Ebʼ li naʼlebʼ choʼq re Xhuhil li qachʼutam Qayuʼam ut Qakʼanjel joʼ aj Paabʼanel
6-12 RE MAYO
XCHAQʼALIL RU LI RAATIN LI YOS | 2 CORINTIOS 4-6
«Inkʼaʼ nachʼinank qachʼool»
w04-S 15/8 25 raqal 16, 17
Nokoolubʼk, abʼan inkʼaʼ nokootʼaneʼk
16 Jwal wank xwankil naq us wanqo saʼ li qapaabʼal. Wi wanko saʼ amiiwil rikʼin li Jehobʼa usta toolubʼq, maajunwa toolubʼq chi xloqʼoninkil ru. Aʼan nakʼehok re «xkawilal li tawajenaq ut naxkawubʼresi xchʼool li lubʼlubʼ wank» (Isaias 40:28, 29, Li Santil Hu, Sociedad Bíblica de Guatemala, [SBG]). Li Apostol Pablo kixkʼe reetal saʼ li xyuʼam naq yaal li aatin aʼin, aʼan kixtzʼiibʼa: «Inkʼaʼ nachʼinank qachʼool. Us ta li qachʼochʼel qasululel yo chi lajk chi osoʼk, abʼan li qamusiqʼ naʼakʼobʼresiik rajlal kutan» (2 Corintios 4:16, SBG).
17 Qakʼehaq reetal li aatin «rajlal kutan». Naxkʼut naq wulaj wulaj tqoksi li tenqʼ li naxkʼe qe li Jehobʼa. Jun li hermaan ixq li taqlanbʼil chi puktesink saʼ jalan chik tenamit ut ak 43 chihabʼ rokik chi kʼanjelak wank sut kilubʼk ut kichʼinaak xchʼool. Abʼan inkʼaʼ kixkanabʼ kʼanjelak chiru li Yos. Aʼan naxye: «Xinkʼayk chi wakliik eqʼla re naq tinruuq chi tijok chiru li Jehobʼa ut rilbʼal xsaʼ li Raatin naq toj maajiʼ ninʼok chi kʼanjelak. Xbʼaanunkil aʼin rajlal kutan xinxtenqʼa chi xkuybʼal toj anaqwan». Relik chi yaal naq li Jehobʼa truuq xkʼebʼal qametzʼew wi junelik nokootijok chiru ut naqakʼoxla rix li xnimal ru xnaʼlebʼ ut li xyeechiʼom «rajlal kutan».
it-1-S 70
Kuyuk
Wank ajwiʼ xwankil xjultikankil naq li Yos naxyeechiʼi qe li junelik yuʼam bʼarwiʼ maakʼaʼaq chik li maak, maaʼani truuq xmaqʼbʼal chiqu aʼin chi moko li kamk saʼ ruqʼebʼ li xikʼ nekeʼilok qe (Ro 5:4, 5; 1Te 1:3; Ap 2:10). Chixjunil li rahilal li naqakʼul anaqwan maakʼaʼ xwankil naq tqajuntaqʼeeta rikʼin li xtzʼaqlojik li yeechiʼom aʼin (Ro 8:18-25). Naq naqakʼoxla rix li junelik yuʼam, maakʼaʼ naxye li rahilal li tqakʼul anaqwan usta jwal kaw, naqil naq «junpaat ajwiʼ ut moko aal ta riiqankil» (2Co 4:16-18, SBG). Xjultikankil naq li chʼaʼajkilal yal junpaat ajwiʼ nawank ut xkʼojobʼankil qachʼool chirix li naxyeechiʼi qe li Yos tooxtenqʼa re xnawbʼal kʼaru tqabʼaanu ut re naq inkʼaʼ tqatzʼeqtaana li Jehobʼa.
Qasikʼaq li tertokil pek
w12-S 1/2 28
«Chesahobʼresi xchʼool li Jehobʼa»
Li hermaan David Splane, jun rehebʼ Li Nekeʼjolomink re Xmolam li Jehobʼa, kixkʼe li seeraqʼ aʼin (2 Corintios 4:7). Chirix kʼaru li maatan kiʼaatinak? Ma chirix li nawom? Ma chirix li xnimal ru naʼlebʼ? Aʼan kixye: «Maawaʼ aʼin. Li maatan li kixye li Apostol Pablo aʼan li qakʼanjel re xkʼebʼal chi naweʼk li yaal» (2 Corintios 4:1, 2, 5). Li hermaan Splane kixjultika chiruhebʼ kʼaʼut naq xeʼtzolok chiru li oobʼ po aʼin: re naq teʼkawresiiq chi xbʼaanunkil jun li nimla kʼanjel saʼ li puktesink, li jwal oxloqʼaq raj chiruhebʼ.
Li hermaan kixye naq ebʼ li «pakʼbʼil sekʼ» reetalil li qajunxaqalil. Moqon chik, kixjuntaqʼeeta jun li pakʼbʼil sekʼ rikʼin jun li sekʼ yiibʼanbʼil rikʼin oor. Li pakʼbʼil sekʼ naʼoksimank wulaj wulaj abʼan li sekʼ re oor inkʼaʼ. Wi saʼ li sekʼ re oor tqakʼula junaq li kʼaʼaq re ru li jwal loqʼ chiqu, naru naqakʼe xwankil li sekʼ joʼ ajwiʼ li wank chisaʼ. Joʼkan naq, li hermaan Splane kixye rehebʼ li keʼtzoleʼk: «Meebʼaanu naq teʼxnima eeru. Bʼaanuhomaq naq ebʼ li poyaman teʼxnima ru li Jehobʼa. Kubʼsihomaq eeribʼ joʼ li pakʼbʼil sekʼ».
w09-S 15/11 21 raqal 7
Qakʼehaq tzʼaqal qachʼool chi xraabʼalebʼ li qechpaabʼanel
7 Kʼaru naru tqaye chiqix? Chanru tooruuq xteebʼal li qachʼool ut xkʼutbʼal naq jwal naqarahebʼ li qechpaabʼanel? Ak re, naq kaʼajwiʼ nawulak chiqu wank rikʼinebʼ li juntaqʼeet xchihabʼebʼ qikʼin malaj xbʼaanuhomebʼ ut xkʼebʼal qahoonal chi wank rikʼinebʼ li nekeʼwulak chiru li nawulak chiqu. Abʼan wi aʼin nokooxnajtobʼresi rikʼinebʼ li junchʼol, tento naq tqasikʼ xkomon li qamiiw. Kʼoxla aʼin: «Ma kaʼajwiʼ rikʼinebʼ li wamiiw ninpuktesink? Ma nachʼaʼajkoʼk chiwu xbʼoqbʼal jalan chik li hermaan re naq toowanq junpaataq saʼ komonil? Ma inkʼaʼ ninjunaji wibʼ rikʼinebʼ li tojaʼ xeʼok saʼ li chʼuut, xbʼaan naq moqon teʼruuq chi wank choʼq wamiiw? Ma ninkʼe xsahil xchʼool chixjunilebʼ, maakʼaʼ naxye ma saaj malaj tiix?».
13-19 RE MAYO
XCHAQʼALIL RU LI RAATIN LI YOS | 2 CORINTIOS 7-10
«Li qakʼanjel re xtenqʼankil li wankebʼ saʼ rahilal»
w98-S 1/11 25 raqal 1
«Li Yos naxra li nasihok chi sa saʼ xchʼool»
Li xbʼeen naʼlebʼ, laj Pablo kixye rehebʼ laj Corinto naq ebʼ laj Macedonio keʼxkanabʼ jun chaabʼil eetalil naq keʼtenqʼank. Laj Pablo kixtzʼiibʼa: «Us ta qʼaxal xeʼyaleʼk rix xbʼaan li rahilal xeʼxkʼul, abʼanan qʼaxal numtajenaq li xsahilalebʼ xchʼool, ut li xnimal xnebʼaʼilebʼ xkʼihank choʼq bʼihomal xbʼaan xchaabʼilal xchʼoolebʼ». Moko kiʼajmank ta xjultikankil chiruhebʼ laj Macedonio li teʼxbʼaanu. Laj Pablo kixye bʼan naq «yal xchalk saʼ xchʼoolebʼ; xeʼxtzʼaama ut xeʼrelaji chiqu li usilal aʼin». Naq naqakʼe reetal li «xnimal xnebʼaʼilebʼ» laj Macedonio, nakʼutunk tzʼaqal naq keʼkʼehok chi sa saʼ xchʼoolebʼ (2 Corintios 8:2-4, SBG).
kr-S 209 raqal 1
Li kʼanjel re xtenqʼankil li wankebʼ saʼ rahilal
WANKEBʼ tana chiru li chihabʼ 46 ut li tenamit Judea kiʼok saʼ weʼej. Li xtzolom li Kriist li wankebʼ aran inkʼaʼ keʼruuk xtojbʼal junmin li tzakahemq xbʼaan naq jwal terto, joʼkan naq naru teʼkamq. Abʼanan, okebʼ re rilbʼal chanru teʼtenqʼaaq xbʼaan li Jehobʼa, li maajunwa ilbʼil chaq xbʼaan junaq laj paabʼanel. Kʼaru tkʼulmanq?
kr-S 209, 210 raqal 4-6
Li kʼanjel re xtenqʼankil li wankebʼ saʼ rahilal
4 Saʼ li xkabʼ hu choʼq rehebʼ laj Corinto, laj Pablo naʼaatinak chirix li xkʼanjelebʼ laj paabʼanel, usta li hu aʼin tzʼiibʼanbʼil choʼq rehebʼ laj paabʼanel li yulbʼilebʼ ru rikʼin santil musiqʼej, nakʼanjelak ajwiʼ choʼq rehebʼ li jalan chik chi karneer (Juan 10:16). Joʼ kixchʼolobʼ li Apostol Pablo, wiibʼ ru li kʼanjel kʼebʼil qe. Li xbʼeen aʼan «li kʼanjel re li kʼamok ibʼ saʼ usilal», malaj li kʼanjel re puktesink ut kʼutuk (2 Cor. 5:18-20, SBG; 1 Tim. 2:3-6). Ut li jun chik aʼan li «kʼanjelak chirixebʼ laj santil paabʼanel», [malaj: li kʼanjel re tenqʼank], li naqabʼaanu re xtenqʼankilebʼ li qechpaabʼanel (2 Cor. 8:4, SBG). Saʼ li wiibʼ chi naʼlebʼ aʼin li aatin kʼanjel chalenaq saʼ li aatin Griego diakonía. Kʼaʼut wank xwankil aʼin?
5 Naq laj Pablo kiroksi jun ajwiʼ li aatin Griego choʼq re li wiibʼ chi kʼanjel aʼin, kixkʼe ajwiʼ saʼ ajl li kʼanjel re tenqʼank saʼ xyanq li jalan jalanq chi kʼanjel li nabʼaanumank saʼ li chʼuut. Ak kixchʼolobʼ chaq naq wank «jalan jalanq li qakʼanjel, abʼan li Qaawaʼ aʼan ajwiʼ. Jalan jalanq li qabʼaanuhom, abʼan [...] aʼ ajwiʼ li jun chi Musiqʼej nabʼaanunk re» (1 Cor. 12:4-6, 11, SBG). Joʼkan naq, laj Pablo kixye naq li jalan jalanq chi kʼanjel li nabʼaanumank saʼ li chʼuut naxchap ribʼ rikʼin «li tzʼaqal mayejak» malaj li xloqʼoninkil ru li Yos (Rom. 12:1, 6-8, SBG). Joʼkan naq kʼaynaq chaq xkʼebʼal xhoonal re «xtenqʼankilebʼ laj santil paabʼanel» (Rom. 15:25, 26, SBG).
6 Re xtenqʼankilebʼ laj Corinto chi xtawbʼal ru kʼaʼut naq li kʼanjel re tenqʼank naʼok ajwiʼ saʼ xyanq li xkʼanjelebʼ joʼ aj paabʼanel ut li xloqʼoninkil ru li Jehobʼa, laj Pablo kixchʼolobʼ naq ebʼ laj paabʼanel nekeʼtenqʼank naq nawank junaq li rahilal xbʼaan naq nekeʼxpaabʼ «li xChaabʼil Esil li Kriist» (2 Cor. 9:13, SBG). Saʼ xkʼabʼaʼ naq nekeʼraj xyuʼaminkil li xkʼutum li Kriist, nekeʼxtenqʼa li rechpaabʼanel. Chi joʼkan, laj Pablo kixkʼe chi naweʼk naq li usilal li nekeʼxbʼaanu chirixebʼ li rechpaabʼanel aʼan reetalil «li rusilal li Yos li xhoyeʼk [...] chi numtajenaq» saʼ xbʼeenebʼ (2 Cor. 9:14, SBG; 1 Ped. 4:10). Joʼkan bʼiʼ, naq nokooʼaatinak chirix xtenqʼankilebʼ li hermaan li wankebʼ saʼ rajbʼal ru, joʼ ajwiʼ xtenqʼankilebʼ naq nachalk junaq li rahilal, li hu Laj Kʼaakʼalehom 1 re Junio 1976, maakʼaʼ saʼ Qʼeqchiʼ, kixye: «Chʼolchʼooq chiqu naq li Jehobʼa ut li Jesukriist, li Ralal, nekeʼxkʼe xwankil li kʼanjel aʼin». Joʼkan tzʼaqal, li kʼanjel li naqabʼaanu re xtenqʼankil li wankebʼ saʼ rahilal jwal wank xwankil saʼ li qakʼanjel re xloqʼoninkil ru li Yos (Rom. 12:1, 7; 2 Cor. 8:7; Heb. 13:16).
kr-S 196 raqal 10
Bʼar nachalk xtuminal li kʼanjel chirix li Xʼawabʼejilal li Yos
10 Xbʼeenwa, yal naʼalaak saʼ qachʼool naq nokootenqʼank xbʼaan naq naqara li Jehobʼa ut naqaj xbʼaanunkil «li kʼaru nawulak chiru» (1 Juan 3:22, SBG). Li Jehobʼa nawulak chiru naq naqakʼe li naʼalaak saʼ qachʼool. Li Apostol Pablo kixtzʼiibʼa chirix chanru teʼkʼehoq laj paabʼanel (taayaabʼasi 2 Corintios 9:7). Li tzʼaqal aj paabʼanel inkʼaʼ nakʼehok chi kabʼrix xchʼool chi moko chi minbʼil ru; nakʼehok bʼan, xbʼaan naq «naʼalaak saʼ xchʼool». Naq naril li naʼajmank, naxtzʼil rix kʼaru truuq xbʼaanunkil ut naxbʼaanu. Li Jehobʼa nawulak chiru li nanaʼlebʼak chi joʼkan «xbʼaan naq li Yos naxra li nasihok chi sa saʼ xchʼool» malaj joʼ naxye jun chik li Santil Hu, «li Yos naxbʼanyoxi re li nakʼehok chi sa saʼ xchʼool».
Qasikʼaq li tertokil pek
w16.01-S 12 raqal 2
Ma naqabʼanyoxi re li Yos li xbʼaanu chiqix?
2 Chʼolchʼo chaq chiru laj Pablo naq saʼ xkʼabʼaʼ li xkamik li Jesus naru natzʼaqlok ru chixjunil li naxyeechiʼi qe li Yos (taayaabʼasi 2 Corintios 1:20). Joʼkan naq, li «xnimal li xsimaatan» li Yos li «maaʼani truuq xchʼolobʼankil» aʼan chixjunil li xchaabʼilal ut li xrahom li Jehobʼa li naxkʼe qe saʼ xkʼabʼaʼ li Jesus. Joʼkan naq, chʼaʼaj xtawbʼal li aatin re xchʼolobʼankil li chʼinaʼusil maatan aʼin. Chan raj ru tqekʼa qibʼ? Kʼaru tento tqabʼaanu re xbʼanyoxinkil, anaqwan naq yook chaq chi nachʼok li xnimankil li xkamik li Jesus saʼ li Miercoles 23 re Marzo 2016?
g99-S 8/7 20, 21
Ma us tawiʼ naq tqanimobʼresi qibʼ?
Saʼ li Santil Hu li kitzʼiibʼamank chaq saʼ Griego, li aatin kau·kjá·o·mai, li najalmank ru choʼq «xkʼebʼal xloqʼal, xnimankil ribʼ, xnimobʼresinkil ribʼ», naʼoksimank joʼ jun chaabʼil naʼlebʼ malaj inkʼaʼ. Laj Pablo naxye naq naru «naqanima qibʼ rikʼin roybʼeninkil li xnimal xloqʼal li Yos», ut naxye ajwiʼ: «Ani taaraj xnimobʼresinkil ribʼ, chixnimaaq ribʼ saʼ xkʼabʼaʼ li Qaawaʼ», Jehobʼa (Romanos 5:2, SBG; 2 Corintios 10:17, SBG). Aʼin naraj xyeebʼal naq tqanima qibʼ saʼ xkʼabʼaʼ naq li Qayos aʼan li Jehobʼa, aʼin tixbʼaanu naq sahaq saʼ qachʼool xbʼaan li xkʼabʼaʼ ut li xnaʼlebʼ.
20-26 RE MAYO
XCHAQʼALIL RU LI RAATIN LI YOS | 2 CORINTIOS 11-13
«Laj Pablo wank chaq jun li kʼix saʼ li xjunxaqalil»
w08-S 15/6 3 raqal 3
Kaw qibʼ usta nokoopaltoʼk
Li Apostol Pablo, jun chik li xmoos li Yos li kiwank chaq najter, oxibʼ sut kixtzʼaama re li Jehobʼa naq trisi «jun li tiqʼlebʼ» saʼ li xjunxaqalil chanchan jun li kʼix, malaj jun li chʼaʼajkilal li inkʼaʼ naxkanabʼ xsakʼbʼal laj Pablo. Inkʼaʼ naqanaw kʼaru li chʼaʼajkilal aʼin, abʼan, joʼ jun li kʼix li ra naxtiqʼ, aʼin kiruuk raj xbʼaanunkil naq li Apostol inkʼaʼ tkʼanjelaq chi sa saʼ xchʼool chiru li Yos. Li Jehobʼa kixsume chi joʼkaʼin li xtij: «Tzʼaqal choʼq aawe li wusilal, xbʼaan naq linwankil tzʼaqal nakʼutunk saʼ xmajelal li metzʼew». Usta li Jehobʼa inkʼaʼ kirisi li chʼaʼajkilal aʼin ut laj Pablo kixkʼe xchʼool chi xkuybʼal, aʼan kixye: «Joʼqʼe maakʼaʼ inmetzʼew, tojaʼ naq qʼaxal kaw wibʼ» (2 Cor. 12:7-10, SBG). Kʼaru kiraj xyeebʼal?
w06-S 15/12 24 raqal 17, 18
Li Jehobʼa naxkʼe «li Santil Musiqʼej rehebʼ li teʼxtzʼaama chiru»
17 Li Yos kixsume li xtij laj Pablo: «Tzʼaqal choʼq aawe li wusilal, xbʼaan naq linwankil tzʼaqal nakʼutunk saʼ xmajelal li metzʼew». Ut li Apostol naxye ajwiʼ: «Joʼkan utan, chi anchal inchʼool toj tinnima wibʼ saʼ xmajelal inmetzʼew re naq taahilanq wikʼin li xwankil li Kriist» (2 Corintios 12:9, SBG; Salmo 147:5). Kʼaru kiraj xyeebʼal laj Pablo rikʼin aʼin? Naq saʼ xkʼabʼaʼ li Kriist, li Yos kixhel li xwankil re xkolbʼal chanchan jun li muhebʼaal. Joʼkan tana naxsume li qatij li Jehobʼa saʼebʼ li qakutan, xbʼaan naq naxkolebʼ li nekeʼloqʼonink re rubʼel li xwankil.
18 Jun li muhebʼaal inkʼaʼ truuq xbʼaanunkil naq tyamaaq li habʼ malaj tchʼanaaq li iqʼ, abʼan nokooxkol chiru aʼin. Joʼkan ajwiʼ, li qakolbʼal li naxkʼe «li xwankil li Kriist» moko naxbʼaanu ta naq inkʼaʼ tqakʼul li chʼaʼajkilal. Abʼanan, nokooxtenqʼa saʼ li qapaabʼal re naq tqakol qibʼ chiru li xmaaʼusilal li ruuchichʼochʼ aʼin ut chiru li xraʼal laj Tza, laj jolominel (Apocalipsis 7:9, 15, 16). Usta inkʼaʼ t-elqʼ li aaleek, chʼolchʼooq chaawu naq li Jehobʼa naril laarahilal ut naq ak xsume li xyaabʼ laakux (Isaias 30:19; 2 Corintios 1:3, 4). Laj Pablo kixtzʼiibʼa: «Li Yos naxbʼaanu li xyeechiʼi, ut inkʼaʼ texxkanabʼ chi aaleek joʼ inkʼaʼ truuq teekuy. Rikʼin li aaleek, li Yos tixkʼe ajwiʼ eere chanru teekuy re naq us texʼelq» (1 Corintios 10:13, SBG; Filipenses 4:6, 7).
w18.01-S 9 raqal 8, 9
«Aʼan nakʼehok xkawilal li tawajenaq»
8 (Taayaabʼasi Isaias 40:30). Usta wank qaseebʼal ut nokooruuk xbʼaanunkil junaq li kʼanjel, nawulak xhoonalil naq nalajk li qametzʼew. Aʼin jun li naʼlebʼ li tento tqatzol chiqajunilo. Qakʼoxlaq rix li xyuʼam li Apostol Pablo. Usta naxnaw raj xbʼaanunkil junaq li kʼanjel, inkʼaʼ naru xbʼaanunkil chixjunil li naraj. Naq kixye re li Yos li xkʼaʼuxl wiʼ xchʼool, li Yos kixye: «Linwankil tzʼaqal nakʼutunk saʼ xmajelal li metzʼew». Laj Pablo kixtaw ru li kiyeheʼk re ut kixye: «Joʼqʼe maakʼaʼ inmetzʼew, tojaʼ naq qʼaxal kaw wibʼ» (2 Cor. 12:7-10, SBG). Kʼaru kiraj xyeebʼal?
9 Chʼolchʼo chaq chiru laj Pablo naq maakʼaʼ ajwiʼ truuq xbʼaanunkil wi maaʼani ttenqʼanq re. Li xsantil musiqʼej li Yos truuq xkʼebʼal xmetzʼew naq narekʼa naq maakʼaʼ chik xmetzʼew. Ut moko kaʼaj tawiʼ aʼin. Truuq ajwiʼ xkʼutbʼal chiru li maajunwa raj tixbʼaanu xjunes. Joʼkan ajwiʼ naqakʼul laaʼo. Chʼolchʼo chiqu naq wank qametzʼew saʼ xkʼabʼaʼ li xwankil li Yos.
Qasikʼaq li tertokil pek
Xpatzʼom ebʼ laj ilol hu
Li «rox [...] choxa» li naxye saʼ 2 Corintios 12:2 aʼan tana li Xʼawabʼejilal li Yos saʼ ruqʼ li Jesukriist ut ebʼ li 144.000, naraj naxye, li «akʼ choxa» (2 Ped. 3:13, SBG).
Nakʼabʼaʼiik «rox [...] choxa» xbʼaan naq li Xʼawabʼejilal li Yos aʼan li awabʼejilal li qʼaxal wank xwankil.
Maare li «paraíso» li kikʼameʼk wiʼ saʼ moy u li Apostol Pablo aʼan: 1) li Chʼinaʼusil naʼajej li twanq saʼ Ruuchichʼochʼ, 2) li tuqtuukilal li wank saʼ xyanqebʼ li xmoos li Yos anaqwan, ut qʼaxal nimaq wiʼ chik saʼ li kutan chalk re, ut 3) li «xsantil naʼaj li Yos» saʼ choxa; chixjunil aʼin twanq saʼ li akʼ ruuchichʼochʼ.
it-1-S 317
Utzʼuk u malaj tzʼubʼuk u
Li «santil utzʼuk u». Li Santil Hu li kitzʼiibʼamank chaq saʼ Griego naroksi li aatin «santil utzʼuk u» (Ro 16:16; 1Co 16:20; 2Co 13:12, SBG; 1Te 5:26) malaj li «utzʼuk u saʼ li rahok» (1Pe 5:14, SBG), li keʼxbʼaanu tana rikʼinebʼ rechwinqilal malaj rech-ixqilal. Ebʼ li xbʼeen aj paabʼanel maare keʼxbʼaanu chaq aʼin xbʼaan naq joʼkan kʼaynaqebʼ chaq xbʼaanunkil ebʼ laj Hebreo re xkʼebʼal xsahilebʼ xchʼool. Usta li Santil Hu moko naxchʼolobʼ ta chi tzʼaqal re ru aʼin, nakʼutunk naq li «santil utzʼuk u» malaj li «utzʼuk u saʼ li rahok» naxkʼutbʼesi li rahok ut li junajil li wank chaq saʼ xyanqebʼ laj paabʼanel (Jn 13:34, 35).
27 RE MAYO TOJ 2 RE JUNIO
XCHAQʼALIL RU LI RAATIN LI YOS | GALATAS 1-3
«Kinxaqliik chiru re xqʼusbʼal»
w17.04-S 27 raqal 16
Ma nokookʼoxlak joʼ li Jehobʼa?
16 (Taayaabʼasi Galatas 2:11-14). Laj Pedro kiʼok xxiw xbʼaanebʼ li winq (Prov. 29:25). Usta ak kiril chaq li naxkʼoxla li Jehobʼa chirix aʼin, kixxuwa li teʼxkʼoxla ebʼ laj Judiiy li wankebʼ Jerusalen li ak keʼxkʼul li sirkunsisyon. Li Apostol Pablo, li kiwank saʼ li chʼutam re li chihabʼ 49, kixqʼus laj Pedro saʼ Antioquia ut kixye re naq aj kaʼpakʼal u (Hech. 15:12; Gal. 2:13). Chanru teʼnaʼlebʼaq li maawaʼebʼ aj Judiiy rikʼin li xpaltil laj Pedro? Ma teʼxkanabʼ naq aʼin tkʼehoq rehebʼ chi tichkʼok? Ma tmaqʼeʼq chiru li xkʼanjel saʼ xkʼabʼaʼ li kixbʼaanu?
w13-S 15/3 5 raqal 12
Li nekeʼxra li Jehobʼa inkʼaʼ nekeʼtichkʼok
12 Laj Pedro kixxuwa li tbʼaanuuq raj re xbʼaanebʼ li junchʼol, usta maajunwa kixtzʼeqtaana li Jesus ut li Jehobʼa, wank sut kipaltoʼk. Jun li eetalil chirix aʼin, kixye chiruhebʼ li junchʼol naq inkʼaʼ naxnaw ru li Jesus, laj Tzolol re, moko jun sut ta ajwiʼ, oxibʼ sut kixbʼaanu (Luc. 22:54-62). Moqon chik inkʼaʼ kinaʼlebʼak joʼ aj paabʼanel, xbʼaan naq kirilebʼ laj paabʼanel li maawaʼebʼ aj Judiiy chanchan tawiʼ naq maakʼaʼebʼ xwankil chiruhebʼ li rechpaabʼanel Judiiy. Abʼan, chʼolchʼo chaq chiru li Apostol Pablo naq maakʼaʼaq raj li jachok ibʼ chi moko li sikʼok u saʼ li chʼuut. Laj Pedro inkʼaʼ us kikʼoxlak. Joʼkan bʼiʼ, re naq inkʼaʼ tixkʼehebʼ chi tichkʼok ebʼ li rechpaabʼanel, laj Pablo kixaqliik chiru ut kixkʼe xnaʼlebʼ (Gal. 2:11-14). Ma kixkanabʼ li xbʼehil li yaal laj Pedro xbʼaan naq ra kirekʼa naq kiqʼuseʼk? Inkʼaʼ, kixkʼoxla rix li naʼlebʼ li kixye laj Pablo, kiʼok xyuʼaminkil ut inkʼaʼ kixkanabʼ li yaal.
Qasikʼaq li tertokil pek
w14-S 15/9 16 raqal 20, 21
Kʼanjelan chiru li Yos usta taakʼul «naabʼal rahilal»
20 Kʼaru naqakʼoxla chirix li chʼaʼajkilal li inkʼaʼ naʼilmank ru? Qakʼoxlaq, chanru tooruuq xkuybʼal li rahil chʼoolejil? Jun rehebʼ li naʼlebʼ li tooxtenqʼa aʼan xkʼoxlankil rix li xkamik li Jesus. Aʼan kixbʼaanu laj Pablo. Wank sut inkʼaʼ chik sa kirekʼa ribʼ saʼ xkʼabʼaʼ naq aj maak, abʼan naxnaw naq li Kriist kichalk chi xkolbʼalebʼ laj maak joʼ aʼan. Kixtzʼiibʼa ajwiʼ: «Linyuʼam [...] wank chik rikʼin naq ninpaabʼ li Ralal li Yos li kirahok we ut kixqʼaxtesi ribʼ saʼ inkʼabʼaʼ» (Gal. 2:20, SBG). Laj Pablo kixkʼulubʼa li xkamik li Jesus ut chʼolchʼo chiru naq aʼan kikolok re.
21 Wi naqil li xkamik li Jesus joʼ jun li maatan li naxkʼe qe li Jehobʼa chiqajunqal, aʼin jwal tooxtenqʼa. Yaal, aʼin moko naraj ta xyeebʼal naq saʼ junpaat t-elq li rahil chʼoolejil. Maare wank qe tento tixkuy aʼin toj reetal naq twulaq li akʼ ruuchichʼochʼ. Abʼan, michʼinaak aachʼool! Jultika naq ebʼ li teʼxkuy toj saʼ rosoʼjik teʼxkʼul li maatan. Ak xnachʼok li nimla kutan bʼarwiʼ naq li Xʼawabʼejilal li Yos tixkʼam chaq li tuqtuukilal ut tixtenqʼa chixjunilebʼ chi xtawbʼal li tzʼaqal yuʼam bʼarwiʼ maakʼaʼaq chik li maak. Kʼe aachʼool chi ok saʼ li Awabʼejilal aʼin usta taanumsi naabʼal li chʼaʼajkilal.
it-1-S 984
Galatas, li hu choʼq rehebʼ
Naq laj Pablo kixye: «Ex aj Galacia maakʼaʼ eenaʼlebʼ!», aʼin moko naraj ta xyeebʼal naq kaʼajwiʼ yook chi aatinak rikʼin jun chʼuut li qas qiitzʼin li wankebʼ saʼ relebʼl iqʼ saʼ xteepal Galacia (Gal 3:1, SBG); laj Pablo yook bʼan xqʼusbʼal wiibʼ oxibʼ li qas qiitzʼin re li chʼuut aʼin li nekeʼxkʼulubʼa li xnaʼlebʼebʼ laj Judiiy li wankebʼ saʼ xyanq. Ebʼ laj Judiiy aʼin yookebʼ xsikʼbʼal xtiikilalebʼ xchʼool saʼ xkʼabʼaʼ li Xchaqʼrabʼ laj Moises, ut maawaʼ li xtiikilalebʼ xchʼool chiru li Yos saʼ xkʼabʼaʼ li akʼ sumwank (2:15–3:14; 4:9, 10). Saʼebʼ li chʼuut re Galacia (1:2) li kixtzʼiibʼahebʼ laj Pablo wankebʼ aj Judiiy ut li maawaʼebʼ aj Judiiy. Saʼ xyanq li maawaʼebʼ aj Judiiy wankebʼ li jalanebʼ xtenamit li keʼxkʼul li sirkunsisyon ut li inkʼaʼ keʼxkʼul li sirkunsisyon, chisaʼ aʼin wankebʼ laj Celta (Hch 13:14, 43; 16:1; Gal 5:2). Chixjunilebʼ keʼkʼabʼaʼiik chaq choʼq aj paabʼanel re Galatas xbʼaan naq wankebʼ Galacia. Joʼ chanru tzʼiibʼanbʼil li esilhu naxkʼut naq laj Pablo yook chaq chi aatinak rikʼinebʼ laj paabʼanel li wankebʼ saʼ rokebʼl iqʼ re li teep Roma xbʼaan naq li wankebʼ aran naxnaw chaq ruhebʼ ut maawaʼ li wankebʼ saʼ relebʼl iqʼ li maajunwa kixnawebʼ chaq ru ut maare inkʼaʼ kirulaʼanihebʼ.