Sɩnɩ ɛyaa mba pɛwɛnɩ «laŋa kɩbana» yɔ lɛɛ lɛɛ nɛ patɩlɩ Ɛsɔ

1. Ɛzɩma ɛyaa lakɩ alɩwaatʋ ndʋ ɖisusuu-wɛ tɔm yɔ? (Tʋma Labʋ 13:​47, 48; 16:​14, 15)

KAJALAƔ pɩnzɩ mɩnʋʋ taa, alɩwaatʋ ndʋ ɛyaa nabɛyɛ nɩ toovenim tɔm kajalaɣ ɖeɖe yɔ, pa-taa sakɩyɛ mʋ-tʋ kpaagbaa. (Kalɩ Tʋma Labʋ 13:​47, 48; 16:​14, 15.) Sɔnɔ ɖɔɖɔ, ɛyaa nabɛyɛ taa lakɩ leleŋ alɩwaatʋ ndʋ panɩɣ tɔm kɩbandʋ kajalaɣ ɖeɖe yɔ. Lalaa lɛ, alɩwaatʋ ndʋ pacalɩ-wɛ tʋ susuu yɔ patɩmʋ-tʋ, ɛlɛ pʋwayɩ pɔkɔma nɛ pɔsɔɔlɩ se patɩlɩ Ɛsɔ nɛ pɛsɛɛ-ɩ. Alɩwaatʋ ndʋ ɖɩlɩɣ tɔm susuu nɛ ɖɩkatɩ mba pɛwɛnɩ laŋa kɩbana yɔ, ɛbɛ pɩwɛɛ se ɖɩla?

2. Ɛzɩma tɩyɛ kpɛlɩkɩyaa labʋ tʋmɩyɛ nɩɣzɩnɩ haɖʋ tʋmɩyɛ?

² Ðɩpɩzɩɣ nɛ ɖɩkpaɣ kpɛlɩkɩyaa labʋ tʋmɩyɛ nɛ ɖɩmaɣzɩnɩ haɖʋ tʋmɩyɛ. Alɩwaatʋ ndʋ tɩʋ piye naɖɩyɛ pɩɣ tɩʋ yɔɔ yɔ haɖʋ koyuu-ɖɩ kpaagbaa, ɛlɛ ewoki pɩ-yɔɔ nɛ ɛmɩzɩɣ tɩʋ lɩm nɛ ɛcɔŋnɩ kɩ-yɔɔ se pɩsa nɛ pee wena akazaa yɔ atɛzɩ pɩʋ. Mbʋ ɖɔɖɔ alɩwaatʋ ndʋ ɖɩkatɩɣ nɔɔyʋ nɛ ɛsɔɔlaa se ewelisi ɖɔ-tɔm yɔ, ɖɩsɩɣnɩ-ɩ kpaagbaa se ɛpɩsɩ Krɩstʋ tɔm kpɛlɩkɩyʋ. Ɛlɛ ɖiwoki pɩ-yɔɔ nɛ ɖɩsɩɣnɩ mba patɩmʋ-tʋ kajalaɣ ɖeɖe yɔ nɛ pana mbʋ pʋyɔɔ pɩcɛyaa se pɛkpɛlɩkɩ nɛ patɩlɩ Ɛsɔ yɔ. (Yoh. 4:​35, 36) Alɩwaatʋ ndʋ ɖɩtɩlɩɣ se nɔɔyʋ sɔɔlaa se ewelisini-ɖʋ yaa ɛtɩsɔɔlɩ yɔ, pɩkaɣ-ɖʋ sɩnʋʋ nɛ ɖɩna nʋmɔʋ ŋgʋ kɩ-yɔɔ pɩwɛɛ se ɖɩtɩŋna nɛ ɖɩsɩnɩ-ɩ yɔ. Tɔm ñʋʋ kʋnɛ kɩ-taa, ɖɩkaɣ naʋ mbʋ ɖɩpɩzɩɣ ɖɩla nɛ ɖɩsɩnɩ ɛyʋ weyi ɖɩkatɩ kajalaɣ ɖeɖe nɛ Bibl taa tɔm kɛdɩnɩ-ɩ yɔ. Ðɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩsɩnɩ ɛyʋ ɛnʋ nɛ ɛɖɛɛnɩ ɛsɩndaa yɔ.

ƐZƖMA ÐƖPƖZƖƔ NƐ ÐƖSƖNƖ ƐYAA MBA TƆM KƖBANDƲ KƐDƖNƖ-WƐ YƆ?

3. Ɛbɛ pɩwɛɛ se ɖɩla alɩwaatʋ ndʋ ɖɩkatɩɣ ɛyaa mba tɔm kɩbandʋ kɛdɩnɩ-wɛ yɔ tɔm susuu taa yɔ? (1 Kɔrɛntɩ mba 9:26)

³ Alɩwaatʋ ndʋ ɖɩkatɩɣ ɛyaa mba tɔm kɩbandʋ kɛdɩnɩ-wɛ yɔ tɔm susuu taa yɔ, ɖɩsɔɔlaa se ɖɩsɩnɩ-wɛ nɛ papaɣzɩ ɖɔm wezuu nʋmɔʋ taa kpaagbaa. Ðɩkatɩɣ-wɛ kajalaɣ ɖeɖe lɛ, pɩwɛɛ se ɖɩpaɣzɩnɩ-wɛ Bibl kpɛlɩkʋʋ kpaagbaa nɛ ɖɩyaa-wɛ se pɔkɔɔ ɖe-kediɣzisi.—Kalɩ 1 Kɔrɛntɩ mba 9:26.

4. Ha kɩɖaʋ ŋgʋ kɩwɩlɩɣ ɛzɩma halʋ nɔɔyʋ tisaa nɛ ɛpaɣzɩ Bibl kpɛlɩkʋʋ kpaagbaa yɔ.

⁴ Heyi mba ŋkatɩɣ yɔ se ŋsɔɔlaa se ña nɛ wɛ ɩpaɣzɩ Bibl kpɛlɩkʋʋ. Ɛyaa mba ɖɩkatɩɣ yɔ, pa-taa nabɛyɛ sɔɔlaa se papaɣzɩ Bibl kpɛlɩkʋʋ kpaagbaa. Kɩɖaʋ nakʋyʋ yɔ: Saɖakawaɣ nakɛyɛ wiye, halʋ nɔɔyʋ wobi présentoir nakʋyʋ cɔlɔ Kanadaa ɛjaɖɛ taa nɛ ɛlɩzɩ Nɩɩ wezuu leleŋ tam! hatʋ cabɩ takayaɣ. Peeɖe koobu halɩñɩnʋ weyi ɛsɩŋ présentoir cɔlɔ yɔ eheyi-i se pɩtasɩnɩ takayaɣ ŋga lɛ, papɩzɩɣ nɛ pɛkpɛlɩkɩnɩ-ɩ Bibl falaa. Nɛ halʋ ɛnʋ etisi nɛ ɛ nɛ koobu ɛnʋ paha ɖama pa-kaŋgalaafu masɩ. Pɩtasɩ ɖanaɣ yɔɔ lɛ, halʋ ɛnʋ etiyini koobu halɩñɩnʋ ɛnʋ message nɛ ɛpɔzɩ-ɩ se ɖooye papɩzɩɣ nɛ pɛkpɛlɩkɩ. Koobu halɩñɩnʋ ɛnʋ ecosi-i se ewoki Mazaɣ wiye yaa Kujuka wiye lɛ, halʋ ɛnʋ ɛpɩsɩnɩ-ɩ se: «Nɛ ye ŋkɔm cee? Mɛwɛɣ ɖɩɣa.» Nɛ tɛʋ fema Kemeɣa lɛ pɛkpɛlɩkɩ; halʋ ɛnʋ etisaa nɛ ewolo kediɣzaɣ ŋga palabɩ kpɩtaʋ ŋgʋ kɩ-ɖɩdɛnɖɛ yɔ kajalaɣ ɖeɖe nɛ ɛwɛɛ nɛ ɛɖɛɣnɩ ɛsɩndaa lɛɛ lɛɛ.

5. Ɛbɛ ɖɩpɩzɩɣ ɖɩla nɛ pɩsɩnɩ-ɖʋ nɛ ɖa nɛ ɛyaa ɖɩpaɣzɩ Bibl kpɛlɩkʋʋ? (Cɔnɩ ɖɔɖɔ kɩlɛmɩŋ.)

⁵ Ɛlɛ pɩtɩkɛ ɛyaa tɩŋa kaɣnɩ tisuu se papaɣzɩ Bibl kpɛlɩkʋʋ kpaagbaa ɛzɩ halʋ weyi ɛ-tɔm ɖɩyɔɔdaa nɛ pɩɖɛɛ yɔ. Nabɛyɛ lɛ, pɩpɩzɩɣ nɛ pɩkpaɣ alɩwaatʋ pʋcɔ nɛ petisi nɛ papaɣzɩ Bibl kpɛlɩkʋʋ. Pɩtɩla ɖɩcalɩɣ-wɛ katʋʋ lɛ, pɩwɛɣ ɖeu se ɖa nɛ wɛ ɖɩla kɛdaɣ pɩlɩɩnɩ tɔm ndʋ pɔsɔɔlaa yɔ tɩ-yɔɔ. Ɛlɛ ye ɖɩwɛnɩ wɛtʋ kɩbandʋ pɔ-yɔɔ nɛ ɖiwolo pɩ-yɔɔ nɛ ɖɩwɩlɩɣ-wɛ se ɖɩmaɣzɩɣ pɔ-yɔɔ yɔ, piileɖiɣ lɛ pɩtɩla petisiɣ nɛ ɖa nɛ wɛ ɖɩpaɣzɩ Bibl kpɛlɩkʋʋ. Tɔm ndʋ ɖɩpɩzɩɣ ɖɩyɔɔdɩ nɛ peɖiɣzina se ɖɩsɔɔlaa se ɖa nɛ wɛ ɖɩkpɛlɩkɩ Bibl? Koobiya nabɛyɛ wɛ niye siŋŋ ɛzɩma papaɣzɩ ɛyaa Bibl kpɛlɩkɩnʋʋ yɔ pɩ-taa. Iyele nɛ ɖɩna tɔm ndʋ pa-taa nabɛyɛ yɔɔdaa yɔ.

6. Tɔm ndʋ ɖɩpɩzɩɣ nɛ ɖɩyɔɔdɩ nɛ pɩsɩnɩ ɛyʋ nɔɔyʋ nɛ etisi se ɖa nɛ ɩ ɖiwolo pɩ-yɔɔ nɛ ɖɩlakɩ kɛdaɣ?

⁶ Koobiya mba, pɔyɔɔdaa se ɛjaɖɛ hɔɔlɩŋ nɩɩyɩ taa lɛ, paayɔɔdʋʋ Bibl kpɛlɩkʋʋ ɖʋtʋ tɔm lɛ, pɩɩwɛɣ ɖeu se palabɩnɩ tʋmɩyɛ tɔm loyisi nɛ tɔm pee ɛzɩ «kpɛlɩkʋʋ», «Bibl kpɛlɩkʋʋ» yaa «mawɩlɩ-ŋ» mbʋ yɔ. Payʋsaa se pɩkɩlɩɣ ɖeu se palabɩnɩ tʋmɩyɛ tɔm loyisi ɛzɩ «kɛdaɣ» nɛ «ɖɩtɩlɩ Bibl taa tɔm nɛ pɩkɩlɩ» mbʋ yɔ. Pɩsa nɛ nɔɔyʋ sɔɔlɩ se ña nɛ ɩ ɩɖaɣnɩ labʋ kɛdaɣ pʋwayɩ lɛ, ŋpɩzɩɣ nɛ ŋyɔɔdɩ se: «Ɛzɩma Bibl cosuu ɖe-wezuu caɣʋ taa tɔm ndʋ ɖɩpɔzʋʋ ɖa-tɩ yɔ tɩ-yɔɔ yɔ pɩkaɣ-ŋ ɖɩɣzʋʋ» yaa «Bibl tɩkɛnɩ Ɛsɔ sɛtʋ takayaɣ nakɛyɛ yem, ɛlɛ kɩtasɩɣ-ɖʋ lɔŋ kɩbaŋ weyi ɩsɩɣnɩ-ɖʋ ɖe-wezuu caɣʋ taa yɔ.» Ŋpɩzɩɣ nɛ ŋtasɩ yɔɔdʋʋ se: «Ðɩpɩzɩɣ nɛ ɖɩkpaɣ cɛcɛsɩ 10 yaa 15 nɛ ɖɩkpɛlɩkɩ tɔm kɩcɛyɩtʋ ndʋ tɩpɩzɩɣ tɩsɩnɩ-ɖʋ ɖe-wezuu caɣʋ taa yɔ.» Nɛ pɩtɩcɛyɩ se ɖɩlabɩnɩ tʋmɩyɛ tɔm piye «ɖʋtʋ» yaa tɔm loyaɣ «paa kpɩtaʋ ŋgʋ» nɛ ɛyʋ weyi ɖɩwɛɛ nɛ ɖɩyɔɔdʋʋna yɔ ɛmaɣzɩ se pɩkɛnɩ-ɩ kɩjɛyʋʋ paa kpɩtaʋ ŋgʋ se ɖɩkatɩ.

7. Alɩwaatʋ ndʋ ɛyaa nabɛyɛ lɩ Bibl taa toovenim tɔm yɔɔ kajalaɣ ɖeɖe? (1 Kɔrɛntɩ mba 14:​23-25)

⁷ Yaa-wɛ se pɔkɔɔ kediɣzaɣ. Pɩwɛ ɛzɩ apostoloo Pɔɔlɩ alɩwaatʋ taa, ɛyaa nabɛyɛ ɖiɣzinaa se toovenim tɔm paawɛɛ nɛ pawɩlɩɣ-wɛ alɩwaatʋ ndʋ powobi kediɣzaɣ kajalaɣ ɖeɖe yɔ. (Kalɩ 1 Kɔrɛntɩ mba 14:​23-25.) Sɔnɔ ɖɔɖɔ, alɩwaatʋ ndʋ nabɛyɛ kɔŋ ɖe-kediɣzisi kajalaɣ ɖeɖe yɔ, peɖiɣziɣna se palɩ toovenim yɔɔ. Nabɛyɛ lɛ, pañɩtɩɣ nɛ papaɣzɩɣ kediɣzisi kɔm lɛ, pɛɖɛɣnɩ ɛsɩndaa lɛɛ lɛɛ. Alɩwaatʋ ndʋ pɩwɛɛ se ɖɩyaa-wɛ nɛ pɔkɔɔ ɖe-kediɣzisi? Nɩɩ wezuu leleŋ tam! takayaɣ tɛ tɔm kɩkpɛlɩkɩtʋ 10 taa, payaɣ weyi ña nɛ ɩ ɩkpɛlɩkɩɣ Bibl yɔ se ɛkɔɔ kediɣzisi. Ɛlɛ taaɖaŋ se ɩkpɛlɩkɩ nɛ ɩtalɩ peeɖe pʋcɔ nɛ ŋyaa-ɩ se ɛkɔɔ kediɣzaɣ. Kɩyakʋ ŋgʋ ña nɛ ɩ ɩcalɩɣ katʋʋ nɛ ɩpaɣzɩ kɛdaɣ yɔ, ŋpɩzɩɣ nɛ ŋyaa-ɩ se ɛkɔɔ kediɣzaɣ ŋga ɩlakɩ kpɩtaʋ ɖɩdɛnɖɛ yɔ. Pɩtɩla ŋpɩzɩɣ nɛ ŋheyi-i samaɣ taa tɔm ndʋ pakaɣ yɔɔdʋʋ yɔ tɩ-ñʋʋ yaa Feŋuu Tilimiye tɔm ñʋʋ ŋgʋ ɩkaɣ kpɛlɩkʋʋ kpɩtaʋ ŋgʋ yɔ kɩ-taa lɩmaɣzɩyɛ naɖɩyɛ.

8. Alɩwaatʋ ndʋ ɖɩyaɣ nɔɔyʋ se ɛkɔɔ ɖe-kediɣzisi yɔ, tɔm ndʋ taa ɖɩpɩzɩɣ nɛ ɖɩlɩzɩ-ɩ? (Izaayii 54:13)

⁸ Alɩwaatʋ ndʋ ɖɩyaɣ mba toovenim tɔm kɛdɩnɩ-wɛ yɔ se pɔkɔɔ ɖe-kediɣzisi yɔ, pɩwɛɛ se ɖɩlɩzɩ-wɛ pɩ-taa se ɛzɩma ɖɩlakɩ ɖe-kediɣzisi yɔ pɩwɛ ndɩ nɛ Ɛsɔ sɛtʋ agbaa lɛɛna kediɣzisi nzɩ pɩtɩla patiiwoki yɔ. Kɩɖaʋ nakʋyʋ yɔ: Kɩyakʋ nakʋyʋ, Bibl kpɛlɩkɩyʋ nɔɔyʋ wobi kediɣzaɣ nakɛyɛ kajalaɣ ɖeɖe, nɛ ɛna ɛzɩma Feŋuu Tilimiye kpɛlɩkʋʋ ɖɔma yɔ lɛ, ɛpɔzɩ koobu halɩñɩnʋ weyi ɛkpɛlɩkɩɣnɩ-ɩ Bibl yɔ se: «Kpɛlɩkʋʋ yɔɔ cɔnɩyʋ sɩm paa weyi ɛ-hɩɖɛ na?» Weyi ɛkpɛlɩkɩɣnɩ-ɩ Bibl yɔ ecosi-i se ɖa-tɩŋa ɖɩñakɩ pana se ɖɩtɩlɩ ɛgbɛyɛ taa mba tɩŋa hɩla, mbʋ pʋyɔɔ yɔ ɛgbɛyɛ taa mba wɛ ɛzɩ ɖɔ-hɔʋ taa mba yɔ. Bibl kpɛlɩkɩyʋ ɛnʋ ɛyɔɔdɩ se ɛ-tɛ cooci taa ɛyaa sakɩyɛ ɩɩsɩŋ lalaa hɩla. Pɩtasɩ lɛ, alɩwaatʋ ndʋ ɖɩyaɣ nɔɔyʋ se ɛkɔɔ ɖe-kediɣzisi yɔ, pɩwɛɛ se ɖɩlɩzɩ-ɩ pɩ-taa se kaɖʋwa ŋga kɔ-yɔɔ ɖiwoki kediɣzisi yɔ kɛwɛ ndɩ nɛ Ɛsɔ sɛtʋ agbaa lɛɛna ñɩŋga. (Kalɩ Izaayii 54:13.) Ðiwoki kediɣzisi se ɖɩsɛɛ Yehowa, ɖɩkpɛlɩkɩ ɛ-tɔm nɛ ɖɩkpazɩ ɖama ɖoŋ. (Ebr. 2:12; 10:​24, 25) Pʋyɔɔ ɖe-kediɣzisi ɖɔŋ camɩyɛ cɔlɩɩɩ nɛ sɩwazɩɣ-ɖʋ, nɛ paalakɩ sɔnzɩ nasɩyɩ sɩ-taa. (1 Kɔr. 14:40) Pɩtasɩ lɛ, pama ɖe-Kewiyaɣ Kpaamɩŋ nɛ ɩwɛɛ kɛlɛʋ nɛ ɩsɩɣnɩ-ɖʋ se ɖɩkpɛlɩkɩ tɔm camɩyɛ. Nɛ ɖɩɩyɔɔdʋʋ politiki ɛgbɛyɛ naɖɩyɛ tɔm, mbʋ pʋyɔɔ yɔ ɖɩɩtɩnɩɣ hɔɔlʋʋ nakʋyʋ yɔɔ, nɛ ɖɩɩhɔŋ tɔm nɛ ɖama yaa ɖɩɩwɩlɩɣ ɖa-maɣmaɣ ɖa-lɩmaɣza. Pɩwɛɣ ɖeu se ɖɩwɩlɩ Bibl kpɛlɩkɩyʋ video Ɛbɛ palakɩ Kewiyaɣ Kpaaŋ taa? Ðɩnɛ ɛlɛ ɛkaɣ naʋ mbʋ palakɩ ɖe-kediɣzisi taa yɔ pʋcɔ nɛ ɛkɔɔ kediɣzaɣ.

9-10. Ye ɖɩya nɔɔyʋ se ɛkɔɔ kediɣzaɣ yɔ, ɛbɛ pɩwɛɛ se ɖɩla nɛ piyele nɛ ɛ-taa tɛ se ye ɛkɔma yɔ, paakaɣ ñɩɣʋ ɛ-yɔɔ se ɛla nabʋyʋ yaa ɛyɔɔdɩ natʋyʋ? (Cɔnɩ ɖɔɖɔ kɩlɛmʋʋ.)

⁹ Nabɛyɛ tɩsɔɔlɩ se pɔkɔɔ ɖe-kediɣzisi mbʋ yɔɔ yɔ sɔɔndʋ kpaɣ-wɛ se ye pɔkɔma yɔ pakaɣ-wɛ heyuu se papɩsɩ Yehowa Aseɣɖe Tɩnaa. Pʋyɔɔ lɛ ye ŋya nabɛyɛ yɔ, sɩnɩ-wɛ nɛ pa-taa tɛ se ye pɔkɔm kediɣzaɣ yɔ, nɔɔyʋ ɛɛkaɣ-wɛ pɔzʋʋ se pala nabʋyʋ yaa pɔyɔɔdɩ natʋyʋ. Heyi-wɛ se pa nɛ pɔ-hɔʋ taa mba papɩzɩɣ nɛ pɔkɔɔ, pɩkpɛndɩnɩ pe-piya. Nɛ pɔkɔŋ lɛ, pe-piya ɩɩcakɩnɩ hɔɔlʋʋ ɛlɛ sɩcakɩ pɔ-cɔlɔ nɛ pa-tɩŋa pewelisi wɩlɩtʋ kʋɖʋmtʋ, ɖɩnɛ ɛlɛ pɛ-ɛsa wɛɣ sɩ-yɔɔ. (Wp. 31:12) Ðɩɩpɔzʋʋ ɛyaa se pɔcɔɔ liidiye ɖe-kediɣzisi taa, ɛlɛ ɖɩɖɔŋ Yesu tɔm tʋnɛ tɩ-yɔɔ: «Ɩmʋ falaa, ɩha falaa.» (Mat. 10:8) Pɩwɛɛ ɖɔɖɔ se ɖɩlɩzɩ-wɛ pɩ-taa se pɩfɛyɩ se pamaɣzɩ se pɩpɔzʋʋ se posuu wondu ndʋ tɩwɛ liidiye yɔ pʋcɔ nɛ pɔkɔɔ kediɣzaɣ, mbʋ pʋyɔɔ yɔ pɩtɩkɛ mbʋ pɩnaɣ ɛsa yɔɔ yɔ Ɛsɔ cɔŋna, ɛlɛ laŋɩyɛ taa ɛcɔŋna.—1 Sam. 16:7.

¹⁰ Ye ŋya nɔɔyʋ nɛ ɛkɔɔ kediɣzaɣ yɔ, ñaɣ pana nɛ ŋmʋ-ɩ camɩyɛ. Wɩlɩ-ɩ ɛgbɛyɛ taa ɛzʋtʋyaa nɛ ɛgbɛyɛ taa koobiya lalaa. Ye ɛ nɛ koobiya pamalɩnɩ ɖama yɔ, pɩtɩla pɩkaɣ-ɩ seɣtuu nɛ ɛɖaɣnɩ kɔm. Paalakɩ kediɣzaɣ lɛ, ye ɛfɛyɩnɩ Bibl yɔ, ñɔtɩnɩ-ɩ nɛ ña nɛ ɩ ɩkalɩɣ masɩ nzɩ pɛwɛɛ nɛ pakalɩɣ yɔ ña-ñɩŋgʋ taa nɛ ŋsɩnɩ-ɩ nɛ ɛnɩɩ tɔm ndʋ pɛwɛɛ nɛ pɔyɔɔdʋʋ yɔ tɩ-taa.

ALƖWAATƲ NDƲ ÑA NƐ NƆƆYƲ ƖPAƔZƖƔ BIBL KPƐLƖKƲƲ YƆ

11. Ɛzɩma ŋpɩzɩɣ nɛ ŋwɩlɩ se ŋñaŋ ɖɩɣdʋ alɩwaatʋ nɛ ɛ-ɖʋtʋ?

¹¹ Ye ɖa nɛ nɔɔyʋ ɖɩpaɣzɩ Bibl kpɛlɩkʋʋ yɔ, tɔm ndʋ pɩwɛɛ se tɩwɛɛ ɖa-lɩmaɣza taa? Pɩwɛɛ se ɖɩɖɔ alɩwaatʋ ndʋ Bibl kpɛlɩkɩyʋ ɖʋ-ɖʋ yɔ tɩ-yɔɔ nɛ ɖɩɖɔ ɖɔɖɔ ɛ-ɖʋtʋ yɔɔ. Ye ña nɛ ɩ ɩnɩnɩ ɖama se ŋwoki alɩwaatʋ natʋyʋ yɔɔ yɔ, ñaɣ pana nɛ ŋɖɔ tɩ-yɔɔ paa ɛyaa ɩɩɖɔŋ alɩwaatʋ yɔɔ ñe-egeetiye taa yɔ. Pɩtasɩ lɛ, ye kajalaɣ ɖeɖe lɛ ña nɛ ɩ ɩpaɣzɩɣ kpɛlɩkʋʋ yɔ, taakɩlɩ alɩwaatʋ kpaɣʋ. Koobiya mba pɛkpɛlɩkɩnɩ ɛyaa sakɩyɛ Bibl yɔ, pa-taa nabɛyɛ yɔɔdaa se pɩwɛɣ ɖeu se kpɛlɩkʋʋ ɛtaakɩlɩ leɖuu paa kpɛlɩkɩyʋ ɛsɔɔlaa se ɖiwolo kpɛlɩkʋʋ yɔɔ yɔ. Pɩtasɩ ɖɔɖɔ lɛ, pɩtɩpɔzɩ se ɖɩyɔɔdʋʋ sakɩyɛ, ɛlɛ pɩwɛɛ se ɖɩha kpɛlɩkɩyʋ alɩwaatʋ nɛ ɛyɔɔdɩ ndʋ ɛmaɣzɩɣ yɔ.—Adu. 10:19.

12. Alɩwaatʋ ndʋ ɖa nɛ nɔɔyʋ ɖɩpaɣzɩɣ Bibl kpɛlɩkʋʋ yɔ, ɖa-kaɖʋwa lɛ ŋga?

¹² Alɩwaatʋ ndʋ ɖa nɛ nɔɔyʋ ɖɩpaɣzɩɣ Bibl kpɛlɩkʋʋ yɔ, ɖa-kaɖʋwa lɛ se ɖɩsɩnɩ-ɩ nɛ ɛtɩlɩ Yehowa nɛ Yesu nɛ ɛsɔɔlɩ-wɛ. Pɩsa nɛ ɖɩtalɩ kaɖʋwa ŋga lɛ, pɩwɛɛ se paa ɛzɩmtaa lɛ ɖɩwɩlɩ-ɩ ndʋ Bibl yɔɔdʋʋ yɔ nɛ pɩtaakɛnɩ ndʋ ɖa-maɣmaɣ ɖɩmaɣzɩɣ yɔ. (Tʋma 10:​25, 26) Apostoloo Pɔɔlɩ ha-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. Alɩwaatʋ ndʋ ɛwɩlaɣ ɛyaa tɔm yɔ, ɛhɔŋaɣ pa-lɩmaɣza nɛ ewokini Yesu Krɩstʋ yɔɔ, mbʋ pʋyɔɔ yɔ Yesu ɛnʋ Yehowa tiyaa se ɛsɩnɩ-ɖʋ nɛ ɖɩtɩlɩ-ɩ nɛ ɖɩsɔɔlɩ-ɩ. (1 Kɔr. 2:​1, 2) Pɔɔlɩ sɩnɩ-wɛ ɖɔɖɔ nɛ panɩɩ pɩ-taa se pɩcɛyaa se pañaɣ pana nɛ pɛwɛɛnɩ wɛtʋ kɩbandʋ ndʋ papɩzɩɣ nɛ pakpaɣ nɛ pamaɣzɩnɩ sika, liidiye ñɩɣtʋ nɛ ñɩɣlɩm pɛɛ yɔ. (1 Kɔr. 3:​11-15) Wɛtʋ kɩbandʋ ndʋ tɩ-taa natʋyʋ lɛ tisuu, lɔŋsɩnɖɛ, lɛɣtʋ nɛ Yehowa sɔɔndʋ seu. (Keɣ. 19:​9, 10; Adu. 3:​13-15; 1 Pɩy. 1:7) Ye ŋsɩɣnɩ ñe-Bibl kpɛlɩkɩyaa se pɛwɛɛnɩ tisuu sɔsɔm nɛ taabalɩyɛ kɩbanɖɛ wɛɛ pa nɛ pa-Caa sɔɔlɩm tʋ weyi ɛwɛ ɛsɔdaa yɔ pɛ-hɛkʋ taa yɔ, ɖɩnɛ ɛlɛ ŋwɛɛ nɛ ŋmaɣzɩɣnɩ Pɔɔlɩ.—2 Kɔr. 1:24.

13. Alɩwaatʋ ndʋ ɖɩsɩɣnɩ mba tɔm kɩbandʋ kɛdɩnɩ-wɛ yɔ, ɛzɩma ɖɩpɩzɩɣ nɛ ɖɩwɩlɩ se ɖɩwɛ suuɖu nɛ ɖɩnɩɣ tɔm taa? (2 Kɔrɛntɩ mba 10:​4, 5) (Cɔnɩ ɖɔɖɔ kɩlɛmʋʋ.)

¹³ Alɩwaatʋ ndʋ Yesu wɩlaɣ ɛyaa tɔm yɔ, ɛwɩlaa se ɛwɛ suuɖu nɛ ɛnɩɣ tɔm taa. Ña ɖɔɖɔ ŋŋkpɛlɩkɩɣnɩ nɔɔyʋ lɛ, maɣzɩnɩ Yesu wɛtʋ ndʋ. Ɩɩkpɛlɩkɩɣ lɛ, taapɔzɩ-ɩ tɔm ndʋ tɩpɩzɩɣ nɛ tɩcɛyɩ-ɩ yɔ. Ye pɩwɛ-ɩ kaɖɛ se ɛnɩɩ tɔm natʋyʋ taa yɔ, pɩtɩcɛyɩ se ɩkpaɣ alɩwaatʋ sakɩyɛ tɩ-yɔɔ. Ɛlɛ ɩpɩzɩɣ nɛ iwolo kpɛlɩkʋʋ yɔɔ nɛ pʋwayɩ lɛ ɩɩpɩsɩ tɩ-yɔɔ. Taañɩɣ ɛ-yɔɔ se etisi Bibl wɩlɩtʋ natʋyʋ yɔɔ, ɛlɛ ha-ɩ alɩwaatʋ nɛ ɛmaɣzɩ tɩ-yɔɔ nɛ alɩwaatʋ kaaɖɛɣ lɛ, ɛkaɣ tɩ-taa nɩʋ. (Yoh. 16:12; Kol. 2:​6, 7) Bibl kpaɣ cɛtɩm wɩlɩtʋ nɛ kɩmaɣzɩnɩ tilimiye. (Kalɩ 2 Kɔrɛntɩ mba 10:​4, 5.) Kɩyɔɔdʋʋ se cɛtɩm wɩlɩtʋ wɛ ɛzɩ «mbʋ pɩkam camɩyɛ» nɛ pɩpɔzʋʋ se ɖituzi-pʋ nɛ ɖɩpɛɖɩ yɔ. Kiɖe tɛɛ kʋnʋŋ taa lɛ, tɔm piye nɖɩ palabɩnɩ tʋmɩyɛ Bibl mayaɣ kanɛ ka-taa yɔ, ɖiyeki nɛ ɛyʋ maɣzɩɣ ɛzɩma potuzuu tilimiye naɖɩyɛ yɔ pɩ-yɔɔ. Pɩpɩzɩɣ nɛ pɩkpaɣ alɩwaatʋ sakɩyɛ pʋcɔ nɛ Bibl kpɛlɩkɩyʋ kizi tisuu mbʋ ɛɛwɛna pʋcɔ nɛ ɛtɩlɩɣ toovenim yɔ. Pʋyɔɔ lɛ, pɩwɛɛ se ɖɩsɩnɩ-ɩ nɛ ɛma tilimiye kɩfaɖɛ, pʋ-tɔbʋʋ se ɖɩsɩnɩ-ɩ nɛ ɛtaa Yehowa liu. Ðɩnɛ ɛlɛ, pɩkaɣ-ɩ wɛʋ kɛlɛʋ se ɛsɔɔ tisuu mbʋ ɛɛwɛna yɔ pɩ-yɔɔ.—Keɣ. 91:9.

ALƖWAATƲ NDƲ BIBL KPƐLƖKƖYƲ NƆƆYƲ KƆŊ KEDIƔZAƔ YƆ

14. Wɛtʋ ndʋ pɩwɛɛ se ɖɩwɛɛnɩ ɛyaa kɩfama mba pɔkɔŋ ɖe-kediɣzisi yɔ pɔ-yɔɔ?

¹⁴ Yehowa tɩsɔɔlɩ se ɖɩɖʋ tʋkaɣ ɛyaa taa paa le patɩɩlɩnaa yaa paa lone nɖɩ patɩɩwɛna yɔ. (Yak. 2:​1-4, 9) Ye mbʋ, ɛzɩma ɖɩpɩzɩɣ nɛ ɖɩwɩlɩ sɔɔlɩm ɛyaa kɩfama mba pɔkɔŋ ɖe-kediɣzisi yɔ?

15-16. Ɛbɛ ɖɩpɩzɩɣ ɖɩla nɛ ɛyaa kɩfama mba pɔkɔŋ ɖe-kediɣzisi taa yɔ pa-taa wɛɛ leleŋ?

¹⁵ Nabɛyɛ lɛ, pɔkɔŋ kediɣzaɣ mbʋ pʋyɔɔ yɔ pɩtɩla pɔsɔɔlaa se pana mbʋ ɖɩlakɩ ɖe-kediɣzisi taa yɔ, yaa nɔɔyʋ lɛ pɩtɩla yɔ egeetiye naɖɩyɛ taa koobu nɔɔyʋ heyini-i se ɛkɔɔ. Pʋyɔɔ lɛ, alɩwaatʋ ndʋ ɖɩnaɣ ɛyʋ kɩfalʋ nɔɔyʋ kediɣzaɣ taa yɔ, pɩwɛɛ se ɖɩñɔtɩnɩ-ɩ nɛ ɖɩmʋ-ɩ camɩyɛ ɛlɛ ɖɩtaala nabʋyʋ nɛ pɩcɛyɩ-ɩ. Yaa-ɩ nɛ ɛkɔɔ ɛcaɣ ñɔ-cɔlɔ. Ñɔtɩnɩ-ɩ nɛ ña nɛ ɩ ɩcɔŋnɩ ñe-Bibl taa yaa takayaɣ ŋga ɩwɛɛ nɛ ɩkpɛlɩkɩɣ yɔ ka-taa, yaa ŋpɩzɩɣ nɛ ŋñɩnɩ-ɩ Bibl nɛ takayaɣ ŋga. Pɩtasɩ lɛ, maɣzɩ ɛzɩma pɩlakɩ-ɩ yɔ pɩ-yɔɔ. Kɩyakʋ nakʋyʋ, abalʋ nɔɔyʋ wobi kediɣzaɣ nɛ ɛna ɛzɩma koobiya su wondu yɔ lɛ, eheyi koobu weyi ɛmʋ-ɩ yɔ se fɛyɛ kpa ɛnʋ, mbʋ pʋyɔɔ yɔ ɛnʋ tisuu wondu camɩyɛ ɛzɩ lalaa yɔ. Peeɖe koobu ɛnʋ ɛhɛzɩ ɛ-laŋɩyɛ nɛ eheyi-i se paa ɖisuu wondu mbʋ nɛ ɖiwoki kediɣzisi yɔ, ɖɩwɛ ɛzɩ ɛyaa lalaa yɔ. Pʋwayɩ abalʋ ɛnʋ ɛɖɛnɩ ɛsɩndaa nɛ ɛha ɛ-tɩ nɛ pamɩyɩsɩ-ɩ lɩm, ɛlɛ eɖiɣni tɔzʋʋ tɔm ndʋ koobu ɛnʋ eeheyi-i nɛ pɩhɛzɩ ɛ-laŋɩyɛ yɔ tɩ-yɔɔ. Ɛlɛ alɩwaatʋ ndʋ ŋyɔɔdʋʋnɩ ɛyaa kɩfama mba pɔkɔm kediɣzaɣ yɔ, kpa ña-tɩ nɛ ŋtaaɖʋ ñɔ-nɔɔ pɔ-tɔm ndʋ tɩtɩkɛ ña-ñɩndʋ yɔ tɩ-taa.—1 Pɩy. 4:15.

¹⁶ Ye ɖɩyɔɔdʋʋnɩ ɛyaa kɩfama mba pɔkɔŋ kediɣzaɣ yɔ nɛ ñamtʋ yɔ, ɖɩpɩzɩɣ ɖɔɖɔ ɖiyele nɛ pa-taa la leleŋ. Nɛ alɩwaatʋ ndʋ ɖicosuu tɔm yɔ, yaa alɩwaatʋ ndʋ ɖɩyɔɔdʋʋ mba patɩkɛ Yehowa Aseɣɖe Tɩnaa yɔ pɔ-tɔm yaa pe-tisuu yɔɔ tɔm yɔ, pɩwɛɛ se ɖɩmaɣzɩ tɔm pee wena ɖɩlakɩnɩ tʋmɩyɛ yɔ a-yɔɔ camɩyɛ. Pɩtɩpɔzɩ se ɖɩyɔɔdɩ tɔm ndʋ tɩɖʋʋ-wɛ ɖɩwɩzɩyɛ yɔ yaa tiyeki nɛ paatasɩɣ sɔɔlʋʋ se pɔkɔɔ kediɣzaɣ yɔ. (Tiiti 2:8; 3:2) Kɩɖaʋ nakʋyʋ yɔ: Pɩtɩpɔzɩ se ɖɩyɔɔdɩ tɔm kɩdɛkɛdɩtʋ natʋyʋ pe-tisuu yɔɔ. (2 Kɔr. 6:3) Pʋyɔɔ lɛ koobiya mba pɔyɔɔdʋʋ samaɣ taa tɔm yɔ, pɩwɛɛ se pakpa pa-tɩ nɛ pataayɔɔdɩ tɔm kɩdɛkɛdɩtʋ natʋyʋ ɛyaa kɩfama mba pɔkɔm kediɣzaɣ yɔ pe-tisuu yɔɔ. Pɩwɛɛ ɖɔɖɔ se paayɔɔdʋʋ samaɣ taa tɔm lɛ, palɩzɩ tɔm pee wena ɛyaa kɩfama mba paasɩŋ yɔ a-taa nɛ pɩwɩlɩ se pamaɣzɩɣ pɔ-yɔɔ.

17. Alɩwaatʋ ndʋ ɖɩkatɩɣ ɛyaa mba ‘pɛwɛnɩ laŋa kɩbana yɔ,’ ɛbɛ pɩwɛɛ se ɖɩla?

¹⁷ Pɩcɛyaa se ɖɩla kpɛlɩkɩyaa tʋmɩyɛ kpɛdɛyɛ, nɛ paa evemiye nɖɩ ɖɩwɛɣ nɛ ɖɩɖɛɣ lɛ, tʋmɩyɛ nɖɩ ɖɩ-tɔm tasɩɣ cɛyʋʋ nɛ pɩkɩlɩɣ. Nɛ ɖɩkaɣ wobu pɩ-yɔɔ nɛ ɖɩñɩnɩɣ ɛyaa mba ‘pɛwɛnɩ laŋa kɩbana se pehiɣ wezuu maatɛŋ yɔ.’ (Tʋma 13:48) Alɩwaatʋ ndʋ ɖɩkatɩɣ-wɛ yɔ, ɖiheyiɣ-wɛ kpaagbaa se ɖɩsɔɔlaa se ɖa nɛ wɛ ɖɩkpɛlɩkɩ Bibl yaa ɖɩyaɣ-wɛ se pɔkɔɔ ɖe-kediɣzisi. Ye ɖɩlakɩ mbʋ yɔ, ɖɩsɩɣnɩ-wɛ nɛ papaɣzɩ ɖɔm nʋmɔʋ ‘ŋgʋ kiwokini wezuu taa yɔ’ kɩ-taa.—Mat. 7:14.