CHUSBʼAL 01
¿Kam la tulbʼe u Bibliaeʼ alochpeʼ?
Nimal oʼ nukubʼanaj chʼot tziʼ tiʼ u kutiichajileʼ, u kʼaxkʼoeʼ, u kamchileʼ as tukʼ tiʼ uveeʼ sukuvatzbʼen. Nixaan qaama umpajte tiʼ unqʼa kameʼ veʼ nukusaʼbʼela jun qʼii, echeʼ tiʼ kuchukat umaʼj kupuaj o kam la kubʼaneʼ vaʼ chiibʼebʼal tatin ku-familia. Nimal xaol kat taqʼlu kuenta stej veʼ nitzaqʼbʼe u Bibliaeʼ unqʼa chʼot tziʼeʼ veeʼ veʼ nim talcheʼ as nitaqʼ bʼaʼnla chalaj txumbʼal umpajte tiʼeʼ kam qeʼot u kutiichajileʼ jun qʼii. ¿Moj la iloch u Bibliaeʼ umaʼj xaol sakʼuʼl veʼ ootzimal aʼn?
1. ¿Abʼiste kaʼlaj unqʼa chʼot tziʼeʼ veʼ nitzaqʼbʼe u Bibliaeʼ?
Nitzaqʼbʼe u Bibliaeʼ unqʼa chʼot tziʼeʼ veʼ nim talcheʼ, echeʼ unqʼa viʼlaʼ: ¿kam ixeʼt u tiichajileʼ?, ¿kam stiʼ at kuxh oʼ tzitzaʼ?, ¿kam stiʼ nukuxh ipalebʼe unqʼa bʼaʼnla xaoleʼ kʼaxkʼo?, ¿moj at tel tiichajil tiʼ u kamchileʼ?, ¿kam stiʼ mamaʼla kuxh chʼaʼojeʼ ati tul uvaʼ kajayil xaol nisaʼon paz? as ¿kam tuk ipalebʼe u Txʼavaʼeʼ? Nital u Bibliaeʼ vaʼ stuul la kulejkat vitzaqʼbʼebʼal unqʼa chʼot tziʼeʼ vaaʼ, as mamaʼla xaoleʼ veʼ kat chukunya as nichiibʼ veʼt chajaak taʼn unqʼa kameʼ veʼ kat ilejlaʼ.
2. ¿Kam nitulbʼe u Bibliaeʼ kulochpeʼ aqʼal uvaʼ chiibʼebʼal qatineʼ jun qʼii?
Nitaqʼ u Bibliaeʼ bʼaʼnla chalaj txumbʼal. Echkoleʼ, nichus u Bibliaeʼ te unqʼa familiaeʼ tiʼeʼ kam la ibʼaneʼ aqʼal vaʼ chiibʼebʼal tatineʼ. As nital umpajte kam la qulbʼe kupal vatz u xaanchil aamaeʼ as kam la kubʼaneʼ vaʼ achaʼv u qaqʼoneʼ la kunacheʼ. Tul uvaʼ la kuchus unqʼa kameʼ vaaʼ veʼ nital u Bibliaeʼ as tiʼ kaʼtaj tema umpajte. La pal veʼt axh stuul veʼ «jankʼal chit viyol u Tiixheʼ uveʼ tzʼibʼamalkan [...] bʼaʼn tiʼ ichusat oʼ» (2 Timoteo 3:16).
U uʼjeʼ vaaʼ yeʼle vaʼ aʼkoeʼ la bʼambʼel veʼteʼ chʼexel u Bibliaeʼ. Lochel axh tuk ibʼaneʼ tiʼ achusat u Bibliaeʼ. Estiʼeʼ niqal see vaʼ la sikʼle kajayil unqʼa textoeʼ tu Bibliaeʼ veʼ nicheeʼ tu junun unqʼa chusbʼaleʼ as la eel veʼteʼ moj eela niteleʼ tukʼ unqʼa kameʼ veʼ nachuseʼ.
CHUS EEBʼ IMAAS
Qileʼ kam kat tulbʼel u Bibliaeʼ ilochpu kaʼtaj xaol, kam la kubʼaneʼ aqʼal uvaʼ achaʼv isikʼlel u Bibliaeʼ la kunacheʼ as kam veʼt ibʼaʼnil asoj la iloch oʼ umaʼt xaol tiʼ kupal stuul.
3. Niloch oʼ u Bibliaeʼ tiʼ qeʼot u jikla bʼeyeʼ
U Bibliaeʼ echeʼ umaʼl luz veʼ maas iyakʼil as nitolebʼeʼ tiʼ itxijul kubʼey. Niloch oʼ aqʼal uvaʼ bʼaʼn unqʼa kameʼ la kubʼaneʼ as tiʼ qootzit umpajte kam la uch sukuvatzbʼen.
Esikʼleta Salmo 119:105 as yolonotaj ex tiʼ u viʼlaʼ:
¿Kam nikat titzʼa u xaoleʼ veʼ kat tzʼibʼan u salmoeʼ vaaʼ tiʼ u Bibliaeʼ?
¿Kam neetzʼa axh tiʼ u Bibliaeʼ?
4. Nitzaqʼbʼe u Bibliaeʼ unqʼa kuchʼot tziʼeʼ
Kat taqʼ kuenta te umaʼl u ixoj veʼ nitzaqʼbʼe u Bibliaeʼ unqʼa chʼot tziʼeʼ veʼ nikat ibʼanjeʼ ixoj stej. Etilta u VIDEOEʼ as yolonotaj ex tiʼ u viʼlaʼ:
¿Kamaj ichʼot tziʼ u ixojeʼ atike veʼ nitelchʼuʼl tu videoeʼ?
¿Kam kat tulbʼe u chusbʼaleʼ tiʼ u Bibliaeʼ ilochpu ixoj?
Nital u Bibliaeʼ sqej vaʼ la kubʼanaj chʼot tziʼ. Esikʼleta Mateo 7:7 as yolonotaj ex tiʼ u viʼlaʼ:
¿Kamaj achʼot tziʼ ati veʼ la iloch axh u Bibliaeʼ tiʼ itzaqʼbʼeleʼ?
5. La ibʼaneʼ vaʼ achaʼv isikʼlel u Bibliaeʼ la kunacheʼ
Nimal xaol ati veʼ taama chit isikʼlet u Bibliaeʼ as nimal kam nichuskan chajaak stiʼ. Etilta u VIDEOEʼ as yolonotaj ex tiʼ u viʼlaʼ:
¿Kam nititzʼa unqʼa txul aamaeʼ veʼ nitelchʼuʼl tu videoeʼ tiʼ u sikʼle uʼjeʼ?
As, ¿kam nititzʼa veʼt chajaak qʼii tiʼ isikʼlel u Bibliaeʼ?
U Bibliaeʼ nitaqʼ chusbʼal sqej veʼ niyakʼinsan oʼ as nitaqʼ kutxʼebʼoʼm. Esikʼleta Romanos 15:4 as yolonotaj ex tiʼ u viʼlaʼ:
¿Moj nasaʼ ootzit imaas tiʼ u lochbʼaleʼ tukʼ tiʼ u txʼebʼoʼmeʼ veʼ nitaltzi u Bibliaeʼ?
6. La pal oʼ tu Bibliaeʼ tukʼ ilochbaʼl umaʼt xaol
Kuxh nisikʼle umaʼl xaol u Bibliaeʼ sijunal, aal maas bʼaʼn asoj la ichus chajaak u Bibliaeʼ tukʼ ilochbʼal umaʼt xaol. Esikʼleta Hechos 8:26-31 as yolonotaj ex tiʼ u viʼlaʼ:
¿Kam nukusaʼbʼela aqʼal uvaʼ la pal oʼ tu Bibliaeʼ? (Etilta unqʼa versículoeʼ 30 tukʼ 31).
U najeʼ veʼ echen tu Etiopía nikat isaʼbʼela naj lochbʼal aqʼal uvaʼ la pal naj tu Bibliaeʼ. Echat kuxh cheel, nimal xaol achaʼv ipal chajaak tu Bibliaeʼ tukʼ ilochbʼal umaʼt xaol.
UVEEʼ VEʼ NITAL KAʼLAJ XAOL: «Tzʼejo tiempo kuxheʼ asoj la kuchus u Bibliaeʼ».
¿Kam neetzʼa axh? ¿Kam stiʼ?
UVEEʼ VEʼ KAT KUCHUSA
Nitaqʼ u Bibliaeʼ bʼaʼnla txumbʼal sqej veʼ la txakon sqiʼ jun qʼii, nitzaqʼbʼe unqʼa kuchʼot tziʼeʼ veʼ nim talcheʼ as nitaqʼ kulochbʼal tukʼ kutxʼebʼoʼm.
Kam nitul sakʼuʼl
¿Kamaj txumbʼal la uch kulejataʼ tu Bibliaeʼ?
¿Abʼiste kaʼlaj chʼot tziʼ veʼ nitzaqʼbʼe u Bibliaeʼ?
Axh qʼii, ¿kam nasaʼ alejataʼ tu Bibliaeʼ?
OOTZI KAʼTAJ KAM
Ootzi kam stiʼ veʼ nukuxh itxakon unqʼa txumbʼaleʼ cheel veʼ at tu Bibliaeʼ.
«Unqʼa txumbʼaleʼ veʼ at tu Bibliaeʼ veʼ yeʼl iyaʼtebʼal» (La Atalaya, núm. 1 2018)
Bʼan eelataʼ kam kat tulbʼe u Bibliaeʼ ilochpu umaʼl u naj veʼ txoj kuxhtuʼ nikat inacheʼ tiʼ itzaaele titzʼupil.
Kam kat vulbʼe unxeʼtisat umaʼl un akʼ tiichajil as chiibʼebʼal umpajte (2:53)
Ootzi tiʼ unqʼa bʼaʼnla txumbʼaleʼ veʼ nitaqʼ u Bibliaeʼ aqʼal uvaʼ chiibʼebʼal tatin ku-familia.
«Umaʼl 12 lochbʼal tetz umaʼl familia aqʼal uvaʼ chiibʼebʼal tatineʼ» (¡Despertad!, núm. 2 2018)
Ila kam nitulbʼe u Bibliaeʼ talax isuuchil umaʼl u txumbʼal veʼ sotznal kaʼlaj xaol stiʼ, tiʼeʼ veʼ abʼil ni ilon isuuchil u vatz txʼavaʼeʼ.
¿Kam stiʼ la kuxh chuspu u Bibliaeʼ? (u videoeʼ veʼ tzʼajel tuul) (3:14)