Enọ Ahwo Nọ A S’ebe

Otẹrọnọ ọzae avọ aye hayo ọmọzae avọ ọmọtẹ nọ e rrọ orọo ho a kiẹzẹ uwou ovona asohẹrioke evaọ uyero nọ u fo ho, kọ a rẹ sae ta nọ a thọ uzi nọ a rẹ rọ rehọ ae guẹdhọ?a

Ee, ogbẹrọnọ oware ikpregede jọ o wha riẹ ze he, a rẹ rehọ ogbẹgwae ẹdhoguo mu nọ a tẹ ruẹ nọ imuẹro egaga e riẹ nọ u dhesẹ nọ a gbe-ọfariẹ.​—1 Kọr. 6:18.

Ugboma ekpako na o rẹ romatotọ kiẹ uyero ovuovo riwi re a riẹ sọ u fo re a rehọ ogbẹgwae ẹdhoguo mu. Wọhọ oriruo: Kọ imava na yọ ahwo nọ a be nya usu orọo? Kọ a kẹ rai ohrẹ no vẹre kpahe oghẹrẹ nọ a bi ru kugbe ohwohwo? Didi iyero e wha riẹ ze nọ a ro kiẹzẹ uwou ovona asohẹrioke? Kọ a ma omaa riẹ kpahotọ vẹre? Kọ u wo oware jọ nọ a hae sai ru kpahe iẹe, manikọ oware ikpregede jọ o wha riẹ ze, wọhọ, oware nọ a rẹro riẹ hẹ nọ o via, hayo oware idudhe jọ dẹẹ o wha riẹ ze nọ o rọ gba ae họ nọ a re kiẹzẹ uwou ovona asohẹrioke? (Ọtausi. 9:11) Oghẹrẹ vẹ a ro kiẹzẹ? Nọ orọnọ uyero ovuovo o sai wo ohẹriẹ na, eware efa e sae jariẹ nọ ekpako na a re roro kpahe.

Nọ a tẹ riẹ oware nọ o via no dẹẹ, ugboma ekpako na a rẹ jiroro sọ u fo re a rehọ aimava na guẹdhọ fiki oware nọ a ru na.