Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan?
1. Chanru tooxtenqʼa xtzolbʼal li tasal hu Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan?
1 Saʼ li chʼutam Tzolok chirix li Santil Hu tqatzol xsaʼ li tasal hu, Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan? Li tasal hu aʼin kijekʼimank saʼ li Nimla Chʼutam re Oxibʼ Kutan li kixkʼabʼaʼi: «Qakʼaakʼalehaq li Qachʼool!». Ut kʼuubʼanbʼil re naq li yookebʼ chi tzolok chirix li Santil Hu teʼoq saʼ li xmolam li Jehobʼa. Xtzʼilbʼal xsaʼ li tasal hu aʼin tooxtenqʼa chi roxloqʼinkil naq wanko saʼ li xmolam li Jehobʼa, ut tooxtenqʼa re naq qʼaxal us toopuktesinq (Sal. 48:14 [48:13, Wy]).
2. Chanru ttzolmanq li tasal hu Li Rajom li Yos saʼ li chʼutam?
2 Chanru Ttzolmanq li Tasal Hu? Li tnumsinq re li chʼutam aʼin tixjekʼi chiʼus li hoonal re naq truuq xchoybʼal li junjunq chi tzolom. Naq tixtikibʼ junaq li tzolom, xbʼeenwa tixyaabʼasi li naʼlebʼ li naxjolomi li tzolom, ut naq ak xyaabʼasimank li xbʼeen raqal, li tnumsinq re li chʼutam tixbʼaanu li patzʼom li kixkʼuubʼ choʼq re li raqal aʼin. Ut ebʼ li raqal li teʼtiklaaq rikʼin chʼina qʼeq teʼyaabʼasimanq ut twanq xsumenkilebʼ xjunes. Ut naq ak xyaabʼasimank, twanq xpatzʼbʼal rehebʼ li hermaan chanru nokooxtenqʼa li raqal aʼin re xsumenkil li naʼlebʼ li wank saʼ xjolomil li tzolom. Aʼ yaal chanru wank li hoonal, teʼyaabʼasimanq ebʼ li raqal li Santil Hu li nekeʼxsume li patzʼom. Chisaʼ li hu aʼin wank naabʼal li eetalil ut tooruuq ajwiʼ xyeebʼal kʼaru naqil. Naq ak xqachoy junaq li tzolom ut tento tqatzol jun chik, li tnumsinq re li chʼutam tixyaabʼasi ebʼ li patzʼom li wank saʼ xtaqʼahil li tzolom re naq tkanaaq chiqu li xqatzol. Wi saʼ li tzolom wank li kaaxukuut «Sikʼ Xkomon li Naʼlebʼ», tento tyaabʼasimanq ut tpatzʼmanq rehebʼ li hermaan kʼaru rusilal teʼxtaw li yookebʼ chi tzolok chirix li Santil Hu wi teʼxbʼaanu aʼin. Ut wi toj wank li hoonal re xjultikankil li ak xqatzol naru xyaabʼasinkil ebʼ li naʼlebʼ li najolomink rehebʼ li tzolom. Usta aʼin li naʼlebʼ tbʼeeresimanq saʼ li chʼutam, moko aajel ta ru naq aʼan ajwiʼ li naʼlebʼ tqoksi rikʼinebʼ li nekeʼtzolok qikʼin.
3. Chanru tooruuq xtawbʼal ru chiʼus li tqatzol saʼ li tasal hu aʼin?
3 Re naq tooruuq xtawbʼal ru chiʼus li tqatzol saʼ chʼutam aʼin, tento tqatzol saʼ li qochoch li tasal hu aʼin ut tqakʼe qaqʼe chi tzʼaqonk naq teʼxbʼaanu li patzʼom. Naq yooq chi tzʼilmank rix ebʼ li tzolom, qakʼoxlaq kʼaʼut us li naʼlebʼ aʼin choʼq rehebʼ li yookebʼ chi tzolok qikʼin. Li tasal hu aʼin tooxtzol re naq tooruuq xtenqʼankilebʼ li qas qiitzʼin chi xbʼaanunkil li Rajom li Yos ut chi xtawbʼal li junelik yuʼam (1 Juan 2:17).