Enọ nọ Ahwo Isiuru A rẹ Nọ Ẹsikpobi

Otẹrọnọ Ọghẹnẹ yọ uyoyou, eme jabọ ọ jẹ kuvẹ kẹ emuemu?

ỌGHẸNẸ ọ kuvẹ kẹ emuemu, yọ ima ahwo buobu evaọ akpọ na a be rọ emuemu wholo. Wọhọ oriruo, a re fiemo, gbolo ebọmbo fihọ emọ, raha otọakpọ na, jẹ wha ohọo ze. Ima ahwo buobu a re vovo a ve wo ẹyao ọta irue, a re bruẹnwae a vẹ mọ ẹyao nọ igberẹ-ibro e rẹ wha ze, a rẹ didi vrẹ oma, edhẹ rai o ve si dhẹgo no, gbe eware efa. Oghẹrẹ ahwo otiọye na a ghinẹ gwọlọ nọ emuemu o kuhọ họ. A gwọlọ nọ a si uye nọ u re noi ze na no ọvo. Okenọ a te bi vu oware nọ a kọ, a ve bo nọ, “Mẹ ọvo ọ rrọ akpọ na?” A vẹ fo Ọghẹnẹ, wọhọ epanọ Itẹ 19:3 ọ ta: “Okenọ ugheghẹ ohwo u su rie thọ no, o ve muofu kpahe ỌNOWO na.” Yọ Ọghẹnẹ ọ tẹ da eyoma oruo rai ji, a vẹ go nnọ a mi rai ufuoma rai no!

Ugogo ẹjiroro nọ Jihova ọ rọ kuvẹ kẹ emuemu họ re ọ kuyo kẹ use-abọ Setan. Setan Ẹdhọ na ọ ta nọ Ọghẹnẹ ọ rẹ sai fi ahwo họ otọakpọ nọ e rẹ gọ E evaọ otọ odawọ họ. (Job 1:6-12; 2:1-10) Jihova ọ kẹ Setan uvẹ re ọ gbẹ jọ uzuazọ re ọ sai dhesẹ uzẹme ehaise riẹ na. (Ọnyano 9:16) Setan ọ gbẹ be rehọ okpẹtu ze enẹna, re o ku ahwo rẹriẹ no Ọghẹnẹ, nọ ọ be daoma ru ehaise riẹ gba na. (Eviavia 12:12) Ghele na, Job o kru ẹgbakiete riẹ. Ere Jesu o ru re. Ileleikristi uzẹme a bi ru ere nẹnẹ.—Job 27:5; 31:6; Matiu 4:1-11; 1 Pita 1:6, 7.

Mẹ hae gwọlọ rọwo aparadase otọakpọ nọ ahwo a te jọ rria bẹdẹ bẹdẹ, rekọ oyena o sae te via?

Ere Ebaibol na ọ rehọ e riẹ hẹ. A rẹ kaki se eme na gboja ha keme ohwo-akpọ ọ ruẹ eware iyoma te ikpe udhusoi buobu no. Jihova ọ ma otọakpọ na ọ tẹ ta kẹ ahwo-akpọ re a yẹ ahwo okiẹrẹe vọe enọ e te rẹro te ekakọ gbe erao riẹ a vẹ jẹ sẹro erru riẹ viukpenọ a rẹ raha iẹe. (Rri ẹwẹ-obe avọ 12 gbe 17.) Ukpenọ a re wo avro kpahe Aparadase ọyena nọ a yeyaa riẹ na, uyero ọkora inẹnẹ na họ onọ u re serihọ fikinọ u yoma hrọ. Aparadase o ti nwene iei.

Didi uyo mẹ rẹ rọ kẹ ahwo nọ i bi se ẹkoko inọ Ebaibol na yọ ọrue gbe nnọ o rọwo kugbe otokiẹ-eriariẹ hẹ?

Ẹrọwọ nọ a re fihọ eyaa enana orọnikọ ogbẹrọwọ họ. “Epanọ ohwo o yo ere ọ rẹ rọ rọwa.” Ẹkwoma ewuhrẹ Ẹme Ọghẹnẹ, ereghẹ riẹ i ve ti dhesẹ oma via viere, ẹrọwọ ọ vẹ rro.—Ahwo Rom 10:17; Ahwo Hibru 11:1.

Eware anwae ikuigbe Ebaibol buobu nọ a tọ n’otọ ze e kẹ imuẹro ẹgbagba ikuigbe Ebaibol na. Uvi otokiẹ-eriariẹ e rọwo kugbe Ebaibol na. Izẹme nọ e rrọ obotọ na e jọ Ebaibol na oke krẹkri no taure ewena-isukulu a tẹ te kiẹ ae via: etoke unọjọ u tọjọ nọ a rọ ma otọakpọ na, inọ akpọ na ọ rrọ gheghelie, inọ ọ rrọ ehru uvumọ oware he, inọ evra e rẹ kwa no ofẹ jọ kpohọ ofẹ ofa.—Emuhọ, uzou 1; Aizaya 40:22; Job 26:7; Jerimaya 8:7.

Ogaga ẹzi nọ a ro kere Ebaibol na u dhesẹ oma via ẹkwoma eruẹaruẹ nọ i rugba. Daniẹl ọ ruẹaro kpahe ẹvaze gbe ekie egaga akpọ, jegbe oke nọ Mesaya na ọ te rọ tha a ve je kpei. (Daniẹl, uzou avọ 2, 8; 9:24-27) Nẹnẹ na, eruẹaruẹ efa i bi rugba, enọ i dhesẹ oke onana wọhọ “edẹ urere” na. (2 Timoti 3:1-5; Matiu, uzou avọ 24) Ohwo o wo ogaga nọ ọ rẹ rọ riẹ kpahe obaro na ere he. (Aizaya 41:23) Whọ tẹ gwọlọ imuẹro efa, rri ebe na The Bible—God’s Word or Man’s? gbe Is There a Creator Who Cares About You?, enọ Watchtower Bible and Tract Society, a kporo.

Ẹvẹ mẹ sae rọ kẹ iyo kpahe Ebaibol na?

Who re wuhrẹ Ebaibol na je roro kpahe iẹe hrọ, whọ vẹ jẹ lẹ kẹ ẹzi Ọghẹnẹ re ọ kpọ owhẹ. (Itẹ 15:28; Luk 11:9-13) Ebaibol na ọ ta nọ: “Otẹrọnọ areghẹ ọkare owhai ọjọ, jọ ọ yare Ọghẹnẹ nọ ọ rẹ kẹ ọvọvẹ nọ rẹ gboke he, a rẹ te rehiẹe kẹe.” (Jemis 1:5) Ofariẹ, ebe nọ a re ro wuhrẹ Ebaibol na nọ i fo ese e riẹ. O gwọlọ obufihọ mi amọfa, wọhọ epanọ Filip o wuhrẹ kugbe ohwo Ẹtiopia na. (Iruẹru 8:26-35) Isẹri Jihova a bi ru iwuhrẹ Ebaibol ọvọvẹ kugbe ahwo nọ a wo isiuru evaọ iwou rai. Whọ sae yare uwuhrẹ na mi ai.

Fikieme ibuobu e jẹ wọso Isẹri Jihova jẹ be ta kẹ omẹ nọ a wuhrẹ kugbe omẹ hẹ?

Ọwọsuọ ọ jọ kẹ usiuwoma ota Jesu, yọ ọ ta nọ a te wọso ilele riẹ re. Okenọ ewuhrẹ Jesu o mu ahwo jọ urirẹ, otu ọwọsuọ egagọ a te dueme họ nọ: “A su owhai thọ re? Kọ okpohwo jọ ọ rọwo riẹ manikọ ohwo otu Farisi jọ?” (Jọn 7:46-48; 15:20) Ibuobu nọ e be hrẹ owhẹ nọ Isẹri na a wuhrẹ obe kugbe owhẹ hẹ na a riẹ kpahe omai hi hayo a mukpahe omai gheghe. Jọ Isẹri na a wuhrẹ kugbe owhẹ re whọ ruẹ sọ otoriẹ ra kpahe Ebaibol na u ti viharo ho.—Matiu 7:17-20.

Fikieme Isẹri na i je weze bru ahwo nọ i wo egagọ obọ rai?

Evaọ onana uruo a bi lele oriruo Jesu. Ọ nya bru ahwo Ju na. Ahwo Ju na a wo egagọ rai, rekọ evaọ idhere buobu a nyasiọ Ẹme Ọghẹnẹ ba no. (Matiu 15:1-9) Erẹwho kpobi i wo oghẹrẹ egagọ jọ, makọ enọ i se oma rai Ileleikristi hayo enọ e rrọ Ileleikristi hi. O r’oja gaga k’ahwo re a wo iwuhrẹ nọ e rọwo kugbe Ẹme obọ Ọghẹnẹ, yọ oma nọ Isẹri na a be dawo re a fiobọhọ kẹ ae ru onana yọ edhesẹ uyoyou ọrivẹ.

Kọ Isẹri na a rọwo nnọ egagọ rai ọvo họ onọ u woma?

Ohwo kpobi nọ o kru egagọ riẹ ga o re roro nọ oye họ ogbagba na. Ogbẹrọ ere he, kemejabọ o je kuomagbe egagọ yena? A hrẹ Ileleikristi nọ: “Jawo koware koware; yọrọ onọ uwoma ga.” (1 Ahwo Tẹsalonika 5:21) U re mu ohwo ẹro nọ ọ rẹ sae jọ Ikereakere na duku orọwọ riẹ, keme ẹrọwọ ọvuọvo ọ riẹ. Ahwo Ẹfẹsọs 4:5 o k’imuẹro onana, nọ o t’ẹme te “Ọnowo ọvo, orọwọ ovo, ame-ọhọ ọvo.” Jesu ọ rọwo kugbe eriwo odode ọgbọna ha inọ idhere buobu, egagọ buobu, e riẹ nọ i bi su kpohọ esiwo. Ukpoye, ọ ta nọ: “Edhere nọ a re ro kpohọ uzuazọ ọ rẹ kekeke, unu riẹ ọ rẹ hwahwa, enọ e ro riẹ e rẹ kakao.” Isẹri Jihova a rọwo nọ a duku edhere na no. Ogbẹrọ ere he, a hae gwọlọ egagọ ọfa.—Matiu 7:14.

Kọ a rọwo nọ ae ọvo a rẹ te zọ?

Ijo. Ima ahwo buobu nọ e rria ikpe buobu nọ e vrẹ no nọ e jọ Isẹri Jihova ha a ti zihe ze evaọ ẹkparomatha a ve ti wo uvẹ uzuazọ. Ibuobu jọ nọ e rrọ uzuazọ enẹna a te j’owọ dikihẹ kẹ uzẹme na gbe ẹrẹreokie evaọ obaro taure ‘uye ulogbo’ na o tẹ te lahwe, yọ a ti siwi ai. Ofariẹ, Jesu ọ ta nọ ma re gu ohwohwo ẹdhọ họ. Okafe ọvo ma re rri; Ọghẹnẹ o re rri udu na. O re rri gbagba je guẹdhọ avọ ohrọ. O mu ẹdhoguo họ obọ Jesu no, orọnikọ abọ mai hi.—Matiu 7:1-5; 24:21; 25:31.

Didi azọhọ ugho a re rẹro riẹ mi enọ i bi kpohọ iwuhrẹ Isẹri Jihova?

Kpahe azọhọ ugho, Pọl ukọ na ọ ta nọ: “Ohwo o re ru wọhọ epanọ o roro evaọ eva riẹ, o jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” (2 Ahwo Kọrint 9:7) Eva Egwa Uvie na gbe egwa ikokohọ erọ Isẹri Jihova, a re mi azọhọ họ. A fi itehe họ re o ruẹse lọhọ kẹ ohwo nọ ọ gwọlọ ru azọhọ-unevaze kpobi. Uvumọ ohwo ọ rẹ riẹ oware nọ ọdekọ o fihọ hayo sọ o tube fihọ dede he. Ahwo jọ a re fihọ vi edekọ; ahwo jọ a rẹ sae kẹ uvumọ oware he. Jesu o dhesẹ eriwo ọgbagba na evaọ okenọ ọ t’ẹme kpahe etehe unevaze eva etẹmpol evaọ Jerusalẹm gbe enọ i bi ru azọhọ na: Ẹgba ohwo nọ ọ sae rọ kẹ gbe ẹzi nọ a rọ kẹ na họ oware nọ o r’oja, orọnikọ unuigho nọ ọ kẹ na ha.—Luk 21:1-4.

Me te zihe ruọ omọvo Isẹri Jihova, kọ a re rẹro nọ mẹ ta usiuwoma wọhọ epanọ a be ta na?

Okenọ ohwo ọ tẹ vọ avọ eriariẹ Aparadase otọakpọ nọ a yaa na evaọ otọ Uvie Kristi na, ohwo ọ rẹ gwọlọ ghale eriariẹ na kugbe amọfa. Who ti ru ere re. O rrọ emamọ usi!—Iruẹru 5:41, 42.

Enẹ oruo yọ edhere obọdẹ jọ nọ who re ro dhesẹ nọ whẹ yọ olele Jesu Kristi. Evaọ Ebaibol na, a se Jesu “oruọzewọ gbe oseisẹri uzẹme na.” Okenọ ọ jọ otọakpọ ọ jẹ ta usiuwoma, inọ: “Uvie odhiwu o kẹle ino,” yọ o vi ilele riẹ vrẹ re a ru epọvo na. (Eviavia 3:14; Matiu 4:17; 10:7) Uwhremu na, Jesu o j’uzi kẹ ilele riẹ nọ: “Fikiere wha wuhrẹ ahwo erẹwho kpobi, . . . wha wuhrẹ ai.” Ọ tẹ jẹ ruẹaro nọ taure urere na o tẹ te ze, “a rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi.”—Matiu 24:14; 28:19, 20.

Idhere buobu e riẹ nọ a re ro whowho emamọ usi na. Ẹmeọta gheghe kugbe egbẹnyusu gbe egbẹrioma o re rovie edhere nọ a re ro ru ere. Ejọ i re ru ei ẹkwoma ileta i kere hayo ẹkwoma ifonu. Ejọ i re vi ebe nọ a riẹ nọ e te were egbẹrioma jọ gaga se ai. Re uvumọ ohwo ọ siọ ae ẹro ba evo, Isẹri na a rẹ rọ ovuẹ na n’ẹthẹ ruẹthẹ.

Ebaibol na o wo uzizie oruọruọ onana: “Ẹzi na avọ Ọva na a tẹ ta nọ, ‘Nyaze.’ Jọ ohwo nọ o yo kpobi ọ za nọ, ‘Nyaze.’ Whai e nọ uruame u re kpe a nyaze obonẹ re wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.” (Eviavia 22:17) Ẹtakẹ amọfa kpahe otọakpọ Aparadase gbe eghale riẹ a re ru ei nevaze, no udu nọ o vọ avọ isiuru re a ghale emamọ usi na ze.

U mu omai ẹro nọ who wo enọ efa kpahe Isẹri Jihova gbe orọwọ rai. Ẹsejọhọ eme jọ e rẹ sae wha avro ze. Ma gwọlọ k’iyo enọ ra. Uvẹ o jọ ibroshọ nana bu tere he, fikiere ma zizie owhẹ re whọ nọ mi Isẹri na evaọ ẹwho ra. Whọ rẹ sai ru ere evaọ iwuhrẹ Ọgwa Uvie na hayo a te weze ziọ uwou ra. Hayo whọ sai vi enọ ra bru Watch Tower, evaọ oria adrẹse nọ o fo evaọ obotọ na.