Li Xyoobʼtesihom li Yos ut li Bʼutʼihaʼ

Bʼar keʼchalk chaq li choxa ut li Ruuchichʼochʼ? Chanru keʼyoʼlaak li Saqʼe, li Po ut ebʼ li chahim joʼ chixjunil li wank saʼ Ruuchichʼochʼ? Li Santil Hu naxye naq li Yos kiyoobʼtesink chaq re chixjunil. Joʼkan naq ebʼ li xbʼeen tzolom nekeʼaatinak chirix li xyoobʼtesihom li Yos.

Tqatzol naq li Yos kixyoobʼtesi xbʼeenwa ebʼ li anjel. Kixyiibʼ li Ruuchichʼochʼ choʼq qe, joʼkan naq li Yos kixyoobʼtesi laj Adan ut li xʼEva ut kixkʼehebʼ saʼ jun li chʼinaʼusil naʼajej. Abʼan moko keʼwank ta xyuʼam chi junelik, xbʼaan naq keʼxqʼet Raatin li Yos.

Chalen naq kiyoobʼtesiik laj Adan toj naq kibʼutʼunk li Ruuchichʼochʼ kinumeʼk 1.656 chihabʼ. Saʼebʼ li chihabʼ aʼan, naabʼalebʼ li poyanam moko usebʼ ta xnaʼlebʼ. Laj Tza ut ebʼ li maaʼus aj musiqʼej keʼwank chaq saʼ choxa. Ut saʼ Ruuchichʼochʼ kiwank laj Cain ut li maaʼusebʼ xnaʼlebʼ. Saʼ xyanqebʼ aʼin keʼwank winq, jwal nimebʼ roq ut naabʼalebʼ xmetzʼew. Abʼan keʼwank ajwiʼ li chaabʼilebʼ xnaʼlebʼ joʼ laj Abel, laj Enoc ut laj Noe. Saʼ li XBʼEEN Tasal, tqatzol kʼaru keʼxbʼaanu chaq ebʼ li qas qiitzʼin aʼin.