Naq inkʼaʼ chik nakatruuk xkuybʼal

Qilaq jun li eetalil, li xSally,a re Estados Unidos, kachʼin chik ma kisachk chixjunil li kʼaru re xbʼaan jun nimla kaqsut-iqʼ. Aʼan naxye: «Xinkʼoxla naq inkʼaʼ chik tinruuq xkuybʼal. Naabʼal kutan xwekʼa naq maakʼaʼ chik inmetzʼew».

Jwal narahoʼk ajwiʼ saʼ qachʼool naq nakamk jun li poyanam li naqara. Li xJanice, re Australia, naxye: «Naq xeʼkamk xkabʼichal linkokʼal, chanchan tawiʼ xineʼxrahobʼtesi ut timil timil xinʼok xbʼanbʼal wibʼ re naq tinʼusaaq wiʼ chik. Xintzʼaama re li Yos: “Bʼaanu usilal, at Inyos, inkʼaʼ chik ninkuy! Yal nawaj wark ut inkʼaʼ chik tinwakliiq”».

Qilaq li kixkʼul laj Daniel, chanchan tawiʼ kiʼosoʼk li xyuʼam naq kikʼateʼk roq xbʼaan li rixaqil. Aʼan naxye: «Naq li wixaqil kixye we naq kixmux li qasumlajik, chanchan tawiʼ keʼxchʼik jun li chʼiichʼ saʼ li waanm. Kʼajoʼ xrahil kiwekʼa, chanchan tawiʼ kokʼaj xsaʼ yookebʼ chaq inxeqʼbʼal chi chʼiichʼ, ut joʼkan xwekʼa chiru naabʼal po».

Ma ra wankat saʼ xkʼabʼaʼ jun rehebʼ li chʼaʼajkilal aʼin?

• Jun li nimla rahilal

• Naq nakamk junaq laakomon

• Li muxuk sumlaak

• Jun li nimla yajel

• Naq nakaawekʼa naq maakʼaʼ chik rusilal laayuʼam

Wi joʼkan yookat xkʼulbʼal, li hu Laj Kʼaakʼalehom tatxtenqʼa chi rilbʼal naq toj wank rusilal laayuʼam.