Li Tzolok chirix Xpuktesinkil li Chaabʼil Esilal 2015 tooxtenqʼa chi kʼutuk chiʼus

¹ Laj David kixtzʼiibʼa: «Chiwulaq taxaq chaawu chixjunil li ninye ut li ninkʼoxla. At qaawaʼ, at inDios, laaʼat nakakʼe xkawilal inchʼool ut laaʼat laj kolol we» (Sal. 19:14, Wy). Laaʼo naqaj ajwiʼ naq li qaatin twulaq chiru li Jehobʼa ut oxloqʼ chiqu aatinak chirix li yaal saʼ li Chʼutlebʼaal Kabʼl ut saʼ li puktesink. Re naq us toopuktesinq, li Jehobʼa naroksi, saʼ xyanq chixjunil li chaabʼil maatan, li Tzolok chirix Xpuktesinkil li Chaabʼil Esilal. Naxqʼax 111.000 li chʼuut li naʼuxk wiʼ li tzolok aʼin ut nawank rajlal xamaan. Saʼ chixjunil li Ruuchichʼochʼ li tzolok aʼin naxtenqʼahebʼ laj kʼanjel chiru li Yos re naq teʼruuq xkʼutbʼal li chaabʼil esilal chi kawebʼ ru xchʼool, chi maakʼaʼaqebʼ xxiw ut saʼ sahil chʼoolejil (Hech. 19:8; Col. 4:6).

² Saʼ li naʼlebʼ re xpuktesinkil li chaabʼil esilal 2015 tqatzʼil rix li naʼlebʼ li wank saʼ li folleto Li tooruuq xtzolbʼal saʼ li Raatin li Yos, li tasal hu Kʼaru Naxchʼolobʼ? ut Resil li Santil Hu. Joʼkan ajwiʼ, xkʼosmank li kʼasal choʼq re li xqatzol saʼ li Santil Hu chiru jun xamaan ut choʼq re li kʼanjel 1. Qilaq kʼaru xjalaak ut chanru t-uxmanq li junjunq chi kʼanjel.

³ Li xqatzol saʼ li Santil Hu chiru jun xamaan. Li tbʼaanunq re li kʼanjel aʼin wiibʼ kʼasal ajwiʼ troksi re xkʼebʼal chi naweʼk jun ajwiʼ li chaabʼil naʼlebʼ. Ut re naq tixchʼolobʼ jun li chaabʼil naʼlebʼ choʼq re li chʼuut ut troksi kaʼajwiʼ li kʼasal li kʼebʼil re tento tixtzol ribʼ chiʼus. Ut joʼ ak nabʼaanumank chaq, wank waqibʼ kʼasal choʼq re li chʼuut re naq tixye kʼaru rusilal li Santil Hu kixtaw. Joʼkan bʼiʼ, chixjunqalebʼ teʼroksi 30 kʼajkʼasal ajwiʼ. Re naq tooruuq xyeebʼal jun li chaabʼil naʼlebʼ ut inkʼaʼ tqaqʼax li kʼajkʼasal, aajel ru naq tqatzol qibʼ chiʼus ut tqakʼe xwankil li kʼajkʼasal li tenebʼanbʼil chaq. Wi junelik naqabʼaanu aʼin, yooqo xkʼaytesinkil qibʼ ut tqakʼehebʼ xhoonal ebʼ li qech aj paabʼanel re naq teʼruuq chi tzʼaqonk ajwiʼ chi xchʼolobʼankil jun li chaabʼil naʼlebʼ li xeʼxtzʼil chaq.

⁴ Kʼanjel 1. Anaqwan xkʼosmank li kʼasal choʼq re li t-iloq re li Santil Hu, inkʼaʼ tixqʼax oxibʼ kʼasal. Li teʼbʼaanunq re li kʼanjel aʼin tento teʼxyaabʼasi naabʼal sut ebʼ li raqal li Santil Hu, teʼxbʼaanu saʼ kawil kuxej, teʼrabʼi chanru yookebʼ xyaabʼasinkil ebʼ li aatin ut teʼxkʼe reetal ma inkʼaʼ yookebʼ chi tʼilk. Wi nekeʼxbʼaanu aʼin, ttawmanq ru li teʼxyaabʼasi. Chiqajunilo joʼ aj Testiiw re li Jehobʼa tento tqakʼe qachʼool chi ilok ru hu chiʼus xbʼaan naq chi joʼkan naqakʼe ajwiʼ xloqʼal li Yos. Jwal nasahoʼk saʼ qachʼool naq naqil saʼ li chʼuut naq ebʼ li kokʼal nekeʼxnaw chiʼus ilok ru hu. Joʼkan naq, aajel ru naq tqawaklesihebʼ xchʼool ebʼ li naʼbʼej yuwaʼbʼej li nekeʼxkʼe xchʼool chi xtenqʼankilebʼ li xkokʼal.

⁵ Kʼanjel 2. Chiru oobʼ kʼasal jun li hermaan ixq tixbʼaanu jun li kʼutbʼesink. Ut tixnumsi li naʼlebʼ li kʼebʼilaq re. Naq li kʼanjel aʼin isinbʼilaq saʼ li folleto Li tooruuq xtzolbʼal saʼ li Raatin li Yos tento tbʼaanumanq joʼ chanru nakʼulmank chi kutankil saʼ li puktesink ut saʼ li qateep. Ut naq isinbʼilaq saʼ jalan chik li tasal hu, aajel ru naq li naʼlebʼ tchʼolobʼamanq ut tsikʼmanq chiʼus ebʼ li raqal li Santil Hu. Ut naruhank roksinkil ajwiʼ jalan chik li raqal li Santil Hu li naxchap ribʼ rikʼin li naʼlebʼ. Li cheekel winq li naxbʼeresi li chʼutam aʼin tixye ani aj tenqʼahom re.

⁶ Kʼanjel 3. Li kʼanjel aʼin tbʼaanumanq chiru oobʼ kʼasal ut naru naxbʼaanu junaq winq malaj junaq ixq. Wi ixq, tixbʼaanu joʼ chanru naxchʼolobʼ li kʼanjel 2. Wi winq, li naʼlebʼ li trisi saʼ jalan chik li tasal hu tixkʼe joʼ jun li seeraqʼ choʼq re li chʼuut. Li tbʼaanunq re li kʼanjel tento tixchʼolobʼ li naʼlebʼ ut tixsikʼ chiʼus ebʼ li raqal li Santil Hu li troksi.

⁷ Jun chik li akʼ naʼlebʼ choʼq re li kʼanjel 3. Naq li kʼanjel isinbʼilaq saʼ li folleto Li tooruuq xtzolbʼal saʼ li Raatin li Yos, ut naq winq xaqabʼanbʼil chi xbʼaanunkil, tixbʼaanu li kʼanjel rikʼin jun li kʼutbʼesink: xloqʼoninkil li Yos saʼ junajil joʼ junkabʼal malaj xpuktesinkil li chaabʼil esilal. Li cheekel winq tixye ani aj tenqʼahom re ut chanru tixbʼaanu. Li ttenqʼanq re saʼ li kʼutbʼesink aʼan jun rehebʼ li xjunkabʼal malaj junaq chik li hermaan winq. Naruhank roksinkil ajwiʼ jalan chik li raqal li Santil Hu li naxchap ribʼ rikʼin li naʼlebʼ. Ut wank sut, tkʼemanq li kʼanjel aʼin re jun li cheekel winq saʼ li chʼuut, ut aʼan tixsikʼ ani ttenqʼanq re ut chanru tixbʼaanu. Kʼajoʼ tixwaklesi qachʼool joʼ chʼuut rilbʼal chanru nokooʼeʼxtzol ebʼ li cheekel winq naq teʼxbʼaanu li kʼutbʼesink rikʼin jun li rehebʼ li xjunkabʼal malaj rikʼin junaq li rech aj paabʼanel!

⁸ Laj kʼehol naʼlebʼ. Li cheekel winq li nabʼeresink re li chʼutam aʼin troksi wiibʼ kʼasal naq traqeʼq li junjunq chi kʼanjel re waklesink chʼool ut trisi junaq chik li chaabʼil naʼlebʼ li wank saʼ li tasal hu Benefíciese de la Escuela del Ministerio Teocrático. Naq li cheekel winq tixye ani tnumeʼq, inkʼaʼ tixye kʼaru li naʼlebʼ yook chi tzoleʼk laj puktesinel. Ut naq ak xraqeʼk li junjunq chi kʼanjel, li cheekel winq tixye wiibʼ oxibʼ li aatin re waklesink chʼool ut tixye chirix kʼaru li naʼlebʼ yook chi tzoleʼk laj puktesinel. Joʼkan ajwiʼ, tixye kʼaru li naʼlebʼ kixbʼaanu laj puktesinel re xyuʼaminkil li naʼlebʼ li yook chi tzoleʼk malaj tixye saʼ tuulanil kʼaʼut us naq tixbʼaanu li naʼlebʼ.

⁹ Ebʼ laj puktesinel naru nekeʼxtaw li tustukil naʼlebʼ chirix li kʼutuk saʼ li perel 79-81 re li tasal hu Benefíciese. Naq ak xraqeʼk li chʼutam aʼin ut ak xnumsi xkʼanjel laj puktesinel, li cheekel winq tixtzʼiibʼa xsaʼ li xhu laj puktesinel ut tixpatzʼ re ma xbʼaanu li kʼanjel li naxpatzʼ li tasal hu. Ut saʼ li hoonal ajwiʼ aʼan malaj saʼ jun chik hoonal naru naxwaklesi xchʼool ut tixkʼe xnaʼlebʼ. Aajel ru naq ebʼ laj puktesinel li nekeʼxbʼaanu junaq li kʼanjel teʼxpaabʼ li naʼlebʼ li kʼebʼilebʼ re xbʼaan naq aʼan ttenqʼanq rehebʼ chi xkawresinkil li xpaabʼal (1 Tim. 4:15).

¹⁰ Wi jun rehebʼ laj puktesinel tixqʼax li hoonal, li cheekel winq malaj junaq chik, tixkʼe junaq li eetalil re xkʼutbʼesinkil naq xraqeʼk li hoonal, maare treekʼasi junaq li kʼanjelobʼaal malaj tixtochʼtochʼi li meex rikʼin li tzʼiibʼlebʼ. Naq laj puktesinel trabʼi aʼin kaʼaj chik tixraq ru li yook xyeebʼal, twakliiq ut inkʼaʼ chik tixchoy li kʼanjel (taawil xsaʼ li tasal hu Benefíciese, perel 282, raqal 4).

¹¹ Us raj naq chixjunilebʼ li toj maajiʼ nekeʼnumeʼk chi xbʼaanunkil junaq li kʼanjel teʼxpatzʼ ma ak nekeʼruuk chi tzʼaqonk saʼ li Tzolok chirix Xpuktesinkil li Chaabʼil Esilal (taawil xsaʼ li tasal hu Benefíciese, perel 282, raqal 6). Li naʼlebʼ li wank saʼ li tzolok aʼin naxtenqʼa li xtenamit li Yos re naq teʼxtzol chanru xpuktesinkil ut xkʼutbʼal li chaabʼil esilal chi tzʼaqal re ru, saʼ tuulanil ut rikʼin rahok. Li Jehobʼa nawulak chiru naq tqoksi li naʼlebʼ li naxkʼe qe li xmolam re xloqʼoninkil ru (Sal. 148:12, 13; Is. 50:4).