Wɛɛ taa leleŋ taa ña-akpadɩyɩtʋ alɩwaatʋ taa

1-2. Lɩmaɣza wena Yehowa wɛnɩ ɛ-sɛyaa siɣsiɣ tɩnaa mba pakpadɩyaa yɔ pɔ-yɔɔ? (Keɣa 92:​12-14; cɔnɩ ɖɔɖɔ kɩlɛmʋʋ.)

ƐJAÐƐ hɔɔlɩŋ nɩɩyɩ taa lɛ, ɛyaa maɣzɩɣ se akpadɩyɩtʋ kɛnɩ hɩɖɛ ɖʋʋ. Ɛlɛ hɔɔlɩŋ lɛɛŋ taa lɛ, ɛyaa lakɩ mbʋ payɩ papɩzɩɣ yɔ se pɩtaana se pakpadɩyaa, pʋyɔɔ alɩwaatʋ ndʋ nabɛyɛ naɣ ñɔyaɣ kʋhʋlʋmaɣ nakɛyɛ pa-ñʋʋ taa yɔ pɛkpɛzɩɣ-kɛ. Ɛlɛ paa patɩɩñaɣ pana ɛzɩma se pɩtaana se pakpadɩyaa yɔ, paapɩzɩɣ nɛ paɖɩɣ nʋmɔʋ akpadɩyɩtʋ.

² Ɛlɛ lɩmaɣza wena ɖa-Caa Yehowa wɛnɩ ɛ-sɛyaa mba pakpadɩyaa yɔ pɔ-yɔɔ? (Adu. 16:31) Ɛkpaɣ-wɛ nɛ ɛmaɣzɩnɩ tɩŋ weyi ɩwɛ kajʋka yɔ. (Kalɩ Keɣa 92:​12-14.) Ɛbɛ yɔɔ ɛkpaɣ-wɛ nɛ ɛmaɣzɩnɩ tɩŋ ɛnɩ? Tɩŋ weyi ileɖaa yɔ, ɖoŋ ɖoŋ lɛ ɩ-yɔɔ wɛɣ hatʋ nɛ hɛtʋ kɩbandʋ sakɩyɛ. Kɩɖaʋ nakʋyʋ yɔ: Tɩŋ nɩɩyɩ wɛ Japɔŋ ɛjaɖɛ taa nɛ ɩcakɩ wezuu pɩnzɩ sakɩyɛ. Tɩŋ ɛnɩ ɩ-taa nɩɩyɩ cɛzɩ pɩnzɩ kudoku nɛ ɩwɛ kajʋka pɩdɩɩfɛyɩ. Ɛzɩ tɩŋ ɛnɩ yɔ, Ɛsɔ sɛyaa siɣsiɣ tɩnaa mba pakpadɩyaa yɔ pɛwɛ kajʋka, pʋ-tɔbʋʋ se pamʋ ñɩm siŋŋ Yehowa ɛsɩndaa. Wɛtʋ kɩbandʋ ndʋ akpadɩyaa wɛna yɔ, tɩmʋ ñɩm siŋŋ Yehowa ɛsɩndaa. Akpadɩyaa mba, pɛsɛ-ɩ pɩnzɩ sakɩyɛ nɛ pɔɖɔkɩ pe-siɣsiɣ wɛtʋ alɩwaatʋ kɩbandʋ nɛ alɩwaatʋ kaɖɛ ñɩndʋ taa.

3. Ha kɩɖaʋ ŋgʋ kɩwɩlɩɣ ɛzɩma Yehowa tɩŋnɩ akpadɩyaa yɔɔ nɛ eyele nɛ ɛ-tamaɣ la yɔ.

³ Paa ɛyʋ ɛkpadɩyaa yɔ, ɛkpɛndɩ ɛmʋ ñɩm Yehowa ɛsɩndaa.a Halɩ ɖoŋ ɖoŋ lɛ, Yehowa tɩŋɩɣnɩ akpadɩyaa yɔɔ nɛ eyeki se ɛ-tamaɣ ɛla. Kɩɖaŋ nɩɩyɩ yɔ: Alɩwaatʋ ndʋ Yehowa kaaheyi Saara se ɛjaɖɛ ɖoŋ ñɩnɖɛ naɖɩyɛ nɛ Mesiya pakaɣ lɩnʋʋ ɛ-taa yɔ, Saara kaatɛm kpadɩyʋʋ kpem. (Kiɖe 17:​15-19) Moyizi ɖɔɖɔ kaakpadɩyaa alɩwaatʋ ndʋ Yehowa ɖʋ-ɩ tʋmɩyɛ se eɖiyi Izrayɛɛlɩ samaɣ nɛ ɛlɩzɩ-kɛ Ejipiti yɔ. (Ejl. 7:​6, 7) Pɩtasɩ lɛ, apostoloo Yohanɛɛsɩ kaakpadɩyaa kpem alɩwaatʋ ndʋ Yehowa fezuu ɖiyi-i nɛ ɛma Bibl taa takayɩsɩ 5 yɔ.

4. Ɛzɩ Aduwa 15:15 yɔɔdʋʋ yɔ, ɛbɛ pɩzɩɣ pɩsɩnɩ akpadɩyaa nɛ palʋbɩnɩ akpadɩyɩtʋ taa kala? (Cɔnɩ ɖɔɖɔ kɩlɛmʋʋ.)

⁴ Akpadɩyaa katɩɣ akpadɩyɩtʋ taa kala sakɩyɛ. Koobu halɩñɩnʋ nɔɔyʋ yɔɔdaa se: «Akpadɩyɩtʋ tɩkɛnɩ aleɣya tɔm.» Ɛlɛ ye akpadɩyaa ɩwɛ taa leleŋb taa yɔ, pɩpɩzɩɣ pɩsɩnɩ-wɛ nɛ palʋbɩnɩ akpadɩyɩtʋ taa kala. (Kalɩ Aduwa 15:15.) Tɔm ñʋʋ kʋnɛ kɩ-taa, ɖɩkaɣ naʋ mbʋ ɖeyi ɖeyi akpadɩyaa pɩzɩɣ pala nɛ pɛwɛɛ taa leleŋ taa yɔ. Ðɩkaɣ naʋ ɖɔɖɔ ɛzɩma koobiya lalaa pɩzɩɣ nɛ pasɩnɩ akpadɩyaa mba pɛwɛ pa-agbaa taa yɔ. Ɛlɛ kajalaɣ lɛ, iyele nɛ ɖɩna mbʋ pʋyɔɔ pɩpɩzɩɣ nɛ pɩwɛɛ kaɖɛ akpadɩyaa se pɛwɛɛ taa leleŋ taa yɔ.

MBƲ PƲYƆƆ PƖPƖZƖƔ NƐ PƖWƐƐ-MƖ KAÐƐ SE ƖWƐƐ TAA LELEŊ TAA YƆ

5. Ɛbɛ pɩzɩɣ piyele nɛ pitii akpadɩyaa nabɛyɛ yɔɔɔ?

⁵ Ɛbɛ pɩzɩɣ piyele nɛ pitibi-ŋ yɔɔɔ? Pɩtɩla, pitibi-ŋ yɔɔɔ mbʋ pʋyɔɔ yɔ ŋŋtasɩɣ pɩzʋʋ nɛ ŋlakɩ tʋma wena ŋlakaɣ ɖooo lɛ yɔ. Yaa ŋwɛɛ nɛ ŋmaɣzɩɣ alɩwaatʋ ndʋ ŋŋwɛnɩ ño-ɖoŋ nɛ ña-alaafɩya yɔ tɩ-yɔɔ. (Ekl. 7:10) Kɩɖaŋ nɩɩyɩ yɔ: Payaɣ koobu halɩñɩnʋ nɔɔyʋ se Ruby, ɛyɔɔdaa se: «Wondu suu maɣmaɣ wɛ-m kaɖɛ, mbʋ pʋyɔɔ yɔ manɩɣ wɩzasɩ paa le nɛ maapɩzɩɣ nɛ malakɩnɩ tʋmɩyɛ mon-tomnaɣ pilinzi. Halɩ maapɩzɩɣ se mankpazɩ ma-nɩŋgbanzɩ nɛ mɛlɛɛ naataŋgbala kabʋsɩ. Me-nesi wɩɣ kpem nɛ maapɩzɩɣ nɛ malakɩnɩ tʋmɩyɛ me-niwee camɩyɛ, nɛ halɩ tʋma cikpena maɣmaɣ maapɩzɩɣ labʋ.» Payaɣ koobu abalɩñɩnʋ nɔɔyʋ se Harold, ɛɛlabɩ tʋmɩyɛ Betɛɛlɩ, ɛyɔɔdaa se: «Nabʋyʋ taa man-taa wɩɣ mbʋ pʋyɔɔ yɔ maatasɩɣ pɩzʋʋ nɛ malakɩ tʋma wena malakaɣ nɛ ahaɣ-m taa leleŋ yɔ. Maakɛ evebu lɛ maawɛ ɖoŋ kpem, maasɔɔlɩ hola aleɣya naayɛ labʋ. Ðɩɩlakɩ aleɣya ana lɛ lalaa yɔɔdʋʋ se: “Ɩcɛlɩ Harold pombo mbʋ pʋyɔɔ yɔ ɛkaɣ yebu nɛ ɖɩwa.” Ɛlɛ lɛɛlɛɛyɔ, mantɩsa se manpɩzɩɣ nɛ mɔlɔ pombo.»

6. (a) Ɛbɛ ɖɔɖɔ pɩzɩɣ piyele nɛ pitii akpadɩyaa nabɛyɛ yɔɔɔ? (b) Ɛbɛ pɩzɩɣ pɩsɩnɩ akpadɩyaa nɛ pana alɩwaatʋ ndʋ pɩwɛɛ se peyele lɔɔɖɩyɛ yaa kpokpo saʋ yɔ? (Kalɩ tɔm ñʋʋ «Ɛzɩ pɩwɛɛ se meyele lɔɔɖɩyɛ yaa kpokpo saʋ na?», kɩwɛ Feŋuu Tilimiye takayaɣ kanɛ ka-taa.)

⁶ Pɩtɩla pitibi-ŋ yɔɔɔ mbʋ pʋyɔɔ yɔ ña-maɣmaɣ ŋŋtasɩɣ pɩzʋʋ nɛ ŋlakɩ tʋma naayɛ, nɛ pɩpɔzʋʋ se nɔɔyʋ ɛwɛɛ ñɔ-cɔlɔ nɛ ɛsɩɣnɩ-ŋ yaa ŋwolo nɛ ŋcaɣ ña-pɩɣa nakɛyɛ cɔlɔ. Yaa pɩtɩla pitibi-ŋ yɔɔɔ kpem, mbʋ pʋyɔɔ yɔ ñɔ-tɔnʋʋ taa alaafɩya tɔm wɛɛ nɛ pɩtɛzɩɣ labʋ kaɖɛ yaa ñɛ-ɛsa wɛɛ nɛ atɛzɩɣ caŋʋʋ nɛ ŋŋtasɩɣ pɩzʋʋ se ŋɖɔ ñe-ɖeke nɛ ŋwolo ɖoli yaa ŋŋpɩzɩɣ nɛ ŋsaa lɔɔɖɩyɛ. Wɛtʋ ndʋ tɩpɩzɩɣ nɛ tɩha-ŋ laŋwɛɛkɩyɛ kpem. Ɛlɛ paa ŋŋpɩzɩɣ nɛ ŋlakɩ tʋma wena ŋlakaɣ yɔ, tɔzɩ se ŋmʋ ñɩm siŋŋ Yehowa nɛ ɛyaa lalaa ɛsɩndaa. Nɛ ɖa-taa pɩzɩɣ nɛ pɩtɛ se Yehowa nɩɣ ɛzɩma pɩlakɩ-ɖʋ yɔ pɩ-taa. Mbʋ pɩ-tɔm kɩlɩ cɛyʋʋ Yehowa ɛsɩndaa yɔ lɛ ɛyʋ weyi ɖɩkɛnɩ ɖooo ɖa-taa yɔ, pʋ-tɔbʋʋ se ɛzɩma ɖɩsɔɔlɩ-ɩ nɛ ɖa-laŋɩyɛ pilim nɛ ɖɩtɛ ɖɩsɔɔlɩ ɖo-koobiya yɔ pɩ-tɔm kɩlɩnɩ cɛyʋʋ ɛ-ɛsɩndaa.—1 Sam. 16:7.

7. Ɛbɛ pɩzɩɣ nɛ pɩsɩnɩ mba pɛwɛ laŋwɛɛkɩyɛ taa mbʋ pʋyɔɔ yɔ pamaɣzɩɣ se paakaɣ hiɣu waɖɛ nɛ pana alɩwaatʋ ndʋ Yehowa kaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ yɔ?

⁷ Pɩtɩla ŋwɛ laŋwɛɛkɩyɛ taa mbʋ pʋyɔɔ yɔ, ŋmaɣzɩɣ se ŋŋkaɣ hiɣu waɖɛ nɛ ŋna alɩwaatʋ ndʋ Yehowa kaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ yɔ. Ye pɩlakɩ-ŋ mbʋ yɔ, ɛbɛ pɩsɩɣ nɛ pɩsɩnɩ-ŋ? Tɔzɩ se Yehowa ɖɔɖɔ ɖaŋnɩ suuɖu se alɩwaatʋ ɛtalɩ nɛ ɛɖɩzɩ ɛjaɖɛ kɩdɛkɛdɩyɛ ɖɩnɛ. (Iza. 30:18) Ɛbɛ yɔɔ Yehowa ɖʋ suuɖu? E-suuɖu ɖʋʋ haɣ ɛyaa miiliyɔɔwaa sakɩyɛ alɩwaatʋ nɛ waɖɛ se pɛkpɛlɩkɩ nɛ patɩlɩ-ɩ nɛ pɛsɛɛ-ɩ. (2 Pɩy. 3:9) Ye mbʋ, alɩwaatʋ ndʋ pitiki-ŋ yɔɔɔ yɔ, maɣzɩ ɛyaa miiliyɔɔwaa sakɩyɛ mba papɩzɩɣ nɛ pɛkpɛlɩkɩ nɛ patɩlɩ Yehowa pʋcɔ nɛ ɛjaɖɛ tɛ yɔ pɔ-yɔɔ. Halɩ pa-taa nabɛyɛ pɩzɩɣ nɛ pɛkɛ ñɔ-hɔʋ taa mba.

8. Alɩwaatʋ ndʋ pɩwɩɣ akpadɩyʋ nɔɔyʋ yaa ɛwɛɛ nɛ ɛnɩɣ siziŋ yɔ, ɛbɛ ɛpɩzɩɣ nɛ ɛla?

⁸ Paa pɩnzɩ ɛzɩma ɖɩtɩɩwɛna yɔ, alɩwaatʋ ndʋ ɖɩnɩɣ siziŋ yaa alɩwaatʋ ndʋ pɩwɩɣ-ɖʋ yɔ, ɖɩpɩzɩɣ nɛ ɖɩyɔɔdɩ natʋyʋ yaa ɖɩla nabʋyʋ nɛ pʋwayɩ ɖikpiɖi. (Ekl. 7:7; Yak. 3:2) Kɩɖaʋ nakʋyʋ yɔ: Alɩwaatʋ ndʋ ɛyʋ siɣsiɣ tʋ Yɔɔb nɩɣaɣ siziŋ yɔ, ɛyɔɔdɩ «kpaanzɩyʋ tɔm.» (Yɔɔb 6:​1-3) Pɩtasɩ lɛ, kʋdɔŋ yaa kɔ wena akpadɩyaa kpakɩɣ yɔ, apɩzɩɣ ayele nɛ pala nabʋyʋ yaa pɔyɔɔdɩ tɔm ndʋ tɩtɩmʋna yɔ. Ɛlɛ paa ɖɩkpadɩyaa yaa pɩwɩɣ-ɖʋ yɔ, pɩtɩpɔzɩ se ɖɩwaanɩ mbʋ nɛ ɖɩyɔɔdʋʋ tɔm ndʋ tɩtɩmʋna yɔ, yaa ɖɩpɔzʋʋ ɛyaa lalaa paa ɛzɩmtaa se palabɩ-ɖʋ mbʋ ɖɩsɔɔlaa yɔ. Nɛ ye ɖiɖiɣzinaa se ɖiheyi nɔɔyʋ natʋyʋ nɛ tɩtɩtʋʋzɩ yɔ, pɩwɛɛ se ɖitendi-i se ɛkpaɣ nɛ ekpeɣ-ɖʋ.—Mat. 5:​23, 24.

ƐBƐ PƖZƖƔ PƖSƖNƖ-MƖ NƐ ƖWƐƐ TAA LELEŊ TAA TAM?

9. Ɛbɛ yɔɔ pɩwɛɛ se ŋtisi nɛ ɛyaa lalaa sɩnɩ-ŋ? (Cɔnɩ ɖɔɖɔ kɩlɛmɩŋ.)

⁹ Itisi nɛ lalaa sɩnɩ-mɩ. (Gal. 6:2) Kiɖe tɛɛ lɛ, pɩpɩzɩɣ nɛ pɩwɛɛ-mɩ kaɖɛ se iyele nɛ lalaa sɩnɩ-mɩ. Payaɣ koobu halɩñɩnʋ nɔɔyʋ se Gretl, ɛyɔɔdaa se: «Nabʋyʋ taa, pɩwɛ-m kaɖɛ se meyele nɛ ɛyaa lalaa sɩnɩ-m mbʋ pʋyɔɔ yɔ pɩlakɩ-m ɛzɩ manpɩsɩɣ-wɛ sʋʋtʋ yɔ. Pɩkpaɣ-m alɩwaatʋ pʋcɔ nɛ mɛlɛɣzɩ ma-lɩmaɣza nɛ moluzi man-tɩ nɛ mentisi se pɩpɔzʋʋ se lalaa ɩsɩnɩ-m.» Alɩwaatʋ ndʋ ŋtisiɣ se ɛyaa lalaa ɩsɩnɩ-ŋ yɔ, ŋhaɣ-wɛ waɖɛ se pehiɣ taa leleŋ weyi ɩlɩɣnɩ haʋ taa yɔ. (Tʋma 20:35) Nɛ ŋnaɣ ɛzɩma ɛyaa lalaa sɔɔlɩ-ŋ nɛ pamaɣzɩɣ ñɔ-yɔɔ yɔ lɛ, pɩtʋʋ fɛyɩ se ña-taa kaɣ labʋ leleŋ.

10. Ɛbɛ yɔɔ pɩwɛɛ se ŋtɔzʋʋ nɛ ŋwɩlɩɣ lalaa ñɛ-ɛsɩmɩyɛ? (Cɔnɩ ɖɔɖɔ kɩlɛmɩŋ.)

¹⁰ Wɩlɩɣ lalaa ñɛ-ɛsɩmɩyɛ. (Kol. 3:15; 1 Tes. 5:18) Alɩwaatʋ ndʋ ɛyaa lalaa lakɩ-ɖʋ kɩbandʋ yɔ, ɖɩwɛɣnɩ ɛsɩmɩyɛ mbʋ palabɩ-ɖʋ yɔ pɩ-yɔɔ, ɛlɛ nabʋyʋ taa ɖɩsɔʋ se ɖɩwɩlɩ-wɛ ɛsɩmɩyɛ nɖɩ. Ye ɖɩmʋʋyʋʋnɩ ɖa-taabalaa nɛ ɖɩsɛɣ-wɛ se palabaɣ lɛ yɔ, pakaɣ ɖiɣzinuu se ɖɩwɛnɩ ɛsɩmɩyɛ mbʋ palabɩ-ɖʋ yɔ pɩ-yɔɔ. Payaɣ koobu halɩñɩnʋ nɔɔyʋ se Leah, ɛcɔŋnɩ koobiya akpadɩyaa yɔɔ Betɛɛlɩ taa. Ɛyɔɔdaa se: «Koobiya mba pɔ-yɔɔ mɔncɔŋna yɔ, pa-taa koobu halɩñɩnʋ nɔɔyʋ maɣ-m tɔm takayɩsɩ cikpesi yɔɔ paa ɛzɩmtaa nɛ ɛsɛɣ-m se malabaɣ lɛ. Tɔm pazɩ yem ɛmaɣ, ɛlɛ tɩkɛdɩɣnɩ-m kpem. Mɔnsɔɔlɩ-tʋ kalʋʋ nɛ man-taa wɛ leleŋ se ɛwɛnɩ ɛsɩmɩyɛ mbʋ malakɩ nɛ mansɩɣnɩ-ɩ yɔ pɩ-yɔɔ.»

11. Ɛzɩma ŋpɩzɩɣ nɛ ŋsɩnɩ ɛyaa lalaa? (Cɔnɩ ɖɔɖɔ kɩlɛmɩŋ.)

¹¹ La mbʋ ŋpɩzɩɣ yɔ nɛ ŋsɩnɩ lalaa. Ye ŋmaɣzɩɣ lalaa yɔɔ nɛ ŋlakɩ mbʋ ŋpɩzɩɣ yɔ nɛ ŋsɩɣnɩ-wɛ yɔ, piyeki nɛ ŋŋkɩlɩɣ kam ña-lɩmaɣza kala wena ŋkatɩɣ yɔ a-yɔɔ. Ðɩpɩzɩɣ nɛ ɖɩkpaɣ akpadɩyaa nɛ ɖɩmaɣzɩnɩ takayɩsɩ nzɩ sɩ-taa ɖɩpɩzɩɣ nɛ ɖɩkpɛlɩkɩ lɔŋ yɔ. Ɛlɛ ye ɖɩɩkalɩɣ takayɩsɩ nzɩ yɔ, ɖɩɩpɩzɩɣ nɛ ɖɩkpɛlɩkɩ lɔŋ nɩɩyɩ sɩ-taa. Mbʋ ɖɔɖɔ ye ŋŋyɔɔdʋʋnɩ piya evelisi yaa ye ŋŋkɛdɩɣ-sɩ mbʋ ŋkpɛlɩkɩ ñe-wezuu caɣʋ taa yɔ, sɩɩpɩzɩɣ nɛ sɩkpɛlɩkɩ lɔŋ ñɔ-cɔlɔ. Pɔzɩ-sɩ tɔm nɛ pʋwayɩ lɛ ŋwelisini-sɩ. Sɩnɩ-sɩ nɛ sɩtɩlɩ se Yehowa paɣtʋ yɔɔ ɖɔm wɛ wazaɣ paa ɛzɩmtaa nɛ tiyeki se sɩwɛɛ taa leleŋ taa. Pɩtʋʋ fɛyɩ se ye ŋhɛzɩɣ piya evelisi laŋa nɛ ŋkpazɩɣ-sɩ ɖoŋ yɔ, ŋkaɣ hiɣu taa leleŋ nɛ pɩkɩlɩ.—Keɣ. 71:18.

12. Ɛzɩ Izaayii 46:4 yɔɔdʋʋ yɔ, ɛbɛ Yehowa labɩ tamaɣ se ɛlakɩ akpadɩyaa? (Cɔnɩ ɖɔɖɔ kɩlɛmɩŋ.)

¹² Tɩmnɩ Yehowa se ɛha-ŋ ɖoŋ. Nabʋyʋ taa, pɩpɩzɩɣ nɛ pɩnɩ-ŋ siŋŋ nɛ piyele nɛ pitibi-ŋ yɔɔɔ, ɛlɛ tɔzɩ se Yehowa ɖoŋ fɛyɩnɩ kamaɣ. Bibl yɔɔdʋʋ se «pɩɩnɩɣ-ɩ kaaʋ yaa pɩɩɖɛɣ-ɩ kaaʋ.» (Iza. 40:28) Ye mbʋ, ɛpɩzɩɣ nɛ ɛha-ŋ ɖoŋ weyi pɩpɔzʋʋ-ŋ yɔ. (Iza. 40:​29-31) Halɩ ɛlabɩ tamaɣ se ɛsɩɣnɩ-ŋ. (Kalɩ Izaayii 46:4.) Nɛ paa ɛzɩmtaa lɛ, Yehowa ɖɔŋ ɛ-tɔm yɔɔ. (Yoz. 23:14; Iza. 55:​10, 11) Alɩwaatʋ ndʋ ŋtɩmɩɣ yɔ, Yehowa kaɣ-ŋ haʋ mbʋ pɩpɔzʋʋ-ŋ yɔ, ɖɩnɛ ɛlɛ ŋkaɣ naʋ ɛzɩma ɛsɔɔlɩ-ŋ siŋŋ yɔ nɛ pɩkaɣ yebu nɛ ŋhiɣ taa leleŋ.

13. Ɛzɩ 2 Kɔrɛntɩ mba 4:​16-18 yɔɔdʋʋ yɔ, tɔm ndʋ yɔɔ pɩwɛɛ se ɖɩtɔzʋʋ? (Cɔnɩ ɖɔɖɔ kɩlɛmɩŋ.)

¹³ Tɔzɩ se ŋŋkaɣ kɛʋ akpadɩyʋ mbʋ tam. Ye ɖɩtɔzʋʋ se kala wena ɖɩkatɩɣ yɔ akaɣ sɩʋ tɩnaɣ yɔ, pɩkaɣ-ɖʋ wɛʋ kɛlɛʋ se ɖɩɖɔkɩ ɖa-laŋa a-taa. Bibl sɩɣnɩ-ɖʋ se ɖa-taa ɛtɛ se akpadɩyɩtʋ nɛ kʋdɔmɩŋ pakaɣ sɩʋ tɩnaɣ. (Yɔɔb 33:25; Iza. 33:24) Ye mbʋ, ye ŋtɔzʋʋ se ñe-wezuu caɣʋ taa kɩyakɩŋ kɩbaŋ wɛnɩ ñɛ-ɛsɩndaa ɛlɛ pɩtɩkɛ ña-wayɩ ɩwɛna yɔ, pɩkaɣ yebu nɛ ŋhiɣ taa leleŋ nɛ pɩkɩlɩ. (Kalɩ 2 Kɔrɛntɩ mba 4:​16-18.) Ɛlɛ ɛbɛ ɛyaa lalaa pɩzɩɣ pala nɛ pasɩnɩ akpadɩyaa?

ƐBƐ ƐYAA LALAA PƖZƖƔ PALA NƐ PASƖNƖ AKPADƖYAA?

14. Ɛbɛ yɔɔ pɩcɛyaa se ɖikilimiɣ akpadɩyaa yɔɔ yaa ɖɩyaɣ-wɛ?

¹⁴ Kilimiɣ akpadɩyaa yɔɔ yaa yaɣ-wɛ ɖoŋ ɖoŋ. (Ebr. 13:16) Pɩpɩzɩɣ nɛ pɩla akpadɩyaa ɛzɩ pɛwɛ pe-ɖeke yɔ. Payaɣ koobu abalɩñɩnʋ nɔɔyʋ se Camille, ɛɛpɩzɩɣ se ɛlɩɩ ɛ-ɖɩɣa nɛ ewolo ɖoli. Ɛyɔɔdaa se: «Kpaɣnɩ tanaŋ tɛɛ nɛ piwolo ɖanaɣ, ɖaŋ tɛɛ mɛwɛɣ. Piyeba nɛ ɖoŋkʋɖʋm caɣʋ lɩ-m sɔŋ kpem. Nabʋyʋ taa, pɩlakɩ-m ɛzɩ mɛwɛ ɛzɩ tɔɔyʋʋ ŋgʋ paɖɩɣ-kʋ kpou tɛɛ yɔ. Man-taa wɩɣ nɛ manɩɣzɩɣ.» Ye ɖikilimiɣ akpadɩyaa yɔɔ yɔ, piyeki nɛ pa-taa tɛ se ɖɩsɔɔlɩ-wɛ nɛ pamʋ ñɩm ɖɛ-ɛsɩndaa. Pɩtɩla nabʋyʋ taa, ɖɩlakɩ lɩmaɣza se ɖiwoki nɛ ɖikilimi akpadɩyʋ nɔɔyʋ yɔɔ yaa ɖɩyaɣ-ɩ ɛlɛ pʋwayɩ lɛ ɖɩsɔɔ. Ðɩnawa se pɩɖɔkɩnɩ ɖa-taa paa anɩ. Ye mbʋ, ɛbɛ pɩzɩɣ pɩsɩnɩ-ɖʋ nɛ ɖɩtaasɔɔ «mbʋ pɩ-tɔm kɩlɩ cɛyʋʋ yɔ» pɩ-yɔɔ, pɩkpɛndɩnɩ akpadɩyaa yɔɔ kilimuu yɔɔ? (Filp. 1:10) Ŋpɩzɩɣ nɛ ŋma akpadɩyaa mba pɔ-yɔɔ ŋsɔɔlaa se ŋkilimi yaa mba ŋsɔɔlaa se ŋtiyini-wɛ message waa yɔ pa-hɩla. Ŋpɩzɩɣ ɖɔɖɔ nɛ ŋlɩzɩ alɩwaatʋ ndʋ tɩ-yɔɔ ŋsɔɔlaa se ŋkilimi pɔ-yɔɔ yɔ.

15. Ɛbɛ piya evelisi nɛ akpadɩyaa papɩzɩɣ nɛ pɛkpɛndɩ nɛ pala?

¹⁵ Ye ŋkɛ pɩɣa evelaɣ yɔ, pɩtɩla ŋpɔzʋʋ ña-tɩ se tɔm ndʋ ña nɛ akpadɩyaa ɩpɩzɩɣ nɛ ɩyɔɔdɩ yaa tʋma wena ɩpɩzɩɣ nɛ ɩla. Pɩfɛyɩ se ŋnɩɣzɩ tɔm ndʋ tɩ-yɔɔ. Mbʋ pɩwɛɛ se ŋla yɔ lɛ se ŋkɛ taabalʋ kɩbanʋ. (Adu. 17:17) Alɩwaatʋ ndʋ ŋwoki kediɣzisi yɔ, pʋcɔ nɛ kediɣzaɣ paɣzɩ lɛ, kpaɣ alɩwaatʋ nɛ ña nɛ wɛ ɩla kɛdaɣ, nɛ kediɣzaɣ tɛŋ lɛ kpaɣ alɩwaatʋ ɖɔɖɔ nɛ ña nɛ wɛ ɩla kɛdaɣ. Ŋpɩzɩɣ nɛ ŋpɔzɩ-wɛ se peheyi-ŋ mayaɣ ŋga pakɩlɩ sɔɔlʋʋ yɔ kɔ-tɔm yaa pɛkɛdɩ-ŋ mbʋ pɩlabɩ pa-pɩjatʋ taa nɛ paasɔʋ pɩ-yɔɔ yɔ pɩ-tɔm. Ŋpɩzɩɣ ɖɔɖɔ nɛ ŋyaa-wɛ nɛ ña nɛ wɛ ɩcɔnɩ JW tɔm ɖɩyɔɔdɩyɛ^® yɔɔ ɖʋtʋ natʋyʋ. Ŋpɩzɩɣ ɖɔɖɔ nɛ ŋlabɩ-wɛ mbʋ ŋnawa se pa-maɣmaɣ paapɩzɩɣ nɛ pala yɔ. Pɩtɩla ŋpɩzɩɣ ŋsɩnɩ-wɛ nɛ pɛ-tɛ pɔrtaabɩlɩwaa nɛ pɛ-tɛ taabɩlɛɛtɩwaa la tʋmɩyɛ camɩyɛ, yaa ŋpɩzɩɣ ŋsɩnɩ-wɛ nɛ pakpaɣ takayɩsɩ kɩfasɩ yaa videowaa kɩfama mba palɩɣ yɔ. Payaɣ koobu halɩñɩnʋ nɔɔyʋ se Carol, ɛyɔɔdaa se: «Ña nɛ akpadɩyaa ɩkpɛndɩɣ nɛ ɩlakɩ mbʋ ŋsɔɔlɩ labʋ yɔ. Paa mankpadɩyaa yɔ, mɔnsɔɔlaa se manɩɩ wezuu leleŋ. Mɔnsɔɔlaa se malɩɩ nɛ maya wondu, ma nɛ man-taabalaa ɖɩkpɛndɩ nɛ ɖɩtɔɔ tɔɔnaɣ, nɛ mɔnsɔɔlɩ yɛlʋʋ ɖɔɖɔ se mana wondu kɩlɩzɩtʋ.» Payaɣ koobu halɩñɩnʋ nɔɔyʋ se Maira, ɛyɔɔdaa se: «Man-taabalʋ nɔɔyʋ wɛnɩ pɩnzɩ 90, ɛkɩlɩ-m nɛ pɩnzɩ 57. Ɛlɛ ɖoŋ ɖoŋ lɛ, ma nɛ ɩ ɖihoŋuu nɛ ɖɩkpɛndɩɣ nɛ ɖɩcɔŋnɩ videowaa nɛ halɩ mɔnsɔʋ se ɛkɩlɩ-m. Nɛ alɩwaatʋ ndʋ ɖɩkatɩɣ kala yɔ, ɖɩpɔzʋʋ ɖama lɔŋ tasʋʋ.»

16. Ye ɖɩsɩɣ koobiya akpadɩyaa ɖɔkɔtɔ tɛ yɔ ɛzɩma pɩwazɩɣ-wɛ?

¹⁶ Sɩɩ-wɛ alɩwaatʋ ndʋ powoki ɖɔkɔtɔ tɛ yɔ. Ŋpɩzɩɣ nɛ ŋwoni-wɛ ɖɔkɔtɔ tɛ, ɛlɛ ŋpɩzɩɣ ɖɔɖɔ nɛ ŋcaɣ pɔ-cɔlɔ nɛ pɩsa nɛ ɖɔkɔtɔnaa cɔnɩ pɔ-yɔɔ camɩyɛ. (Iza. 1:17) Ðɔkɔtɔ kaayɔɔdʋʋ lɛ, ŋpɩzɩɣ nɛ ŋma tɔm se pɩsɩnɩ koobu akpadɩyʋ weyi ŋsɩwa yɔ. Payaɣ koobu halɩñɩnʋ nɔɔyʋ se Ruth, ɛyɔɔdaa se: «Ðoŋ ɖoŋ mowoki ɖɔkɔtɔ tɛ men-ɖeke lɛ, ɖɔkɔtɔ eewelisiɣni-m camɩyɛ. Nabʋyʋ taa eheyiɣ-m se: “Nabʋyʋ ɛɛlakɩ-ŋ, ña-ñʋʋ taa pɩwɛɛ.” Ɛlɛ alɩwaatʋ ndʋ nɔɔyʋ sɩɣ-m yɔ, ɖɔkɔtɔ welisiɣni-m camɩyɛ. Mɛnsɛɣ mon-koobiya mba pasɩɣ-m ɖɔkɔtɔ tɛ yɔ se palabaɣ lɛ.»

17. Ðʋtʋ ndʋ ɖɩpɩzɩɣ ɖɩla nɛ ɖa nɛ akpadɩyaa ɖisusuu tɔm?

¹⁷ Ña nɛ wɛ isusuu tɔm. Pɩtɩla yɔ akpadɩyaa nabɛyɛ fɛyɩnɩ ɖoŋ se powolo kpaɣ ɖɩɣa nɛ ŋwolo ɖɩɣa nɛ posusi tɔm. Pɩtɩla ŋpɩzɩɣ nɛ ŋyaa koobu halɩñɩnʋ akpadɩyʋ nɔɔyʋ se ɛsɩ-ŋ nɛ ɩla présentoir. Halɩ ŋpɩzɩɣ ŋñɩnɩ-ɩ kpelaɣ nɛ ɛcaɣ présentoir cɔlɔ. Ŋpɩzɩɣ nɛ ŋyaa koobu abalɩñɩnʋ akpadɩyʋ nɔɔyʋ se ɛkpɛndɩ ñɔ-yɔɔ nɛ ña nɛ ɩ ɩkpɛlɩkɩnɩ nɔɔyʋ Bibl. Halɩ ŋpɩzɩɣ nɛ ŋheyi Bibl kpɛlɩkɩyʋ se ɛkɔɔ koobu abalɩñɩnʋ akpadɩyʋ ɛnʋ ɛ-tɛ nɛ ɩkpɛlɩkɩ. Ɛzʋtʋyaa pɩzɩɣ nɛ pala tɔm susuu kediɣzisi koobu akpadɩyʋ nɔɔyʋ tɛ se pɩsa nɛ pɩwɛɛ-ɩ kɛlɛʋ se esusi tɔm. Ye ɖɩlakɩ mbʋ payɩ ɖɩpɩzɩɣ yɔ nɛ ɖɩɖʋʋ hɩɖɛ akpadɩyaa yɔ pɩkɛdɩɣnɩ Yehowa.—Adu. 3:27; Roma 12:10.

18. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

¹⁸ Tɔm ñʋʋ kʋnɛ kɩtɔzɩ-ɖʋ se Yehowa sɔɔlɩ akpadɩyaa nɛ pamʋ ñɩm ɛ-ɛsɩndaa siŋŋ, nɛ pamʋ ñɩm ɖɔɖɔ ɛgbɛyɛ taa koobiya ɛsɩndaa. Koobiya akpadɩyaa, paa ɩwɛɛ nɛ ɩkatɩɣ kala sakɩyɛ yɔ, Yehowa kaɣ-mɩ sɩnʋʋ nɛ ɩwɛɛ taa leleŋ taa. (Keɣ. 37:25) Ye ɩtɔzʋʋ se mi-wezuu caɣʋ taa kɩyakɩŋ kɩbaŋ wɛnɩ mɩ-ɛsɩndaa yɔ pɩkaɣ-mɩ kpazʋʋ ɖoŋ siŋŋ. Ɛlɛ ye ŋwɛɛ nɛ ŋcɔŋnɩ ñɔ-hɔʋ taa tʋ akpadɩyʋ nɔɔyʋ yɔɔ, yaa ye pɩwɩɣ pɩɣa nakɛyɛ yaa ña-taabalʋ nɔɔyʋ nɛ ŋcɔŋnɩ ɛ-yɔɔ yɔ, ɛbɛ pɩzɩɣ pɩsɩnɩ-ŋ nɛ ŋwɛɛ taa leleŋ taa? Ðɩkaɣ tɔm ndʋ tɩ-yɔɔ cosuu tɔm ñʋʋ ŋgʋ kɩkɔŋ yɔ kɩ-taa.