Ũndũ Ũsumbĩ wa Ngai Ũkamina Kaũ

Makaũ ala me ĩũlũ wa nthĩ maendeee kũete wanangĩko mũnene, na nĩmatumĩte andũ mathĩna mũno. Sisya livoti ii iatĩĩe:

• ‘Mwaka mũthelu, andũ aingĩ mũno nĩmanakwie nũndũ wa kaũ, mũno mũno nthĩ ya Ethiopia na ya Ukraine, kwĩ ĩvinda yĩngĩ o na yĩva kuma mwaka wa 1994.’—Peace Research Institute Oslo, Matukũ 7, Mwei wa 6, 2023.

• “Kaũ ũla wĩ Ukraine nĩ ũmwe katĩ wa ithokoo ila inathũkĩĩie mwaka wa 2022. Mwaka mũthelu, ithokoo sya siasa inongelekile ĩũlũ wa nthĩ yonthe na kĩlungu kya 27 ĩũlũ wa 100, na ninatumie andũ vakuvĩ mbilioni 1.7 maũmĩa kana makwata wasyo.”— The Armed Conflict Location & Event Data Project (ACLED), Matukũ 8, Mwei wa 2, 2023.

Mbivilia nĩnenganĩte wĩkwatyo. Yaĩtye kana “Ngai wa ĩtunĩ akaũngamya ũsumbĩ ũtakaanangĩka tene na tene.” (Ndanieli 2:44) Ũsumbĩnĩ ũsu, kana silikalĩnĩ ĩsu, Ngai akatuma “makaũ mathela kũvika kĩtulu kya nthĩ.”—Savuli 46:9.