Ebʼ li naʼlebʼ choʼq re Xhuhil li qachʼutam Qayuʼam ut Qakʼanjel joʼ aj Paabʼanel
7-13 RE OCTUBRE
XCHAQʼALIL RU LI RAATIN LI YOS | SANTIAGO 3-5
«Qakʼutbʼesihaq li xnimal xnaʼlebʼ li Yos»
cl-S 221, 222 raqal 9, 10
Ma wank xwankil «li choxahil naʼlebʼ» saʼ li qayuʼam?
9 «Xbʼeenwa saq ru». Li aatin saʼ Griego «saq ru» naxkʼut naq maakʼaʼ xmuxul malaj saq ru chisaʼ joʼ ajwiʼ chirix. Li Santil Hu naxkʼut naq li choxahil naʼlebʼ naxchap ribʼ rikʼin li chʼoolej, moko truuq ta raj xkʼulbʼal li choxahil naʼlebʼ wi tzʼaj ru li qakʼaʼuxl malaj li naqarahi ru (Proverbios 2:10, La Biblia. Traducción del Nuevo Mundo, [TNM]; Mateo 15:19, 20). Abʼan, wi naqakʼe qaqʼe re naq saqaq ru li qachʼool, tqakol qibʼ «chiru li maaʼusilal» ut tqabʼaanu «li us» (Salmo 37:27, Li Santil Hu, Sociedad Bíblica de Guatemala, [SBG]; Proverbios 3:7). Peʼyaal naq wank xyaalalil kʼaʼut nakʼemank xbʼeenwa li xsaqal ru li qayuʼam saʼ xyanq li choxahil naʼlebʼ? Xbʼaan naq, chanru tooruuq raj xyuʼaminkil li xkomon chik li naʼlebʼ wi moko saq ta ru li qayuʼam ut li qapaabʼal?
10 «Chirix chik aʼan li tuqtuukilal». Li xnimal ru xnaʼlebʼ li Yos nokoorekʼasi chi xsikʼbʼal li tuqtuukilal, li naruuchi li santil musiqʼej (Galatas 5:22). Joʼkan naq, naqakʼe qachʼool re naq inkʼaʼ tqakʼe saʼ chʼaʼajkilal «li junajil li nachalk [...] saʼ xkʼabʼaʼ li tuqtuukilal» li wank saʼ li xtenamit li Jehobʼa (Efesios 4:3, SBG). Joʼkan ajwiʼ, naq nawank li chʼaʼajkilal naqasikʼ chanru xtuqubʼankil ru re naq toowanq wiʼ chik saʼ junajil. Kʼaʼut wank xwankil naq tqabʼaanu aʼin? Xbʼaan naq li Santil Hu naxye: «Wanqex saʼ tuqtuukilal, ut li Yos li nakʼehok li rahok ut li tuqtuukilal taawanq eerikʼin» (2 Corintios 13:11, SBG). Joʼkan naq, wi wanko saʼ tuqtuukilal, li Xyosil li tuqtuukilal twanq qikʼin. Joʼ chanru naqilebʼ li qechpaabʼanel, aʼin tixkʼut chanru wanko chiru li Yos. Chanru naqakʼutbʼesi naq naqasikʼ li tuqtuukilal? Qilaq jun li eetalil.
cl-S 223 raqal 12
Ma wank xwankil «li choxahil naʼlebʼ» saʼ li qayuʼam?
12 «Chaabʼil». Kʼaru naraj xyeebʼal li aatin aʼin? Joʼ nekeʼxye li nekeʼxtzʼil rix aʼin, li aatin Griego li natawmank saʼ Santiago 3:17 chʼaʼaj xjalbʼal ru. Wankebʼ chik li Santil Hu nekeʼxjal ru joʼ «tuulan xchʼool», «wank xkuyum» ut «naxkʼoxla li junchʼol». Saʼ li Santil Hu Traducción del Nuevo Mundo naxye saʼ jun li chʼina esil naq li xyaalalil li aatin aʼin naraj tzʼaqal xyeebʼal «xkʼulubʼankil». Chanru naqakʼutbʼesi naq naqayuʼami li naʼlebʼ aʼin li nachalk rikʼin li Yos?
cl-S 224, 225 raqal 14, 15
Ma wank xwankil «li choxahil naʼlebʼ» saʼ li qayuʼam?
14 «Seebʼ xchʼool chi abʼink». Aʼin naxjal ru jun li aatin li kaʼajwiʼ natawmank saʼ li raqal li Santil Hu li kitzʼiibʼamank chaq saʼ Griego. Joʼ naxye jun li poyanam li naxtzʼil rix li aatin aʼin, «naʼoksimank chaq naq nekeʼqʼuseʼk ebʼ laj puubʼ». Naraj xyeebʼal naq «saʼ junpaat naxkʼulubʼa li nayeheʼk re» ut «naxpaabʼ». Joʼkan naq, li naxyuʼami li choxahil naʼlebʼ, naxkʼulubʼa chi sa saʼ xchʼool li naxye li Santil Hu. Naq naxkʼulubʼa junaq li naʼlebʼ moko nawbʼil ta ru naq inkʼaʼ chik naraj xjalbʼal usta wank xyaalalil re naq tixbʼaanu. Saʼ junpaat bʼan naxjal li xkʼaʼuxl naq nakʼuteʼk chiru rikʼin li Santil Hu naq moko us ta li xnaʼlebʼ malaj li kixkʼoxla. Ma nawbʼil qu naq joʼkan nokoonaʼlebʼak?
«Kʼajoʼ naʼuxtaanank ut chaabʼil li xbʼaanuhom»
15 «Kʼajoʼ naʼuxtaanank ut chaabʼil li xbʼaanuhom». Saʼ xkʼabʼaʼ naq li choxahil naʼlebʼ «kʼajoʼ naʼuxtaanank», aajel ru aʼin. Qakʼehaq reetal naq li uxtaanank u naxchap ribʼ rikʼin li «chaabʼil bʼaanuhom». Ut wank xyaalalil aʼin xbʼaan naq li Santil Hu naxye naq li uxtaanank u nokoorekʼasi chi xtenqʼankilebʼ li junchʼol, li toqʼobʼank u li naqakʼutbʼesi rikʼin li chaabʼil bʼaanuhom. Jun li tasal hu naxye naq li uxtaanank u naraj xyeebʼal «xtoqʼobʼankil ruhebʼ li nekeʼxkʼul li rahilal, li naʼekʼasink qe chi xtenqʼankilebʼ». Joʼkan naq, li choxahil naʼlebʼ moko kaw ta chi moko kaʼaj tawiʼ nakʼehok naʼlebʼ, narahok bʼan, tuulan ut chaabʼil. Chanru naqakʼutbʼesi naq qʼaxal nokooʼuxtaanank u?
cl-S 226 raqal 18, 19
Ma wank xwankil «li choxahil naʼlebʼ» saʼ li qayuʼam?
18 «Juntaqʼeet naril chixjunil». Li choxahil naʼlebʼ moko naxtzʼeqtaana ta li jalan rilobʼaal ut xtenamit, joʼkan naq, wi naqakanabʼ naq tixbʼeresi li qabʼaanuhom, tqasikʼ chanru risinkil saʼ qachʼool li sikʼok u (Santiago 2:9). Moko kaʼaj tawiʼ sa naqil wiibʼ oxibʼ li poyanam xbʼaan naq wankebʼ xtzolbʼal, xtumin malaj junaq xkʼanjel saʼ li chʼuut, chi moko naqatzʼeqtaana junaq li qechpaabʼanel usta maakʼaʼ xwankil. Wi xeʼraheʼk xbʼaan li Jehobʼa, xkʼulubʼebʼ ajwiʼ naq tqarahebʼ.
19 «Maawaʼ aj kaʼpakʼal u». Li aatin saʼ Griego «aj kaʼpakʼal u» naʼaatinak tana chirixebʼ «li nekeʼtzʼaqonk saʼ jun li kʼutbʼesink». Saʼ najter qʼe kutan, ebʼ laj Griego ut ebʼ laj Roma li nekeʼkʼanjelak chaq saʼ li kʼutbʼesink nekeʼroksi li nimla kʼoj. Joʼkan naq, li aatin saʼ Griego «aj kaʼpakʼal u» kiʼoksimank chirix jun li poyanam aj bʼalaqʼ li yal naxpakʼ li xbʼaanuhom re xkʼebʼal chi seʼek li poyanam. Li choxahil naʼlebʼ aʼin moko kaʼaj tawiʼ tkʼutunq rikʼin chanru naqilebʼ li junchʼol, tento raj ajwiʼ tkʼutunq rikʼin li naqekʼa chirixebʼ.
Qasikʼaq li tertokil pek
w18.05-S 23 raqal 4
Naw ru li xikʼ nakatril
4 Li Apostol Pedro kixkʼabʼaʼi laj Tza joʼ jun li «kajkoj japjo re», ut laj Juan kixkʼabʼaʼi joʼ «kʼantiʼ» ut «nimla xul» (1 Ped. 5:8, SBG; Apoc. 12:9, SBG). Ma naraj xyeebʼal aʼin naq qʼaxal tqaxuwa ru laj Tza? Inkʼaʼ, xbʼaan naq usta wank xwankil inkʼaʼ naru xbʼaanunkil chixjunil li naraj (taayaabʼasi Santiago 4:7). Li Jehobʼa, li Jesus ut ebʼ li chaabʼil anjel nokooʼeʼxtenqʼa. Saʼ xkʼabʼaʼ naq nokooʼeʼxtenqʼa, naqakuy xnumsinkil li aaleek li naxkʼe laj Tza. Abʼan toj tqasume oxibʼ rehebʼ li patzʼom li wank xwankil: Ma wank xwankil laj Tza? Chanru naxyal rechaninkilebʼ li poyanam? Ut, toj bʼar nawulak xwankil? Qatzʼilaq rix aʼin ut qilaq kʼaru tqatzol.
w97-S 15/11 20 raqal 8
Li qapaabʼal nokooxtenqʼa re naq wanq qakuyum ut re naq junelik tootijoq
8 Li naxwechʼ rix li rechpaabʼanel yook chi maakobʼk (Santiago 4:11, 12). Abʼanan, wankebʼ nekeʼaatinak chirix xjolom ebʼ li rechpaabʼanel, maare xbʼaan naq nekeʼxkʼoxla naq jwal chaabʼilebʼ ru li xyuʼam chiruhebʼ aʼan malaj nekeʼraj xnimobʼresinkil ribʼebʼ rikʼin xtzʼeqtaanankil li junchʼol (Salmo 50:20; Proverbios 3:29). Li aatin saʼ Griego «aatinak chirix xjolom» naxkʼam chaq li xikʼ ilok ut li qʼabʼank, aʼin naraj xyeebʼal raqok aatin saʼ xbʼeen li qechpaabʼanel. Kʼaʼut naq li naxbʼaanu aʼin «naxwechʼ rix li Chaqʼrabʼ ut naraqok aatin saʼ xbʼeen»? Ebʼ laj Tzʼiibʼ ut laj Pariseey keʼxtzʼeqtaana chaq «li xchaqʼrabʼ li Yos» ut keʼraqok aatin rikʼin li naʼlebʼ li xaqabʼanbʼil xbʼaanebʼ (Marcos 7:1-13, SBG). Wi li Jehobʼa inkʼaʼ naraqok aatin saʼ xbʼeen junaq li qechpaabʼanel, ut laaʼo naqabʼaanu, peʼyaal naq yooqo raj xwechʼbʼal rix li xchaqʼrabʼ li Yos ut maakobʼk chiru naq naqaye naq maakʼaʼ chik xwankil? Ut naq tqawechʼ rix junaq li qechpaabʼanel chi maakʼaʼ xyaalal, moko yooqo ta raj xyuʼaminkil li rahok (Romanos 13:8-10).
14-20 RE OCTUBRE
XCHAQʼALIL RU LI RAATIN LI YOS | 1 PEDRO 1, 2
«Santaqex»
w17.02-S 9 raqal 5
Li xkamik li Jesus: jun chaabʼil maatan li naxkʼe li Qayuwaʼ
5 Chanru naqakʼutbʼesi naq naqara li xkʼabʼaʼ li Jehobʼa? Rikʼin li qabʼaanuhom. Li Yos naraj naq santaqo (taayaabʼasi 1 Pedro 1:15, 16). Aʼin naraj xyeebʼal naq kaʼajwiʼ li Jehobʼa naqaloqʼoni ru ut naqapaabʼ chi anchal qachʼool. Naqakʼe qaqʼe chi xyuʼaminkil li xchaabʼil naʼlebʼ ut li xchaqʼrabʼ usta nokooʼeʼxrahobʼtesi. Li qachaabʼil bʼaanuhom naxkʼutbʼesi naq laaʼo tzʼaqal aj paabʼanel ut naxkʼe xloqʼal li xkʼabʼaʼ li Jehobʼa (Mat. 5:14-16). Saʼ xkʼabʼaʼ naq santo, naqakʼutbʼesi rikʼin li qayuʼam naq chaabʼil li xchaqʼrabʼ li Yos ut naq moko yaal ta li kixye laj Tza chiqix. Yaal naq chiqajunilo nokoopaltoʼk, abʼan naqayotʼ qachʼool ut naqakanabʼ xbʼaanunkil li inkʼaʼ naxkʼe xloqʼal li Jehobʼa (Sal. 79:9).
Chanru Tqajsi Qu joʼ Nawulak Chiru li Yos?
6 Laj Pablo kixye rehebʼ laj paabʼanel re li tenamit Roma: «[Kanabʼomaq roksinkil] leeroq leeruqʼ re xbʼaanunkil li maak». Ut kixye ajwiʼ rehebʼ: «Teekʼe chi kamk li xbʼaanuhom li tzʼejwalej» (Romanos 6:12-14, SBG; 8:13, SBG). Toj maajiʼ naxye chaq ebʼ li aatin aʼin laj Pablo naq kiʼaatinak chirix wiibʼ oxibʼ xchaʼal li tibʼelej ut chanru yookebʼ chaq roksinkil re xbʼaanunkil li maaʼusilal. Joʼkan naq kixye chirixebʼ li poyanam aʼin: «Li xsaʼ rehebʼ nujenaq chi majewal». «Li roqebʼ nekeʼseebʼoʼk chi xik chi kamsink». «Tik inkʼaʼ nekeʼxxiwa ru li Yos» (Romanos 3:13-18, SBG). Kʼaru raj tkʼulmanq wi naqoksi jun xchaʼal li qatibʼel re xbʼaanunkil li inkʼaʼ us? Wi tqabʼaanu chi joʼkan, yooqo xtzʼajninkil li qatibʼel. Qakʼoxlaq aʼin: wankebʼ nekeʼxtzʼajni chixjunil li xtibʼel naq nekeʼok rilbʼal li nekeʼxrahobʼtesi li ras riitzʼin malaj li inkʼaʼ nekeʼxutaanak xkʼutbʼal li xchaʼal. Ut inkʼaʼ chik saqaq ru li xpaabʼal chiru li Yos, xbʼaan naq yook roksinkil li xnaqʼru re rilbʼal li maaʼusilal (Deuteronomio 15:21; 1 Pedro 1:14-16; 2 Pedro 3:11). Joʼkan naq, li tzʼaj aj naʼlebʼ naru naxbʼaanu naq tqakanabʼ wank choʼq ramiiw li Jehobʼa!
Qasikʼaq li tertokil pek
w08-S 15/11 21 raqal 10
Li xqatzol saʼ li hu Santiago ut Pedro
1:10-12. Ebʼ li anjel keʼraj tzʼaqal xtawbʼal ru li xnimal ru li yaal chirix li chʼuut rehebʼ li yulbʼilebʼ ru, li keʼxtzʼiibʼa chaq ebʼ li Propeet najter qʼe kutan. Abʼanan, li yaal aʼin inkʼaʼ kitawmank ru toj naq li Jehobʼa kixxaqabʼ li chʼuut rehebʼ laj paabʼanel (Efe. 3:10). Qakʼamaq qe rikʼinebʼ li anjel ut qatzʼilaq rix «li xchamal xkʼaʼuxl li Yos» (1 Cor. 2:10, SBG).
it-2-S 1075 raqal 1
Laj Ilol qe
Li Xnimal ru aj Ilol qe. Saʼ 1 Pedro 2:25, SBG, li Apostol naxye li natawmank saʼ Isaias 53:6 naq kiʼaatinak chirixebʼ li keʼwank chaq joʼebʼ li «karneer li nekeʼchaʼchotk», ut moqon chik kixye ajwiʼ: «Aʼut anaqwan xexsutqʼiik chaq rikʼin laj Kʼaakʼalenel ut laj Ilol re leeraanm». Li aatin aʼin nayeemank chirix li Jehobʼa, xbʼaan naq li kixtzʼiibʼahebʼ laj Pedro moko sachsokebʼ ta chaq chi moko keʼxkanabʼ li Jesukriist, saʼ xkʼabʼaʼ bʼan aʼan keʼkʼameʼk wiʼ chik rikʼin li Jehobʼa, li Xnimal ru aj Kʼaakʼalehom re li xtenamit (Sl 23:1; 80:2; Jer 23:3; Eze 34:12). Li Jehobʼa aʼan ajwiʼ laj Ilol qe, chanchan tawiʼ nokoorulaʼani (Sl 17:3). Li ulaʼanink aʼin (gr. e·pi·sko·pḗ) naxchap tana ajwiʼ ribʼ rikʼin li raqok aatin, joʼ kixkʼul li tenamit Jerusalen saʼ li xbʼeen siʼeent chihabʼ, naq inkʼaʼ kixkʼe reetal li hoonal naq kiʼulaʼaniik chaq (gr. e·pi·sko·pḗs) (Lu 19:44). Malaj tixkʼam chaq rusilal ut osobʼtesink joʼ li teʼxkʼul li «teʼxnima xloqʼal li Yos saʼ xkutankil li Ulaʼaniik [gr. e·pi·sko·pḗs]» (1Pe 2:12, SBG).
21-27 RE OCTUBRE
XCHAQʼALIL RU LI RAATIN LI YOS | 1 PEDRO 3-5
«Li rosoʼjik chixjunil li kʼaʼaq re ru nachʼ chik wank»
w13-S 15/11 3 raqal 1
«Ajʼajaq eeru chi tijok»
JUN li winq li kikʼanjelak chaq chi qʼeq naxye: «Li hoonal li jwal chʼaʼaj re naq ajʼooq qu aʼan naq jwal naʼok li qʼoqyink, naq ak saqewk re». Joʼkan tana ajwiʼ nekeʼxkʼoxla li nekeʼyoʼlek chi qʼeq. Ebʼ laj paabʼanel nekeʼxkʼul ajwiʼ li chʼaʼajkilal aʼin saʼ li qakutan, xbʼaan naq yook chaq chi nachʼok li rosoʼjik li xmaaʼusilal li xruuchichʼochʼ laj Tza, li jwal wank saʼ akʼabʼ (Rom. 13:12). Jwal xiwxiw wi toowarq raj saʼ li qapaabʼal saʼ li hoonal aʼin! Jwal aajel ru naq tqapaabʼ li naxye li Santil Hu: «Chiwanq bʼiʼ eenaʼlebʼ ut ajʼajaq eeru chi tijok» (1 Ped. 4:7, SBG).
w99-S 15/4 22 raqal 3
Chanru tqanaw ut tqaqʼax ru li naxchʼina li qapaabʼal?
Wanq saʼ qachʼool li naʼlebʼ li kixkʼe li Apostol Pedro: «Li rosoʼjik chixjunil li kʼaʼaq re ru nachʼ chik wank. Chiwanq bʼiʼ eenaʼlebʼ ut ajʼajaq eeru chi tijok. Xbʼeen xbʼeen chiru chixjunil qʼaxal cherahaq eeribʼ, xbʼaan naq li rahok kʼajoʼ xkʼihal li maak naxtzʼap ru» (1 Pedro 4:7, 8, SBG). Moko chʼaʼaj ta xxokbʼal saʼ li qakʼaʼuxl ut saʼ li qachʼool li qapaltil ut li xpaltilebʼ li junchʼol ut xkanabʼankil naq tooxkʼe chi tichkʼok saʼ li qapaabʼal. Laj Tza naxnaw chiʼus naq chʼaʼaj chiqu aʼin. Li jwal us naʼelk chiru aʼan li jachok ibʼ. Joʼkan naq, aajel ru naq jwal tqara qibʼ chiqibʼil qibʼ re naq tooruuq xtzʼapbʼal li paltil aʼin ut inkʼaʼ tqakʼe «xnaʼaj laj tza» (Efesios 4:25-27, SBG).
w18.03-S 14, 15 raqal 2, 3
Kʼaʼut aajel ru naq tookʼehoq ochochnal?
2 Laj Pedro kixkʼe li naʼlebʼ aʼin rehebʼ laj paabʼanel: «Chexkʼehoq ochochnaal cheribʼil eeribʼ» (1 Ped. 4:9, SBG). Li aatin saʼ Griego kʼehok ochochnal naraj tzʼaqal xyeebʼal «xkʼutbʼesinkil li rahok malaj li usilal rehebʼ li inkʼaʼ naqanawebʼ ru». Abʼan qakʼehaq reetal naq li Apostol naxye rehebʼ naq teʼkʼehoq ochochnal chiribʼilebʼ ribʼ malaj rehebʼ li ak nekeʼxnaw ru ut nekeʼraatina chaq. Kʼaru rusilal teʼxtaw wi teʼxyuʼami li naʼlebʼ aʼin?
3 Tixtenqʼahebʼ raj chi wank saʼ junajil. Qakʼoxlaq li xqakʼul chaq. Peʼyaal naq maajunwa xsach saʼ qachʼool naq jun li hermaan xooxbʼoq saʼ rochoch? Ut, naq laaʼo xqabʼoq junaq li hermaan, peʼyaal naq kikawuuk li qamiiwil rikʼin? Li kʼehok ochochnal nokooxtenqʼa chi xnawbʼalebʼ ru chiʼus li qechpaabʼanel. Saʼ xkutankil laj Pedro, naq kinumtaak li chʼaʼajkilal jwal kiʼajmank wiʼ chik naq laj paabʼanel wanqebʼ saʼ junajil. Joʼkan ajwiʼ naqakʼul laaʼo «saʼ rosoʼjikebʼ li kutan» aʼin (2 Tim. 3:1, SBG).
Qasikʼaq li tertokil pek
w13-S 15/6 23
Xpatzʼom ebʼ laj ilol hu
Kʼaʼut naq li Santil Hu naxye naq li Jesus kipuktesink rikʼinebʼ «li musiqʼej tzʼaptzʼookebʼ»? (1 Ped. 3:19, SBG).
▪ Li Apostol Pedro kiʼaatinak chirixebʼ li musiqʼej li «inkʼaʼ keʼpaabʼank naq keʼoybʼeniik xbʼaan li xnimal xkuyum li Yos» saʼ xkutankil laj Noe (1 Ped. 3:20, SBG). Chʼolchʼo naq yook chi aatinak chirixebʼ li anjel li keʼokenk chirix laj Tza naq kixqʼet ribʼ. Laj Judas kiʼaatinak ajwiʼ chirixebʼ «li ánjel li inkʼaʼ keʼxkʼuula li loqʼal kʼeebʼil rehebʼ ut keʼxkanabʼ li xnaʼajebʼ, tzʼaptzʼookebʼ anaqwan xbʼaan li Qaawaʼ rubʼel xwankil li aakʼabʼ rikʼin kareen chi junelik, choʼq re li raqbʼa aatin taawanq saʼ li xnimal ru kutan» (Jud. 6, SBG).
Chanru keʼxqʼet ribʼ ebʼ li anjel aʼin saʼ xkutankil laj Noe? Naq toj maajiʼ nachalk li Bʼutʼihaʼ, keʼtibʼeloʼk abʼan moko yeebʼil ta chaq rehebʼ xbʼaan li Yos (Gen. 6:2, 4). Moko kaʼaj tawiʼ aʼin keʼxbʼaanu, keʼwank ajwiʼ rikʼinebʼ li ixq, li moko xkʼulubʼebʼ ta raj xbʼaanunkil, xbʼaan naq moko re ta aʼin naq keʼyobʼtesiik (Gen. 5:2). Ebʼ li maaʼus aj musiqʼej li keʼxqʼet ribʼ teʼsacheʼq ru saʼ li kutan xaqabʼanbʼil chaq xbʼaan li Yos. Abʼan, joʼ kixtzʼiibʼa chaq laj Judas, wankebʼ «rubʼel xwankil li aakʼabʼ» chanchan tawiʼ tzʼaptzʼokebʼ.
Joqʼe ut chanru kipuktesink li Jesus rikʼinebʼ «li musiqʼej tzʼaptzʼookebʼ»? Laj Pedro kixye naq aʼin kikʼulmank naq li Jesus ak «kiyoobʼtesiik saʼ musiqʼejil yuʼam» malaj naq kiwaklesiik wiʼ chik chi yoʼyo (1 Ped. 3:18, SBG, 19). Joʼkan ajwiʼ, kixye naq li Jesus kipuktesink rikʼinebʼ. Naq kiroksi li aatin re xyeebʼal naq ak xkʼulmank, naxkʼut naq li puktesink aʼin kikʼulmank naq li Apostol toj maajiʼ naxtzʼiibʼa li xbʼeen xhu. Joʼkan bʼiʼ, maare naq ak xwakliik wiʼ chik chi yoʼyo li Jesus kixpuktesi rehebʼ li maaʼus aj musiqʼej li teʼxkʼul. Moko kixpuktesi ta jun li esil li kixkʼe roybʼenihomebʼ, re bʼan tojbʼa maak (Jon. 1:1, 2). Kiruuk xkʼebʼal li esil aʼin, xbʼaan naq rikʼin li xpaabʼal, li xtiikilal xchʼool toj saʼ xkamik ut li xwaklijik wiʼ chik chi yoʼyo, kiruuk xkʼutbʼesinkil naq laj Tza maakʼaʼ xwankil saʼ xbʼeen (Juan 14:30; 16:8-11).
Saʼ li kutan chaalel, li Jesus tixbʼakʼ laj Tza ut tixkut saʼ siwan rochbʼenebʼ li anjel li keʼxqʼet ribʼ (Luc. 8:30, 31, TNM; Apoc. 20:1-3). Naq toj maajiʼ nawulak li kutan aʼin, ebʼ li anjel li keʼxqʼet ribʼ wankebʼ saʼ akʼabʼ saʼ musiqʼej. Ut twulaq xqʼehil naq teʼsacheʼq (Apoc. 20:7-10).
w08-S 15/11 21 raqal 8
Li xqatzol saʼ li hu Santiago ut Pedro
4:6. Anihebʼ «li kamenaq» li «kipuktesimank li Chaabʼil Esilal» rehebʼ? Aʼan li kamenaqebʼ chaq saʼ li xmaaʼusilal ut saʼ li xmaakebʼ, malaj kamenaqebʼ saʼ li xpaabʼal (Efe. 2:1). Naq keʼxkʼulubʼa li chaabʼil esil, chanchan tawiʼ keʼyoʼlaak saʼ li xpaabʼal.
28 RE OCTUBRE TOJ 3 RE NOVIEMBRE
XCHAQʼALIL RU LI RAATIN LI YOS | 2 PEDRO 1-3
«Ajʼajaq qu chi roybʼeninkil li xkutankil li Jehobʼa»
w06-S 15/12 27 raqal 11
Li Jehobʼa traqoq aatin
11 Chanru tqataw ru li kixye li Jesus naq li Jehobʼa traqoq aatin saʼ xhoonalil? Usta yaal naq li Raatin li Yos naxkʼut naq li Jehobʼa nim xkuyum, abʼanan, naxye ajwiʼ naq inkʼaʼ tbʼayq chi raqok aatin (Lucas 18:7, 8; 2 Pedro 3:9, 10). Naq kiwulak li Bʼutʼihaʼ saʼ xkutankil laj Noe, saʼ junpaat keʼsacheʼk li maaʼusebʼ xnaʼlebʼ. Joʼkan ajwiʼ kikʼulmank saʼ xkutankil laj Lot, keʼsacheʼk li maaʼusebʼ xnaʼlebʼ naq kikubʼeek chaq li xaml saʼ choxa. Li Jesus kixye: «Joʼkanaq ajwiʼ saʼ li kutan tixkʼut wiʼ ribʼ li Kʼajolbʼej» (Lucas 17:27-30, SBG). Joʼkan ajwiʼ tkʼulmanq rikʼin li maaʼusebʼ xnaʼlebʼ «taachalq li rosoʼjikebʼ saʼ junpaat» (1 Tesalonicenses 5:2, 3, SBG). Joʼkan naq, chʼolchʼooq chiqu naq li Jehobʼa maajunwa tixkanabʼ jun kutanaq chik li xruuchichʼochʼ laj Tza, traqoq aatin saʼ xhoonalil.
w06-S 15/12 19 raqal 18
«Xnachʼok chaq li xnimla kutankil li Qaawaʼ»
18 Wank xyaalalil kʼaʼut naq li Apostol Pedro kixye naq inkʼaʼ tqakanabʼ roybʼeninkil «li xkutankil li Yos»! Chanru tooruuq xbʼaanunkil? Jun rehebʼ aʼan naq toowanq «saʼ santilal ut rikʼin paabʼank» (2 Pedro 3:11, 12, SBG). Wi laatzʼ qu chi xbʼaanunkil aʼin, tooxtenqʼa chi roybʼeninkil chi anchal qachʼool «li xkutankil li Yos». Li aatin Griego li najalmank ru choʼq «teeseebʼa xchalik» naraj tzʼaqal xyeebʼal «xbʼaanunkil saʼ junpaat». Yaal naq inkʼaʼ tooruuq xbʼaanunkil naq tnumeʼq saʼ junpaat li hoonal re naq twulaq xkutankil li Jehobʼa. Abʼanan, naq yooqo roybʼeninkil, tnumeʼq saʼ junpaat li hoonal wi laatzʼ qu saʼ li xkʼanjel li Yos (1 Corintios 15:58).
Qasikʼaq li tertokil pek
w08-S 15/11 22 raqal 2
Li xqatzol saʼ li hu Santiago ut Pedro
1:19. Ani «li kaq chahim»? Joqʼe nawakliik, ut chanru naqanaw naq ak xkʼulmank aʼin? «Li kaq chahim» aʼan li Jesukriist naq ak xaqabʼanbʼil chik choʼq Awabʼej (Apoc. 22:16). Saʼ 1914, li Jesus kiwakliik chiru chixjunil li yobʼtesihom naq kikʼeheʼk choʼq Awabʼej saʼ li Xʼawabʼejilal li Yos, kixkʼe chi naweʼk jun akʼ kutan. Li kiril laj Pedro saʼ li moy u naq kilemtzʼunoʼk ru li Jesus, yal reetalil li loqʼal ut li wankilal li tkʼemanq re li Jesus ut kixkʼutbʼesi naq paabʼajel li kixye chaq li Yos rehebʼ li Propeet (Mar. 9:1-3). Wi naqakʼe qachʼool chirix li aatin aʼin, tlemtzʼunq li qachʼool ut tqanaw naq li kaq chahim ak xwakliik chik.
w08-S 15/11 22 raqal 4
Li xqatzol saʼ li hu Santiago ut Pedro
3:17. Kʼaru li naʼlebʼ ak nekeʼxnaw chaq ebʼ laj paabʼanel? Saʼ li raqal aʼin, laj Pedro yook chi aatinak chirix li kiyeheʼk re xbʼaan li Yos naq tkʼulmanq saʼ li kutan chaalel joʼ ajwiʼ li keʼxtzʼiibʼa chaq wiibʼ oxibʼ li winq saʼ Santil Hu. Yaal naq li naʼlebʼ li ak nekeʼxnaw chaq moko aʼan ta raj chixjunil, joʼkan naq ebʼ li xbʼeen aj paabʼanel moko nekeʼxnaw ta chixjunil li tkʼulmanq saʼ li kutan chaalel. Abʼan ak xyeemank xyaalalil rehebʼ chirix li naʼajmank xnawbʼal.