Julhu

Nos kapasidadi di pâpia é un prezenti ki Jeová da-nu. Má, kapasidadi di pâpia uzadu mariadu. Satanás konta Eva mintira i kel-li traze pekadu i inperfeison. (Gén. 3:1-4) Adon uza se kapasidadi di pâpia mariadu kantu el poi kulpa na Eva i ti na Jeová pa kes kuza mariadu ki el faze. (Gén. 3:12) Kain konta Jeová mintira dipôs ki el mata Abel, se irmon. (Gén. 4:9) Oji, é difísil atxa filmi ki ka ten algun palavra mariadu. Studantis ta obi palavrons na skóla i adultus ta obi-s na undi ki es ta trabadja. Si nu ka toma kuidadu, nu pode kumesa ta uza konbérsu mariadu di tantu obi-s. Pa nu agrada Jeová, nu meste faze más di ki sô ivita uza palavrons. Tanbê, nu krê uza nos kapasidadi di pâpia pa lova Jeová. w22.04 4 ¶1-3

Jizus tinha un ideia ikilibradu sobri kuzas material. El ka ta atxaba ma kume i bebe éra eradu. (Luk. 19:2, 6, 7) Na se primeru milagri, el poi agu ta bira un bon vinhu. (Juan 2:10, 11) I na kel dia ki el móre el tinha un ropa karu. (Juan 19:23, 24) Má Jizus ka dexa kes kuza material bira kuza más inportanti na se vida. Jizus inxina ma si nu poi Reinu na primeru lugar, Jeová ta da-nu tudu kes kuza ki nu meste. (Mat. 6:31-33) Sigi konsedju di Jeová sobri dinheru dja djuda txeu algen. Odja izénplu di un irmon solteru, ki txoma Daniel. El fla: “Kantu N staba jóven, N disidi poi kes kuza spritual na primeru lugar na nha vida.” Pamodi el kontinua ku un vida sinplis, Daniel konsigi uza se ténpu i se kapasidadis pa partisipa na txeu prujétu di organizason. El fla: “Ka ten ninhun dinheru na mundu ki pode konpara ku kes benson ki Jeová dja da-m.” w22.05 21-22 ¶6-7

Nu pode mostra ma nu ta ama verdadi óras ki sénpri nu ta studa Bíblia i publikasons ki ten bazi na Bíblia. Ka ta inporta kantu ténpu ki dja nu ten na verdadi, sénpri ten kuzas pa prende. Studa Bíblia ta iziji txeu sforsu, má bale péna faze kel sforsu li. É ka tudu algen ki gosta di lé i studa. Má Jeová ta konvida-nu pa nu ‘kontinua ta djobe’ asi pa nu pode intende verdadi midjór. (Pro. 2:4-6) Óras ki nu ta faze kel sforsu li, sénpri nu ta ten bons rezultadu. Un irman ki txoma Korei fla ma sénpri ki el ta faze se leitura di Bíblia el ta konsentra na un versíklu di kada bês. El fla: “N ta lé tudu kes nóta di rodapé, N ta djobe tudu kes referénsia i N ta faze otus piskiza. Asi, N ta prende txeu kuza.” Ka ta inporta modi ki nu ta studa, nu ta mostra ma nu ta da valor pa verdadi óras ki nu ta tra ténpu i nu ta sforsa pa studa Bíblia. — Sal. 1:1-3. w22.08 17 ¶13; 18 ¶15-16

Kantu Jizus staba na téra, el uza kuzas di kriason pa el inxina se disiplus sobri se Pai. Nu ben odja un lison ki el inxina. Jeová ta mostra amor pa tudu algen. Na kel diskursu ki Jizus faze na monti, el pâpia ku se disiplus sobri sól ku txuba, ki é kuzas ki txeu algen ka ta atxa ma é spesial. Nu meste di es tudu dôs pa nu kontinua ta vive. Jeová pode ka daba kes kuza li pa kes algen ki ka ta sirbi-l. Má ku amor, el ta da sól ku txuba pa tudu algen. (Mat. 5:43-45) Jizus uza kel lison li pa inxina se disiplus ma Jeová krê pa nu mostra amor pa tudu algen. Sénpri ki nu ta odja sól ta kanba ô txuba ta kai, nu pode pensa na amor ki Jeová ten pa tudu algen. Se izénplu ta pô-nu ta prega pa tudu algen, asi nu ta mostra amor sima di sel. w23.03 17 ¶9-10

Kuzê ki poi apóstlu Juan ta fika spantadu? Un mudjer xintadu riba di un féra brumedju. El é kel ‘grandi prostituta’ i el ta txomadu di ‘Babilónia Grandi’. El sta ta faze ‘konportamentu seksual mariadu’ ku kes ‘rei di téra’. (Apo. 17:1-5) Kuzê ki é ‘Babilónia Grandi’? Kel mudjer li ka pode ser un organizason pulítiku pamodi Apokalipse ta fla ma el ta faze konportamentu seksual mariadu ku govérnus di mundu. (Apo. 18:9) Dja ki el sta xintadu riba di kel féra, kel-li ta mostra ma el ta tenta kontrola kes govérnu. Tanbê el ka ta reprizenta komérsiu di mundu di Satanás. É otu párti di livru di Apokalipse ki ta pâpia di komérsiu di mundu di Satanás i el ta txoma-l di ‘kes komersianti di téra’. (Apo. 18:11, 15, 16) Babilónia di ténpu antigu éra séntru di adorason falsu. Pur isu, Babilónia Grandi ta reprizenta tudu tipu di adorason falsu, ô relijions falsu. — Apo. 17:5, 18. w22.05 11 ¶14-16

Un mai ki ta sirbi Jeová sabe ma se fidjus ta pasa pa txeu tentason na mundu di Satanás. Pur isu, é normal el pergunta si se fidjus ta ben sirbi Jeová. Tanbê, ten txeu mai ki ta kria ses fidjus es sô. I otus ten maridu ki ka ta sirbi Jeová. É ka sô óras ki mai ku pai ka ten kel mésmu relijion ki é difísil djuda un fidju ama Jeová i sirbi-l. Mésmu óras ki pai ku mai ta sta na verdadi, pode ser difísil toka korason di ses fidju pa es bira sérvus lial di Jeová. Ka ta inporta kal ki é bu situason, ka bu fika preokupadu dimás pamodi Jeová ta djuda-u. Bu pode pergunta otus pai ku mai modi ki es ta uza nos publikason na ses Adorason na família. (Pro. 11:14) Jeová pode djuda-u pâpia ku bus fidju. Pidi-l pa el djuda-u faze-s perguntas ki ta djuda-u sabe kuzê ki es ta pensa i ki es ta xinti. — Pro. 20:5. w22.04 17 ¶4, 7; 18 ¶9

Jizus imita manera di ser di Jeová di manera perfeitu. Nton, óras ki nu konxe Jizus midjór, nu ta ama Jeová mutu más inda. (Ebr. 1:3) Midjór manera di konxe Jizus é studa kes kuatu Ivanjélhu. Si inda bu ka ten ábitu di lé Bíblia tudu dia, pamodi ki bu ka ta kumesa oji? Sima bu ta ba ta lé kes stória sobri Jizus, presta atenson na se kualidadis. Algen ta xintiba avontádi ku el. Pur izénplu, el karega kes minís pikinoti ku amor. (Mar. 10:13-16) El dexa se disiplus avontádi ku el i es ka ta xintiba medu di fla-l kuzê ki es staba ta xinti. (Mat. 16:22) Di kel manera li, Jizus imita se Pai ki sta na Séu. Jeová tanbê ta poi algen ta xinti avontádi ku el. Nu pode pâpia ku el na orason. I óras ki nu ta faze orason nu pode fla-l kalker kuza ki nu sta pensa i ki nu sta xinti. Nu ten serteza ma el ka ta julga-nu. El ta ama-nu i el ta kuida di nos. — 1 Ped. 5:7. w22.08 3 ¶4-5

Dja ki Jeová é nos Kriador, el sabe tudu kuza sobri nos. Pensa na kel-li! Jeová sabe tudu kuza sobri kada algen na Téra. (Sal. 139:15-17) Pur isu, el pode odja tudu inperfeison ki nu erda di nos pai ku nos mai. El sabe ti kes kuza ki kontise na nos vida ki pô-nu ta bira kel tipu di algen ki nos é. Kuzê ki Jeová ta faze pamodi el konxe-nu dretu? Kel-li ta pô-l ta mostra-nu mizerikórdia. ( Sal. 78:39; 103:13, 14) Jeová dja da próva ma el ten gana di púrdua. El ta intende ma pamodi kuzê ki primeru ómi, Adon, faze nos tudu é pekador i nu ta móre. (Rom. 5:12) Ka ten nada ki nu pode faze pa liberta nos kabésa ô otus algen di pekadu i mórti. (Sal. 49:7-9) Má nos Deus ki krê-nu txeu mostra konpaxon i el faze algun kuza pa liberta-nu. Juan 3:16 ta mostra ma Jeová manda se úniku Fidju pa móre pa nos. — Mat. 20:28; Rom. 5:19. w22.06 3 ¶5-6

Jeová ta púrdua kes ki ta púrdua otus. Kel-li fika klaru na kazu di Jó. Jó fika maguadu ku kes palavra duru ki Elifás, Bildadi i Zofar fla. Jeová fla Jó pa ora pa es. Dipôs ki Jó faze kel-li Jeová abensua-l. (Jó 42:8-10) Guarda rankor ta prujudika-nu. Raiba é sima un karga pezadu i Jeová krê pa nu xinti pas pamodi nu ka ta guarda rankor. (Efé. 4:31, 32) El ta fla pa nu ‘dexa raiba pa la’ i pa nu ‘ka xatia más’. (Sal. 37:8) Kel konsedju li ta djuda-nu. Guarda rankor pode prujudika nos korpu i nos menti. (Pro. 14:30) Guarda rankor di un algen ka ta prujudika-l. É sima bebe venénu i spéra pa el prujudika otu algen. Óras ki nu ta púrdua otus nu sta da nos kabésa un prezenti. Nu ta xinti pas déntu nos i nu ta kontinua ta sirbi Jeová. w22.06 10 ¶9-10

Nos speransa é sima un kapaseti ki ta proteje nos manera di pensa i ta djuda-nu ka pensa sô na nos kabésa, ki é un kuza ki pode prujudika nos amizadi ku Jeová. (1 Kor. 15:33, 34) Nos kapaseti di speransa tanbê pode proteje-nu di pensa ma nunka nu ka ta konsigi agrada Jeová. Lenbra ma Elifás, ki éra un amigu falsu di Jó, fla un kuza kuazi sima kel-li. Elifás fla: ‘Modi ki un ómi ki ta móre pode ser puru?’ Tanbê el fla sobri Deus: ‘Odja! El ka ta kunfia na se santus, i nen séu el ka atxa ma é puru.’ (Jó 15:14, 15) Fórti mintira! Lenbra ma é Satanás ki krê pa bu pensa si. El sabe ma si bu kontinua ta pensa si, bu ta kumesa ta perde bu speransa. Nton, nega kes mintira li. Nunka ka bu duvida ma Jeová krê pa bu vive pa tudu ténpu i ma el ta djuda-u alkansa kel obijetivu li. — 1 Tim. 2:3, 4. w22.10 25-26 ¶8-10

Satanás krê pa Jó kriditaba ma el staba ta sufri pamodi Jeová staba xatiadu ku el. Pur izénplu, Satanás uza un béntu fórti pa ronba kel kaza na undi ki tudu kes 10 fidju di Jó staba ta kume djuntu. (Jó 1:18, 19) Tanbê el poi lumi ta dixi di séu i kaba ku tudu kes animal di Jó i tanbê kes inpregadu ki ta tomaba kónta di es. (Jó 1:16) Dja ki kel béntu i kel lumi ben di séu, Jó pensa ma é Jeová ki manda-s. I pamodi kel-li, Jó ta kriditaba ma Jeová staba xatiadu ku el pamodi algun kuza ki el faze. Má simé, Jó nega maldísua se Pai na Séu. Jó sabia ma duránti monti ténpu el resebe txeu kuza dretu di Jeová. Pur isu, el pensa ma dja ki el setaba kuzas dretu, tanbê el debe setaba kuzas mariadu. El fla: ‘Pa nómi di Jeová kontinua ta ser lovadu.’ — Jó 1:20, 21. w22.06 21 ¶7

É kel avizu li ki Jizus da se disiplus, sima sta na Juan 17:14. Di serteza nu sta ta odja kel profesia li ta kunpri, prinsipalmenti duránti kes últimu 100 anu. Modi? Poku dipôs ki Jizus bira Rei na 1914, Satanás tradu di Séu. Gósi Satanás sta li na téra ta spéra pa el distruídu. (Apo. 12:9, 12) Má el ka sta xintadu ta spéra. Satanás sta dizusperadu ku raiba i ta diskonta se raiba na povu di Deus. (Apo. 12:13, 17) É pamodi kel-li ki mundu di Satanás sta ta odia-nu kada bês más. Má nu ka ten motivu pa xinti medu di Satanás i di kes algen ki ta sigi-l. Envês di kel-li, nu pode ten kel mésmu serteza di apóstlu Paulu, ki fla: ‘Si Deus sta ku nos, ken ki ta fika kóntra nos?’ (Rom. 8:31) Nu pode ten tudu kunfiansa na Jeová. w22.07 18 ¶14-15

Jizus tinha serteza ma na ténpu di fin ta tinha trabadjadoris pa faze trabadju di pregason. El sabia ma kes palavra di salmista ta ben kunpriba. El fla: ‘Bu povu ta oferese ses kabésa di livri vontadi na dia ki bu izérsitu sta pripara.’ (Sal. 110:3) Si bu sta ta prega notísias sábi di Reinu, nton bu sta ta apoia Jizus i skravu fiel, i bu sta ta djuda kunpri kel profesia li. Kel trabadju li dja sta ta fazedu, má el ten alguns difikuldadi. Un di kes difikuldadi é ki kes algen ki ta prega notísias sábi ta pasa pa opozison. Kes algen ki bandona i fika kóntra organizason di Jeová, kes xéfi di relijion i pulítikus ta spadja mintira sobri nos trabadju. Si nos família, kes algen ki nu konxe i kolégas di trabadju kridita na kes mintira li, es pode faze-nu preson pa nu para di prega i di sirbi Jeová. Na alguns país nos inimigu ta amiasa, ta ataka i ta poi alguns di nos irmons ku irmans na kadia. w22.07 8 ¶1; 9 ¶5-6

Jeová ta spéra pa nu tra ténpu pa nu studa Bíblia sénpri i pa nu midita na kuzê ki nu ta lé. Óras ki nu ta faze kel ki nu prende, nos fé ta bira más fórti i nu ta bira más amigu di nos Pai ki sta na séu. Asi nu ta fika más fórti pa aguenta prublémas. Jeová tanbê ta da se spritu santu pa kes algen ki ta kunfia na se Palavra. I se spritu santu ta da-nu ‘puder alén di normal’ pa nu aguenta kalker prubléma. (2 Kor. 4:7-10) Ku ajuda di Jeová, ‘skravu fiel i prudenti’ sta ta faze txeu artigu, vídiu i múzika ki pode djuda-nu ten un fé fórti i kontinua ku un bon amizadi ku Jeová. (Mat. 24:45) Jeová sta trena se povu pa ama i konsola kunpanheru na ténpus di frónta. (2 Kor. 1:3, 4; 1 Tes. 4:9) Nos irmons ku irmans tene gana di djuda-nu kontinua fiel óras ki nu sta pasa pa prublémas. w22.08 12 ¶12-14

Óras ki sénpri nu ta ilojia kes bon kualidadis ki nos irmons ku irmans ten, nu ta djuda-s bira ses amizadi más fórti ku irmons na kongregason i es ta ten más amor pa kunpanheru. Alvês ti kes irmon maduru pode ka konkorda ku kunpanheru. É kel-li ki kontise ku apóstlu Paulu i ku se amigu Barnabé. Es tevi un grandi diskuson sobri si es ta lebaba Markus ô nau pa kel otu viajen ki es staba ta ba faze. ‘Es tevi un grandi diskuson’ i dipôs di kel-li es sipara. (Atus 15:37-39) Má dipôs Paulu, Barnabé ku Markus faze pas ku kunpanheru. Dipôs Paulu pâpia dretu di Markus ku Barnabé. (1 Kor. 9:6; Kol. 4:10) Nos tanbê nu meste rezolve kalker prubléma ki nu ten ku nos irmons na kongregason i nu ta sforsa pa odja kes bon kualidadis ki es ten. Di kel manera li, nu ta mante pas i union na kongregason. w22.08 23 ¶10-11

Sima nu ta ba ta sforsa pa sigi kes lei justu di Jeová, nu debe ivita julga otus algen i atxa ma nos é midjór di ki es. Nu debe lenbra ma Jeová é ‘Juís di téra interu’. (Gén. 18:25) Jeová ka da-nu direitu di julga otus. Odja izénplu di Juzé ki éra un ómi justu. El ivita julga otus algen sikrê es maltrataba el. Se irmons maltrata-l, es bende-l pa ser skravu i es konvense ses pai ma Juzé staba mortu. Dipôs di alguns anu, Juzé inkontra ku se família. Má dipôs ki Juzé bira un algen ki tinha txeu autoridadi, el pode julgaba se irmons di manera duru i vingaba di es. Kes irmon di Juzé tinha medu ma el ta fazeba kel-li, enbóra dja es rapendeba di korason di kuzê ki es fazeba. Má Juzé fla-s: ‘Ka nhos xinti medu. N sta na lugar di Deus?’ (Gén. 37:18-20, 27, 28, 31-35; 50:15-21) Ku umildadi Juzé dexa pa Jeová julga. w22.08 30 ¶18-19

Bu sabia ma Jeová pode uza-u pa responde un orason ki un algen faze di korason? Bu pode djuda sikrê bo é ansion, ajudanti di kongregason, pioneru ô publikador na kongregason. Bu pode djuda tanbê sikrê bo é jóven ô un algen di idadi ô si bo é un irmon ô un irman. Óras ki un algen ta ama Jeová i el ta pidi-l ajuda, nos Deus txeu bês ta uza ansions i otus sérvu fiel pa bira ‘un fonti di grandi konsolu’ pa kel algen. (Kol. 4:11) Nu ta fika txeu kontenti di sirbi Jeová i nos irmons di kel manera li. Nu pode faze kel-li óras ki kontise un duénsa ki ta spadja, un disgrasa ô pirsigison. Nu pode krê djuda otus algen, má kel-li pode ser difísil si nos própi família sta ta sufri. Má simé, nu krê djuda nos irmons i Jeová ta fika kontenti óras ki nu faze kel ki nu ta pode pa es. — Pro. 19:17. w22.12 22 ¶1-2

Amor é bazi di kunfiansa. Jizus fla ma kes dôs mandamentu más inportanti é ama Jeová i ama nos prósimu. (Mat. 22:37-39) Amor ki nu ten pa Jeová ta pô-nu ta imita se izénplu perfeitu di kunfiansa. Pur izénplu, amor ki nu ten pa nos irmons ku irmans ta pô-nu ka ta pâpia di asuntus ki es konta-nu ki nu ka debe fla. Nunka nu ka debe fla otus algen algun kuza ki otu algen konta-nu ki pode magua-l, pô-l ta xinti vergónha ô xinti dór. Umildadi tanbê ta djuda-nu ser un algen di kunfiansa. Un irmon ki é umildi ka ta ser primeru na konta un asuntu di otus algen sô pa el txoma atenson pa se kabésa. (Fil. 2:3) El ka ta tenta poi otus algen ta pensa ma el sabe kuzas ki el ka pode konta. Umildadi tanbê ka ta dexa-nu fla txeu algen kuzê ki nu ta atxa sobri kes asuntu ki Bíblia ô nos publikasons inda ka pâpia di el. w22.09 12 ¶12-13

Un anju fla Daniel ma povu di Deus ta ben intendeba más dretu kes profesia di livru di Daniel, má ‘kes mau ka ta ben intendeba.’ (Dan. 12:10) Gósi é óra di nu prova ma nos é ka algen mau. (Mal. 3:16-18) Jeová sta ta djunta kes ki el ta atxa ma é ‘un propriadadi spesial’ ô ki ten txeu valor pa el. Di serteza nu krê sta na meiu di kes algen li. Nu ka ten dúvida ma nu sta ta vive na un ténpu inportanti. Má ka ta dura, ta ben kontise txeu kuza ki ta dexa-nu dimiradu. Nu ta ben odja distruison di tudu kes kuza mariadu. Dipôs di kel-li, nu ta ben odja kel promésa ki Jeová fla Daniel ta kunpri. El fla-l: ‘Na fin di dias, bu ta ben labanta pa bu resebe bu párti.’ (Dan. 12:13) Bu tene gana pa txiga kel dia ki Daniel i kes algen ki bu ta ama ta ben ‘labanta’ otu bês? Nton, sforsa pa bu mante fiel gósi, asi bu pode ten serteza ma bu nómi ta kontinua skrebedu na livru di vida di Jeová. w22.09 24 ¶17; 25 ¶19-20

Kes palavra li talvês da Ezekiel forsa. Pamodi? Pamodi Ezekiel talvês lenbra ma Jeová fla Muizés ku Izaías un kuza kuazi sima kel-li kantu el skodje-s pa ser se profétas. (Êxo. 3:10; Isa. 6:8) Ezekiel tanbê sabia ma Jeová djuda kes dôs proféta li faze ses trabadju. Pur isu, kantu Jeová fla Ezekiel dôs bês: ‘N sta ta manda-u’, el tinha bons motivu pa kunfia ma Jeová ta djudaba el. Tanbê, Ezekiel skrebe txeu bês: ‘Jeová fla-m kes palavra li’. (Eze. 3:16) I txeu bês el skrebe: ‘Jeová torna pâpia ku mi’. (Eze. 6:1) Ezekiel ka tinha dúvida ma é Jeová ki mandaba el. Pai di Ezekiel éra saserdóti. Talvês el inxina Ezekiel ma Jeová sénpri fla se profétas ma el ta djudaba es. Jeová fla Izaki, Jakó i Jeremias: ‘N sta ku bo’. — Gén. 26:24; 28:15; Jer. 1:8. w22.11 2 ¶3

Enbóra Adon ku Eva peka, i pamodi kel-li ses fidjus dipôs ben móre, Jeová ka muda kuzê ki el kreba. (Isa. 55:11) Ti inda el krê da vida pa tudu ténpu pa kes algen ki é lial pa el. Odja kes kuza ki Jeová fla i ki el faze pa kunpri se vontadi. Jeová promete resusita kes algen ki móre i da-s vida pa tudu ténpu. (Atus 24:15; Titu 1:1, 2) Jó, ki éra un ómi fiel, tinha serteza ma Jeová krê resusitaba kes algen ki móre. (Jó 14:14, 15) Proféta Daniel sabia ma algen pode resusitadu ku xansi di vive pa tudu ténpu. (Sal. 37:29; Dan. 12:2, 13) Kes judeu na ténpu di Jizus tanbê sabia ma Jeová pode da kes algen ki ta sirbi-l di manera fiel ‘vida pa tudu ténpu’. (Luk. 10:25; 18:18) Jizus pâpia di kel promésa li txeu bês i se Pai resusita-l. — Mat. 19:29; 22:31, 32; Luk. 18:30; Juan 11:25. w22.12 4-5 ¶8-9

Jeová ta konvida-nu pa nu ser se amigu. (Tia. 4:8) El krê ser nos Deus, nos Pai i nos Amigu. El ta responde nos orason i el ta djuda-nu óras ki nu ta pasa pa prublémas. I el ta uza se organizason pa inxina-nu i pa proteje-nu. Nu pode bira más amigu di Jeová óras ki nu ta faze orason, nu ta lé se Palavra i nu ta midita na el. Óras ki nu ta faze si, nos amor pa el ta bira más txeu i nu ta bira ta da-l más valor. Nu ta xinti gana di obi ku el i da-l adorason ki el merese. (Apo. 4:11) Óras ki nu konxe Jeová más midjór, nu ta kunfia más txeu na el i na organizason ki el ta uza pa djuda-nu. Má Satanás ta tenta kaba ku nos kunfiansa na Jeová i na se organizason poku-poku. Má nu pode difende nos kabésa kóntra kes ataki li. Óras ki nos fé é fórti i nos kunfiansa na Jeová é firmi, nu ka ta bandona nos Deus i se organizason. — Sal. 31:13, 14. w22.11 14 ¶1-3

Txeu kriston verdaderu poi ses liberdadi i ti ses vida na prigu pamodi ses amor pa Jeová i pa se direitu di governa. Es staba disididu na kontinua lial pa Jeová. Es é sima kes três ebreu ki kontinua lial pa kel Algen Más Grandi i ki dipôs salva-s di kel fornadja di lumi. Davidi mostra ma é inportanti kontinua lial pa Deus. El fla: ‘Jeová ta ben julga kes povu. Ó Jeová, julga-m di akordu ku nha retidon i di akordu ku nha lialdadi.’ (Sal. 7:8) Tanbê, Davidi skrebe: ‘Pa lialdadi i justisa proteje-m’. (Sal. 25:21) Midjór manera di vive é kontinua lial pa Jeová. Nunka ka nu dexa di ser lial pa el! Asi nu ta xinti mésmu kuza ki kel salmista ki skrebe: ‘Filís é kes ki é lial na ses kaminhu, kes ki ta anda na lei di Jeová.’ — Sal. 119:1, nóta di rodapé. w22.10 17 ¶18-19

Jó tevi txeu konbérsu ku otus algen duránti se vida. Má kel ki el tevi ku Jeová, mexe ku el más txeu. Na kel konbérsu li, Jeová fla Jó pa el odja alguns kuza bunitu ki El faze. Kel-li pode djudaba Jó odja modi ki Jeová ten sabedoria. I el pode poba kunfiansa di Jó ta biraba más fórti ma Jeová pode da se sérvus tudu kuza ki es meste. Pur izénplu, Deus lenbra Jó ma el ta da animal kumida. Nton, el pode daba Jó tudu kes kuza ki el staba ta meste tanbê. (Jó 38:39-41; 39:1, 5, 13-16) Óras ki Jó pensaba na izénplus di kriason, el ta prendeba txeu kuza sobri kualidadis di se Deus. Nos tanbê nu pode prende mutu más sobri nos Deus, óras ki nu ta odja ku atenson pa kes kuza ki el kria. Má alvês é difísil pa nos faze kel-li. Si nu ta mora na un sidadi, nu pode odja poku kuza di naturéza na nos dia-dia. Sikrê nu ta mora pértu di naturéza, nu pode xinti ma nu ten poku ténpu pa odja-l ku atenson, bale péna tra ténpu i faze sforsu pa odja kriason ku atenson. w23.03 15 ¶1-2

Jizus fla ma ta ben tinha ‘grandis tremor di téra’ i otus disgrasa antis di fin ben. (Luk. 21:11) Tanbê el fla ma ‘kuzas ki é kóntra lei’ ta biraba más txeu i é kel-li ki nu sta ta odja ta kontise oji. Pur izénplu, nu sta ta odja krimi, violénsia i atakis di terorista. (Mat. 24:12) Jizus nunka ka flaba ma kes kuza li ta ben afetaba sô kes ki bandona Jeová. Na verdadi, txeu sérvu di Jeová pasa pa disgrasas. (Isa. 57:1; 2 Kor. 11:25) Jeová pode ka faze un milagri pa proteje-nu di tudu disgrasa, má el ta da-nu tudu kel ki nu meste pa nu kontinua kalmu i ku pas. Si nu sta priparadu é más fásil. Má pripara pa un imerjénsia ta mostra falta di fé na Jeová? Klaru ki nau. Na verdadi, pripara pa un disgrasa ta mostra ma nu ten fé na se kapasidadi di kuida di nos. Di ki manera? Palavra di Deus ta fla-nu pa nu pripara pa disgrasas ki pode kontise. w22.12 18 ¶9-10

Timenti Juzé staba na kadia, Jeová poi rei di Ijitu ta ten dôs sonhu ki inkomoda-l. Kantu Faraó fika ta sabe ma Juzé tinha kapasidadi di fla kuzê ki un sonhu siginifika, el manda txoma-l. Ku ajuda di Jeová, Juzé fla kuzê ki kes sonhu siginifikaba i Faraó fika dimiradu ku konsedju ki Juzé da-l. Kantu Faraó odja ma Jeová staba ku Juzé, el skodje Juzé pa ser enkaregadu di kumida pa Ijitu interu. (Gén. 41:38, 41-44) Dipôs, tevi un grandi fómi na Ijitu i na Kanan, ki éra kel téra ki família di Juzé ta moraba na el. Pamodi trabadju ki Juzé tinha, el pode salvaba se família, asi Misías pode binha di se família. É klaru ki é Jeová ki poi tudu kes kuza ki Juzé faze ta ten bons rezultadu. Enbóra kes irmon di Juzé krê mataba el, Jeová muda kel situason pa El pode kunpriba Se vontadi. w23.01 17 ¶11-12

Un algen ki ta toma kuidadu ta fika atentu na kalker kuza ki pode prujudika se amizadi ku Jeová, i el ta toma medida pa ivita-s. Asi, el ta mante na amor di Deus. (Pro. 22:3; Jud. 20, 21) Apóstlu Paulu fla kristons pa es mante sienti. Pur izénplu, el fla kes kriston na Éfezu: ‘Nhos mante txeu sienti pa nhos ka anda sima algen tolu, má sima algen ki ten sabedoria’. (Efé. 5:15, 16) Satanás sta sénpri ta tenta kaba ku nos amizadi ku Jeová. Pur isu, Bíblia ta fla-nu pa nu ‘kontinua ta intende kal ki é vontadi di Jeová.’ Asi, nu ta konsigi proteje nos kabésa di tudu kes armadilha di Satanás. (Efé. 5:17) Pa nu toma bons disizon, nu meste intende ô fika sienti na kal ki é ‘vontadi di Jeová’. Nu ta konsigi faze kel-li, óras ki nu ta studa Palavra di Deus sénpri i nu ta midita na el. Óras ki nu intende vontadi di Jeová midjór i nu tenta ‘ten menti di Kristu’, nu ten más xansi di anda sima ‘algen ki ten sabedoria,’ sikrê ka ten leis ki ta fla-nu kuzê ki nu debe faze. — 1 Kor. 2:14-16. w23.02 16-17 ¶7-9

Kantu bês ki bu ta linpa bu kaza? Talvês antis di bu ba mora la bu linpa-l dretu. Má kuzê ki pode kontise si bu ka linpa-l más? Sima bu sabe, puera ku sujidadi pode djunta faxi. Pa bu kaza kontinua linpu, bu meste linpa-l sénpri. Di mésmu manera, tanbê nu meste kontinua ta konpo nos manera di pensa i nos manera di ser. É klaru ki antis di nu batiza, nu sforsa txeu pa muda nos vida, asi pa nu pode fikaba linpu ‘di tudu sujidadi di karni i di spritu’. (2 Kor. 7:1) Má gósi, nu meste obi ku konsedju di apóstlu Paulu i ‘kontinua ta bira más novu’. (Efé. 4:23) Kes puera i sujidadi di kel mundu li pode djunta na nos faxi. Pa Jeová kontinua kontenti ku nos, nu meste analiza sénpri nos manera di pensa, nos manera di ser i nos dizejus. w23.01 8 ¶1-2

Imajina modi ki ta sérba sábi obi Jizus ta inxina. Txeu bês óras ki el ta inxinaba el ta flaba kuzê ki staba na Skrituras i el tinha el dikoradu! Kantu Jizus batiza i el skodjedu ku spritu santu, el lenbra di se vida na séu antis di el ben vive li na téra. Kes primeru kuza ki el fla dipôs di se batismu i kes últimu palavra ki el fla antis di el móre, sta na Skrituras. (Deut. 8:3; Sal. 31:5; Luk. 4:4; 23:46) I duránti kes três anu i meiu di trabadju di pregason di Jizus li na téra, el pâpia i el splika na públiku kuzê ki staba na Skrituras. (Mat. 5:17, 18, 21, 22, 27, 28; Luk. 4:16-20) Alguns anu antis di Jizus kumesa se trabadju di pregason li na téra, el lé i el obi Palavra di Deus txeu bês. Di serteza na kaza, Jizus obi Maria ku Juzé ta pâpia sobri Skrituras. (Deut. 6:6, 7) Tanbê, Jizus ta baba tudu sábadu ku se família pa sinagóga. (Luk. 4:16) Timenti el staba na sinagóga, el ta obiba Skrituras ku atenson. w23.02 8 ¶1-2

Bu ten txeu motivu pa ama Jeová. Pur izénplu, bu intende ma el é ‘fonti di vida’ i ma el ta da-u ‘tudu bon prezenti i tudu prezenti perfeitu’. (Sal. 36:9; Tia. 1:17) Tudu kuza sábi ki bu ten ben di nos Deus, ki gosta di da i ki ta ama-nu. Resgati é un prezenti bunitu ki Jeová da-nu. Pamodi ki nu pode fla kel-li? Pensa na kel amizadi ki Jeová tevi ku se Fidju. Jizus fla: ‘Nha Pai ta ama-m’ i ‘N ta ama nha Pai’. (Juan 10:17; 14:31) Ses amizadi bira más fórti kantu es pasa txeu ténpu djuntu. (Pro. 8:22, 23, 30) Má pensa na dór ki Deus xinti kantu el dexa se Fidju sufri i móre. Jeová ta ama tudu algen txeu i abo tanbê. Pur isu, el da se Fidju ki el ta ama pa móre pa bo i pa otus algen pode vive pa tudu ténpu. (Juan 3:16; Gál. 2:20) Kel-li é kel motivu más grandi ki nu ten pa nu ama Deus. w23.03 4-5 ¶11-13

Nu debe nega ensinus di kes algen ki bandona verdadi. Jizus reprende kes irmon di Pérgamu pamodi es staba ta kria dizunion entri irmons. (Apo. 2:14-16) Jizus ilojia kes irmon di Tiatira pamodi es ivita kes ensinu ki ta ben di Satanás, i el insentiva-s pa es ‘pega riju’ na verdadi. (Apo. 2:24-26) Kes kriston ki staba fraku i ki kumesa ta sigi kes ensinu falsu meste rapendeba. Kuzê ki nu ta prende? Nu meste nega kalker ensinu ki é kóntra kes kuza ki Jeová ta fla. Kes algen ki bandona verdadi ‘ta finji ma es ta adora Deus, má es ka ta seta puder di es adorason.’ (2 Tim. 3:5) Si nos é bons studanti di Palavra di Deus, ta ser más fásil nu nega kes ensinu falsu. (2 Tim. 3:14-17; Jud. 3, 4) Nu debe ten serteza ma Jeová ta seta nos adorason. Si nu sta ta faze algun kuza ki ta poi Jeová ka ta seta nos adorason, nu ten ki aji faxi i muda nos konportamentu. — Apo. 2:5, 16; 3:3, 16. w22.05 4 ¶9; 5 ¶11