Li Chʼinaʼusil Naʼajej

KʼE REETAL li naʼajej aʼin, kʼajoʼ xchʼinaʼusal ru! Chaawil ebʼ li pim, ebʼ li cheʼ, ebʼ li uutzʼuʼuj ut chixjunilebʼ li xul. Ma nakaakʼe reetal bʼar wankebʼ li karneer ut ebʼ li kaqkoj?

Bʼar kiʼelk chaq li chʼinaʼusil naʼajej aʼin? Qilaq chanru naq li Yos kixyiibʼ li Ruuchichʼochʼ choʼq qe.

Li Yos kixkʼe xbʼeenwa li pim saʼ xbʼeen li chʼochʼ. Kixyiibʼ jalan jalanq li uutzʼuʼuj ut kixyiibʼ kokʼ ut ninqi cheʼ. Wankebʼ ajwiʼ li cheʼ saasa ebʼ li ru. Chixjunil aʼin, naxchʼinaʼusa li Ruuchichʼochʼ.

Moqon chik, li Yos kixyoobʼtesihebʼ li kar re naq teʼwanq saʼ haʼ ut ebʼ li xul li nekeʼrupupik. Kixyoobʼtesihebʼ kokʼ ut ninqi xul. Wankebʼ tzʼiʼ, mes ut kawaay. Ma wankebʼ xul bʼarwiʼ wank laawochoch? Kʼajoʼ xchaabʼilal li Yos, xbʼaan naq kixyiibʼ chixjunil aʼin choʼq qe!

Chirix chik aʼan, li Yos kixyiibʼ chiʼus jun jachal ru li chʼochʼ ut Eden kixkʼe choʼq xkʼabʼaʼ. Li Yos kiraj naq chʼinaʼusaq raj chixjunil li Ruuchichʼochʼ joʼ li Eden.

Chaawil wiʼ chik li eetalil. Ma nakaanaw kʼaru kixkʼe reetal li Yos naq maakʼaʼ saʼ li naʼajej aʼin? Aʼan tqil saʼ li jun chik tzolom.