Otubru

Nos tudu nu pode djuda pa runion fika más sábi óras ki nu ta kanta djuntu ku tudu algen i da bons komentáriu. Alguns algen ta xinti medu di kanta ô di da komentárius na runion. É si ki bu ta xinti? Si bu ta xinti si, odja kuzê ki alguns algen faze pa es vense ses medu. Alguns algen da kónta ma kanta di tudu korason ta djuda-s. Nu ta kanta na runion pamodi nu krê lova Jeová. Óras ki bu ta pripara pa runion, trena kes kántiku i djobe modi ki palavras di kes kántiku sta ligadu ku asuntu di runion. Da komentáriu na runion é txeu difísil pa alguns algen. Kuzê ki pode djuda-s? Tenta da komentáriu sénpri. Lenbra ma ka ten prubléma si bu da un komentáriu kurtu, sinplis i dirétu. Jeová ta fika kontenti óras ki nu ta faze nos midjór pa lova-l na runion. w22.04 7-8 ¶12-15

Kes palavra ‘ki ta djuda-m’, krê fla un algen ki ta kóre pa ba djuda otu algen ki sta pidi ajuda. Imajina Jeová ta kóre pa salva un algen ki sta frontadu. Di serteza bu ta konkorda ma kel-li ta mostra ma Jeová krê djuda-nu própi, el krê ser Kel ki ta djuda-nu. Ku Jeová di nos ladu, nu pode aguenta nos prublémas ku alegria. Kal ki é alguns manera ki Jeová ta djuda-nu? Pa nu atxa respósta, nu ben analiza un párti di livru di Isaías. Pamodi? Pamodi txeu di kes profesia ki Izaías skrebe ta aplika na kes algen ki ta sirbi Deus gósi. Txeu bês, Izaías pâpia di Jeová di un manera ki é fásil nu intende. Isaías kapítlu 30 ten alguns izénplu. Na kel kapítlu li, Izaías uza alguns ilustrason bunitu pa mostra modi ki Jeová ta djuda se povu. El fla ma Jeová ta djuda-nu óras ki (1) el ta obi ku atenson i el ta responde nos orason, (2) el ta da-nu orientason i (3) el ta abensua-nu gósi i na futuru. w22.11 8 ¶2-3

Na kel mensajen ki Jizus da kes kongregason di Smirna ku Filadélfia, el fla kes kriston pa es ka fikaba ku medu di pasa pa pirsigison, pamodi Jeová ta rekonpensaba es si es kontinuaba fiel. (Apo. 3:10) Nu debe spéra ma nu ta pasa pa pirsigison i nu debe sta prontu pa aguenta-l. (Mat. 24:9, 13; 2 Kor. 12:10) Livru di Apokalipse ta mostra-nu ma povu di Deus ta sérba pirsigidu na ‘dia di Sinhor’ ki é kel ténpu ki nu sta ta vive gósi. (Apo. 1:10) Apokalipse kapítlu 12 ta fla ma ta tinha un géra na Séu lógu dipôs ki Jizus biraba Rei. Migel, ki é Jizus Kristu dipôs ki el volta pa Séu, i se anjus ta brigaba ku Satanás i se dimónis. (Apo. 12:7, 8) Pamodi kel-li, inimigus di Deus botadu pa Téra i es traze txeu sufrimentu pa pesoas. — Apo. 12:9, 12. w22.05 5 ¶12-13

Julgamentus di Jeová é sénpri justu. El ta trata tudu algen igual. Jeová nunka ka ta púrdua un algen pamodi se aparénsia, se rikéza, pamodi el é inportanti ô el ten txeu kapasidadi. (1 Sam. 16:7; Tia. 2:1-4) Ningen ka ta pode suborna Jeová ô obriga-l faze algun kuza. Raiba ô kuzas ki Jeová ta xinti nunka ka ta afeta disizons ki el ta toma. (Êxo. 34:7) Di serteza Jeová é kel midjór Juís pamodi el ta intende tudu kuza sobri nos i sobri nos situason. (Deut. 32:4) Kes skritor di Skrituras Ebraiku rekonhese ma kapasidadi di Jeová púrdua ka ten konparason. Na alguns kazu es uza un palavra na ebraiku ki un livru ta fla ma el ‘uzadu sô pa pâpia di manera ki Deus ta púrdua kes algen ki peka i ma kel palavra li nunka ka ta uzadu pa pâpia di manera ki un algen ta púrdua kel otu.’ É sô Jeová ki ten puder di púrdua konpletamenti un algen ki rapende. w22.06 4 ¶10-11

Si bu sta kria bus fidju bo sô, ô si bu ka ten un maridu ki ta sirbi Jeová, lenbra ma bu izénplu ta inkoraja txeu algen. Má, i si bus fidju ka krê sirbi Jeová, sikrê bu sta faze txeu sforsu? Lenbra ma ta leba ténpu pa inxina un fidju. Óras ki bu símia un simenti, bu ka ten serteza si ta nase un planta ki ta ben da fruta. Má simé, bu ta kontinua ta rega-l, sikrê bu ka sabe kal ki ta ser rezultadu. (Mar. 4:26-29) Di mésmu manera, alvês bu pode pergunta si sforsu ki bu sta faze sta ta djuda bus fidju ama Jeová. Bu ka sabe si bus fidju ta ben sirbi Jeová ô nau. Má, si bu faze bu midjór pa bu inxina-s sobri Jeová, bu pode djuda-s bira se amigu. w22.04 19-20 ¶16-17

Kantu Salumon ta sirbiba Jeová di tudu korason, el tinha un ideia ikilibradu sobri se kabésa. Kantu el éra jóven, el rekonhese ma el tinha limitason i el pidi ajuda di Jeová. (1 Reis 3:7-9) I na komésu, kantu el bira Rei, el staba sienti ma orgulhu é prigozu. Má infilismenti, ku ténpu, Salumon ka sigi kel konsedju li ki el da. El kumesa ta bira orgulhozu i ka ta obi ku mandamentus di Deus. Pur izénplu, un di kes mandamentu ta flaba ma un rei di Israel ‘ka debe tomaba un monti mudjer pa se korason ka disvia’. (Deut. 17:17) Salumon ka obi ku kel lei li, i el tinha 700 mudjer i 300 konkubina! (1 Reis 11:1-3) Talvês Salumon atxa ma kel-li é ka éra prigozu pa el. Má ku ténpu, Salumon ben xinti kes mau rezultadu di ka obi ku Jeová. — 1 Reis 11:9-13. w22.05 23 ¶12

Oji pesoas ten un disizon inportanti pa es toma. Es ten ki disidi si es ta apoia Jeová, ki é kel Deus ki ten direitu di governa Séu ku Téra, ô si es ta fika di ladu di se piór inimigu, ki é Satanás. Ten sô kel dôs ladu li, i tudu algen ten ki disidi ki ladu ki es ta apoia. I disizon ki es ta toma pode da-s vida pa tudu ténpu ô nau. (Mat. 25:31-33, 46) Duránti ‘grandi tribulason’ es ta ben siparadu pa es salva ô pa es distruídu. (Apo. 7:14; 14:9-11; Eze. 9:4, 6) Si dja bu skodje apoia govérnu di Deus, kel-li é midjór disizon ki bu toma. Di serteza bu tene gana di djuda otus algen toma kel mésmu disizon. Kes algen ki ta apoia govérnu di Jeová ta ben resebe benson. É inportanti nu studa kes verdadi li pamodi si nu faze kel-li el ta djuda-nu bira nos lialdadi pa Jeová más fórti. Tanbê nu pode uza kuzê ki nu prende pa djuda otus algen toma kel midjór disizon i kontinua ta sirbi Jeová. w22.05 15 ¶1-2

Nu meste obi ku Jeová, envês di obi ku nos inimigus. Jó presta txeu atenson kantu Jeová pâpia ku el. Deus faze Jó alguns pergunta pa djuda-l pensa. El fla-l: ‘N sabe dretu di tudu kuza ki kontise ku bo. Bu ta atxa ma N ka pode kuida di bo?’ Jó responde ku umildadi i el mostra txeu gratidon pa bondadi ki Jeová mostra-l. El fla: ‘Ku nhas obidu N obi ta papiadu di bo, má gósi, N sta ta odja-u ku nhas própi odju.’ (Jó 42:5) Bu ta lenbra na undi ki Jó staba kantu el fla kes kuza li? Inda el staba xintadu na meiu di sinza, ku korpu xeiu di frida i tristi. Ma simé, Jeová prova se amor pa Jó i El garanti-l ma El staba kontenti ku el. (Jó 42:7, 8) Oji tanbê algen pode insulta-nu i trata-nu sima si nu ka ten valor. Es pode tenta suja nos nómi i nómi di nos organizason. Stória di Jó ta inxina-nu ma Jeová ta kunfia ma nu ta kontinua lial pa el óras ki nu sta pasa pa prubléma. w22.06 24 ¶15-16

Enbóra ta ben ten grandi alegria na Séu óras ki Babilónia Grandi distruídu, ta ben ten otu kuza ki ta ben traze más alegria inda. (Apo. 19:1-3) É ‘kazamentu di Korderu’, ki é kel kontisimentu más inportanti di livru di Apokalipse. Tudu kes 144 mil ta sta na Séu antis di géra di Armajedon kumesa. Má inda é ka ténpu di kazamentu di Korderu. (Apo. 21:1, 2) Kazamentu di Korderu ta ben kontise dipôs ki géra di Armajedon kaba ku tudu inimigus di Deus. (Sal. 45:3, 4, 13-17) Kuzê ki ta ben kontise na kazamentu di Korderu? Sima un kazamentu ta djunta un ómi ku un mudjer, kel kazamentu li ta ben djunta Rei Jizus Kristu ku kes 144 mil, ki é se ‘noiva’. Óras ki kel kuza inportanti li kontise, kel govérnu novu ta ben kumesa ta governa Téra duránti mil anu. — Apo. 20:6. w22.05 17 ¶11-13

Jizus fla ma na ténpu di fin el ta ben skodjeba un ‘skravu fiel i prudenti’ pa da kumida spritual. (Mat. 24:45) I é kel-li ki sta ta kontise. Jizus sta ta uza un grupu pikinoti di ómis skodjedu ku spritu santu pa da povu di Deus i kes algen ki ten interesi ‘kumida [spritual] na óra sértu’. Kes ómi li, es ka ta atxa ma es é dónu di fé di otus algen. (2 Kor. 1:24) Envês di kel-li, es ta rekonhese ma Jizus Kristu é ‘líder i governanti’ di se povu. (Isa. 55:4) Désdi 1919, skravu fiel dja faze txeu publikason ki dja da kes algen ki mostra interesi oportunidadi di prende verdadi di Palavra di Deus. Na 1921, skravu faze livru A Harpa de Deus, pa djuda kes ki tinha interesi prende kes verdadi prinsipal di Bíblia. Sima ténpu ba ta muda, fazedu otus livru. Ki livru ki djuda-u konxe i ama Jeová? w22.07 10 ¶9-10

Ka ten ningen ki gosta di da más ki Jeová. Ka ta inporta kuzê ki bu da-l, sénpri el ta da-u mutu más txeu. (Mar. 10:29, 30) El ta da-u kel vida más interesanti i más sábi ki ten, sikrê gósi na kel mundu mau li. I kel-li é sô komésu. Bu pode kontinua ta sirbi bu Pai pa tudu ténpu. Kel amor ki izisti entri bo ku bu Pai ta kontinua ta bira más txeu. I dipôs, bu ta kontinua ta vive pa tudu ténpu sima el. Óras ki bu da bu vida pa Jeová i bu batiza, bu ta ten priviléjiu di da bu Pai un kuza ki ten txeu valor pa el. El da-u tudu kuza dretu, tudu momentu sábi ki dja bu pasa pa el na bu vida. I abo, bu pode da Dónu di séu ku téra un kuza ki inda el ka ten, ki é sirbi-l ku lialdadi i di livri vontadi. (Jó 1:8; 41:11; Pro. 27:11) Di serteza, kel-li é midjór manera di uza bu vida. w23.03 6 ¶16-17

Óras ki abo é más jóven, dizeju di faze séksu pode ser más fórti. I alvês otus algen ta faze-u preson pa bu faze konportamentu seksual mariadu. É kel-li ki Satanás krê pa bu faze. Kuzê ki pode djuda-u kontinua ta ten un konportamentu linpu? (1 Tes. 4:3, 4) Óras ki bu ta ora pa Jeová, fla-l modi ki bu sta xinti i pidi-l pa el da-u forsa. (Mat. 6:13) Lenbra ma Jeová krê djuda-u, el ka ta julga-u. (Sal. 103:13, 14) Ka bu tenta rezolve prublémas bo sô. Pâpia ku bu pai i ku bu mai sobri kuzê ki sta kontise. É klaru ki é ka fásil pâpia sobri kes asuntu li, má é inportanti faze kel-li. Óras ki bu ta lé Bíblia i midita na se prinsípius ta ser más fásil toma disizon ki ta agrada Jeová. Bu ta odja ma bu ka meste di un régra pa kada situason, pamodi bu ta intende kuzê ki Jeová ta pensa sobri alguns asuntu. w22.08 5 ¶10-12

Un xéfi di família ki ta sirbi Deus ta leba asériu se responsabilidadi di kuida di se família. Si bo é xéfi di família, bu pode sta preokupadu ku poi kumida na méza i paga rénda. Tanbê, talvês bu sta ku medu ma si bu perde bu trabadju bu ka ta konsigi atxaba otu. Ô talvês bu fika ta pensa ma bu ka ta konsigi vive ku ménus dinheru. Satanás konsigi poi txeu algen para di sirbi Jeová pamodi es xinti medu di kes kuza li. Satanás ta tenta pô-nu ta kridita ma Jeová ka ta preokupa ku nos i ma el ka ta djuda-nu kuida di nos família. Pamodi kel-li nu pode pensa ma nu ten ki faze tudu kuza pa nu ka perde nos trabadju, sikrê nu ten ki prujudika nos amizadi ku Deus. w22.06 15 ¶5-6

Nu sabe ma el é un Deus di ‘mizerikórdia i konpaxon, ki ten paxénxa i ki sta xeiu di amor lial i di verdadi’. (Êxo. 34:6) Tanbê Jeová ta ama justisa. (Isa. 61:8) Ta due-l txeu odja-nu ta sufri i el ta spéra kel óra sértu pa el ben kaba ku tudu sufrimentu. (Jer. 29:11) Nu tene gana pa kel-li kontise! É ka atoa ki nu ta ama Jeová txeu! Kal ki é un otu motivu ki ta pô-nu ta ama verdadi? Konxe verdadi ta djuda-nu txeu. Nu ben odja un izénplu. Verdadis di Bíblia ta inklui speransa ki nu ten pa futuru. Sima un ánkura ka ta dexa un barku sakudi txeu, di mésmu manera nos speransa ki ten bazi na Bíblia ta djuda-nu kontinua kalmu óras ki nu ta pasa pa prublémas. Na testu di oji, apóstlu Paulu staba ta pâpia di kel speransa ki kes kriston skodjedu ten di ba vive na Séu. Má kuzê ki el fla ta aplika tanbê na kes sérvu di Jeová ki ten speransa di vive pa tudu ténpu na paraízu li na Téra. (Juan 3:16) Di serteza, prende sobri kel speransa di vive pa tudu ténpu ta da-nu un obijetivu na vida. w22.08 14-15 ¶3-5

É amor ki é bazi di nos kunfiansa na nos irmons. Na 1 Koríntius kapítlu 13 ta splika modi ki amor pode djuda-nu kunfia na otus algen ô torna kunfia na otus algen. (1 Kor. 13:4-8) Pur izénplu, na versíklu 4 ta fla ma ‘amor ten paxénxa i el é bon.’ Jeová ten paxénxa ku nos óras ki nu ta peka kóntra el. Nton, nu debe ten paxénxa ku nos irmons si es fla ô faze algun kuza ki irita-nu ô ki magua-nu. Versíklu 5 ta fla: ‘[Amor] ka ta xatia faxi. El ka ta liga mal ki fazedu.’ Nu ka ta lenbra di kada kuza mariadu ki un irmon fla ô faze kóntra nos. Eclesiastes 7:9 ta fla ma nu ka debe ‘ofende faxi’. Tenta odja bus irmons i irmans sima Jeová ta odja-s. Deus ta ama-s i el ka ta leba en kónta pekadus ki es ta faze. Nen nos nu ka debe faze kel-li. (Sal. 130:3) Envês di nu konsentra na ses fadjas, konsentra na kes kuza bon ki es pode faze. — Mat. 7:1-5. w22.09 3-4 ¶6-7

Livru di Daniel ta fla modi ki kuzas ta ben kontise duránti ténpu di fin. Pur izénplu, Daniel 12:1 ta fla ma Migel, ki é Jizus Kristu, ta ‘sta sakédu pa djuda povu’ di Deus. Kel párti di es profesia kunpri na anu 1914 kantu Jizus skodjedu pa ser Rei di Reinu di Deus na Séu. Má, Daniel tanbê fla ma Jizus ‘ta ben labanta’ duránti ‘ténpu di frónta, ki sima kel-la nunka ka kontise, désdi ki nasons kumesa ta izisti ti kel ténpu.’ Kel ‘ténpu di frónta’ li é ‘grandi tribulason’ ki Mateus 24:21 ta pâpia di el. Jizus ta ben labanta ô el ta ben aji pa difende povu di Deus na fin di kel ténpu di frónta, ki é na Armajedon. Livru di Apokalipse ta fla ma kes algen li é kel ‘monti di algen ki ta sai di grandi tribulason’. — Apo. 7:9, 14. w22.09 21 ¶4-5

Kes nómi ki sta na livru di vida pode pagadu. É sima ki primeru Jeová ta skrebe kes nómi ku lapis. (Apo. 3:5, nóta di rodapé.) Nos tudu nu krê ten serteza ma nos nómi ta kontinua na kel livru li ti ki txiga kel ténpu ki ka ta da pa paga más, sima si el skrebedu ku kanéta. Un grupu ki ses nómi ki dja sta skrebedu na livru di vida é kes ki skodjedu pa ba governa ku Jizus na Séu. Sima apóstlu Paulu fla se ‘kunpanherus di trabadju’ na Filipus, nómi di kes ki skodjedu ô ki konvidadu pa ba governa ku Jizus, dja sta na livru di vida. (Fil. 4:3) Má pa ses nómi kontinua na kel livru li, es debe kontinua fiel. Dipôs, óras ki es resebe kel últimu sélu na algun momentu antis di es móre ô antis di kumesa grandi tribulason, ses nómi ta ben skrebedu pa tudu ténpu na kel livru. — Apo. 7:3. w22.09 14 ¶3; 15 ¶5-6

Pensa na kel-li: Un algen ta faze kel kumida ki bu gosta más txeu. Má pamodi bu sta ku présa ô bu sta txeu preokupadu, bu ta kume kel kumida uma faxi. Dipôs ki bu tirmina di kume kel kumida, bu ta da kónta ma bu kume-l faxi dimás i bu rapende pamodi bu ka kume-l ku kalma i bu ka xinti gostu di kel kumida más dretu. Dja bu kustuma lé Bíblia faxi dimás ki nen bu ka xinti gostu di kuzê ki el ta fla? Tra ténpu pa bu xinti gostu na lé Palavra di Deus. Imajina kes séna, kes son, kes vós i pensa na kuzê ki bu lé. Tudu kes kuza li ta da-u más filisidadi. Jizus skodje ‘skravu fiel i prudenti’ pa da kumida spritual na óra sértu, i nu sta ta resebe bon kumida spritual própi. (Mat. 24:45) Bíblia é kel kuza prinsipal ki skravu fiel ta poi na tudu kumida ki el ta faze. — 1 Tes. 2:13. w22.10 7-8 ¶6-8

Bíblia ta fla ma na ténpu di fin ta ben tinha txeu di kes algen ki ta faze trósa. (2 Ped. 3:3, 4) Es ‘ta aji di akordu ku ses própi dizeju mariadu.’ (Jud. 7, 17, 18) Modi ki nu pode ten serteza ma nu ka ta bira sima kes ki ta faze algen trósa? Un manera é ivita sta ku kes algen ki ta kritika tudu kuza. (Sal. 1:1) Kel-li krê fla ma nu ka ta obi, nen nu ka ta lé nada di kes algen ki fika kóntra organizason di Jeová. Nu sabe ma si nu ka toma kuidadu nu pode kumesa ta kritika i ta duvida di Jeová i di kes orientason ki nu ta resebe através di se organizason. Pa nu ivita kel-li, nu pode pergunta nos kabésa: ‘Sénpri N ta ten un kuza negativu pa fla óras ki nu ta resebe un orientason novu ô alguns splikason? N ten tendénsia di kritika kes ki toma kónta di kongregason?’ Si nu koriji kes tendénsia mariadu faxi, Jeová ta fika kontenti ku nos. — Pro. 3:34, 35. w22.10 20 ¶9-10

Spritu santu da Ezekiel koraji pa faze se trabadju di prega pa kes algen na se tiritóriu ki tinha ‘kabésa duru i korason duru tanbê’. Jeová fla Ezekiel: ‘N poi bu róstu ta fika riju sima ses róstu i bu tésta ta fika riju sima ses tésta. N faze bu tésta sima un diamanti, más riju di ki pédra. Ka bu xinti medu di es, nen ka bu dexa medu toma kónta di bo pamodi ses róstu’. (Eze. 3:8, 9) É sima si Jeová staba ta fla Ezekiel: ‘Ka bu dexa kel povu li ki é temozu dizanima-u. N ta da-u forsa.’ Dipôs di kel-li, spritu santu leba Ezekiel pa ba prega na se tiritóriu. El skrebe: ‘Mô di Jeová éra fórti riba mi.’ Pasa un simana pa Ezekiel intende dretu kel mensajen ki el tinha ki pregaba pa kes algen. (Eze. 3:14, 15) Dipôs Jeová fla-l pa el bai pa un vali na undi ki ‘spritu entra na el’. (Eze. 3:23, 24) Asi, Ezekiel staba prontu pa kumesa se trabadju di pregason. w22.11 4-5 ¶8-9

Proféta Abakuki pasa pa txeu prubléma. Ta parse ma un bês el tinha dúvida si Jeová ta preokupaba ku el. Nton, el abri se korason i el fla Jeová kuzê ki el staba ta xinti. Jeová responde kel orason di korason ki se sérvu fiel faze pa el. (Hab. 2:2, 3) Dipôs, Abakuki midita na modi ki Jeová dja salvaba se povu i el fika kontenti otu bês. El fika konvensidu ma Jeová ta preokupaba ku el i ma el ta djudaba el aguenta firmi kalker prubléma. (Hab. 3:17-19) Kuzê ki nu ta prende? Óras ki bu ta pasa pa prublémas, faze orason i fla Jeová modi ki bu sta xinti i pidi-l ajuda. Óras ki bu ta faze si, bu pode ten serteza ma Jeová ta da-u kel forsa ki bu meste pa bu aguenta firmi. I óras ki bu xinti se ajuda, bu fé na el ta bira más fórti. Si bu kontinua ta faze kes kuza pa mante bu amizadi ku Jeová fórti, bu ka ta dexa prublémas ô dúvidas ta pô-u ta sipara di Jeová. — 1 Tim. 6:6-8. w22.11 15 ¶6-7

Jizus i kes dôs kriminozu na se ladu staba ta sufri timenti es staba ta móre poku-poku. (Luk. 23:32, 33) Antis, kes dôs kriminozu faze Jizus trósa. (Mat. 27:44; Mar. 15:32) Má dipôs, un di es muda di ideia. El fla: ‘Jizus, lenbra di mi óras ki bu entra na bu Reinu.’ Jizus responde-l ku kes palavra ki sta na testu di oji. (Luk. 23:39-42) Kel kuza ki Jizus fla kel kriminozu debe pô-nu ta pensa na modi ki vida na Paraízu ta ben ser. Na verdadi, kel govérnu di pas di Rei Salumon pode inxina-nu algun kuza sobri paraízu. Bíblia ta fla ma Jizus é más grandi ki Salumon. Nton, nu pode spéra ma Jizus ta ben trabadja djuntu ku kes ki ta ba governa ku el pa bira téra un paraízu rei di sábi. (Mat. 12:42) É klaru ki kes ‘otu ovelha’ debe krê sabe kuzê ki es debe faze pa es pode ba vive pa tudu ténpu na Paraízu. — Juan 10:16. w22.12 8 ¶1; 9 ¶4

Izaías ta da-nu serteza ma Jeová ta obi-nu ku atenson óras ki nu ta pidi-l ajuda i el ta responde nos orason faxi. Izaías fla tanbê: ‘El ta kudi-u lógu ki el obi bu gritu.’ Kes palavra li ki ta konsola-nu, ta lenbra-nu ma nos Pai sta prontu i el tene gana di djuda kes ki ta pidi se ajuda. Sabe kel-li ta djuda-nu aguenta firmi ku alegria. Jeová ta obi ku atenson orason ki kada un di nos ta faze. Pamodi ki nu pode fla kel-li? Na primeru párti di kapítlu 30 di Isaías, la ta fla ‘nhos’ pamodi Jeová sta ta pâpia ku se povu interu. Má, na versíklu 19 ta fla ‘bu’ pamodi el sta pâpia ku un algen. Izaías fla: ‘Abo bu ka ta txora más. Di serteza el ta djuda-u, el ta kudi-u.’ Sima un Pai ki krê-nu txeu, Jeová ta preokupa ku kada un di nos i el ta presta atenson na nos orason. — Sal. 116:1; Isa. 57:15. w22.11 9 ¶5-6

Prega i inxina sikrê ku opozison ta da-nu alegria i pas. Na primeru séklu, kantu kes autoridadi di judeus manda kes apóstlu pa para di prega, kes ómi fiel li skodje obi ku Deus. Es kontinua ta prega i kel trabadju li pô-s fika kontenti. (Atus 5:27-29, 41, 42) É klaru ki si nos trabadju di pregason ten poku liberdadi nu debe toma kuidadu óras ki nu ta prega. Má si nu faze nos midjór, nu ta xinti pas pamodi nu sta ta poi Jeová kontenti i nu sta ta leba otus algen un mensajen ki ta salva ses vida. Bu pode ten serteza ma sikrê na situasons difísil, nu pode ten pas. Na kes situason li, nu debe lenbra ma kel pas ki nu meste é kel pas ki é sô Jeová ki pode da-nu. Kunfia na el óras ki bu sta ta pasa pa un duénsa ki ta spadja, un disgrasa ô pirsigison. Kontinua pértu di se organizason. Pensa na kel futuru sábi ki sta ta spera-u. Óras ki bu faze kel-li ‘kel Deus di pas ta sta ku bo.’ — Fil. 4:9. w22.12 21 ¶17-18

Nu debe sforsa txeu pa nu faze kel-li. Un di kes kuza ki nu debe faze é sforsa pa kaba ku kes mau kualidadi, sima rankor i raiba. (Efé. 4:31, 32) Pamodi ki faze kel-li pode ser difísil? Pamodi alguns manera di ser mariadu sta ben finkadu na nos. Pur izénplu, Bíblia ta fla ma ‘tendénsia di korason di ómi é mau désdi se juventudi.’ (Gén. 8:21) Kontrola kes manera di ser mariadu ki nu ten talvês ta iziji pa nu kontinua ta sforsa, sikrê dipôs ki nu batiza. (Rom. 7:21-23) Pâpia ku Jeová na orason sobri kel manera di ser ki bu sta ta luta ku el, ku serteza ma el ta obi bu orason i ma el ta djuda-u. (1 Juan 5:14, 15) Enbóra Jeová ka ta faze un milagri ta kaba ku kel manera di ser, el pode da-u forsa, asi pa bu konsigi kontrola-l. (1 Ped. 5:10) Pa bu aji di akordu ku bu orason, ka bu faze kes kuza ki pode poi kel manera di ser bédju ta parse otu bês. I ka bu kontinua ta pensa na kes dizeju mariadu. — Fil. 4:8; Kol. 3:2. w23.01 10 ¶7, 9-10

Un manera ki nu ta mostra nos amor é óras ki nu ta partisipa na pregason ku zelu. Nu ta pâpia ku tudu algen ki nu ta atxa. Nu ka ta ivita pâpia ku un algen pamodi el é di un rasa ô tribu diferenti. Tanbê nu ta pâpia ku tudu algen, ka ta inporta si el é riku ô póbri, si el ten skóla ô nau. Di kel manera li, nu ta faze vontadi di Jeová ki é ‘pa tudu tipu di algen salva i pa es ten un konhisimentu izatu di verdadi.’ (1 Tim. 2:4) Tanbê nu ta prova ma nu ten amor pa Deus i pa Jizus, óras ki nu ta mostra amor pa nos irmons ku irmans. Nu ta preokupa txeu ku kuzê ki es meste i nu ta djuda-s óras ki es ta pasa pa prublémas. Nu ta konsola-s óras ki un algen ki es ta ama móre, nu ta vizita-s óras ki es sta duenti i óras ki es sta dizanimadu nu ta faze nos midjór pa da-s koraji. (2 Kor. 1:3-7; 1 Tes. 5:11, 14) Nu ta kontinua ta ora pa es pamodi nu sabe ma ‘súplika di un ómi justu ten txeu forsa.’ — Tia. 5:16. w23.01 28-29 ¶7-8

Sima ténpu ta ba ta pasa, un algen ki ta trabadja na konstruson ta midjora se manera di trabadja. Nos tanbê nu pode midjora nos manera di djuda nos irmons. Nu pode djuda nos irmons ten forsa pa infrenta prublémas óras ki nu ta konta-s spiriénsia di kes algen ki konsigi vense kes prubléma ki es pasa pa el. (Ebr. 11:32-35; 12:1) Tanbê nu pode mante pas na kongregason óras ki nu ta pâpia dretu di otus algen i nu ta sforsa pa mante pas óras ki ta parse algun prubléma ki pode kaba ku union na kongregason. I nu debe sta prontu pa faze pas ku nos irmons óras ki nu ten algun prubléma. (Efé. 4:3) I nu pode kontinua ta djuda nos irmons bira ses fé más fórti óras ki nu ta pâpia ku es sobri alguns verdadi inportanti di Bíblia pa djuda-s na kel ki es meste i pa apoia-s óras ki ses fé sta fraku. Tanbê nu pode fika kontenti óras ki nu ta djuda nos irmons ku irmans bira ses fé más fórti. Kes prédiu ki irmons ta faze, ka ta dura pa tudu ténpu. Má óras ki nu ta djuda nos irmons nu ta ten rezultadus ki ta dura pa tudu ténpu. w22.08 22 ¶6; 25 ¶17-18

Jizus pâpia di un kuza inportanti ki nu meste faze pa nu pode intende kuzê ki nu ta lé na Palavra di Deus. Nu debe pensa ku kuidadu pa nu intende kuzê ki nu sta lé. (Mat. 24:15) Modi ki nu pode faze kel-li? Nu meste pensa ku kuidadu sobri modi ki un ideia sta ligadu ku kel otu i modi ki es é diferenti di kunpanheru, i odja kuzê ki ka sta mutu klaru. I sima Jizus mostra, nu meste pensa ku kuidadu pa intende kuzê ki sta ta kontise gósi ki sta kunpri profesias di Bíblia. Tanbê, nu meste faze kel-li pa nu pode intende dretu tudu kuza ki nu ta lé na Bíblia. Jeová ta djuda se sérvus pensa dretu pa intende kuzê ki es ta lé. Nton, faze orason i pidi-l pa el djuda-u pensa ku kuidadu pa bu pode intende. Modi ki bu pode aji di akordu ku bu orason? Analiza ku kuidadu kuzê ki bu lé i repara modi ki el sta ligadu ku otus kuza ki bu sabe. Djobe kuzê ki un párti di Bíblia krê fla i odja di ki maneras ki bu pode faze sima bu prende. (Ebr. 5:14) Óras ki bu ta pensa ku kuidadu pa intende kuzê ki bu lé, bu ta intende Skrituras midjór. w23.02 10 ¶7-8

Imajina ma un amigu da-u un kuadru txeu antigu, má ki ten txeu valor. El sta diskoradu, el tene alguns mantxa i el sta ratxadu. Má sikrê ku kes difeitu li, kel kuadru bale txeu dinheru. Di serteza, bu ta da valor i bu ta proteje kel kuadru li. Di mésmu manera, Jeová da-nu un prezenti ki ten txeu valor, ki é vida. Na verdadi Jeová mostra modi ki nos vida ten txeu valor pa el, kantu el da se Fidju pa móre pa nos. (Juan 3:16) Jeová é Fonti di vida. (Sal. 36:9) Apóstlu Paulu tanbê ta kriditaba na kel-li, i el fla: ‘Através di el nu ten vida, nu ta mexe i nu ta izisti’. (Atus 17:25, 28) Nton, nu pode fla ma nos vida é un prezenti di Deus. El ta da-nu ku amor kes kuza ki nu meste, asi pa nu kontinua ta vive. (Atus 14:15-17) Má Jeová ka ta faze milagri pa proteje nos vida. Envês di kel-li, el ta spéra ma nu ta kuida di nos saúdi i di nos amizadi ku el di midjór manera ki nu pode. — 2 Kor. 7:1. w23.02 20 ¶1-2

Nu ta agradese Jeová txeu pamodi el da-nu Bíblia. Na Bíblia, el ta da-nu konsedju ku sabedoria ki ta djuda-nu sabe kuzê ki nu ta faze óras ki nu tene prublémas. Tanbê el ta da-nu un speransa sábi pa futuru. Má más inportanti inda, Jeová ta uza Bíblia pa inxina-nu txeu kuza sobri se manera di ser. Óras ki nu ta pensa na kes kualidadi bunitu di Jeová, kel-li ta mexe ku nos korason i el ta pô-nu ta krê bira más se amigu. (Sal. 25:14) Jeová krê pa algen konxe-l. Na pasadu, el da alguns algen sonhus, vizons i el manda anjus pa leba se mensajen pa otus algen. (Núm. 12:6; Atus 10:3, 4) Má nu ka ta konsigi studaba kes sonhu, vizons ô mensajen di anjus si es ka staba skrebedu. É pamodi kel-li ki Jeová poi ómis ta skrebe na ‘un livru’ tudu kes kuza ki el krê pa nu sabeba. Dja ki ‘kaminhu di Deus verdaderu é perfeitu’, nu pode ten serteza ma kel-li é un bon manera di el pâpia ku nos i kel-li ta djuda-nu. — Sal. 18:30. w23.02 2 ¶1-2

Poi métas ki ta djuda-u. Skodje métas ki ta djuda-u bira bu fé más fórti i un algen midjór. (Efé. 3:16) Pur izénplu, bu pode disidi midjora bu prugrama di studu pesoal i leitura di Bíblia. (Sal. 1:2, 3) Ô talvês bu pode tenta faze orason más txeu i di korason. Talvês bu meste toma más kuidadu ku diverson ki bu ta skodje ô modi ki bu ta uza bu ténpu. (Efé. 5:15, 16) Óras ki bu ta djuda otus bu ta bira un algen maduru. Pur izénplu, bu pode poi métas di djuda kes irmon ki dja sta algen grandi i duenti na bu kongregason. Talvês bu pode bai kunpra kes kuza ki es meste ô djuda-s uza aparelhus iletróniku. Tanbê bu pode mostra amor pa kes algen ki ka ta sirbi Jeová óras ki bu ta pâpia ku es di notísias sábi di Reinu. (Mat. 9:36, 37) Si ta da, poi méta di partisipa di algun manera na sirvisu pa ténpu interu. w22.08 6 ¶16-17