UZOẸME UKE NA | KỌ OHWO O TE WHU—Ọ SAE WARIẸ ZIHE ZIỌ UZUAZỌ?
Eme Ọ rẹ Via nọ Ohwo O te Whu No?
“Me je roro nọ eria esa ohwo o re kpohọ nọ o te whu no: odhiwu, ehẹle, hayo pọgatri. Mẹ riẹ nọ me woma te ohwo nọ o re kpohọ odhiwu hu, yọ me yoma te ohwo nọ o re kpohọ ehẹle gbe he. Rekọ mẹ nwane riẹ oware nọ o rẹ via kẹ ohwo evaọ pọgatri hi. Mẹ re jọ Ebaibol na se ku oware utioye vievie he. Atanọ atanọ ọvo me ro yo kpahe ẹme ọyena.”—Lionel.
“A wuhrẹ omẹ nọ ahwo kpobi a re kpohọ odhiwu nọ a te whu no, rekọ u mu omẹ ẹro ghele he. Me je roro nọ ohwo o te whu no yọ u re no, inọ ahwo nọ a whu no a gbe wo ẹruore ọvo ho.”—Fernando.
Kọ who roro kpahe onọ nana no ẹdẹjọ inọ, Eme ọ rẹ via kẹ ahwo nọ a whu no? Kọ iyoyou mai nọ i whu no na, a rrọ oria jọ be reoja? Kọ ma te wariẹ ruẹ e rai ẹdẹjọ? Otẹrọnọ ma te wariẹ ruẹ e rai, ẹvẹ onana o sai ro mu omai ẹro?’ Iviena roro kpahe oware nọ Ebaibol na o gine wuhrẹ. Joma kake ta kpahe oware nọ Ebaibol na ọ rọ uwhu dhesẹ. Kẹsena ma vẹ te ta kpahe ẹruore nọ Ebaibol na ọ kẹ.
Eme ọ rẹ via kẹ ahwo nọ a whu no?
UYO NỌ EBAIBOL NA Ọ KẸ: “Keme enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho, a gbe wo osa ovo ho; keme a thọrọ ẹro no. Oware kpobi nọ whọ gwọlọ rehọ obọ ra ru, rehọ ogaga ra kpobi ru ei; keme iruo hayo iroro hayo eriariẹ hayo areghẹ e rọ eva ẹri hi, obonọ who bi kpohọ na.”a—Ọtausiuwoma Na 9:5, 10.
Uki yọ oria nọ a re ki ahwo nọ a whu no fihọ gheghe; yọ u dhesẹ oria nọ ohwo ọ rẹ gbẹ jọ riẹ oware ovo ho. Ẹvẹ Job o rri uki? Kareghẹhọ nọ eware kpobi nọ o wo makọ emọ riẹ kpobi i whu ku ei evaọ ẹdẹvo, kẹsena ẹyao oyoma jọ ọ tẹ jẹ tehe iẹe. Fiki oyena Job ọ tẹ jẹ lẹ Ọghẹnẹ inọ: “O, eme who gbe si omẹ no obọ Ẹriwi hi [hayo “ehẹle,” wọhọ epanọ efafa Ebaibol Catholic Douay o fi rie họ], re who si omẹ no.” (Job 1:13-19; 2:7; 14:13) O rrọ vevẹ inọ Job o rri uki fihọ oria nọ a rẹ jọ reakọ họ wọhọ ẹsenọ etẹe uye riẹ o te jọ mae ga. Ukpoye o rri rie wọhọ oria nọ uye riẹ u ti jo serihọ.
Edhere ọfa jọ ọ riẹ nọ ma sai ro wuhrẹ kpahe oware nọ o rẹ via kẹ ahwo nọ a whu no. Ma sae ruẹ ikuigbe ẹkparomatha eree soso evaọ Ebaibol na.—Rri ẹkpẹti na “Ikuigbe Ẹkparomatha Eree nọ E Rrọ Ebaibol Na.”
Ohwo ọvuọvo evaọ usu ahwo yena nọ a kpare ze nọ o gbiku kpahe odhiwu nọ ọ jọ wowoma hayo erae ehẹle nọ e jẹ to, ọ riẹ hẹ. O hae jọnọ ahwo nọ a kpare ze na a gine kpohọ eria yena, kọ a gbẹ hae vuẹ ahwo eware nọ a jọ obei ruẹ? Kọ a gbẹ hai kere eware yena fihọ Ebaibol na? Rekọ ma jọ Ebaibol na ruẹ oware utioye ovo ho. Imaree yena soso a gbiku oware utioye ovo ho. Fikieme? Fikinọ okenọ a whu no, a gbẹ riẹ oware ovo ho, a wọhọ ahwo nọ a jọ owezẹ. Uzẹme riẹ họ, Ebaibol na ọ rehọ uwhu dhesẹ owezẹ. Wọhọ oriruo, Ebaibol o dhesẹ nọ Devidi avọ Stivin a kie ruọ owezẹ.—Iruẹru Ikọ 7:60; 13:36.
Kọ ẹruore vẹ ahwo nọ a whu no a wo? Kọ a sae rọwo ai no owezẹ nana ze?
a Evaọ Ebaibol ọ New World Translation of the Holy Scriptures na, ẹme na “ẹri” hayo uki yọ ẹme Hibru nọ a re se “Sheol” gbe ọrọ Griki nọ a re se “Hades.” Efafa Ebaibol jọ a se rie “ehẹle,” rekọ uwuhrẹ na inọ ehẹle yọ oria nọ ahwo nọ a whu no a rẹ jọ reakọ o rrọ Ebaibol na vievie he.