Maiu

Na kes últimu anu ki pasa, txeu algen fuji di ses país i es bai vive sima rafujiadu na otus país. Pamodi ki bu ka ta tenta prende kunprimenta-s na ses língua? Dipôs, tenta prende alguns frazi ki pode djuda kes rafujiadu kria interesi. Tanbê, bu pode mostra-s nos site jw.org, undi es ta atxa txeu vídiu i publikasons na ses língua. Jeová ta trena-nu dretu pa nu faze trabadju di pregason. Pur izénplu, runion Vida i pregason ta djuda-nu ten más kunfiansa pa nu faze revizitas i studus di Bíblia. Bu ta inxina bus fidju da komentáriu na ses própi palavra? Alguns algen seta verdadi dipôs ki es obi un mininu da un komentáriu sinplis i di korason. — 1 Cor. 14:25. w18.06 22-23 ¶7-9

É bon nu lenbra ma nos tudu nu staba lonji di Deus. (Efé. 2:12) Má Jeová traze-nu pa el pamodi se amor. (Ose. 11:4; João 6:44 ) I Jizus resebe-nu ku amor. Nbóra nos é pekador, el abri-nu pórta pa nu pode faze párti di família di Deus. Si Jizus resebe-nu ku txeu amor, nos tanbê nu ten obrigason di faze mésmu kuza pa tudu algen! Nu sta kada bês más pértu di fin, pur isu divizon, diskriminason i ódiu sta ta bira más txeu. (Gál. 5:19-21; 2 Tim. 3:13) Má, anos nu krê ten sabedoria di Deus ki ta djuda-nu trata tudu algen igual i npenha pa kuzas ki ta traze pas. (Tia. 3:17, 18) Nu ta xinti filís óras ki nu ta faze amizadi ku algen di otu país, ntende ses kultura i ti prende ses língua. Asi, nu ta xinti ma nos pas sta ta ‘bira sima un riu i justisa sima óndias di mar.’ — Isa. 48:17, 18. w18.06 12 ¶18-19

Un trópa di Roma ka podia baba géra sen sapatu. Se sandália éra fetu di três tira di péli, éra fórti, i tanbê es ta kalsaba sábi. Asi el podia andaba ku suguransa i el ka ta skoregaba. Sima un sandália ta djudaba un trópa ganha géra, tanbê kristons meste ten ses pé kalsadu ku notísias sábi pa es pode leba mensaji di pas. (Isa. 52:7; Rom. 10:15) Má simé, nu meste ten koraji pa nu prega. Un irmon di 20 anu, ki txoma Robertu, fla: “N tinha medu di pâpia ku nhas koléga di skóla sobri Bíblia. N ta fikaba ku vergónha. Óras ki N djobe pa tras, N ta odja ma N ka tinha motivu di xinti si. Gósi N ta fika kontenti di da nhas koléga tistimunhu.” Txeu jóven da kónta ma é más faxi da tistimunhu óras ki es sta ben priparadu. w18.05 29 ¶9-11

Jizus fla se apóstlus: ‘N ta da nhos nha pas.’ (João 14:27 ) Modi ki pas ki ta ben di Jizus pode djuda-nu da frutu? Óras ki nu ka ta dizisti di prega, Jeová ku Jizus ta fika kontenti ku nos i nu ta xinti pas na korason. (Sal. 149:4; Rom. 5:3, 4; Col. 3:15) Dipôs ki Jizus pâpia di alegria ki se apóstlus pode xintiba, el splika ma é inportanti es ama otus algen más di ki ses kabésa. (João 15:11-13 ) Tanbê el fla: ‘N ta txoma nhos di amigus’. É un grandi priviléjiu ser amigu di Jizus! Má kuzê ki apóstlus tinha ki fazeba pa es kontinuaba se amigu? Es tinha ki ‘bai i kontinua ta da frutu’. (João 15:14-16 ) Uns dôs anu antis, Jizus daba se apóstlus un órdi: ‘Óras ki nhos ta bai, nhos prega i nhos fla: “Reinu di Séu sta kuazi ta txiga.”’ (Mat. 10:7) É pur isu ki na kel noti antis di Jizus móre, el fla se apóstlus ma es tinha ki kontinuaba ta faze trabadju ki dja es kumesaba. — Mat. 24:13; Mar. 3:14. w18.05 20-21 ¶15-16

Jóvens, nhos konsentra na sirbi Jeová i ten métas spritual. Má, txeu jóven di bu idadi ta pensa na uza vida sô pa divirti. Talvês es ta krê konvida-u pa bu divirti ku es. Pur isu, más sédu ô más tardi bu ten ki mostra ma bu sta disididu na alkansa bus méta. Ka bu dexa preson di kolégas distrai-u. Ten txeu manera di nu ivita preson di kolégas. Pur izénplu, ivita situasons ki é faxi bu kai na tentason. (Pro. 22:3) Pensa tanbê na maus rezultadu di faze kuzas mariadu. Otu kuza ki pode djuda-nu, é ser umildi i seta ma nu meste di konsedju. Ser umildi ta djuda-u obi konsedju di bu pai ku bu mai i di otus algen ku más spiriénsa na kongregason. (1 Ped. 5:5, 6) Abo tanbê é umildi pa seta konsedju? w18.04 28-29 ¶14-16

Jizus tanbê ta mostraba gratidon. Na un mensaji ki el manda se sigidoris na alguns kongregason na Ázia Menor, el ilojia-s i el agradise-s pa ses trabadju. Pur izénplu, el fla kongregason di Tiatira: ‘N konxe kuzas ki bu faze, bu amor, bu fé, bu trabadju i ma bu sta aguenta firmi, i N sabe ma kuzas ki bu sta faze gósi é más txeu di ki kes ki bu faze antis.’ (Apo. 2:19) Jizus fla ma ses trabadju omenta i tanbê el ilojia-s pa kes kualidadi ki ta motivaba es faze kes trabadju. Nbóra Jizus meste konsedjaba alguns na Tiatira, el kumesa i el finda se mensaji ta mostra se gratidon ki el ta xintiba pa es. (Apo. 2:27, 28) Jizus é kabésa di tudu kongregason. Pensa na autoridadi ki el ten. El ka meste agradise-nu pa trabadju ki nu ta faze pa el. Má simé, el ta preokupa ku mostra gratidon pa nos. Kel-li é un grandi izénplu pa ansions! w19.02 16 ¶10

Na ténpu di apóstlus, grupu enkaregadu di óbra ta daba nkorajamentu pa kes ki ta tomaba kónta di pregason i pa tudu kes otu kristons. Es manda Pedru ku Juan, pa ora pa kes novu kriston resebeba spritu santu. (Atos 8:5, 14-17 ) Imajina modi ki Filipi i tudu kes ki bira kristons xinti nkorajadu, ku ajuda ki grupu enkaregadu di óbra da-s! Oji, Grupu Enkregadu di Óbra di Tistimunhas di Jeová ta nkoraja família di Betel, kes ki trabadja pa ténpu interu i irmons na mundu interu. I rezultadu ta ser kel mésmu ki kes kriston na ténpu di apóstlu tevi, nu ta fika kontenti ku nkorajamentu. Un izénplu di kel-li é bruxura Volte para Jeová ki Grupu Enkaregadu di Óbra lansa na anu 2015. Kel-li sta ta da txeu nkorajamentu pa monti algen na mundu interu. w18.04 19 ¶18-20

Txeu algen ta pensa ma óras ki es ten txeu liberdadi é midjór pa es. Má, liberdadi pa nu faze kel ki nu krê é sima un spada ki ta korta pa dôs ladu. Imajina modi ki mundu ta sérba si ka tinha limiti. É pur isu ki Enciclopédia Delta Universal fla: “Leis di tudu sosiadadi organizadu ta forma un grupu di liberdadis i proibisons konplikadu, má ikilibradu.” ‘Konplikadu’ é kel palavra sértu. Pensa na kes monti livru di leis ki ómis faze. Tanbê, kes monti adivogadus i juízis ki meste ntende i aplika kes lei. Jizus mostra ma pa ten liberdadi di verdadi, ta nvolve dôs kuza: Primeru, seta verdadi ki el inxina. Sugundu, bira se disiplu. Si nu faze si nu ta ten liberdadi di verdadi. Má é liberdadi di kuzê? Jizus responde: ‘Tudu kenha ki faze pekadu é skravu di pekadu. Si Fidju liberta nhos, nhos ta ser livri di verdadi.’ — João 8:34, 36. w18.04 6-7 ¶13-14

Nu gosta di sta djuntu ku algen ki ta nporta ku nos sentimentus i ki krê pa nu sta dretu. Es ta tenta poi na nos lugar pa ntende kuzê ki nu sta pensa ô modi ki nu sta xinti. Es ta repara kuzê ki nu sta meste i antis di nu pidi-s es ta djuda-nu. Nu ta fika kontenti ku kes algen ki ta ‘poi na nos lugar’. Anos é kriston, pur isu nu debe poi na lugar di otus. Má, faze kel-li pode ser difísil. Pamodi? Un di kes motivu é pamodi nos é inperfetu. (Rom. 3:23) Pur isu, nu meste luta kóntra nos tendénsia di pensa sô na nos kabésa. Otu kuza ki pode bira difísil pa alguns algen poi na lugar di otus é manera ki es kriadu i alguns difikuldadi ki es pasa na vida. Tanbê, nu pode ser influensiadu pa manera di pensa di algen di mundu. Na es ténpu di fin, txeu algen ka ta preokupa ku sentimentus di otus. Má, es ta ‘ama sô ses kabésa’. (2 Tim. 3:1, 2) Simé, nu ta konsigi poi na lugar di otus si nu imita Jeová ku se Fidju, Jizus Kristu. w19.03 14 ¶1-3

Kel últimu di kes 10 Mandamentu ta proibiba kubisa, ô dizenvolve dizeju mariadu pa kuzas di otus algen. (Deut. 5:21; Rom. 7:7) Jeová da kel lei li pa inxina un grandi lison: se povu ten ki proteje ses korason, ki é ses pensamentu i sentimentu. El sabe ma é pensamentus i sentimentus mariadu ki ta pô-nu faze kuzas mariadu. Pur izénplu, Rei Davidi kai na es armadilha. El éra un bon ómi, má un bês, el dizeja mudjer di un otu ómi. Se dizeju pô-l ta faze pekadu. (Tia. 1:14, 15) Davidi faze adultériu, el tenta ngana maridu di kel mudjer i el ranja manera di mata-l. (2 Sam. 11:2-4; 12:7-11) Jeová ka ta odja sô pa aparénsia di algen. El ta odja kel algen ki nos é di pa déntu, kel ki nos é na korason. (1 Sam. 16:7) Ka ten ninhun pensamentu, sentimentu ô kuzas ki algen ta faze ki Jeová ka ta da kónta. El ta odja kes bon kualidadi na nos korason i el krê pa kes bon kualidadi kontinua ta dizenvolve. Má, el krê pa nu konxe kes pensamentu mariadu i pa nu kontrola-s antis di es pô-nu ta faze kuzas mariadu. — 2 Cró. 16:9; Mat. 5:27-30. w19.02 22 ¶9, 11

Bíblia ta fla ma Muizes éra ‘mutu más mansu ki tudu ómi na téra.’ (Núm. 12:3) Má kel-li krê fla ma el éra fraku, ma el tinha medu di tomaba disizons, ô di kontinuaba firmi óras ki otus algen ta staba kóntra el? É si ki txeu algen ta pensa di pesoas mansu. Má kel-li é ka verdadi. Muizes éra fórti, disididu i korajozu. Ku ajuda di Jeová, el nfrenta Faraó kel rei poderozu di Ijitu, el orienta talvês 3 milhon di israelita na dizértu i el djuda nason di Israel vense ses inimigu. Nu ka sta ta pasa pa kes mésmu prubléma ki Muizes pasa pa el. Má tudu dia nu ten ki lida ku pesoas ô ku situasons ki ta bira difísil nu ser un algen mansu. Má simé, nu ten un bon motivu pa dizenvolve kel kualidadi li, pamodi Jeová promete ma ‘kes algen mansu ta ben toma kónta di Téra’. (Sal. 37:11) Bu ta atxa ma bo é un algen mansu? Otus algen ta atxa ma bo é mansu? w19.02 8 ¶1-2

Konsénsia é un prezenti ki Jeová da-nu. Adon ku Eva tanbê tinha konsénsia, pur isu lógu dipôs ki es peka kóntra Deus, es tenta sukundi di el. Pamodi ki es faze kel-li? Pamodi es staba ku konsénsia pizadu. Si un algen ka trena se konsénsia, el é sima un barku ki ta uza un búsula stragadu. Si barku ka tene búsula dretu, béntu i korentis di mar pode leba-l pa otu direson. Má, un búsula ki ta funsiona dretu ta djuda kapiton di barku leba-l na direson sértu. Nos búsula é nos konsénsia. É kel vós déntu di nos ki ta fla-nu kuzê ki é dretu i kuzê ki é mariadu. Tanbê el pode gia-nu na kaminhu sértu. Má pa nos konsénsia ser un gia di kunfiansa, nu meste trena-l dretu. Si nu ka trena nos konsénsia dretu, el ka ta gia-nu pa kaminhu sértu. (1 Tim. 4:1, 2) Má, el pode ti pô-nu ta fla ‘ma kel ki é mau é bon’. w18.06 16 ¶1-3

Ten óras ki ideias di mundu ka ta parse klaru. Pur isu, nu meste sabe modi ki nu ta konxe-s i ivita-s. Pur izénplu, alguns notísia na jornal ta mostradu di un manera ki ta apoia opinion di un partidu pulítiku. Ô es ta konta stória di un algen ki mundu ta fla ma el subi na vida. Alguns filmi i livrus ta insentiva pesoas pa ten kes ideia li: ‘Primeru é mi’, i ‘primeru é nha família’. Ta parse ma é ka mariadu pensa si, i é un direitu ki tudu algen ten. Má, pensa di kel manera li ta mostra ma kes algen ka ta sigi kel ki Bíblia ta fla. Bíblia ta fla ma nu ta ser filís djuntu ku nos família sô si nu ama Jeová primeru. (Mat. 22:36-39) É klaru ki tudu diverson é ka mariadu. Má nu debe pergunta nos kabésa: ‘N ta konsigi da kónta di kes ideia di mundu sikrê es ka ta parse klaru? N sta proteje nhas fidju i nha kabésa di alguns prugrama di tilivizon i di lé informasons ki ten ideias di mundu? N sta ta djuda nhas fidju pensa sima Jeová, asi pa es ka dexa ideias di mundu ki es ta obi i ki es ta odja, muda ses manera di pensa?’ w18.11 22 ¶18-19

Jeová ta mostra ma el sta ku nos óras ki el ta da-nu tudu se atenson i amor. Repara ma el ta ama-nu txeu, kantu el fla: ‘Pamodi bu pasa ta ten txeu valor pa nhas odju, bu dadu ónra i N ta ama-u.’ (Isa. 43:4) Ka ten nada na Séu ku Téra ki ta poi Jeová dexa di ama kes ki ta sirbi-l. Nunka el ka ta dexa di ser lial. (Isa. 54:10) Jeová ka promete kaba ku nos prublémas. Má, el promete ma el ka ta dexa-nu foga na prublémas ki pode ser sima ‘rius’ i nen el ka ta dexa provasons ki pode ser sima ‘lumi’ pô-nu ta sufri pa tudu ténpu. Jeová promete ma el ta sta ku nos pa el djuda-nu lida ku kes prubléma. Modi ki el ta faze kel-la? El ta djuda-nu fika kalmu. Asi nu ta kontinua lial pa el sikrê nu sta kóre risku di móre. (Isa. 41:13; 43:2) Nu ten ki kúnfia na promésa di Deus: ‘N ta sta ku bo.’ Kel-li ta djuda-nu ten koraji i forsa pa nu lida ku prublémas. w19.01 3 ¶4-6

Si bo é jóven, talvês profesoris i otus algen ta insentiva-u faze kursu i ten un trabadju ki bu ta ganha txeu dinheru. Má Jeová, ta da-u un konsedju diferenti. É klaru ki el krê pa bu sforsa na skóla pa bu pode ten un trabadju pa bu sustenta. (Col. 3:23) Má, óras ki bu ta toma disizon inportanti sobri bu futuru, Jeová ta krê pa bu sigi se prinsípius. Kes prinsípiu ta mostra kuzê ki nu ten ki faze na es ténpu di fin. (Mat. 24:14) Jeová sabe tudu kuza. El sabe kuzê ki ta ben kontise na futuru i ki ténpu ki fin ta ben. (Isa. 46:10; Mat. 24:3, 36) Jeová tanbê konxe-u, el sabe kuzê ki ta da-u filisidadi i kuzê ki ta traze-u prublémas ku tristéza. Konsedjus di algun algen pode parse dretu, má el ka ta ben di Palavra di Deus. Pur isu, el é ka midjór ki di Jeová. w18.12 19 ¶1-2

Óras ki kel ténpu txiga, ‘kes algen mansu ta ben toma kónta di Téra i es ta ben ten txeu alegria ku txeu pas.’ Tanbê Jeová uza Davidi pa skrebe kel promésa li: ‘Téra ta ben ser di kes algen justu i es ta ben vive na el pa tudu ténpu.’ (Sal. 37:11, 29; 2 Sam. 23:2) Kes promésa li ta djudaba kes algen ki ta fazeba vontadi di Deus tinha sertéza ma un dia Téra ta ten sô algen justu ta vive na el. Tanbê ma Téra ta ben biraba un paraízu, sima éra na jardin di Éden. Ku ténpu, txeu israelita bandona Jeová i adorason verdaderu. Pur isu, Deus dexa nason di Babilónia toma Judá, kaba ku país i leba alguns sima skravu. (2 Cró. 36:15-21; Jer. 4:22-27) Má, profétas di Deus dja flaba ma dipôs di 70 anu, israelitas ta voltaba pa ses téra. Kes profesia li dja kunpri, má tanbê es é inportanti pa nos oji. Es ta da-nu motivu pa nu kridita ma Téra ta ben bira un Paraízu. w18.12 4 ¶9-10

Konsedjus di mundu é kóntra kel ki Bíblia ta fla. Má, konsedjus di mundu ta sirbi pa nos oji más di ki kes di Bíblia? Jizus fla: ‘Sabedoria ta mostra ma el é justu pa se óbras.’ (Mat. 11:19) Mundu dja avansa txeu na tekinolojia, má es ka konsigi rezolve kes prubléma ki ka ta dexa-nu ser filís, sima géra, diskriminason i krimi. I tanbê txeu algen ta atxa ma é normal faze konportamentu seksual mariadu. Txeu algen sabe ma kes kuza li ta distrui família, ta traze duénsas i otus prubléma. Má kes algen ki ta pensa sima Jeová, ten un família filís i bon saúdi. I es ten bons amizadi ku tudu kes algen ki ta sirbi Jeová na mundu interu. (Isa. 2:4; Atos 10:34, 35; 1 Cor. 6:9-11) Kel-li ta mostra klaru ma manera ki Jeová ta pensa é mutu más midjór ki di mundu. w18.11 20 ¶8-10

É klaru ki nu ta sforsa pa nu ten un bon amizadi ku nos família i trata-s ku amor. Má simé, nu meste toma kuidadu pa nu ka dexa di sigi leis di Jeová sô pa nu pode agrada-s. Nos midjór amigu debe ser kes algen ki ta ama Jeová. Tudu ken ki ta anda na verdadi ten ki ser santu. (Isa. 35:8; 1 Ped. 1:14-16) Kantu nu prende verdadi, nu tevi ki faze mudansas pa nu pode vive sima Bíblia ta fla. Alguns tevi ki faze mudansas más txeu. Má simé, nu meste sforsa pa nu kontinua linpu i toma kuidadu pa nu ka torna faze kes kuza mariadu di mundu. Tanbê nu debe toma kuidadu pa nu ka kai na tentason di faze konportamentu seksual mariadu. Kuzê ki pode djuda-nu? Pensa na présu ki Jeová paga ku sangi di se Fidju Jizus Kristu pa nu pode bira santu. (1 Ped. 1:18, 19) Pa nu ser linpu sima Jeová ta krê, nu meste kontinua ta da valor pa sakrifisiu di Jizus. w18.11 11 ¶10-11

Txeu irmon ki staba na sirvisu pa ténpu interu, fla ma es ka perde alegria mésmu kantu ses situason muda, pamodi es staba konsentradu na pregason. Sima dja nu odja, nu debe faze tudu ki nu pode sima nos situason ta da i nu kúnfia sénpri na Jeová. Si nu faze si, nu ta ten pas déntu nos, ka ta nporta kuzê ki kontise. Ku ténpu, nu ta odja ma manera ki nu lida ku kes mudansa, ta djuda-nu ten un amizadi más fórti ku Jeová. Na mundu ki nu sta vive, nos vida pode muda di un óra pa otu. Nu pode resebe un novu diziginason na sirvisu di Jeová, nu pode panha prubléma di saúdi, ô talvês nu meste kuida di nos família. Ka ta nporta kuzê ki pode kontise, bu pode ten sertéza ma Jeová ta kuida di bo i el ta djuda-u na óra sértu. (Heb. 4:16; 1 Ped. 5:6, 7) I désdi gósi faze kel ki bu pode sima bu situason ta da. Faze orason pa Jeová i prende poi tudu kunfiansa na el. Si bu faze kel-li, ka ta nporta mudansa ki kontise na bu vida, sénpri bu ta ten pas ki ta ben di Jeová. w18.10 30 ¶17; 31 ¶19, 22

Na Bíblia, nu ta atxa txeu izénplu ki ta mostra ma Jeová ta preokupa ku se sérvus. Pur izénplu, repara modi ki Deus djuda Samuel pâpia di un mensaji di julgamentu kóntra Eli, ki éra Saserdóti prinsipal sima sta na 1 Samuel 3:1-18. Lei di Jeová ta flaba ma mininus devia ruspetaba un algen más grandi, prinsipalmenti si el éra un xéfi di tribu. (Êxo. 22:28; Lev. 19:32) Bu ta atxa ma éra faxi pa Samuel txiga na Eli i flaba el kel mensaji di julgamentu? Klaru ki nau! Bíblia ta fla ma Samuel staba ku ‘medu di konta Eli kel vizon’. Má, Deus dexa klaru pa Eli ma éra El ki staba ta txoma Samuel. Pur isu, Eli txoma Samuel i el fla-l: ‘Ka bu sukundi-m nada di kuzê ki El fla-u.’ Samuel obi ku el i el ‘konta-l tudu’, i se palavras staba di akordu ku un mensaji ki Eli resebeba antis. (1 Sam. 2:27-36) Stória sobri Samuel ku Eli, ta mostra ma Jeová ten sabedoria i el ta preokupa ku kuzê ki se sérvus ta xinti. w18.09 23 ¶2; 24 ¶4-5

Oji, mintira dja bira un kuza normal. Un artigu di revista National Geographic ku téma “Pamodi ki nu ta konta mintira” ta fla ma mintira dja bira ta faze párti di manera di ser di pesoas. Txeu bês es ta konta mintira pa proteje ses kabésa ô talvês pa es sukundi algun kuza mariadu ki es faze. Tanbê es ta konta mintira pa es pode ganha dinheru ô pa es subi na vida. Kel artigu tanbê ta fla ma é faxi pa alguns, konta mintira na kuzas grandi ô pikinoti pa “algen stranhu, kolégas di trabadju, amigus i pa kes algen ki es ta ama.” Kal ki é rezultadu di tudu kes mintira? Amizadi i kunfiansa ta kaba. Davidi fla Jeová: ‘N sabe ma bu ta fika kontenti óras ki un algen ten verdadi na korason’. (Sal. 51:6) Davidi sabia ma verdadi é un kuza ki ta ben di korason. Pur isu, kristons debe ‘pâpia verdadi pa kunpanheru’, na tudu situason. — Zac. 8:16. w18.10 7 ¶4; 8 ¶9-10; 10 ¶19

Kantu israelitas sai di Ijitu na anu 1513 antis di Jizus, pode ser ki es éra más di três milhon. Na meiu di tudu kes algen, staba mininu, algen grandi, algen duenti ô difisienti. Un grupu grandi sima kel-la, ta mesteba di un líder ki ta ntendeba es i ki ta kuidaba di es ku amor. Jeová uza Muizes pa faze kel-la. Asi, israelitas xinti suguru timenti es staba ta dexa kel úniku lugar ki es konxeba. (Sal. 78:52) Kuzê ki Jeová faze pa se povu xinti suguru? Primeru, Jeová pô-s ta sai di Ijitu ‘organizadu sima trópa.’ (Êxo. 13:18) Kel manera organizadu djuda israelitas odja ma Jeová staba ta orienta-s. Tanbê duránti dia Jeová uza un ‘núven’ i di noti un ‘lus di lumi’ pa gia se povu. (Sal. 78:14) Kel-la éra un manera di Jeová flaba israelitas: “Ka nhos xinti medu. N ta gia i N ta proteje nhos.” w18.09 26 ¶11-12

Na ténpu ki Bíblia skrebedu, alguns sérvu fiel di Jeová, xinti dizanimadu pamodi prubléma ki es staba ta pasa. Pur isu, alguns di es atxa ma éra midjór si es moreba. Pur izénplu, Jó staba txeu dizanimadu ki el fla: ‘Dja N sta fartu di nha vida, N ka krê vive más.’ (Jó 7:16 ) Proféta Jonas tanbê fika diziludidu ku kuzas ki kontise na se diziginason ki el fla: ‘Gósi, ó Jeová, favor, tra-m nha vida, pamodi pa mi, é midjór N móre di ki N fika bibu.’ (Jonas 4:3 ) Tanbê proféta Elias xinti txeu dizanimadu ki el pidi Jeová pa dexa-l móre. El fla: ‘Dja sta bon! Gósi, ó Jeová, tra-m nha vida’. (1 Reis 19:4 ) Má Jeová ta daba txeu valor pa kada un di es i el krê pa es viveba. Envês di kondena-s pa kuza ki es staba ta xinti, Jeová djuda-s xinti vontadi di vive. El djuda-s ku amor pa es pode kontinuaba ta sirbi-l. w18.09 13 ¶4

Sérvus di Deus é konxedu pa algen ki gosta di resebe otus. Na Skrituras gregu palavra ki traduzidu pa ‘resebe otus’ ta siginifika ‘faze bondadi pa un algen ki bu ka konxe’. (Heb. 13:2; nóta di rodapé) Na Bíblia nu ta atxa txeu izénplu ki ta inxina-nu modi ki nu pode resebe dretu un algen. (Gén. 18:1-5) Tudu xansi ki nu atxa nu pode i nu debe djuda otus, ka ta nporta si es é nos ‘família na fé’ ô nau. (Gál. 6:10) Un otu manera ki nu pode trabadja ku Jeová é óras ki nu ta resebe otus irmon ki ta sirbi Jeová pa ténpu interu. (3 João 5, 8 ) Óras ki nu faze si, nu ta ‘nkoraja kunpanheru’. (Rom. 1:11, 12) Palavra di Deus ta nkoraja ómis na kongregason pa trabadja ku Jeová. Es ta faze kel-li óras ki es é ansions ô ajudantis di kongregason. (1 Tim. 3:1, 8, 9; 1 Ped. 5:2, 3) Kes irmon li krê djuda otus na kuza ki es meste i na ses amizadi ku Jeová. (Atos 6:1-4 ) I irmons ki ta djuda na faze kes trabadju li, es é txeu filís. w18.08 24-25 ¶6-7; 25 ¶10

Nbóra Timótiu tinha algun autoridadi sobri irmons di más idadi, el debe trataba es ku konpaxon i ruspetu. Má, imajina ma un irmon di idadi sta ta faze un kuza mariadu ô el sta poi otus algen ta faze kuzas ki Jeová ka gosta. Ka ta fazedu nada ku el sô pamodi dja el sta grandi? Repara kuzê ki Jeová fla na Isaías 65:20 : ‘Pekador ta ser maldisuadu, sikrê el ten 100 anu.’ Tanbê nu ta atxa kel mésmu ideia na vizon di Ezekiel. (Eze. 9:5-7) Jeová ka ta dexa pasa pekadu di un algen sô pamodi dja el sta di idadi. Nu ten ki lenbra ma kuza más inportanti é ruspeta Jeová ki é kel algen más bédju ki ten. (Dan. 7:9, 10, 13, 14) Si nu lenbra di kel-li, nu ka ta xinti medu di koriji un algen ki meste konsedju, ka ta nporta kantu anu el ten. — Gál. 6:1. w18.08 11 ¶13-14

Nos tudu nu meste prende modi ki nu ta sabe, si un informason é verdadi ô nau i uza kel informason pa txiga un konkluzon sértu. (Pro. 3:21-23; 8:4, 5) Si nu ka prende faze kel-li, ta fika más faxi pa Satanás ku se mundu ngana-nu. (Efé. 5:6; Col. 2:8) Nu meste sabe si un informason é verdadi, pa nu pode txiga un konkluzon sértu. Oji, informasons ta txiga na nos di tudu manera. Es ta ben através di internet, tilivizon i otus meiu di kumunikason. Tanbê, nu pode resebe e-mail, mensájen i notísias ki nos amigus i família ta manda-nu. Pur isu, é faxi spadja informasons falsu ô izajera na da informasons. Kel-li ta mostra ma nu meste toma kuidadu i djobe dretu si kel informason ki nu resebe é verdadi ô nau. w18.08 3 ¶1, 3

Kantu txiga ténpu pa Jizus ben pa Téra, Jeová skodje Maria, ki éra un jóven umildi i vírjen pa ser mai di se Fidju. Maria ta moraba na un sidadi pikinoti ki txomaba Nazaré. El ta fikaba lonji di Jiruzalen ki éra un sidadi inportanti ki tinha un ténplu bunitu. Maria mostra ma el éra un algen ki tinha amizadi ku Deus kantu el bai pâpia ku Elizabeti, ki éra se família. (Luc. 1:46-55) Jeová sta ta odjaba Maria, ma el éra un algen fiel i pur isu, el da-l responsabilidadi inportanti ki nunka el ka ta imajinaba. Kenha ki Jeová fla primeru ma Jizus dja nase? El ka dexa ninhun di kes governanti di Jiruzalen i di Belén sabe kuzê ki kontise. Má el manda anjus pa aviza kes pastor umildi ki staba ta kuida di ses ovelha na kanpu fóra di Belen. (Luc. 2:8-14) Kes pastor bai vizita kel mininu ki nase. (Luc. 2:15-17) Juzé ku Maria talvês fika kontenti di odja Jizus ta resebe ónra di un manera ki es ka sta speraba. w18.07 9-10 ¶11-12

Pamodi ki Jeová fika xatiadu ku Salumon? Bíblia ta fla: ‘Pamodi se korason disvia di Jeová, ki dja parseba pa el dôs bês i ki dja avizaba el sobri kel-li, ma el ka debe sigi otus deus. Má, Salumon ka obi ku órdi di Jeová.’ Pur isu, Salumon perde apoiu i benson di Jeová. I kes rei ki ben dipôs di Salumon, es fika ta governa sô un párti di Israel i es tevi ki lida ku txeu prubléma, un tras di kel otu. (1 Reis 11:9-13 ) Sima kontise ku Salumon, un di kes kuza ki ta poi nos amizadi ku Jeová na próva, é ser amigu di algen ki ka ta ntende ô ki ka ta ruspeta leis di Jeová. Alguns di es pode ser irmons na kongregason ki ka ten un amizadi fórti ku Jeová. Ô pode ser família, vizinhus, kolégas di trabadju ô di skóla ki ka ta adora Jeová. Si nu ten un amizadi fórti ku kes algen ki ka ta ruspeta leis di Jeová, poku-poku es pode distrui nos amizadi ku Jeová. w18.07 19 ¶9-10

Satanás tanbê ta uza filmis i prugramas di tilivizon pa el spadja se manera di pensa. El sabe ma stórias ki ta kontadu, é ka sô pa divirti-nu. Tanbê es ta inxina-nu modi ki nu ta pensa, xinti i aji. Jizus éra bon na konta stória pa inxina kuzas inportanti. Pur izénplu, stória di kel bon samaritanu i di kel fidju ki perde. (Mat. 13:34; Luc. 10:29-37; 15:11-32) Má kes algen ki sta influensiadu pa Satanás ta uza stórias pa tenta prujudika-nu. É klaru ki nen tudu filmis i prugramas di tilivizon é ka mariadu. Es pode divirti-nu i inxina-nu sen prujudika nos manera di pensa. Má nu meste toma kuidadu. Óras ki nu ta skodje diverson é bon nu pergunta nos kabésa: ‘Kel filmi li ô prugrama di tilivizon ta inxina-m ma é normal faze dizejus di karni?’ (Gál. 5:19-21; Efé. 2:1-3) Kuzê ki bu debe faze si bu da kónta ma un prugrama di tilivizon sta ta spadja manera di pensa di Satanás? Fika lonji di el, sima bu ta fujiba di un algen ki tene un duénsa ki ta pega! w19.01 15-16 ¶6-7

Sima kapaseti ta protejeba kabésa di un trópa, nos speransa di salvason ta proteje-nu nos menti ô kuzas ki nu ta pensa. (1 Tes. 5:8; Pro. 3:21) Satanás ta tenta tra-nu nos kapaseti. Modi ki el ta faze-l? Lenbra modi ki el tenta Jizus. Satanás sabia ma Jizus tinha speransa di governa Téra un dia. Má primeru Jizus tinha ki sufreba i moreba. Dipôs el tinha ki speraba Jeová faze-l Rei. Nton Satanás oferese Jizus xansi di konsigi kel-li más sédu. Satanás fla ma si Jizus adora-l sô un bês, el podia kumesaba ta governa mundu na kel óra. (Luc. 4:5-7) Di mésmu manera, Satanás sabe ma Jeová promete da-nu kuzas material na kel mundu novu. Má nu ten ki spéra pa kel-la kontise. I talvês timenti nu ka txiga la, nu ta pasa pa prublémas. Pur isu, Satanás ta da-nu xansi di ten un vida sábi désdi gósi. El krê pa nu poi kuzas material na primeru lugar i Reinu na sugundu lugar. — Mat. 6:31-33. w18.05 30-31 ¶15-17

Sin, Jeová krê pa bu korason fika kontenti. Mante konsentradu na bus méta spritual i poi Jeová na tudu bus planu. Kantu más sédu bu kumesa faze-l, más faxi bu ta xinti orientason, proteson i bensons di Jeová. Pensa na tudu konsedju ki bu ta atxa na Palavra di Deus i guarda na bu korason kes palavra li: ‘Nton lenbra, di bu Grandiozu Kriador na bu juventudi’. (Ecl. 12:1) Jóvens na kongregason merese ilojius pamodi es ka dizisti di sirbi Jeová sikrê ku prublémas. Jóvens ta faze kel-li óras ki es ten métas spritual i óras ki es ta poi trabadju di pregason na primeru lugar na ses vida. Tanbê, es ka ta dexa kuzas di es mundu distrai-s. Adulesentis pode ten sertéza ma tudu ses sforsu ten valor. Lenbra tanbê ma nhos pode konta ku ajuda di irmons i irmans ki ta ama nhos. I más inportanti, si nhos kúnfia na Jeová nhos ta ten susésu na vida. w18.04 29 ¶17, 19