LISHOMO 2

Tangola mwaunatangalela

2 Vakolintu 2:17

IKUVAIKIDILE UTENDE DASHI: Tangola kenga womba mwaa úlodya kenga ntenga wauvalanga unkuvanavo mana, namomo lodya kenga unkuvangaikangila vanu vakwigwilíla.

MWAKUTANDELA:

Shwali na lipanganiange shana. Shwali pakulota haunababaikange, lola ntenga wauvalanga haunalikulupile umwene. Vika muti dimbande dikumene dyaulota kutangola shana. Tangola kwamalove lako na lipuwilo; haunashomye vila vinu vyaandikigwe mu lyaamba mwako.

Ikava kenga ulota Kushomya Ibibiliya au mabuku lanji, manya shana imbande yaulota kushomya pakulota kushomya kwako kwigwinike shana. Muwakati waushomya malove latangwele munu, ikuvaikidile ushomye shana pakulota laigwinike shana, kanji haunapundyaniange.
Tangola na ntima wako uti. Muwakati wautangola, vakumbukile vanu vakwigwilíla mwaulatela kuvapwashalela ntenga wako. Tangola uvalola. Kwimila kwako, kwalatanga kwako na malaledi lako lavaikidile lalodye kenga shautangola ni shinu shiu na shinkuma muntima.

Haunakumbukile kenga kutangola mwaunatangalela ni kutangalanga gwamba. Idapedya ntenga wako, utangola mu inamuna yakwigwiniya shana na kwamalove lambone.
Valole vanu vakwigwilíla. Valole kumevo avalá vautangolanavo ikava kenga kwenu hainanyatilika shinu. Pautangola mwaa pashipinga, nnole kula munu na mwanda wake, kuleka kuvalola vanu uti kwamwanda umo.