Epanọ Ma Sai ro Wo Onaa Ziezi Evaọ Usiuwoma Ota—Enọ E Gwọlọ Bru Ẹme Dhe Omai Unu

Oware nọ U ro Wuzou: Dae rehọ iẹe nọ whọ riẹ kpahe okpẹtu jọ nọ ọ be tha. Ohwo nọ ọ dhẹ hẹ ọ te seba ewhu hu. Nọ whọ nyae vuẹ ohwo jọ nọ ọ be rria kẹle owhẹ kpahe okpẹtu na, o te bru ẹme dhe owhẹ unu inọ o wo uvẹ hẹ. Kọ whọ te nwane nya siọ ohwo na ba ere? Vievie. Epọvo na re, ahwo buobu a be gaviezọ kẹ omai hi dede nọ usiuwoma na u re siwi uzuazọ rai. O sae jọnọ obọ rai o rrọ oware evaọ oke nọ ma rọ nya. (Mat. 24:37-39) Hayo a gwọlọ gaviezọ kẹ omai hi keme a yo eme atanọ jọ kpahe omai. (Mat. 11:18, 19) A rẹ sai roro nọ egagọ mai avọ egagọ efa nọ i bi wuhrẹ iwuhrẹ ethọthọ epọvo na. (2 Pita 2:1, 2) Otẹrọnọ ohwo nọ ma nyae ta usiuwoma kẹ ọ gwọlọ yo ho, ma rẹ nwane nya siọ ohwo na ba ere he.

Epanọ A re ro Ru Ei:

Nọ whọ tẹ be ruẹrẹ oma kpahe kẹ usiuwoma n’uwou ruọ uwou, rọ omoke jọ roro kpahe oghẹrẹ nọ ahwo a sai ro bru ẹme dhe owhẹ unu, gbe ẹme nọ whọ te ta.
Otẹrọnọ ohwo nọ ma nyae ta usiuwoma kẹ o bru ẹme dhe omai unu, daoma rọ areghẹ ruọ ẹme na. Whọ sai jiri ei rọkẹ ẹme nọ ọ ta na. Wọhọ oriruo, ohwo na ọ tẹ ta nọ o wo egagọ riẹ, whọ sae ta nọ, “Ẹme nọ whọ ta na u dhesẹ nọ who se egagọ Ọghẹnẹ gboja.” Ẹsejọ, nọ whọ tẹ rọwo kugbe ohwo na, ọ sae k’owhẹ uvẹ ta ẹme nọ whọ wha ze. Wọhọ oriruo, ọ tẹ ta nọ o wo uvẹ hẹ, whọ sae ta nọ: “Mẹ ginẹ ruẹ nọ obọ ra o rrọ oware, rekọ taure mẹ tẹ te nyavrẹ jomẹ k’owhẹ obe nana.” Ọ tẹ ta nọ ọ gwọlọ yo ho, whọ sae nọe nọ, “Kọ ẹme Ebaibol whọ gwọlọ yo ho manikọ ẹme egagọ?”
Wo orimuo. Kareghẹhọ nọ Jihova ọ rẹ gba ohwo ọvo họ yo ẹme riẹ hẹ. (Izie. 30:19) Ohwo kpobi o wo udu nọ ọ rẹ rọ salọ sọ ọ rẹ gọ Ọghẹnẹ hayo ọ rẹ gọe he. (Gal. 6:5) Otẹrọnọ ohwo jọ ọ gwọlọ yo usiuwoma na vievie he, ma rẹ nya siẹe ba. Nọ ma tẹ kẹ ohwo na adhẹẹ nọ u fo, onana o sai ru ei gaviezọ kẹ oniọvo ọfa nọ ọ te nya bru rie.—1 Pita 3:15.

Dao Onana Evaọ Amara Na:

Whọ tẹ nyaku ohwo nọ ọ jẹ gwọlọ yo ho, nọ wha te no oria riẹ no, whẹ avọ oniọvo nọ wha gbẹ rrọ usiuwoma na wha ta oghẹrẹ nọ o mai woma nọ whọ hae rọ ta ẹme kẹe.