Otubru

Kes kuza ki nu ta inxina i ki nu ta kridita na es ten bazi na Palavra di Deus. Má simé, txeu algen oji ta tropesa pamodi es ta atxa ma nos manera di adora Deus é sinplis dimás i pamodi kel ki nu ta inxina é ka kel ki es ta krê obi. Kuzê ki nu meste faze pa nu ka tropesa? Apóstlu Polu fla kes kriston na Roma: ‘Fé ta sigi kel ki algen obi. I kel ki algen ta obi ta ben através di palavra sobri Kristu.’ (Rom. 10:17) Kes serimónia ki relijions ta faze pode ser bunitu i ti dexa algen dimiradu, má es ka ta poi nos fé ta bira fórti. Kuzê ki ta djuda-nu ten un fé fórti é studa Palavra di Deus, pamodi ‘sen fé nu ka ta pode agrada Deus’. (Heb. 11:1, 6) Pur isu, pa nu ten un fé fórti nu meste ten konhisimentu izatu. Nton, pa nu ten sertéza ma dja nu atxa verdadi, nu ka meste odja ninhun sinal di Séu ki ta dexa-nu dimiradu. Si nu studa Palavra di Deus ku kuidadu nos fé ta bira más fórti. I sô kel-li ta txiga pa kaba ku kalker dúvida ki nu ten. w21.05 4-5 ¶11-12

Apóstlu Polu lida ku txeu dizafiu. El mesteba forsa di Jeová prinsipalmenti kantu se inimigus sota-l, prende-l, pô-l prézu i ti tenta mata-l. (2 Cor. 11:23-25) Polu tanbê rekonhese ma el ta lutaba kóntra sentimentus negativu. (Rom. 7:18, 19, 24) Alén di kel-li, el tevi ki aguenta un prubléma ki éra sima un ‘spinhu na karni’ i tevi un momentu ki el tinha txeu vontadi pa Deus tra-l kel spinhu. (2 Cor. 12:7, 8) Sikrê ku tudu kes dizafiu ki Polu pasa pa el, Jeová da-l forsa. Di kel manera li, el konsigi faze se trabadju pa Deus konplétu. Pur izénplu, duránti un ténpu, Polu staba prézu na un kaza na Roma, má simé el konsigi pâpia di notísias sábi ku kes líder di judeus i talvês ku kes algen inportanti di govérnu di Roma. (Atos 28:17; Fil. 4:21, 22) Tanbê el prega pa txeu di kes guarda di inperador i kes algen ki ta ba vizitaba el. (Atos 28:30, 31; Fil. 1:13) É na kel ténpu la ki Jeová uza Polu pa skrebe alguns karta ki djuda kristons verdaderu di kel ténpu i ki ti inda ta djuda-nu. w21.05 21 ¶4-5

Pamodi orgulhu, rei Uzias di Judá, nega obi konsedju di otus algen i el faze un kuza ki el ka tinha direitu di faze. Uzias éra un ómi ki tinha txeu kapasidadi. El ganha txeu géra, el faze txeu sidadi i el tinha txeu lugar di fazeba plantason. ‘Kel Deus verdaderu ta djudaba el ta ten bons rezultadu.’ (2 Cró. 26:3-7, 10) Má Bíblia ta fla: ‘Lógu ki el bira fórti orgulhu entra na se korason, pa se própi distruison’. Jeová dja dexaba klaru na Lei ma éra sô saserdótis ki tinha direitu di ofereseba insénsu na ténplu. Má Uzias, faze un kuza ki el ka tinha direitu. El entra déntu di ténplu i el oferese insénsu. Jeová fika xatiadu ku kel ómi orgulhozu li i el kastiga-l ku lépra. (2 Cró. 26:16-21) Nu pode kai na armadilha di orgulhu sima kontise ku Uzias? Sin, pode kontise, si nu fika ta pensa txeu dimás di nos kabésa. Nunka nu ka debe skese ma tudu nos kapasidadi i priviléjius ki nu ta ten é prezentis di Jeová. (1 Cor. 4:7) Si nu bira orgulhozu, Jeová nunka ka ta uza-nu. w21.06 16 ¶7-8

Jizus sabia ma é ka sénpri ki se disiplus ta tinha bons spiriénsa na pregason. Na verdadi, nu ka sabe kantu di kes algen ki disiplus di Jizus pâpia ku el ki bira kriston. Kes disiplu meste ntendeba ma es ka debe fikaba kontenti sô pamodi pesoas staba ta obi-s. Má es devia fikaba más kontenti inda di sabe ma Jeová staba kontenti ku sforsu ki es faze. Si nu ka dizisti di nos trabadju di pregason, nu ta ganha vida pa tudu ténpu. Óras ki nu ta trabadja di tudu korason pa prega i inxina notísias sábi, na verdadi nu sta ta ‘símia ta pensa na spritu’. Kel-li krê fla ma nu sta dexa spritu di Deus orienta nos vida. Si nu ‘ka dizisti’ i nen nu ‘ka dizanima’, Jeová promete ma el ta da-nu vida pa tudu ténpu, sikrê nu ka djuda ningen batiza. —  Gál. 6:7-9. w21.10 26 ¶8-9

Un bês, Jizus ku se disiplus staba uma kansadu pamodi es prega txeu na kel dia. Es mesteba di un lugar pa diskansa, má un monti di algen bai atxa-s. Jizus xinti péna di es i el kumesa ta inxina-s ‘txeu kuza.’ El poi na lugar di kes algen. El odja ma es staba ta sufri i ma es mesteba di un speransa. Jizus krê djudaba kes algen. É si ki ta kontise ku pesoas oji. Pode ti parse ma es sta filís, má ka nu dexa ses aparénsia ngana-nu. Es é sima ovelhas ki sta perdedu i sen proteson, sen ninhun pastor pa gia-s. Apóstlu Polu, fla ma kes algen ki sta na kel situason li sta sen Deus i sen speransa. (Efé. 2:12) Óras ki nu para i nu pensa modi ki pesoas na nos tiritóriu meste konxe Deus, amor i konpaxon ta pô-nu ta krê djuda-s. I midjór manera di nu faze kel-li é oferese-s un studu di Bíblia. w21.07 5 ¶8

Un algen orgulhozu ta pensa sô na se kabésa. Un algen invejozu ta krê ten un kuza di otu algen, i tanbê el ta krê pa kel algen perde kuzê ki el ten. Na verdadi, invéja é un tipu di ódiu. Orgulhu ku invéja pode ser sima kes sujidadi ki pode entra na konbustível di un avion. Nbóra kel avion pode ti labanta, kes sujidadi pode intupi kes tubu di konbustível. Dipôs, el ta kaba pa kai. Tanbê, un algen pode sirbi Jeová pa algun ténpu. Má si el sta faze kel-li pamodi invéja ô orgulhu, un dia el ta kaba pa kai. (Pro. 16:18) El ta para di sirbi Jeová i el ta prujudika se kabésa i otus algen. Nu pode luta kóntra orgulhu óras ki nu ta lenbra sénpri di kel konsedju ki apóstlu Polu da. El fla: ‘Ka nhos faze nada pa konpitison nen ku orgulhu; má nhos mostra umildadi i nhos trata otus sima algen más inportanti ki nhos’. — Fil. 2:3 w21.07 15-16 ¶6-8

Alguns algen ta atxa ma relijion verdaderu debe ser kapás di responde tudu pergunta, ti mésmu di kes ki nu ka ta atxa respósta na Bíblia. Má nu debe spéra kel-li? Odja izénplu di apóstlu Polu. El insentiva kes kriston pa es ‘konfirma tudu kuza’, má tanbê el seta ma tinha txeu kuza ki el ka ta ntendeba. (1 Tes. 5:21) El skrebe: ‘Konhisimentu ki nu ten é sô un párti, nu ta odja imaji fusku na un spedju di metal’. (1 Cor. 13:9, 12) Polu ka sabia di tudu kuza i nen nos tanbê. Má Polu ta ntendeba kes verdadi prinsipal sobri vontadi di Jeová. Kes kuza ki el sabia dja txigaba pa daba el sertéza ma kuzê ki el ta kriditaba na el éra verdadi! Nu meste ten más sertéza ma nu tene verdadi. Un manera di faze kel-li é óras ki nu ta konpara kel manera di adora Deus ki Jizus inxina ku kel ki Tistimunhas di Jeová ta faze oji. w21.10 18-19 ¶2-4

Irmons di idadi, ka ta nporta si nhos sta na sirvisu pa ténpu interu ô nau, nhos pode faze txeu kuza pa djuda otus. Modi? Nhos prende gosta di nhos novu diziginason, nhos poi méta ki nhos ta konsigi alkansa i ka nhos konsentra na kuzê ki nhos ka ta pode faze, má na kel ki nhos ta konsigi faze. Rei Davidi kreba faze un ténplu pa Jeová. Má Jeová fla-l ma éra se fidju Salumon ki ta tinha kel priviléjiu la. Davidi seta kel disizon di Jeová i el faze tudu ki el pode pa apoiaba kel konstruson. (1 Cró. 17:4; 22:5) Davidi ka ta pensaba ma el éra kel midjór algen pa kunpriba kel diziginason sô pamodi Salumon éra ‘jóven i el ka tinha spiriénsa’. (1 Cró. 29:1) El sabia ma pa kel konstruson tinha bon rezultadu éra sô ku benson di Jeová, envês di idadi ô spiriénsa di kes algen ki staba ta kuida di kel trabadju. Sima Davidi, oji kes irmon di idadi sta kontinua ta faze ses midjór sikrê es dadu otu diziginason. Es sabe ma Jeová ta abênsua kes jóven ki sta ta faze kes trabadju ki es ta fazeba antis. w21.09 9 ¶4; 10 ¶5, 8

Ten méta na nos sirvisu pa Jeová ta djuda-nu ten obijetivu na vida. Má segredu é poi métas ki sta di akordu ku nos kapasidadi i situason. Nu ka ten ki ten mésmu méta ki otus algen. Si nu poi métas ki nu ka ta konsigi alkansa, nu pode fika diziludidu i dizanimadu. (Luc. 14:28) Si bo é un sérvu di Jeová, abo é úniku i bu ta faze párti di un família na mundu interu ki ten txeu algen diferenti. Jeová ka atrai-u pa el pamodi bo é midjór di ki otus. El atrai-u pa el pamodi el odja bu korason i el odja ma bo é un algen umildi ki sta dispostu pa prende. Bu pode ten sertéza ma Jeová ta da txeu valor pa tudu kel ki bu ta faze na se sirvisu pamodi bu sta ta aguenta firmi i bu sta ta mostra lialdadi. Bu sta prova ma bu ten un korason ‘sinseru i bon’. (Luc. 8:15) Pur isu, kontinua ta da Jeová bu midjór. Asi bu ta ten bons motivu di fika kontenti ‘sô ku bu kabésa’. — Gál. 6:4. w21.07 24 ¶15; 25 ¶20

Txeu bês nu meste ten paxénxa timenti nu sta spéra pa fazedu justisa. Pur izénplu, óras ki ansions fika ta sabe ma un algen na kongregason faze un pekadu gravi, es ta faze orason pa es pidi ‘kel sabedoria ki ta ben di riba’, asi pa es odja kel situason di mésmu manera ki Jeová ta odja-l. (Tia. 3:17) Ses obijetivu é odja si es ta konsigi djuda kel algen ki peka ‘volta di se kaminhu mariadu’. (Tia. 5:19, 20) Tanbê es krê faze di tudu pa proteje kongregason i konsola kes ki sufri algun injustisa. (2 Cor. 1:3, 4) I óras ki ansions ta lida ku un pekadu gravi, primeru es ta tenta sabe tudu kuza. I kel-li ta leba algun ténpu. Es ta faze orason i ku kuidadu es ta da konsedju ku bazi na Bíblia i es ta disiplina na ‘medida sértu’ kel algen ki peka. (Jer. 30:11) Ansions ka ta toma ninhun disizon na présa. Óras ki ansions ta kuida di un asuntu sima debe ser, ta djuda tudu algen na kongregason. w21.08 11 ¶12-13

Pamodi fómi na Israel, Nuemi, se maridu i ses dôs fidju muda pa Muabi. Timenti es staba ta mora la, maridu di Nuemi móre. Ses dôs fidju kaza, má dipôs es móre tanbê. (Rute 1:3-5) Tudu kes disgrasa li poi Nuemi ta fika kada bês más dizanimadu. El fika tantu dizanimadu ki el pensa ma Jeová staba kóntra el. Repara modi ki el staba ta xinti. El fla: ‘Mô di Jeová dja fika kóntra mi.’ Kel ‘Tudu-Poderozu bira nha vida txeu margós.’ Tanbê el fla: ‘Jeová sta kóntra mi i kel Tudu-Poderozu dja traze-m txeu sufrimentu’. (Rute 1:13, 20, 21) Jeová ta ntende ma ‘frónta pode poi un algen ki ten sabedoria ta aji sima dodu’. (Ecl. 7:7) Jeová uza Ruti pa mostra Nuemi amor lial. Ku bondadi, Ruti djuda Nuemi ka xinti dizanimadu dimás i odja ma Jeová inda ta amaba el. w21.11 9 ¶9; 10 ¶10, 13

Si dja nu sta ta faze nos midjór pa Jeová, kel-li krê fla ma nu ka meste sforsa pa faze más pa el? Klaru ki nau! Nu pode i nu debe ten métas na sirvisu di Jeová. Es ta djuda-nu midjora nos manera di prega i inxina i es ta da-nu más xansi di djuda nos irmons ku irmans. Má pa nu konsigi alkansa kes méta, nu meste ten sabedoria i ser umildi. Envês di pensa sô na nos kabésa, nu debe konsentra na sirbi otus. (Pro. 11:2; Atos 20:35) Ki métas bu pode ten? Pidi Jeová pa djuda-u sabe ki métas bu ta konsigi alkansa na se sirvisu. (Pro. 16:3) Bu ta pode ser pioneru ajudanti ô pioneru fíksu, sirbi na Betel ô na konstruson? Bu ta pode prende un otu língua ô muda pa un otu país pa bu pode faze más na pregason? w21.08 23 ¶14-15

Jeová gosta di mostra amor lial. (Ose. 6:6) Através di proféta Mikeias, Jeová fla: ‘Ama amor lial’. (Miq. 6:8, nóta di rodapé) Má é klaru ki pa nu konsigi faze kel-li, nu meste sabe kuzê ki é amor lial. Kuzê ki é amor lial? Kes palavra ‘amor lial’ ta parse más di 230 bês na Tradução do Novo Mundo da Bíblia Sagrada. Má kuzê ki kel kualidadi li siginifika? Si un algen ten amor lial, el ta ama kel otu algen di tal manera ki el ta kontinua ta ama-l i nunka el ka ta bandona-l. Jeová é kel midjór izénplu di algen ki ta mostra amor lial. É pur isu ki rei Davidi fla: ‘Ó Jeová bu amor lial ta txiga ti séu; ó Deus, bu amor lial ten txeu valor!’ (Sal. 36:5, 7) Davidi ta daba txeu valor pa amor lial di Deus. I nos? Nu ta xinti mésmu kuza? w21.11 2 ¶1-2; 3 ¶4

Família di Jeová ta inklui Jizus, ki é ‘kel primeru di tudu kriason’ i un monti anju. (Col. 1:15; Sal. 103:20) Tanbê, kantu Jizus staba na Téra, el inxina pesoas pa odja Jeová sima ses Pai. Un bês kantu Jizus staba ta pâpia ku se disiplus el txoma Jeová di ‘nha Pai i nhos Pai’. (João 20:17) Óras ki nu da nos vida pa Jeová i nu batiza, nu ta bira ta faze párti di un família di irmons ku irmans ki ta ama-nu. (Mar. 10:29, 30) Jeová é un Pai ki ten txeu amor. Jizus krê pa nu odja Jeová di mésmu manera ki el. El krê pa nu odja Jeová sima un algen ki ta ama-nu txeu i ki nu pode pâpia ku el kalker óra. El ka krê pa nu pensa ma Jeová é un algen ki ka ten bondadi i ki gosta sô di manda. El kumesa kel orason ku kes palavra li: ‘Nos Pai’. Jizus podia inxinaba nos pa nu txoma Jeová di ‘Tudu-Poderozu’, ‘Kriador’ ô di ‘Rei di tudu ténpu’. Tudu kes titlu li sta dretu i es ta parse na Bíblia. (Gén. 49:25; Isa. 40:28; 1 Tim. 1:17) Má, Jizus inxina-nu pa nu txoma Jeová di ‘Pai’, ki é un palavra ki ta pô-nu xinti más amor pa el. w21.09 20 ¶1, 3

Rei Manasés nega obi ku kes avizu di Jeová. Nton, ‘Jeová poi kes xéfi di trópas di rei di Asíria ta ataka [Judá]. Es kasa Manasés ku ganxu, es prende-l ku dôs korenti di kóbri i es leba-l pa Babilónia.’ Kantu Manasés staba prézu na Babilónia, talvês el pensa na tudu kuza ki el faze. ‘El rabaxa txeu dianti di kel Deus di se gentis grandi.’ Tanbê el faze otus kuza. ‘El pidi ajuda di Jeová, se Deus’. Aliás, Bíblia ta fla ma ‘Manasés ta fazeba orason pa El’. (2 Cró. 33:10-12) Ku ténpu Jeová responde orason di Manasés. El odja ma se korason dja mudaba pamodi kuzê ki el fla na orason. Pur isu, Jeová purdua-l i el dexa-l bira rei otu bês. Manasés pruveta kel oportunidadi pa mostra ma el rapende di verdadi. w21.10 4 ¶10-11

Ákila ku Prisila tevi ki dexa kel lugar ki es konxeba dretu, atxa un otu kaza i kumesa ses nogósiu di faze ténda na un otu lugar. Na ses novu kaza na Korintu, Ákila ku Prisila kumesa ta djuda kongregason di la i es trabadja djuntu ku apóstlu Polu pa da irmons ku irmans forsa. Dipôs es muda pa otu sidadi undi tinha más nisisidadi di algen pa prega. (Atos 18:18-21; Rom. 16:3-5) Di sertéza es tinha txeu kuza pa fazeba, má es éra filís! Kes kazal di oji pode imita izénplu di Ákila ku Prisila, óras ki es ta poi interesis di Reinu na primeru lugar. Midjór momentu pa es pâpia sobri kuzê ki es krê faze pa Jeová é óras ki es sta ta namora. Óras ki un kazal ta toma disizons djuntu i es ta sforsa pa alkansa kes méta ki es ten na sirvisu di Jeová, es ta ten más xansi di odja mô di Jeová na ses vida. — Ecl. 4:12. w21.11 17 ¶11-12

É inportanti nu leba asériu kel órdi ki Jeová da-nu di onra nos pai ku nos mai. Repara ma kel órdi ki nu ta atxa na Levítico 19:3, di ruspeta pai ku mai, ta ben lógu dipôs di kel frazi li: ‘Nhos debe ser santu, pamodi ami, Jeová, nhos Deus, ami é santu.’ (Lev. 19:2) Óras ki nu pensa na kel órdi ki Jeová da-nu di onra nos pai ku nos mai, nu pode pergunta: ‘N sta ta onra nha pai ku nha mai?’ Si bu xinti ma antis bu faze poku kuza pa bu pai ku bu mai, bu pode disidi faze más pa es gósi. Bu ka ta pode muda pasadu, má ten alguns kuza ki bu pode faze gósi sima, pasa más ténpu ku es, djuda-s faze kónpra ô djuda-s mante ses amizadi fórti ku Jeová. Tanbê bu pode konsola-s más txeu. Si bu faze kel-li, bu sta sigi kel órdi ki sta na Levítico 19:3. w21.12 4-5 ¶10-12

Rei Davidi faze alguns pekadu grávi. Pur izénplu, el faze adultériu ku Batiseba i dipôs el manda mata se maridu. (2 Sam. 11:2-4, 14, 15, 24) Pamodi kel-li, Davidi ku se família interu sufri txeu, ti mésmu kes otu mudjer ki el tinha. (2 Sam. 12:10, 11) Tanbê Davidi faze un otu kuza ki Jeová ka krê pa el fazeba. El manda konta kantu ómi ki tinha na izérsitu di Israel i kel-li mostra falta di kunfiansa na Jeová. Kal ki foi rezultadu? Jeová manda un duénsa ki mata uns 70 mil israelita! (2 Sam. 24:1-4, 10-15) Bu ta atxa ma Jeová ka debe purduaba Davidi? Jeová ka ta pensaba si. El konsentra na kes kuza dretu ki Davidi dja fazeba na se vida i el odja modi ki Davidi rapende di verdadi. Pur isu, Jeová disidi púrdua kes pekadu gravi di Davidi. Jeová sabia ma Davidi ta amaba el txeu i ma el krê fazeba kel ki éra dretu. Nu ta fika kontenti pamodi Jeová ta konsentra na kes bon kualidadi ki nu ten. —  1 Reis 9:4; 1 Cró. 29:10, 17. w21.12 19 ¶11-13

Jizus mostra txeu konpaxon pa kes algen ki tinha algun difisénsia. Lenbra kuzê ki el manda fla Juan Batista: ‘Gósi algen ségu sta ta odja, mankus sta ta anda, kes leprozu sta ta fika linpu, kes surdu sta ta obi, kes mortu sta ta resusitadu’. Dipôs ki kes algen odja milagris di Jizus, es ‘lova Deus.’ (Luc. 7:20-22) Dja ki nos é sérvus di Jeová, nu krê imita Jizus i mostra konpaxon pa kes algen ki ten algun difisénsia. Pur isu, nu ta sforsa pa mostra bondadi, konsiderason i ten paxénxa ku es. É klaru ki Jeová ka da-nu puder di faze milagri. Má nu ten priviléjiu di pâpia di notísias sábi ku kes algen ki é ségu, sobri un paraízu undi tudu algen ta ben ten saúdi perfetu i un amizadi fórti ku Deus. (Luc. 4:18) Kes notísia sábi li sta ta djuda txeu algen bira más amigu di Deus. w21.12 9 ¶5

Tiagu uza Skrituras pa inxina. El uza Palavra di Deus pa djuda se irmons ntende ma Jeová sénpri ta rekonpensa kes algen ki ta mante lial pa El, sima Jó. Tiagu uza palavras sinplis i ku lójika pa inxina un lison. Asi, el ka txoma atenson pa se kabésa, má pa Jeová. Kuzê ki nu ta prende? Mante bu mensaji sinplis i inxina ku bazi na Palavra di Deus. Óras ki nu ta inxina otus algen, nu ka debe tenta mostra-s ma nu sabe txeu kuza, má nu debe mostra-s ma Jeová sabe txeu kuza i ma el ta preokupa txeu ku es. (Rom. 11:33) Nu ta konsigi faze kel-li si sénpri nu inxina ku bazi na Palavra di Deus. Pur izénplu, envês di fla nos studantis di Bíblia kuzê ki nu ta fazeba si nu staba na ses lugar, nu debe djuda-s rasusina ku bazi na izénplus di Bíblia i ntende kuzê ki Jeová ta pensa i ki el ta xinti. Asi, es ta xinti gana di faze kuzê ki es prende pa es agrada Jeová, ka pamodi es krê agrada-nu. w22.01 11 ¶9-10

Nu ka ta trata otus algen mariadu, má Jeová krê pa nu faze mutu más di ki kel-li. Si nu ka ama otus sima nu ta ama nos kabésa, nu ka ta konsigi agrada Deus. Jizus mostra ma kel mandamentu na Levítico 19:18, é txeu inportanti. Un bês, un farizeu pergunta Jizus: ‘Kal ki é mandamentu más inportanti di Lei?’ Jizus fla ma kel mandamentu ‘más inportanti i ki é primeru’ é ama Jeová di tudu nos korason, alma i menti. Dipôs el fla kes palavra di Levítico 19:18: ‘Kel sugundu, sima kel-li, é: “Ama bu prósimu sima bu kabésa.”’ (Mat. 22:35-40) Nu pode mostra amor pa otus algen di txeu manera. Un manera é óras ki nu ta sigi kel konsedju ki sta na Levítico 19:18. El ta fla: ‘Bu ka debe vinga nen guarda rankor’. w21.12 10-11 ¶11-13

Jizus pega apóstlu Pedru na mô i el ka dexa-l bai fundu. Repara ma Pedru konsigi anda riba di kel mar brabu timenti el staba ta odja pa Jizus. Má kantu el odja pa kel tenporal, medu toma kónta di el i el kumesa ta ba fundu. (Mat. 14:24-31) Nu pode prende un kuza inportanti ku izénplu di Pedru. Kantu el sai di barku i el kumesa ta anda riba di agu, el ka staba ta spéra ma el ta distraíba i ma el ta kumesaba ta bai pa fundu. El krê andaba riba di agu ti txiga na Jizus, má el fika preokupadu dimás pamodi tenporal. Sima Pedru meste tinha fé pa el andaba riba di agu, oji tanbê nu meste ten fé pa nu lida ku nos prublémas. Si nu dexa di kunfia na Jeová i na se promésas, nos fé pode bira fraku i nu ta kóre risku di funda na nos prublémas. Pur isu, ka ta nporta si nu sta pasa pa prublémas difísil sima tenporal, nu meste kontinua ta konsentra na Jeová i ta kunfia ma el ta djuda-nu. w21.12 17-18 ¶6-7

Orason, studa i midita ta faze párti di nos adorason. Óras ki nu ta faze orason, nu sta ta pâpia ku nos Pai na Séu, ki ta ama-nu txeu. Óras ki nu ta studa Bíblia, nu sta ta prende sobri Deus, ki é Fonti di tudu sabedoria. (Pro. 2:1-5) Óras ki nu ta midita, nu sta ta pensa na kes kualidadi bunitu di Jeová i tanbê na kes kuza ki el krê faze pa nos i pa tudu algen. Bu ta konsigi pensa na un midjór manera di uza bu ténpu? Kuzê ki pode djuda-nu uza dretu kel poku ténpu ki nu ten? Si ta da, skodje un lugar kétu. Pensa na izénplu di Jizus. Antis di el kumesa se pregason li na Téra, el pasa 40 dia na dizértu. (Luc. 4:1, 2) Na kel lugar kétu, Jizus pode fazeba orason i pensaba na kuzê ki se Pai krê pa el fazeba. Di sertéza, kel-li djuda Jizus pripara pa kes próva ki kontise lógu dipôs. w22.01 27-28 ¶7-8

Un ansion ô un otu irmon ki ten más spiriénsia pode fla-nu algun kuza ki nu meste midjora. Si un algen ki ta ama-nu da-nu un konsedju ku bazi na Bíblia, nu debe obi ku kel konsedju i aplika-l. Na verdadi, pode ser difísil seta un konsedju dirétu i nu pode ti fika maguadu. Pamodi? Pamodi nbóra nu sabe ma nos é inperfeitu, alvês é difísil seta konsedju óras ki un algen ta fla-nu un kuza ki nu meste midjora. (Ecl. 7:9) Nu pode kumesa ta ranja diskulpa i nu pode pergunta pamodi ki kel algen sta ta da-nu konsedju. Tanbê, nu pode fika maguadu ku manera ki el da-nu konsedju i nu pode ti atxa fadja na kel algen ki da-nu konsedju. Talvês nu pode pensa: ‘El é kenha pa el da-m konsedju? El tanbê el ta fadja!’ Si nu ka gosta di kel konsedju, nu ka ta seta-l ô nu pode ti ba pâpia ku otus algen, pamodi nu ta spéra ma es ta fla-nu kel ki nu krê obi. w22.02 8-9 ¶2-4

Na mundu novu pode ben kontise alguns prubléma ki ta poi na próva nos kunfiansa na Jeová. Pur izénplu, pensa na kuzê ki kontise ku kes israelita ki éra skravu na Ijitu. Lógu dipôs ki es sai di Ijitu, es kumesa ta reklama pamodi es staba ta xinti falta di kes kumida ki es ta kumeba la i es dispreza maná ki Jeová da-s. (Núm. 11:4-6; 21:5) Nu pode ben pensa di mésmu manera dipôs ki nu sai di grandi tribulason? Nu ka sabe kantu trabadju ki nu ta ben faze pa linpa Téra nen kantu ténpu ta dura pa el bira un paraízu. Di sertéza, nu ta ben ten txeu trabadju pa faze i nos vida pode ka ser fásil na komésu. Nu ta ben reklama di kes kuza ki Jeová ta ben da-nu na kel ténpu? Si nu ta da valor pa kes kuza ki Jeová ta da-nu gósi, di sertéza nu ta ben faze mésmu kuza na futuru. w22.02 7 ¶18-19

Na kel profesia ki sta na Zacarias 8:23, kes palavra ‘un judeu’ i ‘nhos’ sta ta pâpia di kes kriston skodjedu ku spritu santu ki inda sta na Téra. (Rom. 2:28, 29) Kes ‘des ómi di tudu língua di nason’ ta reprizenta kes otu ovelha. I kes palavra ‘pega riju’, ta mostra ma kes otu ovelha é lial pa kes kriston skodjedu ku spritu santu i es sta unidu ku es na adorason puru. Di mésmu manera, pa kunpri kel profesia ki sta na Ezequiel 37:15-19, 24, 25, Jeová dja poi kes kriston skodjedu ku spritu santu i kes otu ovelha ta trabadja unidu ku kunpanheru. Kel profesia li ta pâpia di dôs pó. Kes ki ten speransa di ba vive na Séu é sima pó ‘di Judá’ (na kel tribu ki es ta skodjeba kes rei di Israel), i kes ki ten speransa di vive na Téra é sima kel pó ‘di Efrain’. Jeová ta ben djuntaba kes dôs grupu pa biraba ‘sô un pó’. Kel-li krê fla ma es sta ta sirbi Jeová unidu, dibaxu di orientason di ses Rei, Jizus Kristu. — João 10:16. w22.01 22 ¶9-10

Jizus pâpia di kes algen ki ta daba póbris zimóla, má es ta fazeba kel-la sô pa otus algen odjaba es. Nbóra kuzê ki es fazeba éra dretu, Jeová ka fika kontenti ku es. (Mat. 6:2-4) Nu pode ser un algen dretu di verdadi sô si nu faze kuzas dretu ku bon intenson. Nu pode faze kes pergunta li: ‘N sabe kuzê ki é dretu i N ta faze nha midjór pa N faze-l? Pamodi ki N ta faze kes kuza dretu?’ Jeová ta uza se spritu santu pa el aji. (Gén. 1:2) Nton, tudu kes kualidadi di frutu di spritu santu debe pô-nu ta aji. Pur izénplu, disiplu Tiagu fla: ‘Fé sen óbras sta mortu.’ (Tia. 2:26) Nu pode fla mésmu kuza sobri kes otu kualidadi di frutu di spritu santu di Deus. Tudu bês ki nu ta mostra kes kualidadi di spritu, nu sta ta dexa pa spritu santu di Deus gia-nu. w22.03 11-12 ¶14-16

Adora Jeová i djuda otus algen é kuzas txeu inportanti. Má apóstlu Pedru pâpia di otu kuza. É kuzê? Antis di el insentiva-nu pa nu ser santu na tudu ária di nos vida, el fla: ‘Nhos pripara menti pa trabadju’. (1 Ped. 1:13) Di ki trabadju Pedru staba ta pâpia di el? Pedru fla kes kriston skodjedu ku spritu santu ‘“pa spadja kes kualidadi rei di bon” di Kel ki txoma-s’. (1 Ped. 2:9) Kel-li é trabadju di pregason. Tudu sérvus di Jeová oji ten priviléjiu di prega i inxina. Kel-li é trabadju más inportanti ki ta djuda txeu algen. É un priviléjiu grandi faze párti di povu santu di Deus i partisipa sénpri na trabadju di prega i inxina ku zelu! (Mar. 13:10) Óras ki nu ta faze kel-li, nu ta prova ma nu ta ama Jeová i nos prósimu, i nu ta mostra ma nu krê ‘ser santu’ na tudu ária di nos vida. w21.12 13 ¶18

Apóstlu Polu ta odjaba irmons ku irmans di manera puzitivu. El sabia ma si un algen fazeba un kuza mariadu, kel-li ka krê fla ma el éra un mau algen. El ta amaba irmons i el ta konsentraba na kes bon kualidadi ki es tinha. Si es staba ta sforsa pa faze kuzas dretu, el ka ta duvidaba di ses intenson i el ta djudaba es. Odja modi ki Polu djuda dôs irman di kongregason na Filipus. (Fil. 4:1-3) Talvês Evódia ku Síntiki staba xatiadu ku kunpanheru i es ka éra amiga más. Polu ka pâpia duru ku es nen el ka kritika-s, má el konsentra na kes bon kualidadi ki es tinha. Es éra irman ki dja tinha txeu ténpu ta sirbiba Jeová i Polu sabia ma Jeová ta amaba es. Pamodi Polu ta pensaba dretu di es, el insentiva-s pa es faze pas ku kunpanheru. Polu konsentra na kes bon kualidadi di otus. Pur isu, el konsigi mante se alegria i el kontinua ta ten un amizadi fórti ku irmons na kongregason. w22.03 30 ¶16-18

Pas di Jeová ta kalma nos korason i ta djuda-nu pensa dretu. É kel-li ki kontise ku un irman ki txoma Lus. El fla: “Txeu bês N ta xinti mi sô. Kes kuza li ta pô-m ta pensa ma Jeová ka ta ama-m. Má óras ki kel-li kontise, lógu N ta fla Jeová kuzê ki N sta ta xinti. Orason ta djuda-m kontrola nhas sentimentu.” Spiriénsa di es irman ta mostra ma orason ta da-nu kel pas ki nu meste. (Fil. 4:6, 7) Nu sabe ma Jeová ku Jizus ta djuda-nu óras ki móre un algen ki nu krê txeu. Nu krê kontinua ta prega i inxina ku konpaxon pamodi Jeová i Jizus ta mostra kel kualidadi bunitu li. Tanbê ta konsola-nu sabe ma Jeová i se Fidju Jizus, sabe di nos frakéza i es krê djuda-nu aguenta firmi. Nu tene gana pa txiga kel dia ki Jeová ta ben ‘linpa di [nos] odju tudu lágua’! —  Apo. 21:4. w22.01 15 ¶7; 19 ¶19-20

Jizus pâpia di dôs porton ki ta leba pa dôs strada diferenti. Un é ‘largu’, i kel otu é ‘pertadu’. (Mat. 7:14) Ka ten tirseru strada. Nu ten ki skodje ki strada ki nu krê anda na el. Kel-li é kel disizon más inportanti ki nu pode toma pamodi nos vida pa tudu ténpu ta dipende di el. Txeu algen ta skodje kel strada ‘largu’, pamodi é fásil anda na el. I é tristi di odja ma kes algen ta prifiri kontinua ta anda na kel strada la i es ta faze mésmu kuza ki tudu algen na kel strada sta ta faze. Es ka da kónta ma kel strada é di Satanás i ma úniku lugar ki el ta leba é mórti. (1 Cor. 6:9, 10; 1 João 5:19) Diferenti di kel strada ‘largu’ kel otu strada é ‘pertadu’, i Jizus fla ma é poku algen ki ta atxa-l. Pamodi? Repara ma na kel otu versíklu, Jizus aviza se sigidoris pa toma kuidadu ku profétas falsu. — Mat. 7:15. w21.12 22-23 ¶3-5