Jeuova An No Shaat

1. Wen Muoziz did a liid di Izrel piipl dem outa Iijip, a ou im did shuo se im chos iina Gad?

DI BAIBL buk we niem Iibruu taak bout uol iip a piipl we did chos iina Gad, an Muoziz a did wan a dem we did chos iina Gad nof nof. (Iib. 3:2-5; 11:23-25) Muoziz did shuo se im chos iina Gad wen im did a liid di Izrel piipl dem outa Iijip, an im neehn fried a Fiero an im aami. An kaa Muoziz did chos iina Jeuova, im did liid di piipl dem fi go chuu di Red Sii an fi go chuu di wildanes tu. (Iib. 11:27-29) An aal wen nof a di Izrel piipl dem did a wanda ef Jeuova wuda stil tek kier a dem, Muoziz neehn tap chos iina Jeuova. An a gud ting se im did chos iina Gad kaa Jeuova did wok mirikl fi mek di piipl dem get fuud an waata wen dem did iina di wildanes we no fuud neehn de.a​—Ek. 15:22-25; Sa. 78:23-25.

2. Wa mek Gad did aks Muoziz se: “Yu tingk se Jeuova an tuu shaat”? (Nombaz 11:21-23)

² Aalduo Muoziz did chos iina Gad nof nof, bout wan ier afta Jeuova did mek dem get fi kom outa Iijip, Muoziz did staat fi wanda ef Jeuova kuda gi im piipl dem di miit we im se im wuda gi dem. Im did a wanda a we Jeuova wuda fain so moch miit fi fiid di miliyan a piipl we did de de iina di wildanes. So Jeuova aks Muoziz se: “Yu tingk se Jeuova an tuu shaat?” (Riid Nombaz 11:21-23.) Wen it taak bout “Jeuova an,” it a taak bout im uoli spirit ar im powa we im yuuz fi du tingz. So Jeuova did riili a aks Muoziz se, ‘Yu tingk se mi kyaahn du wa mi se mi a-go du?’

3. Wa mek wi fi tingk bout di taim wen Muoziz an di Izrelait dem neva chos se Jeuova kuda gi dem di sitn dem we dem niid?

³ Yu eva wanda ef Jeuova riili a-go gi yu an yu fambili aal a di sitn dem we unu niid fi liv? Iivn ef yu neva wanda bout dat, iina da lesn ya wi a-go luk pan wa mek Muoziz an di Izrelait dem neva chos se Jeuova kuda tek kier a dem kaa dis a-go elp wi fi nuo fi shuor se Jeuova a-go aalwiez tek kier a wi.

WI KYAN LORN FRAM MUOZIZ AN DI IZRELAIT DEM

4. Wa mek nof a di piipl dem did tingk se Jeuova kudn gi dem di fuud we dem niid?

⁴ Tingk bout wa did go dong: Di Izrelait dem an som ada piipl we did go wid dem did de iina di wildanes fi wan lang taim a waak fram Iijip fi go a di Lan we Jeuova pramis fi gi dem. (Ek. 12:38; Dyuu. 8:15) An di ada piipl we did go wid dem staat grombl grombl bout di mana we dem did a nyam, an di Izrelait dem did staat grombl grombl tu. (Nom. 11:4-6) Di piipl dem did se dem wel waahn di fuud we dem did a get iina Iijip. An kaaz a dat, Muoziz did fiil se a im afi go du sitn bout it.​—Nom. 11:13, 14.

5-6. Wa wi kyan lorn wen wi luk pan wa di piipl dem did kaaz di Izrelait dem fi du?

⁵ Di Izrelait dem mek di ada piipl dem we did di de wid dem mek dem no api fi wa Jeuova did du fi dem. An a di siem ting kyan apm tu wi tu​—wi kyan mek ada piipl mek wi no api fi di sitn dem we Jeuova Gad gi wi. Dis kyan apm wen wi wel waahn fi av som a di sitn dem we wi yuus tu av an ef wi staat fi bad main ada piipl fi wa dem av tu. Bot ef wi api wid di sitn dem we Jeuova a gi wi, no mata ou tingz stie wid wi, wi a-go aarait.

⁶ Di Izrelait dem did fi memba se a neehn iina di wildanes Jeuova wuda gi dem di sitn dem we im did a-go gi dem, bot a wen dem riich iina di Lan we im pramis dem dem wuda get aal a dem nais sitn de. A siem so insted-a fi a sidong an a tingk bout wa wi no av nou, wa wi fi du a tingk bout aal a di nais sitn dem we Jeuova a-go gi wi iina di nyuu worl. An wa wi kyan du tu a fi tingk bout som skripcha we kyan elp wi fi chos se Jeuova a-go aalwiez tek kier a wi.

7. Wa mek wi kyan nuo fi shuor se Jeuova an no shaat?

⁷ Wi mait-a a wanda wa mek Jeuova did aks Muoziz: “Yu tingk se Jeuova an tuu shaat?” Jeuova mait-a did a elp Muoziz fi si se im no onggl chrang, bot notn kyaahn tap im fram du aal a wa im waahn fi du. So Jeuova kuda gi di Izrelait dem uol iip a miit aalduo dem did iina di wildanes. So fi mek dem si se im an no shaat, Jeuova chrech out im an an yuuz im powa fi mek dem si wa im kyan du fi dem. (Sa. 136:11, 12) So wen yu a go chuu di uol iip a prablem dem, yu kyan chos se Jeuova a-go chrech out im an fi tek kier a yu.​—Sa. 138:6, 7.

8. A ou wi kyan mek shuor se wa apm tu di Izrelait dem iina di wildanes no apm tu wi? (Luk pan di picha tu.)

⁸ Iina no taim, Jeuova wok wan mirikl fi gi dem som uol iip a bod we niem kwiel fi iit. Bot dem neehn tangk Jeuova fi dat. Insted-a dat, nof a dem did krievn an a wok aad, aal iina di nait dem did a chrai fi si umoch kwiel dem kuda pik op, an so Jeuova did get beks wid dem fi dat. An siek-a dat im ponish dem. (Nom. 11:31-34) So dis mek wi si se wi no fi krievn fi tingz. It no mata ef wi av uol iip a moni ar wi puor, wi fi mek shuor se a “di sitn dem we wot nof tu Gad we de iina evn” wi a ron dong so das wi an Jeuova an Jiizas kyan get kluos kluos. (Mat. 6:19, 20, NWT; Luuk 16:9) Wen wi du dat, wi kyan nuo fi shuor se Jeuova a-go tek kier a wi.

9. Wa wi nuo se Jeuova a-go aalwiez du fi wi?

⁹ Jeuova stil a du tingz fi elp wi, bot dat no miin tu se wi naa go go chuu som rof taim ar se wi naa go onggri.b Bot Jeuova naa go lef wi, im a-go aalwiez di de fi wi wen wi a go chuu dem rof taim de. Wi a-go luk pan tuu taim iina wi laif wen wi kyan chos se Jeuova a-go tek kier a wi: (1) wen wi a diil wid moni prablem, an (2) wen wi a si ef wi av inof moni pudong fi wen wi get uol.

WEN WI A DIIL WID MONI PRABLEM

10. Wa a som a di sitn dem we mait-a mek yu en op a av moni prablem?

¹⁰ Di kluosa an kluosa wi a get tu di taim wen da worl ya a-go don, a di wosa tingz a-go get. Laik waar kyan staat wich paat wi liv, ar di govament dem mait-a staat fi chienj op chienj op kwik kwik, ar wi mait-a staat fi get muor an muor orikien an dem ting de, an siknis laik KUOVID an dem sitn de mait-a apm agen an kaaz wi fi luuz wi wok an di sitn dem we wi av. An wi mait-a afi muuv fram wich paat wi liv go somwe els, an aal a dem sopm ya kyan mek it aada fi wi tek kier a wi fambili. So wa kyan elp wi fi shuo se wi riili chos se Jeuova a-go tek kier a wi?

11. Wa kyan elp wi fi diil wid di moni prablem dem we wi mait-a av? (Luuk 12:29-31)

¹¹ Wen wi av wi prablem dem, wan a di fos ting we wi fi du a prie tu Jeuova. (Pr. 16:3) Wi kyan prie tu im an aks im fi mek wi waiz wen wi a mek op wi main fi du difrant difrant tingz an fi elp wi fi iizi wiself an no fi ‘wori op wiself bout notn.’ (Riid Luuk 12:29-31.) An wi kyan aks im tu fi elp wi fi satisfai wid di sitn dem we wi niid fi liv. (1 Tim. 6:7, 8) An wi kyan luk iina di buk an pamplet dem fi si ou wi kyan diil wid moni prablem an dem ting de. A nof a wi breda an sista dem get nof elp fi diil wid dem moni prablem dem wen dem luk pan di sitn dem we de pan jw.org.

12. Wa a som a di kwestiyan dem we sumadi kyan aks fi nuo wa a di bes ting fi du fi dem fambili?

¹² Som piipl fiil laik se fi tek kier a dem fambili, dem afi tek wan wok we de faar fram we dem liv. Bot dat a no wan gud sitn fi du. Bifuo sumadi tek wan wok, dem no fi onggl a tingk bout di mount a moni dem a-go mek, bot dem fi tingk bout ef it a-go mek dem an dem fambili get chrang iina di sitn dem we dem biliiv iina. (Luuk 14:28) Aks yuself dem kwestiyan ya: ‘Ef mi go we lef mi waif ar mi ozban, wa a-go apm tu dem? A wa kain-a kompni mi a-go fain miself iina? Mi a-go kyan get fi go a sorvis aafn?’ Ef yu av pikni, yu niid fi aks yuself da kwestiyan ya tu: ‘Mi a-go get fi gruo mi pikni dem an get fi “tiich dem fi liv di wie ou di Laad waahn dem fi liv”?’ (Ifii. 6:4) Eniting wi mek op wi main fi du wi fi mek shuor se a wa Gad waahn wi fi du an a no wa wi fren ar fambili dem, we no nuo ou fi yuuz di Baibl fi riizn pan tingz, waahn wi fi du.c A nof taim Tony, we liv iina di wes paat a Iezha, kuda get fi go a wan neda konchri fi wok som gud moni. Bot im prie bout it an den taak tu im waif an mek op im main se im naa go dwi’it, bot we dem du a chrai fi kot dong pan di mount a moni we dem a spen. Tony se: “Mi glad se mi neehn go we kaa mi get di chaans fi elp uol iip a piipl fi kom sorv Jeuova, an mi si se mi pikni dem a enjai fi du tingz fi Jeuova tu. Rait ya nou ya, wi fambili get fi si se az lang az wi du wa Matyu 6:33 se, Jeuova a-go tek kier a wi.”

WEN WI A SI EF WI AV INOF MONI PUDONG FI WEN WI GET UOL

13. Wa a som a di sitn dem we wi kyan du ya nou so dat wi kyan tek kier a wiself wen wi op iina iej?

¹³ Di Baibl mek wi nuo se notn no rang ef wi plan fi av tingz fi tek kier a wiself wen wi get uol. (Pr. 6:6-11) So notn no rang ef wi pudong som moni fi wen wi get uol kaa it kyan go elp wi fi tek kier a wiself. (Iik. 7:12) Bot wi no fi mek fi a ron dong moni an dem ting de bi di big ting iina wi laif.

14. A wa Iibruu 13:5 mek wi nuo se Jeuova a-go du fi wi we mek wi si se wi no fi wori bout moni an dem ting de?

¹⁴ Jiizas did a mek wi nuo se it no mek no sens wi siev op uol iip a moni an wi “no rich iina di sitn dem we Gad kier bout.” (Luuk 12:16-21) An memba se non a wi no nuo wa a-go apm tumaro. (Pr. 23:4, 5; Jmz. 4:13-15) An fi wi we a sorv Gad, Jiizas tel wi se wi fi redi fi “gi op” evriting we wi av ef wi waahn fi fala im. (Luuk 14:33) Di Kristiyan dem iina Judiya bak iina Baibl taim did api fi gi op evriting we dem av fi fala Jiizas. (Iib. 10:34) An a siem so iina fi wi taim, nof breda an sista redi fi gi op moni an dem ting de kaa dem no waahn fi get miks op iina palitiks an dem ting de. (Rev. 13:16, 17) Dem kuda du dat kaa dem nuo fi shuor se Jeuova a-go du wa im pramis dem wen im se: “Mi naa go lef unu non at aal. Nuo mi naa lef unu fi fen fi unuself.” (Riid Iibruu 13:5.) Ye, wi a-go du evriting we wi kyan du fi saat out wiself so dat wi kyan aarait iina di fyuucha. Bot ef sitn apm we wi no plan fa, wi kyan nuo fi shuor se Jeuova a-go tek kier a wi.

15. A ou di mada an faada dem fi si dem pikni dem? (Luk pan di picha tu.)

¹⁵ Iina som konchri, som mada an faada av pikni kaa dem fiil se dem wi av sumadi fi tek kier a dem wen dem get op iina iej. So it wuda komiin laik se dem si dem pikni laik wan “uol-iej penshan.” Bot di Baibl mek wi nuo se a di mada an faada dem fi tek kier a dem pikni dem. (2 Kor. 12:14) Ye, di pikni dem fi tek kier a dem mada an faada dem wen dem get op iina iej, an nof pikni api fi du dat. (1 Tim. 5:4) Bot di mada an faada dem fi nuo se a no wen dem gruo di pikni dem fi kom tek kier a dem dem a-go riili api, bot a wen dem elp dem pikni fi kom sorv Jeuova, a dat a-go mek dem riili api.​—3 Jan 4.

16. A ou di mada an faada dem kyan elp dem pikni fi tek kier a demself wen dem get big? (Ifiijan 4:28)

¹⁶ Yu pikni dem fi kyan luk pan yu an si se a Jeuova yu a luk tu fi tek kier a yu, an dat wi elp dem fi du di siem ting tu. An fram dem likl, mek dem si se notn no rang fi wok aad. (Pr. 29:21; riid Ifiijan 4:28.) An elp dem wen dem a go a skuul fi du dem skuul wok gud. Di mada an faada dem fi luk op tingz iina di buk an pamplet dem an yuuz di Baibl fi riizn pan tingz fi elp dem pikni fi si umoch skuulin dem fi du so dat dem kyan tek kier a demself an du aal we dem kyan du fi priich muor an aal ton wan paiyanier tu.

17. A wa wi kyan nuo fi shuor se?

¹⁷ Yu kyan nuo fi shuor se Jeuova kyan tek kier a yu an im a-go dwi’it, an im wel waahn fi du it tu. An di kluosa an kluosa wi get tu di taim wen da worl ya a-go don a di muor tingz a-go apm we a-go shuo ef wi riili a chos iina Jeuova. Bot no mata wa gwaan, mek wi mek op wi main an nuo se wi kyan chos se Jeuova a-go tek kier a wi an gi wi evriting we wi niid fi liv. Wi kyan put wi pat pan faiya an nuo fi shuor se Jeuova an no shaat, im kyan chrech out im an fi elp wi no mata wa.