Maiu

Kantu Jizus éra jóven inda, el disidi obi ku Juzé i Maria. Nunka el ka dizobidese se pai ku se mai pamodi el ta atxaba ma el sabia más di ki es. Tanbê, dja ki Jizus éra kel fidju más grandi, el tinha alguns responsabilidadi. Ta parse ma el faze se midjór pa el kuida di es. Di sertéza, el sforsa txeu pa prende un profison ku se pai di kriason. Di kel manera li, el ta konsigi djudaba se família. Talvês Juzé ku Maria konta Jizus, ma manera ki el nase foi un milagri di Deus i kuzê ki anjus dja flaba di el. (Luc. 2:8-19, 25-38) Má, Jizus ka konforma sô ku kuzê ki el obi; tanbê el ta studaba Skrituras di el pa el. Modi ki nu sabe ma Jizus éra un bon studanti di Palavra di Deus? Pamodi kantu el éra mininu inda, kes instrutor na Jiruzalen ‘fika dimiradu ku se ntendimentu i ku se respóstas.’ (Luc. 2:46, 47) Sô ku 12 anu, Jizus dja provaba se kabésa ma Jeová éra se Pai. — Luc. 2:42, 43, 49. w20.10 29-30 ¶13-14

Pa nu ten sertéza ma ta ben ten resureison, nu meste kridita ma Jizus resusitadu. Kantu Polu kumesa ta skrebe sobri resureison, el fla três kuza: (1) ‘Kristu móre pa nos pekadus’. (2) El ‘nteradu’. (3) El ‘labantadu na tirseru dia, sima Skrituras dja flaba’. (1 Cor. 15:3, 4) Kuzê ki mórti, ntéru i resureison di Jizus ta siginifika pa nos? Proféta Izaías dja flaba ma Misías ta sérba ‘tradu di téra di algen bibu’ i ma el ta sérba ‘sipultadu na meiu di algen mau’. Má inda tinha otu kuza ki ta kontiseba. Izaías tanbê flaba ma Misías ta karegaba ‘pekadu di txeu algen’. Jizus faze kel-li kantu el da se vida pa salva-nu. (Isa. 53:8, 9, 12; Mat. 20:28; Rom. 5:8) Nton, mórti, ntéru i resureison di Jizus ta da-nu sertéza ma nu pode fika livri di pekadu ku mórti. Tanbê nu ta torna ben sta djuntu ku nos famílias i amigus ki dja móre. w20.12 2-3 ¶4-6; 5 ¶11

Apóstlu Polu txeu bês ta pregaba na sinagógas di judeus. Pur izénplu, na sinagóga na Tesalónika, ‘el uza Skrituras pa rasusina ku [judeus] duránti três sábadu’. (Atos 17:1, 2) Ta parse ma Polu ta xintiba avontádi óras ki el ta pregaba na sinagóga, pamodi el éra judeu. (Atos 26:4, 5) Pur isu, el ta pregaba ku kunfiansa pa judeus, pamodi el ta ntendeba es dretu. (Fil. 3:5) Dipôs ki Polu fuji di kes algen ki ta pirsigiba el na Tesalónika i tanbê na Berea, el txiga na Atenas. Otu bês, ‘el kumesa ta rasusina na sinagóga ku judeus i ku otus algen ki ta adoraba Deus’. (Atos 17:17) Má kantu Polu ba prega na merkadu, el atxa otus tipu di algen. Na meiu di kes algen ki staba ta obi-l, tinha filózofus i otus algen ki ka éra judeu, ki ta atxaba ma mensaji di Polu éra sima un “dotrina nobu”. Es fla Polu: “Bu sa ta traze-nu uns sértu kuzas stranhu pa nos obidu”. — Atus 17:18-20, BPK. w20.04 9 ¶5-6

Ka bu kondena bu kabésa si bu sta ta luta ku un frakéza. Lenbra ma anos é inperfetu i ninhun di nos ka pode ser justu pa Deus pamodi nu merese-l. Nos tudu nu meste di kel bondadi di Deus ki ka meresedu ki el mostra através di resgati. (Efé. 1:7; 1 João 4:10) Nos irmons ku irmans na kongregason pode nkoraja-nu. Es pode obi-nu óras ki nu meste pâpia i es pode fla-nu palavras ki ta anima-nu. (Pro. 12:25; 1 Tes. 5:14) Un irman na Nijéria ki txoma Joy, ki ta luta kóntra dizánimu fla: “Kuzê ki éra di mi si N ka tinha nhas irmon ku irmans? Es é un próva ma Jeová ta responde nhas orason. N prende ku es modi ki N ta nkoraja kes ki tanbê sta dizanimadu.” Nu debe lenbra ma nos irmons nen sénpri ka ta sabe óras ki nu meste di un algen pa konsola-nu. Pur isu, talvês nu meste txiga na un irmon ku más spiriénsa i pidi ajuda. w20.12 23-24 ¶7-8

Txeu bês, pa nu ten un amizadi fórti ku un algen, primeru kuza ki nu meste faze é pasa ténpu ku el. Sima nhos ta ba ta pâpia i ta fla kunpanheru kuzê ki nhos ta pensa i xinti, nhos ta bira amigu. Má alvês, é ka fásil ten un amizadi fórti ku Jizus. Un di kes razon é pamodi nunka nu ka odja-l. É kel-li ki kontise ku txeu kriston na ténpu di apóstlus. Má simé, apóstlu Pedru fla: ‘Nbóra nunka nhos ka odja-l, nhos ta ama-l. Nbóra nhos ka sta odja-l gósi, nhos mostra fé na el’. (1 Ped. 1:8) Kel-li ta mostra ma sikrê nunka nu ka odja Jizus, nu pode ten un amizadi fórti ku el. Tanbê, nu ka ta konsigi pâpia ku Jizus. Óras ki nu ta faze orason, nu ta pâpia sô ku Jeová. É klaru ki nu ta faze orason na nómi di Jizus, má nu ka ta pâpia ku Jizus. Na verdadi Jizus ka krê pa nu faze orason pa el. Pamodi? Pamodi orason é un fórma di adorason, i nu debe adora sô Jeová. (Mat. 4:10) Má simé, nu pode mostra nos amor pa Jizus. w20.04 20 ¶1-3

Kes atléta ki ta partisipaba na kes jogu na Grésia, tinha ki venseba alguns prubléma, sima kansera i dór. Má, tudu ses kunfiansa staba na kel trenu ki es ta resebeba i na ses própi forsa. Sima kes atléta, nos tanbê nu ta trenadu pa nu kóre na kel korida pa vida. Má nu ten un kuza ki es ka ten. Nu pode resebe puder di Jeová sénpri ki nu meste, pamodi se forsa ka ta kaba. Si nu kunfia na Jeová, el ta promete ma el ta trena-nu i ma el ta pô-nu fika fórti! Apóstlu Polu tevi ki lida ku un monti prubléma. Es falta-l, es pirsigi-l i alvês el ta xintiba fraku. Tanbê, el tevi ki lida ku un prubléma ki el txoma di ‘un spinhu na karni’. (2 Cor. 12:7) El ka ta odjaba kes prubléma sima un motivu pa el dizistiba. Má, el ta odjaba kada un di kes prubléma sima un xansi pa el kunfiaba na Jeová. (2 Cor. 12:9, 10) Dja ki Polu ta pensaba di kel manera li, Jeová djuda-l na tudu se prublémas. w20.04 29 ¶13-14

‘Trabadja djuntu’ ku Jeová, Jizus i anjus é otu tizoru ki nu ka ta odja. (2 Cor. 6:1) Nu ta faze kel-li óras ki nu ta partisipa sénpri na trabadju di pregason. Apóstlu Polu fla ma el i kes otu algen ki ta faze pregason é ‘kolaboradoris di Deus.’ (1 Cor. 3:9) Óras ki nu ta partisipa na trabadju di pregason, tanbê nu sta ta kolabora ku Jizus. Lenbra ma dipôs ki el manda se sigidoris pa ‘faze disiplus di algen di tudu nasons,’ Jizus fla: ‘N sta ku nhos’. (Mat. 28:19, 20) I kes anju? Nu ta fika kontenti pamodi anjus ta orienta-nu óras ki nu ta pâpia di ‘notísias sábi ku kes algen ki ta mora na Téra’. (Apo. 14:6) Ku ajuda di Jeová, Jizus i anjus, kuzê ki nu ta pode faze? Nu ta konsigi símia mensaji di Reinu. Alguns di kes simenti ta kai na un bon korason i es ta kria. (Mat. 13:18, 23) Ken ki ta poi kes simenti di verdadi ta kria i ta da frutu? Jizus splika kel-li na testu di oji. w20.05 30 ¶14-15

Milhons di família fika divididu pamodi divórsiu. Ti famílias ki ta mora na mésmu kaza pode xinti ma es ka ten amizadi fórti ku kunpanheru. Un algen ki ta konsedja família fla: “Mamá, papá i fidjus ka ta pâpia ku kunpanheru i es ta pasa maior párti di ses ténpu ta uza konputador, tablet, telemóvel ô ta djuga na aparelhus iletróniku. Nbóra es ta vive na mésmu kaza, es ka konxe kunpanheru dretu.” Nu ka krê dexa di mostra amor sima txeu algen na kel mundu li. Má, nu krê mostra un amor fórti pa kunpanheru. Nu ka krê mostra kel amor li sô pa kes algen di nos família. Tanbê nu krê mostra kel amor li pa nos família na fé, ki é nos irmons ku irmans. (Rom. 12:10) Óras ki nu ta ama nos irmons di korason, nu ta kontinua unidu, i union é un párti inportanti di adorason verdaderu. — Miq. 2:12. w21.01 20 ¶1-2

Un ekipa di futibol, ki é unidu ten más xansi di ganha jogu di ki un ekipa ki é ka unidu. Mésmu kuza ta kontise ku bu korason. El pode ser sima un ekipa ki ta ganha si bus pensamentu, dizeju i sentimentu sta unidu na sirbi Jeová. Lenbra sénpri ma Satanás krê dividi bu korason. El krê pa bus pensamentu, dizeju i sentimentu bai kóntra leis di Jeová. Má, pa bu sirbi Jeová bu meste ten un korason konplétu. (Mat. 22:36-38) Pur isu, nunka ka bu dexa Satanás dividi bu korason! Faze orason pa Jeová i pidi mésmu kuza ki Davidi: ‘Da-m un korason konplétu pa N pode ruspeta bu nómi.’ Faze tudu kel ki bu pode pa bu vive sima kel orason li ta fla. Na tudu disizon ki bu ta toma, ka ta nporta si é grandi ô pikinoti, mostra ma bu ten txeu ruspetu pa nómi santu di Jeová. Di kel manera li, bu ta ser un Tistimunha di Jeová ki ta da ónra pa kel nómi li. (Pro. 27:11) I nos tudu nu pode ben fla djuntu ku proféta Mikeias: ‘Nu ta ben anda na nómi di Jeová, nos Deus, pa tudu ténpu.’ — Miq. 4:5. w20.06 13 ¶17-18

Kel ataki ki rei di nórti ta ben faze djuntu ku otus govérnu di mundu, ta ben poi kel Deus Tudu-Poderozu uma xatiadu. Nton, ta kumesa géra di Armajedon. (Apo. 16:14, 16) Na kel ténpu, rei di nórti djuntu ku tudu kes otu nason ki ta faze párti di Gogi di Magogi, ta ben kabadu ku el i ka ta ten ‘ningen pa djuda-l.’ (Dan. 11:45) Na livru di Daniel 12:1 ta da-nu más informason sobri modi ki rei di nórti ku kes ki ta apoia-l ta ben kabadu ku es i modi ki nu ta ben salva. Kuzê ki kel testu li krê fla? Migel é otu nómi di Jizus Kristu, ki é nos Rei. El ‘sta sakédu pa djuda’ povu di Deus désdi 1914, kantu Reinu di Deus kumesa ta governa na Séu. Ka ta dura, Migel ta ben ‘labanta’, ô kaba ku tudu se inimigus na géra di Armajedon. Kel géra ta ben ser kel últimu kuza ki Daniel ta txoma di kel piór ‘ténpu di frónta’ ki ta ben kontise. — Apo. 6:2; 7:14. w20.05 15-16 ¶15-17

Timenti Juzé éra skravu i kantu el staba na kadia, el ka podia fazeba nada pa mudaba se situason. Nton, kuzê ki djuda-l ka fika dizanimadu dimás? Envês di el konsentra na kes kuza ki el ka ta podia fazeba, el faze se midjór na kes trabadju ki el mandadu. Juzé ta konsentraba na agrada Jeová, kel Algen más inportanti na se vida. Pur isu, Jeová ta abensuaba tudu kuza ki el ta fazeba. (Gén. 39:21-23) Stória di Juzé ta lenbra-nu ma es mundu li é mau i ma pesoas pode trata-nu ku injustisa. Ti mésmu un irmon na kongregason pode magua-nu. Má si nu odja Jeová sima nos Rótxa, ô nos Proteson, nu ka ta fika dizanimadu dimás ô para di sirbi-l. (Sal. 62:6, 7; 1 Ped. 5:10) Lenbra tanbê ma Juzé tinha uns 17 anu kantu Jeová pô-l ta ten kes sonhu. Kel-li ta mostra ma Jeová ta kunfia na jóvens ki ta sirbi-l. Oji txeu jóven é fiel pa Jeová sima Juzé. Alguns di es ti podu na kadia sen ninhun kulpa pamodi es krê kontinua lial pa Jeová. — Sal. 110:3. w20.12 16 ¶3; 17 ¶5, 7

Apóstlus Pedru ku Juan ta atxaba ma éra un onra ser pirsigidu pamodi es ta sigiba Jizus i es ta inxinaba otus sobri el. (Atos 4:18-21; 5:27-29, 41, 42) Kes disiplu ka tinha motivu pa xintiba vergónha. Mésmu ki kes algen ka ta ruspetaba kes kriston na ténpu di apóstlus, es faze mutu más kuzas pa djuda otus di ki kalker un di ses inimigus. Pur izénplu, kes livru di Bíblia ki alguns di kes kriston skrebe, kontinua ta djuda i ta da speransa pa milhons di algen. Tanbê, kel Reinu ki es pâpia di el dja sta ta governa na Séu i ka ta dura el ta ben governa tudu algen. (Mat. 24:14) Má kes govérnu poderozu ki ta pirsigiba kes kriston dja ten txeu anu ki es dexa di izisti. Tanbê, kes disiplu lial gósi sta ta governa na Séu. Má ses inimigus sta tudu mortu, i si es ben resusitadu es ten ki ben obi ku kel Reinu ki kes kriston ki es ta odiaba, papiaba di el. — Apo. 5:10. w20.07 15 ¶4

Abraon tinha un fé fórti na promésas di Deus ki éra sima si el ta odjaba kel Algen ki ta ben sérba Rei di Reinu di Deus, ô Misías. É pur isu ki Jizus flaba kes judeu di se ténpu: ‘Nhos pai Abraon, fika txeu kontenti pamodi speransa di odja nha dia, i el odja-l i el fika kontenti.’ (João 8:56) Kel-li ta mostra klaru ma Abraon sabeba ma alguns di se disendentis ta ben fazeba párti di un Reinu, ki ta tinha apoiu di Jeová. I el staba dispostu na spéra pa Jeová kunpriba kel promésa li. Modi ki Abraon mostra ma el staba ta spéra pa kel sidadi, ô Reinu, ki Deus faze? Primeru, Abraon ka faze párti di ninhun govérnu li na Téra. El ta staba sénpri ta muda di un lugar pa kel otu i nunka el ka apoia ninhun govérnu di ómi. Tanbê, Abraon ka tenta kria se própi govérnu. Má, el kontinua ta obi ku Jeová i ta spéra pa El kunpriba Se promésa. Di kel manera li, Abraon mostra ma el tinha txeu fé na Jeová. w20.08 3 ¶4-5

Jeová promete ma na Paraízu ningen ka ta ben fla: ‘N sta duenti.’ (Isa. 33:24) Pur isu, kes algen ki resusitadu ta ben ten un novu korpu ku bon saúdi. Má, es ka ta bira perfetu lógu ki es resusitadu. Si kel-la kontiseba, ses família i amigus talvês pode ka konxeba es. Ta parse ma tudu algen ta ba ta bira perfetu poku-poku duránti kel Govérnu di Kristu di mil anu. É sô na fin di mil anu ki Jizus ta ben ntrega se Pai Reinu. Na kel momentu la, ta atxa Reinu dja kaba di faze tudu se trabadju i tanbê poi tudu algen ta bira perfetu. (1 Cor. 15:24-28; Apo. 20:1-3) Tenta imajina modi ki ta ben ser óras ki bu resebe otu bês bus família i amigus ki bu ta ama txeu. Bu ta ben txora ô ri di alegria? Bu ta ben kanta riju pa lova Jeová? Un kuza é sértu: resureison ta ben pô-u ta xinti más amor inda pa Jeová i pa Jizus. Si ka éra pamodi ses amor i ses bondadi, nunka nu ka ta ben resebeba kel prezenti grandi li! w20.08 16-17 ¶9-10

Apóstlu Polu insentiva kristons pa pensa si es ta konsigi kontinua solteru ta sirbi Jeová. (1 Cor. 7:8, 9) Di sertéza, Polu ka ta pensaba ma kes kriston solteru tinha poku valor. É pur isu ki el skodje Timótiu ki éra jóven i solteru pa kuida di diziginasons rei di inportanti. (Fil. 2:19-22) Kel-li ta mostra klaru ma nu ka debe pensa ma un algen ta sta más kualifikadu ô ménus kualifikadu sô si el é kazadu ô solteru.(1 Cor. 7:32-35, 38) Nen Jizus nen Polu ka inxina ma kristons debe kaza ô fika solteru. Nton, kuzê ki nu debe pensa di kes algen ki é kazadu ô solteru? Sentinéla di 1 di otubru di 2012, da un bon respósta pa kel pergunta li: “Na verdadi, nu debe odja kes dôs situason li [kazadu ô solteru] sima prezenti di Deus. . . Jeová ka ta atxa ma un algen solteru debe xinti tristi ô ku vergónha pamodi el é ka kazadu.” Si nu lenbra sénpri di kel-li, nu ta ruspeta lugar ki nos irmons ku irmans solteru ten na kongregason. w20.08 28 ¶8-9

Na alguns país, pesoas gosta di obi notísias sábi. Kel mensaji ki nu ta leba é kel ki es meste! Má na otus país, pesoas ka ta mostra kuazi ninhun interesi na Deus ô na Bíblia. Modi ki pesoas ta reaji na bu tiritóriu? Ka ta nporta modi ki es ta reaji, Jeová ta spéra pa nu kontinua ta prega ti ki el fla dja sta bon. Jeová dja disidi ki ténpu ki trabadju di pregason ta kaba i ki ténpu ki ‘fin ta ben’. (Mat. 24:14) Jizus dja flaba modi ki mundu ta staba duránti ténpu di fin. El sabia ma kuzas ki ta kontiseba pode distraíba se sigidoris di faze trabadju di pregason. Pur isu, el aviza se disiplus: ‘Nhos mante sienti’. (Mat. 24:42) Na ténpu di Nué, pesoas staba distraídu ku kes kuza di dia-dia i es ka leba asériu kes avizu di Nué. (Mat. 24:37-39; 2 Ped. 2:5) Di mésmu manera, oji ten alguns kuza ki pode distrai-nu. Pur isu, nu krê kontinua konsentradu ta faze kel trabadju ki Jeová da-nu. w20.09 8 ¶1-2, 4

Satanás sta ‘xeiu di raiba’. Pur isu, si nu pensa ma nu ten algun manera di skapa di se raiba nu sta nganadu. (Apo. 12:12) Ka ta dura, nos tudu ta ben pasa pa situasons ki ta poi nos lialdadi na próva. Mundu sta ben pasa pa ‘un grandi frónta, ki sima kel-la nunka ka kontiseba antis, désdi komésu di mundu ti gósi’. (Mat. 24:21) Duránti kel ténpu, talvês nos família pode fika kóntra nos i pode ser ki nu ka ta ben dexadu prega. (Mat. 10:35, 36) Modi ki bu ta ben reaji? Bu ta ben kunfia na ajuda i proteson di Jeová sima Rei Aza? (2 Cró. 14:11) Jeová dja sta ta pripara-nu pa kuzê ki sta ben kontise. El sta ta orienta ‘skravu fiel i prudenti’ pa da-nu kumida spritual ‘na óra sértu.’ Asi, nu ta pode mante firmi na nos adorason pa Deus. (Mat. 24:45) Má nu meste faze nos párti. Nu debe faze nos midjór pa nu pode ten un fé fórti na Jeová. — Heb. 10:38, 39. w20.09 18 ¶16-18

Jeová pode uza se spritu santu pa poi pesoas ki ten autoridadi ta faze kuzê ki el krê. Pesoas pode abri un kaminhu pa poi agu di un riu ta kóre pa undi ki es krê. Di mésmu manera, Jeová pode uza se spritu santu pa poi pensamentus di kes governanti ta faze kuzê ki el krê. Óras ki kel-li ta kontise, kes algen ki ten autoridadi ta xinti motivadu na toma disizons ki ta djuda povu di Deus. (Konpara ku Esdras 7:21, 25, 26). Kuzê ki nu pode faze? Nu pode faze orason ‘pa reis i pa tudu kes ki sta na puzisons altu’ óras ki es meste toma disizons ki ta nvolve nos vida i nos trabadju di pregason. (1 Tim. 2:1, 2, nóta di rodapé; Nee. 1:11) Sima kristons na ténpu di apóstlus ta fazeba, anos tanbê nu ta faze txeu orason pa Deus djuda nos irmons ku irmans ki sta prézu. — Atos 12:5; Heb. 13:3. w20.11 15 ¶13-14.

Modi ki bu ta xinti óras ki bu ta odja un studanti di Bíblia di bu kongregason ta batiza? Di sertéza bu ta fika uma kontenti. (1 Tes. 2:19, 20) Kes novu disiplu ki batiza, es é bons ‘karta di rekumendason’, ka sô pa kes algen ki studa Bíblia ku es, má tanbê pa kongregason interu. (2 Cor. 3:1-3) Nu ta fika txeu kontenti di odja ma duránti kuatu anu, fazedu uns 10 milhon di studus di Bíblia tudu mês na mundu interu. I duránti kes anu la, uns 280 mil algen batiza tudu anu. Kuzê ki nu pode faze pa djuda más algen, entri kes milhon di studanti, faze prugrésu i batiza? Jeová ten txeu paxénxa, i inda el sta da tudu algen xansi di bira disiplus di Kristu. Nton, nu krê faze nos midjór pa djuda kes algen txiga na batismu más faxi ki nu pode. Ténpu ki resta sta ta kaba! — 1 Cor. 7:29a; 1 Ped. 4:7. w20.10 6 ¶1-2

Rei Saul ka obi ku Jeová. I kantu proféta Samuel ba pâpia ku el sobri kel asuntu, el ka seta ma el faze mariadu. Envês di kel-li, el tenta ranja diskulpa pa kuza ki el faze, i el mostra ma se éru ka éra mutu gravi i el poi kulpa na otus. (1 Sam. 15:13-24) Un ténpu antis, Saul dja fazeba un kuza kuazi sima kel-li. (1 Sam. 13:10-14) É tristi di odja ma Saul dexa se korason bira orgulhozu. El ka muda se manera di pensa, pur isu Jeová nega-l. Nu ka krê ser sima Saul, pur isu nu debe pergunta nos kabésa: ‘Óras ki N ta lé konsedjus di Bíblia, N ta fika ta ranja diskulpa pa nha manera di pensa? N ta kustuma pensa ma nhas éru é ka mutu gravi si? Óras ki N faze un éru N ta poi kulpa na otus?’ Si nu responde sin pa kalker un di kes pergunta li, nu debe muda nos manera di pensa. Si nu ka faze si, nos korason pode bira txeu orgulhozu ki Jeová ka ta krê ser más nos amigu. w20.11 20 ¶4-5

Jóven, disidi kenha ki bu ta sirbi. Bu meste prova bu kabésa ken ki é Jeová, kal ki é se vontadi i modi ki bu pode faze-l na bu vida. (Rom. 12:2) Asi, bu ta pode toma kel disizon más inportanti di bu vida: ki é sirbi Jeová. (Jos. 24:15) Si bu ten ábitu di lé i studa Bíblia, bu amor pa Jeová ta bira más txeu i bu fé na el ta fika más fórti. Skodje poi vontadi di Jeová na primeru lugar na bu vida. Mundu di Satanás ta fla ma pa un algen ser filís el ten ki uza se kapasidadi pa el fika riku. Na verdadi, kes ki ta pensa sô na ganha dinheru, ta ‘poi ses kabésa na txeu sufrimentu.’ (1 Tim. 6:9, 10) Má, si bu obi ku Jeová i bu skodje poi se vontadi na primeru lugar na bu vida, bu ta ten bons rezultadu i ‘bu ta aji ku sabedoria.’ — Jos. 1:8. w20.10 30-31 ¶17-18

Na ténpu di apóstlus, Jizus ta pregaba un mensaji di speransa pa tudu algen. I el manda se sigidoris pa kontinua ta faze kel trabadju ki el kumesa, i pa es daba tistimunhu “na tudu kantu di mundu.” (Atus 1:8, BPK) Má é klaru ki kes disiplu ka ta konsigi fazeba es trabadju es sô. Es ta ben mesteba di spritu santu, ‘kel ajudador’ ki Jizus dja prometeba es. (João 14:26; Zac. 4:6) Sigidoris di Jizus resebe spritu santu na Pentikósti di anu 33. Ku ajuda di kel spritu, lógu es kumesa ta prega, i na poku ténpu milharis di algen seta notísias sábi. (Atos 2:41; 4:4) Kantu kumesa pirsigison, kes disiplu ka dexa medu toma kónta di es, má es pidi ajuda di Jeová. Es ora: “Da bu sérvus tudu koraji pa fla Bu Palavra.” Nton, es fika xeiu di spritu santu i es kontinua ‘ta pâpia di Palavra di Déus ku koraji.’ — Atus 4:18-20, 29, 31, BPK. w20.10 21 ¶4-5

Pamodi ki nu pode ten sertéza ma Jeová da Jizus vida otu bês? Txeu algen odja Jizus dipôs ki el resusitadu i es konta otus algen. (1 Cor. 15:5-7) Kel primeru tistimunha ki apóstlu Polu pâpia di el éra apóstlu Pedru, ki tanbê éra konxedu pa Séfas. Un grupu di disiplus tanbê fla ma Pedru odja Jizus dipôs ki el resusitadu. (Luc. 24:33, 34) Tanbê, kes 12 apóstlu odja Jizus dipôs ki el labantadu. Dipôs di kel-li, Kristu ‘parse pa más di 500 irmon sô di un bês’. Talvês kel-li kontise na kel runion sábi, na Galilea, ki sta na Mateus 28:16-20. Jizus tanbê ‘parse pa Tiagu’, ki éra se irmon sô pa ladu mai, ki antis ka ta kriditaba ma el éra Misías. (João 7:5) Dipôs ki Tiagu odja Jizus, el fika ku sertéza di kel-la. É interesanti odja ma kantu Polu skrebe es karta pa vólta di anu 55 D.J., txeu algen ki odja Jizus dipôs ki el resusitadu inda staba bibu. Pur isu, kalker algen ki tinha dúvida podia perguntaba kes tistimunha. w20.12 3 ¶5, 7-8

Óras ki nu sta duenti, inda más óras ki dja nu dura duenti, pode ser difísil pensa na kuzas dretu. Pidi Jeová pa djuda-u. É verdadi ki Jeová ka ta faze milagri pa kura-nu oji. Má el ta konsola-nu i el ta da-nu forsa ki nu meste pa nu aguenta firmi. (Sal. 94:19) Pur izénplu, el pode poi irmons di kongregason pa djuda-nu faze alguns trabadju na kaza. El pode poi irmons ta faze orason pa nos. Ô el pode pô-nu ta lenbra di promésas na Bíblia ki ta konsola-nu, sima kel speransa rei di sábi di un vida perfetu sen duénsa na kel mundu novu ki sta pa ben. (Rom. 15:4). Má nu pode xinti ma nu ka sta konsigi faze txeu na pregason. Un irman ki txomaba Laurel pasa 37 anu detadu déntu di un mákina ki ta djudaba el respira. Tanbê, el tinha kánser, el fazedu txeu operason i el tinha duénsas di péli. Má el ka fika kaladu. El ta pregaba pa infermerus i otus algen ki ta ba kuidaba di el. I el djuda peloménus 17 algen prende verdadi! w20.12 24 ¶9; 25 ¶12

Apóstlu Polu staba ta meste ajuda. Pa vólta di anu 56 D.J., un monti di algen rasta Polu pa fóra di ténplu na Jiruzalen i es tenta mata-l. Na kel otu dia, kantu Polu lebadu pa kel Tribunal más altu, se inimigus staba kuazi ta korta-l padás-padás. (Atos 21:30-32; 22:30; 23:6-10) Na kel momentu, talvês Polu pergunta: ‘Ti ki ténpu N ten ki kontinua ta aguenta kel-li?’ Ki ajuda Polu resebe? Dipôs ki Polu prendedu, ‘Sinhor’, Jizus, parse pa el di noti i el fla-l: ‘Koraji, sima bu pâpia di mi na Jiruzalen, bu meste ba pâpia di mi na Roma.’ (Atus 23:11, BPK) Kel nkorajamentu li txiga déntu d’óra. Jizus ilôjia Polu pa tistimunhu ki el daba na Jiruzalen. I el promete Polu ma el ta txigaba ku vida na Roma, undi ki el ta kontinua ta daba tistimunhu. Kel promésa li poi Polu ta xinti más suguru sima un mininu na brasu di se pai. w20.11 12 ¶1, 3; 13 ¶4

Nos speransa na Reinu é sima un ‘ánkura pa alma’. El ta djuda-nu mante kalmu i ten kunfiansa óras ki nu sta pasa pa situasons difísil ô óras ki nu sta preokupadu dimás. Nton pensa na kel promésa ki Jeová faze di un futuru na undi ki kes pensamentu negativu ka ta ben ten más. (Isa. 65:17) Imajina bu kabésa ta vive na un mundu novu di pas, undi ki kes situason ki ta pô-nu txeu preokupadu ka ta ten más. (Miq. 4:4) Tanbê, bu pode bira bu speransa más fórti óras ki bu ta pâpia di el ku otus algen. Faze tudu kel ki bu ta pode na trabadju di prega i di faze disiplus. Di kel manera li, bu ta ‘ten tudu sertéza di speransa ti ki fin txiga’. (Heb. 6:11) Sima nu sta ta txiga más pértu di fin di kel mundu li, nu ta ben ten más prubléma ki pode dexa-nu preokupadu dimás. Nu ta konsigi lida ku kes prubléma i kontinua kalmu, ka ku nos própi forsa, má ku kel kunfiansa ki nu ten na Jeová. Mostra ma bu ta kunfia na es promésa di Jeová: ‘Pa nhos ten forsa nhos ten ki kontinua kalmu i ten kunfiansa.’ — Isa. 30:15. w21.01 7 ¶17-18

Repara ma Salmo 103:8, ta mostra ma amor lial di Jeová sta ligadu ku un otu kualidadi bunitu ki el ten ki é mizerikórdia. (Êxo. 34:6) Un manera ki Jeová ta mostra-nu mizerikórdia é óras ki el ta púrdua nos éru. (Sal. 51:1) Má na Bíblia, mizerikórdia é más di ki sô púrdua un algen. Mizerikórdia é un sentimentu fórti ki ta motiva un algen pa djuda otu algen ki sta pasa pa un situason difísil. Jeová fla ma se dizeju di djuda-nu é más fórti ki kes sentimentu ki un mai ten pa se fidju. (Isa. 49:15) Óras ki nu ta pasa pa difikuldadi, é mizerikórdia di Jeová ki ta motiva-l pa el djuda-nu. (Sal. 37:39; 1 Cor. 10:13) Nu pode mostra mizerikórdia pa nos irmons óras ki nu ta purdua-s i nu ka ta guarda rankor. (Efé. 4:32) Má kel manera prinsipal di nu mostra mizerikórdia é óras ki nu ta djuda nos irmons ku irmans ki sta pasa pa prubléma. Asi, nu ta imita Jeová, ki é midjór izénplu na mostra konpaxon. — Efé. 5:1. w21.01 21 ¶5

Un xéfi di família meste toma kuidadu pa trabadju ka ser kel kuza más inportanti na se vida. El ka debe trabadja dimás pa sustenta se família i dexa di preokupa ku ses sentimentu, kuida di ses amizadi ku Jeová i trena-s. Jeová ta trena-nu i el ta disiplina-nu, pamodi el krê kel ki é midjór pa nos. (Heb. 12:7-9) Pa sigi izénplu di se Pai, Jizus ta trena ku amor kes ki sta dibaxu di se autoridadi. (João 15:14, 15) El é firmi, má el ta trata algen ku bondadi. (Mat. 20:24-28) El sabe ma nos é inperfetu i ma nos tendénsia é di faze kuzas mariadu. (Mat. 26:41) Un xéfi di família ki ta imita izénplu di Jeová i di Jizus, ta tenta ntende otus algen. El ta lenbra ma kes algen di se família é inperfetu. Pur isu, el ka ta ‘sai di kabésa’ ku se mudjer i se fidjus. (Col. 3:19) Envês di kel-li, el ta sigi kel konsedju ki sta na Galátas 6:1, i el ta tenta koriji-s ‘ku un spritu di brandura’, pamodi el ta lenbra ma el tanbê é inperfetu. Sima Jizus, el ta rekonhese ma midjór manera di inxina otus é através di se izénplu. w21.02 6-7 ¶16-18

Através di resgati, Jeová kunpra vida di kada algen na kongregason i di tudu kel ki krê bira disiplu di Kristu. (Mar. 10:45; Atos 20:28; 1 Cor. 15:21, 22) Dja ki Jizus da se vida sima resgati, ta faze tudu sentidu pamodi ki Jeová skodje-l pa el ser kabésa di kongregason. El é nos kabésa, pur isu el ten autoridadi pa kria régras ki ta fla kuzê ki kada algen, família ô kongregason debe faze. I el ten direitu di iziji pa obidesedu kes régra. (Gál. 6:2) Má Jizus ta faze más di ki sô kria régras. El ta da-nu kumida spritual i el ta kuida di kada un di nos ku amor. (Efé. 5:29) É Kristu ki dizigina ómis pa kuida di irmans. Pur isu, óras ki irmans ta sigi orientasons ki kes ómi li ta da-s, es ta mostra ma es ta ruspeta Kristu. Óras ki irmons ta trata irmans ku ruspetu, es ta mostra ma es ta ntende pamodi ki Jeová da-s algun autoridadi. Óras ki tudu algen na kongregason ta ntende i ta ruspeta kel autoridadi ki Jeová da alguns algen, ta ten pas na kongregason. I más inportanti inda, nu ta traze glória pa nómi di Jeová, ki é nos Pai na Séu ki ta ama-nu. w21.02 18-19 ¶14-17

Kantu Davidi ku se trópas staba ta vive sukundidu, es tevi ki dexa ses família na kaza pa es bai pa un géra. Timenti es staba na kel géra, alguns inimigu invadi ses kaza i leba ses família. Dja ki Davidi éra un trópa ki tinha txeu spiriénsa, el podia ranjaba un manera di rezolveba kel situason. Má envês di kel-li, el djobe orientason di Jeová. Davidi pergunta Jeová: ‘N debe bai tras di es grupu di bandidu?’ Jeová fla Davidi pa el pode bai i el da-l sertéza ma es ta konsigi tomaba ses família. (1 Sam. 30:7-10) Kuzê ki bu pode prende ku kel stória li? Jóvens, nhos djobe orientason di Jeová antis di toma un disizon. Pidi bu pai ku bu mai pa djuda-u. Tanbê, pidi ajuda di kes ansion ki ten spiriénsa. Jeová ta kunfia na kes ómi li i bo tanbê bu pode kunfia na es. Jeová ta odja ansions sima ‘prezentis’ pa kongregason. (Efé. 4:8) Ta ser bon pa bo si bu imita fé di kes ómi li i bu obi kes bon konsedju ki es ta da. w21.03 4-5 ¶10-11

Jizus fla ma un algen ki ka ta aplika kuzê ki el prende é sima un ómi ki faze se kaza na areia. El trabadja duru, má atoa. Pamodi? Pamodi si ben tenporal ku txeia, kel kaza ta ronba. (Mat. 7:24-27) Di mésmu manera, tudu kel sforsu ki nu ta faze ta ser atoa si nu ka faze sima nu prende. Óras ki nu pasa pa kes próva di fé sima prublémas ô pirsigison, nos fé ka ta pode aguenta. Má óras ki nu faze sima nu prende na nos studu di Bíblia, nu ta konsigi toma bons disizon, nu ta ten pas i nos fé ta fika más fórti. (Isa. 48:17, 18) Pa nu kontinua fiel pa Jeová mésmu óras ki nu ta pasa pa prubléma, nu meste kontinua ta faze orason i ta studa se Palavra sénpri. I nunka nu ka debe skese ma kuza más inportanti é da glória pa Jeová. Nu pode ten sertéza ma Jeová nunka ka ta bandona-nu i ma nada ki otus algen pode faze ka ta kaba ku amor ki Jeová ten pa nos. — Heb. 13:5, 6. w21.03 15 ¶6; 18 ¶20