Mars

Ðɩnaɣ ɛyaa siɣsiɣ tɩnaa mba pelesi pe-siɣsiɣ wɛtʋ yɔ pɔ-tɔm Bibl taa. Pa-taa lɛlʋ lɛ Wiyaʋ Salomɔɔ. Ɛɛsɩm Yehowa nɛ ɛzɩma pɩpɔzʋʋ se pɛsɛɛ-ɩ yɔ camɩyɛ, nɛ Yehowa kaawazɩ-ɩ siŋŋ; ɛlɛ pʋwayɩ Salomɔɔ paɣzɩ cɛtɩm ɛsɔnaa sɛʋ. Ɛ-kɩwɛɛkɩm ɖʋ Yehowa ɖɩwɩzɩyɛ siŋŋ, piyeba nɛ Izrayɛɛlɩ samaɣ kpeekpe nɩɩ siziŋ siŋŋ pɩnzɩ sakɩyɛ. Masɩ yɔɔdʋʋ se Salomɔɔ sɩba lɛ, ‘pahɩzɩ-ɩ ɛ-cɔzɔnaa cɔlɔ;’ peeɖe pepim ɛyaa siɣsiɣ tɩnaa ɛzɩ Wiyaʋ Daviid mbʋ yɔ. (1 Awi. 11:​5-9, 43, pɩ-tɛɛ tɔm; 2 Awi. 23:13) Ɛlɛ, lone nɖɩ ɖɩ-taa paapimi-i yɔ ɖɩwɩlɩɣ se paa pɩɩlabɩ ɛzɩma yɔ, pakaɣ-ɩ fezuu na? Bibl tɩyɔɔdɩ mbʋ. Sɩɖaa fezuu kɛnɩ kʋjɔʋ ŋgʋ kɩlɩnɩ ɖɛ-Ɛsɔ sɔɔlɩm tʋ cɔlɔ yɔ. Nɛ ɛlakɩ kʋjɔʋ ŋgʋ mba ɛsɔɔlaa se ɛha-wɛ waɖɛ nɛ pɛsɛɛ-ɩ tam yɔ. (Yɔɔb 14:​13, 14; Yoh. 6:44) Ɛzɩ pakaɣ labʋ Salomɔɔ kʋjɔʋ ŋgʋ? Yehowa ɖeke sɩmna; ɖa lɛ ɖɩɩsɩŋ. Ɛlɛ ɖɩnawa se Yehowa kaɣ labʋ mbʋ pɩtʋʋzaa yɔ. w24.05 4 § 9

Alɩwaatʋ ndʋ ɖɩhaɣ ɖa-tɩ Yehowa yɔ, ɖɩpɩsɩɣ agɔma e-kizinziku tɛɛ. Ðɩwɛɣnɩ fezuu taa tɔɔnaɣ sakɩyɛ nɛ taabalɩyɛ kɩbanɖɛ wɛɣ ɖa nɛ ɛyaa lalaa mba papɩsɩ agɔma Yehowa kizinziku tɛɛ yɔ ɖɛ-hɛkʋ taa. Kizinziku ŋgʋ kɩ-tɛɛ Yehowa yaɣ-ɖʋ se ɖiwolo nɛ ɛmʋ-ɖʋ ɛgɔndʋ yɔ, pɩtɩkɛ lone kʋɖʋmɖɩyɛ naɖɩyɛ taa ɖeke kɩwɛɛ. Kizinziku ŋgʋ kɩwɛ lona wena a-taa payɩ Yehowa sɛyaa siɣsiɣ tɩnaa wɛɛ yɔ. (Natʋ 21:3) Piyele nɛ ɛyaa siɣsiɣ tɩnaa mba pasɩba yɔ, ɖɩpɩzɩɣ nɛ ɖɩyɔɔdɩ se pɛkɛ agɔma Yehowa kizinziku tɛɛ halɩ nɛ sɔnɔ? Ɛɛɛ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Ðɩyɔɔdʋʋ mbʋ, mbʋ pʋyɔɔ yɔ Yehowa tɔzʋʋ pɔ-yɔɔ camɩyɛ. Ɛ-ɛsɩndaa lɛ, pɛwɛ wezuu halɩ nɛ sɔnɔ. Yesu lɩzɩ pɩ-taa se: «Halɩ Moyizi wɩlɩ sɔɔ cɔkɔyɛ yɔɔ tɔm taa se sɩɖaa kaɣ fem, alɩwaatʋ ndʋ ɛya Yehowa se “Abraham tɛ Ɛsɔ nɛ Izaakɩ tɛ Ɛsɔ nɛ Yakɔɔb tɛ Ɛsɔ” yɔ. Ɛtɩkɛ sɩɖaa tɛ Ɛsɔ, ɛlɛ ɛsadɩnaa tɛ Ɛsɔ, mbʋ pʋyɔɔ yɔ ɛ-ɛsɩndaa lɛ, pa-tɩŋa payɩ pɛwɛ wezuu.»—Luka 20:​37, 38. w24.06 3 § 6-7

Sadɔɔkɩ wobi Ebrɔŋ nɛ ɛkpɛndɩnɩ e-you wondu se ye pɩpɔzʋʋ se eyoo yɔ, eyoo. (1 Kro. 12:38) Ɛɛsɔɔlɩ faaa se ɛtɩŋ Daviid you taa nɛ ɛlʋbɩnɩ Izrayɛɛlɩ koyindinaa. Pɩtɩla, Sadɔɔkɩ taawɛɛ niye you labʋ taa, ɛlɛ ɛɛwɛ abalɩtʋ siŋŋ. Ɛbɛ kaasɩnɩ cɔjɔ Sadɔɔkɩ nɛ ɛwɛɛ abalɩtʋ mbʋ? Ɛyaa mba paawɛ ɖoŋ nɛ pɛtɛ pɛwɛɛ abalɩtʋ yɔ, paacɔ-ɩ nɛ pata. Pɩtʋʋ fɛyɩ se ɛɛkpɛlɩkɩ lɔŋ pa-kɩɖaŋ taa. Ðɩna kɩɖaʋ nakʋyʋ: Daviid ‘ɖiyaɣ Izrayɛɛlɩ yoŋ’ nɛ abalɩtʋ, piyeba nɛ Izrayɛɛlɩ mba tɩŋa sɔɔlɩ se paɖʋ-ɩ nesi nɛ pa-laŋɩyɛ pilim. (1 Kro. 11:​1, 2) Daviid taɣaɣ Yehowa liu paa ɛzɩmtaa se ɛsɩnɩ-ɩ nɛ eyooni e-koyindinaa. (Keɣ. 138:3) Sadɔɔkɩ kaakpɛlɩkɩ lɔŋ ɖɔɖɔ ɛ-alɩwaatʋ taa ñɩma mba paawɛ abalɩtʋ yɔ pɔ-cɔlɔ: pa-taa nabɛyɛ lɛ Yehoyiyada nɛ ɛ-pɩyalʋ Benayaa weyi ɛɛkɛ you laɖʋ kɩbanʋ yɔ nɛ cejewe ñʋndɩnaa 22 lalaa mba paaɖʋ Daviid nesi yɔ.—1 Kro. 11:​22-25; 12:​26-28. w24.07 3 § 5-6

Taarɩsɩ tʋ Sɔɔlɩ kaanazɩ Krɩstʋ wayɩ tɩŋɩyaa siŋŋ. Pʋtɔma, Krɩstʋ mba hɔɔlʋʋ sɔsɔʋ maɣzaɣ se ɛɛpɩzɩɣ nɛ ɛlɛɣzɩ kpa. Ɛlɛ Yesu kaanawa se Sɔɔlɩ pɩzɩɣ nɛ ɛlɛɣzɩ nɛ ekpiɖi ɛ-kɩwɛɛkɩm yɔɔ. Ɛ nɛ ɛ-Caa pana wɛtʋ kɩbandʋ Sɔɔlɩ yɔɔ. Yesu yɔɔdaa se: «Abalʋ ɛnʋ ɛkɛ ñanaɣ ŋga malɩzaa yɔ.» (Tʋma 9:15) Halɩ Yesu tɩŋnɩ maamaaci lakasɩ nasɩyɩ yɔɔ nɛ ɛsɩnɩ Sɔɔlɩ nɛ ekpiɖi ɛ-kɩwɛɛkɩm yɔɔ. (Tʋma 7:58–8:3; 9:​1-9, 17-20) Sɔɔlɩ, weyi pɔkɔm nɛ payaa pʋwayɩ se apostoloo Pɔɔlɩ yɔ, ɛpɩsɩ Krɩstʋ tʋ nɛ pɩtɛ lɛ, ɛyɔɔdaɣ ɖoŋ ɖoŋ ɛzɩma ɛ-taa labɩ leleŋ se Yehowa nɛ Yesu pana ɛ-pʋtɔdɩyɛ nɛ palabɩ-ɩ camɩyɛ lakasɩ yɔ pɩ-tɔm. (1 Tim. 1:​12-15) Alɩwaatʋ ndʋ Pɔɔlɩ nɩwa se Kɔrɛntɩ ɛgbɛyɛ taa mba ha nʋmɔʋ abalʋ weyi ɛcakaɣ kʋzʋʋ kɩdɛkɛdʋʋ wezuu yɔ se ɛwɛɛ ɛgbɛyɛ taa yɔ, ɛzɩma ɛcɔnɩ tɔm ndʋ ti-ɖeɖe? Tɔm ndʋ ɛyɔɔdaa yɔ, tɩkpɛlɩkɩɣ-ɖʋ ɛzɩma Yehowa lɩzɩɣ sɔɔlɩm nɛ ɛwɩlɩɣ ɛ-sɛyaa alɩwaatʋ ndʋ ɛsɩɣzɩɣ-wɛ lɔŋ yɔ nɛ ɛzɩma ɛnaɣ pa-pʋtɔdɩyɛ alɩwaatʋ ndʋ pekpiɖiɣ yɔ. w24.08 13 § 15-16

Pɩnzɩ wɛɛ nɛ sɩɖɛɣ lɛ, Yehowa wɛɛ nɛ ɛwɩlɩɣ mbʋ ɛyaa pɩzɩɣ pala nɛ pɔñɔtɩnɩ-ɩ yɔ pazɩ pazɩ. Aɖam nɛ Ɛva pakaɖɩnɩ Yehowa Edɛɛnɩ kaɖaɣ taa nɛ pɩtɛ lɛ, pa-pɩyalʋ naalɛ ñɩnʋ Aabɛɛlɩ kaakɛnɩ ɛyʋ kajalaɣ ñɩnʋ weyi ɛɛwɛnɩ tisuu Yehowa yɔɔ yɔ. Aabɛɛlɩ kaasɔɔlɩ Yehowa nɛ ɛñɩnaɣ se ɛ-tɔm ɛkɛdɩnɩ-ɩ nɛ ɛɛsɔɔlaa se ɛñɔtɩnɩ-ɩ, pʋyɔɔ ɛla-ɩ kɩlaʋ nakʋyʋ. Aabɛɛlɩ kaakɛ ninɖiɣyu, pʋyɔɔ ɛkpaɣ heɣsi nasɩyɩ nɛ ɛlaa-sɩ Yehowa. Ɛzɩma pɩlabɩ Yehowa? «Aabɛɛlɩ nɛ ɛ-kɩlaʋ pɔ-tɔm kɛdɩnɩ Yehowa.» (Kiɖe 4:4) Ɛyaa lalaa ɖɔɖɔ kaala-ɩ kɩlaŋ nɛ ɛ-taa la leleŋ nɛ kɩlaŋ ɛnɩ, ɛyaa mba paasɔɔlɩ-ɩ nɛ pataɣ-ɩ liu. Pa-taa nɔɔyʋ lɛ Noowa. (Kiɖe 8:​20, 21) Yehowa mʋ kɩlaŋ ɛnɩ nɛ ɛwɩlɩ se kɩwɛɛkɩm laɖaa tɔm pɩzɩɣ nɛ pɩkɛdɩnɩ-ɩ nɛ papɩzɩɣ nɛ pɔñɔtɩnɩ-ɩ. w24.08 3 § 5-6

Ye pomuluu-ɖʋ yɔ, pɩpɩzɩɣ nɛ pɩha-ɖʋ laŋwɛɛkɩyɛ nɛ nɩɣzɛ siŋŋ. (Ekl. 7:7) Mbʋ pɩɩlabɩ Yehowa sɛyaa siɣsiɣ tɩnaa ɛzɩ Yɔɔb nɛ Habakuuki mbʋ yɔ. (Yɔɔb 6:​2, 3; Hab. 1:​1-3) Pɩtɩwɛɛkɩ pʋyʋ se pɩlabɩ-ɖʋ mbʋ, ɛlɛ pɩwɛɛ se ɖɩkpa ɖa-tɩ nɛ mbʋ ɖɩlakɩ yɔ nɛ ɖɩtaala kɩdɛkɛdɩm nabʋyʋ nɛ pɩtɛzɩ tɔm wɛɛkʋʋ. Alɩwaatʋ ndʋ pɩlakɩ-ɖʋ ɛzɩ paahɔŋ mba pomuluu lalaa yɔ pa-nɩŋgbaaŋ yɔ, ɖɩpɩzɩɣ nɛ ɖɩpaɣzɩ maɣzʋʋ se pɩtɩcɛyɩ se ɖiwolo pɩ-yɔɔ nɛ ɖɩla mbʋ pɩwɛ ɖeu yɔ. Keɣa maɖʋ nɔɔyʋ naɣaɣ se kañatʋ tɩnaa mulaɣ ɛyaa kɩbama, ɛlɛ pɩwɛ ɛzɩ piɖeɣaɣni kañatʋ tɩnaa mba yɔ. Ɛyɔɔdaa se: «Mbʋ kañatʋ tɩnaa wɛɛ, pɛwɛ hɛzɩyɛ taa paa ɛzɩmtaa.» (Keɣ. 73:12) Ɛnaɣaɣ mulum lakasɩ lɛ pɩcɛyaɣ-ɩ siŋŋ, nɛ halɩ ɛmaɣzaɣ se ye ɛyʋ ɛsɛɣ Yehowa yɔ pɩɩwazɩɣ pʋyʋ. Ɛyɔɔdaa se: «Mañakaɣ pana se manɩɩ pɩ-taa lɛ, pɩcɛyaɣ-m siŋŋ.»—Keɣ. 73:​14, 16. w24.11 3 § 5-7

Ðɩcɛlɩɣ Yehowa samtʋ mbʋ pʋyɔɔ yɔ ɖɩñaŋɩ-ɩ siŋŋ. Lɩmaɣza sakɩyɛ yɔɔ pɩwɛɛ se ɖɩña Yehowa. Yehowa kɛ ɖoŋ tɩŋa tʋ; e-ɖoŋ fɛyɩnɩ kamaɣ. (Keɣ. 96:​4-7) Ðɩnaɣ ɛ-lɔŋsɩnɖɛ kpayɩ kpayɩ e-wondu kɩlɩzɩtʋ taa. Ɛnʋ hanɩ-ɖʋ wezuu nɛ mbʋ payɩ pɩpɔzʋʋ-ɖʋ se ɖɩwɛɛ wezuu yɔ. (Natʋ 4:11) Ɛwɛ siɣsiɣ. (Natʋ 15:4) Mbʋ payɩ ɛlakɩ yɔ piɖeɣni-i, nɛ paa ɛzɩmtaa lɛ ɛɖɔŋ ɛ-tamasɩ yɔɔ. (Yoz. 23:14) Pʋyɔɔ nayʋ Yereemii yɔɔdɩ Yehowa yɔɔ se: «Ajɛɛ lɔŋsɩnɖaa kpeekpe hɛkʋ taa nɛ pe-kewiyisi kpeekpe hɛkʋ taa lɛ, nɔɔyʋ fɛyɩ kaaʋ ɛzɩ ña yɔ.» (Yer. 10:​6, 7) Toovenim taa lɛ, lɩmaɣza wena a-yɔɔ pɩwɛɛ se ɖɩña ɖa-Caa weyi ɛwɛ ɛsɔdaa yɔ aɖɔ sakɩyɛ. Ɛlɛ pɩtasɩna se ɖɩñaŋ Yehowa lɛ, ɖɩsɔɔlɩ-ɩ ɖɔɖɔ. Ðɩcɛlɩɣ Yehowa samtʋ mbʋ pʋyɔɔ yɔ ɖɩsɔɔlɩ-ɩ siŋŋ. w25.01 3 § 5-6

Ɛsɔ koyindinaa ñakɩ pana se peyele nɛ ɖɩkpaɣ mbʋ ɛ-ɛgbɛyɛ lakɩ nɛ pɩwɛ ɖeu yɔ ɛzɩ mbʋ pɩfɛyɩ ɖeu yɔ. Kɩɖaʋ nakʋyʋ yɔ: Ðɩkpɛlɩkɩ Bibl taa se Yehowa sɔɔlaa se ɛ-sɛyaa ɩwɛɛ kele kele tomnaɣ yɔɔ, wezuu kɩbaŋʋ caɣʋ nʋmɔʋ taa nɛ fezuu taa. Ɛyɔɔdaa se pɩwɛɛ se palɩzɩ weyi ɛlakɩ lakasɩ nzɩ sɩfɛyɩ kele kele nɛ eekpiɖiɣ yɔ ɛgbɛyɛ taa. (1 Kɔr. 5:​11, 12; 6:​9, 10) Ðɩñaŋ Bibl taa paɣtʋ ndʋ. Ɛlɛ ɖo-koyindinaa kʋyʋʋ ɖɔ-yɔɔ nɛ pɔyɔɔdʋʋ se ɖɩtɩsɔɔlɩ ɛyaa, ɖɩkʋʋ ɛyaa tɔm nɛ ɖɩɩmʋʋ ɛyaa mba paacakɩ wezuu ɛzɩ ɖa yɔ. Pɩwɛɛ se ɖɩtɩlɩ weyi ɖeyi ɖeyi ɛkʋyʋʋ ɛgbɛyɛ yɔɔ yɔ. Sataŋ Eleeu wɛna nɛ eseɣtiɣ ɛyaa se pɔyɔɔdɩ cɛtɩm tɔm Yehowa ɛgbɛyɛ yɔɔ. Ɛnʋ kɛnɩ «cɛtɩm caa.» (Yoh. 8:44; Kiɖe 3:​1-5) Ye mbʋ, pɩɩlakɩ-ɖʋ piti se Sataŋ tɩŋɩɣnɩ ɖo-koyindinaa yɔɔ nɛ ɛyɛlɩɣnɩ cɛtɩm tɔm Yehowa ɛgbɛyɛ yɔɔ. w24.04 10-11 § 13-14

Halɩ alɩwaatʋ ndʋ kʋñɔŋ sɔsɔʋ paɣzɩɣ yɔ, pɩpɩzɩɣ pɩla se ɛyaa mba panaɣ ɛzɩma paɖɩzɩɣ «Babilɔɔnɩ Sɔsɔʋ» yɔ, pa-taa nabɛyɛ kaɣ tɔzʋʋ se Yehowa Aseɣɖe Tɩnaa wɛʋ nɛ pɔyɔɔdʋʋ se lakasɩ nzɩ sɩkaɣ labʋ yɔ pɩlakɩ alɩwaatʋ sakɩyɛ yɔ. Ɛyaa mba panaɣ lakasɩ nzɩ yɔ, ɛzɩ pa-taa nabɛyɛ kaɣ tisuu Yehowa yɔɔ? (Natʋ 17:5) Ye pɩlabɩ mbʋ yɔ, pɩkaɣ wɛʋ ɛzɩ mbʋ pɩɩlabɩ Ejipiti ɛjaɖɛ taa Moyizi alɩwaatʋ taa yɔ. Tɔzɩ se «ɛyaa ndɩ ndɩ» kaakpɛndɩ Izrayɛɛlɩ mba yɔɔ alɩwaatʋ ndʋ palɩɣaɣ Ejipiti ɛjaɖɛ taa yɔ. Pʋtɔma ɛyaa mba pa-taa nabɛyɛ kaapaɣzɩ wɛnʋʋ tisuu Yehowa yɔɔ alɩwaatʋ ndʋ panawa se asɛyɩŋ 10 weyi ɩ-tɔm Moyizi kaayɔɔdaa yɔ ɩlaba yɔ. (Ejl. 12:38) Ye pɩlabɩ mbʋ Babilɔɔnɩ Sɔsɔʋ ɖɩzʋʋ wayɩ, ɛzɩ pɩkaɣ-ɖʋ tibu yɔɔɔ mbʋ pʋyɔɔ yɔ pɩkazɩ pazɩ se ɛjaɖɛ ɛtɛ lɛ, ɛyaa nabɛyɛ kpɛndɩ ɖɔ-yɔɔ? Aayɩ. Ðɩsɔɔlaa se ɖɩmaɣzɩnɩ ɖa-Caa weyi ɛwɛ ɛsɔdaa yɔ ɛ-wɛtʋ kɩbandʋ; ɛkɛ «Ɛsɔ weyi ɛnaɣ ɛyaa pʋtɔdɩyɛ nɛ ɛnɩɣ ɛyaa wɩzasɩ yɔ, weyi ɛɛkɔʋ pana lɛɛ lɛɛ, nɛ weyi ɛ-sɔɔlɩm siɣsiɣ ñɩmbʋ nɛ e-toovenim ɖɔ pɩdɩɩfɛyɩ yɔ.»—Ejl. 34:6. w24.05 11 § 12-13

Ye ɖiyebi ɖɔkʋʋ «tɔm kɩbandʋ kɩɖaʋ» yɔ, ɛbɛ pɩzɩɣ nɛ pɩtalɩ-ɖʋ? Iyele nɛ ɖɩna kɩɖaʋ nakʋyʋ. Kajalaɣ pɩnzɩ mɩnʋʋ taa, Krɩstʋ mba nabɛyɛ yɛlaɣnɩ tɔm natʋyʋ se Yehowa kɩyakʋ talaa. Pʋtɔma, takayaɣ nakɛyɛ yɔɔdɩnɩ tɔm ndʋ nɛ nabɛyɛ maɣzaɣ se apostoloo Pɔɔlɩ kaamanɩ takayaɣ ŋga. Tesalooniiki Krɩstʋ mba nabɛyɛ tɩkpaɣ alɩwaatʋ nɛ pañɩnɩ nɛ pana se tɔm ndʋ tɩkɛ toovenim yaa cɛtɩm; pʋyɔɔ petisi tɔm ndʋ tɩ-yɔɔ nɛ papaɣzɩ-tʋ yɛlɩnʋʋ. Ye paatɔzɩ tɔm ndʋ Pɔɔlɩ wɩlɩ-wɛ alɩwaatʋ ndʋ ɛɛwɛ pɔ-cɔlɔ yɔ tɩ-yɔɔ yɔ, pitaapeɣzi-wɛ mbʋ. (2 Tes. 2:​1-5) Pɔɔlɩ kaatasɩ e-koobiya lɔŋ se pataatisi tɔm ndʋ payɩ panɩɣ yɔ tɩ-yɔɔ yem. Nɛ pɩsa nɛ ɛsɩnɩ Tesalooniiki mba nɛ ɛsɩndaa lɛ, ɛyɔɔdɩ tɔm tʋnɛ alɩwaatʋ ndʋ ɛkɔwaɣ takayaɣ naalɛ ñɩŋga ŋga ɛma-wɛ yɔ ka-ñʋʋ yɔ: «Ma Pɔɔlɩ mɛn-sɛtʋ yɔ, ma-maɣmaɣ me-nesi tɛɛ sɛtʋ, man-takayɩsɩ kpeekpe yʋsaɣ lɛ; mbʋ mamaɣ.»—2 Tes. 3:17. w24.07 12 § 13-14

Pɩɩpɔzaa se Ebree Krɩstʋ mba ɩɖɔkɩ pa-laŋa Yehowa sɛtʋ taa, mbʋ pʋyɔɔ yɔ pɩkazɩ pazɩ lɛ pakaɣ katʋʋ kʋñɔmɩŋ. Paa paanazɩ pa-taa nabɛyɛ nɛ pɩɖɛɛ yɔ, pa-taa sakɩyɛ kaapɩsɩ Krɩstʋ mba, laŋhɛzɩyɛ alɩwaatʋ taa. Apostoloo Pɔɔlɩ yɔɔdaa se paa kʋñɔmɩŋ sakɩyɛ kaatakɩ pe-tisuu yɔ, pa-kʋñɔmɩŋ tɩtalɩ weyi Yesu kaatɔwaa yɔ, pʋ-tɔbʋʋ se patɩtɔɔ kʋñɔŋ nɛ pɩtalɩ sɩm taa. (Ebr. 12:4) Ɛlɛ Yuuda ñɩma mba pakaɖaɣnɩ Krɩstʋ mba yɔ, paakɔ pana siŋŋ nɛ palakɩ puuyaɣ lakasɩ, mbʋ pʋyɔɔ yɔ Yuuda mba sakɩyɛ kaapɩsɩ Krɩstʋ mba. Pɩnzɩ pazɩ pʋcɔ nɛ pɩtalɩɣ mbʋ lɛ, Yuuda ñɩma mba paacɛzɩ 40 yɔ, paaɖuwaa «se piyoo mba ye pɔtɔwaa nɛ pɔñɔɔ nɛ patɩkʋtɩ Pɔɔlɩ yɔ.» (Tʋma 22:22; 23:​12-14) Paa papaɖaɣ Krɩstʋ mba nɛ panazɩɣ-wɛ yɔ, pɩɩwɛɛ se Krɩstʋ mba iwolo pɩ-yɔɔ nɛ pekpeɣliɣ nɛ pɛsɛɣ Ɛsɔ, posusuu tɔm nɛ peyele nɛ pe-tisuu kpa ɖoŋ. w24.09 12 § 15

Yohanɛɛsɩ kaakɛ apostoloo weyi Yesu Krɩstʋ kaasɔɔlɩ siŋŋ yɔ. (Mat. 10:2) Yohanɛɛsɩ kaasɩ Yesu ɛ-tɔm susuu tʋmɩyɛ taa; ɛɛna Yesu maamaaci lakasɩ nɛ ɛ-ɛsa nɛ ɛñɔɔnɩ-ɩ kpam kaɖɛ alɩwaatʋ taa. Alɩwaatʋ ndʋ pakʋwaɣ Yesu yɔ, ɛɛwɛɛ nɛ ɛnaɣ nɛ ɛna-ɩ ɖɔɖɔ e-femtu wayɩ. Ɛɛna ɖɔɖɔ ɛzɩma Krɩstʋ ɛgbɛyɛ calɩ ñɔʋ kajalaɣ pɩnzɩ mɩnʋʋ taa nɛ ɖɩpaɣlɩ nɛ pɩkɔɔ pɩtalɩ alɩwaatʋ ndʋ posusi tɔm kɩbandʋ «wondu kɩlɩzɩtʋ tɩŋa ɛjaɖɛ kpeekpe yɔɔ yɔ.» (Kol. 1:23) Yohanɛɛsɩ caɣ wezuu nɛ pileɖi, nɛ ɛ-akpadɩyɩtʋ taa, ehiɣ waɖɛ nɛ ɛɖʋ nesi nɛ pama Ɛsɔtɔm. Ɛnʋ manɩ «natʋ ndʋ tɩ-yɔɔ Yesu Krɩstʋ kulaa yɔ» tɩ-takayaɣ. (Natʋ 1:1) Ɛnʋ manɩ ɖɔɖɔ Evaŋgilim ŋgʋ paya-kʋ nɛ ɛ-hɩɖɛ yɔ. Fezuu ɖiyi-i ɖɔɖɔ nɛ ɛma takayɩsɩ lɛɛsɩ 3. Ɛma ɛ-takayaɣ 3 ñɩŋga Krɩstʋ tʋ siɣsiɣ tʋ weyi payaɣ se Gayuusi yɔ, nɛ ɛɛsɔɔlɩ-ɩ ɛzɩ ɛ-maɣmaɣ ɛ-pɩɣa yɔ. (3 Yoh. 1) Tɔm ndʋ akpadɩyʋ siɣsiɣ tʋ ɛnʋ ɛmawa yɔ, tɩkpazɩɣ Yesu wayɩ tɩŋɩyaa tɩŋa ɖoŋ halɩ nɛ sɔnɔ. w24.11 12 § 15-16

Walʋ weyi ɛsɔɔlɩ ɛ-halʋ yɔ, ɛwɩlɩɣ-ɩ se ɛmʋ ñɩm ɛ-ɛsɩndaa nɛ ɛhɛndɩɣnɩ-ɩ. Ɛkpakɩɣ-ɩ se ɛkɛ kʋjɔʋ ŋgʋ kɩlɩnɩ Yehowa cɔlɔ nɛ kɩ-wayɩ fɛyɩ yɔ. (Adu. 18:22; 31:10) Piyeki nɛ ɛlakɩ ɛ-halʋ camɩyɛ lakasɩ nɛ ɛñaŋɩ-ɩ, halɩ pɩkpɛndɩnɩ alɩwaatʋ ndʋ pasʋʋnɩ ɖama yɔ. Ɛɛkaɣ ñɩɣʋ ɛ-halʋ yɔɔ se pala kʋzʋʋ lakasɩ nzɩ sɩɩkɛdɩɣnɩ ɛlɛ yaa siyeki nɛ ɛnɩɣ siziŋ yaa sɩcɛyɩɣ ɛ-ɛhʋyɛ yɔ. Ɛnʋ ɖɔɖɔ ɛkaɣ ñaɣʋ pana nɛ alɩwaatʋ ndʋ ɛ nɛ ɛ-halʋ pasʋʋnɩ ɖama yɔ ɛtaala nabʋyʋ nɛ pɩcɛyɩ ɛ-maɣmaɣ ɛ-ɛhʋyɛ. (Tʋma 24:16) Walaa, mɩ-taa pɩzɩɣ nɛ pɩtɛ se Yehowa naɣ pana wena ɩñakɩ se ɩɖʋ mɩ-halaa hɩɖɛ mi-wezuu caɣʋ hɔɔlɩŋ tɩŋa taa yɔ, nɛ ɛ-taa lakɩ leleŋ. Ɩtɛ mɩ-taa se ikiziɣ lakasɩ nzɩ sɩɖʋʋ-wɛ ɖɩwɩzɩyɛ yɔ nɛ ɩlabɩ-wɛ camɩyɛ lakasɩ, ɩñam-wɛ nɛ ɩhɛndɩnɩ-wɛ. Ye ɩlakɩ mbʋ yɔ, ɩɖʋʋ-wɛ hɩɖɛ. Pɩtasɩ lɛ, ɩwɩlɩɣ-wɛ se ɩsɔɔlɩ-wɛ nɛ pamʋ ñɩm mɩ-ɛsɩndaa. Ɩɖʋ mɩ-halaa hɩɖɛ, ɖɩnɛ ɛlɛ ɩkaɣ kandɩyʋʋ taabalɩyɛ nɖɩ ɖɩ-tɔm kɩlɩ cɛyʋʋ yɔ ɖɩ-yɔɔ, pʋ-tɔbʋʋ se mɩ nɛ Yehowa mɩ-taabalɩyɛ.—Keɣ. 25:14. w25.01 13 § 17-18

Hɔɔlɩŋ weyi ɩ-taa Yehowa sɛyaa wɛ ndɩ nɛ mba payaɣ pa-tɩ se Krɩstʋ mba yɔ ɩ-taa nakʋyʋ lɛ kpekpeka ŋga pɛwɛnɩ tɔm susuu taa yɔ. Ɛbɛ pɩzɩɣ pɩsɩnɩ-ɖʋ nɛ ɖitaalesi kpekpeka ŋga ɖɩwɛnɩ tɔm susuu taa yɔ yaa halɩ ɖɩwɛɛ kpekpeka nɛ pɩkɩlɩ? Yesu kɩɖaʋ pɩzɩɣ kɩsɩnɩ-ɖʋ nɛ ɖɩwɛɛ kpekpeka tɔm susuu taa. Alɩwaatʋ ndʋ esusaɣ tɔm yɔ, etilesi kpekpeka ŋga ɛɛwɛna yɔ kpa. Halɩ alɩwaatʋ wɛɛ nɛ tɩɖɛɣ lɛ, kpekpeka ŋga, kɛwɛɛ nɛ kakpaɣ ɖoŋ nɛ pɩkɩlɩɣ. Eduuye naɖɩyɛ taa, Yesu kpaɣ ɛ-tʋmɩyɛ nɛ ɛmaɣzɩnɩ abalʋ weyi ɛɛsɔ fiigi tɩʋ ɛ-hayɩm taa yɔ ɛ-tʋmɩyɛ. Abalʋ ɛnʋ ɛcɔnɩ fiigi tɩʋ ŋgʋ kɩ-yɔɔ pɩnzɩ 3, ɛlɛ kɩtɩlʋlɩ pee. Mbʋ ɖɔɖɔ Yesu kpaɣ pɩnzɩ 3 nɛ esusi tɔm Yuuda mba, ɛlɛ pa-taa sakɩyɛ tiwelisini-i. Ɛzɩ hayɩm tʋ wɩlʋʋ se ɛwɛnɩ lidaʋ se fiigi tɩʋ kaɣ lʋlʋʋ pee yɔ, mbʋ ɖɔɖɔ Yesu tɩlɔ lidaʋ Yuuda mba yɔɔ nɛ etiyele-wɛ tɔm susuu. (Luka 13:​6-9) Ye ɖɩkpɛlɩkɩɣ tɔm ndʋ Yesu wɩlaa yɔ nɛ ɖɩmaɣzɩɣnɩ-ɩ yɔ, pɩsɩɣnɩ-ɖʋ nɛ ɖɩwɛɛ kpekpeka sɔnɔ. w25.03 14-15 § 1-4

Ye ŋmaɣzɩɣ se ŋhiɣ weyi ña nɛ ɩ ɩpɩzɩɣ nɛ ɩɖɔkɩ nesi yɔ, ɛbɛ pɩwɛɛ se ŋla? Ɛzɩ pɩpɔzʋʋ se ŋheyi ɛyʋ ɛnʋ ña-lɩmaɣzɩyɛ kpaagbaa? Bibl yɔɔdʋʋ se lɔŋsɩnɖʋ ñɩnɩɣ lɔŋsɩnɖɛ pʋcɔ nɛ ɛkpɛzɩ nɩŋgbanzɩ. Ye mbʋ, pɩwɛɣ ɖeu se ŋkpaɣ alɩwaatʋ pazɩ nɛ ŋcɔŋnɩ ɛ-wɛtʋ pʋcɔ nɛ ŋheyi-i se ŋsɔɔlɩ-ɩ. Ɛzɩma ŋpɩzɩɣ nɛ ŋkpaɣ alɩwaatʋ nɛ ŋcɔnɩ nɔɔyʋ ɛlɛ ŋŋyeki se ɛna se ŋɖiɣni-i cɔnʋʋ? Ɛgbɛyɛ taa kediɣzisi yaa helim mʋʋ alɩwaatʋ taa, ŋpɩzɩɣ nɛ ŋna ɛyʋ ɛnʋ e-fezuu taa wɛtʋ, ɛ-ɛyʋtʋ nɛ ɛ-lakasɩ. Mba kɛ ɛ-taabalaa, nɛ ɛbɛ tɔm ɛyɔɔdʋʋ? (Luka 6:45) Ña nɛ ɩ mɩ-kaɖʋsɩ labɩ nɔɔ kʋɖʋmaɣ na? Ŋpɩzɩɣ nɛ ŋyɔɔdɩnɩ ɛyʋ ɛnʋ ɛ-ɛgbɛyɛ taa ɛzʋtʋyaa yaa koobiya lalaa mba papɩ fezuu taa nɛ pasɩmɩ-ɩ camɩyɛ yɔ. (Adu. 20:18) Ŋpɩzɩɣ nɛ ŋpɔzɩ-wɛ nɛ ŋna se ɛyʋ ɛnʋ ɛwɛnɩ hɩɖɛ kɩbanɖɛ nɛ wɛtʋ kɩbandʋ na. (Ruti 2:11) Ŋŋkpakɩɣ alɩwaatʋ nɛ ŋcɔŋnɩ ɛyʋ ɛnʋ lɛ, ña-lakasɩ etaayele nɛ pɩcɛyɩ-ɩ. Ña ɛyʋ ɛnʋ ɛ-lɩmaɣza nɛ taawɛɛ nɛ ŋñɩnɩɣ se ŋna mbʋ payɩ pɩlakɩ e-wezuu caɣʋ taa yɔ. w24.05 22 § 7-8

Ɛzʋtʋyaa ɩɩkɔʋ tɔm ñʋʋ lɛɛ lɛɛ se kɩwɛɛkɩm laɖʋ ɛɛkaɣ kpiɖuu ɛ-kɩwɛɛkɩm yɔɔ. Ɛyaa nabɛyɛ pɩzɩɣ nɛ pekpiɖi pa-kɩwɛɛkɩm yɔɔ alɩwaatʋ ndʋ pa nɛ ɛzʋtʋyaa kɔɔmitee pacalɩɣ ɖama katʋʋ yɔ. Ɛlɛ lalaa lɛ, pɩpɩzɩɣ nɛ pɩkpaɣ alɩwaatʋ pʋcɔ nɛ pekpiɖi. Pʋyɔɔ lɛ, ɛzʋtʋyaa pɩzɩɣ nɛ pakpaɣ lɩmaɣzɩyɛ se pa nɛ kɩwɛɛkɩm laɖʋ pakatɩ nɛ pɩcɛzɩ tam kʋɖʋm. Pɩtɩla pakatɩɣ kajalaɣ ɖeɖe nɛ pɩtɛ lɛ, koobu weyi eɖiɣni lebu yɔ, ɛpɩzɩɣ nɛ ɛpaɣzɩ maɣzʋʋ tɔm ndʋ peheyi-i yɔ tɩ-yɔɔ siŋŋ. Ɛpɩzɩɣ nɛ eluzi ɛ-tɩ nɛ ɛtɩmnɩ Yehowa nɛ ɛpɔzɩ-ɩ se ɛkpaɣ nɛ ekpeɣ-i. (Keɣ. 38:18) Pɩpɩzɩɣ piyele nɛ alɩwaatʋ ndʋ pakatɩɣ nabʋlɛ ɖeɖe yɔ, kɩwɛɛkɩm laɖʋ lɛɣzɩ lɩmaɣza wena ɛɛwɛna alɩwaatʋ ndʋ pacalɩ katʋʋ yɔ. Pɩsa nɛ ɛgbɛyɛ taa ɛzʋtʋyaa sɩnɩ kɩwɛɛkɩm laɖʋ nɛ ekpiɖi lɛ, pɩwɛɛ se pawɩlɩ se panaɣ ɛ-pʋtɔdɩyɛ nɛ palabɩ-ɩ camɩyɛ lakasɩ. Patɩmɩɣnɩ Yehowa se ɛwazɩ pa-pana ñaɣʋ yɔɔ nɛ pataɣ liu se po-koobu kaɣ lɛɣzʋʋ ɛ-maɣzɩm nɛ ekpiɖi.—2 Tim. 2:​25, 26. w24.08 22-23 § 12-13

Yehowa tɩsɔɔlɩ se paɖɩzɩ nɔɔyʋ. Ɛsɔɔlaa se kɩwɛɛkɩm laɖaa ɩla mbʋ pɩpɔzʋʋ yɔ nɛ pa nɛ ɩ peceɣ. (2 Kɔr. 5:20) Pʋyɔɔ kpaɣnɩ ɖooo caanaʋ taa, Yehowa kaawɛɛ nɛ eseɣtiɣ ɛ-samaɣ nɛ ɛyaa ndɩ ndɩ se pekpiɖi pa-kɩwɛɛkɩm yɔɔ nɛ papɩsɩ ɛ-cɔlɔ. Pɩkɛnɩ ɛgbɛyɛ taa ɛzʋtʋyaa waɖɛ se pa nɛ Yehowa pɛkpɛndɩ nɛ pasɩnɩ kɩwɛɛkɩm laɖaa nɛ pekpiɖi. (Roma 2:4; 1 Kɔr. 3:9) Maɣzɩ taa leleŋ weyi ɛwɛ ɛsɔdaa alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ yɔ ɩ-yɔɔ nɛ ŋna. Ða-Caa Yehowa maɣmaɣ taa lakɩ leleŋ siŋŋ alɩwaatʋ ndʋ payɩ e-heŋ weyi ileba yɔ ɩ-taa nɔɔyʋ pɩsɩɣ ɛgbɛyɛ taa yɔ. Alɩwaatʋ ndʋ ɖɩmaɣzɩɣ Yehowa pʋtɔdɩyɛ naʋ nɛ e-lootiye pɔ-yɔɔ yɔ, sɔɔlɩm mbʋ ɖɩwɛnɩ ɛ-yɔɔ yɔ pɩpaɣlɩɣ nɛ pɩkɩlɩ.—Luka 1:78. w24.08 31 § 16-17

Ye Yesu eetisaa nɛ ɛpɩsɩ wiyaʋ yɔ, ɛɛɖʋ ɛ-nɔɔ Yuuda mba politiki tɔm taa; alɩwaatʋ ndʋ tɩ-taa lɛ, Roma mba tɔkaɣnɩ kewiyitu Yuuda mba yɔɔ. Ɛlɛ ɛtɩla mbʋ. Bibl yɔɔdʋʋ se Yesu ‘kʋyaa nɛ ɛɖɛɛ pʋʋ taa.’ Ye mbʋ paa ɛyaa lalaa kaañɩɣ ɛ-yɔɔ yɔ, ɛtɩɖʋ ɛ-nɔɔ politiki tɔm taa. Pɩkpɛlɩkɩɣ-ɖʋ lɔŋ kɩbaŋ siŋŋ. Pɩkɛ toovenim se ɛyaa ɩɩkaɣ-ɖʋ pɔzʋʋ kpa se ɖɩla maamaaci lakasɩ nɛ tɔɔnaɣ huu, yaa ɖɩwaa kʋdɔndɩnaa, yaa ɖɩpɩsɩ pe-wiyaʋ. Ɛlɛ papɩzɩɣ nɛ peseɣti-ɖʋ se ɖɩtɔ caca, yaa ɖɩɖʋ nesi ɛyʋ weyi pamaɣzɩɣ se ɛpɩzɩɣ nɛ ɛkɛ ɖiyiyu kɩbanʋ yɔ nɛ ɖɩɖʋ ɖɔ-nɔɔ politiki tɔm taa. Ɛlɛ ɖɩna kpayɩ kpayɩ mbʋ Yesu kaalaba yɔ. Ekizaa se ɛɛɖʋʋ ɛ-nɔɔ politiki tɔm taa. Halɩ ɛyɔɔdɩ pʋwayɩ se: «Men-Kewiyaɣ tɩkɛ ɛjaɖɛ ɖɩnɛ ɖɩ-hɔɔlʋʋ nakʋyʋ.» (Yoh. 17:14; 18:36) Sɔnɔ, pɩcɛyaa se Krɩstʋ mba ɩwɛɛnɩ Yesu maɣzɩm nɛ pamaɣzɩnɩ ɛ-lakasɩ. E-Kewiyaɣ ɖɩɖʋʋ nesi, kɔ-yɔɔ ɖɩlɩzɩɣ aseɣɖe, nɛ ɖɩtɩmɩɣ se kɔkɔɔ.—Mat. 6:10. w24.12 4 § 5-6

Ŋŋkpɛlɩkɩɣ lɛ, ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋɖɔ tɔm ndʋ ŋkpɛlɩkɩɣ yɔ tɩ-yɔɔ yɔ. Kɩɖaŋ nɩɩyɩ yɔ: Ŋpɩzɩɣ nɛ ŋmaɣzɩnɩ Yehowa siɣsiɣ wɛtʋ nɛ ŋkpaɣ lɩmaɣzɩyɛ se ŋŋɖʋʋ tʋkaɣ ɛyaa taa. Maɣzɩnɩ sɔɔlɩm mbʋ Yesu kaawɛnɩ ɛ-Caa nɛ ɛyaa lalaa yɔɔ yɔ nɛ ŋsɔɔlɩ faaa se ŋla kʋñɔŋ Yehowa hɩɖɛ yɔɔ, nɛ ŋsɩnɩ ɖɔɖɔ ño-koobiya paa pɩwɛ kaɖɛ nabʋyʋ taa yɔ. Ŋpɩzɩɣ ɖɔɖɔ nɛ ŋmaɣzɩnɩ Yesu ye ŋlɩzɩɣ ɛyaa lalaa aseɣɖe se pɩsa nɛ paba ɖɔɖɔ pehiɣ waɖɛ nɛ pamʋ kʋjɔʋ sɔsɔʋ ŋgʋ Yehowa labɩ-ɖʋ yɔ. Ðɩwɛɣ nɛ ɖɩnɩɣ kɩhɛyʋʋ pʋ-ñʋʋ taa kɩlaʋ taa nɛ pɩkɩlɩɣ, nɛ ɖɩwɛɣnɩ ɛsɩmɩyɛ pɩ-yɔɔ nɛ pɩkɩlɩɣ lɛ, ɖɩsɔɔlʋʋ Yehowa nɛ ɛ-Pɩyalʋ nɛ pɩkɩlɩ. Piyeki nɛ paba ɖɔɖɔ pɔsɔɔlɩ-ɖʋ nɛ pɩkɩlɩ. (Yak. 4:8) Ye mbʋ, ɖiwolo pɩ-yɔɔ nɛ ɖɩlakɩnɩ tʋmɩyɛ mbʋ payɩ Yehowa haɣ-ɖʋ yɔ nɛ ɖɩkpɛlɩkɩ kɩhɛyʋʋ pʋ-ñʋʋ taa kɩlaʋ yɔɔ tɔm. w25.01 25 § 16-17

Papɩzaɣ pɛɖɛzɩ sɔnɔ evemiye mayaɣ se: «Ŋkʋsɩ man-kɩwɛɛkɩm kpeekpe ñɛ-ɛsɩndaa.» Tɔm pee ana, awɩlɩɣ se Yehowa kʋsʋʋ mba pekpiɖiɣ yɔ pa-kɩwɛɛkɩm ɛ-ɛsɩndaa nɛ ɛɛtasɩɣ-pʋ cɔnʋʋ. Papɩzɩɣ nɛ pɛɖɛzɩ tɔm loyaɣ ŋga ɖɔɖɔ ɛzʋnɔ: «Ŋyeba nɛ [man-kɩwɛɛkɩm] pɩsɩ ɛzɩ wiɖiyi pɩtaawɛɛ yɔ.» Palabɩnɩ tʋmɩyɛ tɔm pee lɛɛna Mikee 7:​18, 19 taa nɛ pañɩɣnɩ niye lɩmaɣzɩyɛ nɖɩ ɖɩ-yɔɔ. (Mik. 7:​18, 19) Masɩ nzɩ sɩyɔɔdʋʋ se Yehowa lɔʋ ɖa-kɩwɛɛkɩm ɖooo teŋgu cukaŋ taa. Caanaʋ taa lɛ, ye pɔlɔ wonuu nakʋyʋ teŋgu cukaŋ taa yɔ, ɛyʋ nɔɔyʋ taapɩzɩɣ se ɛlɩzɩ-kʋ. Bibl wɩlɩ-ɖʋ kpayɩ kpayɩ se alɩwaatʋ ndʋ Yehowa kpakɩɣ ɖa-kɩwɛɛkɩm nɛ ekpeɣu-ɖʋ yɔ, ɛhɩzɩɣ-pʋ caɣ caɣ nɛ pɩtɩcɛyɩ se ɖɩtasɩ kʋʋ ɖa-tɩ tɔm. Ɛzɩ Daviid yɔɔdʋʋ yɔ, toovenim taa lɛ, «koboyaɣ tɩnaa lɛ mba pamanɩ paɣtʋ yɔɔ ɛlɛ pekpeɣ-wɛ yɔ, nɛ mba pa-kɩdɛkɛdɩm yɔɔ pohuuzaa yɔ.» (Roma 4:7) Kpaɣʋ nɛ kpeɣu siŋŋ lɛ! w25.02 9 § 7-8

Paradisuu nakʋyʋ wɛ tɛtʋ yɔɔ sɔnɔ nɛ ɛyaa mba palakɩ lakasɩ kɩbanzɩ yɔ, mba suni kɩ-taa. Ɛyaa miiliyɔɔwaa sakɩyɛ wɛnɩ kɩ-taa, nɛ laŋhɛzɩyɛ siŋŋ wɛ pɛ-hɛkʋ taa. Mba pɛtɛm wɛʋ paradisuu ŋgʋ kɩ-taa yɔ, pɛtɛm pa-taa se paakaɣ lɩʋ kɩ-taa kaaʋ. Pɔsɔɔlaa ɖɔɖɔ se ɛyaa sakɩyɛ ɩsɔzɩ pɔ-yɔɔ ŋgee lone nɖɩ ɖɩ-taa. Ɛbɛ ŋgee lone nɖɩ ɖɩkɛnaa? Ðɩkɛnɩ fezuu taa paradisuu. Yehowa samaɣ wɛ Sataŋ ɛjaɖɛ kɩdɛkɛdɩyɛ nɖɩ ɖɩ-taa yɔ, ɛyaa paɖɩɣ ɖama ɖɩ-taa; ɛlɛ ɛtɩŋnɩ piti nʋmɔʋ nakʋyʋ yɔɔ nɛ eyele nɛ laŋhɛzɩyɛ nɛ nɔɔ kʋɖʋmaɣ pɛwɛɛ ɛ-sɛyaa hɛkʋ taa. (1 Yoh. 5:19; Natʋ 12:12) Ðɛ-Ɛsɔ sɔɔlɩm tʋ naɣ ɖoŋ kɩdɛkɛdɩŋ weyi ɛjaɖɛ ɖɩnɛ ɖɩwɛnɩ ɛyaa yɔɔ yɔ; ɛlɛ eyeki se ɖa lɛ, ɖɩwɛɛ pɛɛyɛ taa se pɩsa nɛ ɖɩsɛɛ-ɩ nɛ taa leleŋ. Bibl ya fezuu taa paradisuu se ‘ɖenɖe ɛyʋ cɔzʋʋ’ nɛ kaɖɛ naɖɩyɛ ɛɛtalɩɣ-ɩ yɔ nɛ «kaɖaɣ ŋga pamɩzɩ-kɛ lɩm camɩyɛ yɔ.» (Iza. 4:6; 58:11) Yehowa ɖoŋ taa lɛ, mba pɛwɛ fezuu taa paradisuu ŋgʋ kɩ-taa yɔ, pɛwɛ koboyaɣ nɛ pɛɛyɛ taa kaɖɛ kɛdɛzaɣ kɩyakɩŋ ɩnɛ ɩ-taa.—Iza. 54:14; 2 Tim. 3:1. w24.04 20 § 1-2

Ye ŋsɔɔlaa se ŋɖɔkɩ nesi yɔ, pɩtʋʋ fɛyɩ se ŋtɩmnɩ Ɛsɔ se ɛsɩnɩ-ŋ nɛ ŋhiɣ weyi ɛmʋnɩ-ŋ yɔ. Pɩkɛ toovenim se Yehowa tɩla nɔɔyʋ tamaɣ se ɛhaɣ-ɩ halʋ yaa walʋ. Ɛlɛ ɛcɔŋnɩ ña-kɩcɛyɩm ɖeɖe nɛ ɛmaɣzɩɣ ɛzɩma pɩlakɩ-ŋ yɔ pɩ-yɔɔ, nɛ ɛpɩzɩɣ nɛ ɛsɩnɩ-ŋ alɩwaatʋ ndʋ ŋñɩnɩɣ nɔɔyʋ se ña nɛ ɩ ɩɖɔkɩ nesi yɔ. Ye mbʋ, wolo pɩ-yɔɔ nɛ ŋheyiɣ-i mbʋ ŋsɔɔlaa yɔ nɛ ɛzɩma pɩlakɩ-ŋ yɔ. (Keɣ. 62:8) Tɩmnɩ-ɩ se ɛha-ŋ lɔŋsɩnɖɛ nɛ ɛsɩnɩ-ŋ nɛ ŋwɛɛ suuɖu. (Yak. 1:5) Paa ŋtihiɣti weyi ña nɛ ɩ ɩpɩzɩɣ nɛ ɩɖɔkɩ nesi yɔ, Yehowa labɩ tamaɣ se ɛkaɣ wobu pɩ-yɔɔ nɛ ɛcɔnɩ ñɔ-yɔɔ tomnaɣ yɔɔ nɛ ɛwɩlɩ-ŋ sɔɔlɩm mbʋ pɩpɔzʋʋ-ŋ yɔ. (Keɣ. 55:22) Ɛlɛ kpa ña-tɩ: Taayele nɛ walʋ yaa halʋ ñɩnʋʋ pɩsɩ mbʋ pɩ-tɔm kɩlɩ cɛyʋʋ ñe-wezuu caɣʋ taa yɔ. (Filp. 1:10) Taa leleŋ siŋŋ ɛɛlɩɣnɩ ɛɖandʋ caɣʋ yaa nesi ɖɔkʋʋ cɔlɔ, ɛlɛ ɛlɩɣnɩ taabalɩyɛ nɖɩ ɖɩwɛ ña nɛ Yehowa mɩ-hɛkʋ taa yɔ ɖɩ-cɔlɔ na. (Mat. 5:3) Nɛ alɩwaatʋ ndʋ ŋkɛ ɛɖanɛ yɔ, ŋpɩzɩɣ nɛ ŋwalɩsɩ ñɛ-Ɛsɔ sɛtʋ tʋmɩyɛ nɛ pɩkɩlɩ. (1 Kɔr. 7:​32, 33) Labɩnɩ tʋmɩyɛ ɛɖandʋ alɩwaatʋ ndʋ camɩyɛ. w24.05 21 § 4; 22 § 6

Alɩwaatʋ ɛzɩma pɩwɛɛ se ɩkpaɣ nɛ ɩɖanɩnɩ ɖama? Ðoŋ ɖoŋ lɛ, alɩwaatʋ ndʋ ɖikpedesiɣ nɛ ɖɩkpakɩɣ lɩmaɣza yɔ pɩkɔŋnɩ kala. (Adu. 21:5) Pʋyɔɔ lɛ, pɩpɔzʋʋ se ɩkpaɣ alɩwaatʋ ndʋ pɩpɔzʋʋ yɔ mɩ-ɖanɩyɛ alɩwaatʋ taa nɛ ɩtɩlɩ ɖama camɩyɛ. Ɛlɛ ye pɩtɩcɛyɩ yɔ, pɩtɩpɔzɩ se iyele nɛ mɩ-ɖanɩyɛ alɩwaatʋ kɩlɩ ɖaɣlʋʋ. Bibl yɔɔdʋʋ se: «Ye ɛyʋ ɛɖaŋ nabʋyʋ nɛ pɩɩkɔŋ lɔŋ yɔ, pɩhaɣ-ɩ laŋwɛɛkɩyɛ.» (Adu. 13:12) Ye ɖɩsɩm nabɛyɛ se paɖanɩɣ ɖama yɔ, ɛbɛ ɖɩpɩzɩɣ ɖɩla nɛ ɖɩsɩnɩ-wɛ? Ðɩpɩzɩɣ nɛ ɖɩyaa-wɛ se pɔkɔɔ nɛ ɖa nɛ wɛ ɖɩtɔɔ tɔɔnaɣ, ɖɩla ɖɔ-hɔʋ taa Ɛsɔ sɛtʋ yaa ɖɩmʋ helim. (Roma 12:13) Ɛzɩ pɩpɔzʋʋ-wɛ nɔɔyʋ se ɛ-ɛsɩyɛ ɛwɛɛ pɔ-yɔɔ? Ɛzɩ pɩpɔzʋʋ se pasɩnɩ-wɛ nɛ powolo ɖoli? Yaa ɛzɩ pɩpɔzʋʋ-wɛ lone naɖɩyɛ se pɛwɛɛ pe-ɖeke nɛ pɔyɔɔdɩ pa-taa tɔm na? Ye ɛɛɛ yɔ, ɖɩpɩzɩɣ nɛ ɖɩsɩnɩ-wɛ hɔɔlɩŋ ɛnɩ ɩ-taa? (Gal. 6:10) Ye pakpaɣ-ŋ se ŋtɩŋɩɣ pa-wayɩ nɛ ñɛ-ɛsɩyɛ wɛɛ pɔ-yɔɔ yɔ, kpaɣ se pɩkɛnɩ-ŋ waɖɛ sɔsɔɖɛ. Pɩpɔzʋʋ se ŋkpa ña-tɩ nɛ ŋtaaɖɛɛ ɖooo poliŋ nɛ ŋyele pe-ɖeke, ɛlɛ pɩwɛɛ ɖɔɖɔ se ŋwɛɛ lɛɣtʋ nɛ ŋtɩlɩ alɩwaatʋ ndʋ pɩpɔzʋʋ se ŋyele-wɛ nɛ pɔyɔɔdɩ pa-taa tɔm yɔ. w24.05 30 § 13-14

Ɛgbɛyɛ taa ɛzʋtʋyaa ñakɩ pana se patɩlɩ mbʋ pituyi koobu nɔɔyʋ nɛ ɛla kɩwɛɛkɩm yɔ. Ɛzɩ koobu ɛnʋ ɛpaɣzɩ hɛʋ fezuu taa pazɩ pazɩ, mbʋ pʋyɔɔ yɔ eyebi labʋ ɛ-tɩ yɔɔ kpɛlɩkʋʋ ɖoŋ ɖoŋ yaa eyebi tɔm susuu ɖoŋ ɖoŋ? Eyebi tɩmnʋʋ Yehowa ɖoŋ ɖoŋ yaa eyebi labʋ adɩma wena alɩɣnɩ ɛ-laŋɩyɛ taa yɔ? Ɛzɩ eyeba nɛ kɔɖɛyɩ kɩdɛkɛdʋʋ wɛɛnɩ ɖoŋ ɛ-yɔɔ? Ɛkpaɣ lɩmaɣza kɩdɛkɛda taabalɩyɛ ɖʋʋ yaa aleɣya labʋ nʋmɔʋ taa? Ðoŋ weyi lɩmaɣza ana awɛnɩ ɛ-laŋɩyɛ yɔɔ? Eɖiɣzinaa se lɩmaɣza wena ɛkpaɣaa yɔ yaa lakasɩ nzɩ ɛlaba yɔ sɩɖʋ ɛ-Caa Yehowa ɖɩwɩzɩyɛ na? Ɛzʋtʋyaa pɩzɩɣ nɛ pɔpɔzɩ kɩwɛɛkɩm laɖʋ ɛnʋ tɔm nɛ pɩsɩnɩ-ɩ nɛ ɛmaɣzɩ nɛ ɛna mbʋ ɛlaba nɛ pɩcamɩ ɛ nɛ Yehowa pa-taabalɩyɛ nɛ piyele nɛ ɛla kɩwɛɛkɩm yɔ. Palakɩ mbʋ nɛ hɛɛɛ wɛtʋ, nɛ paapɔzʋʋ-ɩ ɛ-yɔɔ tɔm ndʋ pɩtɩcɛyɩ se patɩlɩ yɔ. (Adu. 20:5) Pɩtasɩ lɛ, papɩzɩɣ nɛ patɩŋnɩ kɩɖaŋ nɩɩyɩ yɔɔ nɛ pɔcɔlɩ ɛyʋ ɛnʋ ɛ-lɩmaɣza nɛ pɩsɩnɩ-ɩ nɛ ɛna mbʋ pʋyɔɔ mbʋ ɛlaba yɔ pɩfɛyɩ ɖeu yɔ. Pɩtɩla ɛzʋtʋyaa nɛ ɛyʋ ɛnʋ pacalɩɣ katʋʋ lɛ, ɛpɩzɩɣ nɛ ɛpaɣzɩ nɩʋ siziŋ siŋŋ mbʋ ɛlaba yɔ pɩ-yɔɔ. Halɩ ɛpɩzɩɣ nɛ ekpiɖi ɛ-kɩwɛɛkɩm yɔɔ. w24.08 22 § 9-11

Yesu susi «Kewiyaɣ tɔm kɩbandʋ» nɛ kpekpeka, mbʋ pʋyɔɔ yɔ ɛnawa se tʋmɩyɛ nɖɩ Ɛsɔ kaasɔɔlaa se ɛla. Yesu kaasɩ tɔm susuu tʋmɩyɛ kajalaɣ lone taa e-wezuu caɣʋ taa. Halɩ kɛdɛzaɣ fenasɩ nzɩ sɩ-taa esusi tɔm yɔ, ewobi «tɛtʋ sɔsɔtʋ ndɩ ndɩ taa nɛ tɛtʋ cikpetu ndɩ ndɩ taa» nɛ ɛwɩlɩ tɔm. (Luka 13:22) Pɩtasɩ lɛ, ɛtasɩ falɩsʋʋ tɔmkpɛlɩkɩyaa nabɛyɛ se pa nɛ ɩ posusi tɔm. (Luka 10:1) Sɔnɔ ɖɔɖɔ Yehowa nɛ Yesu pɔsɔɔlaa se ɖɩka ñʋʋ nɛ tɔm susuu tʋmɩyɛ. (Mat. 24:14; 28:​19, 20) Ye ɖɩwɛnɩ lɩmaɣza wena Yehowa wɛnɩ ɛyaa yɔɔ yɔ, ɖɩwɛɣ kpekpeka tɔm susuu taa nɛ pɩkɩlɩ. Yehowa sɔɔlaa se ɛyaa sakɩyɛ ɩnɩɩ tɔm kɩbandʋ nɛ pamʋ-tʋ. (1 Tim. 2:​3, 4) Tɔm kɩbandʋ pɩzɩɣ nɛ pɩya ɛyaa ñʋʋ, pʋyɔɔ lɛ Yehowa wɛɛ nɛ ɛfalɩsɩɣ-ɖʋ se ɖɩwɛɛ niye tɔm susuu taa nɛ pɩkɩlɩ. Paa ɛyaa iitisiɣ se papaɣzɩ sɛʋ Yehowa lɛɛlɛɛyɔ yɔ, pɩtɩla pakaɣ hiɣu waɖɛ se pɛsɛɛ-ɩ pʋcɔ nɛ kʋñɔŋ sɔsɔʋ tɛ. w25.03 15-16 §5-7

Ye palɩzɩ nɔɔyʋ ɛgbɛyɛ taa nɛ ɛkɔɔ kediɣzaɣ taa yɔ, paa Krɩstʋ tʋ weyi lɛ pɩpɔzʋʋ se ɛtɩŋnɩ ɛ-ɛhʋyɛ nɖɩ ɛkpaɣ Bibl nɛ ɛfalɩsɩna yɔ ɖɩ-yɔɔ nɛ ɛkpaɣ lɩmaɣza se ɛsɛɣ-ɩ yaa ɛɛsɛɣ-ɩ. Nabɛyɛ pɩzɩɣ nɛ palɩzɩ se pɛsɛɣ ɛyʋ ɛnʋ yaa palakɩ-ɩ talɩ ɖeu kediɣzaɣ taa. Paa mbʋ yɔ, pɩfɛyɩ se ɖa nɛ ɩ ɖɩla kɛdaɣ nɛ pileɖi yaa ɖɩɖʋ-ɩ nɛ taabalɩyɛ. Nabɛyɛ pɩzɩɣ nɛ pɔpɔzɩ se: «Pɩcaɣ Bibl yɔɔdaa se ye Krɩstʋ tʋ nɔɔyʋ ɛsɛ kɩwɛɛkɩm laɖʋ weyi ekizaa se eekpiɖiɣ yɔ, ɛɖʋʋ nesi ɛ-tʋma kɩdɛkɛda» na? (2 Yoh. 9-11) Tɔm ndʋ tɩcɔ mayaɣ ŋga nɛ tɩta yɔ, tɩwɩlɩɣ se tisuu yebiyaa nɛ ɛyaa mba peseɣtiɣ lalaa se pala kɩwɛɛkɩm yɔ, mba lɔŋ tasʋʋ mbʋ pitukuuna. (Natʋ 2:20) Pʋyɔɔ lɛ, ye ɛyʋ nɔɔyʋ ɛyɛlɩɣnɩ tisuu yebiyaa tɔm yaa eseɣtiɣ lalaa se pala kɩwɛɛkɩm yɔ, ɛgbɛyɛ taa ɛzʋtʋyaa iikilimiɣ ɛ-yɔɔ. Paa mbʋ yɔ, lidaʋ wɛɛ se ɛyʋ ɛnʋ ɛpɩzɩɣ nɛ ekpiɖi ɛ-kɩwɛɛkɩm yɔɔ. Ɛlɛ, pɩfɛyɩ se ɖɩsɛɛ-ɩ yaa ɖɩyaa-ɩ se ɛkɔɔ ɛgbɛyɛ taa kediɣzaɣ nakɛyɛ pɩkɔɔ nɛ pɩsɩɩnɩ alɩwaatʋ ndʋ ekpiɖaa yɔ. w24.08 30-31 § 14-15

Yesu calɩ samaɣ nakɛyɛ nɛ pɩtɛ lɛ, eyele nɛ apostoloowaa kpa kpɩyʋʋ taa nɛ papɩsɩ Kapɛrɩnawum, nɛ ɛnʋ ñakpa pʋʋ taa se pɩsa nɛ samaɣ ɛtaakpa-ɩ nɛ kapɩsɩ-ɩ wiyaʋ. (Yoh. 6:​16-20) Apostoloowaa wɛ kpɩyʋʋ taa lɛ, tɛʋ sɔsɔʋ nakʋyʋ paɣzɩ nɩʋ. Piyeba nɛ helim sɔsɔm nabʋyʋ paɣzɩ mabʋ nɛ pɩkʋsʋʋ lɩm hola. Pʋwayɩ lɛ pana Yesu, ɛwɛɛ nɛ ɛɖɔŋ lɩm yɔɔ nɛ ɛkɔŋ pɔ-cɔlɔ. Nɛ eheyi apostoloo Pɩyɛɛrɩ se ɛnʋ ɖɔɖɔ ɛɖɔ lɩm yɔɔ. (Mat. 14:​22-31) Yesu ñɩtaa nɛ ɛkpa kpɩyʋʋ taa lɛ, helim yele mabʋ. Pɩɖɩɣzɩ ɛ-tɔmkpɛlɩkɩyaa nɛ pɔyɔɔdɩ se: «Toovenim taa lɛ, ŋkɛ Ɛsɔ Pɩyalʋ.» (Mat. 14:33) Ɛlɛ pataatɩɩnatɩ nɔɔ kʋɖʋmaɣ ŋga kɛwɛ maamaaci lakasɩ nzɩ nɛ nzɩ ɛlaba nɛ ɛha ɛyaa tɔɔnaɣ yɔ sɩ-hɛkʋ taa yɔ. Maarɩkɩ yɔɔdaɣ kɛdaɣ ŋga kɔ-tɔm lɛ, ɛyɔɔdaa se: «Nɛ pɩɖɩɣzɩ-wɛ siŋŋ, mbʋ pʋyɔɔ yɔ pataanɩɩ kpɔnɔnaa mba ɛɛtayaa yɔ pɔ-tɔbʋʋ.» (Mark. 6:​50-52) Toovenim taa lɛ, pataanɩɩ pɩ-taa se Yehowa ha Yesu ɖoŋ se ɛla maamaaci lakasɩ nzɩ sɩkɩlɩ nzɩ ɛlaba nɛ ɛha ɛyaa kpɔnɔnaa yɔ. w24.12 5 § 7

Ðɩpɩzɩɣ ɖɩla mbʋ payɩ ɖɩpɩzɩɣ yɔ Yesu sɩm yɔɔ tɔzʋʋ sɔnzɩ alɩwaatʋ taa nɛ ɖɩwɩlɩ Yehowa se ɖa-taa wɛ leleŋ siŋŋ kɩhɛyʋʋ pʋ-ñʋʋ taa kɩlaʋ yɔɔ nɛ ɖɩwɩlɩ ɖɛ-ɛsɩmɩyɛ sɔɔlɩm mbʋ Yehowa wɩlɩ-ɖʋ yɔ pɩ-yɔɔ. Pɩtasɩna se ɖɩlakɩ ɖʋtʋ se ɖiwolo Yesu sɩm yɔɔ tɔzʋʋ sɔnzɩ taa lɛ, ɖɩyaɣ ɛyaa lalaa ɖɔɖɔ se powolo sɔnzɩ nzɩ sɩ-taa. Ɛyaa mba ŋyaɣ se powolo sɔnzɩ nzɩ sɩ-taa yɔ, heyi-wɛ mbʋ pakaɣ labʋ sɩ-taa yɔ. Pɩtɩla pɩwɛɣ ɖeu se ŋwɩlɩ-wɛ video Ɛbɛ yɔɔ Yesu sɩba? nɛ Tɔzɩ Yesu sɩm yɔɔ; pɛwɛ jw.org yɔɔ. Pɩwɛɛ se ɛgbɛyɛ taa ɛzʋtʋyaa ɩyaa mba pɛhɛ fezuu taa yɔ. Maɣzɩ nɛ ŋna ɛzɩma taa leleŋ wɛɣ ɛsɔdaa nɛ tɛtʋ yɔɔ ye Yehowa heu kilebu nɔɔyʋ ɛpɩsɩ ɛ-kalakʋ taa yɔ. (Luka 15:​4-7) Yesu sɩm yɔɔ tɔzʋʋ sɔnzɩ taa, paa ɖɩsɛɣ ɖama yɔ, ɖɩtaasɔɔ se ɖɩsɛɛ kɔzɩ kɔzɩ ɛyaa kɩfama mba pɔkɔŋ yɔ yaa ɛyaa mba peyebi sɔnzɩ nzɩ sɩ-taa kɔm pileɖaa yɔ. Ðɩsɔɔlaa se ɖiyele nɛ pa-taa la leleŋ se pɔkɔm sɔnzɩ nzɩ sɩ-taa.—Roma 12:13. w25.01 29 § 15

Kɩhɛyʋʋ pʋ-ñʋʋ taa kɩlaʋ sɩɣnɩ-ɖʋ se ɖɩnɩɩ pɩ-taa se Yehowa wɛ siɣsiɣ, ɛlɛ kɔzɩ kɔzɩ lɛ, kɩsɩɣnɩ-ɖʋ se ɖɩna se ɛsɔɔlɩ-ɖʋ siŋŋ. (Yoh. 3:16; 1 Yoh. 4:​9, 10) Kɩhɛyʋʋ pʋ-ñʋʋ taa kɩlaʋ wɩlɩɣ se pɩtasɩna se Yehowa sɔɔlaa se ɖɩcaɣ wezuu tam lɛ, ɛsɔɔlaa ɖɔɖɔ se ɖɩkɛ ɛ-hɔʋ taa mba. Ðɩmaɣzɩ tɔm tʋnɛ tɩ-yɔɔ: Alɩwaatʋ ndʋ Aɖam labɩ kɩwɛɛkɩm yɔ, Yehowa ɖɔɔnɩ-ɩ ɛ-hɔʋ taa. Mbʋ pɩlɩ pɩ-taa yɔ lɛ se patɩlʋlɩ ɖa-taa nɔɔyʋ Yehowa hɔʋ taa. Ɛlɛ kɩhɛyʋʋ pʋ-ñʋʋ taa kɩlaʋ yɔɔ lɛ, Yehowa kpaɣ ɖa-kɩwɛɛkɩm nɛ ekpeɣ-ɖʋ, nɛ wiɖiyi ɛkaɣ yebu nɛ mba payɩ pawɩlɩɣ se pɛwɛnɩ tisuu nɛ pañaŋɩ-ɩ yɔ pasʋʋ ɛ-hɔʋ taa. Halɩ lɛɛlɛɛyɔ lɛ, taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ Yehowa nɛ ɖo-koobiya ɖɛ-hɛkʋ taa. Toovenim taa lɛ, Yehowa sɔɔlɩ-ɖʋ siŋŋ.—Roma 5:​10, 11. w25.01 21 § 6

Pɩtʋʋ fɛyɩ se ŋtisiɣ se kɩhɛyʋʋ pʋ-ñʋʋ taa kɩlaʋ kɛ kʋjɔʋ ŋgʋ kɩ-wayɩ fɛyɩ yɔ. (2 Kɔr. 9:15) Yesu kpaɣ e-wezuu nɛ ɛlaa ɖɔ-yɔɔ, pʋyɔɔ lɛ taabalɩyɛ kɩbanɖɛ pɩzɩɣ nɛ ɖɩwɛɛ ña nɛ Ɛsɔ Yehowa mɩ-hɛkʋ taa. Ŋpɩzɩɣ ɖɔɖɔ nɛ ŋwɛɛnɩ wezuu maatɛŋ lidaʋ. Ye mbʋ, pɩmʋnaa se ɖɩwɩlɩ Yehowa ɖɛ-ɛsɩmɩyɛ; ɛlabɩ-ɖʋ kʋjɔʋ ŋgʋ mbʋ pʋyɔɔ yɔ ɛsɔɔlɩ-ɖʋ siŋŋ. (Roma 5:8) Pɩsa nɛ ɖiwolo pɩ-yɔɔ nɛ ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ nɛ ɖɩtaakpaɣ-kʋ ɛzɩ waɖɛ pɩkɛnɩ-ɖʋ yɔ lɛ, Yesu ɖʋ-ɖʋ paɣtʋ se ɖɩtɔzʋʋ ɛ-sɩm yɔɔ paa pɩnaɣ ŋga. (Luka 22:​19, 20) Pɩnaɣ kanɛ, pakaɣ labʋ Yesu sɩm yɔɔ tɔzʋʋ sɔnzɩ Saɖakawaɣ wiye, 2 avril 2026. Pɩtʋʋ fɛyɩ se ɖa-tɩŋa payɩ ɖɩwɛɛ nɛ ɖɩlakɩ ɖʋtʋ se ɖiwolo sɩ-taa. Yesu sɩm yɔɔ tɔzʋʋ sɔnzɩ alɩwaatʋ taa, ye ɖɩkpaɣ alɩwaatʋ nɛ ɖɩmaɣzɩ mbʋ Yehowa nɛ ɛ-Pɩyalʋ Yesu palabɩ-ɖʋ yɔ pɩ-yɔɔ yɔ, sɔnzɩ nzɩ sɩkaɣ-ɖʋ wazʋʋ. w25.01 20 § 1-2

Ye ŋwobi pɩ-yɔɔ nɛ ŋmaɣzɩɣ sɔɔlɩm mbʋ Ɛsɔ Yehowa nɛ Yesu Krɩstʋ pɛwɛnɩ ɖɔ-yɔɔ yɔ pɩ-yɔɔ yɔ, ŋkaɣ kpɛlɩkʋʋ lɔŋ sakɩyɛ sɔɔlɩm mbʋ pɩ-yɔɔ. Pɩtɩla, sɛmɩyɔɔ Krɩstʋ sɩm yɔɔ tɔzʋʋ sɔnzɩ alɩwaatʋ taa, ŋpɩzɩɣ nɛ ŋkpaɣ alɩwaatʋ nɛ ŋkalɩ Evaŋgilim kʋɖʋmʋʋ yaa pɩcɛzɩ mbʋ. Taañaɣ pana se ŋkalɩ ñʋŋ sakɩyɛ alɩwaatʋ kʋɖʋmtʋ taa. Ɛlɛ ŋŋkalɩɣ lɛ, kpaɣ alɩwaatʋ nɛ ŋñɩnɩ lɩmaɣza lɛɛna wena a-yɔɔ pɩpɔzʋʋ se ɖɩsɔɔlɩ Yehowa nɛ Yesu yɔ. Ŋwɛʋ toovenim taa yɔ, ye pɩtɛm labʋ pɩnzɩ sakɩyɛ yɔ, pɩtɩla ŋpɔzʋʋ ña-tɩ se: «Ɛzɩ manpɩzɩɣ nɛ mantasɩ kpɛlɩkʋʋ tɔm kɩfatʋ natʋyʋ pɩlɩɩnɩ Ɛsɔ siɣsiɣ wɛtʋ, ɛ-sɔɔlɩm nɛ kɩhɛyʋʋ pʋ-ñʋʋ taa yɔɔ?» Toovenim taa lɛ, ɖɩkaɣ wobu pɩ-yɔɔ nɛ ɖɩkpɛlɩkɩɣ tɔm kɩfatʋ tɔm ñʋŋ ɛnɩ nɛ tɔm ñʋŋ lɛɛŋ yɔɔ. Ye mbʋ, kalɩ tɔm kɩbandʋ ndʋ tɩwɛ ɖɛ-ɛgbɛyɛ takayɩsɩ taa yɔ nɛ ŋkpɛlɩkɩ-tʋ. w25.01 24-25 § 13-15