Tzol Chiʼus li Puktesink, Tzʼiibʼa Xkʼabʼaʼebʼ li Nekeʼraj Rabʼinkil li Yaal

«Chawilaq aawibʼ ut chakʼe reetal chi us li kʼaru yookat chi xkʼutbʼal.» (1 Tim. 4:16.) Li naʼlebʼ aʼin li kixkʼe laj Pablo re laj Timoteo naxkʼut naq tento tqakʼe qachʼool chi kʼiik saʼ li qapaabʼal maakʼaʼ naxye ma akʼo malaj najter nokooʼok chi kʼanjelak chiru li Yos. Li naʼlebʼ li tooxtenqʼa chi xbʼaanunkil aʼin naxkʼabʼaʼi: «Tzol Chiʼus li Puktesink» li natawmank saʼ li hu Li Qakʼanjel Chirix li Yos. Li junjunq tixkʼam chaq li chaabʼil naʼlebʼ ut tixchʼolobʼ chanru xbʼaanunkil. Aajel ru naq chiqajunilo tqayuʼami li naʼlebʼ li t-elq chiru jun po. Ut naq traqeʼq li po tooruuq xwotzbʼal saʼ li chʼutam Tzolok chirix li Xkʼanjel li Yos kʼaru rusilal xqataw naq xqoksi li naʼlebʼ. Chiru li po aʼin tqoksi li hu re xtzʼiibʼankilebʼ xkʼabʼaʼ li nekeʼraj rabʼinkil li yaal.

Kʼaʼut Aajel Ru Xbʼaanunkil aʼin. Li qakʼanjel moko kaʼaj tawiʼ xpuktesinkil li chaabʼil esilal, tento bʼan tqasikʼebʼ wiʼ chik li nekeʼraj rabʼinkil li yaal ut tqatzolebʼ chirix li Santil Hu, ut chi joʼkan yooqo xtaqresinkil li iyaj li xqawk chaq (Mat. 28:19, 20; 1 Cor. 3:6-9). Ut re xbʼaanunkil aʼin aajel ru xtawbʼalebʼ wiʼ chik ebʼ li poyanam, aatinak chirix junaq li naʼlebʼ li nekeʼraj rabʼinkil ut tooʼaatinaq chirix li naʼlebʼ li xooʼaatinak chaq naq xqatawebʼ saʼ li xbʼeen sut. Joʼkan naq aajel ru xtzʼiibʼankil li xkʼabʼaʼebʼ ut bʼar nakanaak rochochebʼ li nekeʼraj rabʼinkil li yaal.