Abril

Aristarku ki éra un kriston di Tesalónika ki staba na Masedónia, mostra ma el éra un amigu lial di apóstlu Polu. Primeru bês ki Bíblia ta pâpia di Aristarku, é kantu Polu vizita Éfezu na se tirseru viaji misionáriu. Timenti el staba ta kunpanha Polu, un grupu violéntu pega Aristarku. (Atos 19:29 ) Kantu es larga-l, el ka djobe sô pa se kabésa, má el mostra ma el éra lial i el fika ku Polu. Alguns mês dipôs, na Grésia, Aristarku inda staba na ladu di Polu, mésmu kantu inimigus kontinua ta tenta mata Polu. (Atos 20:2-4 ) Pa vólta di anu 58 D.J., kantu Polu mandadu prézu pa Roma, Aristarku kunpanha-l na un viaji ki ta duraba txeu ténpu. Tanbê, es aguenta djuntu kantu barku inkadja na kaminhu. (Atos 27:1, 2, 41 ) Ta parse ma kantu es txiga Roma, el pasa algun ténpu na prizon djuntu ku Polu. (Col. 4:10) Nu ka ta fika dimiradu di sabe ma Polu xinti nkorajadu i konsoladu ku un amigu lial sima kel-li! Sima Aristarku, nu pode ser un amigu lial pa nos irmons i irmans óras ki nu ta fika djuntu ku es, ka sô na ténpu sábi má tanbê na ‘ténpu di frónta’. w20.01 9 ¶4-5

Un algen ki skodjedu ku spritu santu talvês pode xinti ma el ka merese es priviléjiu grandi. Má, el ka ten ninhun dúvida ma Jeová skodje-l. Envês di kel-li, el ta xinti kontenti dimás i xeiu di gratidon óras ki el ta pensa na se speransa di ba vive na Séu. (1 Ped. 1:3, 4) Má, kel-li krê fla ma kes kriston skodjedu ku spritu santu krê móre? Apóstlu Polu ta responde kel pergunta li. El konpara ses korpu ku un ténda i el fla: ‘Na verdadi, anos ki sta na es ténda, nu ta jeme frontadu, pamodi nu ka krê duspi di el, má nu krê bisti di kel otu, asi pa vida inguli kel ki ta móre.’ (2 Cor. 5:4) Kes kriston ka perde interesi na vida li na Téra, i nen es ka tene gana móre. Envês di kel-li, es gosta di vive i es krê uza kada dia pa sirbi Jeová djuntu ku ses famílias i amigus. Má, ka ta nporta kuzê ki es sta ta faze, kes kriston sénpri ta lenbra di ses grandi speransa pa futuru. — 1 Cor. 15:53; 2 Ped. 1:4; 1 João 3:2, 3; w20.01 23 ¶12-13

Pa nos Pai pode trena-nu, el ta disiplina-nu óras ki nu meste. El ta faze-l di txeu manera. Pur izénplu, nu pode lé na Bíblia ô obi algun kuza na runion ki ta mostra ma nu meste muda nos manera di pensa ô di aji. Ô talvês el ta uza ansions pa djuda-nu. Ka ta nporta modi ki Jeová ta disiplina-nu, sénpri el ta faze kel-li pamodi el ta ama-nu. (Jer. 30:11) Jeová ta djuda-nu óras ki nu sta pasa pa prublémas. Sima un pai ki ten amor ta djuda se fidjus na situasons difísil, nos Pai na Séu tanbê ta djuda-nu aguenta prublémas. El ta uza se spritu santu pa djuda-nu proteje nos amizadi ku el. (Luc. 11:13) Jeová tanbê ta djuda-nu óras ki nu sta dizanimadu. Pur izénplu, el ta da-nu un speransa rei di sábi. Kel speransa pa futuru ta djuda-nu aguenta prublémas. Pensa na kel-li: Ka ta nporta ki disgrasa kontise ku nos, nos Pai ki ta ama-nu ta ben kaba ku tudu nos sufrimentu. Nos prublémas ka ta dura pa tudu ténpu, má bensons ki Jeová ta da-nu ta dura pa tudu ténpu. — 2 Cor. 4:16-18. w20.02 5 ¶14-15

Nu pode ganha géra kóntra invéja! Pensa na izénplu di irmons di Juzé. Dipôs di txeu anu ki es maltrata Juzé, es nkontra ku el na Ijitu. Antis di Juzé fla-s ken ki el éra, el sprimenta-s pa el odja si dja es mudaba. El konvida-s pa es bai kume ku el, i el da kumida más txeu pa Benjamin, ki éra ses irmon más pikinoti. (Gén. 43:33, 34) Má ka ten nada ki ta mostra ma se irmons fika ku invéja di Benjamin. Envês di kel-li, es mostra ma es ta preokupaba di korason ku ses irmon i ku ses pai, Jakó. (Gén. 44:30-34) Dja ki irmons di Juzé para di ser invejozu, es konsigi torna poi pas na ses família. (Gén. 45:4, 15) Di mésmu manera, si nu rinka kalker sentimentu di invéja na nos korason, nu ta mante pas na nos família i na nos kongregason. Jeová krê pa nu luta kónta invéja i pa nu npenha pa pas. Si nu ser umildi, nu prende sta kontenti ku kel ki nu ten i nu da valor pa kuzas ki otus algen ta faze, invéja ka ta atxa lugar pa kria déntu nos. w20.02 19 ¶17-18

Un manera di mostra bu gratidon pa amor di Jeová é óras ki bu ta pâpia ku el na orason. Bu amor pa Deus ta bira más fórti, óras ki bu ta konta-l bus preokupason i agradese-l pa tudu kuza ki el ta faze pa bo. I nhos amizadi ta fika más fórti inda, sima bu ta ba ta odja modi ki el ta responde bus orason. Bu ta ten sertéza ma el ta ntende-u. Má, pa bu ser más amigu di Jeová, bu meste ntende se manera di pensa. I bu meste sabe kuzê ki el krê pa bu faze. Úniku manera pa bu ten kel konhisimentu li é óras ki bu ta studa Bíblia, ki é se Palavra. Prende da-l valor. É sô Bíblia ki ta konta verdadi sobri Jeová i kuzê ki el krê faze pa bo. Pur isu, lé Bíblia tudu dia, pripara pa bu studu di Bíblia ku bu instrutor i faze tudu kel ki bu prende. Asi, bu ta mostra ma bu ta da valor pa Bíblia. (Sal. 119:97, 99; João 17:17 ) Bu ten un prugrama di leitura di Bíblia? Bu ta konsigi sigi kel prugrama tudu dia? w20.03 5 ¶8-9

Si bu ka ta konsigi anda txeu, talvês bu pode xinta na algun lugar i prega pa kes algen ki sta pasa. Ô nton bu pode da tistimunhu informal, skrebe karta ô da tistimunhu pa tilifóni. Txeu publikador ku prublémas di saúdi ô otus prubléma, ta xinti txeu alegria óras ki es ta prega di maneras diferenti. Mésmu ku prublémas di saúdi, bu pode faze bu trabadju di pregason di manera konplétu. Polu fla: ‘Pa tudu kuza N ten forsa pamodi kel ki ta da-m puder.’ (Fil. 4:13) Polu mesteba di kel puder kantu el fika duenti duránti un di ses viaji misionáriu. El splika kes irmon na Galásia: ‘É pamodi un duénsa ki N tevi kel primeru xansi di pâpia ku nhos sobri notísias sábi.’ (Gál. 4:13) Di mésmu manera, prubléma di saúdi ki bu tene ta da-u oportunidadi di prega pa dotoris, infermerus ô otus algen ki ta trabadja ligadu ku saúdi. Txeu di kes algen la, ta sta na trabadju óras ki nos irmon ta ba prega na ses kaza. w19.04 4-5 ¶10-11

Na anu di 2018, más di 223 mil publikador ta moraba na paízis undi nos óbra staba proibidu ô na paízis undi nos óbra tinha poku liberdadi. Kel-li ka ta spanta-nu. Kristons verdaderu sabe ma es ta ser pirsigidu. Ka ta nporta undi ki nu ta mora, govérnus pode di un óra pa kel otu, i sen nu spéra, proibi-nu di adora Jeová, nos Deus ki ta ama-nu txeu. Si un govérnu proíbi nos óbra, talvês nu pode pensa ma Deus ka sta abensua-nu más. Má nu ka debe skese ma pirsigison ka krê fla ma Jeová ka sta kontenti ku nos. Odja izénplu di apóstlu Polu. Di sertéza Deus staba kontenti ku el. Polu tevi priviléjiu di skrebe 14 karta ki ta faze párti di Skrituras Gregu, i el éra apóstlu pa nasons. Má simé, el sufri txeu pirsigison. (2 Cor. 11:23-27) Izénplu di apóstlu Polu ta inxina-nu ma Jeová pode dexa se sérvus fiel pasa pa pirsigison. w19.07 8 ¶1, 3

Un di kes midjór manera ki Jeová ta mostra ma el ta preokupa ku se sérvus é óras ki el ta djuda-nu mante firmi kóntra nos inimigus. Nos inimigus prinsipal é Satanás ku se dimónis. Jeová ta aviza-nu sobri kes inimigu i el ta da-nu kuzê ki nu meste pa nu ka kai na ses armadilha. (Efé. 6:10-13) Óras ki nu ta seta ajuda di Jeová i nu ta kunfia na el di tudu korason, nu ta konsigi mante firmi kóntra Diabu. Nu meste ten kel mésmu kunfiansa di apóstlu Polu. El skrebe: ‘Si Deus é pa nos, ken ki ta ser kóntra nos?’ (Rom. 8:31) Anos ki é kristons verdaderu, nu ka ta konsentra dimás na Satanás ku dimónis. Nu ta konsentra nos atenson na prende sobri Jeová i faze se vontadi. (Sal. 25:5) Má, nu meste konxe kes armadilha di Satanás. Pamodi? Asi, el ka ta konsigi ngana-nu. — 2 Cor. 2:11; nóta di rodapé. w19.04 20 ¶1-2

Óras ki nu ta lida ku algen ki sta sufri txeu, nu ta obi-s ku atenson? Obi ku atenson ta nvolve más ki fika paradu i sen fla nada. Nu pode mostra konpaxon i amor timenti nu sta ta obi-s. Alvês, un palavra ku amor i ku jetu pode mostra kel algen modi ki nu sta xinti. Pur izénplu, nu pode fla: “N fika txeu tristi ku kuza ki kontise ku bo!” Talvês bu pode faze un ô dôs pergunta pa ten sertéza ma bu sta ta ntende kuzê ki kel algen ki sta dizanimadu fla. Tanbê bu pode pergunta: “Bu pode djuda-m ntende kuzê ki bu krê fla?” ô “Pa kel ki bu fla, N ntende ma. . . É kel-li ki bu krê flaba?” Óras ki nu ta fla palavras ki ta mostra amor sima kes-li, kel algen ta odja ma nu sta obi-l ku atenson i ma nu sta sforsa pa nu ntende se situason. (1 Cor. 13:4, 7) Lenbra ma nu ‘ka debe pâpia faxi’. Óras ki un algen sta ta pâpia, nu ka debe korta-l konbérsu pa nu da-l konsedju ô pa nu koriji-l se manera di pensa. Ten paxénxa! Envês di nu fika ta fla-l modi ki el ta rezolve se prublémas, nu debe poi na se lugar i mostra konpaxon. — 1 Ped. 3:8. w19.05 17-18 ¶15-17

Na família, maridu debe ama se mudjer ‘sima Kristu tanbê ama kongregason’. (Efé. 5:28, 29) Pa un maridu mostra kel amor fórti sima di Kristu, el ten ki poi interesis i nisisidadis di se mudjer más primeru ki di sel. Alguns ómi ta atxa difísil mostra kel tipu di amor li. Talvês es kriadu na un anbienti ki ka ta dadu valor pa amor i justisa. I pur isu, es dizenvolve maus ábitu. Má, es meste muda ses manera di ser pa es pode obi ku lei di Kristu. Un maridu ki ta mostra un amor fórti ta ganha ruspetu di se mudjer. Tanbê, un pai ki ta ama se fidjus di korason nunka el ka ta fla ô faze kuzas di un manera ki ta prujudika-s. (Efé. 4:31) Má, el ta mostra se fidjus ma el ta ama-s i tanbê el ta ilojia-s. Kel-li ta djuda-s xinti suguru. Óras ki un pai ta faze si, el ta ganha amor i kunfiansa di se fidjus. w19.05 6 ¶21

Kuzê ki Maria atxa kantu Gabriel fla kes kuza li? Gabriel sta ta krê flaba ma Jizus ta sérba Rei di Israel na lugar di Eródis ô na lugar di un di kes algen ki ta sérba rei dipôs di el? Si Jizus biraba rei, Maria ta sérba rainha-mai i se família podia moraba na palásiu. Má nunka nu ka atxa na ninhun párti di Bíblia ma el pidi un lugar inportanti na Reinu. Maria éra un algen txeu umildi! Nu ka debe skese ma nos obijetivu prinsipal óras ki nu ta studa Bíblia é ten un amizadi más fórti ku Jeová. Tanbê nu krê odja más klaru ki tipu di algen ki nos é i kuzê ki nu meste muda pa nu agrada Deus. (Tia. 1:22-25; 4:8) Pur isu tudu bês ki bu ta ba studa, faze orason pa Jeová ta pidi se spritu santu. Pidi di tudu bu korason pa el djuda-u tra txeu pruvetu i pa bu odja más klaru kuzê ki bu meste faze pa bu ser un algen midjór. w19.05 30-31 ¶18-19

Alvês, nu ta pasa pa txeu prubléma un tras di kel otu, ki ta dexa-nu txeu dizanimadu. Odja alguns izénplu. Un Tistimunha di Jeová ki txoma John, ta sufri di un duénsa gravi. El fika txeu dizanimadu kantu se mudjer bandona-l dipôs di 19 anu kazadu. Dipôs se dôs fidju-fémia para di sirbi Jeová. Un kazal ki txoma Bob ku Linda, pasa pa prublémas diferenti di kes ki John pasa pa es. Es tudu dôs perde ses trabadju i dipôs es perde ses kaza. Pa piora ses situason, Linda atxadu ku un duénsa na korason ki podia mataba el i tanbê el panha un otu duénsa ki kaba ku diféza di se korpu. Nu pode ten sertéza ma Jeová, ki é nos Kriador i nos Pai ki ta ama-nu txeu, ta ntende modi ki nu ta xinti óras ki nu ta sta txeu dizanimadu. I el krê djuda-nu lida ku kes prubléma ki nu ta pasa pa es. (Fil. 4:6, 7) Bíblia ten txeu izénplu di stórias di sérvus di Jeová ki pasa pa txeu prubléma. Tanbê, el ta splika modi ki Jeová djuda-s lida ku kes situason. w19.06 14 ¶2-3

Óras ki nu ta faze kuzas pikinoti ki ta mostra bondadi pa kes algen ki ka tene maridu ô mudjer más, es ta xinti ma nu ta ama-s. I gósi ki es sta es sô, es meste di bons amigu. Modi ki bu pode mostra ma bo é ses amigu? Talvês bu pode konvida-s pa nhos kume djuntu. Ô nhos pode konbina pa sai na pregason ô pasa algun ténpu djuntu. Bu pode tanbê konvida-s pa es ba sisti bu adorason na família. Si bu faze si, Jeová ta fika kontenti pamodi el sta ‘pértu di kes ki tene korason maguadu’ i el é ‘kel ki ta proteje viúvas’. (Sal. 34:18; 68:5) Ka ta dura, Reinu di Deus ta ben governa Téra i nu ta ben ‘skese di kes prubléma ki dja pasa’. Nu ta spéra pa kel ténpu ki ‘kuzas ki dja pasa ka ta ben lenbradu más i nen es ka ta ben pasa pa korason.’ (Isa. 65:16, 17) Timenti kel dia ka txiga, nu meste kontinua ta apoia kunpanheru i mostra, na kuzas ki nu ta fla i ki nu ta faze, ma nu ta ama tudu kes ki ta faze párti di nos família spritual. — 1 Ped. 3:8. w19.06 25 ¶18-19

Dja ten txeu anu ki un Sentinéla fla: “Un algen ki konxe Deus dretu, ta kunfia na el inda más na ténpu di próva.” Kel-li é verdadi! Pa nu mante firmi óras ki nu pasa pa pirsigison, nu meste ama Jeová i kunfia na el di tudu korason. (Mat. 22:36-38; Tia. 5:11) Lé Bíblia tudu dia pa bu ten un amizadi más fórti ku Jeová. (Tia. 4:8) Óras ki bu ta lé Bíblia, konsentra na kes kualidadi bunitu di Jeová. Tenta xinti se amor na kuzas ki el fla i ki el faze. (Êxo. 34:6) Alguns ta atxa difísil kridita ma Deus ta ama-s pamodi nunka es ka mostradu amor. Si bu ta xinti si, tenta tudu dia faze un lista di maneras ki Jeová mostra mizerikórdia i bondadi pa bo. (Sal. 78:38, 39; Rom. 8:32) Si bu pensa na kuzas ki bu pasa pa el i na kuzas ki bu lé na Palavra di Deus, talvês bu ta pode odja txeu kuza ki Jeová faze pa bo. Si bu ta da txeu valor pa kuzê ki Jeová ta faze, nhos amizadi ta fika más fórti. — Sal. 116:1, 2. w19.07 2-3 ¶4-5

Jeová ka da-nu autoridadi di toma disizons pa otus. Algen ki ta kria régras sen nisisidadi ka sta ta proteje irmons, má el sta ta tenta ser dónu di ses fé. Satanás kel Diabu, ka ta dizisti di pirsigi sérvus fiel di Jeová. (1 Ped. 5:8; Apo. 2:10) Satanás i kes ki ta apoia-l ta ben tenta proíbi nos adorason pa Jeová. Má, nu ka ten motivu pa dexa medu toma kónta di nos! (Deut. 7:21) Jeová sta di nos ladu i el ta kontinua ta apoia-nu mésmu ki nos óbra proibidu. (2 Cró. 32:7, 8) Pur isu, nu sta disididu na toma kel mésmu disizon ki nos irmons na ténpu di apóstlus. Es fla kes governanti di ses ténpu: ‘Nhos julga anhos, si obi ku nhos envês di obi ku Deus é un kuza dretu pa Deus. Má nos, nu ka pode para di pâpia di kes kuza ki nu odja i ki nu obi.’ — Atos 4:19, 20. w19.07 13 ¶18-20

Óras ki nu ta prega nu debe tenta ntende pamodi ki kes algen ta pensa ô ta xinti si. Apóstlu Polu kria na meiu di judeus. Di sertéza, el tevi ki muda se manera di prega pa kes algen ki ka éra judeu, pamodi es sabia poku kuza ô kuazi nada sobri Jeová i sobri Skrituras. Di mésmu manera, pa nu ntende dretu kuzê ki pesoas na nos tiritóriu ta pensa ô ta xinti, talvês nu ten ki faze alguns piskiza. (1 Cor. 9:20-23) Nos obijetivu é atxa kes ‘algen ki merese’. (Mat. 10:11) Pa kel-li, nu meste pergunta pesoas ses opinion i obi ku atenson kuzê ki es ta fla. Un irmon na Inglatéra ta pergunta pesoas ses opinion sobri modi ki es pode ten un kazamentu filís, modi ki es ta kria fidjus ô modi ki es ta lida ku injustisa. Dipôs di el obi ses respósta, el ta pergunta: “Kuzê ki bu ta atxa di kel konsedju li, ki skrebedu dja ten uns 2 mil anu?” Dipôs, sen fla palavra “Bíblia”, el ta mostra alguns testu interesanti na se telemóvel. w19.07 21-22 ¶7-8

Modi ki debe ser nos amor pa Deus? Jizus fla un farizeu: ‘Ama Jeová, bu Deus, di tudu bu korason, di tudu bu alma i di tudu bu menti.’ (Mat. 22:36, 37) Nu krê ama Deus di tudu nos korason i nu krê pa nos amor pa el ba ta omenta kada dia. Nu meste konxe Deus pa nu pode ama-l. Bíblia ta fla: ‘Ken ki ka ta ama ka konxe Deus, pamodi Deus é amor.’ (1 João 4:8 ) Apóstlu Polu mostra ma nos amor pa Deus pode fika más fórti si nu ten ‘konhisimentu izatu i tudu disirnimentu’ sobri El. (Fil. 1:9) Óras ki nu kumesa ta studa Bíblia, nu ta prende ama Deus sikrê nu ka konxe tudu se kualidadis bunitu. Dipôs, kantu más nu prende sobri Jeová, nos amor ta bira más fórti. Nu krê pa es amor kontinua ta kria. É pur isu ki é txeu inportanti pa nu studa Bíblia sénpri i pensa txeu sobri kuzas ki nu lé. — Fil. 2:16. w19.08 9 ¶4-5

Si bu sta na un novu diziginason, bu meste faze novus amigu. Lenbra ma pa ten un amigu, bu meste ser un amigu. Konta sobri kes benson ki bu resebe di Jeová i dexa otus xinti bu alegria na sirbi Jeová. Si bu tevi ki dexa bu diziginason pamodi kel algen ki bu sta kazadu ku el tevi algun prubléma di saúdi, ka bu kulpa-l. Má tanbê, si é bo ki tevi algun prubléma di saúdi, ka bu xinti kulpadu ta pensa ma bu dexa bu maridu ô bu mudjer dizanimadu. Lenbra ma nhos é ‘un karni sô’ i ma nhos promete Jeová ma nhos ta kuida di kunpanheru na kalker situason. (Mat. 19:5, 6) Si bu dexa bu diziginason pamodi un gravidês ki bu ka sta speraba, dexa bu fidju sabe ma el é más inportanti pa bo di ki diziginason ki bu tinha antis. Fla bu fidju sénpri ma el é ‘un rekonpénsa’ di Deus. (Sal. 127:3-5) Tanbê, konta-l tudu kes spiriénsa sábi ki bu tevi na bu diziginason. Kel-li pode insentiva-l pa el entra na sirvisu pa ténpu interu. w19.08 22 ¶10-11

Babilónia kel Grandi, ki ta reprizenta tudu kes relijion falsu di mundu, poi txeu algen ka ta mostra ruspetu pa nómi di Deus. El ta inxina mintiras sobri Deus. Sima un prostituta, relijion falsu é infiel pa Deus i el ta apoia govérnus di mundu. El ta uza se puder i influénsia ki el ten, pa el toma dinheru di ses ménbru i dja el mata monti algen, ki ta inklui alguns sérvu di Deus. (Apo. 18:24; 19:2) Jeová ta ben uza ‘10 txifri’ di ‘un féra kor burmedju’ pa kaba ku kel ‘grandi prostituta’. Kel féra li ta reprizenta Organizason di Nasons Unidu. Kes 10 txifri ta reprizenta govérnus ki ta apoia Organizason di Nasons Unidu. Na ténpu sértu di Deus, kes govérnu ta ben fika kóntra Babilónia kel Grandi. Es ‘ta dexa-l distruídu i nu’, es ta toma se rikézas i es ta mostra tudu algen kuzas mariadu ki el faze. (Apo. 17:3, 16) Se distruison ta ser uma faxi, ki ta parse ma kontise ‘sô na un dia’. Tudu kes ki ta apoiaba relijion falsu ta ben fika spantadu, pamodi sénpri el ta ngababa se kabésa: ‘Nunka N ka ta ben odja tristéza.’ — Apo. 18:7, 8. w19.09 10 ¶10-11

Tudu algen pode seta kel konviti li. Jizus nunka ka ta negaba un algen ki krê sirbi Deus di korason. (João 6:37, 38 ) Tanbê, tudu sigidoris di Kristu resebe priviléjiu di partisipa na trabadju ki Jeová da Jizus. I nu pode ten sertéza ma Jizus sénpri ta sta ku nos na es trabadju i el ta djuda-nu. (Mat. 28:18-20) Kes algen umildi ta krê fikaba pértu di Jizus. (Mat. 19:13, 14; Luc. 7:37, 38) Pamodi? Jizus éra diferenti di farizeus. Kes xéfi di relijion ka ta trataba pesoas ku amor i es éra orgulhozu. (Mat. 12:9-14) Má, Jizus tinha amor i el éra umildi. Kes farizeu gostaba di ser algen konxedu i es tinha orgulhu di ser más inportanti ki otus. Jizus ta inxinaba pesoas pa es ka pensaba ma es éra más inportanti, má pa es sirbi otus. (Mat. 23:2, 6-11) Kes farizeu kria pa pesoas tinha medu di es, asi pa es podia mandaba na es. (João 9:13, 22 ) Má Jizus ta animaba otus ku palavras ki ta mostraba amor i bondadi. Bu sta ta prende ku kes lison di Jizus? w19.09 20 ¶1; 21 ¶7-8; 23 ¶9

Runions ta djuda-nu ser más amigu di Jeová. I valor ki nu ta da pa nos runion, ta djuda-nu sabe si nu ta konsigi lida ô nau ku pirsigison na futuru. (Heb. 10:24, 25) Pamodi ki nu ta fla kel-li? Si gósi nu ta dexa kalker kuza pikinoti pô-nu ka ta bai runion, kuzê ki ta kontise na futuru si nu ten ki poi nos vida na prigu pa nu sisti runion? Má, si dja nu sta disididu na sisti tudu runion, nu ka ta xinti medu óras ki nos inimigus tenta inpidi-nu di faze kel-la. Gósi é ténpu di nu prende ama nos runions. Si nu ta ama nos runions, ninhun opozison, nen proibison di govérnus, ka ta inpidi-nu di obi ku Deus antis di nu obi ku ómis. (Atos 5:29 ) Dikora testus di Bíblia ki más bu ta gosta. (Mat. 13:52) Bu ka ta konsigi lenbra di tudu kuza, má Jeová pode uza se spritu santu pa djuda-u lenbra di kes testu di Bíblia ki bu dikora. (João 14:26 ) Testus di Bíblia ta djuda-u kontinua amigu di Jeová, i aguenta firmi. w19.07 3 ¶5; 4 ¶8-9

Bu nase dipôs di 1914? Si bu respósta é sin, nton sénpri bu vive duránti ‘ténpu di fin’ di es sistéma. Jizus dja flaba ma txeu kuza ta ben kontiseba na es ténpu, sima géra, falta di kumida, tremor di téra, duénsas ki ta spadja, kuzas ki é kóntra lei ta bira más txeu i sérvus di Jeová ta pirsigidu. (Mat. 24:3, 7-9, 12; Luc. 21:10-12) Tanbê, nu sta ta odja pesoas ta konporta sima apóstlu Polu dja flaba. Anos ki ta adora Jeová, nu ten sertéza ma nu sta ta vive ‘na ténpu di fin’. (Miq. 4:1) Dja pasa txeu ténpu désdi 1914. Nton, gósi nu sta ta vive na fin di ‘ténpu di fin’. Dja ki nu sta pértu di fin, nu meste sabe respóstas di alguns pergunta inportanti: Ki kuzas sta ben kontise na fin di ‘ténpu di fin’? Kuzê ki Jeová krê pa nu faze timenti nu sta ta spéra kes kuza kontise? w19.10 8 ¶1-2

Nos kapasidadi di aguenta firmi ka ta dipende sô óras ki kuzas sta dretu. Nu pode bira más fórti nos kapasidadi di aguenta óras ki nu ta kunfia na Jeová. (Rom. 12:12) Kel promésa di Jizus ki sta na testu di oji, krê fla ma nu meste mante fiel, ka ta nporta ki prublémas ki nu sta pasa pa el. Si nu aguenta tudu prublémas ki nu ten gósi, nu pode bira más fórti antis di txiga grandi tribulason. Sima nu meste kunfia na Jeová pa nu aguenta firmi, tanbê nu meste kunfia na Jeová pa nu ten koraji di verdadi. Modi ki nu pode kunfia más txeu na Jeová? Nu ten ki lé Bíblia tudu dia i pensa txeu na modi ki Jeová salva se povu na pasadu. (Sal. 68:20; 2 Ped. 2:9) Óras ki nasons ataka-nu duránti grandi tribulason, nu meste ten koraji i kunfia na Jeová más di ki nunka. (Sal. 112:7, 8; Heb. 13:6) Si nu kunfia na Jeová gósi, nu ta ten koraji óras ki Gogi ataka-nu. Nu ten sertéza ma Jeová sénpri ta kontinua ta proteje-nu ku amor. — 1 Cor. 13:8. w19.10 18 ¶15-16

Diabu sta kontrola es mundu, i el ta uza-l pa djobe kal ki é nos dizejus normal i nos frakézas. (Efé. 2:1-3) Se obijetivu é dividi nos sentimentu pa nu ka sirbi sô Jeová. Dipôs ki apóstlu Pedru skrebe sobri fin di mundu di Satanás i sobri kel mundu novu ki sta pa ben, el fla: ‘Nhos ki N ta ama, dja ki nhos sta spéra kes kuza li, nhos faze tudu sforsu pa ti ki enfin el atxa nhos sen mantxa i sen defetu i na pas.’ (2 Ped. 3:14) Óras ki nu ta sigi kel konsedju li i nu ta faze nos midjór pa nu kontinua linpu na nos konportamentu i adora Deus sima el ta krê, nu sta ta mostra ma nu ta adora sô el. Satanás ku se mundu ta kontinua ta tenta-nu pa nu poi otus kuza na primeru lugar na nos vida envês di Jeová. (Luc. 4:13) Má simé nu ka krê dexa nada tra lugar di Jeová na nos korason. Nu sta disididu na adora sô Jeová pamodi é sô el ki merese! w19.10 26 ¶4; 31 ¶18-19

Alguns tipu di preokupason é bon pa nos. Pur izénplu, é bon nu preokupa na agrada Jeová i Jizus. (1 Cor. 7:32) Si nu faze un pekadu gravi, nu ta preokupa na rezolve nos situason ku Jeová. Tanbê, nu ta preokupa na agrada kel algen ki nu sta kazadu ku el, na kuida di nos família i di nos irmons na fé. (1 Cor. 7:33; 2 Cor. 11:28) Má, preokupason dimás pode dexa-nu sénpri preokupadu na ten ropa i kumida ki nu meste. (Mat. 6:31, 32) Pa kontrola kel preokupason li, talvês nu ta konsentra na ten más kuzas material. Si nu dexa kel-la kontise, nos fé na Jeová ta bira fraku i nos amizadi ku el ta fika na prigu. (Mar. 4:19; 1 Tim. 6:10) Ô nu pode preokupa dimás ku kuzê ki otus algen ta pensa di nos. Kel-li pode pô-nu ta fika ku más medu di sufri trósa i pirsigison di ómis, di ki medu di faze algun kuza ki Jeová ka gosta. Pa nu proteje di kel prigu li, nu ten ki inplora Jeová pa da-nu fé i koraji ki nu meste pa nu ka xinti medu di ómi. — Pro. 29:25; Luc. 17:5. w19.11 15 ¶6-7

Ten alguns disizon inportanti ki nunka nu ka ta pode muda. Pur izénplu, nu ta pega riju nos disizon di sirbi Jeová. I nu sta disididu na kontinua fiel pa kel algen ki nu sta kazadu ku el. (Mat. 16:24; 19:6) Má talvês, otus disizon meste muda. Pamodi? Pamodi situason ta muda. Kuzê ki pode djuda-nu toma kes midjór disizon? Faze orason ta pidi sabedoria. Na alguns situason, nos tudu nu ten ‘falta di sabedoria’. Pur isu, kunfia na Jeová óras ki bu ta toma un disizon i óras ki bu meste muda-l. Jeová ta djuda-u toma bons disizon. Faze bons piskiza. Djobe Palavra di Deus, lé publikasons di organizason di Jeová i pâpia ku pesoas ki bu ta kunfia na es. (Pro. 20:18) É rei di inportanti faze piskiza antis di toma disizons, sima muda di trabadju, muda di lugar ô skodje un kursu ki ta djuda-u kontinua ta sirbi Jeová. w19.11 27 ¶6-8

Nu ta agradese Jeová pamodi el ranja un manera di salva-nu ô liberta-nu di pekadu. Jizus é kel algen ki da-nu xansi di ten es liberdadi. Más di 700 anu antis di Jizus ben pa Téra, proféta Izaías dja flaba ma ta ben tinha un grandi libertason. Kel grandi libertason ta ben sérba mutu más midjór ki kel libertason ki ta kontiseba duránti anu di Jubileu na Israel antigu. El skrebe: ‘Spritu di Jeová, ki é kel Sinhor Más Grandi, sta riba mi, pamodi Jeová skodje-m pa N pâpia di notísias sábi pa kes mansu. El manda-m pa N kura kes ki sta ku korason tristi, pa pâpia di liberdadi pa kes ki sta prézu’. (Isa. 61:1) Kel profesia li staba ta pâpia di kenha? Es profesia inportanti sobri liberdadi kumesa ta kunpri dipôs ki Jizus kumesa se trabadju di pregason. Kantu el entra na sinagóga di Nazaré, kel sidadi ki el kriadu, Jizus lé kel profesia di Izaías pa kes judeu ki staba la i el fla ma kel profesia staba ta pâpia sobri el. — Luc. 4:16-19. w19.12 9-10 ¶6-8

Bu meste ten más koraji pa lida ku pirsigison. Si bu ta atxa ma bu ka ten koraji, kuzê ki bu pode faze pa bu ten kel kualidadi li? Ka bu skese ma koraji di verdadi ka ta dipende di tamanhu, forsa ô kapasidadi. Odja izénplu di Davidi kantu el nfrenta Gulias. Konparadu ku kel jiganti, Davidi éra pikinoti, más fraku i el ka staba mutu priparadu pa géra. I nen el ka tinha un spada. Má, el tinha txeu koraji. Pur isu, Davidi ba luta kóntra kel jiganti orgulhozu. Pamodi ki Davidi tinha txeu koraji? El tinha sertéza ma Jeová staba ku el. (1 Sam. 17:37, 45-47) Davidi ka fika ta pensa ma Gulias éra mutu más grandi ki el. Má, el fika ta pensa ma Gulias, konparadu ku Jeová, ka éra nada. Kuzê ki nu ta prende ku kel stória li? Nu ta ten más koraji, si nu kunfia ma Jeová sta ku nos i si nu ten sertéza ma nos inimigus é pikinoti konparadu ku Deus Tudu-Poderozu. — 2 Cró. 20:15; Sal. 16:8. w19.07 5 ¶11-13

Tíkiku éra un amigu lial di apóstlu Polu. (Atos 20:4 ) Pa vólta di anu 55 D.J., Polu fla irmons pa es djunta dinheru pa djudaba kristons na Judea. Ta parse ma el dexa Tíkiku pa kuida di kel diziginason inportanti. (2 Cor. 8:18-20) Un ténpu dipôs, kantu Polu staba prézu na Roma pa primeru bês, Tíkiku bira se mensajeru. El ta lebaba kartas di Polu i mensaji di nkorajamentu pa kes kongregason na Ázia. (Col. 4:7-9) Tíkiku kontinua ta ser un amigu di kunfiansa di Polu. (Tito 3:12 ) Nen tudu kristons na kel ténpu ka éra di kunfiansa sima Tíkiku. Pa vólta di anu 65 D.J., kantu apóstlu Polu podu prézu pa sugundu bês, el skrebe un karta ki ta fla ma txeu kriston di pruvínsia di Ázia para di sta djuntu ku el, talvês pamodi medu di kes inimigu. (2 Tim. 1:15) Má, Polu podia kunfiaba na Tíkiku i el da-l un novu diziginason. (2 Tim. 4:12) Di sertéza, Polu ta daba txeu valor pa un bon amigu sima Tíkiku. w20.01 10 ¶7-8

Talvês bu sta ta pergunta si bu skodjedu ku spritu santu. Si bu ta atxa ma sin, pensa na kes pergunta inportanti li: Bu ten un dizeju fórti di faze vontadi di Jeová? Bu ta atxa ma bu ten txeu zelu na pregason? Bu gosta di studa Bíblia i prende ‘kes kuza profundu di Deus’? Bu ta atxa ma Jeová sta ta djuda-u ten bons rezultadu na pregason? Bu ta xinti ma djuda otus prende sobri Jeová é un responsabilidadi grandi? Bu sta ta odja kuzas ki ta mostra ma Jeová djuda-u na bu vida? Si bu responde sin pa tudu kes pergunta li, kel-li ta mostra ma bu txomadu pa bai pa Séu? Nau. Pamodi ki nau? Pamodi tudu sérvus di Jeová pode xinti di kel manera li. Na verdadi, si bu sta ta pergunta si bo é un kriston skodjedu ku spritu santu ô nau, kel-li dja ta mostra ma bu ka ta faze párti di kes ki ta bai pa Séu. Kes ki Jeová ta txoma ka ten dúvida si es skodjedu ku spritu santu ô nau. Es ten sertéza! w20.01 23 ¶14