Mwei wa 6

Mavinda angĩ mũndũ no aũneenyʼe naĩ, ĩndĩ wamũsũngĩa na ndeto syĩ na mumo maũndũ no methĩwe me maseo. (Nth. 15:1) Kwasũanĩa ngelekanyʼo ĩno. Ve mwanake wa mwĩĩtu-a-asa ũmwe weekaa maũndũ mate maseo evithĩte. Ĩvinda yĩmwe mwĩĩtu-a-asa ũngĩ atavisye inyia ndeto ii o na ate na ũthũku nake: “Mwa kote ũthũku kwona ũemetwe nĩ kũea.” Inyia wa mwanake ũsu ambie o kũvindya na ĩndĩ amũsũngĩa atĩĩ: “Waweta wʼo, maũndũ ti maseo yu tũĩ, ĩndĩ no nĩendeee kũmũmanyĩsya. Wĩũka kũndumũsya Ali–Maketoni yavĩta; ĩvinda yĩu nĩwʼo twĩmanya ethĩwa nĩnĩemetwe.” Nũndũ inyia wa mwanake ũsu asũngĩie auĩtye, maendeeie kwĩkalanyʼa nesa e na mwĩĩtu-a-asa ũsu. Na nũndũ mwanae nĩweewie ndeto isu syonthe, nĩweewie eekĩwa vinya. Amanyie kaĩ inyia ndaĩ aamwĩkĩsya ngoo! Kyu kyatumie atila itindo ila waĩ nasyo. Ĩtina wa ĩvinda nĩwavatisiwe na esa kwĩtwa Mbetheli. Kwoou twĩthĩwe twĩ na ana-a-asa maitũ, twĩ mũsyĩ, kana twĩ na andũ angĩ tũtesĩ, ndeto sitũ “syĩthĩwe na mumo mavinda onthe, isamae mũnyũ.”—Ako. 4:6. w15 12/15 3:15, 17

Keka waĩ ũmwe wa amanyĩwʼa ala moonie kĩu, ndwĩsa kũlwa nĩ mũthenya ũsu. O na ndwĩthĩwa na nzika kana nĩwĩtĩkĩwʼe veva mũtheu, na mũno mũno ethĩwa nĩwakwata mũthĩnzĩo wa kũneena na kĩthyomo ũtesĩ. (Meko 2:6-12) Ĩndĩ etĩkĩwʼa mauta onthe metĩkĩawʼa na nzĩa ya ũsengyʼo o tondũ ala amanyĩwʼa ta 120 metĩkĩwʼe? Aiee. Nĩkĩ? Nũndũ o na ala angĩ maĩ Yelusaleme mũthenya ũsu mesie kwĩtĩkĩwʼa mauta maivatiswa. (Meko 2:38) Na ĩla metĩkĩiwʼe vai nĩmĩ sya mwaki syaaoneka mĩtwenĩ yoo. O na eka ũu, ti Aklĩsto onthe maitwʼĩka etĩkĩwʼa mauta metĩkĩawʼa veva mũtheu ĩla meũvatiswa. Mo Asamalia metĩkĩwʼe veva mũtheu kavinda kanini mamina kũvatiswa. (Meko 8:14-17) Ĩndĩ kwĩtĩkĩwʼa mauta kwa Kolinelio na andũ make kwaĩ kĩvathũkanyʼo vyũ na ũndũ andũ meesĩ nũndũ metĩkĩwʼe veva mũtheu o na mate avatise.—Meko 10:44-48. w16.01 3:3, 5

Nũndũ Aklĩsto etĩkĩwʼa mauta methĩawa menyivĩtye, nĩmetĩkĩlaa kana ti lasima methĩwe manengetwe veva mwingangĩ kũthonoka ala me na wĩkwatyo wa kwĩkala kũũ nthĩ. Mayonaa ta mesĩ maũndũ andũ angĩ matesa kũmanya kana ta mavuanĩwʼe maũndũ mana, o na maitataa kwonethya andũ kana mo nĩ ta ma vata mbee wa ala angĩ. O na mayĩsa kwĩa mũndũ nambĩĩe kũya kĩmũtũ na kũnywʼa mbinyu ĩvindanĩ ya kũlilikana kĩkwʼũ kya Yesũ nĩkwĩthĩwa atĩ meĩsilya nĩ ta mwĩtĩkĩsye mauta. Ĩndĩ nũndũ me na wĩnyivyo, nĩmethĩawa mesĩ kana Yeova nĩwe ũnyuvaa nũũ ũkũmwĩtĩkĩsya mauta. Aklĩsto etĩkĩwʼa mauta mayĩthĩawa meteele kũnengwa ndaĩa ya mwanya nĩ ala angĩ. (Aev. 1:18, 19; Avi. 2:2, 3) Veva wa Yeova wakũsĩĩie kĩla ũmwe e weka. Andũ mayaatangaasĩwa kana Mũklĩsto mũna nĩwetĩkĩwʼa mauta. Kwoou maisengʼaa moona andũ amwe mate kwĩtĩkĩla mĩtũkĩ kana mo nĩmetĩkĩwʼe mauta. O na Maandĩko nĩmatũkanĩtye tũiketĩkĩle mĩtũkĩ ĩla mũndũ wasya atĩ Ngai nũmũnyuvĩte akwatĩĩe kĩanda kĩna kya mwanya.—Ũvu. 2:2. w16.01 4:6, 7

Yeova nĩwalikĩlĩĩla maũndũ akamũsũvĩa Avalaamu na Sala kwa nzĩa ya kyama. Na ti ĩvinda yĩmwe yĩ yoka weekie ũu. (Mwa. 12:10-20; 20:2-7, 10-12, 17, 18) Maũndũ asu Avalaamu weeyonee na metho make nĩmalũlũmĩilye mũĩkĩĩo wake. Nĩ ũndũ ũtonyeka ithyĩ tũkethĩwa anyanyae ma Yeova? Ĩĩ, vyũ! Ũmanyi ũla wĩ Mbivilianĩ na ũvoo ĩũlũ wa andũ angĩ ala maĩ na mũĩkĩĩo nitonya kũtũtethya. Avalaamu aĩ na kaũmanyi kanini twasianĩsya na ũĩ mwingĩ ũla tũkwataa Mbivilianĩ ũmũnthĩ. (Nda. 12:4) Maũndũ asu me Ndetonĩ ya Ngai nĩmatonya kũtũtetheesya tũmũmanye nesa “mwene wa ĩtu na nthĩ,” na maitũtetheesya tũmũkĩe na kũmwenda. (Mwa. 14:22) Ĩla twamwĩwʼa Ngai nũndũ wa kũmũkĩa na kũmwenda, nĩtwĩyoneaa ithyĩ ene ũndũ kũmwĩwʼa Ngai kũtethasya. Nĩtwonaa ũndũ motao make matũsũvĩaa na ũndũ ũtũathimaa na aitwĩkĩa vinya. Nĩtwĩyoneaa kana kũmũthũkũma Ngai na ngoo yonthe kũtumaa twĩkala twĩ eanĩe, twĩ na mũuo, na twĩ atanu. (Sav. 34:8; Nth. 10:22) O ũndũ twaendeea kũmanya Ngai na kwona aitũathima, nowʼo mũĩkĩĩo witũ ũlũlũmĩlaa na ndũũ yitũ vamwe na Yeova ĩyĩthĩwa yĩ ndũmangu. w16.02 1:7, 8

Ndeto isu syĩ nthĩnĩ wa ĩandĩko yĩu syonanĩtye kana Meli nĩwasomete Maandĩko nesa. Ndeto isu syĩthĩawa iilyĩ ta imwe syĩ ĩla mboyanĩ ya Aana, inyia wa mwathani Samueli. (1 Sam. 2:1-10) No kwĩthĩwa ũneeninĩ ũsu Meli awetie ndeto syĩ kũndũ ta 20 Maandĩkonĩ. Maũndũ asu metũĩkĩĩthya kana Meli ndakĩaa kũneenea maũndũ ala weemanyĩĩtye Maandĩkonĩ. Nĩweekĩĩte ngoonĩ maũndũ onthe ala wamanyĩĩtwʼe nĩ ũla Mũnyanyae mũnene, Yeova Ngai, na nĩwamaweteaa andũ angĩ. O naitũ mavinda amwe Yeova no atũnenge wĩa tũtonya kwona wĩ vinya mũno. Ĩndĩ o tondũ Meli weekie, nĩtwĩnyivasye na tũyia maũndũ onthe mokonĩ ma Yeova, tũte na nzika kana nũkũtũtetheesya. No twĩthĩwe na mũĩkĩĩo ta wa Meli ethĩwa tũkethukĩĩasya nesa ĩla tũũmanyĩwʼa ĩũlũ wa Yeova na ieleelo syake, ethĩwa tũkavindĩĩasya kĩla tweemanyĩsya, na ethĩwa tũkatanĩaa kũtavya angĩ kĩla tweemanyĩsya.—Sav. 77:11, 12; Luka 8:18; Alo. 10:15. w16.02 2:17, 18

Kĩla mwaka andũ aingĩ ma mũika nthĩ yonthe nĩmavatisawa. (Mũta. 12:1) Kwoou asyai Aklĩsto na atumĩa ma kĩkundi nĩmendaa matiwe mate na nzika kana amũika ta asu meeka ũtwi ũsu na ngenda na mawĩka me na kĩtumi kĩseo. Ĩla mũndũ weeyumya na ĩndĩ avatiswa ethĩawa ambĩĩsya kyalo kya Ũklĩsto. Kyalo kĩu kĩtumaa aathimwa nĩ Yeova na ĩvindanĩ o yĩu kĩtumaa ambĩĩa kũtatwa nĩ Satani. (Nth. 10:22; 1 Vet. 5:8) Kwoou asyai Aklĩsto nĩmosaa ĩvinda mamanyĩsye syana syoo nĩ maũndũ meva mũmanyĩwʼa wa Klĩsto waĩle kwĩanĩsya. Namo atumĩa ma kĩkundi nĩmatetheeasya o nesa amũika ala mate na asyai Aklĩsto kwĩka masavu nĩ kana mamanye ethĩwa nĩmeyũmbanĩsye kũtwʼĩka amanyĩwʼa ma Klĩsto. (Luka 14:27-30) Nĩ kana mũndũ ambĩĩsye mwako na aiũmina nesa, nĩwaĩle kwĩyũmbanyʼa. O ta ũu, mũndũ nĩwaĩle kwĩyũmbanyʼa nesa nĩ kana amũthũkũme Yeova e mũĩkĩĩku “kũvika mũminũkĩlyo.”—Mt. 24:13. w16.03 1:1, 2

Mĩao ya Mose yanengetwe mbaĩ ĩmwe tũ, ĩla nĩ mbaĩ ya Isilaeli. Kĩvathũkanyʼo na ũu, andũ ala matwʼĩkie Isilaeli ma kĩ-veva maumĩte mbaĩnĩ syĩ kĩvathũkanyʼo na maeetwe na mĩeele yĩ kĩvathũkanyʼo. Mĩao ya Mose yaandĩkĩtwe ĩvianĩ, na nĩyo yatongoesye mbaĩ ya Isilaeli ĩla yaĩ Nthĩ ya Watho. Ĩndĩ Isilaeli ma kĩ-veva maaĩle kũatĩĩa “mwĩao wa Klĩsto” ũla ũtwʼĩĩkĩtwe nĩ myolooto ĩandĩkĩtwe ngoonĩ. “Mwĩao wa Klĩsto” waĩ kwondũ wa Aklĩsto onthe o na ethĩwa me va, na waĩ ũmatethye onthe. (Aka. 6:2) Isilaeli ma kĩ-veva nĩmatethekie mũno nũndũ Ngai nĩwamatongoesye aitũmĩa Mwana wake. Kavinda kanini ũla ũtianĩo mweũ ũtanambĩĩwʼa, Yesũ anenganie mĩao ĩlĩ ya vata. Mwĩao ũmwe wakonetye wĩa wa kũtavanyʼa. Nawʼo ũla ũngĩ wakonetye mwĩkalĩle wa aatĩĩi make na ũndũ maaĩle kũkua Aklĩsto ala angĩ. Mĩao ĩsu yanengiwe Aklĩsto onthe, na kwoou athaithi onthe ma wʼo ũmũnthĩ nĩmaĩle kũmĩatĩĩa, methĩwe me na wĩkwatyo wa kũthi ĩtunĩ kana nĩ wa kwĩkala kũũ nthĩ. w16.03 4:10, 11

Mũtumĩa atanesa kwambĩĩa kũmanyĩsya mwana-a-asa aĩle kwamba kwosa ĩvinda amũtetheesye ewʼe e mwĩanĩe ĩla wĩ nake, na aituma ndũũ nake. Ĩndĩ nũndũ nthĩ na syĩthĩo iivwʼananaa, maũndũ ala mũtumĩa wĩ vandũ vana ũtonya kwĩka nĩmatonya kwĩthĩwa me kĩvathũkanyʼo na ala matonya kwĩkwa nĩ mũtumĩa wĩ kũndũ kũngĩ. Ĩndĩ o na wĩthĩwe wĩkalaa va na wĩthĩawa ũkwatene ata, ĩla wamantha ĩvinda ũtũmĩe na mũmanyĩwʼa, wĩthĩawa no ta ũũmwĩa atĩĩ, “Nĩ vata naku.” O na kau no kwĩthĩwa alimũ matetavya amanyĩwʼa ndeto isu na kanywʼa, ĩla amanyĩwʼa onthe ala me na wendi wa kũmanyĩwʼa moona alimũ maimantha ĩvinda kwondũ woo, maileaa kũmanya kana nĩmonekaa me ma vata vyũ, o na ethĩwa nĩ ma nthĩ yĩva. Mwalimũ mũseo ti ũla wendete wĩa wa kũmanyĩsya tũ, ĩndĩ nĩ ũla wendete wĩa wa kũmanyĩsya vamwe na mũndũ ũla ũkũmũmanyĩsya. (Sianĩsya na Yoana 5:20.) Nĩkĩ ũsu nĩ ũndũ wa vata vyũ? Nũndũ mũmanyĩwʼa amanya kana nũmwendete, nĩwĩthĩawa eyũmbanĩtye kwĩmanyĩsya. Kwoou inywʼĩ atumĩa endwa, ĩla mũũmanyĩsya ana-a-asa ala angĩ mũikethĩwe alimũ tũ, ĩndĩ tumai ndũũ namo.—Nth. 17:17; Yoa. 15:15. w15 4/15 1:19, 20

Twasye Ndeto ya Ngai ĩeleetye ngewa ĩsu ya Mũsumbĩ Asalia (Mũsumbĩ Usia) kwa ũkuvĩ o tondũ ĩeleetye ngewa imwe, we no wambĩĩe kwona Ngai ta ũte mũlũngalu? (2 Asu. 15:7, 32; 2 Mav. 26:3-5, 16-21) Kana ũtwʼa Mbivilia nĩtũtavĩtye maũndũ matoetye ĩũlũ wa Yeova ala matũĩkĩĩthasya vyũ kana ĩvinda yonthe ekaa ũla waĩle, na nowe waĩle kũtwʼa ũla ũseo na ũla ũthũku? (Kũt. 32:4) Twamũmanya nesa Ngai ũsu wĩtawa Yeova, tũkamwenda mũnango na tũielewa nesa ũndũ wĩkaa maũndũ nginya wĩthĩe o na ti lasima tũkatinda tũeleawʼa maũndũ onthe ala wĩkaa. Ĩthĩwa na mũĩkĩĩo kana o ũndũ ũkwĩkĩa kĩthito kĩana kya kwĩmanyĩsya na kũvindĩĩsya kĩla Ngai ũkũtavĩtye Ndetonĩ yake, nowʼo ũkũendeea kũelewa nesa ũndũ wĩkaa maũndũ. (Sav. 77:12, 13) Na ĩndĩ kĩu kĩkalũlũmĩlya ngwatanĩo yaku na Yeova, wĩthĩe o naku nũkwĩwʼa yĩ vo. w15 4/15 3:8, 10

Ila syũmbe sya veva syĩtawa alaĩka syĩ “ũtonyi vinyanĩ.” Alaĩka nĩ oĩ mũno kwĩ andũ na me vinya kwĩ mo. Ĩndĩ alaĩka ala aĩkĩĩku matũmĩaa vinya woo kwĩka ũseo. Kwa ngelekanyʼo, mũthenya ũmwe mũlaĩka o ũmwe ooaie asikalĩ 185,000 ma Asuli, ala maĩ amaitha ma andũ ma Ngai. Vai mũndũ wĩsa kũaa andũ maingĩvĩte ũu e weka, o na nguthu ya ita tiyo yĩsa kũaa andũ maingĩvĩte ũu oou laisi. (2 Asu. 19:35) Nayo ĩvinda yĩngĩ mũlaĩka ũmwe atũmĩie vinya wake mwingĩ na ũĩ ũla waĩ nawʼo kũtetheesya atũmwa ma Yesũ maume kolokolonĩ. O na kau asikalĩ nĩmaiĩtwe vau nthĩnĩ, mũlaĩka ũsu amavĩtũkie matamwene, avingũa mĩomo, aumaalya atũmwa, na asyoka amĩvinga ĩngĩ! (Meko 5:18-23) O na kau alaĩka ala aĩkĩĩku matũmĩaa vinya woo kwĩka ũseo, Satani atũmĩaa vinya wake kwĩka ũthũku. Nake vinya ũla ũĩ nĩ mwingĩ mũno! Maandĩko mamwĩtaa “mũnene wa nthĩ ĩno.”—Yoa. 12:31. w15 5/15 1:5, 6

Onthe ala matwaanĩte na ala matatwaanĩte maĩle kwĩkĩa kĩthito mũno mevathane na maũndũ onthe ma ũlaalai. Wʼo ũndũ ũsu wĩ laisi? Ndwĩ laisi o na vanini! Kwa ngelekanyʼo, ethĩwa wĩ mũndũ wa mũika, no kwĩthĩwa wĩwʼaa ala ũsomaa namo mayĩkathĩĩa ũndũ makomaa na andũ mateũmaka, kana ũndũ matũmanĩaa simũnĩ mavisa na ngewa sya ũlaalai. Lilikana kũtũmĩa simũ kwa nzĩa ĩsu isionĩ imwe kũtalawa ũndũ ũmwe na kũnyaĩĩkya ũvoo ũkonetye kũlaalaa kwa syana. Mbivilia yaĩtye atĩĩ: “Ũla wĩkaa ũlaalai eyĩkaa mwĩĩ wake mwene naĩ.” (1 Ako. 6:18) Ũlaalai nũtumĩte andũ mathĩna mũno na makwʼa nũndũ wa kũkwatwa nĩ mowau ala makwatanawʼa kwĩsĩla kũmanyana kĩ-mwĩĩ. Namo amũika aingĩ mate atwae kana matatwaanĩte ala meekie ũlaalai maasya kana nĩmelilaa nĩkĩ meekie ũu. Isese sya maũvoo iyonanasya o na vanini thĩna ũla ũkwataa mũndũ eeka ũlaalai. Syonanasya maũndũ asu kwa nzĩa ĩtonya kũtuma tũĩkĩĩa kana kũtũla mĩao ya Ngai kũi ũthũku o na ũmwe. Woni ta ũsu nĩwʼo ũtumaa andũ makwatwʼa nĩ “ũkengani wa naĩ.” w15 5/15 2:14

Yesũ aĩ na ĩnee ta ya Ngai. Nĩ kyaũ kyatumaa Yesũ ethĩwa ailyĩ ũu? Nĩwasũanĩaa mũno ũndũ kĩla ũkũweta na kĩla ũkwĩka kĩtonya kũtuma ala angĩ mewʼa. Kwa ngelekanyʼo, ve mũndũ mũka ũmwe weesĩkĩe ta mwĩki wa naĩ. Mũthenya ũmwe nĩwookie vala ve Yesũ na ambĩĩa kũĩa etĩkĩsye methoi maũũnĩ ma Yesũ. Ĩndĩ Yesũ nĩwoonie kana mũndũ mũka ũsu nũkwĩlila na amanya kana amũneenyʼa naĩ etuma akwʼa ngoo mũno. Kwoou vandũ va kwĩka ũu, eekie kũmũkatha na amũekea. O na ĩla Mũvalisi waĩ vau wendie kwonanyʼa kana ti ta ũneeka nesa, Yesũ amũsũngĩie o kwa ĩnee. (Luka 7:36-48) Tũtonya kwĩka ata tũkonanyʼa kana twĩ ĩnee ta Ngai? Mũtũmwa Vaulo aandĩkie ũũ: “Ngombo ya Mwĩaĩi ndyaĩlwe nĩ ũkandanĩa, ĩndĩ nĩyaĩle kwĩthĩwa ĩ nduu kwa andũ onthe.” (2 Tim. 2:24) Tweeyosa ta ithyĩ twĩ na thĩna ũla wĩ na andũ asu, na twasũanĩa ũndũ ndeto sitũ itonya kũtuma mewʼa, nĩtũtonya kũneena na kwĩka maũndũ mekwonanyʼa twĩ na ĩnee o ta Yeova.—Nth. 15:28. w15 5/15 4:8, 9

Ĩla ana-a-asa maitũ me na mathĩna, no tũmakiakisye, tũkamekĩa vinya, na tũkamanenga ũtethyo ũla ũngĩ mekwenda. (Nth. 17:17) Kwa ngelekanyʼo, ĩla makwatwa nĩ mĩisyo no tũmatetheesye momĩĩsye. Kwasũanĩa ndeto ila syaneeniwe nĩ mũndũ mũka ũmwe ndiwa, ũla waanangĩwe nyũmba yake vyũ nĩ kĩuutani kĩmwe kyaĩ kĩthũku. Aisye ũũ aitũnga mũvea: “Nĩtũnga mũvea mũno nũndũ wa kwĩthĩwa nĩ ũmwe wa andũ ma Yeova, ti ũndũ wa kũnengwa ũtethyo wa kĩ-mwĩĩ wĩ wʼoka, ĩndĩ nũndũ wa kwĩkĩwa vinya.” O na ĩngĩ kwasũanĩa ũndũ mwĩĩtu-a-asa ũmwe ũte mũtwae waisye ĩla wesie kwĩyĩthĩa olanĩlwʼe vyũ oona nyũmba yake yanangĩtwe nĩ kĩuutani kyookanĩtye na mbua. Ĩla watethiwʼe aisye: “Ndyĩsĩ nĩasya ata. O na ndyĩsĩ ndonya kũelesya ata ũndũ ngwĩwʼa . . . Nĩ mũvea Yeova!” Nĩtũtanaa nũndũ twĩ na ana-a-asa mendete kũtetheesya ala angĩ kuma ngoonĩ. Ũndũ ũngĩ ũtumaa twĩwʼa mũyo mũno nĩ kana Yeova na Yesũ Klĩsto nĩmatũthĩnĩkĩaa vyũ. w15 6/15 1:17

Mbivilia nĩtũtetheeasya twĩvathane na mĩmeo mĩthũku kwa kũtũtavya ũndũ aũme maĩle kwĩkalanyʼa na aka na ũndũ aka maĩle kwĩkalanyʼa na aũme. Vate nzika ũtao ũsu nũtũvatĩte kũvũĩa ngũĩ nthũku mũndũ tũtatwaanĩte nake. Amwe nĩmatonya kwasya kana ti ũthũku kũtemethya mũndũ itho kana kwĩkanyʼa maũndũ kwa nzĩa ĩkwonanyʼa nĩ ta ũũmwenda. Maasya ũu ti ũthũku atĩ nũndũ ndwĩthĩawa ũnamũvũũsya vandũ. Ĩndĩ kũvũĩanĩa ngũĩ nthũku nĩkũtonya kũtuma mwambĩĩa kũsũanĩa maũndũ mate maseo, na mũthya mũyĩsa kwĩthĩa mwĩkie ũlaalai. Ti atĩ ũsu nĩ ũndũ ũtaaĩkĩka. Nĩwĩkĩkĩte, na no wĩkĩke ĩngĩ. Yosevu nĩwatũmĩie ũĩ ĩla wakomanie na ũndũ ta ũsu. Ĩvinda yĩmwe ĩla kĩveti kya vwana wake, Votivali, kyatatie kũmũsesenga makome ĩmwe, Yosevu nĩwaleile. Ĩndĩ kĩveti kyu kĩyaaekela vau. Kyaendeeie kũmũsesenga mũthenya na mũthenya mekalange ĩmwe. (Mwa. 39:7, 8, 10) Ĩndĩ Yosevu nĩwatwʼĩte kana ndakaaĩsa kwĩtĩkĩlana nakyo, na ndaketĩkĩla kĩendeee na ngewa isu kyaĩ nasyo, na kwondũ wa ũu asiĩĩa ngoo yake ndĩkalike mũmeo o na ũmwe mũthũku. w15 6/15 3:10, 11

Yeova ndendaa tũsũanĩe o ũndũ ithyĩ tũendeee kĩ-veva ĩndĩ nĩwendaa tũkasũanĩa ũndũ o namo ala angĩ maendeee kĩ-veva, o na ala matũvĩtĩsye. Mavinda maingĩ wĩthĩaa ti mavĩtyo manene matwĩkĩte, ĩndĩ mavinda asu nĩtũkwataa mwanya wa kwonanyʼa kana nĩtwendete ana-a-asa na eĩtu-a-asa, na kana nĩtwĩthĩawa twĩyũmbanĩtye kũmaekea o tondũ Ngai ũtũekeaa. (Ako. 3:13) Ũndũ ũmwe wa kyeva nĩ kana, nũndũ twĩ andũ me naĩ, mavinda angĩ nĩtũtonya kwĩthĩwa na ũthũ na mũndũ. (Ali. 19:18) Ĩla twambĩĩa kũtavya andũ angĩ ĩũlũ wa ũndũ tũvĩtĩwʼe, asu tũũtavya nĩmatonya kwĩlikya ngewanĩ isu na ũu nĩũtuma kĩkundi kĩaanĩka. Na tũkaeka ũndũ ta ũsu ũendeee, twĩthĩwa tũyonanyʼa nĩ ta tũũvũthya nthembo ya wovosyo na tũikwona tei wa Ngai ta kĩndũ. Na ĩndĩ twaema kũekeaa ala angĩ, Ĩthe witũ akaeka kũtũmĩa nthembo ĩla yaumiwʼe nĩ Mwana wake kũtũekea naĩ sitũ. (Mt. 18:35) Yesũ nĩwaeleisye ũndũ ũsu mũnango ĩtina wa kũmanyĩsya andũ ĩla Mboya ya Mwĩaĩi. (Mt. 6:14, 15) Ũndũ wa mũthya nĩ kana, twenda Ngai atũekeae naĩ sitũ, twaĩle kũtata vyũ tũikethĩwe na kĩmanyĩo kya kwĩkaa naĩ ngito.—1 Yoa. 3:4, 6. w15 6/15 5:9-11

Nĩ ũndũ mũnene mũno kwĩthĩwa twĩtĩkĩlĩtwʼe nĩ Yeova tũtetheesye kũlũlũmĩlya mũuo ũla ũnengete andũ make. Twĩkaa ũu ĩla twatavanyʼa ũvoo mũseo wa Ũsumbĩ twĩ na kĩthito na twatwʼĩkĩthya andũ aingangĩ amanyĩwʼa. Kĩla ĩvinda twatetheesya mũndũ eeyumya amũthũkũme Yeova, twĩthĩawa tũitetheesya andũ aingangĩ methĩwe na mũuo ũla Yeova ũnengete andũ make. (Isa. 26:15; 54:2) O na ĩngĩ tũtonya kũlũlũmĩlya mũuo ũla Yeova ũnengete andũ make kwa kũtata twĩthĩwe na mwĩkalĩle mũseango. Tweeka ũu tũkatumaa andũ ala angĩ menda kwĩthĩwa na mũuo ta ũsu twĩ nawʼo. Mavinda maingĩ kĩla kĩtumaa andũ menda kwĩkwatanyʼa na andũ ma Ngai vamwe na ũ Ngai mwene na Klĩsto nĩ mwĩkalĩle witũ mũseo na ũuu ũla twĩ nawʼo, ĩndĩ ti mũno ũmanyi wa Mbivilia ũla twĩthĩawa nawʼo. No nginya Yeova na Yesũ makethĩwa matanaa mũno ĩla moona mũuo ũla twĩ nawʼo ũmũnthĩ! Ũtanu ũla twĩthĩawa nawʼo ĩla tũũlũlũmĩlya mũuo ũsu no mũnini waelekanwʼa na ũtanu ũla tũkakwata ĩla tũkethĩwa tũiseũvya nthĩ ĩno yĩkale ũndũ mũũnda wa Eteni wailyĩ. w15 7/15 1:18-20

No nginya ũmũnthĩ kĩla mũndũ etwʼĩĩe nũũ ũla wonaa ta wĩkaa maũndũ nesa katĩ wa Ngai na Satani. Nũndũ wa ũu, ĩkũlyo nĩ atĩĩ, We nũtwʼĩte kuma ngoonĩ kũlũmanyʼa na Yeova kwa kũatĩĩa mĩao yake na myolooto yake vandũ va kwĩka ũndũ ũkwenda? We nũĩkĩĩaa kana vai kĩndũ kĩngĩ kĩkavetea andũ mathĩna eka Ũsumbĩ wa Ngai? Kana wonaa mũndũ e na ũtonyi wa kwĩtongoesya? Ũndũ wasũngĩa makũlyo asu no kũũtetheesye kũmanya ũndũ ũtonya kũsũngĩa ĩla andũ maũkũlya woni waku ĩũlũ wa kĩndũ kĩ na ngusanĩsyo. Kwasũanĩa ĩũlũ wa ũndũ ũũ: Kuma tene andũ ma siasa, andũ ala mateteaa andũ na syĩndũ, vamwe na ala mendaa kũete moalyũku kũũ nthĩ nĩmatatĩte mũno kũmina ngusanĩsyo katĩ wa andũ. No kwĩthĩwa mekaa ũu na ngoo ntheu na mate na kĩeleelo kĩthũku. Ĩndĩ Aklĩsto nĩmesĩ kana Ũsumbĩ wa Ngai wĩ wʼoka nowʼo ũtonya kũveta mathĩna, na nowʼo ũtonya kũatĩĩa nesa vyũ ũsili wa katĩ. Nũndũ wa ũu, kĩndũ kyonthe kĩ na ngusanĩsyo twaĩle kũkĩekanĩsya na Yeova. Na nengĩ vakatwʼĩka ĩla kwaumĩla ngusanĩsyo kĩla Mũklĩsto akendaa maũndũ mekwe kwosana na kĩla ũkwona kĩ kĩseo, we tyo ũkwona kana ikundi iaanĩka mĩtũkĩ mũno? w15 7/15 3:7, 8

Nĩtũtonya kũmanya kana Yeova nũtwendete mũno ĩla twasisya wũmbi wake? Ĩĩ, no tũmanye nũndũ wendo nĩwʼo watumie omba syĩndũ. (Alo. 1:20) Oombie nthĩ yĩ na syĩndũ ila itonya kũtũtetheesya twĩkale vo twĩ aima na tũiendeea nesa. Kwoou ndaatũmba twĩkale thayũ tũ, ĩndĩ atũmbie tũtanĩe ũ thayũ. Kwa ngelekanyʼo, no nginya tũye nĩ kana tũikakwʼe. Ĩndĩ Yeova nĩwaĩkĩĩthisye kana nthĩ yĩ na syĩndũ nzeo itatalĩka tũtonya kũya. O na eka ũu, atũmbĩte ũkethĩa ĩla tũũya lĩu nĩtũkũũtanĩa na nĩtũkwĩwʼa twĩ eanĩe. (Mũta. 9:7) Yeova atũmbie twĩ na ũtonyi wa kũtethya wĩa mũseo na wĩ na mosyao. Kĩu nĩ kĩndũ kĩngĩ kĩtumaa tũtanĩa thayũ. (Mũta. 2:24) Endaa andũ mausũsye nthĩ, mamĩkĩlye vinya, na maisumbĩka makũyũ, nyũnyi, na syũmbe ila ingĩ. (Mwa. 1:26-28) Na Yeova ko ũtatwendete mũno nũndũ atũmbie tũtonya kwĩthĩwa na nguma ta syake!—Aev.5:1. w15 8/15 1:4, 5

Maũndũ ala maendeee ĩũlũ wa nthĩ matumaa tũmanya nesa vyũ kana wathani ũla wĩ Mbivilianĩ nũkwetye kwĩanĩa, na kana nthĩ ĩno nthũku ĩkilyĩ kwanangwa. Kwoou tũyaĩlĩte kũsũanĩa atĩ twĩ na ĩvinda yingĩ yĩtiele nthĩ ĩno ĩyĩsa kũtwʼĩka nĩyavika yĩla ĩvinda “mbya ĩkũmi” vamwe na “ĩla nyamũ” ikokĩlĩla Mbaviloni Ĩla Nene, ĩla nĩyo ndĩni syonthe sya ũvũngũ. (Ũvu. 17:16) Tũikatate kũlwa kana nĩ kenda syĩke ũu, Ngai ‘akeekĩa ngoonĩ syoo’ kwĩka kwenda kwake. Na ũndũ ũsu ndwĩ ĩla ũtekĩka. (Ũvu. 17:17) Mũthya wa nthĩ ĩno wĩ vakuvĩ mũno. Nũndũ wa ũu, twĩ na kĩtumi kĩseo kya kũatĩĩa mwĩao wa Yesũ ũla wĩ ĩandĩkonĩ ya ũmũnthĩ. (Ũvu. 16:15) Nĩtũtwʼei ĩndĩ kũmũthũkũma Yeova twĩ na kĩthito na twĩ na mũĩkĩĩo kana ‘nũtetheeasya ũla ũmweteelaa.’—Isa. 64:4. w15 8/15 2:17

O na kau nĩtũkuaa nesa andũ ala mataatĩĩaa mĩao ya Ngai, mayaĩle kũtwʼĩka kĩtindo kitũ, o na tũyaĩle kũtuma ndũũ namo. Kwondũ wa ũu ũmwe wa Ngũsĩ sya Yeova ũte mũtwae kana ũtatwaanĩte ndaĩle kwĩvaanyʼa na mũndũ ũteyumĩtye amũthũkũme Ngai na ũte mũĩkĩĩku kwa Ngai, kana ũtaatĩĩaa myolooto yake. Kwĩkala wĩ mũĩkĩĩku nĩ kwa vata vyũ kwĩ kũmantha kwendwa nĩ andũ mataatĩĩaa mĩao ya Yeova. Kwoou twaĩlĩte kũtuma ndũũ na ala mekaa kwenda kwa Ngai. Ana ma Isilaeli nĩmoonie thĩna ũla ũkwataa ala meekwatanyʼa na itindo nthũku. (Kuma 23:24, 25; Sav. 106:35-39) Nũndũ mayaaĩkala me aĩkĩĩku, Yesũ esie kũmea atĩĩ: “Sisyai, nyũmba yenyu nĩtiĩtwe yĩ nthei.” (Mt. 23:38) Yeova nĩwakolile mbaĩ ya Isilaeli, na ũathimo ũla wesaa kũmĩnenga anenga kĩkundi kĩla kyaĩ kĩnambĩĩwʼa kya Kĩklĩsto.—Meko 2:1-4. w15 8/15 4:7, 8

Yeova Ngai oombie andũ me na ũthasyo wa kwĩnyuvĩa nĩ kana wĩthĩe nĩmatonya kwĩnyuvĩa ũndũ ũmwe katĩ wa maũndũ mana. O na ĩngĩ Ngai nĩwanengie ala andũ elĩ ma mbee kĩndũ kĩseo mũno kya kũmatongoesya. Kĩndũ kyu nĩ wasya wa ngoo, nawʼo nĩ wasya wĩ nthĩnĩ witũ ũtũtetheeasya kũvathũkanyʼa ũseo na ũthũku. Wasya wa ngoo watũmĩwa nesa no ũtũtetheesye kwĩka ũla ũseo na ũkatũsũvĩa tũikeke ũthũku. Kwoou mũthĩnzĩo ũũ wa wasya wa ngoo nĩ nzĩa ĩmwe ĩtwonasya kana Ngai nũtwendete na kana nĩwendaa andũ onthe mekae ũla ũseo. O na ũmũnthĩ andũ onthe masyaawa me na wasya wa ngoo. (Alo. 2:14, 15) Ĩndĩ o na kau andũ aingĩ maiatĩĩaa myolooto ĩla yĩ Mbivilianĩ, mavinda maingĩ amwe nĩmekaa ũla ũseo na makevetangana na ũla ũthũku. Wasya wa ngoo nũsiĩĩaa andũ aingĩ maikeke maũndũ ala mathũku vyũ. We wĩona nthĩ ta yĩthĩwa ĩthũkĩte ata keka andũ mai wasya wa ngoo? Kwoou twaĩle kũtũnga mũvea mũno nũndũ Ngai oombie mũndũ e na wasya wa ngoo! w15 9/15 2:1, 2

Ndeto isu syaandĩkiwe nĩ mũtũmwa Yoana nĩ ndeto twaĩle kũivindĩĩsya mũno. Ĩla Yoana waandĩkie, “Sisyai ũndũ wendo wa Asa ũilyĩ ũla ũtwendete nawʼo,” endaa kwĩkĩa Aklĩsto vinya masũanĩe mũno nĩ maũndũ meva monanasya kana Ngai nũmendete na we ũ Ngai amendete mũno wĩana ata. Kũmanya nesa nĩ maũndũ meva matwonasya kana Yeova nũtwendete na atwendete mũno wĩana ata, kũkatuma tũmwenda mũno na kũilũlũmĩlya ngwatanĩo yitũ nake. Ĩndĩ andũ amwe mayonaa Ngai ta wĩsa kwenda andũ. Monaa Ngai ndalũnganaa na andũ ĩndĩ endaa mamũkĩe na mayĩka kĩla ũkũmatavya. Ve angĩ namo ũtonya kwĩthĩa nũndũ wa kũmanyĩwʼa maũndũ ma ũvũngũ kwa ĩvinda ĩasa, monaa Ngai atendete andũ na atendwa nĩ mũndũ. Na ĩndĩ ve ala maĩkĩĩaa kana Ngai endete andũ onthe ateũkũlya mailyĩ ata kana mwĩkalĩle woo ũilyĩ ata. Ĩndĩ ĩla wambĩĩe kwĩmanyĩsya Mbivilia nĩweethĩie kaĩ wendo nĩyo nguma ĩla nene Yeova wĩsĩkĩe nayo, na kana wendo ũsu nĩwʼo watumie anengana Mwana wake atwʼĩke nthembo kwondũ witũ.—Yoa. 3:16; 1 Yoa. 4:8. w15 9/15 4:1, 2

Ĩla Vaulo waisye ũu ndoonanasya kana ũkanyʼo ti wa vata kana ndũtethya, nũndũ ongelile kwasya: “Ĩndĩ ĩtina nĩkũmaeteae ala mamanyĩĩtwʼe nĩkwʼo ũsyao wa mũuo nawʼo nĩ ũsyao wa ũlũngalu.” Ethĩwa nĩtũmwendete Yeova twaĩle kwĩthĩwa twĩ metho tũikese kũvũthya ũtao ũla watũnenga kana kwambĩĩa kwĩwʼa woo ĩla watũtaa. Nũndũ andũ aingĩ ũmũnthĩ nĩmeyendete na mekaa ũndũ mekwenda, mayendete kũtavwʼa ũndũ mekwĩka, o na mayendaa kũatĩĩa ũtao. O na ala monekaa ta maatĩĩe ũtao kana ũkanyʼo mekaa ũu matekwenda. Ĩndĩ Aklĩsto mataĩtwe kana mayaĩlĩte ‘kũvwʼananwʼa na nthĩ ĩno.’ Ĩndĩ maĩlĩte kũmanya na kũatĩĩa “kwenda kwa Ngai . . . kũla kwĩanĩu.” (Alo. 12:2) Yeova nũtũnengae ũtao ĩvinda yĩla yaĩlĩte aitũmĩa andũ make. Ũtao ũsu wĩthĩawa ũkonetye maũndũ maingĩ ta mwĩkalĩle witũ twĩ na mũndũ tũtatwaanĩte nake, itindo sitũ, na syĩndũ ila twĩtanĩthasya nasyo. Tweetĩkĩla na ngenda ũtao ta ũsu na twaũatĩĩa, twonanasya kana nĩtũtũngaa mũvea na nĩtũmwendete Yeova kuma ngoonĩ.—Yoa. 14:31; Alo. 6:17. w15 9/15 5:13, 15

Tũyamba kũlũlũmĩlya mũĩkĩĩo witũ na vinya witũ ene. Nĩkĩ? Nũndũ mũĩkĩĩo nĩ kĩlungu kya ũsyao wa veva mũtheu wa Ngai. Kwoou twĩ oĩ ethĩwa tũkavoyaa tũendeee kũnengwa veva mũtheu o tondũ Yesũ ũtwĩĩte twĩke. Lilikana Yesũ atũĩkĩĩthĩtye kana Asa ndaleaa “kũmanenga Veva Mũtheu ala mamwĩtasya.” (Luka 11:13) Mũĩkĩĩo witũ wamina kũlũma twaĩlĩte kũendeea kwĩkĩa kĩthito ndũkese kũleela. No tũelekanyʼe mũĩkĩĩo witũ na mwaki. Mavinda maingĩ ĩla mwaki wavuvwa, wakanaa ũkethĩa wĩkĩtye nĩmĩ kwĩkya. Ĩndĩ walea kwongelwa ngũ, ũvoaa na vakatiala makaa, namo makaa asu maekanwa namo mesaa kũtwʼĩka mũu. Ĩndĩ ũkaendeea kũkitanyʼa mwaki ũsu na kũwongela ngũ, ndwĩsa kũvoa. O ta ũu, mũĩkĩĩo witũ ndũkaleela ethĩwa tũkemanyĩasya Ndeto ya Ngai kĩla ĩvinda. Twaendeea kũsoma na kũvindĩĩsya Ndeto ya Ngai, tũkamyenda mũno, o na nĩtũkamwenda mũno Mũandĩkĩthya wayo. Ũu nawʼo ũkatuma twenda kũlũlũmĩlya mũĩkĩĩo witũ na twenda kũtata ndũkese kũleela. w15 10/15 2:6, 7

Andũ ma saenzi nĩmethĩĩte kana nĩ laisi kwĩsa kũlilikana kĩndũ ũsomie na wasya. O nake Mũmbi witũ, ũla nowe woombie wʼongo, nĩwĩsĩ ũu. Nĩkyo kĩtumi weeie Yosua ‘asũanĩae’ yĩla ĩvuku ya Mĩao. Ndeto “kũsũanĩa” ĩla yĩ vau yonanasya kũsoma na wasya wĩ nthĩ. (Yos. 1:8) O naku wasoma Mbivilia na wasya wĩ nthĩ nũtonya kwĩsa kwĩthĩa kana kĩlĩko kyaku nĩkĩũkwatya nesanga kĩla ũũsoma. O na kũsoma kwa nzĩa ĩsu no kũũtetheesye kũtũnga kĩlĩko kyaku vamwe. Mũndũ ndatũmĩaa vinya mwingĩ ĩla ũkũsoma, ĩndĩ ĩla watwʼa kũsũanĩa kĩla wasoma no nginya ekĩe kĩthito kingĩ nĩ kana atũnge kĩlĩko vamwe. Nĩkĩ? Nũndũ kĩlĩko kya mũndũ kyendete kũsembea tũmaũndũ tũla tũtekwenda mũndũ asũanĩe mũno. Kwoou ĩvinda yĩla ĩseo ya kũsũanĩa nesa nĩ ĩla ũte na mĩnoo, wĩ vandũ ũte kũthokoeka, na ũtekwelelũkwʼa kĩlĩko. Kwa ngelekanyʼo, mũandĩki ũmwe wa Savuli eethĩie kana asũanĩaa nesanga vyũ ĩla wesa kũvindũka ũtukũ. (Sav. 63:6) Nake Yesũ, o na kau aĩ mũndũ ũte na naĩ, nĩweesĩ kana mũndũ nũtethekaa mũno athi kũndũ kũuĩtye nĩ kana asũanĩe na aivoya.—Luka 6:12. w15 10/15 4:4, 6, 7

Ĩvinda yĩmwe Yesũ aitavanyʼa Kalilii ve andũ mamwĩthukĩĩisye na mekala ta me na wendi wa kũmũatĩĩa. (Yoa. 6:22-24) Ĩndĩ nũndũ Yesũ aĩ atonya kũsoma ngoo syoo, nĩwamanyie kana andũ asu mendaa kũya mũno mbee wa kĩla wamanyĩasya. Kwoou nĩwamanyie thĩna woo waĩ va, amalũnga auĩtye, na amaelesya ũndũ matonya kwĩka. (Yoa. 6:25-27) O na kau ndũtonya kũsoma ngoo ya mwana waku, no wonanyʼe wĩ na ũmanyi kwa kũtata ũmanye ũndũ mwana waku wĩwʼaa ĩũlũ wa wĩa wa kũtavanyʼa. Asyai aingĩ ĩla mathi kũtavanyʼa na syana syoo nĩmatilĩlaa ũtavanyʼa mavinda kwa mavinda nĩ kana syana syoo ithyũmũe na iiya kaĩndũ. Ĩndĩ ĩla weeka ũu ndũkeanĩawe nĩ kĩla wene na kwoou nũseo ũkekũlya-ĩ, ‘Mwanawa ewʼaa mũyo ĩla tũendeee na kũtavanyʼa kana nĩ ĩla twathyũmũa?’ Wamanya kana syana syaku iyĩwʼaa mũyo mũno ĩla iũtavanyʼa, nũseo mũkavanga ĩmwe nasyo kĩla itonya kwĩka. Iaĩe maũndũ mana syĩke ĩla ũũtavanyʼa nasyo nĩ kana syĩwʼe no syeeka ũndũ. w15 11/15 1:10, 11

Ngai witũ nũtwendete na mavinda onthe ekaa kĩndũ wĩsĩ nĩkĩũtethya vyũ ala mamũthũkũmaa me aĩkĩĩku. Mbivilia ĩtũtavĩtye ũũ: “Akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo.” Yĩu kote ĩvinda ĩseo mũno yathĩtwe onthe ala mewʼaa mũyo kuma ngoonĩ masũanĩa wendo wa Yeova, vamwe na ala mamwĩwʼaa tawe Mũsumbĩ witũ! Ndeto ya Yeova ĩtũtavĩtye atĩĩ: “Sisya nesa mũndũ mwĩanĩu, na keteea mũndũ mũlũngalu; nĩkwĩthĩwa mũminũkĩlyo wa mũndũ ũsu ũkeethĩwa mũuo. Ĩndĩ avĩtanʼya, makaanangwa vamwe.” (Sav. 37:37, 38) “Mũndũ mwĩanĩu” nĩ ũla ũmũmanyaa Yeova na Mwana wake na wĩkaa kwenda kwa Ngai ate kũingĩĩwʼa. (Yoa. 17:3) Mũndũ ta ũsu nĩwĩthĩawa esĩ kana ndeto ii syĩ ĩandĩkonĩ ya 1 Yoana 2:17 ti sya ngũĩ: “Nthĩ nĩnĩũvĩta, na wendi wayo: ĩndĩ ũla wĩkaa kwenda kwa Ngai ekalaa tene na tene.” O ũndũ mũthya wa nthĩ ĩno ũthengeee, nowʼo ve na vata mũnene wa kũatĩĩa ndeto ii: “Mweteele Yeova, na kwata nzĩa yake.”—Sav. 37:34. w15 11/15 3:11, 12

Andũ ma Ngai nĩmatũmĩĩte nzĩa syĩ kĩvathũkanyʼo nĩ kana mavikĩsye andũ aingĩ vyũ ũndũ vatonyeka ũvoo mũseo. Kũtũmĩa nzĩa isu kwatetheeisye mũno mũno ĩvinda yĩla ‘akethi maĩ avũthũ.’ Kwa ngelekanyʼo, mwambĩĩonĩ wa myaka ya 1900 mathangũ ma maũvoo nĩmatũmĩawa kũvikĩsya andũ aingĩ ũvoo kũndũ kũla andũ ma Yeova mataĩ aingĩ. Kĩla kyumwa Charles Taze Russell atũmĩaa telegraph kũtũma ũvoo mũna wa Mbivilia kambunĩnĩ ila syũmbanasya maũvoo. Nasyo kambunĩ isu syakwata ũvoo ũsu syasyokaa ikatũmĩa nzĩa o ĩsu kũtũmĩa aandĩki ma mathangũ ma maũvoo ala maĩ Amelika, Canada, na Europe. Nĩvatonyeka ũkethĩa kana kũvika mwaka wa 1913, mathangũ ma maũvoo 2,000 nĩmavikĩisye andũ 15,000,000 maũvoo ma Mwana-a-asa Russell! Ve nzĩa ĩngĩ nzeo ya kũnyaĩĩkya ũvoo mũseo ĩla yambĩĩiwʼe ĩtina wa kĩkwʼũ kya Mwana-a-asa Russell. Nzĩa yĩva? Matukũ 16, Mwei wa 4, 1922, Joseph F. Rutherford nĩwaumisye ũvoo ũmwe katĩ wa maũvoo ala ma mbee waumisye isesenĩ sya letiũ. Eethukĩĩwʼe nĩ andũ ta 50,000. Na ĩndĩ Matukũ 24, Mwei wa 2, 1924, Ngũsĩ sya Yeova nĩsyavingũie kĩsese kya letiũ kĩla kyeetawa WBBR. w15 11/15 5:10, 11

Yeova no ũtumaa syũmbe syake syĩthĩwa kĩla ũkwenda. Kwa ngelekanyʼo, kwosana na kĩla ĩsyĩtwa yake yonanasya, Ngai nĩwatumie Noa atwʼĩka vundi wa ngalawa, atuma Mbesaleli atwʼĩka ndũĩka ya kũseũvya syĩndũ, atuma Ngiteoni atwʼĩka ngũmbaũ ya kaũ, na atuma Vaulo atwʼĩka mũtũmwa kwa mbaĩ ingĩ. Maũndũ asu meonanyʼa kana ĩsyĩtwa ya Ngai nĩ ya vata mũno andũnĩ make. Na ĩla kamitii yĩtawa New World Bible Translation Committee ndyaĩ ĩvũthĩĩsya ũndũ ũsu kwa kũveta ĩsyĩtwa ya Ngai Mbivilianĩ. Mbivilia ya New World Translation, ĩla ĩalyũlĩtwe kwa ithyomo mbee wa 130, nĩnengete ĩsyĩtwa ya Ngai ndaĩa nũndũ yĩ na ĩsyĩtwa yĩu vala yaĩlĩte. (Mal. 3:16) Ĩndĩ Mbivilia ila ialyũlawa matukũ aa iyĩthĩawa na ĩsyĩtwa ya Ngai. Vandũ va ũu syĩ na masyĩtwa ma ũnene ta “Mwĩaĩi” kana masyĩtwa ma ngai sya kĩthĩo. Kĩu nĩ kĩtumi kĩmwe kĩnene kĩtumĩte Nzama Ĩla Ĩtongoesye ya Ngũsĩ sya Yeova ĩtata ũndũ vatonyeka ĩĩkĩĩthye kana andũ aingĩ vyũ nĩmakwata Mbivilia ĩla ĩnengete ndaĩa ĩsyĩtwa ya Ngai. w15 12/15 2:7-9

Vai nzika kana Ngai e ũtonyi ĩũlũ wa mwĩĩ wa mũndũ. Mbivilia nĩyĩĩkĩĩthĩtye ũu. Ata? Ve mavinda wakũnie andũ na mowau ta kwa ngelekanyʼo, ĩvinda ya Avalaamu nĩwakũnie Valao na ũwau, na ĩvinda ya Mose nĩwakũnie Miliamu na ũwau. (Mwa. 12:17; Mot. 12:9, 10; 2 Sam. 24:15) O na Ngai nĩweeie Aisilaeli kana mesa kwĩthĩwa mate aĩkĩĩku, akamakũna na “kĩla ũwau, na kĩla ũthĩnʼyo.” (Kũt. 28:58-61) Ĩndĩ Yeova aĩ o atonya kũvetanga mowau kana kũmasiĩĩa. (Kuma 23:25; Kũt. 7:15) O na aĩ o atonya kũvosya andũ. Kwa ngelekanyʼo, ĩla Yovu wawaĩte ũkethĩa ekũlya keka no ũkwʼa, Ngai nĩwamũvoisye! (Yovu 2:7; 3:11-13; 42:10, 16) Kwoou vate nzika, Ngai e ũtonyi wa kũvosya mũndũ. O na Mwana wake ailyĩ oou. Nĩtũsomaa Mbivilianĩ kana Yesũ nĩwavoisye andũ mawaĩte mangũ, mũngʼathũko (kĩsala), na angĩ maĩ ilalinda na onzu mamutha. (Mt. 4:23, 24; Yoa. 9:1-7) Twĩkĩawa vinya mũno twasũanĩa kana maũndũ asu Yesũ weekie moonanasya maũndũ manene ala ũkeka nthĩ nzaũ. w15 12/15 4:3, 4