Ña-taa ɛla leleŋ nɛ lone nɖɩ ŋwɛnɩ Yehowa hɔʋ taa yɔ

1. Alɩwaatʋ ndʋ ɖɩmaɣzɩɣ mbʋ payɩ Yehowa lɩzaa yɔ pɩ-yɔɔ yɔ, tɔm ndʋ ɖɩpɩzɩɣ nɛ ɖɩpɔzɩ ɖa-tɩ?

ALƖWAATƲ ndʋ ɖɩmaɣzɩɣ mbʋ payɩ Yehowa lɩzaa yɔ pɩ-yɔɔ yɔ, ɖɩpɩzɩɣ nɛ ɖɩwɛɛnɩ lɩmaɣza wena keɣa maɖʋ Daviid kaawɛna yɔ. Ɛtɩmnɩ Yehowa nɛ ɛyɔɔdɩ se: “Pɔcɔnaa se ŋsezi niye na nɛ ŋlɩzɩ ɛsɔdaa, nɛ pana se ñaɖʋnɩ fenaɣ nɛ tɩɩnzɩ yɔ, ɛzɩ ɛyʋ kɛ we nɛ ŋmaɣzɩɣ ɛ-yɔɔ, Aɖam sayɩ kɛ anɩ pʋdʋ pɩŋŋ nɛ ŋtɔzʋʋ ɛ-yɔɔ?” (Keɣa 8:4, 5) Ɛzɩ Daviid yɔ, ɖɩpɩzɩɣ nɛ ɖɩmaɣzɩ nɛ ɖɩna ɛzɩma ɖɩwɛ ññɩɩ ye pakpaɣ-ɖʋ nɛ pamaɣzɩnɩ tɩɩnzɩ nzɩ Yehowa lɩzaa yɔ; piyeki nɛ pɩɖɩɣzɩ-ɖʋ se Yehowa maɣzɩɣ ɖɔ-yɔɔ. Ɛlɛ ɛzɩ ɖɩkɔŋʋʋ naʋ yɔ, pɩtasɩna se Yehowa maɣzaɣ kajalaɣ ɛyaa, Aɖam nɛ Ɛva pɔ-yɔɔ lɛ, eyeba ɖɔɖɔ nɛ pɛkɛ ɛ-hɔʋ taa mba.

2. Ɛbɛ Yehowa kaasɔɔlaa se Aɖam nɛ Ɛva pala?

² Aɖam nɛ Ɛva paakɛnɩ Yehowa piya kajalaɣ ñɩnzɩ tɛtʋ yɔɔ, nɛ Yehowa kaakɛnɩ pa-Caa kʋsɔɔlʋ weyi ɛwɛ ɛsɔdaa yɔ. Ɛɛɖʋ Aɖam nɛ Ɛva tʋmɩyɛ se pala. Ɛsɔ heyi-wɛ se: “Ɩlʋlɩ, ihuu nɛ ɩwadɩ tɛtʋ yɔɔ nɛ ɩñazɩ-tʋ.” (Kiɖe 1:28) Ɛɛsɔɔlaa se palʋlɩ piya nɛ pɔcɔnɩ tɛtʋ yɔɔ camɩyɛ. Ye Aɖam nɛ Ɛva paañam Ɛsɔ nɛ pala mbʋ ɛpɔzʋʋ-wɛ yɔ, pa nɛ pa-sayɩnaa paakɛ Yehowa hɔʋ taa ñɩma tam.

3. Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa kaaha Aɖam nɛ Ɛva lone nɖɩ ɖɩmʋ ñɩm yɔ ɛ-hɔʋ taa?

³ Aɖam nɛ Ɛva paawɛnɩ lone nɖɩ ɖɩmʋ ñɩm yɔ Yehowa hɔʋ taa. Keɣa 8:5; nwt nɛ mayaɣ ŋga kɛ-tɛ pɩ-tɛɛ tɔm taa, Daviid yɔɔdɩ tɔm tʋnɛ pɩlɩɩnɩ ɛzɩma Yehowa lɩzɩ ɛyʋ yɔ pɩ-yɔɔ nɛ ɛtɔ se: “Ŋlabɩ-ɩ nɛ Ɛsɔ tiyiyaa kɩlɩ-ɩ pazɩ na, ŋpamɩ-ɩ samtʋ nɛ keɖeɣa ɛzɩ awiya hulaɣ yɔ.” Toovenim taa lɛ, Yehowa tɩha ɛyaa ɖoŋ nɛ lɛɣtʋ ɛzɩ Ɛsɔ tiyiyaa yɔ, nɛ pɛfɛyɩ niye ɖɔɖɔ ɛzɩ Ɛsɔ tiyiyaa yɔ. (Keɣa 102:20) Ɛlɛ Ɛsɔ tiyiyaa ɖoŋ tɩnaa mba pakɩlɩ ɛyaa ‘pazɩ yem na.’ Maɣzɩ pɩ-yɔɔ nɛ ŋna! Alɩwaatʋ ndʋ Yehowa lɩzɩ ɖa-lʋlɩyaa kajalaɣ ñɩma yɔ, ɛha-wɛ wezuu ŋgʋ kɩ-wayɩ fɛyɩ yɔ.

4. (a) Aɖam nɛ Ɛva patɩña Ɛsɔ lɛ, ɛbɛ lɩ pɩ-taa? (b) Nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁴ Pɩlabɩ pʋtɔdɩyɛ se Aɖam nɛ Ɛva pelesi lone nɖɩ paawɛnɩ Yehowa hɔʋ taa yɔ. Ɛzɩ ɖɩkɔŋʋʋ naʋ tɔm ñʋʋ kʋnɛ kɩ-taa yɔ, pɩkɔnɩ kala sɔsɔna siŋŋ pa-lʋlʋʋ taa mba. Ɛlɛ kaɖʋwa ŋga Yehowa kaawɛna yɔ katɩlɛɣzɩ. Ɛsɔɔlaa se ɛyaa mba pañaŋɩ-ɩ yɔ, pɛkɛ e-piya tam. Kajalaɣ lɛ, iyele nɛ ɖɩna ɛzɩma Yehowa ɖʋ-ɖʋ hɩɖɛ yɔ. Pʋwayɩ lɛ, ɖɩkaɣ naʋ mbʋ ɖɩpɩzɩɣ nɛ ɖɩla lɛɛlɛɛyɔ nɛ ɖɩwɩlɩ se ɖɩsɔɔlaa se ɖɩkɛ Ɛsɔ hɔʋ taa mba yɔ. Kɛdɛzaɣ ɖeɖe lɛ, ɖɩkaɣ naʋ tamtam wazasɩ nzɩ Yehowa piya nzɩ sɩwɛ tɛtʋ yɔɔ yɔ, sɩkaɣ hiɣu yɔ.

ƐZƖMA TƖYƐ YEHOWA ÐƲ ƐYAA HƖÐƐ?

5. Ɛbɛ ɖɩpɩzɩɣ ɖɩla nɛ ɖɩwɩlɩ Ɛsɔ se ɖɩɖʋʋ-ɩ hɩɖɛ mbʋ pʋyɔɔ yɔ ɛlɩzɩ-ɖʋ ɛ-lɛzʋʋ?

⁵ Yehowa ɖʋ-ɖʋ hɩɖɛ nɛ ɛlɩzɩ-ɖʋ ɛ-lɛzʋʋ. (Kiɖe 1:26, 27) Ɛsɔ lɩzɩ-ɖʋ ɛ-lɛzʋʋ nɛ pʋyɔɔ lɛ, ɖɩpɩzɩɣ nɛ ɖɩwɛɛnɩ ɛ-wɛtʋ kɩbandʋ sakɩyɛ nɛ ɖɩlɩzɩ-tʋ nɛ ɖɩwɩlɩ; tɩ-taa natʋyʋ lɛ sɔɔlɩm, pʋtɔdɩyɛ naʋ, toovenim wɛʋ, nɛ siɣsiɣ wɛtʋ. (Keɣa 85: 15; 144: 17) Alɩwaatʋ ndʋ ɖɩñakɩ pana se ɖɩwɛɛnɩ wɛtʋ kɩbandʋ ndʋ yɔ, ɖɩɖʋʋ Yehowa hɩɖɛ nɛ ɖɩwɩlɩɣ-ɩ ɖɛ-ɛsɩmɩyɛ. (1 Pɩy. 1:14-16) Alɩwaatʋ ndʋ ɖɩcakɩ wezuu ŋgʋ kɩkɛdɩɣnɩ ɖa-Caa weyi ɛwɛ ɛsɔdaa yɔ, ɖihikiɣ koboyaɣ, nɛ ɖa-taa lakɩ leleŋ. Nɛ Yehowa lɩzɩ-ɖʋ ɛ-lɛzʋʋ, pʋyɔɔ ɛha-ɖʋ waɖɛ se ɖɩkɛ ɛyaa mba ɛsɔɔlaa se pɛwɛɛ ɛ-hɔʋ taa yɔ.

6. Alɩwaatʋ ndʋ Yehowa ñɔɔzaɣ tɛtʋ yɔ, ɛzɩma ɛwɩlaa se ɛɖʋ ɛyaa hɩɖɛ?

⁶ Yehowa ñɔɔzɩ-ɖʋ ɖɩɣa ŋga kɛwɛ ŋgee yɔ. Alɩwaatʋ sakɩyɛ pʋcɔ nɛ Yehowa lɩzɩɣ kajalaɣ ɛyʋ lɛ, ɛñɔɔzɩ tɛtʋ se ɛyaa ɩpɩzɩ nɛ pacaɣ tɩ-yɔɔ. (Yɔɔb 38:4-6; Yer. 10:12) Yehowa lakɩ camɩyɛ lakasɩ nɛ ɛkɛ kʋjɔʋ tʋ; pʋyɔɔ lɛ, ɛlɩzɩ wondu kɩbandʋ sakɩyɛ se tɩha-ɖʋ taa leleŋ. (Keɣa 103: 14, 15, 24) Nabʋyʋ taa, ɛkpaɣ alɩwaatʋ nɛ ɛmaɣzɩ mbʋ ɛlɩzaa yɔ pɩ-yɔɔ, nɛ ɛna se: “Pɩɩwɛ ɖeu.” (Kiɖe 1:10, 12, 31) Ɛɖʋ ɛyaa hɩɖɛ nɛ ɛha-wɛ ɖoŋ se ‘pañazɩ’ wondu kɩbandʋ ndʋ payɩ ɛlɩzɩ tɛtʋ yɔɔ yɔ. (Keɣa 8:7) Ɛsɔ kaɖʋwa lɛ se ɛyaa mba patalɩ pilim yɔ pɔcɔnɩ wondu kɩbandʋ ndʋ ɛlɩzaa yɔ tɩ-yɔɔ nɛ pɩha-wɛ taa leleŋ tam. Ŋsɛɣ Yehowa ɖoŋ ɖoŋ se ɛlabaɣ lɛ kaɖʋwa kɩbaŋa ŋga kɔ-yɔɔ?

7. Ɛzɩma Yozuwee 24:15 wɩlɩɣ se ɛyʋ wɛnɩ tɩ-yɔɔ wɛʋ lɩzʋʋ waɖɛ?

⁷ Yehowa ha-ɖʋ tɩ-yɔɔ wɛʋ lɩzʋʋ waɖɛ. Ðɩpɩzɩɣ nɛ ɖɩlɩzɩ wezuu ŋgʋ ɖɩsɔɔlaa se ɖɩcaɣ yɔ. (Kalɩ Yozuwee 24:15.) Waɖɛ nɖɩ ɛyʋ wɛna se ɛlɩzɩ mbʋ ɛsɔɔlaa se ɛla yɔ, mbʋ payaɣ se tɩ-yɔɔ wɛʋ lɩzʋʋ waɖɛ. Ðɛ-Ɛsɔ kʋsɔɔlʋ taa lakɩ leleŋ alɩwaatʋ ndʋ ɖɩlɩzɩɣ se ɖɩsɛɣ-ɩ yɔ. (Keɣa 83:12; Adu. 27: 11) Ðɩpɩzɩɣ nɛ ɖɩlabɩnɩ tʋmɩyɛ ɖa-tɩ yɔɔ wɛʋ lɩzʋʋ waɖɛ camɩyɛ hɔɔlɩŋ sakɩyɛ taa. Iyele nɛ ɖɩna kɩɖaʋ ŋgʋ Yesu hawa yɔ.

8. Hɔɔlɩŋ weyi ɩ-taa Yesu labɩnɩ tʋmɩyɛ ɛ-tɩ yɔɔ wɛʋ lɩzʋʋ waɖɛ yɔ, ɩ-taa nakʋyʋ lɛ ŋgʋ?

⁸ Ye ɖɩmaɣzɩɣnɩ Yesu kɩɖaʋ yɔ, ɖɩpɩzɩɣ nɛ ɖɩlɩzɩ se ɖɩɩɖɛzɩɣ ɖa-maɣmaɣ ɖɛ-kɛzɛsɩ nɔɔ, ɛlɛ ɛyaa lalaa ñɩnzɩ ɖɩɖɛzɩɣ nɔɔ. Kɩyakʋ nakʋyʋ pɩɩnɩ Yesu nɛ ɛ-apostoloowaa siŋŋ lɛ, pɛɖɛɛ nɛ powolo lone nɖɩ ɖɩ-taa nɔɔyʋ fɛyɩ yɔ se pɛhɛzɩ. Ɛlɛ patɩpɩzɩ nɛ pɛhɛzɩ. Ɛyaa samaɣ nakɛyɛ na-wɛ nɛ kaasɔɔlɩ kpem se Yesu ɛwɩlɩ-kɛ tɔm. Yesu taa tɩwɩɩnɩ-kɛ, ɛlɛ kɔ-tɔm labɩ-ɩ pʋtɔdɩyɛ. Ɛbɛ Yesu laba? “Ɛpaɣzɩ-kɛ tɔm sakɩyɛ wɩlʋʋ.” (Mark. 6:30-34) Ye ɖɩmaɣzɩɣnɩ Yesu nɛ ɖɩkpakɩɣ ɖa-alɩwaatʋ nɛ ɖo-ɖoŋ nɛ ɖɩsɩɣnɩ ɛyaa lalaa yɔ, pɩkɔŋnɩ samtʋ ɖa-Caa weyi ɛwɛ ɛsɔdaa yɔ. (Mat. 5:14-16) Pɩtasɩ lɛ, ɖɩwɩlɩɣ Yehowa se ɖɩsɔɔlaa se ɖɩkɛ ɛ-hɔʋ taa mba.

9. Ŋgee kʋjɔʋ ŋgʋ Yehowa labɩ ɛyaa?

⁹ Yehowa ha ɛyaa waɖɛ se palʋlɩ piya, ɛɖʋ-wɛ ɖɔɖɔ tʋmɩyɛ se pawɩlɩ-sɩ tɔm nɛ sɩsɔɔlɩ-ɩ nɛ sɩsɛɛ-ɩ. Ye ŋkɛ lʋlɩyʋ yɔ, ña-taa wɛ leleŋ nɛ ŋgee kʋjɔʋ ŋgʋ? Paa Yehowa ɛwazɩ Ɛsɔ tiyiyaa siŋŋ yɔ, ɛtɩha-wɛ waɖɛ se palʋlɩ piya. Ye mbʋ, ye ŋkɛ lʋlɩyʋ yɔ, ña-taa ɛla leleŋ nɛ waɖɛ nɖɩ ŋwɛna se ŋcɔnɩ piya yɔɔ yɔ. Paɖʋ lʋlɩyaa tʋmɩyɛ kɩcɛyɩyɛ naɖɩyɛ, nɖɩ lɛ se patɩŋnɩ “lɔŋ sɩɣzʋʋ nɛ paɣʋ mbʋ pɩlɩnɩ Yehowa cɔlɔ yɔ” pɩ-yɔɔ nɛ pɔcɔnɩ pe-piya yɔɔ. (Efɛz. 6:4; Wp. 6:5-7; Keɣa 126:3) Pɩsa nɛ pɩsɩnɩ lʋlɩyaa lɛ, Yehowa ɛgbɛyɛ lɩzɩ Bibl kpɛlɩkʋʋ wondu sakɩyɛ; tɩ-taa natʋyʋ lɛ Bibl kpɛlɩkʋʋ takayɩsɩ, videowaa, minziikiwaa, nɛ tɔm lɛɛtʋ ndʋ paɖʋ intɛrnɛɛtɩ yɔɔ yɔ. Pɩnaɣ kpayɩ kpayɩ se ɖa-Caa weyi ɛwɛ ɛsɔdaa yɔ nɛ ɛ-Pɩyalʋ pɔsɔɔlɩ piya. (Luka 18:15-17) Alɩwaatʋ ndʋ lʋlɩyaa taɣ Yehowa liu nɛ palakɩ mbʋ payɩ papɩzɩɣ yɔ se pɔcɔnɩ pe-piya nzɩ sɩkɛ ñɩm pʋyʋ yɔ sɩ-yɔɔ yɔ, pɩkɛdɩɣnɩ Yehowa. Nɛ lʋlɩyaa mba palakɩ mbʋ yɔ, pahaɣ pe-piya waɖɛ se sɩpɩsɩ Yehowa hɔʋ taa mba tam!

10-11. Pɩtɩŋnɩ kɩhɛyʋʋ pʋ-ñʋʋ taa yɔɔ lɛ, waɖɛ nɖɩ Yehowa ha-ɖʋ?

¹⁰ Yehowa ha-ɖʋ ɛ-Pɩyalʋ weyi ɛkɩlɩ mʋʋ ñɩm ɛ-ɛsɩndaa yɔ se pɩsa nɛ ɖɩɖaɣnɩ pɩsʋʋ Ɛ-hɔʋ taa mba. Ɛzɩ ɖɩnaʋ tayʋʋ 4 taa yɔ, Aɖam nɛ Ɛva pelesi lone nɖɩ paawɛnɩ Yehowa hɔʋ taa yɔ, nɛ peyeba nɛ pe-piya ɖɔɖɔ lesi-ɖɩ. (Roma 5:12) Aɖam nɛ Ɛva pana faɖaɖa nɛ palɩzɩ se paañaŋ Ɛsɔ, pʋyɔɔ lɛ, ye Ɛsɔ ɛlɩzɩ-wɛ ɛ-hɔʋ taa yɔ pɩmʋnɩ mbʋ. Ɛlɛ ɛbɛ kaɣ talʋʋ pa-lʋlʋʋ taa mba? Yehowa sɔɔlɩ ɛyaa, pʋyɔɔ ɛlabɩ ɖʋtʋ natʋyʋ se pɩsa nɛ ɛkpaɣ pe-piya nzɩ sɩñaŋɩ-ɩ yɔ ɛzɩ e-piya yɔ nɛ sɩpɩsɩ ɛ-hɔʋ taa mba. Ɛ-Pɩyalʋ ɛgbamɩyɛ Yesu Krɩstʋ kɩlaʋ yɔɔ ɛtɩŋnaa nɛ ɛla mbʋ. (Yoh. 3:16; Roma 5:19) Yesu kɩlaʋ yɔɔ lɛ, Yehowa pɩzɩɣ nɛ ɛkpaɣ ɛyaa siɣsiɣ tɩnaa 144000 ɛzɩ ɛ-pɩyalaa yɔ.—Roma 8:15-17; Natʋ 14:1.

¹¹ Pɩtasɩ lɛ, ɛyaa siɣsiɣ tɩnaa miiliyɔɔwaa sakɩyɛ lalaa wɛɛ nɛ pañaŋ Ɛsɔ nɛ palakɩ ɛ-sɔɔlɩm. Pɛwɛnɩ lidaʋ se pakaɣ pɩsʋʋ Ɛsɔ hɔʋ taa mba takɩm kɛdɛzaɣ ñɩmbʋ wayɩ, alɩwaatʋ ndʋ Yesu Krɩstʋ Pɩnzɩ 1000 Kewiyitu tɔɔʋ tɛŋ yɔ. (Keɣa 24:14; Roma 8:20, 21) Pɛwɛnɩ lidaʋ ŋgʋ, pʋyɔɔ pɛtɛm paɣzʋʋ yaʋ pa-Lɩzɩyʋ Yehowa se “Caa.” (Mat. 6:9) Mba pakaɣ-wɛ fezuu yɔ, pakaɣ-wɛ ɖɔɖɔ haʋ waɖɛ se pɛkpɛlɩkɩ nɛ patɩlɩ mbʋ Yehowa sɔɔlaa se pala yɔ. Mba palɩzɩɣ se pañaŋ ɖʋtʋ ndʋ ɛlaba yɔ, pakaɣ pɩsʋʋ ɛ-hɔʋ taa mba ɖɔɖɔ.

12. Tɔm ndʋ yɔɔ ɖɩkaɣ cosuu lɛɛlɛɛyɔ?

¹² Ɛzɩ ɖɩnaʋ nɛ pɩɖɛɛ yɔ, Yehowa tɛm labʋ wondu sakɩyɛ nɛ ɛɖʋnɩ ɛyaa hɩɖɛ. Ɛtɛm kpaɣʋ patam numwaa ɛzɩ ɛ-pɩyalaa yɔ, nɛ ɛha lidaʋ “samaɣ sɔsɔɔ” taa mba se pakaɣ pɩsʋʋ e-piya ɛjaɖɛ kɩfaɖɛ taa. (Natʋ 7:9) Ɛbɛ ɖɩpɩzɩɣ nɛ ɖɩla lɛɛlɛɛyɔ nɛ ɖɩwɩlɩ Yehowa se ɖɩsɔɔlaa se ɖɩkɛ ɛ-hɔʋ taa mba tam?

WƖLƖ YEHOWA SE ŊSƆƆLAA SE ŊKƐ Ɛ-HƆƲ TAA TƲ

13. Ɛbɛ ɖɩpɩzɩɣ ɖɩla nɛ ɖɩkɛ Ɛsɔ hɔʋ taa mba? (Maarkɩ 12:30)

¹³ Sɛɛ Yehowa nɛ ña-laŋɩyɛ pilim nɛ ŋwɩlɩ se ŋsɔɔlɩ-ɩ. (Kalɩ Maarkɩ 12:30.) Mbʋ payɩ Ɛsɔ ha-ɖʋ nɛ sɔɔlɩm yɔ pɩ-taa lɛ, kʋjɔŋ weyi ɩkpaɖaa yɔ ɩ-taa nakʋyʋ lɛ waɖɛ nɖɩ ɖɩwɛna se ɖɩsɛɛ-ɩ yɔ. Ðɩwɩlɩɣ Yehowa se ɖɩsɔɔlɩ-ɩ ye ‘ɖɩɖɔŋ ɛ-paɣtʋ yɔɔ’ yɔ. (1 Yoh. 5:3) Paɣtʋ ndʋ Yehowa sɔɔlaa se ɖɩña yɔ, tɩ-taa natʋyʋ lɛ paɣtʋ ndʋ Yesu ɖʋwa se ɖɩla ɛyaa nɛ papɩsɩ tɔmkpɛlɩkɩyaa nɛ pamɩyɩsɩ-wɛ lɩm yɔ. (Mat. 28:19) Ɛɖʋ-ɖʋ ɖɔɖɔ paɣtʋ se ɖɩsɔɔlɩ ɖama. (Yoh. 13:35) Yehowa kaɣ mʋʋ ɛyaa mba pañaŋ ɛ-paɣtʋ yɔ ɛ-sɛyaa hɔʋ ŋgʋ kɩwɛ ɛjaɖɛ kpeekpe yɔɔ yɔ kɩ-taa.—Keɣa 14:1, 2.

14. Ɛzɩma ɖɩpɩzɩɣ nɛ ɖɩwɩlɩ ɛyaa lalaa se ɖɩsɔɔlɩ-wɛ? (Maatiyee 9:36-38; Roma mba 12:10)

¹⁴ Wɩlɩ lalaa sɔɔlɩm. Sɔɔlɩm kɛnɩnɩ Yehowa wɛtʋ kɩbandʋ taa ndʋ tɩkpaɖaa yɔ. (1 Yoh. 4:8) Yehowa wɩlɩ-ɖʋ sɔɔlɩm pʋcɔ nɛ ɖɩtɩlɩɣ-ɩ. (1 Yoh. 4:9, 10) Ðɩmaɣzɩɣnɩ-ɩ ye ɖɩwɩlɩɣ lalaa sɔɔlɩm yɔ. (Efɛz. 5:1) Nʋmɔŋ kɩbaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ ɛyaa sɔɔlɩm yɔ, ɩ-taa nakʋyʋ lɛ se ɖɩsɩnɩ-wɛ nɛ pɛkpɛlɩkɩ nɛ patɩlɩ Yehowa pʋcɔ nɛ ɛjaɖɛ tɛm kɔɔ. (Kalɩ Maatiyee 9:36-38.) Ye ɖɩlakɩ mbʋ yɔ, ɖɩhaɣ-wɛ waɖɛ se papɩsɩ Ɛsɔ hɔʋ taa mba. Pamɩyɩsɩɣ nɔɔyʋ lɩm nɛ pɩtɛ lɛ, pɩwɛɛ se ɖiwolo pɩ-yɔɔ nɛ ɖɩsɔɔlɩ-ɩ nɛ ɖɩñamɩ-ɩ. (1 Yoh. 4:20, 21) Ɛzɩma ɖɩpɩzɩɣ nɛ ɖɩla mbʋ? Mbʋ ɖɩpɩzɩɣ nɛ ɖɩla yɔ pɩ-taa nabʋyʋ lɛ se ɖɩwɩlɩ se ɖɩtaɣ-ɩ liu. Ye ɖɩɩnɩɣ mbʋ pʋyɔɔ ɛlabɩ nabʋyʋ yɔ pɩ-taa yɔ, ɖɩɩkaɣ maɣzʋʋ se piɖeni men-ɖeke lɩmaɣza yɔɔ ɛlabɩ mbʋ. Ɛlɛ ɖɩkaɣ ɖo-koobu ɛnʋ ɖʋʋ hɩɖɛ nɛ ɖɩkpaɣ-ɩ se ɛkɩlɩ-ɖʋ.—Kalɩ Roma mba 12:10; Fil. 2:3.

15. Mba pʋtɔdɩyɛ pɩwɛɛ se ɖɩna nɛ ɖɩlabɩ-wɛ kɩbandʋ?

¹⁵ Na ɛyaa tɩŋa pʋtɔdɩyɛ nɛ ŋlabɩ-wɛ kɩbandʋ. Ye ɖɩsɔɔlaa se ɖɩkɛ Yehowa hɔʋ taa mba tam yɔ, pɩwɛɛ se ɖɩɖɔ Ɛsɔtɔm ndʋ tɩwɛ Bibl taa yɔ tɩ-yɔɔ ɖe-wezuu caɣʋ taa. Kɩɖaʋ nakʋyʋ yɔ: Yesu wɩlaa se pɩwɛɛ se ɖɩna ɛyaa tɩŋa pʋtɔdɩyɛ nɛ ɖɩlabɩ-wɛ kɩbandʋ, halɩ pɩkpɛndɩnɩ ɖo-koyindinaa. (Luka 6:32-36) Nabʋyʋ taa, pɩpɩzɩɣ nɛ pɩlabɩ-ɖʋ kaɖɛ se ɖɩla mbʋ. Ye pɩlakɩ-ɖʋ mbʋ yɔ, pɩwɛɛ se ɖɩkpɛlɩkɩ nɛ ɖɩwɛɛnɩ Yesu maɣzɩm nɛ ɖɩmaɣzɩnɩ ɛ-lakasɩ. Alɩwaatʋ ndʋ ɖɩlakɩ ɖo-ɖoŋ ɖeɖe se ɖɩña Yehowa nɛ ɖɩmaɣzɩnɩ Yesu yɔ, ɖɩwɩlɩɣ ɖa-Caa weyi ɛwɛ ɛsɔdaa yɔ se ɖɩsɔɔlaa se ɖɩkɛ ɛ-hɔʋ taa mba tam.

16. Ɛzɩma ɖɩpɩzɩɣ nɛ ɖɩkandɩyɩ Yehowa hɔʋ hɩɖɛ kɩbanɖɛ yɔɔ?

¹⁶ Kandɩyɩ Yehowa hɔʋ hɩɖɛ kɩbanɖɛ yɔɔ. Ðɩkpaɣ ɛzɩ hɔʋ taa mbʋ yɔ, ɖoŋ ɖoŋ lɛ, abalɩbɩɣa cikpelaɣ maɣzɩɣnɩ mbʋ ka-ɖalʋ lakɩ yɔ. Ye ɖalʋ ɛkpakɩɣ Bibl paɣtʋ kila nɛ ɛlakɩnɩ tʋmɩyɛ e-wezuu caɣʋ taa yɔ, ɛkaɣ kɛʋ kɩɖaʋ kɩbaŋʋ e-neu. Ye ɖalʋ ɛpaɣzɩ labʋ mbʋ pɩfɛyɩ ɖeu yɔ, e-neu pɩzɩɣ nɛ ɛtɩŋ ɛ-kɩɖaʋ kɩdɛkɛdʋʋ. Mbʋ ɖɔɖɔ pɩwɛ Yehowa hɔʋ taa. Ye Krɩstʋ tʋ siɣsiɣ tʋ nɔɔyʋ ɛpaɣzɩ wɛnʋʋ tisuu yebiyaa lɩmaɣza, yaa ye ɛpaɣzɩ caɣʋ wezuu kɩdɛkɛdʋʋ, yaa ɛpaɣzɩ kpaɣʋ nʋmɔʋ kɩdɛkɛdʋʋ nakʋyʋ yɔ, lalaa pɩzɩɣ nɛ pamaɣzɩnɩ-ɩ nɛ pala mbʋ pɩfɛyɩ ɖeu yɔ. Mba palakɩ mbʋ yɔ, pepisiɣ Yehowa sɛyaa hɔʋ hɩɖɛ. (1 Tes. 4:3-8) Pɩtɩpɔzɩ se ɖɩmaɣzɩnɩ kɩɖaŋ kɩdɛkɛdɩŋ, nɛ ɖɩtaaha nʋmɔʋ nɛ nabʋyʋ posi-ɖʋ nɛ ɖa-Caa kʋsɔɔlʋ weyi ɛwɛ Ɛsɔdaa yɔ.

17. Lɩmaɣza wena pɩtɩpɔzɩ se ɖɩwɛɛna, nɛ ɛbɛ yɔɔ?

¹⁷ Taa Yehowa liu, taataa tomnaɣ yɔɔ wondu liu. Yehowa ha-ɖʋ lidaʋ se ɛkaɣ-ɖʋ haʋ tɔɔnaɣ, wondu kususutu, nɛ ɖɩzʋyɛ ye ɖɩcalɩnɩ ñɩnʋʋ e-Kewiyaɣ nɛ ye ɖɩcaɣ wezuu nɛ pɩla nɔɔ kʋɖʋmaɣ nɛ ɛ-paɣtʋ kila siɣsiɣ ñɩna yɔ. (Keɣa 54:23; Mat. 6:33) Ye ɖɩtaɣ liu lidaʋ tɔm ndʋ yɔ, ɖɩɩkaɣ maɣzʋʋ se tomnaɣ yɔɔ wondu ndʋ ɛjaɖɛ ɖɩnɛ ɖɩhaɣ yɔ, tɩkaɣ kandɩyʋʋ ɖɔ-yɔɔ nɛ tɩha-ɖʋ taa leleŋ. Ðɩnawa se nʋmɔʋ kʋɖʋmʋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖihiɣ maɣzɩm taa laŋhɛzɩyɛ siŋŋ yɔ, ŋgʋ lɛ se ɖiwolo pɩ-yɔɔ nɛ ɖɩlakɩ Yehowa sɔɔlɩm. (Fil. 4:6, 7) Paa ɖɩpɩzɩɣ se ɖɩya wondu sakɩyɛ yɔ, pɩwɛɛ se ɖɩmaɣzɩ nɛ ɖɩna se toovenim taa lɛ, ɖɩwɛnɩ alɩwaatʋ yaa ɖoŋ se ɖɩlabɩnɩ-tʋ tʋmɩyɛ nɛ ɖɩcɔnɩ tɩ-yɔɔ. Pɩpɩzɩɣ nɛ piyele nɛ ɖɩkɩlɩ ñɔnʋʋ tomnaɣ yɔɔ wondu ndʋ ɖɩwɛna yɔ? Pɩwɛɛ se ɖɩtɔzɩ se Ɛsɔ ɖʋ-ɖʋ tʋmɩyɛ ɛ-hɔʋ taa se ɖɩla. Pɩwɩlɩɣ se pɩtɩpɔzɩ se ɖiyele nɛ nabʋyʋ kɛzɩ ɖa-lɩmaɣza. Pɩtʋʋ fɛyɩ se ɖɩtɩsɔɔlɩ se ɖɩwɛɛ ɛzɩ evebu weyi ɛha siɣye waɖɛ nɖɩ ɛɛwɛna se ɛkɛ Yehowa sɛyʋ nɛ ɛlɛ kpaɣ-ɩ ɛzɩ ɛ-pɩyalaa taa nɔɔyʋ yɔ. Elesi waɖɛ nɖɩ mbʋ pʋyɔɔ yɔ ɛɛñɔnɩ tɛtʋ yɔɔ ñɩm!—Mark. 10:17-22.

MBƲ YEHOWA PIYA KAƔ WƐNƲƲ TAM YƆ

18. Ɛyaa mba pañaŋ Yehowa yɔ, ɛzɩma pakaɣ-wɛ ɖʋʋ hɩɖɛ siŋŋ, nɛ wazasɩ nzɩ pakaɣ hiɣu tam?

¹⁸ Ɛyaa mba pañaŋ Yehowa yɔ, ɛkaɣ-wɛ ɖʋʋ hɩɖɛ siŋŋ, pʋ-tɔbʋʋ lɛ se pakaɣ wɛnʋʋ waɖɛ se pɔsɔɔlɩ-ɩ nɛ pɛsɛɛ-ɩ tam! Mba pɛwɛnɩ lidaʋ se pakaɣ caɣʋ tɛtʋ yɔɔ yɔ, pa-taa kaɣ ɖɔɖɔ labʋ leleŋ se pɔcɔnɩ tɛtʋ ndʋ Yehowa lɩzaa se tɩkɛ pa-ɖɩɣa kɩbaŋa yɔ, tɩ-yɔɔ. Piileɖiɣ lɛ, Ɛsɔ Kewiyaɣ kaɣ yebu nɛ tɛtʋ nɛ mbʋ payɩ pɩwɛ tɩ-yɔɔ yɔ, pɩɖaɣnɩ wɛʋ kajʋka. Aɖam nɛ Ɛva pakpaɣ lɩmaɣzɩyɛ se palɩɣ Ɛsɔ hɔʋ taa; nɛ wɛtʋ kɩdɛkɛdɩtʋ ndʋ tɩlɩ pɩ-taa yɔ, Yesu kaɣ tɩ-tɩŋa hɩzʋʋ. Yehowa kaɣ fezuu ɛyaa miiliyɔɔwaa sakɩyɛ nɛ ɛha-wɛ waɖɛ se pɛwɛɛnɩ tomnaɣ taa alaafɩya kiya nɛ pacaɣ wezuu maatɛŋ tɛtʋ ndʋ tɩpɩsɩ paradisuu yɔ tɩ-yɔɔ. (Luka 23:42, 43) Alɩwaatʋ ndʋ Yehowa hɔʋ taa ñɩma mba pɛwɛ tɛtʋ yɔɔ yɔ pakaɣ talʋʋ pilim yɔ, pa-taa paa weyi lɛ, ɛkaɣ wɛnʋʋ “samtʋ nɛ keɖeɣa” ŋga kɔ-tɔm Daviid yɔɔdaa yɔ.—Keɣa 8:5; nwt.

19. Tɔm ndʋ pɩwɛɛ se tɩwɛɛ ɖa-maɣzɩm taa tam?

¹⁹ Ye ŋkɛ “samaɣ sɔsɔɔ” taa tʋ yɔ, ŋwɛnɩ lidaʋ kɩbaŋʋ kpem. Ɛsɔ sɔɔlɩ-ŋ nɛ ɛsɔɔlaa se ŋkɛ ɛ-hɔʋ taa tʋ. Ye mbʋ, la mbʋ payɩ ŋpɩzɩɣ yɔ nɛ ñɔ-tɔm kɛdɩnɩ-ɩ. Yele nɛ paa evemiye nɖɩ lɛ, Ɛsɔ lidaʋ tɔm wɛɛ ña-maɣzɩm nɛ ña-laŋɩyɛ taa. Wɛɛnɩ ɛsɩmɩyɛ waɖɛ nɖɩ ŋwɛna se ŋsɛɛ ɖa-Caa kʋsɔɔlʋ weyi ɛwɛ ɛsɔdaa yɔ ɖɩ-yɔɔ, nɛ ña-taa ɛla leleŋ nɛ cee wayɩ lidaʋ ŋgʋ ŋwɛna se ŋsamɩ-ɩ tam yɔ!