Julhu

Tudu kuza ki Jizus faze, ki ta inklui kes milagri, el imita se Pai di manera perfeitu na se pensamentus i na kuzê ki el staba ta xinti. (Juan 14:9) Kuzê ki nu pode prende ku milagris di Jizus? Jizus ku se Pai ta ama-nu txeu. Kantu Jizus staba na téra, el mostra txeu amor pa algen kantu el uza puder ki el tinha pa faze milagri pa kaba ku ses sufrimentu. Un bês, dôs ségu pidi-l pa el djuda-s. (Mat. 20:30-34) Repara ma Jizus “xinti péna di es” i dipôs el kura-s. Kel vérbu na gregu ki traduzidu pa “xinti péna” ki uzadu na kel versíklu li, krê fla xinti konpaxon fórti, di fundu di korason. Kel konpaxon fórti li, ki é un manera di mostra amor, tanbê poi Jizus ta da kes algen ki tinha fómi kumida i ta kura un leprozu. (Mat. 15:32; Mar. 1:41) Nu pode ten serteza ma Jeová, ki é un ‘Deus di konpaxon’, ta sufri óras ki el ta odja-nu ta sufri. I se Fidju ki ta ama-nu txeu, tanbê ta xinti mésmu kuza. (Luk. 1:78; 1 Ped. 5:7) Es tene gana di kaba ku tudu kes prubléma ki ta pô-nu ta sufri! w23.04 3 ¶4-5

Nu pode faze nos midjór pa ivita lé i obi kes kuza mariadu ki é txeu konxedu na mundu di Satanás. Nu pode intxi nos menti di kuzas ki ta inkoraja-nu, sima lé i studa Bíblia, sisti runion i partisipa na pregason. Tanbê nu pode proteje nos manera di pensa. Jeová ta promete ma el ka ta dexa-nu pasa pa un tentason más di ki kel ki nu pode aguenta. (1 Kor. 10:12, 13) Nos tudu nu meste faze orason más txeu pa Jeová pa nu mante fiel duránti es ténpu di fin. Jeová krê pa nu ‘konta-l tudu kel ki sta na nos korason’ na orason. (Sal. 62:8) Lova Jeová i agradese-l pa tudu kuza ki el ta faze. Pidi-l pa el djuda-u ten koraji na pregason. Pidi-l pa el djuda-u lida ku kalker prubléma i pa bu aguenta firmi na kalker tentason ki bu pode pasa pa el. Ka bu dexa nada nen ningen pô-u ta para di faze orason pa Jeová sénpri. w23.05 7 ¶17-18

Pamodi ki nu ta sisti runion? Primeru, é pamodi nu krê lova Jeová. (Sal. 26:12; 111:1) Tanbê nu ta sisti runion pa nu inkoraja kunpanheru na es ténpu difísil. (1 Tes. 5:11) Óras ki nu ta labanta mô pa da komentáriu, nu sta ta faze kes dôs kuza li. Má óras ki nu ta da komentáriu, nu pode ten dôs prubléma. Nu pode fika nervozu na óra di da komentáriu ô nu pode ten gana di da komentáriu, má nu pode ka dadu komentáriu txeu bês sima nu ta kreba. Kuzê ki pode djuda-nu lida ku kes prubléma li? Apóstlu Paulu fla ma nu debe konsentra na ‘da kunpanheru koraji’. Nu pode fika ménus nervozu na óra di da komentáriu, si nu lenbra ma nu pode da otus koraji ti ku un komentáriu sinplis ki ta mostra nos fé. I si nu ka dadu komentáriu txeu bês sima nu ta kreba, nu pode fika kontenti pamodi otus na kongregason tevi oportunidadi di da komentáriu. — 1 Ped. 3:8. w23.04 20 ¶1-3

Rei da un avizu. El fla ma kes judeu ki dja tinha uns 70 anu prézu na Babilónia, dja staba livri pa sai i volta pa ses téra, Israel. (Esd. 1:2-4) É sô Jeová ki pode fazeba kel-li. É pamodi Babilónia nunka ka libertaba se prézus. (Isa. 14:4, 17) Má Babilónia dja kaíba i kel novu govérnu fla ma kes judeu pode baba. Tudu xéfi di família tinha ki disidiba si es ta saíba di Babilónia ô si es ta fikaba la. Kel-li ka éra un disizon fásil. Txeu di es dja staba algen grandi pa faze kel viajen. I dja ki maioria di kes judeu nase na Babilónia, la éra úniku lugar ki es konxeba. Es ka ta xintiba ma Israel éra ses téra. Pa es, la éra téra sô di ses gentis grandi. Alguns judeu tinha vida dretu na Babilónia. Nton es pode atxaba difísil dexa ses kaza ki es ta moraba dretu ô ses nogósiu, pa es ba moraba na un téra ki es ka konxeba. w23.05 14 ¶1-2

Palavra di Deus ta insentiva-nu pa nu kontinua ta dizenvolve kapasidadi di aguenta firmi, konpaxon i amor. Lukas 21:19 ta fla: “É pamodi nhos kapasidadi di aguenta firmi, ki nhos ta salva nhos vida.” Kolosensis 3:12 ta fla: “Nhos bisti di konpaxon”. I 1 Tesalonisensis 4:9, 10 ta fla: “Deus sta ta inxina nhos ama kunpanheru. Má irmons, nu krê inkoraja nhos, pa nhos kontinua ta faze-l kada bês más.” Tudu kes palavra li skrebedu pa kes irmon ki dja staba ta mostra kapasidadi di aguenta firmi, konpaxon i amor. Má es tinha ki kontinua ta mostraba kes kualidadi li. Nu meste faze mésmu kuza. Pa djuda-u, odja modi ki kes kriston na ténpu di apóstlus mostra kes kualidadi li. Dipôs, bu ta odja modi ki bu pode imita kes disiplu li i asi, mostra ma bu sta prontu pa grandi tribulason. Nton óras ki grandi tribulason kumesa, bu ta sta prontu pa aguenta firmi i bu ta sta más disididu na kontinua ta faze kel-li. w23.07 3 ¶4, 8

Ka ta inporta si nos é skodjedu ku spritu santu ô si nu ta faze párti di ‘otus ovelha’, nos tudu nu meste kontinua na ‘Kaminhu di Santidadi’. Faze kel-li ta djuda-nu kontinua ta adora Jeová gósi i nu ta ben resebe kes benson di Reinu na futuru. (Juan 10:16) Désdi 1919, milhons di ómi, mudjeris i kriansas sai di Babilónia Grandi ki ta reprizenta tudu relijion falsu i es kumesa ta anda na ‘Kaminhu di Santidadi.’ Jeová ranja manera pa tudu kes kuza ki staba na kaminhu tradu di la kantu kes judeu sai di Babilónia. (Isa. 57:14) Kuzê ki nu pode fla di ‘Kaminhu di Santidadi’ di nos ténpu? Txeu anu antis di 1919, Jeová kumesa ta uza kes ómi ki tinha grandi ruspetu pa el, pa djuda otus algen sai di Babilónia Grandi. (Konpara ku Isaías 40:3.) Es faze kes trabadju ki mesteba i ki dipôs ben djuda kes algen sinseru sai di relijion falsu i adora Jeová djuntu ku se povu. w23.05 15-16 ¶8-9

Jeová krê pa nu sirbi-l pamodi nu krê i ku alegria. (2 Kor. 9:7) Nton, nu debe kontinua ta sforsa pa alkansa un méta spritual si nu ka tene gana di faze-l? Odja izénplu di apóstlu Paulu. El fla: ‘N ta sota nha korpu i N ta leba-l sima skravu’. (1 Kor. 9:25-27, nóta di rodapé) Mésmu kantu Paulu ka tinha dizeju di faze kel ki Jeová krê pa el fazeba, el obriga se kabésa pa faze-l. Jeová fika kontenti ku kuzê ki Paulu faze? Sin! I Jeová rekonpensa-l pa sforsu ki el faze. (2 Tim. 4:7, 8) Di mésmu manera, Jeová ta fika kontenti óras ki el ta odja-nu ta sforsa pa alkansa nos méta, sikrê nu ka tene motivason pa faze kel-li. Enbóra nu pode ka faze kel-li sénpri pamodi nu gosta, Jeová ta fika kontenti pamodi el sabe ma é nos amor pa el ki ta pô-nu ta faze-l. Sima Jeová abênsua Paulu, tanbê el ta abênsua nos sforsu. (Sal. 126:5) I sima nu ta resebe benson di Jeová, nu pode ti kumesa ta xinti motivadu. w23.05 29 ¶9-10

Apóstlu Paulu konpara kes ki ka ta ben salva na dia di Jeová ku kes algen ki sta ta durmi. Es ka ta da kónta di ténpu ta pasa i nen di kuzê ki sta kontise na ses vólta. Pur isu, es ka ta konsigi intende pamodi ki alguns kuza inportanti sta ta kontise na mundu i es ta kontinua sen faze nada. Oji, maioria di algen sta ta durmi na sentidu spritual. (Rom. 11:8) Es ka ta kridita ma nu sta ta vive na “ténpu di fin” i ma ka ta dura grandi tribulason ta kumesa. (2 Ped. 3:3, 4) Má kada dia ki ta pasa é más inportanti inda nu sta kordadu. (1 Tes. 5:6) Má, pamodi ki nu debe mante kalmu i firmi? Pa nu ka mete na asuntus di es mundu ki ten aver ku pulítika ô prublémas na sosiadadi. Sima dia di Jeová sta ta fika kada bês más pértu, preson pa mete na kes asuntu li ta fika más txeu. Má nu ka meste fika preokupadu dimás na modi ki nu ta ben reaji. Spritu santu di Deus pode djuda-nu mante kalmu i firmi i toma disizons ku sabedoria. — Luk. 12:11, 12. w23.06 10 ¶6-7

Kuzê ki bu ta pensa na el óras ki bu ta obi nómi Sanson? Talvês bu ta pensa na un ómi ki tinha txeu forsa. I kel-li é verdadi. Má Sanson toma un disizon mariadu ki pô-l ta sufri txeu. Má simé, Jeová konsentra na tudu kel ki Sanson faze pa sirbi-l i Deus poi izénplu di fé di Sanson na Bíblia pa djuda-nu. Jeová uza Sanson pa faze kuzas ki ta dexa-nu dimiradu pa djuda israelitas, ki éra Se povu. Txeu ténpu dipôs ki Sanson móre, Jeová poi apóstlu Paulu pa skrebe nómi di Sanson na un lista di ómis ki tinha txeu fé. (Ebr. 11:32-34) Izénplu di Sanson pode da-nu koraji. El kunfia na Jeová sikrê na situasons difísil. Nu pode prende ku Sanson i modi ki se izénplu pode da-nu koraji. w23.09 2 ¶1-2

Nu pode bira nos kapasidadi di aguenta firmi más fórti, óras ki nu ta faze orason pa Jeová txeu bês i di korason nu ta fla-l kuzê ki nu sta preokupadu ku el. (1 Tes. 5:17) Talvês bu ka sta pasa pa un provason difísil gósi. Má simé, bu ta djobe orientason di Jeová óras ki bu sta xatiadu, konfuzu ô dizorientadu? Si sénpri bu ta pidi ajuda di Deus pa lida ku prublémas di dia-dia gósi, bu ta xinti avontádi pa faze kel-li óras ki bu ben pasa pa prublémas más difísil na futuru. Nton bu ta kunfia ma Jeová sabe dretu ki óra i modi ki el ta djuda-u. (Sal. 27:1, 3) Si nu konsigi aguenta firmi gósi, ta ser más fásil nu faze kel-li na grandi tribulason. (Rom. 5:3) Pamodi ki nu pode fla kel-li? Txeu irmon ku irmans ta fla ma kada bês ki es aguenta un situason difísil, kel-li ta djuda-s aguenta firmi si es pasa pa un otu prubléma. Óras ki es aguenta firmi ku ajuda di Jeová, es ta ten más fé ma el krê djuda-s. I pamodi es ten fé na Jeová, es ta pode aguenta firmi óras ki parse otu prubléma. — Tia. 1:2-4. w23.07 3 ¶7-8

Umildadi i konpaxon ta poi Jeová ta ser ikilibradu. Pur izénplu, Jeová mostra umildadi kantu el staba kuazi ta distrui kes algen mau di Sudoma. Através di se anjus, Jeová fla Ló, ki éra justu, pa fuji pa montanhas. Má Ló staba ku medu di bai pa la. Pur isu, el pidi Jeová pa dexa el ku se família bai pa Zuar, ki éra un sidadi pikinoti ki Jeová disidi distrui tanbê. Jeová pode insistiba ku Ló pa el faze sima el mandaba el. Má envês di kel-li, Jeová obi pididu di Ló i el ka distrui Zuar. (Jén. 19:18-22) Txeu ténpu dipôs, Jeová mostra konpaxon pa kes algen ki ta moraba na Nínivi. El manda proféta Jonas pa aviza ma kel sidadi i kes algen mau staba kuazi ta distruídu. Má kantu kes algen di Nínivi rapende, Jeová xinti péna di es i el ka distrui kel sidadi. — Jon. 3:1, 10; 4:10, 11. w23.07 21 ¶5

Kuzê ki nu pode prende ku izénplu di Jioás? El éra sima un arvi ki mesteba di ajuda di un staka pa el ka kai. Kantu Jioiada ki éra sima se staka móre, Jioás kumesa ta obi ku kes ki bira kóntra Jeová i el ka obi ku Jeová más. Kel izénplu li ta mostra ma nu ka debe obi ku Jeová sô pamodi nos família i otus algen na kongregason ta insentiva-nu pa nu faze kel-li. Pa nu kontinua ku un bon amizadi ku Jeová, sénpri nu debe studa, midita i faze orason, asi pa nos amor i ruspetu pa el bira más fórti. (Jer. 17:7, 8; Kol. 2:6, 7) Jeová ka ta iziji txeu di nos. Kuzê ki el ta iziji di nos sta na Eclesiastes 12:13, ki ta fla: ‘Ten grandi ruspetu pa Deus verdaderu i obi ku se mandamentus, pamodi é kel-li ki tudu ómi debe faze.’ Óras ki nu ten grandi ruspetu pa Deus, nu ta konsigi aguenta kes provason ki sta pa ben i kontinua firmi. Nada ka ta pode ben prujudika nos amizadi ku Jeová. w23.06 19 ¶17-19

Jeová ta garanti-nu ma nu pode kunfia na el. Apokalipse 21:5 ta kumesa di kel manera li: “Kel ki staba xintadu na tronu fla”. Kes palavra li é spesial pamodi é un di kes três bês ki Jeová ta pâpia na livru di Apokalipse. Ka foi un anju ki ten txeu puder, nen Jizus ki da kel serteza li, má é própi Jeová! Kel-li ta prova ma nu pode ten tudu kunfiansa na kuzê ki el fla dipôs. Pamodi ki nu ta fla si? Pamodi Jeová ka pode “konta mintira”. (Titu 1:2) Nton, kes palavra ki nu ta lé na Apokalipse 21:5, 6 di serteza ta ben kunpri. Jeová fla: “Odja!”. Palavra gregu ki traduzidu pa “odja!” ta uzadu txeu bês na livru di Apokalipse. Kuzê ki Deus fla dipôs? Deus fla: “N sta faze tudu kuza novu.” Jeová ta ben faze kes mudansa li na futuru. Má pamodi el ten tudu serteza ma el ta ben kunpri se promésa pa el é sima si kes mudansa li dja sta ta kontise. — Isa. 46:10. w23.11 3-4 ¶7-8

Apóstlu Pedru luta kóntra se frakézas. Odja alguns izénplu. Kantu Jizus fla ma el ta sufreba i ma el ta moreba pa kunpri profesias di Bíblia, Pedru txoma-l atenson. (Mar. 8:31-33) Txeu bês, Pedru i kes otu apóstlu diskuti sobri kal di es ki éra más grandi. (Mar. 9:33, 34) Na kel noti antis di Jizus móre, Pedru ataka un ómi i el korta-l orédja. (Juan 18:10) Na kel mésmu noti, Pedru xinti medu i três bês el nega ma el konxeba se amigu Jizus. (Mar. 14:66-72) Kel-li poi Pedru ta txora ku txeu mágua. Jizus ka dizisti di se apóstlu ki staba dizanimadu. Dipôs ki Jizus resusitadu, el da Pedru oportunidadi di mostra ma inda el ta amaba el. Jizus konvida Pedru pa ser pastor di se ovelhas ku umildadi. (Juan 21:15-17) Pedru staba prontu pa faze kuzê ki Jizus fla-l. El staba na Jiruzalen na dia di Pentikósti i el foi un di kes primeru ki skodjedu ku spritu santu. w23.09 22 ¶6-7

Apóstlu Pedru fla kes irmon ki éra ansion sima el: “Nhos pastora ribanhu di Deus”. (1 Ped. 5:1-4) Si bo é ansion, nu sabe ma bu ta ama bus irmon ku irmans i ma bu krê kuida di es. Má pode ser ki alvês, bu pode atxa ma bu sta okupadu ô kansadu dimás ki bu ka ta konsigi faze kel-li. Kuzê ki bu pode faze? Abri bu korason pa Jeová. Pedru fla: “Si un algen ta sirbi, pa el faze-l sima ken ki ta dipende di kel forsa ki Deus ta da”. (1 Ped. 4:11) Bus irmon ku irmans pode sta ta pasa pa prublémas ki ka ten soluson na kel mundu li. Má lenbra ma Jizus Kristu, ki é “kel pastor prinsipal”, pode djuda-s más di ki bo. El pode faze kel-li gósi i na mundu novu. Kuzê ki Jeová krê pa ansions faze é ama ses irmons, kuida di es i bira “izénplu pa ribanhu.” w23.09 29-30 ¶13-14

Nu debe ivita uza manera di pensa di mundu. Si nu pensa di mésmu manera ki kes algen ki ka ta ruspeta leis di Jeová, nu pode kumesa ta bandona Jeová i se leis. (1 Kor. 3:19) “Sabedoria di es mundu” txeu bês ta poi algen ka ta obi ku Deus. Alguns irmon na Pérgamu i na Tiatira dexa kes ki ta fazeba konportamentu mariadu i ki ta adoraba imajen influensia-s. Jizus da kes dôs kongregason li un konsedju sériu pamodi es staba ta seta konportamentu seksual mariadu. (Apo. 2:14, 20) Gósi nu ta fazedu txeu preson pa nu seta ideias mariadu. Nos família i otus algen ki nu konxe pode tenta mexe ku kuzê ki nu ta xinti i fla-nu pa nu ka obi ku Jeová. Pur izénplu, es pode fla ma é ka inportanti nu kontinua ta obi ku leis di Jeová sobri séksu i ma kuzê ki Bíblia ta fla é ka pa nos ténpu. Alvês nu pode pensa ma orientason ki Jeová ta da-nu é ka mutu klaru. Nu pode xinti tentadu na “pasa di kes kuza ki sta skrebedu”. — 1 Kor. 4:6. w23.07 16 ¶10-11

Maria, mai di Jizus, staba ta meste forsa. Pensa na modi ki talvês el fika preokupadu dipôs ki el resebe un diziginason inportanti di anju Gabriel. El ka éra kazadu, má el staba grávida. El ka tinha ninhun spiriénsia na kria fidjus, má el tinha ki kuidaba di kel mininu li ki ta ben biraba Misías. Modi ki el ta splikaba se noivu, Juzé tudu kes kuza li dja ki nunka el ka fazeba séksu? (Luk. 1:26-33) Modi ki Maria resebe kel forsa? El pidi ajuda di otus algen. Pur izénplu, el pidi Gabriel más informason sobri kel diziginason. (Luk. 1:34) Poku ténpu dipôs, el viaja ti un “zóna ki ta fikaba na montanha, pa un sidadi di Judá”, pa vizita Elizabeti ki éra se família. Elizabeti ilojia Maria i Jeová uza-l pa pâpia di un profesia sobri fidju di Maria ki staba pa nase. (Luk. 1:39-45) Maria fla ma “ku se brasu” Jeová “aji ku puder.” (Luk. 1:46-51) Jeová da Maria forsa através di Gabriel i di Elizabeti. w23.10 14-15 ¶10-12

Jeová skodje alguns disiplu di Jizus ku spritu santu i es ten un amizadi spesial ku El. Kes 144 mil skodjedu ta ben ser saserdóti na séu djuntu ku Jizus. (Apo. 14:1) Kel lugar Santu di tabernáklu ta reprizenta ma es adotadu sima fidjus spritual di Deus timenti inda es sta na téra. (Rom. 8:15-17) Kel lugar Más Santu di tabernáklu ta reprizenta séu, undi ki Jeová ta mora. “Kel kurtina” ki ta siparaba kel lugar Santu di kel lugar Más Santu, ta reprizenta korpu di Jizus. Timenti el tinha un korpu di karni el ka ta pode entraba na séu sima kel Saserdóti Prinsipal Más Grandi di ténplu spritual. Kantu Jizus oferese se korpu pa salva tudu algen el abri kaminhu pa vida na séu pa tudu kes kriston skodjedu. Es tanbê es debe dexa ses korpu di karni pa tras pa resebe ses rekonpénsa na séu. — Ebr. 10:19, 20; 1 Kor. 15:50. w23.10 28 ¶13

Jidion kontinua kalmu kantu kes ómi di Efrain kritika-l. (Juí. 8:1-3) El ka responde ku raiba. El mostra umildadi kantu el obi ses preokupason i ku jetu el kalma kel situason. Ansions ki ten sabedoria ta imita Jidion óras ki es ta obi ku atenson i es ta reaji ku kalma si algen kritika-s. (Tia. 3:13) Di kel manera li, es ta mante pas na kongregason. Kantu otus algen ilojia Jidion pamodi el salva povu di kes midianita, el da tudu glória pa Jeová. (Juí. 8:22, 23) Modi ki ansions pode imita Jidion? Es pode da tudu lovor pa Jeová pa kuzas ki es ta faze. (1 Kor. 4:6, 7) Pur izénplu, si un ansion ilojiadu pamodi el é bon na inxina, el pode fla ma kel instruson ben di Palavra di Deus ô ma nos tudu nu ta prende ku organizason di Jeová. Ansions alvês pode pensa si es sta ta txoma atenson ki es ka debe pa ses kabésa. w23.06 4 ¶7-8

Si nu ka resebe un kuza ki nu pidi na orason nu pode faze pergunta: ‘N sta ta ora ta pidi kuza dretu?’ Txeu bês nu ta atxa ma nu sabe kuzê ki é midjór pa nos. Má, kes kuza ki nu ta pidi pode ka ser midjór pa nos. Si nu sta ta ora sobri un prubléma, talvês ten un manera mutu más midjór di rezolve kel prubléma. I alguns kuza ki nu sta pidi pode ka sta di akordu ku vontadi di Jeová. (1 Juan 5:14) Pensa na izénplu di un pai ku mai ki pidiba Jeová pa ses fidju kontinua na verdadi. Kel-li ta parse ma é un bon pididu. Má, Jeová ka ta obriga ningen pa sirbi-l. El krê pa tudu nos, i kel-li ta inklui nos fidjus, skodje sirbi-l. (Deut. 10:12, 13; 30:19, 20) Nton, envês di kel pai ku mai pidi Jeová pa ses fidju kontinua na verdadi, es pode pidiba pa el djuda-s toka korason di ses fidju, asi pa ses fidju ama Jeová i bira se amigu. — Pro. 22:6; Efé. 6:4. w23.11 21 ¶5; 23 ¶12

Pamodi ki konsola otus algen é un manera inportanti di mostra nos amor pa es? Un livru ki ta pâpia sobri Bíblia fla ma kel palavra ki Paulu uza pa “konsola” krê fla “fika na ladu di un algen pa da-l koraji óras ki el sta pasa pa un situason difísil.” Nton, óras ki nu ta konsola un irmon ô un irman ki sta ta sufri, nu ta djuda-l kontinua ta sirbi Jeová di manera fiel. I kada bês ki nu ta konsola un irmon ô un irman, nu sta ta mostra-l ma nu ta ama-l. (2 Kor. 7:6, 7, 13) Xinti konpaxon i da un algen konsolu sta ligadu ku kunpanheru. Di ki manera? Óras ki un algen ta xinti konpaxon pa algun algen ki sta ta sufri, el ta krê konsola-l i faze algun kuza pa djuda-l. Nton, óras ki nu ta xinti konpaxon, kel-li ta djuda-nu konsola otus algen. Paulu splika ma konpaxon ki Jeová ta xinti pa pesoas ta motiva-l pa el konsola-s. Paulu fla ma Jeová “é Pai xeiu di mizerikórdia i Deus di tudu konsolu”. — 2 Kor. 1:3. w23.11 9-10 ¶8-10

Tudu sigidor di Kristu pode pasa pa sufrimentu. Odja izénplu di apóstlu Paulu. El fla kes kriston na Tesalónika: “Kantu nu staba ku nhos, nu ta kustuma avizaba nhos ma nu ta pasaba pa prublémas”. (1 Tes. 3:4) I pa kes korintu, Paulu skrebe: “Nu ka krê pa nhos fika sen sabe di kes prubléma ki nu pasa... i ti nu fika ta pensa si nu ta moreba ô nau.” (2 Kor. 1:8; 11:23-27) Oji tanbê, sérvus di Jeová pode spera ma es ta pasa pa algun tipu di sufrimentu. (2 Tim. 3:12) Pamodi bu mostra fé na Jizus i bu sigi-l, talvês bus amigu i famílias dja faze-u trósa ô talvês ti es trata-u di manera duru. Ô talvês bu patron ô kolégas di trabadju dja pirsigi-u pamodi bo é onéstu. (Ebr. 13:18) Dja bu pasa pa opozison di govérnu pamodi bu pâpia ku otus sobri bu speransa? Ka ta inporta kal ki é sufrimentu ki nu ta pasa pa el, Paulu fla ma nu pode fika kontenti. w23.12 10-11 ¶9-10

Jakó pasa pa txeu prubléma. Dôs fidju di Jakó, Simion ku Levi, traze dizónra pa ses família i pa nómi di Jeová. Alén di kel-li, Rakel ki éra mudjer di Jakó ki el gostaba más txeu, móre timenti el staba ta ten ses sugundu fidju. I pamodi un grandi fómi, Jakó tevi ki muda pa téra di Ijitu na se bedjisa. (Jén. 35:16-19; 37:28; 45:9-11, 28) Sikrê ku tudu kes prubléma li, Jakó nunka ka perde se fé na Jeová i na Se promésas. I Jeová mostra Jakó ma el staba kontenti ku el. Pur izénplu, Jeová abênsua Jakó ku txeu kuza. I imajina modi ki Jakó fika txeu kontenti ku Jeová kantu ki el inkontra ku Juzé otu bês, ki éra kel fidju ki el pensa ma staba mortu! Kel amizadi fórti ki Jakó tinha ku Jeová djuda-l ka dizisti sikrê ku se prublémas. (Jén. 30:43; 32:9, 10; 46:28-30) Óras ki nu ten un amizadi fórti ku Jeová, tanbê nu pode lida dretu ku prublémas ki nu ka staba ta spera. w23.04 15 ¶6-7

Salmo 23 é un kántiku ki ta mostra kunfiansa na amor i konpaxon di Jeová. Davidi, skritor di kel salmu li, pâpia di kel amizadi fórti ki tinha entri el i se Pastor, Jeová. Davidi ta dexaba Jeová giaba el i el tinha tudu kunfiansa na Jeová. Davidi sabia ma Jeová ta mostraba el kel amor ki el ta xintiba pa el tudu dia. Pamodi ki el tinha kel kunfiansa li? Davidi ta xintiba ma Jeová ta kuidaba di el pamodi Jeová sénpri da-l kel ki el mesteba. Davidi tanbê sabia ma Jeová éra se amigu i ma el tinha se aprovason. É pur isu, ki el tinha serteza ma ka ta inporta kuzê ki kontiseba ku el na futuru, Jeová ta kontinua ta kuidaba di el i ta daba el kel ki el mesteba. Kel kunfiansa ki Davidi tinha na amor di Jeová éra más fórti di ki kalker un di se preokupasons i kel-li ta poba el ta xinti kontenti i satisfetu. — Sal. 16:11. w24.01 29 ¶12-13

Désdi Sugundu Géra na Mundu Interu, povu di Jeová sta konsigi faze ses trabadju di pregason di manera livri na txeu país. Na verdadi, trabadju di pregason sta ta omenta. Oji kes irmon di Grupu Enkaregadu di Óbra sta kontinua ta sigi orientason di Jizus. Es ta faze kel-li óras ki es ta ten serteza ma kes disizon ki es ta toma sta di akordu ku kel ki Jizus krê. I es ta uza kes enkaregadu di grupu di kongregason i ansions pa da kongregasons kes orientason. Kes ansion skodjedu ku spritu santu sta na “mô direita” di Jizus. (Apo. 2:1) É klaru ki tudu kes ansion é inperfeitu i es ta fadja. Muizés i Juzué fadja alvês, i kes apóstlu tanbê. (Núm. 20:12; Jos. 9:14, 15; Rom. 3:23) Má nu pode odja ma Jizus sta ta orienta skravu fiel i kes ansion skodjedu, i el ta kontinua ta faze kel-li . Pur isu, nu ten tudu motivu pa nu kunfia na orientason ki Jizus sta ta da através di kes skodjedu ki sta toma kónta di povu di Deus. w24.02 23-24 ¶13-14

Oji nu ta poi Jeová kontenti óras ki nu ta pâpia di el di un manera ki ta mostra modi ki nu ten txeu gratidon i amor pa el. Óras ki nu ta prega, nos obijetivu prinsipal é djuda otus algen bira amigu di Jeová i xinti kel mésmu kuza ki nu ta xinti pa nos Pai ki krê-nu txeu. (Tia. 4:8) Nu ta xinti sábi di mostra otus algen modi ki Bíblia ta pâpia di Jeová i ta mostra se amor, justisa, sabedoria, puder i otus kualidadi bunitu. Tanbê, nu ta lova Jeová i nu ta dexa-l kontenti óras ki nu ta faze nos midjór pa imita-l. Óras ki nu ta faze kel-li, otus algen ta odja ma nos é diferenti di pesoas na nos vólta. (Mat. 5:14-16) Óras ki nu ta konvive ku es na dia-dia, nu pode ten xansi di splika-s pamodi ki nos é si. I pamodi kel-li, alguns algen ki é sinseru ta krê bira amigu di Deus. Óras ki nu ta lova Jeová di kel manera li, el ta fika txeu kontenti. — 1 Tim. 2:3, 4. w24.02 10 ¶7

Pa bu bira un irmon maduru, bu meste prende faze kuzas ki ta djuda-u na bu dia-dia. Kes kapasidadi ki bu ten ta djuda-u seta responsabilidadis na kongregason, atxa i kontinua na un trabadju ki ta djuda-u sustenta bu kabésa ô bu família i da dretu ku otus algen. Pur izénplu, prende lé i skrebe dretu. Bíblia ta fla ma un ómi filís i ki ten bons rezultadu ta tra ténpu tudu dia pa lé Palavra di Deus i midita na el. (Sal. 1:1-3) Óras ki el ta lé Bíblia tudu dia, el ta konxe manera ki Jeová ta pensa i kel-li ta djuda-l pensa di manera klaru i prende modi ki el ta aplika prinsípius di Bíblia. (Pro. 1:3, 4) Nos irmons ku irmans meste di ajuda di ómis ki ta konsigi inxina i da konsedju ku bazi na Bíblia. Si bu prende lé i skrebe dretu, bu ta pode pripara diskursus i komentárius ki ta djuda otus i ki ta bira ses fé más fórti. Tanbê, bu ta konsigi toma bons nóta ki ta djuda-u bira bu fé más fórti i da otus algen koraji. w23.12 26-27 ¶9-11

Óras ki bu xinti medu, midita na kuzê ki Jeová ta ben faze na futuru óras ki Satanás distruídu. Un dimonstrason na kongrésu di 2014 mostra un pai ta pâpia ku se família sobri modi ki 2 Timótiu 3:1-5 pode ledu si kes versíklu li staba ta pâpia di modi ki vida ta sérba na Paraízu: “Má fika ta sabe ma na mundu novu situason ta ben fika sábi dimás. Pesoas ta ben ama otus, ta ben ama tizoru spritual, ta seta ses limitason, umildis, ta lova Deus, ta obi ku pai ku mai, ta ser gratu, lial, ta ama ses família, ta djobe pas ku kunpanheru, sénpri es ta pâpia ben di otus, ta kontrola ses kabésa, mansu, ta ama kuzas dretu, es ta ser pesoas di kunfiansa, dretu, umildi na ses menti, es ta ben ama Deus envês di krê sô pasa sábi i es ta ben seta di korason puder di adorason pa Deus; fika pértu di kes tipu di algen li.” Bu ta pâpia ku bu família i ku bus irmon sobri kel tipu di vida ki bu ta ben ten na mundu novu? w24.01 6 ¶13-14

Nu ta xinti txeu koraji di sabe ma Jeová sta kontenti ku se povu! Bíblia ta fla: ‘Jeová ta fika kontenti ku se povu’. (Sal. 149:4) Má alvês alguns algen ta fika txeu dizanimadu i ti es pode pergunta: ‘Jeová sta kontenti ku mi?’ Txeu sérvu fiel di Jeová ki Bíblia ta pâpia di el alvês atxa difísil kridita ma Jeová staba kontenti ku es. (1 Sam. 1:6-10; Jó 29:2, 4; Sal. 51:11) Bíblia ta mostra klaru ma enbóra nos é inperfeitu nu pode dexa Jeová kontenti. Modi ki nu pode faze kel-la? Nu meste mostra fé na Jizus Kristu i batiza. (Juan 3:16) Asi nu ta mostra otus algen ma dja nu rapende di nos pekadus i ma dja nu promete Deus ma nu ta faze se vontadi. (Atus 2:38; 3:19) Jeová ta fika txeu kontenti óras ki el ta odja-nu ta faze kes kuza li pa bira más se amigu. Si nu faze nos midjór pa kontinua ta kunpri nos promésa di sirbi-l, Jeová ta fika kontenti ku nos i el ta odja-nu sima se grandi amigu. — Sal. 25:14. w24.03 26 ¶1-2

Nu pode imita kes disiplu si nu kontinua ta prega, sikrê óras ki govérnu fla-nu pa nu para. Nu pode ten kunfiansa ma Jeová ta djuda-nu faze nos trabadju di pregason. Nton, pidi koraji i sabedoria na orason i pidi ajuda di Jeová pa lida ku prublémas. Txeu di nos ta pasa pa prublémas, sima duénsa, mórti di un algen ki nu ta ama, un situason difísil na família, pirsigison ô otus prubléma. I kuzas sima duénsas ki ta spadja i géra ta poi kes prubléma li mutu más difísil di lida ku es. Fla Jeová tudu kuza ki bu sta ta xinti. Konta-l sobri bu situason, sima bu ta kontaba pa un amigu. Bu pode ten serteza ma Jeová ‘ta faze algun kuza pa djuda-u.’ (Sal. 37:3, 5) Faze orason sénpri ta djuda-nu “aguenta firmi”. (Rom. 12:12) Jeová sabe kuzê ki se sérvus ta pasa pa el i ‘El ta obi-s óras ki es pidi ajuda’. — Sal. 145:18, 19. w23.05 5-6 ¶12-15

Óras ki nu ten ki toma disizons inportanti, nu meste intende “kal ki é vontadi di Jeová” i dipôs aji di akordu ku el. (Efé. 5:17) Óras ki nu ta djobe prinsípius di Bíblia ki ta aplika na nos situason, na verdadi nu sta ta djobe kuzê ki Jeová ta pensa sobri kel asuntu. I sima nu ta ba ta aplika kes prinsípiu di Bíblia, nu ta konsigi toma bons disizon. Kel “Malvadu”, ki é Satanás nos inimigu, ta gostaba di pô-nu okupadu dimás ku kuzas di es mundu, asi pa nu ka ten ténpu pa sirbi Deus. (1 Juan 5:19) Un sérvu di Jeová pode kumesa ta konsentra na dinheru, na skóla ô na trabadju, envês di konsentra na kes txeu oportunidadi di sirbi Jeová. Si kel-li kontise, el ta mostra ma el sta ta kumesa ta pensa sima kes algen ki ka ta sirbi Jeová. É klaru ki kes kuza li é ka mariadu, má nunka nu ka debe pô-s na primeru lugar na nos vida. w24.03 24 ¶16-17