A Ou Jiizas Fiil Bout Jeuova Niem?

1-2. (a) A wa Jiizas did du pan di nait bifuo im ded? (b) A wa wi a-go luk pan iina da lesn ya?

A DID Torzde iivnin, Naisan 14, 33 C.E., an Jiizas did jos don kip di Laad Sopa wid im ilevn apasl dem. An im did nuo se suun suun, Juudas weehn a-go sel im out tu im enimi dem we wuda biit im op bad bad an den kil im. So kaa Jiizas did nuo dis, wen im don iit wid dem, im tel dem som tingz fi bil dem op. An bifuo dem lef de-so, Jiizas se wan prieya wid nof tingz we wi kyan lorn fram. Di apasl Jan did rait dong wa Jiizas se an wi kyan fain da prieya de iina Jan chapta 17.

² Iina da lesn ya, wi a-go si som tingz we wi kyan lorn fram di prieya we Jiizas did se da nait de. Wi a-go si ou di prieya shuo: (1) wa Jiizas did a tingk bout jos bifuo im ded, an (2) wa a did di big ting fi im wen im did de pan ort.

“MI MEK DEM NUO YU NIEM”

3. Wa Jiizas did se bout Jeuova niem, an a wa im did miin wen im se so? (Jan 17:6, 26)

³ Iina im prieya, Jiizas se: “Mi mek dem nuo yu niem.” An dis did miin nof tu Jiizas kaa a tuu taim iina di prieya im se im did mek im falara dem nuo uu Jeuova bi. (Riid Jan 17:6, 26.) Bot wen im did se so, wa im did riili miin? A no laik se dem neehn nuo Gad niem, kaa im falara dem a did Juu an dem did av di paat a di Baibl we rait iina Iibruu we av Jeuova niem nieli 7,000 taim. So dem did wel an nuo Gad niem. So Jiizas neehn a tiich dem ya-so se Gad niem Jeuova, bot im did a taak bout di kain-a sumadi we Jeuova bi. So fi mek dem nuo Jeuova beta, im tel dem bout di sitn dem we Jeuova du aredi, wa im a du nou, an di sitn dem we a-go apm kaa im waahn dem fi apm. An im tel dem bout Jeuova wiez dem tu, an im a did di bes sumadi fi tel dem uu Jeuova bi.

4-5. (a) Tel wi sitn we mek wi kyan andastan ou sumadi niem kyan get fi miin muor tu yu? (b) A ou Jeuova niem did get fi miin muor tu Jiizas falara dem?

⁴ Tingk bout it da wie ya: Se yu av wan elda iina yu kanggrigieshan we niem Dievid an im a wan dakta tu, an yu nuo im fi wol iip a ier nou. Bot wan die yu tek sik an dem afi rosh yu go a aspital, an wen yu riich de, a Dievid a di dakta we siev yu laif. Nou wen yu ier im niem, yu no onggl tingk bout di elda we yu nuo bot yu tingk bout di dakta we siev yu laif.

⁵ A siem wie so Jiizas falara dem did don nuo se Gad niem Jeuova. Bot wen dem luk pan di ting dem we Jiizas did du wen im de pan di ort, laik ou im did diil wid piipl an di sitn dem we im did tiich dem, dem get fi nuo Jeuova beta. Kaa evriting we Jiizas did du an se, im did dwi’it jos laik ou im Faada wuda dwi’it.​—Jan 14:9; 17:3.

“YU NIEM . . . WE YU GI MI”

6. A wa it miin wen it se Jeuova gi Jiizas fi Im niem? (Jan 17:11, 12)

⁶ Wen Jiizas did a prie fi im falara dem, im se tu Jeuova se: “Gyaad dem . . . so dat nobadi kyaahn disrispek yu an av notn bad fi se bout yu niem, da sed niem de we yu gi mi.” (Riid Jan 17:11, 12.) So yu tingk se dis did miin se dem wuda staat fi kaal Jiizas Jeuova nou? Nuo sa! Kaa wen Jiizas did a taak bout Jeuova niem iina im prieya, im se “yu niem.” So a no laik se Jiizas niem did chienj tu Jeuova an piipl wuda kaal im so nou. So wa im did miin wen im se yu niem we yu gi mi? Wan a di ting a dat a Jeuova a di wan we sen Jiizas fi taak fi Im. An im did gi Jiizas di powa tu fi wok mirikl iina fi Im niem. (Jan 5:43; 10:25) An wan neda ting a dat Jiizas niem miin “Jeuova A Wi Sieviya.” So wen wi luk pan wa Jiizas niem miin, yu si se it av sitn fi du wid Jeuova niem tu.

7. Tel wi sitn we kyan mek wi andastan we it miin wen wi se Jeuova sen Jiizas fi kom taak fi Im.

⁷ Tingk bout dis: Wan ruula fi wan konchri kyan sen sumadi fi taak tu ada piipl fi im iina wan neda konchri. So wen di ruula sen da sumadi de fi go chat fi im, im sen im wid fi im powa, an so eniting we im tel di piipl dem se, dem wuda nuo se a di ruula it a kom fram. A siem so Jeuova sen Jiizas fi taak tu ada piipl fi Im tu.​—Mat. 21:9; Luuk 13:35.

8. A wa mek Jeuova kuda se Jiizas kom iina Im niem iivn bifuo Jiizas kom a ort? (Eksidos 23:20, 21)

⁸ Di Baibl kaal Jiizas di Wod, an dat a kaa Jeuova yuuz Jiizas fi mek di ienjel dem an di piipl dem pan di ort nuo wa Im waahn dem fi nuo an wa Im waahn dem fi du. (Jan 1:1-3) So Jiizas a mait-a did di ienjel we Jeuova sen fi tek kier a di Izrelait dem wen dem de iina di wildanes. An wen Jeuova did a tel dem fi lisn tu wa di ienjel se, Jeuova mek dem nuo se dem fi du dat kaa di ienjel kom iina Im niem.a (Riid Eksidos 23:20, 21.) Jeuova se dis kaa Jiizas taak fi Im, an Jiizas a di mien wan we pruuv se Jeuova aalwiez du wa rait an dat evribadi fi av nof rispek fi Im niem.

“FAADA, BIG OP YUSELF AN YU NIEM!”

9. Tel wi wa mek yu wuda se Jeuova niem wot nof tu Jiizas.

⁹ So jos laik wa wi taak bout iina da lesn ya aredi, Jeuova niem did wot nof tu Jiizas iivn bifuo im kom pan di ort. An a das wai wen im kom pan di ort, evriting we im du did av sitn fi du wid Jeuova niem. An so kopl die bifuo Jiizas ded, im kaal out tu Jeuova an se: “Faada, big op yuself an yu niem.” An rait afta im don taak, Jeuova ansa iina wan loud loud vais fram evn an se: “Mi big it op aredi, an mi gweehn big it op wan neda taim.”​—Jan 12:28.

10-11. (a) A ou Jiizas did big op Jeuova niem? (Luk pan di picha tu.) (b) Wa mek sitn niid fi saat out wen it kom aan tu Jeuova niem an di rispek we im fi get?

¹⁰ Jiizas did du tingz tu fi big op Jeuova niem. Wan a di ting dem we im du a dat im mek piipl nuo bout di nais nais wiez dem we Jeuova av an di wol iip a gud sitn dem we Im du. Bot a no dat a di onggl ting Jiizas du fi big op Jeuova niem, im did afi mek evribadi nuo se Jeuova aalwiez du wa rait an dat Im fi get nof rispek. An Jiizas did shuo se dis a wan big sitn wen im did a tiich im falara dem ou fi prie wen im se: “Wi Faada we de iina evn, wi prie se piipl av nof rispek fi yu niem.”​—Mat. 6:9.

¹¹ Wa mek sitn did niid fi saat out wen it kom aan tu Jeuova niem an di rispek we im fi get? Dis a kaa iina di gyaadn a Iidn, Sietan did disrispek Jeuova an tel bie lai pan im. Im did a mek it luk laik se Jeuova a laiyad an dat im no waahn Adam an Iiv fi get di sitn dem we im nuo se gud fi dem. (Jen. 3:1-5) Sietan iivn mek it luk laik se di wie ou Jeuova du tingz a no di rait wie. An so di lai dem we im tel pan Jeuova mait-a mek piipl chat bad bout Jeuova an gi Im bad niem. Iina di taim wen Juob did a liv, Sietan kliem tu se di wan dem we a sorv Jeuova onggl dwi’it kaaz a di gud sitn dem we dem a get fram Im. Sietan di oul laiyad aal se wen prablem lik wi, wi a-go tap sorv Jeuova kaa wi no riili lov Im. (Juob 1:9-11; 2:4) So taim wuda afi paas fi mek evribadi si uu a di laiyad, ef a Jeuova ar a Sietan.

“MI GI OP MI LAIF”

12. Kaa Jiizas lov Jeuova niem, wa im did redi fi du?

¹² Kaa Jiizas did lov Jeuova so moch, im did waahn fi du evriting we im kuda du fi mek evribadi nuo se Jeuova aalwiez du wa rait an dat Im fi get nof rispek. An so fi mek dat gwaan im did aal redi fi ded.b (Jan 10:17, 18) Di fos tuu sumadi we Jeuova did mek fi liv pan di ort a did Adam an Iiv, an im did mek dem porfek. Bot dem did tap lisn tu wa im a se an ton dem bak pan im an staat fi fala Sietan. Bot Jiizas neehn tan laka dem, im did redi fi kom pan di ort an shuo umoch im lov Jeuova, an im du dis bies pan ou im liv im laif. (Iib. 4:15; 5:7-10) Iina evriting we Jiizas du iina im laif, im shuo se im aalwiez a stik tu wa Jeuova se. Iivn wen im did a sofa an a-go ded, im stil did a liv op an a du wa rait. (Iib. 12:2) An a so Jiizas shuo se im lov Jeuova an Im niem.

13. A wa mek Jiizas a did di bes sumadi fi shuo se Sietan a di oul laiyad? (Luk pan di picha tu.)

¹³ Wen wi luk pan di wie ou Jiizas liv im laif, wi kyan si klier klier se a Sietan a di oul laiyad, a no Jeuova. (Jan 8:44) Yu si chuu Jiizas nuo Jeuova beta dan enibadi els, ef non a di sitn dem we Sietan did a se bout Jeuova did go so, Jiizas wuda nuo bout it. Bot fi shuo yu se notn no go so, Jiizas neva tap difen Jeuova niem. So aal wen it did komiin laik se Jeuova did lef im, Jiizas did redi fi ded rada dan fi ton im bak pan im Faada.​—Mat. 27:46.c

“MI DU DI WOK WE YU DID GI MI FI DU”

14. Kaa Jiizas did aalwiez a stik tu wa Jeuova se im fi du, a ou Jeuova did bles im?

¹⁴ Iina di prieya we Jiizas se tu Jeuova di nait bifuo im ded, im se: “Mi du di wok we yu did gi mi fi du.” Kaa Jiizas did aalwiez du di sitn dem we Jeuova se im fi du, im did chos se Jeuova wuda bles im. (Jan 17:4, 5) An Jiizas neva rang fi chos im Faada kaa wen im ded Jeuova mek im kom bak alaiv. (Aks 2:23, 24) Afta Jiizas kom bak alaiv, Jeuova gi im wan tap-a-tap pozishan iina evn. (Fil. 2:8, 9) An afta a wail, Jiizas ton King an staat fi ruul iina Gad Kindom govament. Bot a wa an wa da Kindom de wuda du? Jiizas gi wi di ansa wen im did a tiich im falara dem ou fi prie, wen im se: “Wi a prie fi yu govament ruul uova di ort. An wi a prie se jos laik ou wa yu [Jeuova] waahn fi apm iina evn a apm, a siem so wi a prie se wa yu waahn fi apm pan ort apm.”​—Mat. 6:10.

15. A wa an wa Jiizas a-go du?

¹⁵ Suun suun iina di Aamagedan waar, Jiizas a-go fait gens Gad enimi dem an don dem. (Rev. 16:14, 16; 19:11-16) Likl afta dat, Jiizas a-go fling Sietan iina “di pit we no av no batam,” we im kyaahn go du notn. (Rev. 20:1-3) Den Jiizas a-go ruul fi wan touzn ier, an a dem taim de piis a-go de evriwe an evribadi a-go kyan ton porfek. Aal ded piipl im a-go mek kom bak alaiv tu. An im a-go mek di wol ort ton iina wan paradais. So Jiizas a-go mek shuor se aal a di sitn dem we Jeuova waahn fi apm apm!​—Rev. 21:1-4.

16. Wa laif a-go bi laik wen di Touzn Ier don?

¹⁶ Kaa Jiizas kom ded fi wi, a dat mek wi kyan go tu Jeuova nou an aks im fi paadn wi fi wi sin dem. Bot yu si afta di Touzn Ier don, wi naa go niid fi du dat agen kaa wi a-go frii fram sin. An a das wai wi naa go niid Jiizas ar di 144,000 agen fi elp wi fi get kluos tu Jeuova. Pan tap a dat, di piipl dem we ded wuda kom bak alaiv aredi so “di laas enimi, . . . det [we kom fram Adam]” naa go de bout agen. An evribadi we a liv a-go porfek.​—1 Kor. 15:25, 26.

17-18. (a) Wa a wan big sitn we a-go apm wen di Touzn Ier don? (b) A wa Jiizas a-go du wen di taim kom fi im fi tap ruul az King? (1 Korintiyan 15:24, 28) (Luk pan di picha tu.)

¹⁷ Wan big sitn we a-go apm wen di Touzn Ier don a dat evribadi a-go av nof rispek fi Jeuova niem, an nobadi na’afi go a wanda ef im riili uoli an ef im aalwiez a du we rait. Kaa memba se iina di gyaadn a Iidn, Sietan did kliem se Jeuova a wan laiyad an dat Im no shuo lov wen Im a ruul uova piipl. Bot piipl we lov an rispek Jeuova no tap liv dem laif iina wan wie we shuo se Jeuova wie a aalwiez di bes wie. So wen di Touzn Ier don, evribadi a-go get fi si se Jeuova gud iina evri wie an evribadi a-go nuo fi shuor se Jeuova riili lov wi.

¹⁸ Wen di Touzn Ier don, evribadi a-go si se a Sietan a di laiyad. Bot wa bout Jiizas? Wen di taim kom fi im don ruul, yu tingk se im a-go fala Sietan an ton gens Jeuova? Nuo sa! (Riid 1 Korintiyan 15:24, 28.) Jiizas a-go gi bak im Faada di Kindom an ombl imself an mek Jeuova ruul uova im. Im no tan laik Sietan, im redi fi gi op evriting kaa im lov Jeuova.

19. A ou Jiizas fiil bout Jeuova niem?

¹⁹ Jiizas a di bes sumadi we Jeuova kuda sen fi kom mek wi nuo uu Im bi. So das wai Jeuova neva ich fi sen Jiizas iina Im niem. Bot a ou Jiizas fiil bout Jeuova niem? A did di muos impuotant ting tu im. Im did redi fi gi op im laif fi da niem de, an im a-go muo dan redi fi gi bak Jeuova evriting wen di Touzn Ier don. Bot a ou wi kyan du laik Jiizas? Wi a-go ansa da kwestiyan de iina di neda lesn.