3 | Yele nɛ Bibl taa kɩɖaŋ wazɩ-ŋ
BIBL YƆƆDƲƲ . . . Hala nɛ abalaa siɣsiɣ tɩnaa mba ‘paakɛ ɛyaa ɛzɩ ɖa yɔ’ pɔ-tɔm.—YAKUBU 5:17.
Pʋ-tɔbʋʋ lɛ se
Halaa nɛ abalaa mba paacaɣ wezuu toovenim taa nɛ pana yɔ, pɔyɔɔdɩ pɔ-tɔm Bibl taa; nɛ paakatɩ wɛtʋ ndɩ ndɩ pe-wezuu caɣʋ taa. Ðɩɩkalɩɣ pɔ-tɔm lɛ, pɩtɩla yɔ, ɖiɖiɣziɣna se ɛzɩma pɩɩlabɩ pa-taa nɔɔyʋ yɔ mbʋ ɖɔɖɔ pɩlakɩ-ɖʋ.
Ɛzɩma tɔm tʋnɛ tɩpɩzɩɣ nɛ tɩsɩnɩ-ɖʋ?
Ða-tɩŋa ɖɩsɔɔlaa se lalaa ɩnɩɩ ɖɔ-tɔm taa. Kɔzɩ kɔzɩ alɩwaatʋ ndʋ ɖɩlʋkɩnɩ lɩmaɣza taa kʋdɔŋ nakʋyʋ yɔ. Alɩwaatʋ ndʋ ɖɩkalɩɣ Bibl yɔ, ɖɩkpɛlɩkɩɣ lalaa tɔm nɛ ɖɩnaɣ se pa-maɣzɩm nɛ ɛzɩma pɩlakaɣ-wɛ yɔ mbʋ ɖɔɖɔ ɖeyi ɖeyi pɩlakɩ-ɖʋ. Piyeki nɛ ɖiɖiɣzina se lalaa nɩ siziŋ ɛzɩ ɖa yɔ nɛ pɩɩkɩlɩɣ-ɖʋ labʋ ɛzɩ ɖɩwɛ ɖe-ɖeke yɔ alɩwaatʋ ndʋ ɖɩlʋkɩnɩ nɩɣzɛ nɛ lɩmaɣza taa kʋdɔŋ nakʋyʋ yɔ.
Ɛyaa mba pɩlakaɣ-wɛ ɛzɩ pɛwɛ pe-ɖeke yɔ nɛ pitiki po-toma taa yɔ, pɔyɔɔdɩ tɔm ndʋ yɔ tɩ-taa sakɩyɛ wɛ Bibl taa. Wiɖiyi ŋtɛm yɔɔdʋʋ se: ‘Ðenɖe pɩtalaa yɔ pɩcɛzɩ-m kpem’ na? Pɩɩlabɩ Moyizi, Eliya nɛ Daviid mbʋ ɖɔɖɔ.—Kɩgalʋʋ 11:14; 1 Awiya 19:4; Keɣa 54:5.
Bibl yɔɔdʋʋ halʋ nɔɔyʋ tɔm, payaɣ-ɩ se Hana. Ɛɛwɛ «wɩzasɩ» taa siŋŋ mbʋ pɔyɔɔ yɔ ɛɛkɛ kaalʋlaɣ, nɛ ɛ-yɔnɖɔŋ wɛɛ nɛ ɛwɩlɩɣ-ɩ kʋñɔŋ.—1 Samɩyɛɛlɩ 1:6, 10.
Bibl yɔɔdʋʋ abalʋ nɔɔyʋ tɔm, payaɣ-ɩ se Yɔɔb nɛ pɩtɩla yɔ, mbʋ pɩ-taa ɖɩwɛɛ yɔ pɩnɩɣzɩnɩ mbʋ ɛɛkataa yɔ. Paa ɛɛwɛnɩ tisuu sɔsɔm Yehowa yɔɔ yɔ, ɛɛsʋ laŋwɛɛkɩyɛ sɔsɔɖɛ naɖɩyɛ taa siŋŋ nɛ ɛyɔɔdɩ kɩyakʋ nakʋyʋ se: «Me-lidaʋ ɖʋ lɩm; maakaɣ tasʋʋ wɛʋ.»—Yɔɔb 7:16.
Ye ɖɩkpɛlɩkaa nɛ ɖɩtɩlɩ ɛzɩma Bibl taa ɛyaa panɛ palʋbɩnɩ lɩmaɣza kɩdɛkɛda nɛ pawabɩ-yɛ yɔ, pɩkpazɩɣ-ɖʋ ɖoŋ nɛ ɖiwolo pɩ-yɔɔ nɛ ɖɩlʋkɩnɩ ɖa-nɩɣzɛ.