Maiu

Dipôs ki Juan odja kel grupu ki ta bai pa Séu, el odja ‘un monti di algen’. Bíblia ka ta fla kantu algen ki ta faze párti di kel monti di algen. Kuzê ki nu sabe sobri kel grupu li? Juan fladu: ‘Kes-li é kes ki ta sai di grandi tribulason; es laba ses ropa kunpridu i es bira-s branku na sangi di Korderu.’ (Apo. 7:14) Dipôs ki es salva na grandi tribulason, kel ‘monti di algen’ li ta ben vive na Téra pa tudu ténpu i es ta ten txeu benson. (Sal. 37:9-11, 27-29; Pro. 2:21, 22; Apo. 7:16, 17) Nu ta konsigi imajina nos kabésa ta resebe kes benson ki Apokalipse kapítlu 7 ta pâpia di el, sikrê nu skodjedu pa nu vive na Séu ô na Téra? Nu debe faze kel-li. Ta ben ser un ténpu rei di sábi pa tudu kes ki ta adora Jeová! Di serteza nu ta ben fika txeu kontenti pamodi nu skodje apoia govérnu di Deus. w22.05 16 ¶6-7

Si algun bês bu tevi ki toma un disizon inportanti na bu vida, di serteza bu faze orason ta pidi Jeová pa da-u sabedoria. I é inportanti faze kel-li. (Tia. 1:5) Rei Salumon fla: ‘Sabedoria é kuza más inportanti’. (Pro. 4:7) É klaru ki Salumon ka staba ta pâpia di kalker tipu di sabedoria. El staba ta pâpia di kel sabedoria ki ta ben di Jeová. Má sabedoria di Deus pode djuda-nu lida ku prublémas di dia-dia? El pode sin. Nu pode ten sabedoria óras ki nu ta studa i aplika konsedjus ki dôs ómi ki tinha txeu sabedoria da. Primeru, pensa na izénplu di Salumon. Bíblia ta fla: ‘Deus da Salumon sabedoria ku disirnimentu txeu dimás’. (1 Reis 4:29) Sugundu, pensa na izénplu di Jizus, ki é kel algen ki ten más sabedoria ki dja vive na Téra. (Mat. 12:42) Proféta Izaías fla kel-li sobri Jizus: ‘Spritu di Jeová ta ben sta riba di el, spritu di sabedoria i di intendimentu’. — Isa. 11:2. w22.05 20 ¶1-2

Ka ta inporta kantu anu ki nu ten, nos tudu nu pode poi métas i sforsa pa alkansa-s. Odja izénplu di un irman ki ten 75 anu, ki txoma Béverli. Pamodi el tinha un prubléma gravi di saúdi el ka ta konsigi andaba dretu. Má, el tinha txeu vontadi di partisipaba na kanpanha pa Komemorason. Kuzê ki el faze? El poi métas i el fika kontenti di alkansa-s. Se izénplu poi otus irmon ta faze más na pregason. Jeová ta da txeu valor pa trabadju ki nos irmons ku irmans di idadi ta faze, sikrê ses situason ka ta dexa-s faze kel ki es ta gostaba. (Sal. 71:17) Poi métas ki bu ta konsigi alkansa. Dizenvolve kes kualidadi ki Jeová gosta. Prende faze kuzas ki ta djuda-u faze más pa Jeová i pa se organizason. Djobe manera di djuda bus irmon ku irmans más txeu. Jeová ta abensua-u sima el abênsua Timótiu i ‘tudu algen ta odja klaru ma bu sta faze prugrésu.’ — 1 Tim. 4:15. w22.04 27 ¶18-19

Má i si ku tudu sforsu ki nhos faze, un di nhos fidju fla ma el ka krê sirbi Jeová? Ka bu xinti ma é bo ki é kulpadu. Jeová da tudu algen liberdadi di skodje. Kel-li krê fla ma bus fidju ten kapasidadi di skodje si es ta sirbi Deus ô nau. Ka bu perde speransa ma un dia el ta volta pa Jeová. Lenbra di kel ilustrason di kel fidju ki perde. (Luk. 15:11-19, 22-24) Kel jóven faze txeu kuza mariadu, má dipôs el volta. Pai ku mai, Jeová da nhos un prezenti bunitu ki é kria un jerason novu ki ta adora Jeová. (Sal. 78:4-6) Kel-li é ka un trabadju fásil i nu ta ilojia nhos di korason pa sforsu ki nhos ta faze pa djuda nhos fidjus ama Jeová i inxina-s obi ku el. Nhos pode ten serteza ma nos Pai na Séu, ki krê-nu txeu, ta fika kontenti ku nhos. — Efé. 6:4. w22.05 30-31 ¶16-18

Pa djuda ten pas i union na kongregason, kada un di nos debe faze nos midjór. Pensa na izénplu di kes kriston di ténpu di apóstlus. Es tinha txeu kapasidadi i diziginasons diferenti. (1 Kor. 12:4, 7-11) Má, es ka dexa kel-li pô-s ta konpiti i ta briga ku kunpanheru. Envês di kel-li, Paulu insentiva kada un di es pa faze kel ki staba ta mestedu pa inkoraja kongregason. Paulu skrebe pa kristons na Éfezu: ‘Óras ki kada ménbru ta funsiona dretu, kel-li ta djuda korpu dizenvolve i kria na amor.’ (Efé. 4:1-3, 11, 12) Kes ki faze kuzê ki Paulu fla ta djuda ten pas i union na kongregason. Ka bu konpara bu kabésa ku otus algen. Envês di kel-li, prende ku Jizus i sforsa pa imita se kualidadis. Bu pode ten serteza ma Jeová ‘é ka injustu pa skese di bus óbra’. (Ebr. 6:10) El ta da valor pa sforsu ki bu ta faze di tudu korason pa agrada-l. w22.04 14 ¶15-16

Nu ta fika kontenti di sabe ma nu ka ten responsabilidadi di disidi si Jeová ta púrdua un algen ki peka ô nau! Má simé, ten un kuza ki nu meste disidi. É kuzê? Alvês un algen pode peka kóntra nos, má dipôs el pode pidi-nu diskulpa i fla-nu pa nu purdua-l. Má na otus situason, el pode ka pidi-nu diskulpa. Má simé, nu pode skodje púrdua kel algen, tenta ka xatia ku el i nen guarda rankor. Pa fla verdadi kel-li ta iziji ténpu i sforsu, prinsipalmenti si kel kuza magua-nu txeu. Sentinéla di 15 di setenbru di 1994, ta fla: ‘Óras ki bu púrdua un algen ki peka, kel-li ka krê fla ma bu sta ta konkorda ku kel pekadu ki el faze. Óras ki un algen ki ta sirbi Jeová ta púrdua, el ta kunfia ma Jeová ta rezolve kel asuntu di manera perfeitu. El é kel Juís justu di Séu ku Téra i el ta faze justisa na óra sértu.’ w22.06 9 ¶6-7

Jeová promete ma na nos ténpu, el ta ben djuntaba algen di tudu nason, tribu i língua pa sirbi-l di manera unidu. Oji kel grupu spesial li ta txomadu un ‘monti di algen’. (Apo. 7:9, 10) Sikrê kel grupu li ten ómi, mudjeris i kriansas di Téra interu, es é un família ki ta sta na pas i unidu. (Sal. 133:1; Juan 10:16) Es sta sénpri prontu pa pâpia di ses speransa di un mundu midjór ku kalker algen ki obi. (Mat. 28:19, 20; Apo. 14:6, 7; 22:17) Si bu ta faze párti di kel monti di algen, di serteza bu ta da txeu valor pa bu speransa ma kuzas ta midjora. Satanás krê tra-u bu speransa. Se obijetivu é pô-u ta kridita ma Jeová ka ta kunpri se promésas. Si Satanás konsigi tra-nu nos speransa, nu ta perde koraji i talvês ti nu ta para di sirbi Jeová. w22.06 20-21 ¶2-3

Nos speransa ta pô-nu kontinua kalmu óras ki nu sta pasa pa prublémas pamodi nu ta kridita ma kuzas ta midjora. Lenbra ma Jizus fla ma nu ta sérba pirsigidu. (Juan 15:20) Nton, si nu midita na kuzê ki Jeová promete-nu, kel-li ta djuda-nu kontinua ta sirbi-l. Odja modi ki speransa djuda Jizus kontinua fiel, sikrê el sabia ma el ta moreba di un manera ki el ta sufreba txeu. Na Pentikósti di anu 33, apóstlu Pedru pâpia di un profesia ki sta na livru di Salmos ki ta mostra modi ki Jizus staba kalmu i ku kunfiansa. Pedru fla: ‘N ta ben mora na speransa; pamodi bu ka ta dexa-m na Sipultura, nen bu ka ta dexa pa kel ki é lial pa bo disfaze na kóba. Bu ta ben intxi-m di alegria na bu prezénsa.’ (Atus 2:25-28; Sal. 16:8-11) Jizus tinha speransa fórti ma Deus ta resusitaba el i ma el ta tinha alegria di staba djuntu ku se Pai na séu otu bês. — Ebr. 12:2, 3. w22.10 25 ¶4-5

Un bês, dôs di se apóstlus, Tiagu i Juan, fla ses mai pa pidi Jizus pa da-s un puzison inportanti na Reinu. (Mat. 20:20, 21) Kuzê ki Tiagu i Juan faze ta mostraba ma es tinha orgulhu i es krê biraba más inportanti di ki otus algen. (Pro. 16:18) Ka éra sô Tiagu i Juan ki mostra un atitudi mariadu kel óra. Repara modi ki kes otu apóstlus reaji: “Kantu kes otu 10 fika ta sabe di kel-li, es ka fika nada kontenti ku kes dôs irmon.” (Mat. 20:24) Nu pode imajina modi ki Tiagu i Juan i kes otu apóstlus diskuti txeu ku kunpanheru. Kuzê ki Jizus faze na kel situason? El ka xatia ku es. El ka fla ma el staba ta bai djobe otus apóstlu midjór, ki tinha más umildadi i ki sénpri ta trataba kunpanheru ku amor. Envês di kel-li, Jizus pâpia ku es ku paxénxa pamodi el sabia ma es krê fazeba kel ki é dretu. (Mat. 20:25-28) Jizus sénpri trata se apóstlus ku bondadi. w23.03 28-29 ¶10-13

Dja bu faze txeu kuza. Pur izénplu, bu studa Bíblia dretu talvês pa txeu anu. Kes kuza ki bu prende da-u serteza ma Bíblia é Palavra di Deus. Má, más di ki kel-li, bu konxe i bu ama Autor di es livru sagradu. Bu amor pa Jeová bira fórti di tal manera ki bu disidi da bu vida pa el i batiza. Kel-li foi un bon disizon! Di serteza antis di bu batiza bu pasa pa txeu próva di fé, má sima bu ta ba ta bira bu fé más fórti, bu ta pasa pa otus próva di fé. Satanás ta tenta poi bu amor pa Jeová ta bira más poku i pô-u ta para di sirbi-l. (Efé. 4:14) Ka bu dexa kel-li kontise. Kuzê ki pode djuda-u kontinua lial pa Jeová i kunpri promésa ki bu faze di sirbi-l? Bu debe kontinua ta faze prugrésu pa bu bira ‘un algen maduru’. — Ebr. 6:1. w22.08 2 ¶1-2

Na família, kada algen ten responsabilidadi di mante alguns asuntu sô entri es. Pur izénplu, talvês un maridu ta atxa ma se mudjer ta faze un kuza ki ta da-l grasa. El ta fika ta konta otus algen kel kuza pa el poi se mudjer na vergónha? Klaru ki nau! I nunka el ka ta krê faze nada pa magua-l pamodi el ta ama-l. (Efé. 5:33) Jóvens tanbê ta krê pa es tratadu ku ruspetu. Pai ku mai ta faze dretu si es faze kel-li. Es ka ta konta otus algen kuzas mariadu ki ses fidju ta faze pa ka pô-s na vergónha. (Kol. 3:21) I fidjus debe prende tanbê ka fla asuntus di ses família ki pode poi otus algen di ses família na vergónha. Si kada algen na família faze se párti pa ka fla otus algen alguns asuntu di família, es ta fika más unidu. w22.09 10 ¶9

Jeová pâpia ku Jó i el lenbra-l di se sabedoria ki ka ten konparason i di modi ki el ta kuida di se kriason ku amor. El pâpia di txeu animal ki ta dexa algen dimiradu. (Jó 38:1, 2; 39:9, 13, 19, 27; 40:15; 41:1, 2) Tanbê, Jeová uza un jóven ki txoma Eliú, pa da Jó forsa i pa konsola-l. Eliú garanti Jó ma Jeová sénpri ta rekonpensa kes algen ki ta adora-l i ki ta aguenta firmi. Má Jeová tanbê poi Eliú ta da Jó alguns konsedju ku amor. Kantu Eliú lenbra Jó ma nos é pikinoti konparadu ku Jeová ki é Kriador di Séu ku Téra, el djuda Jó ka pensa txeu dimás na el. Jeová tanbê fla Jó pa faze un kuza. El fla-l pa el faze orason pa kes três ómi ki ba vizita-l i ki peka. (Jó 42:8-10) Modi ki Jeová ta djuda-nu oji óras ki nu ta pasa pa prublémas difísil? Jeová ka ta pâpia ku nos di manera dirétu sima el faze ku Jó, má el ta pâpia ku nos através di se Palavra Bíblia. — Rom. 15:4. w22.08 11 ¶10-11

Kongregason na Roma tinha irmons ki éra judeu i kes ki ka éra judeu. Kantu Lei di Muizés kabadu ku el, kes algen ki ta adoraba Jeová ka meste sigiba kes lei sobri ka kume alguns tipu di kumida. (Mar 7:19) Di la pa dianti, alguns judeu xinti avontádi pa kume tudu tipu di kumida. Má otus ka xinti avontádi pa faze kel-li, pur isu kongregason fika divididu. Apóstlu Paulu mostra-s ma éra inportanti mante pas. Di kel manera li Paulu djuda se irmons odja ma kel dizunion li ta prujudikaba kada un di es i kongregason interu. (Rom. 14:19, 20) Tanbê, el staba dispostu na muda se manera di konporta pa el ka fazeba otus tropesa. (1 Kor. 9:19-22) Di mésmu manera, nu ta mante pas na kongregason si nu ka fika ta diskuti ku nos irmons sobri asuntus ki ka ta viola prinsípius di Bíblia. w22.08 22 ¶7

Si nu sta ta tenta alkansa un méta na trabadju di Jeová nu ta kontinua ta sforsa pa nu alkansa-l. É kel mésmu kuza ki ta kontise óras ki nu ta inpenha pa justisa. I ku paxénxa Jeová ta djuda-nu faze prugrésu pa nu midjora sima ténpu ta ba ta pasa. (Sal. 84:5, 7) Ku amor, Jeová ta lenbra-nu ma faze kel ki é dretu é ka pizadu. (1 Juan 5:3) Má, el ta proteje-nu i nu meste kel proteson li tudu dia. Lenbra di kel armadura spritual ki apóstlu Paulu pâpia di el. (Efé. 6:14-18) Ki párti ki ta protejeba korason di un trópa? Éra ‘koleti di justisa’, ki ta reprizenta kes lei justu di Jeová. Sima koleti ta proteje korason, kes lei justu di Jeová pode proteje bu korason ô kel algen ki bo é di pa déntu. Pur isu, é inportanti ki koleti di justisa faze párti di bu armadura! — Pro. 4:23. w22.08 29 ¶13-14

Dja ten un monti anu ki Palavra di Deus sta ta da bons konsedju pa ómis i mudjeris ki é fiel. Modi ki Deus konsigi faze kel-li? Jeová garanti ma algen ta fazeba kópias di kel testu sagradu. Enbóra kes ómi ki fazeba kes kópia éra inperfeitu, es toma txeu kuidadu. Pur izénplu, un studiozu skrebe kel-li sobri Skrituras Ebraiku: “Nu ten serteza ma ka ten ninhun otu livru antigu ki kopiadu di manera izatu sima Bíblia.” Nton nu pode ten serteza ma kes kuza ki nu ta lé na Bíblia gósi é ideias di se Autor ki é Jeová. Jeová é Fonti di ‘tudu bon prezenti i tudu prezenti perfeitu’. (Tia. 1:17) Bíblia é un di kes midjór prezenti ki Jeová da-nu. Un prezenti ki un algen ta da-nu, ta mostra ma el konxe-nu dretu i el sabe kuzê ki nu meste. Mésmu kuza ta kontise ku kel Algen ki da-nu Bíblia. Óras ki nu ta lé Bíblia, nu ta prende txeu kuza sobri Jeová. Nu ta prende ma el konxe-nu i ma el sabe dretu kuzê ki nu meste. w23.02 2-3 ¶3-4

Óras ki resureison ben kumesa li na Téra na Govérnu di mil anu di Jizus, ta ben ser un ténpu rei di sábi! Nos tudu nu tene gana di odja otu bês kes algen ki nu ta ama ki dja móre. É si tanbê ki Jeová ta xinti. (Jó 14:15) Imajina modi ki tudu algen na Téra ta ben fika kontenti óras ki es odja kes algen ki es ta ama ta resusitadu. Kes ‘algen justu’, ki ses nómi sta skrebedu na livru di vida, ta ben ten ‘resureison di vida’. (Atus 24:15; Juan 5:29) Talvês txeu di kes algen ki nu ta ama ta ben resusita lógu dipôs di Armajedon. Tanbê kes ‘algen injustu’, sima kes ki ka tevi oportunidadi di konxe Jeová dretu ô di sirbi-l di manera fiel antis di es móre, ta ben ten ‘resureison di julgamentu.’ Tudu kes resusitadu ta ben inxinadu. (Isa. 26:9; 61:11) Pur isu, kel trabadju más grandi ki dja fazedu pa inxina algen ta ben kontise. — Isa. 11: 10. w22.09 20 ¶1-2

Jeová mostra ma el ten mutu más puder di ki grupus interu di reis. El luta pa israelitas, el djuda-s toma párti di kel téra ki el prometeba es. (Jos. 11:4-6, 20; 12:1, 7, 24) Jeová mostra monti bês ma é el ki é kel Algen más Grandi! Rei Nabukudunuzor di Babilónia ingaba se ‘própi forsa i puder’ i se ‘grandéza’, envês di seta ku umildadi ma é Jeová ki merese glória. Pur isu, Deus pô-l bira dodu. Dipôs ki Nabukudunuzor bira prontu, el ‘lova kel Más Grandi’ i el seta ma ‘govérnu di Jeová é un govérnu ki ka ta kaba’. Tanbê el fla: ‘Ka ten ningen ki ta pode inpidi-l.’ (Dan. 4:30, 33-35) Salmista skrebe: ‘Filís é kel nason ki se Deus é Jeová, kel povu ki el skodje pa ser se propriadadi.’ (Sal. 33:12) Nu ten bon motivu pa nu kontinua ku nos lialdadi pa Jeová! w22.10 15-16 ¶13-15

Kes txeu profesia di Bíblia ki dja kunpri ta da-nu kunfiansa ma kes promésa di Deus pa futuru ta ben kunpri. Nu ta xinti sima kel salmista ki ora pa Jeová. El fla: ‘N tene gana di ten bu salvason, pamodi bu palavra é nha speransa.’ (Sal. 119:81) Na Bíblia, Jeová ta da-nu ‘un futuru i un speransa.’ (Jer. 29:11) Nos speransa pa futuru ka ta dipende di kuzê ki ómis ta faze, má di promésas di Jeová. Nu kontinua ta studa kes profesia di Bíblia dretu, asi pa nu bira nos kunfiansa na Palavra di Deus más fórti. Más un kuza ki ta pô-nu ta kunfia na Bíblia é pamodi kes algen ki ta sigi kes konsedju di Bíblia ta ten bons rezultadu. (Sal. 119:66, 138) Pur izénplu, kes algen kazadu ki staba prontu pa divôrsia gósi sta kontenti, unidu pamodi es sigi konsedjus di Bíblia. Ses fidjus ta xinti sábi di kria na un família ki ta sirbi Deus, ki es ta xinti suguru i ma es ta amadu. — Efé. 5:22-29. w23.01 5 ¶12-13

Pensa na kuzê ki Jeová dja faze pa bo. Pensa na modi ki kes promésa ki sta na Palavra di Deus ki dja kunpri dja djuda-u. Pur izénplu, Jizus promete ma se Pai ta da-u kes kuza ki bu meste pa bu vive. (Mat. 6:32, 33) Jizus tanbê da-u serteza ma Jeová ta da-u spritu santu óras ki bu pidi-l. (Luk. 11:13) Jeová kunpri kes promésa li. Talvês bu pode pensa na otus promésa ki dja el kunpri pa djuda-u. Pur izénplu, el promete ma el ta purdua-u, ma el ta konsola-u i ma el ta da-u kumida spritual. (Mat. 6:14; 24:45; 2 Kor. 1:3) Óras ki bu ta midita na kuzê ki Deus dja faze pa bo, bu speransa na kel ki el ta ben faze pa bo na futuru ta bira más fórti. Nu ten serteza ma Jeová ta ben kunpri se promésas. Sima salmista skrebe: ‘Filís é kel ki ta poi se speransa na se Deus Jeová, kel ki é sénpri fiel’. — Sal. 146:5, 6. w22.10 27 ¶15; 28 ¶17

Kel profesia sobri rekuperason di adorason puru ta aplika na nos gósi? Klaru ki sin! Di ki manera? Désdi 1919, milhons di algen dexa di ser skravu di Babilónia Grandi, ki ta reprizenta tudu kes relijion falsu. Es lebadu pa un lugar mutu más midjór di ki kel téra ki Deus prometeba israelitas. Es lebadu pa un paraízu spritual. (Isa. 51:3; 66:8) Désdi 1919, kes kriston skodjedu ku spritu santu sta ta vive na paraízu spritual. Sima ténpu ba ta pasa, kes ki ten speransa di ben vive na téra, ki ta faze párti di kes ‘otu ovelha’, entra na kel téra spritual i es resebe txeu benson di Jeová. (Juan 10:16; Isa. 25:6; 65:13) Kel paraízu spritual ki es ta vive na el ten na mundu interu. Nton gósi, ka ta inporta na undi ki nu ta mora, nu pode faze párti di kel paraízu spritual li désdi ki nu ta apoia adorason puru ku zelu. w22.11 11-12 ¶12-15

Bu ta atxa difísil intende ma Jeová ta izisti ‘pa tudu ténpu’? (Isa. 40:28) Txeu otus algen tanbê ta atxa difísil intende kel-li. Eliú fla kel-li sobri Deus: ‘Nunbru di anus ki el ten ta fuji di nos intendimentu.’ (Jó 36:26) Má sô pamodi nu ka ta intende alguns kuza, kel-li ka krê fla ma es é ka verdadi. Pur izénplu, enbóra nu pode ka intende dretu modi ki lus ta funsiona, kel-li ka krê fla ma el ka izisti. Di mésmu manera, talvês nunka nu ka ta konsigi intende dretu ma Jeová sénpri izisti i ma sénpri el ta kontinua ta izisti. Má kel-li ka krê fla ma Deus ka ta vive pa tudu ténpu. Nos Kriador sénpri izisti, sikrê nu ta intende ô nau. (Rom. 11:33-36) Antis di kalker kuza na mundu izisti, sima sól i strélas, Jeová sénpri izistiba. El izisti antis di el ‘stende séu’. — Jer. 51:15. w22.12 2-3 ¶3-4

Alvês nu ta konvidadu pa faze orason pa otus algen. Pur izénplu, un irman ki sta faze un studu di Bíblia pode pidi kel irman ki bai ku el pa faze orason. Kel irman ki bai ku el pode ka konxe kel studanti dretu, nton pode ser ki el ta prifiri faze orason na fin di studu. Di kel manera li, el ta sabe midjór kuzê ki el ta fla na orason pa djuda kel studanti. Un irmon pode konvidadu pa faze orason na runion pa pregason ô na un runion na kongregason. Kes irmon ki ten kel priviléjiu li debe lenbra kal ki é obijetivu di runion. Orason ka debe uzadu pa da kongregason konsedju ô pa faze avizus. Na kuazi tudu runion na kongregason ta dadu sinku minutu pa kántiku i orason. Pur isu, kel irmon ki sta faze orason ka meste uza ‘txeu palavra’, prinsipalmenti pa kumesa runion. — Mat. 6:7. w22.07 24 ¶17-18

Jizus fla ma na ténpu di fin, ta ben tinha duénsas ki ta spadja ‘na un lugar tras di kel otu’. (Luk. 21:11) Modi ki sabe kel-li ta da-nu pas? Nu ka ta fika spantadu óras ki ta kontise duénsas ki ta spadja. Nu sabe ma kes kuza li sta ta kontise sima Jizus flaba. Nton, nu ten motivu pa sigi kel konsedju ki Jizus da pa kes algen ki sta ta vive na ténpu di fin: ‘Nhos toma kuidadu pa medu ka toma kónta di nhos’. Duránti un duénsa ki ta spadja é ka fásil bu faze tudu kes kuza ki bu ta fazeba antis. Má ka bu dexa kel-li pô-u ta para di faze bu studu pesoal ô di ba runion. Spiriénsias di vida ki nu ta atxa na nos publikasons i vídius ta lenbra-u ma bus irmon sta kontinua ku ses lialdadi sikrê ku prublémas sima kel-li. w22.12 17 ¶4, 6

Jakó dexa klaru ma el ta amaba se fidju Juzé txeu. (Gén. 37:3, 4) Má kes fidju di Jakó más grandi fika ku siumis di Juzé. Nton kantu es tevi oportunidadi, es bende Juzé pa un grupu di bendedoris di téra di Midian. Es leba Juzé pa Ijitu, ki éra un téra lonji i es torna bende-l. Di es bês, Putifar, ki éra xéfi di guarda di Faraó, kunpra-l. Vida di Juzé muda dirapenti. El éra kel fidju ki se pai gostaba más txeu, má di un óra pa kel otu el bira skravu na Ijitu. (Gén. 39:1) Alvês nu ta pasa pa prublémas ki é normal ‘ómis pasa pa el’, ô prublémas ki tudu algen ta pasa pa el. (1 Kor. 10:13) Ô nu pode sufri sô pamodi nos é disiplus di Jizus. Pur izénplu, nu pode fazedu trósa, pasa pa opozison ô ti pirsigison pamodi nos fé. (2 Tim. 3:12) Nton, ka ta inporta ki prubléma bu sta pasa pa el, Jeová pode djuda-u ten bons rezultadu. w23.01 14-15 ¶3-4

Alvês nu pode xinti nisisidadi di pâpia ku un irmon ki ofende-nu. Má antis, nu debe faze kes pergunta li: ‘N intende dretu kuzê ki kontise?’ (Pro. 18:13) ‘El staba ta tenta ofende-m mê?’ (Ecl. 7:20) ‘Dja N faze un kuza mariadu sima kel-li?’ (Ecl. 7:21, 22) ‘Si N pâpia ku kel algen sobri kel-li, kel prubléma ta fika más piór?’ Si nu tra ténpu pa pensa na kes pergunta li, nu pode da kónta ma amor pode pô-nu ta para di pensa na kuzê ki kontise. Kada un di nos ta mostra ma nos é disiplu di verdadi, óras ki nu ta mostra amor di korason pa nos irmons i irmans sikrê es é inperfeitu. Óras ki nu ta faze si, nu ta djuda otus algen rekonhese relijion verdaderu i djunta ku nos na adora Jeová. Pur isu, nu debe sta disididu na kontinua ta mostra amor ki ta prova ma nos é kriston verdaderu. w23.03 31 ¶18-19

Bíblia ta djuda-nu intende ma kel kualidadi prinsipal di Jeová é amor. Pamodi Jeová ta ama-nu, el ka da-nu informason txeu dimás ki nu ka meste pa nu sirbi-l. (Juan 21:25) Jeová tanbê mostra-nu amor kantu el pâpia ku nos di un manera ki ta mostra ma el ta da-nu valor. Na Bíblia, el ka da-nu un monti régra ta fla-nu izatamenti kuzê ki nu pode faze i kuzê ki nu ka pode faze na kada situason di nos vida. Envês di kel-li, el ta uza stórias di vida ki kontise própi, profesias ki ta mexe ku algen i bons konsedju pa djuda-nu toma bons disizon. Di kel manera li, Palavra di Deus ta pô-nu ku gana di ama-L i di obi ku El di korason. Bíblia ta mostra ma Jeová ta preokupa ku nos txeu. Modi? Palavra di Deus ten txeu stória ki ta mostra kuzê ki algen ta xinti. Nu pode intende sentimentus di kes algen ki Bíblia ta pâpia di el, pamodi es éra algen ‘ku sentimentus sima di nos’. (Tia. 5:17) I más inportanti inda, óras ki nu odja modi ki Jeová trata ku algen sima nos, nu ta intende más midjór ma ‘Jeová ten grandi konpaxon i el é mizerikordiozu.’ — Tia. 5:11. w23.02 6 ¶13-15

Kel últimu livru di Bíblia, ta kumesa ku kes palavra li: ‘Kuzas ki Jizus Kristu revela, ki Deus fla-l, pa el mostra se skravus kes kuza, ki sta kuazi ta ben kontise.’ (Apo. 1:1) Pur isu, nu ten txeu interesi na kes kuza ki sta ta kontise na mundu gósi i nu ta krê sabe modi ki es pode sta ta kunpri profesias di Bíblia. I nu pode fika ku gana di pâpia sobri kes kuza li ku otus algen. Má óras ki nu sta ta pâpia di profesias di Bíblia, nu ka debe tenta dibinha kuzê ki sta ben kontise. Pamodi? Pamodi nu ka krê fla nada ki ta straga nos union na kongregason. Pur izénplu, talvês nu pode obi governantis di mundu ta pâpia sobri modi ki es pode kaba ku un géra i traze pas i suguransa. Envês di nu tenta dibinha si é profesia di 1 Tesalonisensis 5:3 ki sta ta kunpri, nu debe sabe kal ki é últimu informason ki publikadu sobri kel asuntu li. Óras ki nos konbérsu ten bazi na kuzê ki organizason di Jeová ta fla, nu ta djuda kongregason kontinua ‘unidu na mésmu manera di pensa’. — 1 Kor. 1:10; 4:6. w23.02 16 ¶4-5

Pamodi ki bu ta ama Jizus Kristu? Jizus ta ama verdadi, el é umildi i justu. Si bu ta ama verdadi i justisa é normal bu ama Jizus Kristu tanbê. Pensa na modi ki Jizus difende ku koraji kuzê ki é verdaderu i dretu. (Juan 18:37) Má modi ki Jizus inxina-nu ser umildi? Jizus inxina-nu ser umildi através di se izénplu. Pur izénplu, el da tudu glória pa se Pai i nunka pa se kabésa. (Mar. 10:17, 18; Juan 5:19) Modi ki umildadi di Jizus ta pô-u ta xinti? Ka ta da-u gana di ama-l i di sigi-l? Klaru ki sin. Pamodi ki Jizus é umildi? Pamodi el ta ama i el ta imita se Pai ki é umildi. (Sal. 18:35; Ebr. 1:3) Bu ka ta xinti más gana di konxe Jizus pamodi el ta imita kualidadis di Jeová di manera perfeitu? w23.03 3-4 ¶6-7

Bíblia ta pâpia di dôs grupu di algen ki ta ben resusitadu pa vive na Téra pa tudu ténpu, ki é kes ‘algen justu’ i kes ‘algen injustu.’ Kes ‘algen justu’ é kes ki sirbi Jeová di manera fiel timenti es staba bibu, má kes ‘algen injustu’ ka sirbi-l. Dja ki kes dôs grupu li ta ben resusitadu, nu pode fla ma ses nómi sta skrebedu na livru di vida? Antis di es móre, kes ‘algen justu’ tinha ses nómi staba skrebedu na livru di vida. Ses nómi ta tradu di kel livru óras ki es móre? Nau, pamodi es sta kontinua ‘bibu’ na mimória di Jeová. Jeová ‘é Deus, ka di mortu, má di bibu, pamodi, pa el, tudu es sta bibu ka di algen mortu, má di algen bibu, pamodi pa el es tudu sta bibu.’ (Luk. 20:38) Kel-li krê fla ma óras ki kes algen justu resusitadu pa vive na Téra ses nómi ta sta skrebedu na livru di vida, sikrê na komésu é “ku lapis”. — Luk.14:14. w22.09 16 ¶9-10

Jeová kreba pa kel primeru ómi traba pruvetu di Se kriason. Kantu Deus faze Adon, El pô-l na un paraízu bunitu i El da-l trabadju di toma kónta di kel paraízu i bira-l más grandi. (Gén. 2:8, 9) Imajina modi ki Adon fika kontenti kantu el odja simenti ta nase i flor ta abri. Adon tevi priviléjiu grandi di kuida di jardin di Éden! Jeová tanbê fla Adon pa poi kes animal nómi. (Gén. 2:19, 20) Jeová pode poba kada animal nómi. Má envês di kel-li el da Adon kel trabadju li. Di serteza, antis di Adon poi kes animal nómi, el analiza-s ku atenson, el djobe modi ki es éra i kuzê ki es ta fazeba. Talvês Adon xinti sábi na faze kel-li. Kel-li di serteza djuda-l intende ma Jeová ten sabedoria i ma se kriason é interesanti i bunitu. w23.03 15 ¶3

Mérka ku Inglatéra djuntadu ta reprizenta pé di un státua uma grandi, i el é kel últimu govérnu ki ta manda na mundu ki Bíblia ta pâpia di el. (Dan. 2:31-33) Dipôs di el ka ta ben izisti más ninhun otu govérnu di ómi. I el ta ben distruídu na Armajedon óras ki govérnu di Deus ben kaba ku tudu govérnu di ómi. (Apo. 16:13, 14, 16; 19:19, 20) Modi ki kel profesia li pode djuda-nu? Profesia di Daniel ta da-nu más próva ma nu sta ta vive na ténpu di fin. Dja ten más di 2.500 anu ki Daniel fla ma dipôs di Babilónia ta ben parseba kuatu govérnu ki ta ben afetaba povu di Deus txeu. Tanbê Daniel fla ma Mérka ku Inglatéra djuntadu, ta ben sérba kel últimu. Sabe di kel-li ta konsola-nu i ta da-nu speransa ma ka ta dura Reinu di Deus ta ben kaba ku tudu govérnu di ómi i el ta ben governa Téra interu. w22.07 4 ¶9; 5 ¶11-12