Ille Uushsho Dandeennannoki Hittate?

1-2. Ille uushsho noꞌoꞌni geltaaki hoone oruwwinaaꞌnite kada dandeetta?

YESUUSI mitti murtichchi ille uushsho beloxxa murte iseꞌaa murteessaashsha qortaammaxxe mitte hiyyeette manjichchoka fakkeenna haasoꞌeemman. Yesuusi butta hedhemmake baroꞌni, heddo manjoꞌni ille uushsho geltaammaxxeꞌe kunni fakkeenni, heddo isixxe hordofooleeyyexxa hubanno butataaxxi egeꞌnendeexxen. (Luqa. 18:1-5) Noꞌo duuchchiingeꞌni mitte mitte yanna, ille uushsho geltaammaxxee kunni fakkeenni techchixxe yannaꞌni noꞌaanna laꞌo afeen.

² Techchixxe yannaꞌni buttateꞌni jibbi, gamisanna miiccami egeꞌnendeexxe yaane kaddemmaxxeꞌe, ille uushsho noꞌoꞌni geltaa wodda manbeꞌa hinabeꞌnon. (Meki. 5:8) Heqqinannoxxe yaane kadanna gophphoole, addetike jaaluwwa noꞌokenaaꞌninni ille uushsho noꞌoꞌni geltaa wodda adde wonxannoxxi hexxaan. Dhugaaten, dayyuwwi noꞌokinna dayyuwwa noꞌoxxi, dhugaa moromaꞌneeke manna kandebaaxxi egeꞌnendeexxeen. Insaꞌne qulliyyetebaan. Yesuusi isoo morondaammaxxi fuggaaleeyye isoꞌni ille uushsho geesissaamma wodda asseexxe yaanenaaꞌni caaldeexxa barachcho alfinannon. Noꞌoo moromaꞌneeki manni ille uushsho noꞌoꞌni geesisaaꞌnaa ossinaannole, addetika jaaluwwa noꞌoka faꞌi, hittee qico ossa hasissata! Gubaꞌeti gadho yookiin gubaꞌeti giddo hedheeki manji ille uushsho kaddeexxa yaane noꞌoꞌni gesisaa wodda Yihowwaꞌni maachchi laqema? Noꞌoꞌni gelteexxi yaane isoo yaadissaa?

3. Ille uushsho noꞌoꞌni geltaa wodda Yihowwa yaadaꞌnee? Mayee?

³ Yihowwa noꞌoꞌni ille uushsho geltaa wodda yaadaan. “Yihowwa ille uushsho beloxxa yaane eyyaan.” (Faaro 37:28) Yesuusi, Yihowwa hasissaaxxe yannaꞌni rakeexxi dhugaa “alfinannoshsha” assaaxxa kokeesseen. (Luqa. 18:7, 8) Ittan shiqixxe yannaꞌni, noꞌoꞌni geltaꞌneexxe rakko duuchchanaaꞌninna ille uushshotenaaꞌni fullannon.—Faaro 72:1, 2.

4. Techchixxe yannaꞌni Yihowwa noꞌoo gargaaratee qophpheesseexxi yaane maachcho?

⁴ Dhugaa baꞌlattaaxxa heqqedhateꞌni heꞌnennexxe tenne yannaꞌni, Yihowwa ille uushsho dandeenne heꞌnannoshsha gargaaraan. (2 Pheexi. 3:13) Isi ille uushsho noꞌoꞌni geltaa wodda beekkumiinxe kaddebaaxxa yaane assatenaaꞌni ifi heqqeꞌnannoki hittate kaddeexxa barsiisaan. Yihowwa belti isiki darreeꞌni ille uushsho noꞌoꞌni geltaa wodda maa assinannoxxa leellishaaka eloka fakkeenna qophpheesseen. Ittan hujeteꞌni hosinsannoka eloka gorsa Maxaafa Qullichchakeꞌni borreessiseen.

ILLE UUSHSHO GELTAA WODDA ASSITINAAXXE YAANEꞌAA XEXXEꞌATTE

5. Ille uushsho geltaa wodda assinaannexxe yaaneꞌa xexxeꞌata hasisseeki mayeete?

⁵ Ille uushsho noꞌoꞌni geltaa wodda jaba qicinni miidhemmannoxxinna yaandannoxxi hexxaan. (Meki. 7:7) Addatendeexxe Mageniinxe ergantooleeyeꞌni, Iyyoobiꞌninna Inbaaqoomiꞌni iittan fakkaatteemmaxxi yanna hexxemman. (Iyyo. 6:2, 3; Inbaq. 1:1-3 ) Kunni hedumi dadumiinkenna kadoole, noꞌoꞌni elobaaxxa yaane geesisee manjoꞌni fuggoxxa yaane assinabeꞌnoshsha xexxeꞌata hasissaan.

6. Abiseloomi asseexxe yaanenaaꞌni maa barantano? (Fakke uudi.)

⁶ Mitti manji noꞌoo yookiin noꞌo eenaanneka manjo miidha wodda halo hiissedhatee woꞌlaannannoxxi hexxaan. Kaddoomaleꞌe, iitta hexxeexxa yaane assa wele caaldeexxi rakko dadendaashsha assitoꞌa dandeettaan. Motichcha Daawitike beltika, Abiseloomika fakkeenna uundo. Abiseloomixxe langaxxe amake belto kadeeki Aminooni, dayyo isixxa Tiꞌimaarii daffaareexxa yanna yoꞌoshsha aareemman. Muuseke seerishsha Aminooni asseexxe yaaneꞌa reyo hasissaamman. (Zele. 20:17 ) Abiseloomi aaraanxe aareen. Kaddomaleꞌe, halo hiissatixxi baalle kinni isixxemmabaan.—2 Samu. 13:20-23, 28, 29

7. Ille uushsho yannatee faarsanjo miiteemmaki hittatemmaꞌa?

⁷ Ille uushsho hujaꞌneeke mannaꞌni tarkaaffe adhdhendaꞌnebaachcho fakkaattaaxxa yanna, dhugaatixxa yaane assa laꞌo affebaashsha assineꞌe hendannoxxinna hexxaan. Fuggaaleeyye qulliyyeteꞌni elobaaxxa yaane assitaꞌni dananetixxa jiro hexxaꞌneechcho fakkaateemmaka mitte faarsanjo uundo. Isinna “fuggaaleeyye iittaten duuchchinii wodda yaaddo belo hexxaan,” hiyyeemman. (Faaro 73:12) Faarsanji uudaꞌneexxe ille uushshonaaꞌni kexxeexxa haranga yaadeemmaxxeꞌe, Yihowwaa ergatema laꞌo affeexxa afeemmaxxi adde xeꞌyiteemman. Tennenaaꞌni kexxeexxa iita hiyyeen: “Tennee yaane egeꞌnatee woꞌlanennexxa yanna gophissaaxxe yaane fakkaatteꞌe aneꞌni leelliteen.” (Faaro 73:14, 16 ) Matanga: “Lekka anxi orakenaaꞌni fula shiqqeemman, xaleꞌe iba shiqeennan” hiyyeen. (Faaro 73:2 ) Alberto hiyyemaake mitte dayyoꞌni iitta hexxeexxi yaane gelteemman.

8. Ille uushsho mitti dayyi maa kadaasha assiteemmaꞌa?

⁸ Alberto ‘gubaꞌetika maallaqa moorteetten’ hiyyemeꞌe dedhiki kuꞌlemeemman. Tennenaaꞌni kexxeexxa gercho kadeꞌe ergatematixxa baallenna gopheen, ittan tenne yaane egendeemmaxxi heddo gubaꞌe giddo hexxemmaxxi dayyuwwanna isooꞌo ulfeessa waaldeen. Isinna, “ijjenda qaraarfatenneni, aarennen, ittan alayyennen” hiyyeen. Tinni yaane manfasiinxa hedho isixxa miitoꞌaa waaleen, ittan onde wogga duuchcha qiide tureen. Tinni hedhotixxi baranno, ille uushsho noꞌoꞌni geltaa wodda ifi hira gonphaannole maachchi noꞌoꞌni geyaaxxa ifissaaxxen.

ILLE UUSHSHO DANDEꞌATI YESUUSI FAKKAATTE

9. Yesuusi hiini ille uushshuwwa gelteeꞌnaa ossee? (Fakke uudi.)

⁹ Yesuusi ille uushsho geltaa wodda hitta dandeennannoxxa eloka fakkeenna noꞌaa leellishsheen. Hado isikenaaꞌninna gadhike mannanaaꞌni isoꞌni gelteexxa ille uushshotixxa huje uundo. Isoo addataammabaaki hadi isingi isoo maraatiinsha laakkoꞌaamman. Addetixxi akeekisanoole kinni durriisuwwiki welti hujaꞌneeni hitaamman, ittan Roomeki sannachchuwwinna isoo cooraamman, geebe geerareꞌe muuxamakeꞌni shiyeen. (Marqo. 3:21,22; 14:55; 15:16-20, 35-37 ) Kaddomaleꞌe, tinni ille uushsho duuchchi isoꞌni geltoolenna mitte elobaaxxa yaane assebaangi osseen. Isike fakkeennanaaꞌni maa barantano?

10. Yesuusi ille uushsho dadeꞌeeki hittate? (1 Pheexiroosi 2:21-23)

¹⁰ 1 Pheexiroosi 2:21-23 yaansis.a Yesuusi ille uushsho noꞌoꞌni geltaa wodda hordonfannoka eloka fakkeenna noꞌaa leellisheen. Isi haano haasoꞌaaxxanna haano sammi hiyyaaxxa egꞌneemman. (Mat. 26:62-64) Isoo uuddaxxa haasoonneeke duuchchiinge dhariꞌaa hiissichcho hiissebaan. (Mat. 11:19) Haasoꞌaaxxa yanna isoꞌni fuggoxxa yaane geesisaammaka manna yowweemmabaan yookiin sodaachchiseemabaan. Yesuusi ‘qullummati murteessaakee ifi maganneti uwweemmaxxeꞌe’ ifi hiraꞌneexxa leellisheen. Yesuusi anni isiki Yihowwa isoꞌni geltaꞌneexxa hega uushsho uudaꞌneexxa egeꞌneemman. Ittan anni isiki hasiissaaxxe yannaꞌni ille uushsho balleessaaxxa addataamman.

11. Haasoonanno wodda ifi hirrannoki mitti mitti oruwwi hoonte? (Fakke uudi.)

¹¹ Ille uushsho noꞌoꞌni geltaaxxa yanna hasoonanno wodda ifi hirati Yesuusii fakkaata dandeennannon. Mitte mitte noꞌni geltaaxxi ille uushsho shollaxxe kadammaxxe tuffante saꞌa dandeennannon. Yookiin wele caaldeexxi rakko dadendashsha assitaaxxa yaane haasoꞌa gophateenna sammi hinannoxxi hexxaan. (Meki. 3:7; Yaꞌiqo. 1:19, 20) Mitte mitte wodda seeribeloxxa yaane uundano wodda haasoꞌanna hasissaaxxi yookiin dhugaateenna uurra hasissaan. (Huje 6:1, 2 ) Haasoonaannexxe kaddoole ititikinnaa ulfinniki haasoꞌatee dandeennennexxa duuchcha assa hasissaan.—1 Pheexi. 3:15.b

12. “Qullummati murteessaakee” ifi uunannoki hittate?

¹² “Qullummati murteessaakee” ifi uwwati noꞌonna Yesuusii fakkaata dandeennannon. Weli manji noꞌoꞌni murteessaa wodda yookiin seeribelo noꞌoo abidaa wodda Yihowwa dhugaate kaddeexxa yaane egꞌneexxa addantannon. Iitta hexxeexxi adde, yaane hosse galdoolenna Yihowwa toggi assaaxxa egenneennaxxeꞌe, ille uushsho geltaaꞌnaanni jabaanteꞌe ossinannoshsha gargaartaan. Yaane Yihowwaaꞌa waalati aarenna mufe qalbe noꞌoxxa madoossitabaashsha heqqedha dandeennannon. Iitta hexxeexxi hedino, seeribeloxxa yaane assinannoshsha, gammashshonna Yihowwani welti anfeennexxa firunte gonphannoshsha assa dandeettaan.—Faaro 37:8.

13. Ille uushsho geltaaꞌnaanni jabaanteꞌe ossa ittin edaꞌaa sunfannoshsha noꞌoo gargaartaaxxi yaane maachcho?

¹³ Dhugaaten, Yesuusika fakkeenna woꞌma kadeeke orinni hordofa dandeenaaꞌnon. Mitte mtte yanna udumiiꞌni yaandannoxxa yaane assinannoxxi yookiin haasoonannoxxi hexxaan. (Yaꞌiqo. 3:2) Ittan mitte mitte ille uushsho jaba qicini yaandannoshsha assitaaxxinna baꞌabaaka gadaaneessa uggite saxxaaxxinna hexxaan. Iitta hexxeexxi yaane, ateꞌni geltoole hitta hedheeke jeji giddo hexxettexxa Yihowwa egeꞌneexxa addat. Ittan Yesuusinna ille uushsho gelteeke manjo kademmaxxeꞌe yaaddo atixxa duuchcha gargaadhaan. (Ibra. 4:15, 16) Yihowwa, Yesuusike fakkeenna calla kadebaangi, ille uushsho dandeenne heꞌnannoshsha gargaaraaka gorsuwwanna uwween. Noꞌoo gargaaraaka gorsa alfateꞌe Roomeke maxaafanaaꞌni lame xiqse uundo.

“MUFE ISIXXEE BADO UWWE”

14. “Mufe isixxee bado uwwe” hiyyo maa hiyyote? (Roome 12:19)

¹⁴ Roome 12:19 yaansis. Phawuloosi Kirsitaana “mufe isixxee bado uwwe” hiyye jajjabeesseen. Tinni mufe ayyixxe? Qarqarakeꞌni hedheeke yaadixxe hundaayyeshsha, mufe tinni Yihowwaxxen. Mufe isixxee bado uunannoki, yanna isixxeꞌninna ori isikinni dhugaa fuldaashsha assoꞌaa waalatiten. Joonite hiyyemaake mitte dayyoꞌni ille uushsho geltechchi uduma iitta hiyyeen: “Aare hordofeꞌe fuggoxxa yaane assabeꞌnoshsha ifi hira hasisseemman, tinni kinni shollaxxemmabaan. Roome 12:19 keꞌni hedheeki yaadi Yihowwaaꞌa ossunteti heqqedhannoshsha gargaareen.”

15. Yaane toggi hitaa qicoꞌni, Yihowwaa heqqedha eloxxen hinaanneki mayeete?

¹⁵ Yihowwa yaane toggi assaa qicoꞌni isoo heqqedha noꞌaa laꞌo affeen. Iitta assinaannexxe kaddoole, ifike orinni rakko tikatee woꞌlaanatixxe baꞌonaaꞌninnaa sodaꞌanaaꞌni gargaaremmannon. Yihowwa noꞌoo gargaaraan. Isi, “Ille uushsho haꞌnooꞌni gelteexxa aneꞌni waalle; ani yaane toggi assannon” hiyyeeshshaten. Yihowwa “ani bado hiissannon,” hiyyaꞌneeka yaada adhdhinaannexxe kaddoole, yaane isi eloke kadeeke orinni abidaaxxa addatati, yaane duuchcha isoꞌni waala dandeennannon. Iimiꞌni uundeennaka Jooni gargaarteexxi yaane tenneten. Isinna iitta hiyyeen, “Yihowwa yaane toggi assaa qicoꞌni heqqedhaannexxe kaddoole, ani assatee woꞌlaanaannexxi iimi darre yaane eloxxe kaddaan.”

“FUGGOXXA ELOXXINNI INJIFATTE”

16-17. Kadha ‘fuggoxxa eloxxinni injifantannoshsha’ gargaartaaki hittate? (Roome 12:21)

¹⁶ Roome 12:21 yaansis. Phawuloosi higgeeni Kirsitaana “fuggoxxa eloxxinni injiffatte” hiyye jajjabeesseen. Yesuusinna koobatixxe lassa wodda: “Naapha haꞌnooka eeyye, ittan haꞌnoo shorraꞌneeke manniꞌaa kadhatte” hiyyeen. (Mat. 5:44) Isinna asseemmaki iittandemman. Roomeki sannachchi isoo misimaareti haqichchokeꞌn ganeꞌe leenxiseexxa yanna osseeka abara heda dandeennannon. Isoꞌni salphinninna ille uushsho gelteeꞌnaa osseexxa yanna, maachchi isoꞌni laqemeexxa woꞌma kadeeke garinni egeꞌna dandeennaaꞌnon.

¹⁷ Yesuusi isoꞌni geyeeke ille uushshotike abariꞌaa injifatemebaan. Anni isiki konne sannachuwwaꞌni tarkaaffe adhdhaashsha qorati irra: “Anna ankee, assinaꞌneexxa yaane egeꞌna gonpheemmaxxeꞌe, insaꞌneꞌaa gattowwaal hiyyi” hiyyeꞌe insaꞌneꞌaa kadhateen. (Luqa. 23:34) Noꞌoo miidheeke manjiꞌaa kadhantaannexxe kaddoole mufenna aare heenoꞌmitaꞌni metaan, matanga noꞌoo miidheeka manjo uundaanneki garinna jijjiiremaan.

18. Albertonna Jooni ille uushsho dandeennaashsha kadha gargaarteeki hittate?

¹⁸ Tenne qoꞌneꞌni iimiiꞌni uundeennaxxa lame dayyuwwa, kadha ille uushsho dandeennaashsha gargaarteen. Alberto iitta hiyyeen: “Ille uushsho aneꞌni geessisseexxe dayyuwwaa kadhatennen. Aneꞌni gelteexxe yaanenaaꞌni kexxeexxa aare waalonnaa Yihowwa aneꞌe gargaaraashsha heddole kadhatennen.” Gammachchiissaaxxa Alberto higgeenni Yihowwaa mageneeffatateꞌni hedheen. Jooni kinni iitta hiyyeen: “Anee miidheeke dayyiꞌaa heddole kadhataannan. Tinni kadhanna dayyo konneꞌni murteessebeꞌnongi, isoo eloke kadeeke orinni uudannoshsha gargaarteen. Ittan kadha tinninna sammotika nageꞌa alfannoshsha assiteen.”

19. Tenne aadake muuxami qicoꞌni maa assa hasissa? (1 Pheexiroosi 3:8, 9)

¹⁹ Tinni fuggoxxi aada baxxaa qicoꞌni ille uushsho noꞌoꞌni geltaaxxi egeꞌnendeexxen. Hiini yaanenna noꞌoꞌni futti hiteexxe kaddoole, Yihowwa gargaaraashsha isibaa kadhata ijjenda waallonnoqeꞌe. Yesuusi ille uushsho isoꞌni geltee wodda asseexxe yaanenni isoo fakkaatatinnaa Maxaafi Qullichchiinka hundaayyetika seera hujeteꞌni hosisati iittin ediꞌaa sunfo. Iitta assinaannexxe kaddoole Yihowwa noꞌoo eebbisaaxxa addata dandeennannon.—1 Pheexiroosi 3:8, 9 yaansis.