Tzolom 15

Ebʼ li ramiiw li Yos nekeʼxbʼaanu li chaabʼilal

Naq wank jun qamiiw ut kʼajoʼ xchʼinaʼusal xnaʼlebʼ naqakʼam qe rikʼin. Li Santil Hu naxye: «Chaabʼil ut tiik xchʼool li [Jehobʼa]» (Salmo 25:8). Joʼkan naq, wi naqaj wank choʼq ramiiw li Yos tento naq chaabʼilaq ut tiikaq qachʼool. Li Santil Hu naxye: «Chekʼam eere rikʼin li Yos joʼqex li ralal xkʼajol raarooqex xbʼaan ut chexwanq saʼ li rahok» (Efesios 5:1, 2). Aʼin junjunq rehebʼ li eetalil joʼ chanru tqakʼam qe rikʼin li Jehobʼa:

Rikʼin xtenqʼankilebʼ li qas qiitzʼin. «Qabʼaanuhaq li usilal rehebʼ chixjunil.» (Gálatas 6:10.)

Rikʼin li kʼanjelak chi kaw. «Li xʼelqʼak, miʼelqʼak chik, chixyalaq bʼan xqʼe chi kʼanjelak saʼ tiikilal rikʼin ruqʼ.» (Efesios 4:28.)

Rikʼin xchʼajobʼresinkil li qatibʼel ut li qakʼaʼuxl. «Qachʼajobʼresiiq qibʼ, qisihaq chixjunil li tzʼajnil wank chiqix ut li xtzʼajnil li musiqʼej, qoxloqʼiiq li Yos ut qatzʼaqobʼresiiq ru li qasantilal.» (2 Corintios 7:1.)

Rikʼin xraabʼal ut roxloqʼinkil li qajunkabʼal. «Li junjunq saʼ eeyanq chixra li rixaqil joʼ naq naxra ribʼ; ut li ixaqilbʼej chiroxloqʼi li xbʼeelom. Ex alalbʼej, chepaabʼ leenaʼ leeyuwaʼ.» (Efesios 5:33-6:1.)

Rikʼin xraabʼalebʼ li qas qiitzʼin. «Chiqara qibʼ chiqibʼil qibʼ, xbʼaan naq li rahok rikʼin li Yos chalenaq.» (1 Juan 4:7.)

Rikʼin xpaabʼankil li xchaqʼrabʼ li tenamit. «Chexpaabʼanq chejunilex chiruhebʼ li [awabʼej] [...]. Chetoj re li junjunq li kʼaru tento xkʼeebʼal re:[...] wi tojlebʼ, tojlebʼaq.» (Romanos 13:1, 7.)