Ŋtɔzʋʋ?
Feŋuu Tilimiye takayɩsɩ nzɩ sɩlɩ pɩnaɣ kanɛ yɔ, ŋkalɩ-sɩ camɩyɛ na? Ye ŋkalɩ-sɩ camɩyɛ yɔ, maɣzɩ nɛ ŋna se ŋpɩzɩɣ nɛ ŋcosi tɔm pɔzʋʋ pʋnɛ pɩ-yɔɔ:
Ɛbɛ seɣtiɣ-ɖʋ se ɖɩcɛlɩ Yehowa samtʋ?
Ðɩcɛlɩɣ Yehowa samtʋ mbʋ pʋyɔɔ yɔ ɖɩñaŋɩ-ɩ siŋŋ. Pɩtasɩ lɛ, ɖɩcɛlɩɣ-ɩ samtʋ mbʋ pʋyɔɔ yɔ ɖɩsɔɔlɩ-ɩ siŋŋ. Ðɩcɛlɩɣ Yehowa samtʋ ɖɔɖɔ mbʋ pʋyɔɔ yɔ ɖɩsɔɔlaa se ɛyaa lalaa ɩtɩlɩ-ɩ.—w25.01, h. 3.
Ye nɔɔyʋ ɛɖʋ-ɖʋ ɖɩwɩzɩyɛ yɔ, ɛzɩma ɖɩpɩzɩɣ nɛ ɖɩkpaɣ nɛ ɖikpeɣ-i faaa?
Ðiihuuzuu ɛsa ɛzɩma pɩlakɩ-ɖʋ yɔ pɩ-yɔɔ; ɛlɛ ɖɩkpakɩɣ lɩmaɣzɩyɛ se ɖɩɩcakɩnɩ ɛyʋ ɛnʋ nɛ ɖiyeki nɛ ɖa-pana hɛɛ, ɖɩnɛ ɛlɛ pɩsɩɣnɩ-ɖʋ nɛ ɖɩfɛɛ kala wena pana kɔŋna yɔ.—w25.02, h. 15-16.
Ɛbɛ yɔɔ tɔmkpɛlɩkɩyʋ Maarɩkɩ kɛnɩ kɩɖaʋ kɩbaŋʋ evebiya?
Maarɩkɩ tisi faaa se ɛɖʋʋ ɛyaa lalaa lɩm. Alɩwaatʋ natʋyʋ nabʋyʋ kaalaba, nɛ pɩtɩla pɩɩcɛyɩ-ɩ nɛ pitibi-i yɔɔɔ, paa mbʋ yɔ wɛtʋ ndʋ tɩtɩɖɩɣ-ɩ nʋmɔʋ se eyele e-koobiya sɩnʋʋ. Ɛñaɣ pana nɛ taabalɩyɛ wɛɛ ɛ nɛ Pɔɔlɩ nɛ Krɩstʋ ñɩma lalaa mba papɩ fezuu taa yɔ pɛ-hɛkʋ taa.—w25.04, h. 27.
Yesu yɔɔdɩ adɩma naayɛ taa se: «Meyeba nɛ patɩlɩ ña-hɩɖɛ.» Suwe ɛñɩnaɣ yɔɔdʋʋ? (Yohanɛɛsɩ 17:26)
Yesu tɔmkpɛlɩkɩyaa kaatɛm tɩlʋʋ Ɛsɔ hɩɖɛ. Ɛlɛ eyeba nɛ patɩlɩ mbʋ ɖeyi ɖeyi weyi payaɣ se Yehowa yɔ ɛkɛnaa yɔ, ɛ-kaɖʋsɩ, ɛ-tʋma nɛ ɛ-wɛtʋ kɩbandʋ.—w25.05, h. 20-21.
Ye ɖɩwɛnɩ tɩ luzuu yɔ, tɔm ndʋ yɔɔ ɖitisiɣ?
Ðitisiɣ se pɩtɩkɛ tɔm tɩŋa ɖɩsɩma. Kɩɖaŋ nɩɩyɩ yɔ: Ðɩɩsɩŋ alɩwaatʋ ndʋ ɛjaɖɛ kaɣ tɛm yɔ, ɖɩɩsɩŋ mbʋ ɖeyi ɖeyi Yehowa kaɣ labʋ alɩwaatʋ ndʋ yɔ. Nɛ ɖɩɩsɩŋ mbʋ pɩkaɣ labʋ cee wayɩ yɔ. Ðɩɩpɩzɩɣ nɛ ɖɩnɩɩ ɛzɩma Yehowa sɩm-ɖʋ yɔ pɩ-taa kiya.—w25.06, h. 15-18.
Ɛbɛ pɩzɩɣ pɩsɩnɩ-ɖʋ nɛ tɔm ñʋʋ nakʋyʋ yaa samaɣ taa tɔm yɔɔdʋʋ nabʋyʋ wazɩ-ɖʋ?
Ðɩpɩzɩɣ nɛ ɖɩpɔzɩ ɖa-tɩ se: «Tɔm ndʋ pɛwɛɛ nɛ palakɩnɩ tʋmɩyɛ se pasɩnɩ ɛyaa nɛ pa-taa tɛmnɩ Bibl taa toovenim tɔm tʋnɛ? Kɩɖaʋ kɩbaŋʋ nakʋyʋ wɛɛ se manpɩzɩɣ nɛ malabɩnɩ tʋmɩyɛ alɩwaatʋ ndʋ mawɩlɩɣ tɔm yɔ? Anɩ tɔm ñʋʋ kʋnɛ kɩpɩzɩɣ nɛ kɩkɛdɩna?»—w25.07, h. 19.
Ɛzɩma Yehowa kpaɣ nɛ ekpeɣ Daviid yɔ, ɛbɛ pɩkpɛlɩkɩɣ-ɖʋ ɛ-kpaɣʋ nɛ kpeɣu yɔɔ?
Paa Daviid kaalabɩ kɩwɛɛkɩm sɔsɔm yɔ, alɩwaatʋ ndʋ ekpiɖi siŋŋ yɔ Yehowa kpaɣaa nɛ ekpeɣ-i. (1 Awi. 9:4, 5) Ye Yehowa ɛkpaɣ nɔɔyʋ kɩwɛɛkɩm nɛ ekpeɣ-i yɔ, ɛsɔʋ pɩ-yɔɔ nɛ ɛɛkaɣ-ɩ tasʋʋ pɔzʋʋ akɔnta pɩ-yɔɔ.—w25.08, h. 17.
Ye pɩwɛ Bibl kpɛlɩkɩyʋ nɔɔyʋ kaɖɛ se ɛnɩɩ tɔm natʋyʋ taa yɔ, ɛbɛ ŋpɩzɩɣ nɛ ŋla?
Ye ŋñaɣ pana nɛ ŋtɩŋnɩ Bibl yɔɔ nɛ ŋlɩzɩ-ɩ tɩ-taa ɛlɛ pɩwɛɛ-ɩ kaɖɛ se ɛnɩɩ tɩ-taa yɔ, ɩpɩzɩɣ nɛ iwolo kpɛlɩkʋʋ yɔɔ nɛ pʋwayɩ lɛ ɩɩpɩsɩ tɩ-yɔɔ.—w25.09, h. 24.
Bibl yɔɔdʋʋ se ‘kɩwɛɛkɩm wɛnɩ ɖoŋ se pipeɣzi ɛyaa.’ (Ebr. 3:13) Ɛzɩma tɩyɛ?
Kɩwɛɛkɩm pɩzɩɣ nɛ pituyi-ɖʋ nɛ ɖɩla mbʋ pɩfɛyɩ ɖeu yɔ. Pɩpɩzɩɣ ɖɔɖɔ pipeɣzi-ɖʋ nɛ ɖɩmaɣzɩɣ tam se Yehowa tɩsɔɔlɩ-ɖʋ.—w25.10, h. 16.
Ɛbɛ pɩzɩɣ pɩsɩnɩ-ɖʋ nɛ ɖa-adɩma wɛɛ ɖeu nɛ pɩkɩlɩ?
(1) Ðɩpɩzɩɣ nɛ ɖɩmaɣzɩ Yehowa wɛtʋ kɩbandʋ yɔɔ. (2) Ðɩpɩzɩɣ nɛ ɖɩmaɣzɩ kaɖɛ nɖɩ ɖɩwɛɛ nɛ ɖɩkatɩɣ yɔ ɖɩ-yɔɔ nɛ ɖɩyɔɔdɩ ɖɩ-tɔm, pɩtɩla pɩwɛ-ɖʋ kaɖɛ se ɖɩkpaɣ nɛ ɖikpeɣ nɔɔyʋ. (3) Ðɩpɩzɩɣ nɛ ɖɩkpaɣ alɩwaatʋ nɛ ɖɩtɩmɩ nɛ pileɖi. Pɩkaɣ-ɖʋ haʋ waɖɛ nɛ ɖiheyi Yehowa ɖa-taa tɔm nɛ ɛzɩma pɩlakɩ-ɖʋ yɔ nɛ pɩkɩlɩ.—w25.10, h. 19-20.
Ɛbɛ ɖɩpɩzɩɣ ɖɩla nɛ ɖɩsɩnɩ akpadɩyaa?
Ðɩpɩzɩɣ nɛ ɖikilimiɣ akpadɩyaa yɔɔ yaa ɖɩyaɣ-wɛ ɖoŋ ɖoŋ. Ðɩpɩzɩɣ ɖɔɖɔ nɛ ɖɩsɩɩ-wɛ alɩwaatʋ ndʋ powoki ɖɔkɔtɔ tɛ yɔ. Yaa ɖa nɛ wɛ ɖɩpɩzɩɣ nɛ ɖɩtɩŋɩɣnɩ nʋmɔŋ ndɩ ndɩ yɔɔ nɛ ɖisusuu tɔm.—w25.11, h. 6-7.
Ɛbɛ pɩcɛyaa se ɩla pɩsa nɛ mi-nesi ɖɔkʋʋ sɔnzɩ ɖʋ Yehowa hɩɖɛ?
Pɩwɛɛ se ɩɖɔ paɣtʋ ndʋ payɩ komina ɖʋ nesi ɖɔkʋʋ sɔnzɩ yɔɔ yɔ tɩ-yɔɔ. Ɩñaɣ pana nɛ ɛyaa mba pɔkɔŋ yɔ papɩzɩ nɛ pana piye nɖɩ fezuu kiɖeɖeu lʋlʋʋ yɔ mi-nesi ɖɔkʋʋ sɔnzɩ nɛ kazandʋ taa. Mi-wondu suu ɛmaɣna. Ikizi sɔnzɩ nzɩ sɩɩlakɩ nɔɔ kʋɖʋmaɣ nɛ Bibl paɣtʋ kila yɔ. Ɩɩlakɩ mi-nesi ɖɔkʋʋ ɖʋtʋ lɛ ɩyɔɔdɩnɩ ɖama camɩyɛ.—w25.12, h. 21-24.