Li Yos Kiyoobʼtesink re Chixjunil

CHIXJUNIL li us kichalk rikʼin li Yos. Re naq twanq li kutan, li Yos kixyiibʼ li Saqʼe, ut re naq tooʼiloq saʼ qʼoqyink kixyiibʼ li Po ut ebʼ li chahim. Ut kixyiibʼ li Ruuchichʼochʼ re naq toowanq chisaʼ.

Li Yos kixyiibʼ chixjunil aʼin. Abʼan, ma nakaanaw kʼaru kixbʼaanu xbʼeenwa? Xbʼeenwa kixyoobʼtesihebʼ li anjel re naq teʼwanq rikʼin saʼ choxa. Ebʼ li anjel inkʼaʼ naqilebʼ ru, joʼ naq inkʼaʼ naqil ru li Yos.

Li xbʼeen anjel li kixyoobʼtesi li Yos aʼan li Ralal ut moko joʼ ta li junchʼol chi anjel. Li anjel aʼin, kixtenqʼa li xyuwaʼ chi xyiibʼankil chixjunil. Keʼxbʼaanu li Saqʼe, li Po, ebʼ li chahim ut li Ruuchichʼochʼ.

Ma nakaanaw chanru li Ruuchichʼochʼ saʼ xtiklajik? Saʼ xtiklajik maakʼaʼ chaq li yuʼam, xbʼaan naq li Ruuchichʼochʼ nujenaq chi haʼ. Li Yos kiraj naq ebʼ li poyanam teʼwanq saʼ Ruuchichʼochʼ, joʼkan naq kiʼok xyiibʼankil chiʼus. Abʼan, chanru kixbʼaanu?

Kiʼajmank naq twanq kutan saʼ li Ruuchichʼochʼ. Joʼkan naq li Yos kixkʼe li Saqʼe re naq twanq kutan ut qʼoqyink. Chirix chik aʼan kixtaqsi li chʼochʼ saʼ xbʼeen li nimla palaw.

Saʼ xtiklajik maakʼaʼ wank chaq saʼ xbʼeen li Ruuchichʼochʼ. Chanchan li eetalil aʼin. Maakʼaʼ chaq uutzʼuʼuj, ninqi cheʼ, xul, chi moko kar saʼebʼ li nimla palaw. Joʼkan naq li Yos kiʼok chi kʼanjelak chi kaw re naq us teʼwanq li poyanam ut ebʼ li xul saʼ li Ruuchichʼochʼ.