Ou Wi Kyan Elp Sumadi We Niid Elp Fi Luk Pan Tingz Di Rait Wie?

1. A uu supuoz tu elp wi breda an sista dem fi luk pan tingz di rait wie? Tel wi wa mek yu se so.

OU YU fiil wen yu afi taak tu sumadi fi elp dem wid sopm? Som piipl mait-a fain dat iizi fi du, an som ada piipl mait-a fried ar mait fiil a wie fi dwi’it. Bot eni wie yu tek it, aal a wi afi elp wi wan aneda som a di taim fi nuo ou fi luk pan tingz di rait wie. An dis a kaa Jiizas did se piipl gweehn nuo se wi a fi im falara ef wi lov wi wan aneda. (Jan 13:35) An wan wie we wi shuo se wi lov wi breda an sista dem a wen wi karek dem an elp dem fi luk pan tingz di rait wie. An das wai di Baibl se “it swiit wen yu av wan fren we karek yu kaa im riili kier bout yu.” Pr. 27:9.

2. A wa di elda dem fi kyan du an wa mek? (Luk tu pan di paat we niem “Elp Fi Aal A Uu Av Taak Pan Di Miitn Iina Di Wiik.”)

² Muo dan enibadi els, di elda dem niid fi nuo wa an wa fi se wen dem a elp di breda an sista dem fi luk pan tingz di rait wie. An dis a kaa Jeuova an Jiizas gi dem di wok fi tek kier a di kanggrigieshan. (1 Pii. 5:2, 3) Wan a di wie dem du dat a wen dem yuuz di Baibl fi gi taak pan di miitn dem fi elp di breda an sista dem fi nuo ou fi luk pan tingz di rait wie. Dem elp wi wan a wie tu. Laik fi di wan dem we tap kom a miitn ar we get put outa di kanggrigieshan, di elda dem chrai fi elp dem fi staat sorv Jeuova agen. So ou wi an di elda dem kyan se tingz fi elp ada piipl fi luk pan tingz di rait wie?

3. (a) Wa kyan elp wi nuo di rait ting wi fi se wen wi a elp sumadi? (Aizaiya 9:6; luk pan di paat we niem “Du Laik Jiizas Wen Wi A Tel Sumadi Sitn Fi Elp Dem.”) (b) A wa wi a-go taak bout iina da lesn ya?

³ Wen wi a elp piipl fi luk pan tingz di rait wie, wi kyan lorn bout wa fi se an ou fi se tingz wen wi sidong an stodi bout ou som piipl iina di Baibl did dwi’it. Laik Jiizas did aalwiez nuo di rait ting fi se fi elp piipl, an das wai wan a di sitn dem we di Baibl kaal im a “Di Wan We Waiz An Aalwiez Nuo Di Rait Ting Fi Se.” (Riid Aizaiya 9:6.) Iina da lesn ya, wi a-go taak bout wa wi kyan du wen sumadi aks wi fi elp dem wen dem a mek op dem main bout sitn, an wa wi kyan du fi elp sumadi aal wen dem no aks fi elp. An wi a-go luk pan wa mek it impuotant fi nuo wen a wan gud taim fi se sitn fi elp sumadi an ou fi se it iina di rait wie.

WEN SUMADI AKS WI FI ELP DEM WEN DEM A MEK OP DEM MAIN BOUT SITN

4-5. Wen sumadi aks wi fi elp fi mek op dem main bout sopm, wa a di kwestiyan we wi fi aks wiself fos? Yuuz wan tuori fi mek wi nuo wa mek yu se so.

⁴ Wen sumadi kom tu wi an aks wi fi elp dem wid sopm we dem afi mek op dem main bout, wi mait-a fiil gud se dem kom aks wi an so wi redi fi tel dem we wi tingk. Bot wi fi tap an aks wiself da kwestiyan ya, ‘Mi a riili di bes sumadi fi elp dem wid dis duo?’ Som a di taim di bes elp we wi kuda gi dem a fi no se notn bout wa dem aks wi bout, an jos tel dem bout sumadi we dem kyan go taak tu we wuda bi wan beta sumadi fi elp dem.

⁵ Laik tingk bout dis: Supuoz wan a yu gud fren dem get sik bad an im tel yu se im a luk pan som dakta chriitment we im kuda get, an im aks yu wich wan yu tingk wuda gud fi im tek. Aalduo yu mait-a prefa wan a dem de chriitment de, yu a no dakta an yu neehn chrien fi tel piipl wa kain-a chriitment dem fi tek fi diil wid da siknis de. So di bes ting we yu kyan du fi elp yu fren a fi elp im fain sumadi we nuo bout da siknis de an uu kyan elp im fi mek op im main fi nuo wa fi du.

6. Wa mek wi mait disaid fi wiet likl bifuo wi elp sumadi fi mek op dem main bout sopm?

⁶ Aalduo wi mait-a fiil laik wi nuo nof bout di sitn we sumadi mait-a aks wi bout, wi mait disaid fi wiet likl bit bifuo wi tel dem we wi tingk. An dis mek sens kaa Pravorbz 15:28 se: “Di wan uufa aat rait iina Gad yai a-go tingk gud bout wa im fi se bifuo im se notn at aal.” Bot iivn ef wi tingk wi nuo wa fi tel dem, it wuda gud fi tek som taim fi prie an luk op iina di buk an pamplet dem pan di sitn we dem aks wi bout an tingk bout wa wi a-go tel dem se. An wen wi du dis, wi kyan nuo fi shuor se eniting we wi tel dem a wa Jeuova wuda waahn wi fi tel dem. Luk pan wa did gwaan wid di prafit we niem Nietan.

7. Wa yu lorn fram wa did gwaan wid di prafit Nietan?

⁷ King Dievid did tel di prafit we niem Nietan se im did waahn fi bil wan ous fi Jeuova. An Nietan neehn ich fi tel im se im fi gwaan go dwi’it. Bot a neehn dat Jeuova did waahn. So bifuo Nietan tel Dievid wa fi du, im shuda chek wid Jeuova fos fi fain out ef a dat im did riili waahn Dievid fi du. (1 Kr. 17:1-4) So wi si se wen sumadi aks wi fi elp dem fi mek op dem main bout sitn, wi shuo se wi waiz wen wi “sluo fi taak.”​—Jmz. 1:19.

8. Wa mek wi no fi kwik fi tel sumadi sitn wen dem kom tu wi fi elp?

⁸ Si wan neda riizn ya we mek wi no fi kwik fi tel sumadi sitn wen dem kom tu wi fi elp fi mek op dem main bout sopm: Ef wi tel sumadi sitn an it no wok out gud, wi kuda get bliem fi it. A das wai it gud fi wi tap an tingk fos bifuo wi se notn.

WEN WI AFI KAREK SUMADI AALDUO DEM NEEHN AKS FI ELP

9. Bifuo di elda dem karek sumadi, wa dem mos nuo fi shuor se? (Gyalieshan 6:1)

⁹ Som a di taim di elda dem afi karek wan breda ar wan sista uu dem si a du tingz we kyan kaaz dem fi ‘en op iina prablem.’ (Riid Gyalieshan 6:1.) Dat miin tu se dem no du notn rang yet, bot di ting dem we dem a du kuda kaaz dem fi sin bad gens Jeuova. So di elda dem waahn fi elp da sumadi de fi gwaan sorv Jeuova so dat dem kyan liv fi eva. (Jmz. 5:19, 20) Bifuo di elda dem kyan elp da sumadi de, dem afi nuo fi shuor se im riili a du tingz fi chuu we kyan mek im en op sin gens Jeuova, kaa di elda dem nuo se no jos kaa di sumadi mait-a du tingz difrant fram wa dem wuda du it miin se dem a du tingz we Jeuova no laik. (Ruo. 14:1-4) Bot wa ef di elda dem si se di sumadi a du tingz we a-go mek im en op a sin gens Jeuova? Ou dem kuda karek im?

10-12. Wen wan elda afi karek sumadi we neva kom tu im fi get elp, wa an wa im fi du, an ou wa di elda du komiin laik wa wan faama afi du? (Luk pan di picha dem tu.)

¹⁰ Wen di elda dem afi karek sumadi uu neehn go tu dem fi get elp, dat a sitn we no iizi fi dem du. An dis a kaa di apasl Paal did se sumadi mait-a mek wan rang muuv an im nat iivn si se a dat im a du. So wen di elda dem go tu da sumadi de fi elp im, di fos ting dem niid fi du a fi elp im get redi fi tek di jraa op we dem a-go gi im.

¹¹ Wen wan elda afi karek sumadi we neva kom tu im fi get elp, it wuda komiin laik wen yu a plaant sitn iina di grong we no redi fi notn plaant iina it kaa it tof bad. Bifuo wan faama plaant siid, im afi dig op di grong fos, an dat wi mek di grong get saaf so dat it iiziya fi im plaant di siid dem iina it. Afta im plaant di siid dem, di laas ting im du a fi waata di grong so dat di siid dem kyan gruo. An a siem wie so yu av som sitn we wan elda kyan du fi mek it iiziya fi wan breda fi tek di jraa op we im a-go get. Laik im kyan wiet pan wan gud taim fi taak tu di breda an tel im se im kier bout im an se im av sitn we im waahn fi taak tu im bout. Ef evribadi nuo se wan breda aalwiez a shuo lov an a tek taim wid piipl, it a-go iiziya fi sumadi tek wa im a se wen im a karek dem bout sitn.

¹² Wen di elda a-go sidong fi taak tu di breda, im stil afi du som tingz fi mek it iiziya fi di breda tek di elp we im a-go get. An dis a jos laik ou di faama did afi du som tingz fi mek di siid gruo. So wan a di ting dem we di elda kyan du a fi mek di sumadi nuo se aal a wi mek mistiek an sumadi afi karek wi somtaim. (Ruo. 3:23) Di elda a-go yuuz di Baibl fi mek di breda si di rang muuv we im mek. An wen di elda a du dis, im a-go mek shuor se wa im se an ou im se it mek di breda si se im av nof rispek fi im. Ef di breda si se im did rang fi chuu, di neks ting we di elda a-go du a shuo im wa im niid fi du fi chienj op im wiez ar fi saat out di prablem. An bifuo im don taak wid di breda, di elda a-go mek shuor se im big im op fi im gud wiez dem an den im a-go prie wid im tu.​—Jmz. 5:15.

13. Wa di elda dem kyan du fi mek shuor se di sumadi we dem a elp no tek wa dem a se di rang wie?

¹³ Somtaim wen sumadi a karek sumadi els, di sumadi we dem a karek tek wa dem se di rang wie. So wa di elda kyan du fi mek shuor se dat no apm? Di elda dem fi tek dem taim wid di sumadi an aks dem som kwestiyan fi si ef dem andastan wa mek dem a get di elp an fi fain out ef dem nuo wa dem kyan du fi chienj op dem wiez ar saat out wa niid fi saat out.​—Iik. 12:11.

SHUO RISPEK WEN YU A KAREK SUMADI, AN NO KAREK DEM WEN YU BEKS

14. Wa mek wi no fi karek sumadi wen wi beks?

¹⁴ Kaa wi no porfek, som a di taim wi boun fi se tingz ar du tingz we mek ada piipl get beks. (Kol. 3:13) An dat a sopm we di Baibl se tu. (Ifii. 4:26) Bot wi fi chrai fi no karek sumadi wen wi beks, kaa ‘wen wi get beks, wi kyaahn du di gud sitn dem we Gad waahn wi fi du.’ (Jmz. 1:20) So ef wi chrai fi karek sumadi wen wi beks, dat kuda mek tingz get wos. Bot dat no miin tu se wi kyaahn tel di sumadi we mek wi get beks ou wi fiil. Bot wi fi wiet til wi kaam dong bifuo wi se notn tu dem. Mek wi luk pan wa wi kyan lorn fram Ilaiyuu wen im did afi karek Juob.

15. Wa wi kyan lorn fram wa Ilaiyuu did du? (Luk pan di picha tu.)

¹⁵ A kopl die wel Ilaiyuu did sidong an a lisn tu Juob a difen imself wen im frenimi dem did a se tingz bout im we neva go so. Ilaiyuu did fiil it fi Juob, bot im did get beks bad wen im ier Juob staat fi se tingz bout Jeuova we no go so, an wen im staat fi se tingz fi big op im uona self. Bot iivn duo Ilaiyuu did beks, im wiet pan fi im taim fi taak. An wen im staat fi taak, im tek taim wid Juob an shuo se im rispek im wen im a karek im. (Juob 32:2; 33:1-7) Wa Ilaiyuu did du tiich wi se wen wi a karek sumadi, wi fi shuo rispek an lov an no dwi’it wen wi beks.​—Iik. 3:1, 7.

NO TAP SE TINGZ FI ELP WI WAN ANEDA, AN AALWIEZ REDI FI TEK ELP

16. Wa yu lorn fram Saam 32:8?

¹⁶ Di mien skripcha fi da lesn ya mek wi nuo se ‘Jeuova a-go wach uova wi an mek wi nuo wa wi fi du an wa wi no fi du.’ (Riid Saam 32:8.) So dis mek wi nuo se Jeuova aalwiez a-go di de a elp wi. Im no onggl tel wi wa fi du, bot im elp wi fi nuo ou fi dwi’it tu. An wi kyan du jos laik Jeuova. Laik wen wi afi taak tu sumadi fi elp dem wid sopm, wi kyan chrai fi se tingz fi elp bil dem op an elp dem fi du di rait sitn so dat tingz kyan wok out gud fi dem.

17. Wen di elda dem yuuz di Baibl fi elp wi fi nuo wa fi du, a wa dem wuda komiin laik? Tel wi wa mek yu se so. (Aizaiya 32:1, 2)

¹⁷ Iina dem ya taim ya muo dan eni ada taim, wi niid fi elp wi wan aneda fi nuo di rait ting dem fi du, an wi fi redi fi tek di elp wen wi a get it. (2 Tim. 3:1) Jos laik ou sumadi fiil gud wen dem get waata “we a ron iina wan plies we waata no naamali de,” a siem so wen di elda dem yuuz di Baibl fi elp wi it mek wi fiil gud an push wi fi gwaan sorv Jeuova. (Riid Aizaiya 32:1, 2.) Wi api fi di breda an sista dem we no ich fi tel wi di ting dem we wi niid fi ier. An di sitn dem we dem se wot nof tu wi. (Pr. 25:11) So mek aal a wi gwaan lorn ou fi elp wi wan aneda fi nuo di rait ting dem fi du, an mek wi aalwiez redi tu fi tek elp wen wi a get it.