ĨSOMO YA 11
Ũndũ Ũtonya Kũtetheka Mũnango Yĩla Ũũsoma Mbivilia
We waasũanĩa kwambĩĩa ũndũ mũna mũnene ĩndĩ ũyĩwʼa ta ũtetonya kũwĩanĩsya? No kwĩthĩwa wasũanĩie kũaanyʼa wĩa ũsu, ũũtethasye o kawĩla kanini kwa kanini, nĩ kana maũndũ methĩwe laisangi. Ũu nowʼo ũtonya kwĩwʼa yĩla wenda kwambĩĩa kũsoma Mbivilia. No wĩkũlye-ĩ, ‘Yu nĩambĩĩla va?’ Ĩsomonĩ yĩĩ nĩtũkwona maũndũ amwe mate vinya matonya kũũtetheesya nĩ kana ũtanĩae kwĩmanyĩsya Mbivilia.
1. Nĩkĩ twaĩle kũsomaa Mbivilia kĩla mũthenya?
Mũndũ ũla ũsomaa Mbivilia kĩla mũthenya, kana ‘mĩao ya Yeova,’ akeethĩawa e mũtanu na akaendeea nesa. (Soma Savuli 1:1-3.) Ambĩĩa kwa kwĩmanyĩasya o kwa ndatĩka nini kĩla mũthenya. O ũndũ waendeea kũmanya Ndeto ya Ngai nesanga, nowʼo ũkatanĩaa kũmĩsoma.
2. Nĩ kyaũ kĩtonya kũũtetheesya ũtetheke yĩla ũũsoma Mbivilia?
Nĩ kana tũtethekae mũno yĩla tũũsoma Mbivilia, nũseo tũkambaa kũũngama na tũivindĩĩsya kĩla twasoma. Nĩtwaĩle kũsoma na ‘tũisũanĩĩa.’ (Yosua 1:8) Yĩla ũendeee kũsoma nũseo ũkekũlasya makũlyo amwe ta: ‘Ũndũ ũũ wĩmanyĩsya kyaũ ĩũlũ wa Yeova Ngai? Ndonya kũtũmĩa ũndũ ũũ ata thayũnĩ wakwa? Ndonya kũtũmĩa mĩsoa ĩno ata nĩ kana nĩtetheesye andũ angĩ?’
3. Ũtonya kumya ĩvinda ya kũsoma Mbivilia va?
We nĩwĩwʼaa ũte ũndũ wĩ laisi kũkwata ĩvinda ya kũsoma Mbivilia? Aingĩ maitũ twĩwʼaa oou. Ĩndĩ nũseo ũkatata kũtũmĩaa ‘ĩvinda yaku nesa.’ (Aeveso 5:16) Na nĩ kana wĩke ũu, nũseo ũkavangĩĩa saa ila ũkasomaa Mbivilia kĩla mũthenya. Andũ amwe manyuvĩte kũsomaa Mbivilia kwakya tene. Angĩ makanyuva masaa ma mũthenya, ta kwa ngelekanyʼo, masaa ma kũthyũmũa. Ĩndĩ ve angĩ namo mamĩsomaa matanamba kũkoma. We nĩ ĩvinda yĩva ũkwona yĩkwaĩle?
ĨMANYĨSYE MŨNANGO
Ĩmanyĩsye wone ũndũ ũtonya kwĩka ũkatanĩaa kũsoma Mbivilia. Sisya wone ũndũ waĩle kwĩyũmbanasya nesa nĩ kana ũtethekae mũnango yĩla ũkwĩmanyĩsya Mbivilia.
O ũndũ tũtonya kwĩmanyĩsya kũĩsaa malĩu me kĩvathũkanyʼo, nĩtũtonya kwĩmanyĩsya kũtanĩaa kũsoma Mbivilia
4. Ũndũ ũtonya kũtanĩa kũsoma Mbivilia
No wĩthĩwe ũte ũndũ wĩ laisi kwambĩĩa kũsomaa Mbivilia. Ĩndĩ o na vailye ũu, no ‘twĩthĩwe na wendi mwingĩ’ wa kwĩka ũu, o tondũ mũndũ ũtonya kũmanyĩa kũya lĩu mũna, o kavola kwa kavola, na ĩtina ayambĩĩa kũũtanĩa vyũ. Somai 1 Vetelo 2:2, na ĩndĩ mũineenea ĩkũlyo yĩĩ:
Wasoma Mbivilia kĩla mũthenya, wĩona no ũtanĩe mũno nginya ũkethĩwa na mea ma kũmĩsoma mũnango?
Ĩloelei VITIO nĩ kana mwone ũndũ andũ amwe mambĩĩie kũtanĩa kũsoma Mbivilia. Na ĩndĩ mũineenea makũlyo aa maatĩĩe.
Vitionĩ ĩsu, woona nĩ mawetu meva andũ asu ma mũika masindie?
Nĩ kyaũ kyamatetheeisye nĩ kana maendeee kũsomaa Mbivilia kĩla mũthenya?
Meekie ata nĩ kana matanĩae mũnango kũsoma Mbivilia?
Maũndũ matonya kũũtetheesya wambĩĩe kũtanĩa kũsoma Mbivilia:
Nyuva Mbivilia ĩte na mavĩtyo na ĩtũmĩĩte ndeto syĩ laisi. Tata kũtũmĩa Biblia Takatifu—Tafsiri ya Ulimwengu Mpya ethĩwa nĩkwatĩkanaa kwa kĩthyomo kyenyu, kana o kwa kĩthyomo kĩngĩ ũtonya kũelewa nesa.
Ambĩĩa kũsoma ilungu ila ũkwona ta itonya kũkwendeesya. Nĩ kana ũkwate maũndũ matonya kũũtethya, sisya kyati kĩ na kyongo “Ambĩĩa Kwĩmanyĩsya Mbivilia.”
Andĩka maũndũ ala wamina kũsoma. Tũmĩa kyati kĩ na kyongo “Manya Ũndũ Ũendeee Kũsoma Mbivilia” kĩla kĩ ĩvukunĩ yĩĩ.
Tũmĩa JW Library®. No ĩũtetheesye ũkasomaa Mbivilia kana ũkamĩthukĩĩsya ĩisomwa, wĩ vandũ o na va, ũtũmĩĩte simũ yaku kana o kĩndũ kĩngĩ.
Tũmĩa Nyongeza ila syĩ nthĩnĩ wa Tafsiri ya Ulimwengu Mpya. Vau nũkwĩthĩa mevu, kyati, na maelesyo ma ndeto, ila itonya kũũtetheesya ũtanĩe mũnango kũsoma Mbivilia.
5. Ĩyũmbanĩsye ĩmanyĩsyo yaku ya Mbivilia
Somai Savuli 119:34, na ĩndĩ mũineenea ĩkũlyo yĩĩ:
Nĩkĩ nĩ ũndũ wa vata kũvoya ũtanambĩĩa kũsoma Mbivilia, kana ũtanambĩĩa kwĩyũmbanĩsya ĩmanyĩsyo yaku ya Mbivilia?
Ũtonya kwĩka ata ũtetheke mũnango nĩ kĩla ĩsomo? Ũyĩyũmbanĩsya kĩla ĩsomo ĩvukunĩ yĩĩ, tata kũatĩĩa maũndũ aa:
Soma tũlungu twa mbee twʼonthe kĩla ĩsomonĩ.
Soma maandĩko onthe na ũitata kwona ũndũ meũkwatĩanĩa na ũvoo ũla ũũsoma.
Kululĩĩla ndeto ila syumĩlĩtye maũndũ ala manene, ala masũngĩĩte kĩla ĩkũlyo. Ũu ũkaũtetheeasya yĩla ũendeee kũneenea ĩsomo yĩu na mwalimũ waku.
We nĩwĩsĩ?
Ithyĩ Ngũsĩ sya Yeova nĩtũtũmĩaa Mbivilia syĩ kĩvathũkanyʼo yĩla tũkwĩmanyĩsya. Ĩndĩ nĩtwendete mũno kũtũmĩa Biblia Takatifu—Tafsiri ya Ulimwengu Mpya na kĩtumi nũndũ Mbivilia ĩsu nĩtũmĩĩte ĩsyĩtwa ya Ngai, ndĩ na mavĩtyo, na yĩ laisi kũeleeka.—Sisya ũvoo wĩ Kĩsesenĩ ũla wĩ na kyongo “Syo Ngũsĩ sya Yeova Nĩsyĩthĩawa na Mbivilia Yoo?”
ANDŨ AMWE MAASYA: “Kwĩmanyĩsya Mbivilia nĩ ũndũ wĩ vinya mũno. Nyie ndi na ĩvinda kana vinya wa kũmĩsoma.”
We wĩ na woni mwaũ?
KĨLA TWEEMANYĨSYA
Nĩ kana ũtetheke mũnango yĩla ũkwĩmanyĩsya Mbivilia, manthaa ĩvinda ya kũmĩsoma, voyaa nĩ kana ũelewe kĩla ũũsoma, na ũyĩyũmbanĩasya ĩmanyĩsyo yaku ya Mbivilia.
Makũlyo ma Kũsyokeleela
Nĩ kyaũ kĩtonya kũũtetheesya nĩ kana ũtethekae mũnango ũyĩmanyĩsya Mbivilia?
We wĩona ũtonya kũkwata mwanya ĩndĩĩ wa kũsoma na kwĩmanyĩsya Mbivilia we mwene?
Nĩkĩ nĩ ũndũ wa vata ũkeyũmbanĩasya ĩmanyĩsyo yaku ya Mbivilia?
MAŨNDŨ ANGĨ MA KWĨMANYĨSYA
Soma wone maũndũ amwe matonya kũũtetheesya nĩ kana ũtethekae mũnango ũyĩmanyĩsya Mbivilia.
“Ũndũ Ũtonya Kũtetheka Yĩla Ũũsoma Mbivilia” (Mũsyaĩĩsya Na. 1 2017)
Soma wone nzĩa itatũ itonya kũũtetheesya yĩla ũũsoma Mbivilia.
Manya ũndũ ũtonya kũtanĩa kũsoma Mbivilia.
Ĩloele vitio wone maũndũ amwe matonya kũũtetheesya yĩla ũũsoma Mbivilia, mawetetwe nĩ amwe mamĩsomete kwa ĩvinda yĩasa.