Epanọ Eva E Sae rọ Ginẹ Were Owhẹ

1. Oghẹrẹ vẹ Ọghẹnẹ ọ ma omai, kọ fikieme oyena o rẹ rọ lẹliẹ eva were omai?

A TẸ ta nọ eva e be ginẹ were ohwo orọnikọ eva e tẹ were iẹe ẹmẹsejọ, u ri kri hi na eva e vẹ dhae he. Ukpoye, ohwo otiọye na yọ ohwo nọ eva e be were ẹsikpobi. Ẹvẹ ma rọ ta ere? Jesu ọ kẹ uyo onọ yena oke nọ ọ jẹ kẹ ovuẹ obọ ugbehru na. Ọ ta nọ: “Eva e were enọ e riẹ nọ u fo re a riẹ Ọghẹnẹ.” (Mat. 5:3) Jesu ọ riẹ nọ Ọghẹnẹ ọ ma ohwo-akpọ evaọ oghẹrẹ nọ ọ rẹ rọ daoma re ọ riẹe jẹ gọe. Yọ nọ orọnọ Jihova họ “Ọghẹnẹ evawere na,” ma tẹ be gọe, eva e rẹ ginẹ were omai.—1 Tim. 1:11.

2-3. (a) Amono jọ Jesu ọ ta nọ eva e were? (b) Eware vẹ ma te ta kpahe evaọ uzoẹme nana, kọ fikieme o jẹ roja re ma ta kpahe ae?

² Kọ ebẹbẹ mai kpobi i re kuhọ no taure eva e tẹ te were omai? Ijo. Jesu ọ fodẹ oware jọ evaọ oke nọ ọ jẹ kẹ ovuẹ obọ ugbehru na nọ o lẹliẹ omai riẹ ere. Ọ ta nọ “eva e were enọ i bi weri.” O sae jọ nọ a bi weri fiki izi jọ nọ a raha hayo fiki ebẹbẹ jọ nọ i bi te ai. Ọ tẹ jẹ ta nọ “eva e were enọ a bi kpokpo fiki ẹrẹreokie” gbe ahwo nọ a be la “eka” fikinọ a bi lele ọyomariẹ. (Mat. 5:4, 10, 11) Rekọ onọ na họ, kọ eva e sae ginẹ were ohwo nọ eware itieye na e tẹ be via kẹe?

³ Oware nọ Jesu ọ be jọ oria Ebaibol yena wuhrẹ omai na họ, re eva e sae ginẹ were ohwo, orọnikọ eware kpobi e rẹ jọ ziezi tao ho. Rekọ ma rẹ daoma riẹ Ọghẹnẹ, je si kẹle iẹe. (Jem. 4:8) Ẹvẹ ma sai ro ru ere? Ma te jọ uzoẹme nana ta kpahe eware esa nọ ma re ru re eva e sae ginẹ were omai.

HAI WUHRẸ ẸME ỌGHẸNẸ

4. Eme họ oware ọsosuọ nọ ma re ru re eva e sae were omai? (Olezi 1:1-3)

⁴ OWARE ỌSOSUỌ: Re eva e sae were omai, ma re wuhrẹ ẹme Ọghẹnẹ. Te ahwo, te erao a gbẹ re emu hu, a re whu no. Rekọ orọnọ emu ọvo ọ rẹ lẹliẹ ohwo jọ uzuazọ họ. Jesu omariẹ ọ ta ọkpọ ẹme yena. Ọ ta nọ: “Orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ẹkwoma ẹme kpobi nọ o bi no unu Jihova ze.” (Mat. 4:4) Fikiere, kẹdẹ kẹdẹ akpọ na, joma hae romatotọ se Ebaibol na je wuhrẹ iẹe. Eme nọ e riẹe eva e wọhọ emu kẹ omai. Ọso-ilezi na ọ ta nọ: ‘Jọ eva e were ohwo nọ uzi Jihova o rẹ were gaga, yọ o re sei te aso te uvo.’—Se Olezi 1:1-3.

5-6. (a) Eware jọ vẹ ma sae jọ Ebaibol wuhrẹ? (b) Erere vẹ o re te omai nọ ma te bi se Ebaibol?

⁵ Jihova ọ jọ Ebaibol na vuẹ omai obọdẹ eware jọ nọ e rẹ lẹliẹ eva were omai. Ọ vuẹ omai oghẹrẹ nọ ọ gwọlọ nọ akpọ mai ọ rẹ jọ. Ma rẹ jẹ jọ Ebaibol na ruẹ oware nọ ma re ru re ma sae jọ egbẹnyusu riẹ gbe oware nọ ma re ru re ọ sae rọvrẹ omai nọ ma tẹ raha uzi jọ. U te no ere no, ma rẹ jọ Ebaibol na wuhrẹ kpahe emamọ eware nọ Jihova ọ ya eyaa nọ o ti ru kẹ omai evaọ obaro. (Jeri. 29:11) Eware nana nọ ma riẹ na e be ginẹ lẹliẹ eva were omai!

⁶ Emamọ ehrẹ e rrọ Ebaibol na nọ i re fiobọhọ kẹ omai yeri emamọ uzuazọ. Ma te bi gine lele ehrẹ na, eva e rẹ were omai. Nọ eva e gbẹ be were owhẹ hẹ fiki ebẹbẹ nọ e rrọ owhẹ oma, daoma re who se Ebaibol jẹ romatotọ roro didi kpahe oware nọ who se. Jesu ọ ta nọ: “Eva e were enọ i bi yo ẹme Ọghẹnẹ je bi koko iei!”—Luk 11:28.

7. Oghẹrẹ vẹ who re ro se Ebaibol na nọ who je wo erere noi ze ziezi?

⁷ Who te bi se Ebaibol, romatotọ sei re o daruọ owhẹ oma. Joma kẹ oriruo jọ. Dae rehọ iẹe nọ a there obọdẹ emu jọ nọ ọ rẹ were owhẹ gaga. Rekọ fikinọ whọ gwọlọ kpohọ oria jọ vẹrẹ vẹrẹ hayo fikinọ eware buobu e riẹ nọ whọ gwọlọ ru, whọ tẹ rọ ugidi re emu na. Whọ jẹ re kpobi no, whọ tẹ ta nọ, ‘Emu otiọnana yọ emu nọ ohwo ọ rẹ keria romatotọ re. Mẹ re emu na gidi hrọ.’ Epọvo na o rrọ re nọ ohwo ọ tẹ be rọ ugidi se Ebaibol. Emamọ eware nọ e rrọ oria Ebaibol yena e rẹ da ruẹe oma ha. Fikiere, who te bi se Ebaibol, romatotọ sei re o daruọ owhẹ oma, roro didi re o jọ wọhọ ẹsenọ whọ be ruẹ eware nọ who bi se kpahe na je bi yo edo ahwo nọ a be ta ẹme kpahe na. Who te ru ere, isase na e te daruọ owhẹ oma, jẹ lẹliẹ eva were owhẹ.

8. Ẹvẹ “ọrigbo nọ a re fievahọ nọ o wo areghẹ na” o bi ro ru iruo nọ a kẹ riẹ? (Rri ẹme-oruvẹ na re.)

⁸ Jesu ọ rọ “ọrigbo nọ a re fievahọ nọ o wo areghẹ na” mu re ọ hae rọ ẹme Ọghẹnẹ wuhrẹ omai evaọ ẹruoke, yọ ọrigbo na o bi gine wuhrẹ omai ziezi re.b (Mat. 24:45) Ebaibol na ọrigbo na ọ be rehọ eware na kpobi no ze. (1 Tẹs. 2:13) Uwuhrẹ nana o bi fiobọhọ kẹ omai riẹ oghẹrẹ nọ Jihova o re rri eware. Fikiere, u fo re ma hai se Uwou-Eroro Na, Awake! gbe izoẹme nọ e be hae jọ jw.org na. Ma rẹ jẹ ruẹrẹ oma kpahe kẹ ewuhrẹ koka koka. Ma re rri JW Broadcasting^® kamara kamara re. Ma tẹ be romatotọ wuhrẹ ẹme Ọghẹnẹ ziezi, u ti fiobọhọ kẹ omai ru oware avọ ivẹ nọ ọ rẹ ginẹ lẹliẹ eva were omai.

HAI KOKO IZI JIHOVA

9. Re eva e sae ginẹ were omai ziezi, eme họ oware avọ ivẹ nọ ma re ru?

⁹ OWARE AVỌ IVẸ: Re eva e sae ginẹ were omai, u fo nọ ma re koko izi Jihova. Ọso-ilezi na ọ ta nọ: “Eva e were ohwo kpobi nọ ọ be dhozọ Jihova, ọnọ ọ rẹ nya evaọ idhere Riẹ.” (Ol. 128:1) A tẹ ta nọ ohwo ọ be dhozọ Jihova, u dhesẹ nọ ohwo na ọ be kẹe adhẹẹ yọ ọ gwọlọ whaha oware kpobi nọ o rẹ dha Jihova eva. (Itẹ 16:6) Jihova ọ jọ Ebaibol vuẹ omai oware nọ u woma nọ u fo nọ ma re ru gbe onọ u woma ha nọ ma rẹ kẹnoma kẹ. (2 Kọr. 7:1) Ma te bi ru oware nọ o rẹ were Jihova jẹ be kẹnoma kẹ onọ o mukpahe, eva e rẹ were omai.—Ol. 37:27; 97:10; Rom 12:9.

10. Eme obe Ahwo Rom 12:2 o ta nọ ma re ru?

¹⁰ Se Ahwo Rom 12:2. Ohwo ọ tẹ riẹ ọvo nọ Jihova o gine wo udu nọ ọ rẹ rọ ta nọ oware nana u woma, onana u woma ha yọ u re no ho. Ọ rẹ jẹ rọwo nọ izi Jihova e ginẹ rrọ ziezi. Ma kẹ oriruo jọ. Ohwo nọ ọ be dhẹ omoto hayo imotosaikoro ọ riẹ nọ egọmeti o wo udu nọ ọ rẹ rọ ta nọ whọ rẹ dhẹ siawọ vi enẹ hẹ evaọ edhere. Rekọ o sae jọ nọ ohwo na ọ rọwo fihọ uzi nọ egọmeti o fihọ na ha. Fikiere, ọ rẹ dhẹ siawọ vi epanọ uzi egọmeti o ta na. Onana u dhesẹ nọ ma tẹ riẹ izi Jihova no, o jọ etẹe kuhọ họ. U fo nọ ma rẹ jẹ rọwo nọ izi Jihova e ginẹ rrọ ziezi, ma ve je koko ai. (Itẹ 12:28) Nwanọ ere Devidi o rri izi Jihova re. Ọ ta kpahe Jihova nọ: “Who dhesẹ edhere uzuazọ kẹ omẹ. Oghọghọ ulogbo o rrọ aro ra; evawere e rrọ obọze ra bẹdẹ bẹdẹ.”—Ol. 16:11.

11-12. (a) Ma te wo ẹbẹbẹ hayo bi roro iroro, eme ma rẹ yọroma kẹ? (b) Ẹvẹ Ahwo Filipai 4:8 u re ro fiobọhọ kẹ omai nọ ma tẹ be gwọlọ oware nọ ma rẹ rọ kpairoro?

¹¹ Oware jọ o tẹ be kẹ omai uye hayo nọ ma te bi roro iroro, ma sae gwọlọ ru oware jọ nọ ma rẹ rọ kpairoro. Rekọ ma rẹ yọroma re ma siọ eware nọ e rẹ dha Jihova eva ba eru.—Ẹf. 5:10-12, 15-17.

¹² Evaọ ileta nọ Pọl ukọ na o kere se inievo obọ Filipai, ọ ta kẹ ae nọ jọ a hai roro kpahe eware nọ i “kiẹrẹe, . . . nọ e fo, . . . nọ e rẹ wha uyoyou họ aro, [gbe] eware kpobi nọ i woma.” (Se Ahwo Filipai 4:8.) Ma tẹ gwọlọ gaviezọ kẹ ole, rri ifimu, se obe hayo fa igemu, u fo re ma kareghẹhọ ẹme Pọl na dede nọ ọ fodẹ eware yena dẹẹ hẹ. Wariẹ se oria ikere yena kẹ omara, yọ oria kpobi nọ whọ jọ ruẹ ẹme na “eware,” fi ẹme wọhọ “ile,” “ifimu,” “obe,” hayo “igemu” fihọ iẹe. O te lẹliẹ owhẹ viẹro ku ejọ inọ e te dha Jihova eva. Ma rẹ daoma koko izi Jihova evaọ oware kpobi keme i woma wo umuo ho. (Ol. 119:1-3) Ma te bi ru ere, udu u ti brukpe omai hi, yọ ẹsiẹe ma te sai ro ru oware avọ esa nọ o rẹ lẹliẹ eva were omai.—Iruẹru 23:1.

REHỌ EGAGỌ JIHOVA KARO

13. Eme họ oware avọ esa nọ ma re ru re eva e sae ginẹ were omai? (Jọn 4:23, 24)

¹³ OWARE AVỌ ESA: Daoma rọ egagọ Jihova karo kẹ oware ofa kpobi. Jihova ọ ma omai fikiere o te ọnọ ma rẹ gọ. (Evia. 4:11; 14:6, 7) Ma rẹ daoma re ma gọ Jihova evaọ oghẹrẹ nọ ọ gwọlọ. Koyehọ ma rẹ rọ “ẹzi gbe uzẹme” gọe. (Se Jọn 4:23, 24.) Onana u dhesẹ nọ ma rẹ daoma lele oghẹrẹ nọ ẹzi Ọghẹnẹ ọ be kpọ omai rri nọ ma tẹ be gọ Ọghẹnẹ. Oghẹrẹ nọ Ebaibol ọ ta ma rẹ rọ gọe. O tẹ make rọnọ evaọ orẹwho nọ ma be rria, a gwọlọ nọ ma gbẹ gọ Ọghẹnẹ hẹ, ma rẹ gbẹ daoma rọ egagọ Jihova karo ghele. Ma be ta ẹme na, inievo mai nọ a fihọ uwou-odi no fikinọ a be gọ Jihova, a bu vi udhusoi (100) soso.c O make rrọ ere na, inievo na a be daoma gọ Jihova ghele yọ eva e be were ae. A be hae lẹ, se Ebaibol gbe ebe ukoko na, jẹ ta usi uwoma kẹ ahwo kpahe Ọghẹnẹ gbe Uvie riẹ. Nọ a tẹ be wọso omai hayo la omai eka fikinọ ma be gọ Jihova, eva e rẹ were omai keme ma riẹ nọ Jihova ọ rrọ kugbe omai, yọ ọ te hwosa kẹ omai.—Jem. 1:12; 1 Pita 4:14.

IKU ONIỌVO JỌ I DHESẸ NỌ EVA E SAE WERE OMAI GHELỌ EBẸBẸ

14. Eme o via kẹ oniọvo-ọmọzae jọ evaọ obọ Tajikistan, kọ fikieme?

¹⁴ Eware nọ e via kẹ inievo jọ no i dhesẹ nọ, eware esa nọ ma ta kpahe no na, ma te ru ai, eva e rẹ ginẹ were omai ghelọ ebẹbẹ. Joma ta kpahe oware nọ o via kẹ oniọvo-ọmọzae jọ evaọ obọ Tajikistan nọ a re se Jovidon Bobojonov nọ ọ jọ ikpe ikpegbizii. Ọ rọwo nọ ọ rẹ jọ isoja ha. Fikiere evaọ edẹ ene Akpe ọrọ ukpe 2019, a tẹ nyai mu ei evaọ obọ uwou riẹ, a te fi ei họ uwou-odi emerae buobu, yọ a je ru ei wọhọ ogbulegbu. Oware nọ a ru oniọvo na, a jẹ ta ẹme kpahe iẹe evaọ erẹwho efa buobu. A je kpe oniọvo na re ozọ u mu ei, ọ vẹ whobọhọ obe inọ ọ te jọ isoja, o ve je ku ewu isoja họ. A bruoziẹ kpei, a te fi ei họ ega nọ a rẹ jọ kẹe iruo egaga inọ o ru. Uwhremu na, osu orẹwho na ọ tẹ ta nọ a rọvrẹ riẹ no, a te siobọnoi. Evaọ oke nọ eware nana kpobi e jẹ rọ via kẹ oniọvo na, o kru ẹrọwọ riẹ, yọ eva e jẹ were iẹe ghele. Eme o fiobọhọ kẹe? Ọ jẹ hai ru eware nọ e rẹ lẹliẹe kẹle Jihova ziezi.

15. Ẹvẹ Brọda Jovidon ọ jẹ sai ro wuhrẹ ẹme Ọghẹnẹ nọ ọ jọ uwou-odi?

¹⁵ Oke nọ Brọda Jovidon ọ rọ jọ uwou-odi na, ọ jẹ hai wuhrẹ ẹme Ọghẹnẹ. Yọ orọnikọ o wo Ebaibol hayo ebe ukoko na ha. Kọ ẹvẹ ọ jẹ sai ro ru ei? Inievo nọ e jẹ hae wọ emu sei evaọ uwou-odi na, a jẹ hai kere isase okpẹdẹ fihọ ekpa nọ a jẹ rọ wọ emu sei na. Kọ etẹe ọ jẹ hai jo se Ebaibol kẹdẹ kẹdẹ je roro didi kpahe iẹe. Nọ a siobọnoi no, ọ tẹ ta oware nọ u fo nọ ohwo ọ rẹ hai ru taure ẹbẹbẹ ọgaga jọ o te ti tei oma. Ọ ta nọ: “O roja gaga re ohwo ọ hai se Ebaibol gbe ebe ukoko na ẹsikpobi re ọ riẹ Jihova ziezi. Nọ ukpokpoma o jẹ nyaze, ọ vẹ sai kru ẹrọwọ riẹ.”

16. Eme Brọda Jovidon ọ jẹ hai roro kpahe?

¹⁶ Oniọvo na o je koko izi Jihova. Oke nọ ọ jọ uwou-odi na, o je roro ekpehre eware hayo ru eware nọ e rẹ dha Jihova eva ha. Rekọ ọ jẹ hai roro kpahe Jihova gbe eware nọ e rẹ were iẹe. Ọ jẹ hai rri eware nọ Jihova ọ ma. Kohiohiẹ kohiohiẹ nọ ọ tẹ rọwo ze, ọ rẹ gaviezọ kẹ evra nọ e be so ile. Evaọ aso, o re rri isi gbe ọvẹre nọ e rrọ obehru, yọ o re roro kpahe ae. Ọ ta nọ: “Eware nọ Ọghẹnẹ ọ ma nọ mẹ jẹ hai roro kpahe na e jẹ hae lẹliẹ eva were omẹ, yọ o lẹliẹ udu jọ omẹ awọ.” Nọ ma tẹ be hai roro kpahe oghẹrẹ nọ Jihova ọ be rọ rẹrote omai jẹ rọ ẹme riẹ wuhrẹ omai, eva e te were omai, yọ u ti fiobọhọ kẹ omai thihakọ.

17. Eme 1 Pita 1:6, 7 o ta nọ o rẹ via kẹ ohwo, nọ oghẹrẹ ebẹbẹ nọ i te Jovidon na i te tei?

¹⁷ Brọda Jovidon ọ rọ egagọ Jihova karo. Ọ riẹ nọ o roja gaga re o kru ẹrọwọ riẹ. Jesu ọ ta nọ: “Jihova Ọghẹnẹ ra o gba owhẹ họ nọ whọ rẹ gọ, yọ ọye ọvo o gba owhẹ họ nọ who re ru iruo ọrẹri kẹ.” (Luk 4:8) Isoja a gboja kẹ oniọvo na re ọ siọ Jihova ba ẹgọ. Avọ ere ghele na, oniọvo na ọ jẹ hae daoma lẹ ziezi te aso te uvo. Ọ jẹ hae lẹ inọ jọ Jihova o fiobọhọ kẹe re ọ sai kru ẹrọwọ riẹ, o ve je ru oware nọ o rẹ were iẹe. Dede nọ a gboja kẹe, o thihakọ. Yọ enẹna, ẹrọwọ riẹ o ga vi epanọ o jọ no vẹre taure a te ti mu ei, kpei, je fi ei họ uwou-odi. Yọ o be lẹliẹ eva were iẹe gaga.—Se 1 Pita 1:6, 7.

18. Eme ma re ru re eva e hae ginẹ were omai ẹsikpobi?

¹⁸ Jihova Ọghẹnẹ ọ riẹ oware nọ ma re ru re eva e sae ginẹ were omai. Who te bi ru eware esa nọ ma ta ẹme kpahe no na, eva e te ginẹ were owhẹ o tẹ make rọnọ ebẹbẹ egaga jọ dede i zere owhẹ. Whọ vẹ te sae ta ọkpọ ẹme nọ ọso-ilezi na ọ ta inọ: “Jọ eva e were ahwo nọ Jihova ọ rrọ Ọghẹnẹ rai!”—Ol. 144:15.