Abọ 2—Otọakpọ nọ U Wo Ufuoma no Uye Oruẹ
1, 2. Didi iroro oghẹrẹ sa evẹ ahwo buobu a wo?
DEDE, ima ahwo wariẹ akpọ na soso họ a wo iroro oghẹrẹ sa. A ruẹ obaro ugbunu kẹ ohwo akpọ. A ta nnọ kẹle na evaọ obotọ akpọ obonẹ akpọ na o ti wo ufuoma no emuemu gbe uye riẹriẹriẹ. A wo imuẹro nnọ kẹle na a re ti voro eyoma no a vẹ te rehọ akpọ kpokpọ ro mu. A tubẹ ta re nnọ otọhotọ ọrọ akpọ kpokpọ ọnana dede a bi ru ei enẹna!
2 Ahwo nana a rọwo nọ akpọ kpokpọ na o ti wo ufuoma no ẹmo, eva-ega, ethube, ẹdhoguo-okienyẹ, gbe uvuhu. Ọ te jọ akpọ nọ ọ kare ẹyao, uweri, irui, gbe uwhu dede. Evaọ oke oyena ahwo a te rro te ẹgbagba jẹ rria avọ evawere bẹdẹ bẹdẹ eva aparadase ọ otọakpọ. Wọhọ oriruo, makọ enọ i whu no dede a te kpare ai ze a ve ti je wo uvẹ ọ ẹria ebẹdẹ bẹdẹ!
3, 4. Fikieme ahwo otiọye na a ro fievahọ eriwo rai?
3 Kọ eriwo obaro ọnana ewezẹ gheghe, iroro ifofe gheghe? Ajo, vievie. O wo otọhotọ riẹ fihọ ẹrọwọ nọ o dọmu nnọ Aparadase ọnana nọ ọ be tha na oware ovuovo o rẹ sae whaha iẹe he. (Ahwo Hibru 11:1) Fikieme u je mu ai ẹro te ere? Keme Ọmemama oride ọrọ ehrugbakpọ na ọ yeya riẹ no.
4 Rọ kpahe eya Ọghẹnẹ, enẹ Ebaibol na e ta: “Eware iwoma kpobi nọ Ọnowo na [“Jihova,” NW ] Ọghẹnẹ rai ọ yeya kẹ owhai na o ru rai gba re, ovo u fi rie abọ kie he; ai kpobi i ru gba re.” “Ọghẹnẹ ọ wọhọ ohwo ho, nọ ọ rẹ ta ọrue . . . Kọ ọ ta no, o gbe ru ei? Hayo nọ ọ tẹ ta no, o gbe ru ei gba?” “Ọnowo [“Jihova,” NW ] Ọgbaẹmo na ọ bọwo ehao no nọ: ‘Epanọ mẹ ma fihọ, ere o te jọ; yọ epanọ mẹ jiroro, ere o te via.’ ”—Joshua 23:14; Ikelakele 23:19; Aizaya 14:24.
5. Didi enọ i fo nọ a rẹ kẹ iyo rai?
5 Otẹrọnọ ẹjiroro Ọghẹnẹ họ re o ru otọakpọ na fihọ aparadase nọ o kare uye, eme ọ jẹ kẹ eware iyoma uvẹ re e tubẹ rehọ oma via evaọ oke ọsosuọ dede? Eme ọ jẹ hẹrẹ te ikpe idu ezeza rri te enẹna re ọ tẹ kpọ eware nọ e thọ vi? Kọ ikpe-egba eyena erọ uye oruẹ na i dhesẹ nnọ Ọghẹnẹ ọ be ghinẹ daezọ mai ha, hayo kọ ọ be tubẹ rria dede he?