ABỌ AVỌ 13

Eme O Gba Omai Họ nọ Ma re Ru re Ma Sai Ru Ọghẹnẹ Eva Were?

Whaha oware uyoma. 1 Ahwo Kọrint 6:9, 10

Eware nọ Ọghẹnẹ o mukpahe—uji-utho, idieda-thomawa, ogbẹrehọ imu egaga, ohọre, emema nọ a rẹ lẹ se, gbe edhọgọ

Ma te you Jihova, ma re ru eware nọ o mukpahe he.

Jihova ọ gwọlọ nọ ma tho uji hi, da idi vrẹ oma ha, hayo rehọ imu egaga ogbẹrehọ họ.

Ọghẹnẹ o mukpahe ohwo-okpe, eva-ekparọ, gbe uruemu ọzae avọ ọzae hayo aye avọ aye nọ a rẹ wezẹ kugbe. Ọ gwọlọ nọ ma wo uvou-uthethei hayo họre amọfa ha.

Ma rẹ gọ emedhọ hayo ru iruẹru-imizi vievie he.

Ahwo nọ a bi ru eware iyoma a te ruọ Aparadase otọakpọ nọ ọ be tha na ha.

Ru oware uwoma. Matiu 7:12

Eware nọ e rẹ were Ọghẹnẹ—uyoyou nọ ma re dhesẹ kẹ amọfa, ohwo oruọzewọ nọ ma rẹ jọ, gbe amọfa nọ ma rẹ rọvrẹ

Re ma sai ru Ọghẹnẹ eva were, ma rẹ daoma raro kele iei.

Dhesẹ uyoyou kẹ amọfa ẹkwoma ohwo owowou nọ whọ rẹ jọ jẹ hai ru ọghọ.

Jọ ohwo oruọzewọ.

Wo ohrọ-oriọ gbe erọvrẹ.

Isẹri Jihova ivẹ nọ e be ta usi uwoma kẹ ọzae jọ

Vuẹ amọfa kpahe Jihova gbe idhere riẹ.—Aizaya 43:10.