„ის იეჰოვას ერთგული იყო“

ᲘᲡ ᲘᲣᲓᲐᲡ ერთ-ერთი გამორჩეული მეფე და იეჰოვას ერთგული ადამიანი იყო. თუმცა მამამისზე, მეფე ახაზზე, იმავეს ვერ ვიტყვით. ახაზი ორგულობდა იეჰოვას და ბევრ ბოროტებას სჩადიოდა. მან ცრუ ღმერთებს თავისი ვაჟებიც კი შესწირა და ხალხიც გახვია ცრუ თაყვანისმცემლობაში (2 მეფ. 16:2–4; 2 მატ. 28:1, 3). თუმცა მისი ვაჟი მამის კვალს ნამდვილად არ გაჰყოლია. მართალია, ასეთი მამის ხელში მას ძალიან მძიმე ბავშვობა ექნებოდა, მაგრამ მან შეიყვარა იეჰოვა. ამ ახალგაზრდას ხიზკია ერქვა. ის მამამისის სიკვდილის შემდეგ 25 წლის ასაკში გამეფდა და მაშინვე შეუდგა რეფორმების გატარებას.

ხიზკიამ გააღო იეჰოვას ტაძრის კარები და მისი შეკეთება დაიწყო. ტაძრიდან კერპები მოაშორა და ორგანიზება გაუწია, რომ კვლავ შესრულებულიყო მღვდელმსახურება. მალევე მან იმაზეც იზრუნა, რომ პასექი აღენიშნათ. ხიზკიამ ჩრდილოეთ ათტომიან სამეფოშიც კი გაგზავნა მაცნეები, რომ ისინიც მოეწვია ამ დღესასწაულზე. მართალია, ეს ხალხი ცრუ თაყვანისმცემლობაში იყო გახვეული და ზოგს სასაცილოდაც არ ეყო ეს მოწვევა, მაგრამ ზოგიერთები ჩავიდნენ იერუსალიმში. ხიზკიას მაგალითით გულანთებულმა ხალხმა მოსპო კერპები და მაღლობები როგორც იუდაში, ისე ისრაელში. მეფემ სპილენძის გველიც კი დაამტვრია, რომელიც საუკუნეების წინ მოსემ იეჰოვას ბრძანებით გააკეთა, თუმცა ხალხმა მოგვიანებით კერპად აქცია.

მაგრამ ხიზკია სულ სხვა სირთულის წინაშე აღმოჩნდა. იეჰოვა უკვე დიდი ხნის მანძილზე აფრთხილებდა ჩრდილოეთ სამეფოს, რომ ორგულობის გამო მათ მტრები დაესხმებოდნენ თავს და გაანადგურებდნენ. ეს ასეც მოხდა. ხიზკია სულ რამდენიმე წლის გამეფებული იყო იუდაზე, როცა ასურელები თავს დაესხნენ ჩრდილოეთ სამეფოს და მოსახლეობის უდიდესი ნაწილი გადაასახლეს. იუდასაც იგივე ბედი ხომ არ ელოდა? ისინი ხომ უფრო მძიმედაც კი სცოდავდნენ, ვიდრე ჩრდილოეთ სამეფოს მკვიდრი მათი თანამემამულეები. თანაც იეჰოვა მათაც აფრთხილებდა, რომ ორგულობის გამო სასჯელი არ ასცდებოდათ. მისი სიტყვა კი არასდროს რჩება შეუსრულებელი.

და აი, დგება მისი სიტყვის შესრულების დროც. ასურელთა ჯარი სისასტიკით სახელგანთქმული მეფის, სინახერიბის, მეთაურობით იუდას უახლოვდება. ისინი ერთი მეორის მიყოლებით იპყრობენ იუდას ქალაქებს. ხიზკია მართლაც ცუდ დღეშია. თანაც, როგორც ჩანს, ყველაფერს ისიც ემატება, რომ ის სასიკვდილოდ სნეულდება. მას ალბათ იმაზეც ეფიქრება, რომ ჯერ კიდევ არ ჰყავს მემკვიდრე, რაც იმას ნიშნავს, რომ შეიძლება გაწყდეს დავითის სამეფო საგვარეულო ხაზი. ასეთ დღეში ჩავარდნილი ხიზკია იეჰოვას სთხოვს განკურნებას. ისიც უპასუხოდ არ ტოვებს მის ლოცვას და 15 წლით უხანგრძლივებს სიცოცხლეს. თუმცა ამასობაში ასურელები სულ უფრო უახლოვდებიან იერუსალიმს.

იეჰოვას წმინდა ქალაქი იერუსალიმი რომ დაიცვას, ხიზკია სინახერიბს დიდძალ ოქრო-ვერცხლს უგზავნის. თუმცა სინახერიბს არც ეს აჩერებს და კვლავაც გეგმავს იერუსალიმის აღებას. ხიზკიაც ყველანაირად ემზადება თავდასხმისთვის. ის ამაგრებს ქალაქს, გარედან კიდევ ერთ გალავანს აშენებს და იქ წყალსადენი შეჰყავს, რათა ალყის შემთხვევაში ხალხი წყლის გარეშე არ დარჩეს. მეფე ხალხსაც ამხნევებს და არწმუნებს იმაში, რომ ყველაზე ძლიერი ლაშქარიც კი უძლური იქნება იეჰოვას წინაშე.

ამასობაში სინახერიბი ხალხის დასაშინებლად სხვა მეთოდებსაც მიმართავს. ის იერუსალიმში გზავნის რაბშაკეს, რომელიც ხალხის თვალწინ მასხრად იგდებს მათ მეფესაც და ღმერთსაც. თუმცა ხიზკია არ ტყდება და ხალხსაც განამტკიცებს. სინახერიბი მუქარის წერილებსაც უგზავნის მეფეს, თუმცა არც ეს ჭრის. ის იეჰოვას ტაძარში მიდის და წერილებს მის წინაშე შლის ანუ, ფაქტობრივად, მთელ პრობლემას იეჰოვას ანდობს. ამის საპასუხოდ იეჰოვა მას ესაიას პირით ანუგეშებს. ის მას უმხელს, რომ სინახერიბი იერუსალიმში შესვლას ვერ მოახერხებს და მისი ჯარისკაცები ისარსაც კი ვერ გაისვრიან იქ.

იმ ღამით იეჰოვა ასურელთა ბანაკში თავის ანგელოზს გზავნის, რომელიც 185 000 ჯარისკაცს ანადგურებს. სინახერიბს თავზარს სცემს გაწყვეტილი ლაშქრის დანახვა და შერცხვენილი და დამცირებული სამშობლოში ბრუნდება. რაღაც დროის შემდეგ მას თავისი ღვთის, ნისროქის, ტაძარში საკუთარი ვაჟები კლავენ. ასეთი გამარჯვების შემდეგ ხიზკიას სიხარულს საზღვარი არ აქვს.

იეჰოვას წყალობით მეფემ მტერიც ჩამოიშორა და განიკურნა კიდეც. ამის შემდეგ მას ვაჟიც ეყოლა. სამწუხაროდ, მოგვიანებით ხიზკია გაამაყდა. თუმცა მას შემდეგ, რაც იეჰოვამ შეაგონა, თავი დაიმდაბლა. ის მართლაც ერთ-ერთი საუკეთესო მეფე იყო ისრაელის ისტორიაში. ურთულეს სიტუაციებში მან უდიდესი გაბედულება გამოიჩინა და სიკვდილამდე იეჰოვას ერთგული დარჩა.

წაიკითხეთ:

• 2 მეფეები 18:1–19:37

• 2 მატიანე 29:1–32:33

• ესაია 38:1–39:8

იმსჯელეთ:

რაში გამოჩნდა ხიზკიას გაბედულება?

გამოიკვლიეთ

1. 1) რა არქეოლოგიური აღმოჩენები ადასტურებს ბიბლიაში ხიზკიას შესახებ ჩაწერილს? (w11 5/1 15 ¶1–3) სურათი 1

   პასუხი:

   

   Zev Radovan/Alamy Stock Photo

2. 2) როგორ შესრულდა ხიზკიაზე ესაიას სიტყვები: „სწრაფი გესლიანი გველი იქნება“? (ეს. 14:28, 29; ip-1 190, 191 ¶4–6)

   პასუხი:

3. 3) რატომ არის საინტერესო სინახერიბის სიტყვები, რომელსაც არქეოლოგების მიერ აღმოჩენილ უძველეს პრიზმაზე ვხვდებით? (g 12/10 27 ¶3–5) სურათი 2

   პასუხი:

   

   © The Trustees of the British Museum. Licensed under CC BY-NC-SA 4.0. Source

4. 4) რა დასკვნამდე მივიდნენ 2003 წელს მეცნიერები, რომლებმაც გადაამოწმეს, მართლა ხიზკიას დროს იყო თუ არა გაყვანილი აღმოჩენილი წყალსადენი? (w09 5/1 27 ¶3–5)

   პასუხი:

რას სწავლობთ

• რა მაგალითს აძლევს ხიზკია მათ, ვისი მშობლებიც არ ემსახურებიან იეჰოვას? სურათი 3

  პასუხი:

  

• ყველაზე მეტად რა აფიქრებდა ხიზკიას, როცა ასურელები იერუსალიმის განადგურებით იმუქრებოდნენ? (2 მეფ. 19:15–19). ჩვენ როგორ შეგვიძლია მივბაძოთ მას?

  პასუხი:

• რა მხრივ შეგვიძლია მივბაძოთ ხიზკიას გაბედულებაში?

  პასუხი:

ფართოდ შეხედეთ საკითხს

• რას გასწავლით ეს ისტორია იეჰოვას შესახებ?

  პასუხი:

• როგორ უკავშირდება ეს ისტორია იეჰოვას განზრახვის შესრულებას?

  პასუხი:

• რას ჰკითხავთ მკვდრეთით აღმდგარ ხიზკიას?

  პასუხი:

გაიგეთ მეტი

იხილეთ, როგორ არის გაცოცხლებული ფილმის ამ მონაკვეთში 2 მეფეების 19:14–36.

„გთხოვ, გვიხსენი“ (5:38)

როგორ შესრულდა მიქას 5:5 ხიზკიას დროს და დღეს როგორ სრულდება?

„შვიდი მწყემსი და რვა მთავარი – ვის წარმოადგენენ ისინი დღეს?“ (w13 11/15 18–20 ¶9–18)