UWUHRẸ AVỌ 7

Ẹgbagba avọ Imuẹro Ẹme

Luk 1:3

OWARE NỌ O GWỌLỌ: Fodẹ oware nọ a rẹ sai fievahọ nọ u re fiobọhọ kẹ enọ e be gaviezọ kẹ owhẹ riẹ oware nọ u kiehọ.

EPANỌ A RE RO RU EI:

Kiẹ ebe gbe eware efa nọ a rẹ sai fievahọ. Rehọ eme ra no Ẹme Ọghẹnẹ ze, se noi ze ovavo ẹsikpobi nọ o tẹ lọhọ. Whọ tẹ gwọlọ ta kpahe eware otokiẹ-egbaeriariẹ, usi jọ, oware nọ o via, hayo oware ofa rọ kẹ imuẹro ẹme nọ whọ be ta, nabe kiẹ ziezi re whọ ruẹ sọ a rẹ sai gine fievahọ oria nọ ovuẹ na u no ze gbe inọ ere ẹme na ọ gbẹ rrọ enẹna.
Rehọ evuẹ lahwe evaọ oghẹrẹ nọ u fo. Fa otọ ikereakere evaọ oghẹrẹ nọ o rọwokugbe eme nọ e wariẹ oria Ebaibol yena họ, ugogo ovuẹ nọ o dhẹ Ebaibol na duwu, gbe ebe “ọrigbo nọ a re fievahọ nọ o wo areghẹ na.” (Mat. 24:45) Rehọ ovuẹ no ebe nọ amọfa a kere ze evaọ oghẹrẹ nọ o rọwokugbe eme efa nọ i kiekpahe ovuẹ yena evaọ obe yena gbe ẹjiroro nọ ọnọ o kere ovuẹ yena o ro kere iei.

Who bru okpa họ ẹme hayo unu eware nọ a fodẹ hẹ. Yọroma re otẹrọnọ a fodẹ “ahwo jọ” whọ gbẹ ta nọ “ibuobu ahwo” ho, hayo nọ a tẹ ta nọ “evaọ ẹsejọ” whọ gbẹ ta nọ “ẹsikpobi” hi, yọ otẹrọnọ a ta nọ “o rẹ sae via” whọ gbẹ ta nọ “o wọhọ nọ ere o via” ha.
Ta kpahe imuẹro na. Who te se oria ikere jọ hayo rehọ ẹme no oria jọ ze no, rọ areghẹ nọ enọ hayo kẹ ọtadhesẹ jọ nọ u re fiobọhọ kẹ ahwo nọ a be gaviezọ kẹ owhẹ na re ae ọvo a vuhu uwuhrẹ na mu kẹ omarai.