Kĩlya Vinya Thĩna wa Kwĩwʼa ta wĩ Weka kwa Kũtetheesya Angĩ—Ũndũ Mbivilia Yaasya

Andũ ĩũlũ wa nthĩ mewʼaa ta me oka na ta me vaasa na ala angĩ. Andũ amwe me na ũtũĩka maũndũnĩ ma ũiiti maĩkĩĩaa kana kũtetheesya angĩ nĩ nzĩa ya kũkitana na thĩna ũsu.

• “Kũtetheesya ala me na vata no kũtume tũkĩlya vinya thĩna wa kwĩwʼa ta twĩ ithyoka kana kwĩwʼa ala angĩ ta me vaasa naitũ.”—U.S. National Institutes of Health.

Mbivilia nĩtũnengete ũtao mũseo ũkonetye kĩla tũtonya kwĩka tũtetheesye angĩ. Twaatĩĩa kĩla ĩwetete no tũkĩlye vinya thĩna wa kwĩwʼa ta twĩ ithyoka.

Ũndũ ũtonya kwĩka

Ĩthĩwa wĩ mũlau. Mantha myanya ya kũtũmĩa ĩvinda vamwe na ala angĩ, na mũno mũno ũyĩka ũu mwenene. Ĩthĩwa wĩyũmbanĩtye kũolela angĩ kĩla wĩ nakyo. Weeka ũu, nĩvatonyeka makaũtũngĩa mũvea, na kĩu kĩituma mũtuma ndũũ.

• Mwolooto wĩ Mbivilianĩ: “Ĩmanyĩsyei kũnengane, na andũ makamũnenga.”—Luka 6:38.

Tetheesya ala angĩ. Mantha myanya ya kũtetheesya ala me na mathĩna. Na ũndũ ũmwe ũtonya kwĩka ũu nĩ kũmewʼĩa ĩnee kwa kũmethukĩĩsya kana kũmeka maũndũ meũmatetheesya maikewʼe me aitavĩe mũno.

• Mwolooto wĩ Mbivilianĩ: “Mũnyanya nĩwĩthĩawa vo atetheesye mavinda onthe.”—Nthimo 17:17, Contemporary English Version.

Nĩ kana ũkwate ũvoo mwingangĩ wonanĩtye ũndũ ũtonya kwĩthĩwa na ngwatanĩo nzeo na ala angĩ, soma kĩlungu “Kuboresha Uhusiano wa Familia na Marafiki.”