A Ou Wi Fi Fiil Bout Jeuova Niem?

1-2. A ou wi nuo se Jeuova niem a wan big ting tu Jiizas?

JEUOVA niem miin uol iip tu Jiizas, an nobadi els no du muo fi mek piipl nuo bout Jeuova niem muor dan im. An iina di lesn bifuo da wan ya, wi get fi si se Jiizas did redi fi ded fi pruuv se a Jeuova fi get di rispek an se Im aalwiez du wa rait. (Maak 14:36; Iib. 10:7-9) An wen taim di Touzn Ier we Jiizas a-go ruul fa don, im a-go mek shuor se im gi bak di Kindom tu Jeuova kaa im waahn evribadi fi si se a Jeuova fi get aal a di big op. (1 Kor. 15:26-28) Bot a no jos lov Jiizas lov Jeuova niem, im riili lov di sumadi we Jeuova bi tu.

² Jiizas kom a ort fi mek piipl nuo bout Jeuova. (Jan 5:43; 12:13) An im mek im falara dem nuo bout Jeuova tu. (Jan 17:6, 26) Wen im did a tiich di piipl dem, im did mek dem nuo se a Jeuova tiich im di sitn dem we im did a tel dem, an a Im did gi im di powa fi wok mirikl. (Jan 10:25) Matarafak, Jiizas did aks Jeuova fi gyaad im falara dem “so dat nobadi kyaahn disrispek [Im] an av notn bad fi se bout [Im] niem.” (Jan 17:11) So kaa Jiizas lov Jeuova niem so moch, sumadi kyaahn se dem a fala Jiizas an dem no nuo ar naa yuuz Jeuova niem.

3. A wa wi a-go taak bout iina da lesn ya?

³ Kaa wi a fala Jiizas, wi chrai fi du laik im an shuo se Jeuova niem miin uol iip tu wi tu. (1 Pii. 2:21) Iina da lesn ya, wi a-go si wa mek Jeuova gi im niem tu di wan dem we a priich di ‘gud nyuuz bout im Kindom.’ (Mat. 24:14) An wan neda ting we wi a-go taak bout a wa wi kyan du fi shuo se Jeuova niem miin uol iip tu wi tu.

“IM TEK SOM A DEM FI BI IM UONA PIIPL AN GI DEM FI’IM NIEM”

4. (a) Jos bifuo Jiizas go baka evn, wa im did tel im falara dem fi du? (b) Wa a di kwestiyan we wi a-go get di ansa fa ya nou?

⁴ Jos bifuo Jiizas go baka evn, im did tel im falara dem se: “Di uoli spirit a-go kom pan unu an ful unu op wid powa an unu wi tel piipl iina Jeruusilem, Judiya, Samieriya an aal uova di worl bout mi.” (Aks 1:8) So Jiizas did a mek dem nuo se a no jos iina Izrel dem wuda priich di gud nyuuz, bot piipl aal uova di worl wuda get di chaans fi ton im falara tu. (Mat. 28:19, 20) Bot Jiizas did se: “Unu wi tel piipl . . . bout mi.” Wen Jiizas did se dat, im did miin se fi im falara dem onggl a-go taak bout im wan an dem naa go tel piipl bout Jeuova an im niem? Mek wi luk pan som sitn we Aks chapta 15 taak bout so das wi kyan ansa da kwestiyan de.

5. A ou di apasl an di elda dem iina Jeruusilem did shuo se evribadi niid fi nuo Jeuova niem? (Luk pan di picha tu.)

⁵ Iina 49 C.E., di apasl an di elda dem iina Jeruusilem did av wan miitn bout wa di piipl dem we a no Juu did niid fi du so dat dem kuda ton Kristiyan. Wen taim dem did don taak, Jiemz we a Jiizas aaf breda se: “[Piita] jos mek wi nuo ou Gad shuo se im kier bout di piipl dem we a no Juu wen im tek som a dem fi di fos taim fi bi im uona piipl an gi dem fi’im niem.” Bot a uufa niem Jiemz did a taak bout? Im mek wi nuo wen im tel wi wa di prafit we niem Iemos did se, wen im se: “So dat di piipl dem we di de wi luk fi Jeuova wid aal a dem aat. Jeuova se dem an di piipl dem we a no Juu a-go bi wan piipl we mi a-go gi mi niem.” (Aks 15:14-18) So dis a mek wi nuo se di piipl dem we jos ton Jiizas falara wudn onggl lorn bout uu Jeuova bi, bot ‘Jeuova wuda gi dem im niem tu.’ So dis miin se dem wuda mek ada piipl nuo bout Gad niem an piipl wuda nuo se a dem a Jeuova piipl.

6-7. (a) A wa mek Jiizas did kom a ort? (b) Wa a wan biga riizn wa mek Jiizas did kom a ort?

⁶ Jiizas niem miin “Jeuova A Wi Sieviya,” an dat miin tu se a im Jeuova yuuz fi siev di wan dem we chos iina Im an Im Bwai Pikni. So Jiizas did kom a ort fi ded fi di uol a wi. (Mat. 20:28) An kaa im ded fi wi, a dat siev wi an mek wi kyan get fi liv fi eva.​—Jan 3:16.

⁷ Wi did niid Jiizas fi siev wi kaaz a wa did gwaan iina di gyaadn a Iidn. Jos laik wa wi did se iina di laas lesn, Adam an Iiv did ton gens Jeuova, an kaaz a dat, dem neehn get di chaans fi liv fi eva agen. (Jen. 3:6, 24) Bot Jiizas neehn onggl kom fi siev wi, im kom ya kaa Sietan did tel som wikid lai pan Jeuova we did mash op im niem. (Jen. 3:4, 5) So wan big riizn we mek Jiizas kom a ort a fi mek piipl av nof rispek fi Jeuova niem. Im kom fi shuo wi se Jeuova a wan Faada we lov wi an im neehn du notn rang. An Jiizas a di bes sumadi fi mek wi nuo dat kaa a im Jeuova sen kom an im du evriting we Jeuova did waahn im fi du.

8. A wa aal a Jiizas falara dem wuda niid fi nuo?

⁸ So evribadi we chos iina Jiizas, weda dem a Juu ar dem a no Juu, did afi nuo se di Wan we riili siev dem a Jiizas Faada Jeuova. (Jan 17:3) An pan tap a dat, Jeuova wuda gi dem im niem jos laik Jiizas, an dem wuda afi nuo se a wan big ting fi av nof rispek fi Jeuova niem kaaz a dat wuda siev dem. (Aks 2:21, 22) So aal a Jiizas falara dem wuda afi lorn bout Jeuova an Jiizas tu. Das wai Jiizas don im prieya iina Jan 17 da wie ya, wen im se : “Mi mek dem nuo yu niem, an mi naa go tap mek dem nuo uu yu bi, so dat dem kyan lov dem wan aneda jos laka ou yu lov mi so dat mi an dem kyan wok tugeda az wan.”​—Jan 17:26.

“UNU A MI WITNIS”

9. Wa wi kyan du fi shuo se Jeuova niem impuotant tu wi?

⁹ Bies pan wa wi taak bout aredi iina da lesn ya, aal a wi we a fala Jiizas afi mek shuor se wi a shuo nof rispek fi Jeuova an im niem. (Mat. 6:9, 10) Notn no fi muor impuotant tu wi dan fi rispek Jeuova niem. Bot a no onggl fi se wi a rispek Jeuova niem, wi fi a du tingz fi shuo it tu. Bot wa wi kyan du fi shuo se wi rispek Jeuova niem an elp pruuv se a lai Sietan a tel pan im?

10. Wa Aizaiya chapta 42 tu 44 mek wi nuo bout? (Aizaiya 43:9; 44:7-9) (Luk pan di picha tu.)

¹⁰ Aizaiya chapta 42 tu 44 shuo se wi kyan du sitn fi big op Jeuova. Iina dem chapta ya, it mek wi nuo se sitn laik wan kuot kies a gwaan an Jeuova a aks di piipl dem we no sorv im fi pruuv se di gad we dem worship riil. Jeuova iivn tel dem se dem fi go get dem witnis dem an kom. Bot dem kyaahn fain a suol!​—Riid Aizaiya 43:9; 44:7-9.

11. A wa Jeuova se tu im piipl dem a Aizaiya 43:10-12?

¹¹ Riid Aizaiya 43:10-12. Dis a wa Jeuova se bout im piipl dem: “Unu a fi mi witnis an mi a Gad.” An den Jeuova tel im piipl dem fi ansa da kwestiyan ya: “No Gad de ada dan mi?” (Aiz. 44:8) Wi kyan ansa da kwestiyan de bies pan di sitn dem we wi se an di ting dem we wi du, fi shuo evribadi se Jeuova a di chuu Gad, an se no niem no muor impuotant dan fi im niem. An no mata ou Sietan mek tingz rof fi wi, wi kyan liv wi laif fi shuo se wi lov Jeuova an a stik tu im, an a so wi a-go elp fi shuo se Jeuova fi get nof rispek.

12. A ou wa Aizaiya 40:3, 5 se did apm?

¹² Wen wi du tingz fi elp gi Jeuova gud niem an no mek nobadi chat bad bout im, a fala wi a fala Jiizas Krais. An Aizaiya did se sumadi wuda kom “klier di wie pan Jeuova ruod.” (Aiz. 40:3) Dat did apm wen Jan di Baptis did klier di wie fi Jiizas kom, an wen Jiizas kom im kom iina Jeuova niem an taak fi im. (Mat. 3:3; Maak 1:2-4; Luuk 3:3-6) An Aizaiya did se Jeuova a-go get big op tu. (Aiz. 40:5) Dis did gwaan wen Jiizas did kom a ort an du evriting wa im Faada se im fi du, kaa evriting we Jiizas did du, a di siem ting Jeuova wuda du ef a Im did kom a ort.​—Jan 12:45.

13. Ou wi kyan du laik Jiizas?

¹³ Jos laik Jiizas, aal a wi a witnis fi Jeuova. Jeuova gi wi im niem, an wi tel piipl bout di uol iip a gud sopm we im du tu. Bot fi bi wan gud witnis fi Jeuova, wi afi mek piipl nuo bout aal a di sitn dem we Jiizas du fi shuo evribadi se dem fi rispek Jeuova niem. (Aks 1:8) Jiizas a di bigis Witnis fi Jeuova an wi fi du laik im. (Rev. 1:5) Bot ou wi fi fiil bout Jeuova niem?

SOM TINGZ WE WI KYAN DU FI SHUO SE JEUOVA NIEM IMPUOTANT TU WI

14. Azkaadn tu Saam 105:3, ou wi fi fiil bout Jeuova niem?

¹⁴ Wi no shiem a Jeuova niem. (Riid Saam 105:3.) Jeuova api wen wi buos bout im niem. (Jer. 9:23, 24; 1 Kor. 1:31; 2 Kor. 10:17) A wan big sitn fi wi big op Jeuova niem an mek evribadi nuo se im aalwiez du wa rait. So wi naa go shiem fi tel di piipl dem we wi wok wid, di wan dem we wi go a skuul wid, wi nieba dem, an enibadi els se wi a Jeuova Witnis. Sietan wel waahn wi fi tap tel piipl bout Jeuova niem. (Jer. 11:21; Rev. 12:17) Matarafak, Sietan an di wan dem we a bak im waahn piipl fi figet Jeuova niem. (Jer. 23:26, 27) Bot yu si kaa wi lov Jeuova niem, evri chaans wi get wi a-go priez im.​—Sa. 5:11; 89:16.

15. A wa it miin fi kaal pan Jeuova niem?

¹⁵ Wi no tap kaal pan Jeuova niem. (Jowel 2:32; Ruo. 10:13, 14) Bot fi kaal pan Jeuova niem no jos miin se wi nuo im niem an kaal it, bot yu fi nuo uu im bi, an yu fi chos iina im an mek im elp yu an shuo yu ou yu fi liv yu laif. (Sa. 20:7; 99:6; 116:4; 145:18) It miin tu se wi a-go tel piipl bout Jeuova an im nais nais wiez dem so dat dem kyan chienj op dem laif an sorv im an mek im api wid dem.​—Aiz. 12:4; Aks 2:21, 38.

16. Ou wi kyan shuo se Sietan a wan laiyad?

¹⁶ Wi redi fi sofa fi Jeuova niem. (Jmz. 5:10, 11) Wen wi stik tu Jeuova an du evriting we im se wi fi du aal wen wi a sofa, wi a shuo se Sietan a wan laiyad. Iina Juob taim, Sietan did se dis bout di wan dem we a sorv Jeuova: “Wan man wi gi op evriting we im av fi siev im laif.” (Juob 2:4) So Sietan kliem se piipl onggl a sorv Jeuova kaaz tingz a gwaan gud fi dem, bot wen prablem lik dem, dem a-go ton dem bak pan Jeuova. Bot Juob did shuo se notn no go so. An wi tu kyan shuo se no mata ou Sietan mek tingz rof fi wi, wi naa go lef Jeuova. An wi nuo fi shuor se Jeuova a-go gyaad wi kaaz a im niem.​—Jan 17:11.

17. Azkaadn tu 1 Piita 2:12, wa a wan neda sitn we wi kyan du fi big op Jeuova niem?

¹⁷ Wi fi shuo se wi av nof rispek fi Jeuova niem. (Pr. 30:9; Jer. 7:8-11) Kaa piipl nuo se wi a Jeuova Witnis, wa wi du kyan mek wi big op Jeuova niem ar it kyan mek wi gi im bad niem. (Riid 1 Piita 2:12.) So iivn duo wi no porfek, iina evriting we wi se an we wi du, wi fi chrai wi bes fi mek shuor se wi a big op Jeuova niem.

18. Wa a wan neda wie we wi kyan shuo se Jeuova niem impuotant tu wi? (Luk pan di said paint tu.)

¹⁸ Wi fi big op Jeuova niem no mata wa piipl tingk bout wi. (Sa. 138:2) Dis impuotant kaa wen wi du tingz fi mek Jeuova api, nof taim piipl no laik it an dem se som bad sitn bout wi.a Jiizas “neehn fried ar shiem fi go chuu sofarieshan” an ded laik wan kriminal fi big op Jeuova niem. So im neehn a wori wori op imself bout we piipl tingk bout im. (Iib. 12:2-4) Aal Jiizas did a tingk bout a wa Jeuova waahn im fi du.​—Mat. 26:39.

19. A ou yu fiil bout Jeuova niem, an wa mek yu fiil so?

¹⁹ Wi proud fi sorv Jeuova an wi api se wi niem Jeuova Witnis. An kaa a dat, wi a-go gwaan big op Jeuova niem iivn ef piipl chriit wi bad an se aal kain-a bad sitn bout wi. Ye man, Jeuova niem impuotant tu wi muor dan eniting els. So mek wi gwaan big op Jeuova niem no mata ou Sietan mait-a mek tingz get rof wid wi. A so wi a-go shuo se Jeuova niem a di bigis ting tu wi jos laik ou a did di bigis ting tu Jiizas Krais tu.