Agostu

Ta parse ma Jizus staba ta pâpia di kes trópa di Roma ki prega se mô ku se pé na staka. Má el ka dexa kes injustisa ki el sufri, pô-l ta bira un algen xeiu di raiba i ku rankor. (1 Ped. 2:23) Sima Jizus, nu meste sta prontu pa púrdua otus. (Col. 3:13) Alguns algen i tanbê nos família talvês ta fika kóntra nos pamodi es ka ta ntende kes kuza ki nu ta kridita na el ô nos manera di vive. Talvês es ta konta mintira sobri nos, es ta rabaxa-nu na frenti di otus algen, es ta distrui nos publikason i ti es ta amiasa sota-nu. Envês di guarda rankor, nu pode pidi Jeová pa abri odju di kes algen li, asi pa un dia es pode prende verdadi. (Mat. 5:44, 45) Alvês é ka fásil púrdua, prinsipalmenti óras ki nu ta tratadu rei di mariadu. Má, si nu dexa simenti di raiba i di rankor kria na nos korason, nu ta prujudika sô nos kabésa. (Sal. 37:8) Óras ki nu ta disidi púrdua, nu sta skodje ka dexa kes kuza mariadu ki kontise ku nos pô-nu bira un algen xeiu di rankor. — Efé. 4:31, 32. w21.04 8-9 ¶3-4

Bu ten algun família ô amigu ki dizasosiadu? Kel-li pode ser un kuza txeu difísil! Pensa na modi ki foi difísil pa Jeová kantu alguns anju ki ta fazeba párti di se família bandona-l! (Jud. 6) I imajina modi ki el fika tristi kantu el odja israelitas, ki éra kel povu ki el ta amaba txeu, ta rabela kóntra el monti bês. (Sal. 78:41) Bu pode ten sertéza ma óras ki un algen ki nu ta ama bandona verdadi, Jeová ta fika txeu tristi i el ta ntende kel dór ki bu sta xinti! Ku bondadi, el ta da-u koraji i kel ajuda ki bu sta meste. Pai ku mai krê ses fidjus txeu. Pur isu, óras ki un di ses fidju ta bandona Jeová, é normal es fika ta pergunta kuzê ki es podia fazeba pa djudaba ses fidju kontinua ta sirbi Jeová. Un irmon fla: “N fika ta kulpa nha kabésa. I ti N ta sunhaba ku kuzas mariadu sobri kel-li.” Tanbê un irman ki pasa pa mésmu situason, txeu bês ta pensaba: “Na undi ki N fadja? N ta atxa ma N ka sforsa txeu pa poi verdadi na korason di nha fidju.” w21.09 26 ¶1-2, 4

Alguns algen ta atxa ma Tistimunhas di Jeová ka debe inxina Bíblia pamodi es ka faze kursu na ninhun di kes skóla inportanti sobri relijion. Es meste diskubri kal ki é verdadi. É kel-li ki skritor di Ivanjélhu di Lucas faze. El sforsa pa el ‘piskiza dretu tudu kes kuza désdi komésu’. El kreba pa kes algen ki ta leba se Ivanjélhu tinha ‘tudu sertéza di kes kuza ki es obi ta fladu’ sobri Jizus. (Luc. 1:1-4) Kes judeu di sidadi di Berea na ténpu antigu éra sima Lúkas. Kantu es obi kes notísia sábi sobri Jizus es ba piskiza na Skrituras Ebraiku pa es tinha sertéza ma éra verdadi. (Atos 17:11) Di mésmu manera, oji pesoas meste diskubri kal ki é verdadi. Es pode konpara kel ki povu di Jeová ta inxina ku kel ki Skrituras ta fla. Tanbê es meste studa stória di povu di Jeová di nos ténpu. Si es faze kel-li, kes kuza mariadu ki pesoas ta fla ka ta sega ses menti. w21.05 3 ¶7-8

Bu ta konsigi pensa na algun irmon di kongregason ki bu pode konvida pa nhos pasa ténpu djuntu? Ten alguns momentu ki nos irmons ta meste más inda pa nu sta djuntu ku es. Pur izénplu, pode ser difísil pa alguns irmon pasa kes dia feriadu djuntu ku ses família ki é ka Tistimunhas di Jeová. Otus ta fika txeu tristi óras ki ta txiga data ki ses família móre. Óras ki nu ta oferese pa sta na ladu di nos irmons na kes momentu difísil la, nu ta mostra ma nu ta preokupa ku es di verdadi. (Fil. 2:20) Sima dja nu odja, ten txeu motivu ki ta poi un kriston ta xinti el sô alvês. Má nunka nu ka debe skese ma Jeová ta ntende rei di dretu kuzê ki nu sta xinti. Txeu bês, el ta uza nos irmons ku irmans pa da-nu kel ki nu meste. (Mat. 12:48-50) I nos nu ta mostra nos gratidon pa amor ki Jeová ta mostra-nu, óras ki nu ta da nos midjór pa apoia irmons di nos kongregason. Ka ta nporta kuzê ki bu sta xinti, Jeová sénpri ta sta ku bo! w21.06 13 ¶18-20

Alguns algen ka ta krê obiba mensaji ki Jizus ta pregaba, má simé el mante un atitudi puzitivu na se pregason. Pamodi? Pamodi el sabia ma pesoas meste prendeba verdadi i el krê djudaba tudu kes ki el ta podeba pa seta mensaji di Reinu. Má tanbê el sabia ma alguns ki na komésu ka ta krê obiba, dipôs es pode mudaba di atitudi. Odja kuzê ki kontise na própi família di Jizus. El prega duránti três anu i meiu má ninhun di se irmons ka bira se disiplu. (João 7:5) Má dipôs ki Jizus resusitadu, es bira kriston. (Atos 1:14) Nu ka ta pode sabe ken ki ta bira un sérvu di Jeová. Alguns algen ta leba más ténpu di ki otus pa prende verdadi. I mésmu kes ki na komésu ka ta krê obi-nu, es pode bira ‘ta da Deus glória’ pamodi nos bon konportamentu i atitudi puzitivu. w21.05 18 ¶17-18

Kantu Jizus staba na Téra, el da se sigidoris dôs responsabilidadi. El manda-s pa es prega notísias sábi di Reinu, i el inxina-s modi ki es ta fazeba kel-la. (Luc. 8:1) Pur izénplu, Jizus flaba se disiplus kuzê ki es devia fazeba óras ki pesoas ta obiba mensaji di Reinu i kuzê ki es devia fazeba óras ki pesoas ka ta krê obiba. (Luc. 9:2-5) Tanbê kantu el fla ma se disiplus ta daba ‘tistimunhu pa tudu nasons’, el staba ta fla ma es ta ben pregaba pa txeu algen i na txeu lugar. (Mat. 24:14; Atos 1:8) Tanbê, el fla se sigidoris pa es inxina pesoas obidese tudu kes kuza ki el inxina-s. Jizus mostra ma kel trabadju inportanti li ta kontinuaba ti na nos ténpu, ô ‘ti fin di es sistéma.’ (Mat. 28:18-20) I na kel vizon ki el da Juan, Jizus dexa klaru ma tudu se disiplus ten responsabilidadi di djuda otus prende sobri Jeová. —  Apo. 22:17. w21.07 2-3 ¶3-4

Na mundu di oji txeu algen ta krê ser midjór di ki otus. I es ka ta preokupa na modi ki ses atitudi pode mágua otus. Pur izénplu, un algen di nogósiu pode faze kuzas ki ta prujudika otus sô pa el pode ten más lukru. Un atléta pode prujudika di abuzu un jugador di otu ekipa, asi pa el pode ganha jogu. Un alunu pode kôpia na un próva pa el konsigi entra na un universidadi txeu famozu. Anos ki é Tistimunhas di Jeová, nu sabe ma faze kes kuza li é mariadu pamodi es ta faze párti di ‘kes óbra di karni’. (Gál. 5:19-21) Má, sérvus di Jeová pode poi konpitison na kongregason sen es da kónta? Kel-li é un pergunta inportanti pamodi konpitison pode tra pas di kongregason. Nu ta faze dretu, si nu analiza izénplu di sérvus di Jeová ki sta na Bíblia, ki ka tenta konpiti ku kunpanheru. w21.07 14 ¶1-2

Amor lial ta pô-nu ta djuda kes ki sta dizanimadu. Oji irmons ku irmans amorozu ta sforsa txeu pa djuda kes algen na kongregason ki sta xinti tristi ô dizanimadu. Es ta faze kel-li pamodi amor i es ta faze tudu kel ki es pode pa djuda kes irmon. (Pro. 12:25, nóta di rodapé; 24:10) Kel-li sta di akordu ku konsedju ki apóstlu Polu da. El fla: ‘Nhos konsola kes ki sta diprimidu, nhos djuda kes fraku, nhos ten paxénxa ku tudu algen.’ (1 Tes. 5:14) Txeu bês midjór manera di djuda un algen ki sta dizanimadu é obi-l ku atenson i dexa-l sabe ma nu ta ama-l. Jeová ta da txeu valor pa kuzê ki nu ta faze pa djuda se sérvus fiel. Provérbios 19:17 ta fla: ‘Ken ki ta djuda póbri sta ta pista Jeová, i El ta rekonpensa-l pa kel-li.’ w21.11 10 ¶11-12

Kuzê ki nu pode faze gósi pa nu pripara pa futuru? Nu debe sta kontenti ku kel ki nu ten i pamodi nos é amigu di Jeová. Sima nu ta ba ta konxe nos Deus, nu ta ten más sertéza ma el ten kapasidadi di proteje-nu óras ki Gogi di Magogi ben ataka-nu. Kes palavra ki sta na testu di oji ta splika pamodi ki Davidi tinha sertéza ma el pode kontaba ku ajuda di Jeová. Davidi txeu bês kunfia na Jeová i se Deus nunka ka diziludi-l. Pur izénplu, kantu el éra jóven, el tevi ki briga ku Gulias, ki éra un Filisteu jiganti i un trópa balenti. Davidi fla-l: ‘Oji mê, Jeová ta ntrega-u na nha mô’. (1 Sam. 17:46) Dipôs, kantu Davidi staba ta sirbi na palásiu di Rei Saul, el tenta mata Davidi txeu bês. Má ‘Jeová staba ku’ Davidi. (1 Sam. 18:12) Davidi tinha sertéza ma Jeová ta djudaba el na kes prubléma ki el staba ta pasa pamodi dja el djudaba el antis. w22.01 6 ¶14-15

Jeová faze tudu kuza ku paxénxa. Pa kel-li, el uza kel ténpu ki mesteba. El faze kel-li pa el pode da glória pa se nómi i pa djuda otus algen. Pur izénplu, odja modi ki Jeová pripara Téra poku-poku pa nos. Bíblia ta fla ma el pô-l ‘medida’, el pô-l ‘se bazi finkadu’ i el pô-l se ‘pédra di kantu’. (Jó 38:5, 6) I ti el tra un ténpu pa el djobe tudu kel ki el faze. (Gén. 1:10, 12) Bu ta konsigi imajina modi ki anjus xinti sima es ba ta odja kes kuza ki Jeová staba ta kria? Talvês es fika uma kontenti. É pur isu ki es kumesa ta ‘grita di lovor’. Kuzê ki nu ta prende? Leba milharis di anu pa Jeová tirmina di faze se kriason. Má bale péna faze tudu kuza poku-poku i ku kuidadu. Kantu el para pa el odja tudu kes kuza ki el faze, Jeová odja ma tudu staba ‘rei di bon.’ —  Gén. 1:31. w21.08 9 ¶6-7

Na ilustrason di taléntu, Jizus konta ma un ómi staba pa viaja. Antis di el bai, el txoma se skravus i el da kada un di es alguns taléntu pa es faze nogósiu. Kel ómi sabia ma se skravus tinha kapasidadis diferenti. Pur isu, el da un skravu 5 taléntu, el da kel otu 2 taléntu i el da kel tirseru skravu 1 taléntu. Kes dôs primeru skravu trabadja ku npenhu pa ses patron. Má kel tirseru ka faze nada ku kel dinheru ki el dadu. Pur isu, se patron kóre ku el di trabadju. Kel primeru ku kel sugundu skravu leba asériu kel responsabilidadi ki es dadu i es trabadja duru pa ses patron. Nton ku kes dôs taléntu, es ganha más dôs i es rekonpensadu pa ses trabadju duru i ses kapasidadi. Kel patron fika kontenti ku ses trabadju i el da-s más responsabilidadi! w21.08 21 ¶7; 22 ¶9-10

Jeová sta ta mostra txeu paxénxa na es ténpu di fin. El ka krê pa ningen distruídu. (2 Ped. 3:9) El sta ta da tudu algen xansi di rapende. Má paxénxa di Jeová ten limiti. Kenha ki ka seta kel oportunidadi ki Jeová sta ta da, el sta poi se kabésa na mésmu situason ki Faraó na ténpu di Muizés. Jeová fla Faraó: ‘Pa gósi dja N stikaba nha mô pa kastigaba abo ku bu povu, ku un praga ki ta distrui, i nhos ta dizaparseba di Téra. Má, é pamodi kel-li própi ki N dexa-u fika bibu: pa N mostra-u nha puder i pa papiadu di nha nómi na Téra interu.’ (Êxo. 9:15, 16) Tudu nasons ta ben rekonhese ma Jeová é úniku Deus verdaderu. (Eze. 38:23) Má kel tremor li é diferenti di kel ki testu di oji ta pâpia di el. Kel-li krê fla ma kes algen, ki sima Faraó, nega rekonhese kel direitu ki Jeová ten di governa, ta ben kabadu ku el pa tudu ténpu. w21.09 18-19 ¶17-18

Bu sta xinti dór na korason pamodi un algen ki bu ta ama dizasosiadu? Má i si alguns na kongregason fla ô faze algun kuza ki pô-u ta xinti más piór? Ka bu spéra ma tudu algen ta fla-u kel ki é dretu. (Tia. 3:2) Nos tudu é inperfetu. Nton, ka bu fika spantadu si alguns algen ka sabe kuzê ki es ta fla, ô si ti mésmu es fla algun kuza ki dexa-u maguadu. Lenbra di konsedju ki apóstlu Polu da: ‘Nhos kontinua ta suporta kunpanheru i ta púrdua kunpanheru di korason, sikrê algen tene algun razon di kexa’. (Col. 3:13) Kontinua ta apoia kes algen ki ten família dizasosiadu. Es meste bu amor i nkorajamentu, prinsipalmenti gósi. (Heb. 10:24, 25) Alvês, alguns irmon ta para di pâpia ku kes algen ki ten família dizasosiadu. I kes algen li ta xinti sima ki es sta dizasosiadu tanbê. Ka bu dexa kel-li kontise! Kes jóven ki ten pai ô mai dizasosiadu meste nkorajamentu i ilojiu mutu más txeu inda. w21.09 29 ¶13-14; 30 ¶16

Óras ki kes irmon di idadi ku kes más jóven ta pâpia ku kunpanheru, es tudu ta xinti nkorajadu. (Rom. 1:12) Anhos ki é más jóven nhos ta ten más kunfiansa ma Jeová ta kuida di se sérvus fiel i kes irmon di idadi ta xinti ma ses irmon ta ama-s. Nos irmons di idadi ta fika kontenti di konta-u modi ki Jeová abensua-s duránti ses vida. Normalmenti, óras ki un algen ta ten más idadi, se bunitéza ta ba ta kaba. Má pa Jeová, kes ki é lial pa el ta bira kada bês más bunitu. (1 Tes. 1:2, 3) Pamodi? Pamodi duránti ses vida, sénpri es dexa spritu di Jeová djuda-s dizenvolve kes kualidadi bunitu. Nos irmons ku irmans di idadi ten txeu valor. Sima nu ta ba ta konxe-s, onra-s i nu prende ku es, nu ta odja ma es é un tizoru ki ka ten présu! Kongregason ta fika más fórti ka sô óras ki jóvens ta da kes irmon di idadi valor, má tanbê óras ki kes irmon di idadi ta da jóvens valor. w21.09 7 ¶15-18

Nu ten ki toma kuidadu pa nu ka ser duru, má nu debe ser ‘riku na mizerikórdia’, sima nos Deus. (Efé. 2:4) Mizerikórdia é más di ki sô xinti péna di otus. Un algen ki ten mizerikórdia ta “faze kuza pa djuda otus”. Nton nos tudu, nu debe presta txeu atenson pa nu odja si algen na nos família, na nos kongregason ô na lugar ki nu ta mora meste di ajuda. Asi, nu ta atxa txeu oportunidadi di mostra mizerikórdia! Pur izénplu, sta algun algen ki meste konsolu? Bu ta pode da-l un ajuda ki el meste, talvês faze-l kumida ô algun otu kuza? Sta algun irmon ki readimitidu i ki sta meste konsolu ô nkorajamentu di un amigu? Nu ta pode konsola otus algen na nos tiritóriu ku kes notísia sábi? (Jó 29:12, 13; Rom. 10:14, 15; Tia. 1:27) Si nu fika sienti na nisisidadis di otus algen, nu ta odja ma ten txeu oportunidadi di nu mostra mizerikórdia. Óras ki nu ta mostra kel kualidadi li, nos Pai na Séu, kel Deus ki é ‘riku na mizerikórdia’ ta fika txeu kontenti! w21.10 13 ¶20-22

Na Salmo 23, Davidi pâpia di kuzas ki ten txeu valor, sima kes bon kuza ki Jeová dja daba el pamodi el dexa Jeová ser se Pastor. Jeová gia-l na ‘kes kaminhu di justisa’, i El kontinua ta djuda Davidi na kes ténpu sábi i na kes ténpu difísil. Davidi sabia ma el ta tinha prublémas sikrê Jeová staba ta orienta-l. Alvês el ta xintiba dizanimadu sima si el staba ta anda na meiu di un ‘rubera txeu sukuru’, i tanbê el tinha ki lidaba ku se inimigus. Má dja ki Jeová éra se Pastor, Davidi ‘ka ta xintiba medu di ninhun kuza mariadu’. Di ki manera Davidi ‘ka xinti falta di nada’? El tinha tudu kuza ki el mesteba pa el tinha un amizadi fórti ku Jeová. Se alegria ka ta dipendeba di kuzas material. Davidi staba kontenti ku kel ki Jeová ta daba el. Kuza más inportanti pa el éra ten benson i proteson di se Deus. Palavras di Davidi ta inxina-nu ma kuzas material ka debe ser más inportanti pa nos. w22.01 3-4 ¶5-7

Duránti stória, txeu sérvu di Jeová prega pa pesoas ki ka krê obiba es. Pur izénplu, Nué éra ‘pregador di justisa’. Talvês el faze kel-li pa uns 40 ô 50 anu. (2 Ped. 2:5) Di sertéza, Nué kreba pa pesoas obiba el, má Jeová ka fla-l ma kel-la ta kontiseba. Má kantu Jeová da Nué kes orientason pa el faze arka, el fla-l: ‘Bu debe entra na arka ku bus fidju, bu mudjer i kes mudjer di bus fidju.’ (Gén. 6:18) I kantu Deus splika Nué kal ki éra tamanhu di arka, Nué talvês da kónta ma é ka txeu algen ki sta ba obiba el, pamodi arka ka ta kebeba tudu es. (Gén. 6:15) Sima nu sabe, ningen ka obi ku el. (Gén. 7:7) Kel-li krê fla ma Jeová atxa ma Nué ka tevi bons rezultadu na se trabadju di pregason? Klaru ki nau! Nué foi fiel i el faze tudu kel ki Jeová manda-l. Pa Jeová, Nué tevi bons rezultadu na se trabadju di pregason. —  Gén. 6:22. w21.10 26 ¶10-11

Imajina modi ki Ruti talvês xinti kantu el obi kuzê ki Nuemi fla! Ruti faze di tudu pa djuda Nuemi. El txora ku el, el konsola-l i el anda txeu dia djuntu ku el. Má sikrê ku tudu sforsu ki el faze, Nuemi fla: ‘Jeová pô-m ta volta ku mô baziu.’ Kes kuza ki Nuemi fla ta parse sima ki el ka ta daba valor pa ajuda ki Ruti da-l. Ruti staba na ladu di Nuemi kantu ki el fla kes palavra li. Talvês Ruti fika txeu tristi! Má simé Ruti ka bandona Nuemi. (Rute 1:3-18) Alvês ku tudu sforsu ki nu ta faze pa djuda un irman ki sta dizanimadu, el pode fla-nu un kuza ki magua-nu. Má nu ka debe fika xatiadu. Nu ka debe bandona nos irman i nu debe pidi Jeová pa djuda-nu atxa un manera di konsola-l. (Pro. 17:17) Talvês un irman sta ta meste di ajuda. Sikrê na komésu el ka seta nos ajuda, amor lial ta pô-nu ka ta dizisti di el. — Gál. 6:2. w21.11 11 ¶17-19

Na Bíblia, palavras ‘santu’ ô ‘santidadi’ ten aver ku un konportamentu linpu ô un adorason linpu ô sagradu. Kes palavra li tanbê pode siginifika sta siparadu pa sirbi Deus. Kel-li krê fla ma nu pode ser santu sô si nu ten un konportamentu linpu, si nu adora Jeová sima el ta krê i si nu ten un amizadi fórti ku el. Sô di pensa ma nu pode ten un amizadi fórti ku nos Deus santu, nu ta fika dimiradu, prinsipalmenti óras ki nu ta odja kuzê ki Bíblia ta inxina sobri santidadi di Jeová. Jeová é puru i linpu na tudu kuza. Nu pode odja kel-li na kuzê ki alguns serafin, ki é kes anju ki ta sta pértu di tronu di Deus, fla: ‘Santu, santu, santu é Jeová di izérsitu.’ (Isa. 6:3) Má pa kes anju ten un amizadi fórti ku Jeová, es tanbê es debe ser santu, i es é santu própi. w21.12 3 ¶4-5

Jóvens txeu bês ta pensa na kel midjór manera di vive ses vida. Má ses profesor i ses família ki é ka Tistimunhas di Jeová ta insentiva-s pa es bai universidadi, asi pa es pode ten un bon trabadju i pa es ganha txeu dinheru. Toma kel disizon li ta toma-s txeu ténpu. Má ses pai ku ses mai i ses amigus na kongregason pode insentiva jóvens pa uza ses ténpu na sirvisu di Jeová. Kuzê ki pode djuda un jóven ki ta ama Jeová toma kel midjór disizon? Un kuza ki pode djuda-l é lé Efésios 5:15-17, i pensa na el. Dipôs di lé kes versíklu, un jóven pode pergunta: “Kal ki é ‘vontadi di Jeová’? Ki disizon ta dexa-l kontenti? Ki disizon ta djuda-m uza nha ténpu di midjór manera?” Lenbra, nu sta vive na un ‘ténpu mau’ i kel mundu li ki é governadu pa Satanás ta ben kaba já já. w22.01 27 ¶5

Na ki ténpu ki Tiagu bira un disiplu lial di Jizus? Dipôs ki Jizus resusitadu, ‘el parse pa Tiagu i dipôs pa tudu kes apóstlu.’ (1 Cor. 15:7) Dipôs ki Tiagu odja Jizus, el bira se disiplu. El staba djuntu ku kes otu apóstlu, na primeru andar di un kaza na Jiruzalen, ta spéra resebe spritu santu. (Atos 1:13, 14) Dipôs, Tiagu tevi priviléjiu di sirbi na grupu enkaregadu di óbra na ténpu di apóstlus. (Atos 15:6, 13-22; Gál. 2:9) I algun ténpu antis di anu 62, spritu santu orienta-l pa el skrebe un karta pa kristons skodjedu ku spritu santu. Kel karta ta djuda-nu oji, ka ta nporta si nu ten speransa di vive na Séu ô na Téra. (Tia. 1:1) Un storiador di ténpu di apóstlus ki txomaba Juzefu, fla ma Ananias, ki éra Saserdóti Prinsipal i fidju di Anás, manda mata Tiagu. Tiagu kontinua fiel pa Jeová ti fin di se vida li na Téra. w22.01 8 ¶3; 9 ¶5

Un kuza ki nu ta prende na testu di oji, é ma nu ka debe spéra ma Jeová ta proteje-nu di kes dizafiu ki ta poi nos fé na próva. Sima Jizus testadu ti se limiti, nos tanbê nu debe sta priparadu pa mostra ma nos é fiel ti mórti si meste. (Mat. 16:24, 25) Má Deus ta da-nu sertéza ma el ka ta dexa-nu ser provadu más di ki kel ki nu ta pode aguenta. (1 Cor. 10:13) Otu kuza ki nu pode prende é ki, sima Jizus nu pode sufri mésmu ki nu ka faze nada mariadu. (1 Ped. 2:19, 20) Kes ki ta fika kóntra nos ta faze kel-li ka pamodi nu faze algun kuza mariadu, má pamodi nu ka ta faze párti di mundu i nu ta difende verdadi. (João 17:14; 1 Ped. 4:15, 16) Jizus ntende pamodi ki Jeová dexa-l sufri. Má alvês óras ki alguns irmon fiel ta pasa pa prublémas, es ta pergunta pamodi ki Jeová dexa kel-la kontise. (Hab. 1:3) Nos Deus ten mizerikórdia i el ten paxénxa ku kes irmon li. Jeová ta ntende ma kel-li é ka sinal di falta di fé. Má, kel-li ta mostra ma es meste konsolu ki sô el ki ta pode da. — 2 Cor. 1:3, 4. w21.04 11 ¶9-10

Jeová ta seta nos adorason si nu sta ta faze se vontadi, si nu ta ama-l i si nu ta ruspeta-l. Nu sabe ma el merese nos adorason i nu krê faze kel-li di midjór manera. Un di kes manera di adora Jeová é óras ki nu ta ora pa el. Bíblia ta fla ma nos orason é sima kel insénsu ki es ta priparaba ku kuidadu pa ofereseba na tabernákulu i dipôs na ténplu. Jeová gostaba di kel insénsu. Di mésmu manera, kes orason ki nu ta faze di korason é ‘un kuza sábi’ pa Jeová, sikrê nu uza palavras sinplis. (Pro. 15:8; Deut. 33:10) Jeová gosta di obi kes orason ki ta mostra nos amor i gratidon pa el. El krê pa nu konta-l nos preokupason, pa nu pâpia ku el sobri nos speransa i nos dizejus. Antis di bu faze orason pa Jeová, pamodi ki bu ka ta para i pensa na kuzê ki bu sta ba fla? Si bu faze kel-li, bu ta oferese Jeová kel midjór “insénsu” ki bu pode da-l. w22.03 20 ¶2; 21 ¶7

Na Armajedon, é ka nos ki ta ben disidi pa kenha ki Jeová ta mostra ô pa kenha ki el ka ta mostra mizerikórdia. (Mat. 25:34, 41, 46) Nu ta ben kunfia na julgamentu di Jeová, ô nu ta ben para di sirbi-l pamodi nu ka konkorda ku se disizons? É klaru ki nu meste kunfia na Jeová más txeu gósi pa nu pode kunfia na el di tudu korason na futuru. Imajina modi ki nu ta ben xinti na mundu novu. Relijion falsu ka ta ben ten más, nen kes ómi di nogósiu ki é ganansiozu i kes governanti ki dja ten txeu ténpu ta maltrata pesoas i ta poi mundu na mizéria. Prublémas di saúdi, bedjisa i mórti di kes algen ki nu ta ama ka ta ben faze párti di nos vida más. Satanás ku se dimónis ta ben podu prézu pa mil anu i tudu kes kuza mariadu ki kontise pamodi es ta ben kaba. (Apo. 20:2, 3) Nu ta ben fika txeu kontenti pamodi nu kunfia na manera ki Jeová ta faze kuzas! w22.02 6-7 ¶16-17

Jizus sforsa pa faze pas i el insentiva otus algen pa rezolve prublémas ku kunpanheru. El inxina-s pa es faze pas ku kunpanheru si es kreba pa Jeová setaba ses adorason. (Mat. 5:23, 24) I txeu bês el djuda se apóstlus para di diskuti sobri kal di es éra más inportanti. (Luc. 9:46-48; 22:24-27) Pa nu mante pas, nu ten ki faze más di ki sô ivita prublémas. Nu ten ki sforsa pa faze pas i insentiva nos irmons ku irmans pa rezolve prublémas ku kunpanheru. (Fil. 4:2, 3; Tia. 3:17, 18) Nu pode faze kes pergunta li: ‘Kuzê ki N sta dispostu na faze pa N mante pas ku otus algen? Óras ki un irmon ô un irman magua-m, N ta guarda rankor? N ta spéra ma é kel algen ki ten ki ben faze pas ku mi ô N ta tenta faze pas ku el sikrê N ta atxa ma el ki é kulpadu?’ w22.03 10 ¶10-11

Dja ten txeu ténpu ki Bíblia flaba ma povu di Deus ta ‘ofereseba ses kabésa di livri vontadi’ pa sirbi Jeová dibaxu di orientason di se Fidju. (Sal. 110:3) Di sertéza kel profesia li sta ta kunpri oji. Tudu anu, povu di Jeová ta gasta milhons di óra na trabadju di pregason. Es ka ta pagadu pa ses trabadju, es ta faze kel-li pamodi es krê. Tanbê, es ta tra ténpu pa djuda ses irmon ten kes kuza ki es meste, pa nkoraja-s i pa djuda-s ten un amizadi fórti ku Jeová. Ansions ku ajudantis di kongregason ta gasta txeu óra na pripara pártis pa runion i na faze vizita di pastoreiu. Pamodi ki povu di Jeová ta faze kes trabadju li? É pamodi ses amor pa Jeová i pa pesoas. (Mat. 22:37-39) Jizus mostra ma el ta preokupaba más ku nisisidadi di otus algen di ki di sel. Kel-li é un bon izénplu pa nos. Nu krê faze nos midjór pa nu ser sima el. (Rom. 15:1-3) Si nu faze kel-li, é nos ki ta ganha. w22.02 20 ¶1-2

Na Israel, maioria di algen ta trabadjaba na agrikultura i es ta resebeba na fin di kada dia. Nton si un algen nega pagaba un trabadjador, el ka ta tinha dinheru pa daba se família kumida na kel dia. Pur isu, Jeová fla kel-li: ‘El sta pasa nisisidadi i se vida ta dipende di kel saláriu.’ (Deut. 24:14, 15; Mat. 20:8) Oji txeu trabadjador ta resebe pa dia i otus ta resebe pa simana ô pa mês. Ka ta nporta kal ki é situason, kel prinsípiu ki sta na Levítico 19:13, inda ta sirbi pa nos. Alguns patron ta splora ses npregadu i es ka ta paga-s kel dinheru ki es merese. Es sabe ma kes trabadjador pode ka ten undi bai i pur isu es ta seta kalker saláriu. Na verdadi, kes patron sta ta ‘fika ku saláriu’ di un trabadjador. Un sérvu di Jeová ki ten pesoas ta trabadja pa el, debe leba kel-li asériu i ser justu. w21.12 10 ¶9-10

Ta da pa ntende pamodi ki Jizus staba ku txeu sedi. Dja el aguentaba txeu sufrimentu. Jizus ka ta pensaba ma fla modi ki el staba ta xinti éra un sinal di frakéza. Nos tanbê nu ka debe pensa si. Na txeu situason di nos vida nu ta prifiri ka fla ningen kuzê ki nu sta meste. Má, si nu sta na algun situason ki nu meste ajuda, nu ka debe xinti medu di pidi ajuda di otus algen. Pur izénplu, si dja nu sta algen grandi ô nu sta duenti, talvês nu meste pidi un amigu pa bai ku nos faze kónpra ô faze un konsulta. Si nu sta tristi ô dizanimadu, nu pode pidi un ansion ô un irmon ku más spiriénsa pa obi-nu ku atenson ô pa fla-nu ‘un palavra sábi ki ta poi korason fika kontenti.’ (Pro. 12:25) Nu lenbra ma nos irmon ku irmans ta ama-nu i es krê djuda-nu na ‘ténpu di frónta.’ (Pro. 17:17) Má, es ka sabe kuzê ki nu ta pensa ô ki nu ta xinti. Es ka ta konsigi sabe si nu sta meste ajuda si nu ka pâpia ku es. w21.04 11-12 ¶11-12

É difísil pa txeu di nos lida ku mudansas. Alguns irmon ki dja ten txeu ténpu na sirvisu pa ténpu interu, mudadu di diziginason. Pamodi idadi, otus tevi ki para ses sirvisu ki es ta amaba txeu. É normal nu xinti tristi óras ki nos situason ta muda. Nu ta konsigi lida midjór ku mudansas óras ki nu ta odja kuzas sima Jeová ta odja. Oji el sta ta faze txeu kuza i nu ten un priviléjiu grandi di trabadja djuntu ku el. (1 Cor. 3:9) Amor ki Jeová ten pa nos ka ta muda. Pur isu, ka bu perde ténpu ta pensa pamodi ki fazedu un mudansa na organizason. Envês di bu fika ta pensa na ‘kes ténpu antigu’, pidi Jeová pa djuda-u odja algun kuza bon na kel mudansa. (Ecl. 7:10) Mante un atitudi puzitivu. Asi, nu ta mante nos alegria i nu ta kontinua fiel pa Jeová sikrê nos situason muda. w22.03 17 ¶11-12

Pa kenha ki Jeová ta mostra amor lial? Bíblia ta fla ma nu pode ama ô gosta di txeu kuza, sima ‘agrikultura’, ‘vinhu i azeti’, ‘disiplina’, ‘konhisimentu’ i ‘sabedoria’. (2 Cró. 26:10; Pro. 12:1; 21:17; 29:3) Má nu ka ta konsigi mostra amor lial pa kuzas ô ideias. Nu ta mostra-l sô pa algen. Jeová ka ta mostra se amor lial pa kalker algen. El ta mostra amor lial sô pa kes ki ten un amizadi fórti ku el. Nos Deus é un algen lial pa se amigus. Jeová faze promésas rei di sábi pa kada un di se sérvus i nunka el ka ta para di ama-s. Jeová mostra se amor pa tudu algen. Jizus flaba un ómi ki txoma Nikodemus: ‘Deus ama mundu [ô tudu algen] di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ —  João 3:1, 16; Mat. 5:44, 45. w21.11 2 ¶3; 3 ¶6-7

Vida na kel mundu li é difísil. I na futuru, nu ta ben pasa pa prublémas más difísil inda. (Mat. 24:21) Nu tene gana pa tudu kes prubléma li dexa di izisti i pa txiga kel dia ki nu ka ta ben lenbra di ninhun di es! (Isa. 65:16, 17) Kel-li ta mostra klaru ma nu meste kontinua ta bira nos kapasidadi di aguenta firmi más fórti. Pamodi? Jizus fla: ‘Pamodi nhos kapasidadi di aguenta firmi, nhos ta salva nhos vida.’ (Luc. 21:19) Pensa na modi ki otus sta ta aguenta firmi ku prublémas sima di nos, ta djuda-nu aguenta firmi tanbê. Kenha ki é kel midjór izénplu na aguenta firmi? Jeová nos Deus. Bu ta fika spantadu di obi kel-li? Para i bu pensa un bokadinhu. Kel mundu li sta na puder di Diabu i pur isu el sta xeiu di prubléma. Jeová ten puder di kaba ku kes prubléma li kalker óra. Má, el sta ta spéra pa txiga kel dia sértu pa faze kel-li. (Rom. 9:22) Timenti kel dia ka txiga, kuzê ki el sta ta faze? El sta kontinua ta aguenta firmi. w21.07 8 ¶2-4