Junhu

Imajina modi ki kel promésa li da apóstlus koraji! Nbóra na kel momentu es ka ntende dretu ma dja txigaba ténpu di Jizus móre, es ka ta fikaba sen ajuda. Jeová staba prontu pa responde ses orason i pa da-s ajuda ki es mesteba pa es pregaba mensaji di Reinu. Pur izénplu, dipôs ki Jizus móre, Jeová responde orason di apóstlus kantu es pidi-l ajuda pa es pode pregaba. (Atos 4:29, 31 ) Oji ta kontise mésmu kuza. Si nu kontinua ta prega, nu ta kontinua ta ser amigu di Jizus. Tanbê, nu pode ten sertéza ma Jeová sta prontu pa responde nos orason i pa djuda-nu lida ku kalker difikuldadi na nos trabadju di pregason di notísias sábi di Reinu. (Fil. 4:13) Nu ta agradise Jeová pa kes dôs ajuda ki nu ten: Sabe ma Jeová ta responde nos orason i ten amizadi ku Jizus! Kes ajuda li ta da-nu más forsa pa nu kontinua ta da frutu. — Tia. 1:17. w18.05 21 ¶17-18

Más ô ménus sinku anu dipôs, kristons judeu ki ta viveba na Jiruzalen odja kel ‘dia di Jeová’ ta txiga i es ntende sinal ki Jizus daba, pa es saíba di la. (Atos 2:19, 20; Luc. 21:20-22) Dia di Jeová ben txiga na anu 70 D.J., kantu trópas di Roma distrui Jiruzalen. Oji nu ten txeu motivu pa kridita ma kel ‘grandi dia di Jeová i ki ta da txeu medu’ sta kuazi ta txiga. (Joel 2:11 ) Proféta Sofonias fla: ‘Kel grandi dia di Jeová sta kuazi ta txiga! El sta pértu i el sta ta ben uma na forsa!’ (Sof. 1:14) Kel profesia li tanbê ta sirbi pa nos ténpu. Dja ki dia di Jeová sta kuazi ta txiga, Polu fla-nu pa ‘nu insentiva kunpanheru pa amor i pa bons óbra’. (Heb. 10:24, nóta di rodapé) Pur isu, nu debe omenta interesi pa nos irmons, pa nu pode nkoraja-s sénpri ki es meste. w18.04 20 ¶1-2

Jeová da Juzué grandi koraji antis di el leba Se povu pa kel Téra ki el prometeba es! Alén di Jeová nkoraja pesoas, tanbê el nkoraja se povu kómu grupu. Pur izénplu, Jeová faze un profesia pa nkorajaba kes judeu ki ta baba prézu pa Babilónia. El fla-s: ‘Ka bu xinti medu, pamodi N sta ku bo. Ka bu fika preokupadu dimás, pamodi mi é bu Deus. N ta da-u forsa, N ta djuda-u. N ta pega-u riju ku nha mô direita di justisa.’ (Isa. 41:10) Kes primeru kriston tinha kel mésmu sertéza i povu di Deus oji, tanbê ta xinti mésmu kuza. (2 Cor. 1:3, 4) Jizus tanbê resebe nkorajamentu di se Pai. Na se batismu, Jizus obi un vós di Séu ta fla: ‘Kel-li é nha fidju ki N ta ama txeu, ki ta da-m txeu alegria.’ (Mat. 3:17) Di sertéza kes palavra li da Jizus txeu forsa pa el faze se trabadju di pregason na Téra! w18.04 16 ¶3-5

Dipôs di lé kel órdi ki Deus da Adon, txeu algen ta fla ma Adon perde liberdadi di faze kuzê ki el kreba. Óras ki es ta fla si, es ka sta ta ntende diferénsa entri ser livri ku direitu di disidi kuzê ki é dretu i kuzê ki é mariadu. Adon ku Eva éra livri pa skodje si es ta obiba ku Deus ô nau. Má, sô Jeová ki ten direitu di disidi kuzê ki é dretu i mariadu. ‘Kel arvi di konhisimentu di kel ki é dretu i mariadu’, ki tinha na jardin di Éden ta lenbraba es di kel-li. (Gén. 2:9) Kantu Deus fla Adon ku Eva pa es ka kume frutu di kel arvi, el sta ta inxinaba es modi ki es podia uzaba ses liberdadi. Sima nu odja, Adon ku Eva disidi ka obi ku Jeová. Má disizon di Adon ku Eva da-s más liberdadi? Nau. Envês di es fika livri, es perde kel liberdadi di verdadi ki Deus daba es. w18.04 5-6 ¶9-12

Jeová ta faze mutu más di ki sô xinti péna di se sérvus ki sta sufri. El ta aji pa djuda-s. Pur izénplu, kantu israelitas éra skravu na Ijitu, Jeová ntende ses dór i sufrimentu i el aji pa liberta-s. Jeová fla Muizes: ‘N odja frónta di nha povu ki sta na Ijitu, i N obi se pididu di ajuda, i N sabe dretu kuzê ki es sta ta sufri. N ta dixi pa N liberta-s di mô di gentis di Ijitu’. (Êxo. 3:7, 8) Jeová liberta se povu pamodi el ta preokupaba ku se sentimentus. Txeu anu dipôs, israelitas atakadu pa ses inimigu kantu es staba na kel téra ki Deus prometeba es. Kuzê ki Jeová faze? El ‘ta xintiba péna di ses txoru, pamodi kes ki ta maltrataba es i kes ki ta trataba es ku maldadi.’ Más un bês, Jeová poi na lugar di se povu i el faze algun kuza pa djuda-s. El manda juízis pa salva israelitas di ses inimigu. — Juí. 2:16, 18. w19.03 15 ¶4-5

Kel primeru di kes 10 Mandamentu ta flaba ma israelitas tinha ki adoraba sô Jeová, kel sugundu ta proibiba es di adora imaji. (Êxo. 20:3-6) Kes 10 Mandamentu ka éra pa djudaba Jeová, éra pa djudaba se povu. Óras ki se povu ta kontinuaba lial pa el, es ta tinha bons rezultadu. Óras ki es ta adoraba kes deus di otus nason, es ta sufreba. Má tanbê Jeová ta abensuaba se povu óras ki es éra lial i es ta trataba kunpanheru ku justisa. (1 Reis 10:4-9 ) Jeová ka ten kulpa óras ki kes ki ta fla ma es ta sirbi-l, ka ta obi ku se leis i ta prujudika se povu. Má, Jeová ta ama-nu i el sabe óras ki nu ta sufri injustisa. El ta xinti nos dór mutu más di ki kel ki un mai ta xinti óras ki el ta odja se fidju ta sufri. Nbóra el pode ka aji lógu na kel momentu, má na ténpu sértu el ta julga kes pekador ki ka rapende pa manera ki es trata otus. w19.02 22-23 ¶13-15

Na kes simana antis di Komemorason, txeu bês nos runion ta pâpia di izénplu di Jizus i ta mostra se umildadi kantu el da se vida pa salva-nu. Kel-li ta djuda-nu ser umildi i tanbê faze vontadi di Jeová, mésmu óras ki é difísil. Nu ta pensa na koraji ki el mostra na kes dia antis di el móre. El sabia dretu ma se inimigus ta rabaxaba el, ta sotaba el i es ta mataba el. (Mat. 20:17-19) Má simé, el staba prontu pa nfrenta mórti. Kantu txiga óra di es prende-l, Jizus fla se apóstlus fiel ki staba djuntu ku el na Jetsémani: ‘Nhos labanta, nu sai di li. Nhos odja! Kel ki ta trai-m sta ta txiga.’ (Mat. 26:36, 46) Kantu un grupu di ómis armadu txiga pa prende-l, el da un pasu pa frenti i el fla ma el ki é Jizus. Pa el proteje se apóstlus, el fla kes trópa pa dexa-s bai. (João 18:3-8 ) Jizus mostra un grandi koraji! Oji, kristons skodjedu ku spritu santu i kes otu ovelha ta sforsa pa mostra koraji sima Jizus. w19.01 27-28 ¶7-8

Sima un pintor ta djunta txeu tipu di kor bunitu pa el faze un kuadru, nos tanbê nu meste djunta txeu kualidadi bunitu pa nu pode ser un algen mansu. Alguns di kes kualidadi li é umildadi, obidiénsa, brandura i koraji. É sô kes algen umildi ki ta seta faze vontadi di Deus. Un di kes vontadi di Deus é pa nu ser algen brandu. (Mat. 5:5; Gál. 5:23) Óras ki nu ta faze vontadi di Jeová, Satanás ta fika ku raiba di nos. Pur isu, sikrê nos é umildi i mansu, txeu algen ki ta faze párti di mundu di Satanás ta odia-nu. (João 15:18, 19 ) Pamodi kel-li, nu meste ten koraji pa nu luta kóntra Satanás. Algen orgulhozu é diferenti di algen mansu. El ka sabe kontrola se raiba i el ka ta krê obi ku Jeová. Satanás é kel tipu di algen li. Nu ka ten dúvida ma el ta ôdia kes algen mansu! Es ta mostra ma Satanás é rei di mau pamodi es ten bons kualidadi ki el ka ten. Más piór inda, es ta mostra ma Satanás é mintirozu. Pamodi? Pamodi ka ta nporta kuzê ki Satanás fla ô faze, el ka ta konsigi inpidi kes algen mansu di sirbi Jeová! — Jó 2:3-5. w19.02 8-9 ¶3-5

Jeová sabia ma kenha ki ta moraba na Babilónia ta ben xintiba medu. Pamodi el ta ben uzaba trópas di Média ku Pérsia pa atakaba Babilónia i pa libertaba se povu. (Isa. 41:2-4) Kantu kes algen di Babilónia i di kes otu nason odjaba ses inimigu ta txiga, es ta tentaba nkoraja kunpanheru. Es ta fla: ‘Ser fórti.’ Tanbê es ta fazeba más deus falsu, ku speransa ma es ta protejeba es. (Isa. 41:5-7) Má, Jeová kalma korason di kes judeu ki staba prézu. Pa mostra diferénsa entri Israel ku kes otu nason, Jeová fla: ‘Abo, ó Israel, é nha sérvu. Ka bu fika preokupadu dimás, pamodi mi é bu Deus.’ (Isa. 41:8-10) Repara ma Jeová fla: ‘Mi é bu Deus.’ Jeová promete kes judeu fiel ma el ka skese di es, i ma inda es éra se povu. El fla-s: ‘N ta ben karega nhos, i N ta salva nhos.’ Di sertéza, kes palavra li konsola kes judeu ki staba prézu i da-s koraji. — Isa. 46:3, 4 w19.01 4 ¶8

Marcos 1:9-11 ta mostra kel primeru di kes três bês ki Jeová pâpia la di Séu. Jeová fla: ‘Abo é nha Fidju, kel ki N ta ama txeu, i ki ta da-m txeu alegria.’ Di sertéza, Jizus fika txeu kontenti di obi vós di se Pai ta fla-l ma el ta ama-l i ma el ta kúnfia na el. Kes palavra di Jeová konfirma três verdadi inportanti sobri Jizus. Primeru, el é se Fidju. Sugundu, Jeová ta ama se Fidju. I tirseru, Jeová fika kontenti ku se Fidju. El fla: ‘Abo é nha Fidju’. El éra Fidju spritual di Deus. Má, kantu el batiza, el bira Fidju di Deus di un otu manera. El skodjedu ku spritu santu i el dadu xansi di volta otu bês pa Séu, pa bira kel Rei i Saserdóti Prinsipal skodjedu pa Deus. (Luc. 1:31-33; Heb. 1:8, 9; 2:17) Nton, kantu Jizus batiza, se Pai tinha razon pa fla: ‘Abo é nha Fidju’. — Luc. 3:22. w19.03 8 ¶3-4

Maus konsedju dja dura ki ta izisti. Satanás é kel primeru ki da umanus mau konsedju. El fla Eva, ma el ku Adon, es ta sérba filís si es disidiba pa es mê modi ki es ta viveba. (Gén. 3:1-6) Satanás ta pensaba sô na se kabésa. El kreba pa Adon ku Eva i ses fidju obi i adoraba el envês di adora Jeová. Má, tudu kuza ki es tinha éra Jeová ki daba es. El da Adon un mudjer i el da Eva un maridu i es tinha kapasidadi di amaba kunpanheru. Tanbê, el da-s un jardin bunitu ki es ta viveba na el i un korpu perfetu ki es ta podia viveba pa tudu ténpu. Má é tristi sabe, ma Adon ku Eva ka obi ku Deus i es korta ses relason ku Jeová. Dja nu sabe kuzê ki kontise. Es fika bédju i es móre, sima un flor ki rinkadu di un planta. Tanbê ses fidjus sufri pamodi pekadu. (Rom. 5:12) Oji inda, kuazi tudu algen ta disidi ka obi ku Deus i es krê vive di ses manera. (Efé. 2:1-3) Rezultadus ta mostra klaru ma testu di oji é verdadi. w18.12 20 ¶3-4

Apóstlu Polu tanbê éra un ómi intilijenti i el tinha txeu skóla. El ta papiaba peloménus dôs língua, ebraiku ku gregu. (Atos 5:34; 21:37, 39; 22:2, 3 ) Má óras ki el tinha ki disidiba kuzê ki éra dretu ô mariadu, el ka ta sigiba sabedoria di mundu. El ta uzaba Palavra di Deus pa el tomaba disizon. (Atos 17:2; 1 Cor. 2:6, 7) Pur isu, el tevi bons rezultadu na se pregason i el tinha speransa di ganha un rekonpénsa ki ta dura pa tudu ténpu. (2 Tim. 4:8) Nu pode odja klaru ma manera ki Jeová ta pensa é mutu más midjór ki manera ki mundu ta pensa. Si nu sigi konsedjus di Deus, nu ta ser filís di verdadi i nu ta ten bons rezultadu. Má, Jeová ka ta obriga ningen pa pensa sima el. Tanbê nen ‘skravu fiel i prudenti’ i nen ansions ka ta obriga-nu pensa sima es. (Mat. 24:45; 2 Cor. 1:24) Kada un di nos ten responsabilidadi di prende pensa sima Jeová. w18.11 20-21 ¶12-13

Através di proféta Izaías, Deus dja flaba ma israelitas ta voltaba pa ses téra i es ka meste preokupaba ku ninhun prigu. Es ka mesteba xinti medu di animal brabu i nen di pesoas ki pode atakaba es. Jóvens ku algen di idadi ta xintiba suguru. (Isa. 11:6-9; 35:5-10; 51:3) Proféta Izaías dja flaba ma nason di Israel, i tanbê Téra interu ‘ta fikaba xeiu di konhisimentu di Jeová sima agu ta kubri mar.’ Izaías tanbê torna fla ma israelitas ki voltaba di Babilónia ka ta sérba atakadu nen pa ómis nen pa animal. Ses téra ta daba txeu kumida pamodi es ta tinha txeu agu sima tinha na jardin di Éden. (Gén. 2:10-14; Jer. 31:12) Má, kel profesia li kunpri sô na kel ténpu? Kel profesia li ta flaba ma algen ségu, surdu i manku ta sérba kuradu. Má, ka ten nada ki ta mostra ma kes kuza li kontise kantu israelitas volta di Babilónia. Pur isu, Deus staba ta mostra ma kes kuza li ta ben kontiseba na futuru. w18.12 5 ¶11-12

Anda na verdadi é un manera di vive. É ka un kuza ki nu ta faze sô un bês na vida. É un kuza ki nu krê kontinua ta faze pa tudu ténpu. Kuzê ki pode djuda-nu ka dizisti di anda na verdadi? Nu meste kontinua ta studa Bíblia i pensa na kuzê ki nu prende. Nu meste organiza nos ténpu pa nu faze kel-li sénpri. Kada bês ki nu studa nos amor pa verdadi ta fika más fórti i nunka nu ka ta pensa na bende-l ô dizisti di el. Tanbê Provérbios 23:23 ta fla pa nu kunpra ‘sabedoria, disiplina i ntendimentu.’ Sô konhisimentu ka ta txiga, nu meste faze sima nu prende. Ntendimentu ta djuda-nu konpara kel ki dja nu sabe ku kel ki nu prende, asi nu ta odja ma tudu kel ki Jeová ta fla sta tudu ligadu. Sabedoria ta insentiva-nu faze kel ki nu sabe. I sima ténpu ta ba ta pasa, verdadi ta disiplina-nu ô el ta mostra-nu ki mudansas nu meste faze. Nu debe seta lógu kes disiplina, pamodi Bíblia ta fla ma es bale más di ki prata. — Pro. 8:10. w18.11 9 ¶3; 11 ¶13-14

Kal ki é kuza más inportanti na bu vida? Bu ta trokaba el ku kalker otu kuza ki bale más poku? Pa povu di Jeová, respósta é sinplis. Kuza más inportanti ki nu ten é nos amizadi ku Jeová i nu ka ta troka-l ku nada. Tanbê nu ta da txeu valor pa kes verdadi di Bíblia, pamodi es djuda-nu ser amigu di Jeová. (Col. 1:9, 10) Jeová é nos Grandiozu Instrutor, é el ki ta inxina-nu kes verdadi inportanti ki sta na se Palavra! El inxina-nu kuzê ki se nómi siginifika i sobri se kualidadis bunitu. El fla-nu ma el ta ama-nu txeu dimás, pur isu el da se Fidju pa móre pa nos. Tanbê, el inxina-nu sobri se Reinu i el da-nu un speransa pa futuru di ben vive na Paraízu li na Téra. Tanbê el ta inxina-nu modi ki nu pode vive. Nu ta da valor pa kes verdadi li, pamodi es ta djuda-nu ser amigu di nos Kriador i ten un vida filís. w18.11 3 ¶1-2

Kes algen pode ngana-nu, má es ka ta ngana Jeová. Bíblia ta fla ‘tudu kuza sta nu i klaru dianti’ di el. (Heb. 4:13) Na Bíblia nu ta atxa un izénplu di un kazal na ténpu di apóstlus. ‘Satanás poi’ Ananias ku Safira ta konta Deus mintira. Es faze planu pa es ngana kes apóstlu. Es kreba pa otus na kongregason atxaba ma es éra algen ki gostaba di da. Pur isu es fla ma es da tudu dinheru. Má Jeová sabia ma es staba ta konta mintira i el kastiga-s pa kuza ki es faze. (Atos 5:1-10 ) Kuzê ki Jeová ta atxa di mintira? Tudu kes algen ki ta konta mintira ku maldadi sima Satanás i ki ka rapende, ta ben ‘botadu na lumi’. Kel-li krê fla ma es ta ben distruídu pa tudu ténpu. (Apo. 20:10; 21:8; Sal. 5:6) Nu sabe ma Jeová ‘é ka ómi pa konta mintira’ i ‘é ka posível pa Deus konta mintira’. (Núm. 23:19; Heb. 6:18) ‘Jeová ta ôdia língua ki ta konta mintira’. (Pro. 6:16, 17) Si nu krê pa el ser nos amigu, nu ten ki pâpia verdadi. w18.10 8 ¶10-13

Kuzê ki bu ta fazeba si bu xéfi pidi-u pa bu faze un kontribuison pa un komemorason ki sta ligadu ku relijion falsu? Envês di spéra ti ki kontise un situason sima kel-li éra bon nu pensa désdi gósi, kuzê ki Jeová ta pensa di kel asuntu li. Asi, óras ki nu pasa pa un situason sima kel-li é más faxi nu fla i nu faze kuza dretu. Tanbê óras ki nu ntende modi ki Jeová ta pensa, nu ta kontinua lial óras ki nu ten ki faze un tratamentu urjenti. É klaru ki nu ka ta toma sangi i nen kes kuatu párti prinsipal di sangi. (Atos 15:28, 29 ) Má ten alguns fórma di tratamentu ki ta nvolve uza sangi, ki kada kriston ten ki toma se própi disizon ku bazi na prinsípius di Bíblia. Má, é ki óra ki nu debe disidi kuzê ki nu ta faze? É óras ki nu sta na ospital, talvês ku dór i ku preson di otus algen pa nu toma un disizon kel óra? É klaru ki nau. Gósi é ténpu pa nu faze piskiza, prenxe nos dukumentu sobri sangi ki ta splika klaru kuzê ki nu krê. Tanbê nu debe pâpia ku nos dotor. w18.11 24 ¶5; 26 ¶15-16

Jeová é sima un pastor ki ta brasa se povu ku amor pa proteje-s di ses inimigu. Sabe kel-li ta konsola-nu txeu, inda más gósi ki nu sta ta vive pértu di fin. Jeová ta kontinua ta kuida di se povu duránti grandi tribulason ki sta kuazi ta kontise. (Apo. 7:9, 10) Ka ta nporta si nos é jóven ô algen grandi, si nu ten bon saúdi ô si nos é difisienti. Povu di Jeová ka ta dexa medu toma kónta di es duránti grandi tribulason. Má, es ta faze otu kuza. Es ta lenbra di kuzê ki Jizus fla: “Nhos sakédu na kanéla i nhos labanta kabésa pa riba, pamodi Deus ka ta dura ku ben salva nhos.” (Lúkas 21:28, BPK ) Mésmu óras ki Gogi ô kel grupu poderozu di nasons, ben ataka povu di Deus, es ta kontinua ta kúnfia na Jeová. (Eze. 38:2, 14-16) Pamodi? Pamodi es sabe ma Jeová ka muda. Sénpri el ta mostra ma el é un Salvador ki ten puder i ma el ta preokupa ku se povu. — Isa. 26:20. w18.09 26 ¶15-16

Imajina modi ki israelitas xinti ku kes palavra li di Jeová. Bu pode ten sertéza ma Jeová tanbê ta ama kada un di nos. Bíblia ta promete: ‘Sima un ómi di géra balenti, el ta salva. Pamodi bo, el ta grita ku grandi alegria.’ (Sof. 3:16, 17) Ka ta nporta kal ki é prubléma ki nu sta ta pasa, Jeová promete ma el ta da-nu forsa i ma el ta konsola-nu. El mostra kuzê ki el ta xinti pa nos kantu el fla: ‘Nhos ta ben karegadu na brasus, i nhos ta ninadu na ragás. Sima un mai ta konsola se fidju, N ta kontinua ta konsola nhos.’ (Isa. 66:12, 13) Pensa modi ki un mininu ta xinti óras ki se mai ta karega-l ô ta nina-l na ragás! Kel izénplu li ta mostra ma Jeová ta ama-nu txeu i el krê pa nu xinti protejedu. Bu pode ten sertéza ma Jeová ta ama-u i el ta da-u txeu valor. — Jer. 31:3. w18.09 13 ¶6-7

Na ténpu antigu, israelitas tinha txeu xansi di oferese pa trabadja. (Êxo. 36:2; Nee. 11:2) Oji tanbê, nu ten txeu xansi di uza nos ténpu, kuzas ki nu ten i nos kapasidadi pa djuda nos irmons. Óras ki nu faze si, nu ta ser filís i nu ta ten txeu benson. Kes ki ta oferese di korason pa trabadja na konstruson, txeu bês es ta faze monti amigu. Odja izénplu di un irman ki txoma Margie, un irman ki trabadja 18 anu na faze Salons di Reinu. Duránti tudu kes ténpu, el gostaba di trena irmans más jóven. El fla ma kes trabadju la da-l xansi di es nkoraja kunpanheru. (Rom. 1:12) Margie pasa pa alguns momentu difísil na se vida, má é kes amigu ki el faze kantu el ta trabadjaba na konstruson, ki djuda-l. Dja bu kustuma oferese pa trabadja na algun konstruson? Bu pode oferese, sikrê bu ta atxa ma bu ka sabe faze kel trabadju. w18.08 25 ¶9; 26 ¶11

Kantu Polu skrebe kes palavra li, Timótiu talvês tinha uns 30 anu. Má simé, Polu skodje-l pa kuida di txeu responsabilidadi. Kuzê ki nu ta prende? Nu ka debe julga un irmon jóven sô pamodi se idadi. Ka bu skese ma Jizus finda tudu se trabadju na Téra kantu el tinha sô 33 anu. Na alguns kultura pesoas ka ta ruspeta kes algen ki é más jóven. Pur isu, ansions na kongregason ka ta skodje un irmon jóven pa ser ajudanti di kongregason ô ansion, sikrê el ten tudu kes kualidadi ki Bíblia ta fla. Má, ansions debe lenbra ma, Bíblia ka ta fla ku ki idadi un algen debe ser ajudanti di kongregason ô ansion. — 1 Tim. 3:1-10, 12, 13; Tito 1:5-9. w18.08 11-12 ¶15-16

Pa nu toma bon disizon, nu meste ten sertéza ma informasons ki nu ten é verdadi. Pur isu, nu debe toma txeu kuidadu ku informasons ki nu ta lé. (Fil. 4:8, 9) Nu ka debe perde ténpu ta odja informasons na internet ô lé e-mail ô mensájen ki nu ten dúvida si é verdadi. É inportanti nu toma kuidadu, pa nu ka entra na kes site di kes algen ki éra Tistimunhas di Jeová i ki bira ta pâpia mal di nos. Es krê kaba ku povu di Deus i pô-nu ku dúvida sobri verdadi. Kes informason ki é ka verdadi, pode pô-nu ta toma mau disizon. Nunka ka bu pensa ma informasons falsu ka ta prujudika-u. Odja kuzê ki kontise kantu Muizes manda 12 ómi pa bai djobe téra ki Deus prometeba es, 10 di kes ómi traze mau notísia. (Núm. 13:25-33) Es traze notísia izajeradu sobri kel téra, pur isu povu fika ku medu i dizanimadu. (Núm. 14:1-4, 6-10) Envês di es tenta sabe si éra verdadi ô nau i kúnfia na Jeová, es prifiri kridita na kel notísia falsu. w18.08 4 ¶4-5

Kuazi tudu algen ten algun kualidadi bon na el. I kes ki ka ta adora Jeová, é ka tudu óra ki es ta faze kuzas mariadu. Talvês bu konxe alguns algen ki é si. Má kel-li krê fla ma es é bons koléga? Pergunta bu kabésa: ‘Es ta djuda-m kontinua amigu di Jeová? Kuzê ki é más inportanti pa es? Di kuzê ki es ta pâpia? Ses konbérsu é sobri móda, dinheru, konputador, telemóvel, tablet i otus kuza? Es é algen ki gosta di kritika otus? Es ta konta piadas mariadu?’ Jizus aviza: ‘Bóka ta pâpia di kel ki korason sta xeiu.’ (Mat. 12:34) Si bu da kónta ma bus amigu sta ta straga bu amizadi ku Jeová, toma medida! Poi limiti na ténpu ki bu ta pasa ku es i si meste, kaba ku amizadi. — Pro. 13:20. w18.07 19 ¶11

Kantu Muizes tinha 80 anu, Jeová dizigina-l pa el liberta israelitas di Ijitu. (Êxo. 3:10) Txeu bês, Muizes tenta ranja diskulpa. Má Jeová kontinua ku paxénxa i ti el da Muizes puder pa faze milagris. (Êxo. 4:2-9, 21) El podia uzaba se puder pa poba Muizes medu i pa konvenseba el pa faze kel ki el manda-l. Má Jeová mostra paxénxa i el trata-l ku amor. Muizes éra umildi i Jeová promete ma sénpri el ta djudaba el. Má kel preokupason ki Jeová mostra pa Muizes da algun rezultadu? Klaru ki sin! Muizes bira un grandi líder. El sforsa pa mostra kel mésmu preokupason i bondadi pa otus algen, sima Jeová mostra-l. Si bu ten algun autoridadi, é txeu inportanti bu imita Jeová i bu mostra bondadi i paxénxa pa kes algen ki bu ta kuida di es. Mostra ma bu ta preokupa ku es. (Col. 3:19-21; 1 Ped. 5:1-3) Óras ki bu ta sforsa pa bu imita Jeová i Jizus, é más faxi un algen ben i pâpia ku bo. Asi bu ta konsigi nkoraja-s. — Mat. 11:28, 29. w18.09 24-25 ¶7-10

Bu ta nkoraja irmons i trata-s ku amor pa djuda kongregason kontinua unidu? Si bu sta faze si, bu merese ilojiu! Bu ta kontinua ta sforsa pa bu faze amizadi i mostra amor pa tudu algen na kongregason? (2 Cor. 6:11-13, nóta di rodapé) Nos tanbê nu pode dexa nos lus límia pa nos vizinhus. Si nu trata-s ku amor i nu djuda-s na kuza ki es meste, kel-li pode pô-s ku gana di prende sobri Jeová. Pergunta bu kabésa: ‘Kuzê ki nhas vizinhu ta pensa di mi? N ta oferese djuda-s óras ki es meste? Nha kaza ta sta linpu i ben rumadu? Kuzê ki nhas vizinhu ta atxa di nha kaza?’ Sénpri ki da, pergunta otus irmon modi ki ses bon izénplu i ses amor djuda ses família, ses vizinhu, kolégas di trabadju ô di skóla. Bu pode ten sertéza ma es ten txeu kuza sábi pa es konta-u. — Efé. 5:9. w18.06 24 ¶13-14

Kel avizu li éra verdadi pamodi é kel-li ki kontise ku kes algen ki mata disiplu Estevão i ku otus algen ki ta pensaba sima es. (Atos 6:8, 12; 7:54-60 ) É difísil kridita ma duránti monti ténpu kes xéfi di relijion ki ta flaba ma es ta adoraba Deus, faze kuzas gravi ki Deus ta ôdia, sima mata algen! (Êxo. 20:13) Nu pode odja klaru ma konsénsia di kes algen, ka gia-s na kaminhu sértu! Palavra di Deus, ten txeu lei i prinsípius inportanti ki ‘ta sirbi pa inxina, pa koriji, pa poi kuzas na kaminhu, pa disiplina ku justisa’. (2 Tim. 3:16) Si nu krê pa nos konsénsia djuda-nu faze kuzas dretu, nu ten ki studa Bíblia, pensa na kuzê ki nu lé i faze sima nu prende. Si nu faze kes kuza li, nu ta ntende modi ki Jeová ta pensa i nos konsénsia pode gia-nu na un bon kaminhu. w18.06 16-17 ¶3-4

Na ténpu di apóstlu Polu, trópas di Roma ta uzaba un spada ki tinha uns 50 cm, ki éra fetu pa un géra frenti-frenti. Kes trópa ta trenaba ku spada tudu dia, pur isu es éra bon. Polu konpara Palavra di Deus ku un spada. Má nu meste prende uza-l pa nu difende nos krénsa ô midjora nos manera di pensa. (2 Cor. 10:4, 5; 2 Tim. 2:15) Nu ka meste ten medu di Satanás ku se dimónis. Nu sabe ma es ten puder, má ka más ki Jeová i nen es ka ta ben vive pa tudu ténpu. Óras ki Kristu ben governa pa mil anu, es ta podu prézu pa es ka prujudika ningen. Lógu dipôs es ta distruídu. (Apo. 20:1-3, 7-10) Nu konxe nos inimigu, ses manha i ses intenson. Ku ajuda di Jeová nu pode mante firmi kóntra Diabu! w18.05 30 ¶15; 31 ¶19-21

Adon sabia ma kóbra ka ta pâpia. Talvês el da kónta ma éra un anju ki uza un kóbra pa pâpia ku Eva. (Gén. 3:1-6) Adon ku Eva ka sabia kenha ki éra kel anju. Má simé, Adon disidi fika kóntra Jeová i toma ladu di un algen ki nen el ka konxeba. (1 Tim. 2:14) Lógu na kel momentu Jeová kumesa ta da alguns informason sobri kel inimigu ki ngana Adon ku Eva i el promete ma kel inimigu ta sérba distruídu. Má tanbê, Jeová aviza ma antis di kel-li kontise, kel anju ki uza un kóbra pa ngana Adon ku Eva ta ben sérba inimigu di kes algen ki ta ama Deus. (Gén. 3:15) Jeová é un Deus ki sabe kuzê ki é midjór pa nos. Pur isu el atxa ma nu ka meste sabe nómi di kel anju ki rabéla kóntra el. Sô uns 2.500 anu dipôs ki es rabela kóntra el na jardin di Éden ki Jeová ben uza un titlu pa pâpia di kel inimigu. — Jó 1:6. w18.05 22 ¶1-2

Si dja bu kustuma xinti dizanimadu na tiritóriu ki pesoas ta mostra poku interesi, nton bu xinti mésmu kuza ki apóstlu Polu. El pasa uns 30 anu na se trabadju di pregason i el djuda monti di algen bira disiplu di Kristu. (Atos 14:21; 2 Cor. 3:2, 3) Má simé, el ka konsigi djuda txeu judeu. Maioria di es nen ka krê obiba ku el i alguns ti maltrata-l. (Atos 14:19; 17:1, 4, 5, 13 ) Modi ki Polu xinti? El fla: ‘N sta fla verdadi na Kristu ma N sta txeu tristi i ku un dór ki ka ta kaba na korason.’ (Rom. 9:1-3) Pamodi ki Polu xinti si? Pamodi se korason staba na trabadju di pregason. El ta preokupaba ku kes judeu, pur isu el ta pregaba pa es. Má óras ki el ta odjaba ma es ka sta daba valor pa mizerikórdia di Deus, Polu ta xintiba dizanimadu. Sima Polu, nu ta prega pamodi nu ta preokupa ku otus algen. — Mat. 22:39; 1 Cor. 11:1. w18.05 13 ¶4-5

Polu mostra ma sikrê un algen ki ten responsabilidadi di da nkorajamentu, tanbê ta meste resebe nkorajamentu. Polu skrebe pa kes kriston ki ta viveba na Roma: ‘N tene gana di odja nhos, pa N da nhos algun don spritual pa nhos pode fika firmi, ô midjór, pa nu nkoraja kunpanheru através di nos fé, tantu di nhos ku di meu.’ (Rom. 1:11, 12) Polu ki ta mandaba pa nkoraja otus algen, tanbê el ta mesteba di nkorajamentu. (Rom. 15:30-32) Oji kes algen ki ta faze txeu na sirvisu pa Jeová meste ilojiu. Irmons ku irmans ki ta kontinua solteru pamodi es krê sigi konsedju di kaza ‘sô na Sinhor’, tanbê meste pa nu nkoraja-s. (1 Cor. 7:39) Tanbê, kristons ki ta kontinua fiel mésmu ku pirsigison ô duénsa, meste obi un palavra di nkorajamentu. — 2 Tes. 1:3-5. w18.04 21 ¶3-5