1 | Donga—”Kowé Kudu Masrahké Kabèh Rasa Kuwatirmu marang Gusti Allah”

ING ALKITAB DISEBUTKÉ: ”Kowé kudu masrahké kabèh rasa kuwatirmu marang Gusti Allah merga Dhèwèké perduli karo kowé.”—1 PÉTRUS 5:7.

Maksudé Ayat Kuwi

Yéhuwah péngin awaké dhéwé crita karo Dhèwèké soal kabèh beban utawa kekuwatirané awaké dhéwé. (Mazmur 55:22, lan cathetan ngisor) Embuh masalahé cilik apa gedhé, tapi nèk kuwi penting kanggo awaké dhéwé, Yéhuwah ya nganggep kuwi penting. Nèk péngin ngrasa ayem, ya kudu ndonga.—Filipi 4:6, 7.

Piyé Ngetrapkéné?

Pas ngadhepi masalah keséhatan méntal, isa waé ngrasa dhèwèkan. Wong liya ora selalu isa memahami sing awaké dhéwé alami. (Wulang Bebasan 14:10) Tapi nèk ndonga, Gusti Allah mesthi bakal ngrungokké lan isa memahami perasaané awaké dhéwé. Yéhuwah ngerti isi ati, rasa sedhih, lan masalahé awaké dhéwé. Kabèh sing dikuwatirké isa dicritakké.—2 Babad 6:29, 30.

Donga isa marakké awaké dhéwé tambah yakin nèk Yéhuwah perduli. Awaké dhéwé ya dadi isa yakin kaya penulis Mazmur sing ngomong, ”Njenengan ndelok nèk aku sengsara, lan Njenengan ngerti nèk aku susah banget.” (Mazmur 31:7) Ngerti nèk Yéhuwah nggatèkké kuwi wis nguwatké banget. Tapi Yéhuwah ora mung nggatèkké kesusahané awaké dhéwé thok. Dhèwèké isa nguwatké lan nggawé awaké dhéwé tenang liwat ayat-ayat ing Alkitab. Dhèwèké terbukti sing paling memahami awaké dhéwé.

Manfaaté Alkitab kanggo Julian

Sing Tak Rasakké Merga Nduwé Gangguan Kecemasan

”Aku nduwé gangguan kecemasan lan gangguan obsesif-kompulsif (OCD). Aku isa ujug-ujug ngrasa kuwatir. Misalé saiki aku ora apa-apa, tapi bar kuwi isa ngrasa kuwatir banget tanpa ana sebabé. Aku terutama dadi kuwatir pas karo wong akèh. Aku kuwatir banget meréka mikir apa soal aku.

”Kanca-kancaku sing ngerti keadaanku ngupaya tenanan mbantu aku. Mémang, kadhang omongané meréka ora marakké perasaanku dadi luwih pénak. Tapi aku menghargai banget upayané meréka.

”Gara-gara nduwé OCD lan gangguan kecemasan, kadhang arep ndonga waé rasané angèl banget. Kudu ngupaya tenanan bèn isa fokus lan crita karo Yéhuwah. Pikiranku ing endi-endi, cepet banget berubahé, aku nganti bingung dhéwé. Nèk wis ora isa ngontrol pikiranku, aku dadi ora isa ngungkapké pikiran lan perasaanku.”

Manfaaté Alkitab kanggo Aku

”Merga sinau Alkitab, aku dadi ngerti nèk ndonga kuwi ora perlu dawa-dawa. Ngomongé ora lancar ya ora apa-apa. Kadhang nèk bingung kudu ngomong apa, aku mung ndonga, ’Yéhuwah, tulungi aku.’ Bar kuwi, aku ngrasa Yéhuwah isa memahami perasaanku lan langsung nguwatké aku. Sakliyané ndonga, aku ya konsultasi ing dokter. Hasilé, keadaanku dadi luwih apik. Meskipun kadhang ora gampang, aku tetep ngupaya ndonga karo Yéhuwah soalé aku yakin Dhèwèké sayang lan péngin mbantu aku.”