Ebʼ li naʼlebʼ choʼq re Xhuhil li qachʼutam Qayuʼam ut Qakʼanjel joʼ aj Paabʼanel
© 2024 Watch Tower Bible and Tract Society of Pennsylvania
4-10 RE NOVIEMBRE
XCHAQʼALIL RU LI RAATIN LI YOS | SALMO 105
«Junelik wank saʼ xchʼool li xloqʼlaj Sumwank»
Qakawresihaq qapaabʼal chirix li akʼ ruuchichʼochʼ
11 Qakʼoxlaq li kixyeechiʼi li Jehobʼa rehebʼ junjunq laj kʼanjel chiru, li chanchan naq maajunwa tkʼulmanq. Kixye re laj Abrahán ut li xSara naq twanq li ralal usta ak cheekebʼ chik (Gén. 17:15-17). Joʼkan ajwiʼ kixye re laj Abrahán naq tixkʼe rehebʼ li ralal xkʼajol li naʼajej Canaán. Abʼan chiru naabʼal chihabʼ ebʼ laj Israel, li ralal xkʼajol laj Abrahán, keʼwank joʼ moos saʼ li tenamit Egipto, joʼkan naq chanchan tawiʼ naq maajunwa tkʼulmanq li yeechiʼom aʼin. Abʼan kitzʼaqlok ru. Moqon chik li Jehobʼa kixye re li xʼElisabet naq twanq li ralal usta ak cheek chik. Kixye ajwiʼ re li xMaría, jun li tuqʼixq, naq rikʼin tyoʼlaaq li Ralal. Aʼin li xtzʼaqlojik li kixyeechiʼi li Jehobʼa naabʼal chihabʼ rubʼelaj saʼ li naʼajej Edén (Gén. 3:15).
12 Naq naqil chixjunil li kixyeechiʼi li Jehobʼa ut chanru xeʼtzʼaqlok ru naqil li xwankilal. Aʼin naxkawresi li qapaabʼal naq tixkʼam chaq li akʼ ruuchichʼochʼ (taayaabʼasi Josué 23:14; Isaías 55:10, 11). Chi joʼkan kawresinbʼilaqo re xtenqʼankilebʼ li junchʼol chi xtawbʼal ru naq li yeechiʼom aʼin moko yal jun matkʼ ta. Li Jehobʼa kixye chirix li akʼ ruuchichʼochʼ ut li akʼ choxa naq: «Li aatin aʼin tzʼaqal yaal ut paabʼajel» (Apoc. 21:1, 5 Li Santil Hu, Sociedad Bíblica de Guatemala, SBG).
it-2 581 raqal 2
Li aatin
Chixjunil li yobʼtesihom wank rubʼel xwankil li Yos, joʼkan naq truuq roksinkil re naq ttzʼaqloq ru li rajom (Sl 103:20; 148:8). Paabʼajel li raatin joʼkan naq li naxyeechiʼi li Yos natzʼaqlok ru ut inkʼaʼ nasach saʼ xchʼool (Dt 9:5; Sl 105:42-45). Li Jehobʼa ak kixye naq li raatin «wank chi junelik», maajunwa tsutqʼiiq rikʼin chi inkʼaʼ ta ttzʼaqloq ru li rajom (Isa 40:8; 55:10, 11; 1Pe 1:25).
Li tertokil pek
Li Jehobʼa kixkol laj José
41:9-13, 16, 29-32, 38-40
Laj José kiwank choʼq moos ut saʼ tzʼalam chiru oxlaju chihabʼ tana toj reetal naq li Jehobʼa kikolok re. Inkʼaʼ kichalk xkʼahil, kixtaw bʼan xnaʼlebʼ rikʼin li kixkʼul (Sl 105:17-19). Chʼolchʼo chiru naq junelik ttenqʼaaq xbʼaan li Jehobʼa. Chanru kiroksi chiʼus li xhoonal?
Laj José yook chi xnumsinkil ebʼ li xtzakahemq li preex
Saʼ xkʼabʼaʼ naq laj José aj chaabʼil kʼanjel ut paabʼajel, chi joʼkan kixkanabʼ naq t-osobʼtesiiq xbʼaan li Jehobʼa (Gé 39:21, 22).
Laj José naxchʼolobʼ li xmatkʼ wiibʼ li preex
Moko kixkʼoxla ta xkʼebʼal reqaj li keʼxbʼaanu re, kixtenqʼahebʼ bʼan li junchʼol (Gé 40:5-7).
Chanru tinxtenqʼa li kixkʼul laj José naq wanqin saʼ chʼaʼajkilal?
Chanru tinruuq roksinkil chiʼus linhoonal toj reetal naq li Jehobʼa tinxkol saʼ li Armagedón?
11-17 RE NOVIEMBRE
XCHAQʼALIL RU LI RAATIN LI YOS | SALMO 106
«Kisachk saʼ xchʼoolebʼ li Yos laj Kolol rehebʼ»
«Chalqex wikʼin laaʼex li nekepaabʼ li Qaawaʼ!»
13 Ebʼ laj Israel keʼxuwak naq keʼril li choql moymoy ru, ebʼ li raqʼkaaq ut chixjunil li kikʼutbʼesink re xwankil li Yos. Joʼkan naq, keʼxye re laj Moisés naq aʼan t-aatinaq rikʼin li Jehobʼa (Ex. 20:18-21). Joʼkan bʼiʼ, laj Moisés kitaqeʼk saʼ li tzuul Sinaí, ut aran kikanaak chiru naabʼal kutan. Saʼ xkʼabʼaʼ naq laj kʼamolbʼe li kʼojkʼo wiʼ xchʼoolebʼ maaʼani rikʼinebʼ, ma naru naqaye naq tzʼeqtaananbʼilebʼ saʼ li chaqichʼochʼ? Chanchan tawiʼ naq nakawuuk ebʼ li xpaabʼal yal rikʼin rilbʼal ru laj Moisés. Joʼkan naq, keʼtiʼtzk chi roybʼeninkil ut keʼxye re laj Aarón: «Yiibʼ junaq qayos li taakʼamoq bʼe chiqu, xbʼaan naq inkʼaʼ naqanaw kʼaru xkʼul chaq laj Moisés, li kiʼisink chaq qe saʼ li tenamit Ejiipt» (Ex. 32:1, 2, SBG).
Li tertokil pek
Bʼar naqatiika li xnaqʼ qu?
14 Kʼaru kitaqlank re laj Moisés chi xqʼetbʼal ribʼ? Qilaq wiʼ chik li naxye li Salmo 106:32, 33, SBG: «Keʼxjosqʼi li Qaawaʼ chire li haʼ Meribá, ut laj Moisés kikʼuluk rahilal xmaakebʼ aʼan: kirahoʼk xchʼool laj Moisés ut kiʼaatinak chi inkʼaʼ kixnaw kʼaru kixye». Usta ebʼ laj Israel keʼxchiqʼ xjosqʼil li Jehobʼa, laj Moisés chik kikʼahoʼk xchʼool. Xbʼaan naq maakʼaʼ xkuyum, kixkut raatin ut inkʼaʼ kixkʼoxla naq aʼin tkʼehoq re saʼ chʼaʼajkilal.
15 Laj Moisés kixkanabʼ naq li xbʼaanuhomebʼ li junchʼol tixjal li rilobʼaal, ut inkʼaʼ chik kixtiika li xnaqʼ ru rikʼin li Jehobʼa. Saʼ xbʼeen sut naq ebʼ laj Israel keʼwechʼink xbʼaan naq maakʼaʼ li haʼ, laj Moisés chaabʼil kinaʼlebʼak (Ex. 7:6). Abʼanan, maare xlubʼk ut xchʼinaak xchʼool xbʼaan naq ak lajeetq chihabʼ rokik chi rilbʼal li tenamit li yook xqʼetbʼal ribʼ. Maare kixkʼe chiʼubʼej li rekʼahom ut inkʼaʼ li xloqʼal li Jehobʼa.
18-24 RE NOVIEMBRE
XCHAQʼALIL RU LI RAATIN LI YOS | SALMOS 107, 108
«Chexyoxinq chiru li Qaawaʼ xbʼaan naq chaabʼil»
w07 15/4 20 raqal 2
Qakʼehaq xloqʼal li Jehobʼa saʼ li chʼuut
2 Li chʼuut moko aʼan ta jun naʼaj yal re bʼatzʼunk, re rajsinkil qu malaj bʼarwiʼ nekeʼwulak naabʼal li qas qiitzʼin li juntaqʼeet nekeʼkʼoxlak. Li chʼuut xaqabʼanbʼil re xkʼebʼal xloqʼal li Jehobʼa Yos ut junelik aʼanaq li rajom. Joʼ naxye saʼ Salmo 35:18, SBG: «Tinbʼanyoxinq chawu saʼ li nimla chʼutam ut tinnima aawu saʼ xyanqebʼ li kʼiila tenamit». Joʼkan ajwiʼ, Salmo 107:31,32, SBG, naxye: «Chexyoxinq chiru li Qaawaʼ xbʼaan naq aj rahonel, rikʼinatq li sachbʼachʼoolej kixbʼaanu choʼq rehebʼ chixjunil. Chenima xkʼabʼaʼ naq chʼutchʼuuqebʼ li tenamit».
w15 15/1 9 raqal 4
Choobʼanyoxinq chiru li Jehobʼa
4 Re naq junelik toobʼanyoxinq tento naq tqakʼoxla rix li ak xbʼaanu li Jehobʼa chiqix. Ut xnaʼlebʼankil rix chanru naxkʼutbʼesi li tzʼaqal rahok chiqix. Naq laj salmiist kixbʼaanu aʼin sachso xchʼool kikanaak rikʼin chixjunil li kixbʼaanu li Jehobʼa chirix (yaabʼasi Salmo 40:5 ut 107:43).
Li tertokil pek
it-2 409 raqal 6
Moab
Naq laj David kiwank joʼ awabʼej, ebʼ laj Israel ut ebʼ laj Moab xeʼpleetik. Laj David kitaqlank saʼ xbʼeenebʼ laj Moab ut kixmin ruhebʼ naq teʼtojoq chiru. Naq laj David kixqʼaxebʼ ru laj Moab kitzʼaqlok ru jun li propesiiy li kixye laj Balaam numenaq 400 chihabʼ rubʼelaj: «Jun chahim xwakliik chaq rikʼin laj Jakob, xaqxo xwankil jun li awabʼej saʼ xyanqebʼ laj Israel. Aʼan tixsach ruhebʼ laj Mohab ut tixputzʼi xjolomebʼ li ralal xkʼajol laj Set» (Nú 24:17, SBG). Maare li kitzʼibʼank chaq re li Salmo kiʼaatinak chirix aʼin naq kixye naq choʼq re li Yos laj Moab, aʼan chanchan tawiʼ li «emel» bʼarwiʼ nachʼajok (Sl 60:10; 108:10, SBG).
25 RE NOVIEMBRE TOJ 1 RE DICIEMBRE
XCHAQʼALIL RU LI RAATIN LI YOS | SALMOS 109-112
Chooʼokenq chirix li Qaʼawabʼej, aʼ li Jesús
w06 1/9 13 raqal 6
Li xqatzol saʼ li ro tasal re li hu Salmos
110:1, 2. Kʼaru kixbʼaanu li Qaawaʼ [re laj David] Jesukriist naq kichunlaak saʼ xnim ruqʼ li Yos? Naq kiwakliik chi yoʼyo li Jesús kitaqeʼk saʼ choxa ut kiʼoybʼenink saʼ xnim ruqʼ li Yos toj reetal naq kiʼok chi awabʼejink saʼ 1914. Chiru li hoonal naq kiʼoybʼenink kiʼawabʼejink saʼ xbʼeenebʼ li yulbʼilebʼ ru, kixbʼeresi li kʼanjel re puktesink ut kʼehok tzolom ut kixkawresihebʼ re naq teʼawabʼejinq rochbʼeen saʼ li Xʼawabʼejilal (Mateo 24:14; 28:18-20; Lucas 22:28-30).
w00 1/4 18 raqal 3
Li nekeʼpleetik rikʼin li Yos moko junelik ta teʼwanq
3 Xikʼ naʼileʼk li xtenamit li Jehobʼa chalen xtiklajik li chihabʼ 1900. Saʼ naabʼal li tenamit ebʼ li kristiʼaan nekeʼxrahobʼtesi ebʼ li hermaan ut nekeʼxbʼaanu chixjunil li wank saʼ ruqʼebʼ re naq inkʼaʼ tkʼemanq chi naweʼk li chaabʼil esil chirix li Xʼawabʼejilal li Yos saʼ xkʼabʼaʼ naq nekeʼxkʼam re rikʼin laj Tza, li yook chi sutunk «joʼ jun li kaqkoj li kaw naxjap re ut yook xsikʼbʼal ani tixnuqʼ» (1 Pedro 5:8). Saʼ 1914 naq kiraqʼek «li hoonal li xaqabʼanbʼil choʼq rehebʼ li tenamit», li Jehobʼa kixxaqabʼ li Ralal joʼ Awabʼej saʼ Ruuchichʼochʼ naq kixye: «Chiwanq laawankil saʼ xbʼeenebʼ li xikʼ nekeʼilok aawe» (Lucas 21:24; Salmo 110:2, SBG). Li Jesús kiroksi li xwankilal ut kirisi chaq laj Tza saʼ choxa ut kixtaqla chaq saʼ Ruuchichʼochʼ. Saʼ xkʼabʼaʼ naq laj Tza naxnaw naq moko naabʼal ta chik li xhoonal wank yook risinkil li xjosqʼil saʼ xbʼeenebʼ li yulbʼilebʼ ru ut li nekeʼkʼanjelak rochbʼeenebʼ (Apocalipsis 12:9, 17).
be 76 raqal 3
Maakanabʼ kʼiik saʼ laapaabʼal
Li naʼlebʼ chirix roksinkil li xseebʼal qakʼaʼuxl naxbʼaanu naq t-alaaq saʼ qachʼool kʼanjelak. Ma nawulak chaawu xbʼoqbʼalebʼ li hermaan re naq tteʼrochbʼeeni naq tatxik chi puktesink? Ma nakaakʼoxla chanru xtenqʼankilebʼ li akʼebʼ saʼ li xpaabʼal, ebʼ li saaj ut li yajebʼ saʼ li chʼuut? Ma nawulak chaawu xsaabʼesinkil li Chʼutlebʼaal Kabʼl malaj xbʼaanunkil jalan jalanq li kʼanjel saʼ li nimla chʼutam? Ma twulaq raj chaawu wank joʼ aj kʼamolbʼe saʼ li puktesink joʼ li nekeʼxbʼaanu 30 hoor? Ma tatruuq wank joʼ aj kʼamolbʼe saʼ li puktesink joʼ li nekeʼxbʼaanu 50 hoor malaj qʼaxonk saʼ junaq li naʼaj bʼarwiʼ naʼajmank ebʼ laj puktesinel? Ut wi laaʼat jun li hermaan winq, ma nakaayal aaqʼe re naq tatruuq wank joʼ aj tenqʼanel saʼ li chʼuut malaj cheekel winq? Wi nakaayeechiʼi aawibʼ ut nakaakʼulubʼa li kʼanjel nakaakʼutbʼesi naq yookat chi kʼiik saʼ laapaabʼal (Sal. 110:3, Li Santil Hu, Wycliffe Bible Translators, Wy).
Li tertokil pek
Tenqʼank saʼ laachʼuut
Chiqajunilo naru nokootenqʼank saʼ li qachʼuut. Jun eetalil, ma wankebʼ hermaan cheekebʼ chik malaj yajebʼ saʼ laachʼuut? Ma naru nakaayeechiʼi aawibʼ re xkʼambʼalebʼ saʼ li chʼutam? Ma naru nakaatenqʼahebʼ chi xloqʼbʼal li kʼaru naʼajmank saʼ rochochebʼ, chi xsaabʼesinkil li rochochebʼ malaj jalan chik li kʼanjel? (Yaabʼasi Santiago 1:27). Naru nokootenqʼank ajwiʼ re xsaabʼesinkil ut xyiibʼankil li Chʼutlebʼaal Kabʼl. Maaʼani napuʼersink qe chi xbʼaanunkil li kʼanjel aʼin; naqayeechiʼi bʼan qibʼ xbʼaan naq naqara li Jehobʼa ut ebʼ li qechpaabʼanel (Salmo 110:3, Wy).
Wank jalan chik li naʼlebʼ bʼarwiʼ naru nekeʼtenqʼank ebʼ laj Testiiw li ak kubʼenaqebʼ chik xhaʼ. Ebʼ li hermaan winq li kawebʼ saʼ xpaabʼal naru nekeʼwank joʼ aj tenqʼanel saʼ li chʼuut ut moqon joʼ cheekel winq. Chiqajunilo naru naqakʼe xtzʼaqobʼ li qakʼanjel joʼ aj kʼamolbʼe saʼ li puktesink. Wankebʼ laj Testiiw li nekeʼtenqʼank re xkabʼlankil li ochoch re loqʼonink. Junchʼol chik nekeʼqʼaxonk re tenqʼank saʼ junaq li chʼuut bʼarwiʼ naʼajmank.
2-8 RE DICIEMBRE
XCHAQʼALIL RU LI RAATIN LI YOS | SALMOS 113-118
Chanru tqatoj re li Jehobʼa li usilal li naxbʼaanu qe?
w01 1/1 11 raqal 13
Kawresinbʼilebʼ xbʼaan li rahok
13 Ebʼ li aatin li kixye li Jesús naxchʼolobʼ naq jwal wank xwankil naq tqara li Jehobʼa. Naq nokooyoʼlaak toj maajiʼ naqara li Jehobʼa, li qarahom chirix li Jehobʼa nakʼiik timil timil. Naq xqabʼi xbʼeen sut chirix li Yos, aʼin kixbʼaanu naq t-alaaq saʼ qachʼool jilok chixkʼatq. Timil timil xqatzol chanru kixkawresi li Ruuchichʼochʼ choʼq re li qas qiitzʼin (Génesis 2:5-23) ut chanru naxchʼolanihebʼ li kristiʼaan usta aʼanebʼ inkʼaʼ xeʼabʼink chiru ut xeʼmaakobʼk chiru, aʼan kixbʼaanu chixjunil re xkolbʼalebʼ (Génesis 3:1-5, 15). Chaabʼil kinaʼlebʼak rikʼinebʼ li tiikebʼ xchʼool ut kixtaqla li Ralal re qakolbʼal (Juan 3:16, 36). Naq yook chi kʼiik li qanawom chirix li Jehobʼa, yook ajwiʼ chi kʼiik li rahom chirix (Isaías 25:1). Li awabʼej David kixye naq naxra li Jehobʼa xbʼaan naq aʼan naʼilok re (Salmo 116:1-9). Saʼebʼ li qakutan li Jehobʼa nokooxchʼolani, nokooxbʼeresi, nokooxkawresi ut naxkʼojobʼ qachʼool. Naq yooko xnawbʼal ru li Jehobʼa jwal tkʼiiq qarahom chirix (Salmo 31:24; Sofonías 3:17; Romanos 8:28).
w09 15/7 29 raqal 4, 5
Choobʼanyoxinq naq nokookʼuluk ut chookʼehoq chi anchal qachʼool
Jun li kitzʼiibʼank re li Salmo kixye: «Chanru tintoj re li Qaawaʼ chixjunil li usilal xbʼaanu we?» (Sal. 116:12, SBG). Kʼaru rusilal li Jehobʼa ak kixkʼul? Li Jehobʼa kixtenqʼa naq «xrahoʼk ut xyotʼeʼk li» raanm. Joʼkan ajwiʼ kixkol «chiru xwankil li kamk». Joʼkan naq kiraj bʼanyoxink chiru. Abʼan chanru truuq xbʼaanunkil? Aʼan kixye: «Tinbʼaanu li xinyeechiʼi re linYos» (Sal. 116:3, 4, 8, 10-14, SBG). Joʼkan tzʼaqal, laj salmiist naraj xbʼaanunkil chixjunil li kixyeechiʼi re li Jehobʼa, joʼkan ajwiʼ naraj xbʼaanunkil li tenebʼanbʼil saʼ xbʼeen chiru li Jehobʼa.
Joʼkan ajwiʼ tooruuq xbʼaanunkil laaʼo, chanru? Naq naqapaabʼ li xchaqʼrabʼ ut li naʼlebʼ li naxkʼe qe. Joʼkan naq tento naq chʼolchʼooq chiqu naq xloqʼoninkil ru li Jehobʼa aʼan li jwal wank xwankil saʼ li qayuʼam ut naq li xsantil musiqʼej nokooxbʼeresi naq naqasikʼ kʼaru tqabʼaanu saʼ li qayuʼam (Ecl. 12:13; Gál. 5:16-18). Yaal maajunwa tooruuq xtojbʼal re li Jehobʼa chixjunil li kixbʼaanu chiqix. Usta joʼkan, tooruuq xsahobʼresinkil xchʼool wi naqayal qaqʼe chi kʼanjelak chiru chi anchal qachʼool (Pro. 27:11). Kʼajoʼ xnimal ru li maatan aʼin!
Ebʼ li chaabʼil naʼlebʼ li natawmank saʼ li hu Levítico
9 Li xkabʼ chaabʼil naʼlebʼ: nokookʼanjelak chiru li Jehobʼa saʼ xkʼabʼaʼ naq nokoobʼanyoxink chiru. Qatzʼilaq rix jun chik li naʼlebʼ li wank xwankil li nekeʼxbʼaanu chaq laj Israel naq nekeʼxloqʼoni ru li Yos: li mayej re kʼamok ibʼ saʼ usilal. Saʼ li hu Levítico, naqatzol naq ebʼ laj Israel naru nekeʼxyeechiʼi li mayej re kʼamok ibʼ saʼ usilal re xkʼutbʼesinkil naq nekeʼxnaw «bʼanyoxink» (Lev. 7:11-13, 16-18, SBG). Moko keʼxyeechiʼi ta li mayej aweʼ yal xbʼaan naq tenebʼanbʼil saʼ xbʼeenebʼ, saʼ xkʼabʼaʼ bʼan naq nekeʼraj xbʼaanunkil. Joʼkan naq aʼin jun li mayej li naʼalaak chaq saʼ xchʼoolebʼ, saʼ xkʼabʼaʼ naq nekeʼxra li Jehobʼa, li Xyos. Li naxyeechiʼi li mayej, li xjunkabʼal ut ebʼ laj tij nekeʼxtzeka chaq xtibʼel li mayejanbʼil xul. Abʼan, wiibʼ oxibʼ li xchaʼal li xul nakʼemank kaʼajwiʼ re li Jehobʼa. Bʼar wank rehebʼ?
10 Li rox chaabʼil naʼlebʼ: naqakʼe re li Jehobʼa li qʼaxal chaabʼil saʼ xkʼabʼaʼ naq naqara. Choʼq re li Jehobʼa li xxeebʼul li xul aʼan chaq li qʼaxal chaabʼil. Kixye ajwiʼ naq wiibʼ oxibʼ li xchaʼal li xul li kʼajoʼ nakʼanjelak, joʼ li xkenqʼ, jwal wank chaq xwankil chiru (taayaabʼasi Levítico 3:6, 12, 14-16). Joʼkan naq li Jehobʼa kʼajoʼ naq nasahoʼk chaq xchʼool naq jun aj Israel naxyeechiʼi chi anchal xchʼool li xchaʼal li xul li qʼaxal nakʼanjelak ut li xxeebʼul. Laj Israel li naxyeechiʼi li mayej aʼin naxkʼutbʼesi naq naraj xkʼebʼal re li Jehobʼa li qʼaxal chaabʼil. Joʼkan ajwiʼ, li Jesús kixyeechiʼi re li Xyuwaʼ li qʼaxal chaabʼil naq kikʼanjelak chiru chi anchal xchʼool saʼ xkʼabʼaʼ li rahom li narekʼa chirix (Juan 14:31). Numtajenaq chaq xsahil xchʼool li Jesús chi xbʼaanunkil li rajom li Xyuwaʼ ut naxra chaq chi anchal xchʼool li xchaqʼrabʼ (Sal. 40:9). Makachʼin tana kisahoʼk saʼ xchʼool li Jehobʼa naq kiril chanru naq li Ralal kixyeechiʼi ribʼ re kʼanjelak chiru!
11 Li mayej re kʼamok ibʼ saʼ usilal naʼalaak chaq saʼ xchʼoolebʼ li kristiʼaan ut naxkʼutbʼesi naq nekeʼxra li Yos. Li qakʼanjel chiru li Jehobʼa chanchan li mayej aʼan, xbʼaan naq naqakʼutbʼesi chiru naq saʼ li qachʼool naʼalaak chaq li naqekʼa chirix. Naqakʼe re li qʼaxal chaabʼil, ut naqabʼaanu saʼ xkʼabʼaʼ naq naqara chi anchal qachʼool. Kʼajoʼ tana nasahoʼk saʼ xchʼool li Jehobʼa naq naril naq chi miyon li qas qiitzʼin nekeʼkʼanjelak chiru, xbʼaan naq numtajenaq li xrahomebʼ chirix ut chirix li xchaqʼrabʼ. Naxkʼojobʼ qachʼool xjultikankil naq moko kaʼaj tawiʼ naril ut naroxloqʼi li naqabʼaanu, naxkʼe bʼan saʼ ru li naʼekʼasink qe chi xbʼaanunkil. Jun eetalil, wi saʼ xkʼabʼaʼ li qacheekelal inkʼaʼ chik nokooruuk xbʼaanunkil chixjunil li tqaj raj, chʼolchʼooq chiqu naq li Jehobʼa moko naxkʼe ta xchʼool chirix li inkʼaʼ nokooruuk xbʼaanunkil. Maare tqakʼoxla naq maakʼaʼ ajwiʼ naqakʼe re, abʼan li Yos naril li xnimal ru qarahom chirix li naʼekʼasink qe chi xbʼaanunkil chixjunil li wank saʼ quqʼ. Nasahoʼk xchʼool chi xkʼulubʼankil li qʼaxal chaabʼil li nokooruuk xkʼebʼal re.
Li tertokil pek
Ma naqabʼanyoxi ebʼ li maatan li naxkʼe qe li Yos?
7 Re xkʼutbʼesinkil naq oxloqʼ chiqu li Ruuchichʼochʼ ut chixjunil li wank chisaʼ, tento tqakʼoxla rix li xyobʼtesihom li Jehobʼa (taayaabʼasi Salmo 115:16). Aweʼ t-ekʼasinq qe chi xbʼanyoxinkil re li Jehobʼa rajlal kutan chixjunil li chaabʼil echej li naxkʼe qe. Naqakʼutbʼesi ajwiʼ naq nokoobʼanyoxink naq naqasaabʼesi ru li naʼaj li wank chi qasutam.
9-15 RE DICIEMBRE
XCHAQʼALIL RU LI RAATIN LI YOS | SALMO 119:1-56
«Chanru naq li saaj al taawanq saʼ xyaalalil?»
w87 1/11 18 raqal 10
Ma saq ru laayuʼam saʼ chixjunil?
10 Saʼ Efesios 5:5 laj Pablo kixye: «Xbʼaan naq laaʼex nekeenaw ut nekeetaw ru chiʼus naq maaʼani naru narechani li Xʼawabʼejilal li Kriist ut li Yos wi naxmux ribʼ, wi naxyuʼami li tzʼaj aj naʼlebʼ ut wi narataw xtzʼaqobʼ li xjunkabʼlal, aʼin juntaqʼeet rikʼin xloqʼoninkil li pechʼbʼil yos». Abʼanan, rajlal chihabʼ naqʼuseʼk malaj naʼisiik saʼ li chʼuut kʼiila mil chi qas qiitzʼin saʼ xkʼabʼaʼ li muxuk ibʼ (1 Corintios 6:18). Nakʼulmank aʼin xbʼaan naq li namaakobʼk moko yoʼon ta nawank rikʼin li raatin li Yos (Salmo 119:9, SBG). Joʼ eetalil, naabʼalebʼ li hermaan inkʼaʼ nekeʼxkol ribʼ chiru li muxuk ibʼ naq nekeʼhilank. Nekeʼxkanabʼ rochbʼeeninkilebʼ li hermaan ut nekeʼxsikʼ ramiiwebʼ saʼ xyanqebʼ li qas qiitzʼin li inkʼaʼ nekeʼxloqʼoni ru li Yos naq yookebʼ chi hilank. Wiibʼ oxibʼ rehebʼ maare nekeʼxkʼoxla naq chaabʼilebʼ xnaʼlebʼebʼ li qas qiitzʼin joʼkan naq nekeʼok xjunajinkil ribʼ rikʼinebʼ. Joʼ nakʼulmank rikʼinebʼ li nekeʼxsikʼ joʼ ramiiw ebʼ li rechkʼanjel. Jun li cheekel winq kiʼok wank saʼ amiiwil rikʼin jun li ixq li wank joʼ rechkʼanjel ut aʼin kixbʼaanu naq tixkanabʼ li xjunkabʼal ut taaxik chi wank rikʼin li rechkʼanjel. Saʼ xkʼabʼaʼ aʼin kiʼisiik saʼ li chʼuut. Joʼkan naq chʼolchʼo naq yaal li naxye 1 Corintios 15:33: «Ebʼ li yibʼ aj amiiw nekeʼxpoʼ li chaabʼil naʼlebʼ»!
w06 15/6 25 raqal 1
«Laawaatin nakʼehok xsahil linchʼool»
LI JEHOBʼA naxkʼe qe li xchaqʼrabʼ re naq tooruuq xqʼaxbʼal ru ebʼ li chʼaʼajkilal li naqanumsi. Wiibʼ oxibʼ rehebʼ naqataw naq naqayaabʼasi li Santil Hu saʼ junesal ut naq naqabʼi ebʼ li sumenk li nekeʼxkʼe ebʼ li hermaan ut ebʼ li seeraqʼ li nakʼemank saʼ li chʼutam. Li xkʼihalil li naʼlebʼ li naqabʼi malaj li naqayaabʼasi ak naqanaw chik. Abʼan saʼ xkʼabʼaʼ naq laaʼo aj maak naabʼal sut nasach saʼ qachʼool li naqatzol. Jwal naʼajmank naq teʼxjultika chiqu li rajom, li xchaqʼrabʼ ut li xnaʼlebʼ li Jehobʼa. Jwal oxloqʼ chiqu li xchaqʼrabʼ li Yos xbʼaan naq nokooxtenqʼa re xjultikankil kʼaru kiʼekʼasink qe re kʼanjelak chiru. Joʼkan naq laj salmiist kixye re li Jehobʼa: «Laawaatin nakʼehok xsahil linchʼool» (Salmo 119:24, SBG).
Miqil li maakʼaʼ naʼok wiʼ
2 Li naqil naʼokenk saʼebʼ li naʼlebʼ li naqakʼoxla, joʼkan naq weent tqabʼaanu. Rilbʼal ebʼ li yibʼru aj naʼlebʼ tixbʼaanu naq tqarahi ru xbʼaanunkil. Saʼ li ruuchichʼochʼ aʼin bʼarwiʼ laj Tza najolomink, wank naabʼal ebʼ li jalam ut ebʼ li esil li naru naxchʼaʼajki li qamiiwil rikʼin li Jehobʼa usta jun sut ajwiʼ tqil (1 Juan 5:19). Joʼkan naq laj salmiist kixye re li Yos: «Chakʼe taxaq naq inkʼaʼ tinkʼe reetal li maakʼaʼ naʼok wiʼ, ut chakʼe inyuʼam rikʼin laawaatin» (Sal. 119:37, SBG).
Li tertokil pek
w00 1/10 14 raqal 8
Xyalbʼal xsahil xtzolbʼal li Santil Hu
8 Naʼalaak saʼ qachʼool xraabʼal li Raatin li Yos. Tento naq tqayal xsahil xkʼoxlankil rix li junjunq chi raqal li naqayaabʼasi. Joʼkan ajwiʼ, aajel ru naq tqakʼe qahoonal re xkʼoxlankil rix li junjunq chi naʼlebʼ li jwal wank xwankil ut tqakʼe qachʼool chirixebʼ. Re xbʼaanunkil aʼin aajel ru naq toonaʼlebʼaq chi chaabʼil ut tootijoq. Joʼkan ajwiʼ, tento tqakawresi qachʼool re xyaabʼasinkil ut xtzolbʼal li Raatin li Yos joʼ xbʼaanu chaq laj Esdras. Chirix laj Esdras kiyeemank: «Xbʼaan naq laj Esdras kixkʼe xchʼool chi xtzolbʼal li xChaqʼrabʼ li Qaawaʼ, chi xkʼanjelankil ut chi xkʼutbʼal chixjunil li raatin ut li xtaqlahom chiruhebʼ laj Israel» (Esdras 7:10, SBG). Laj Esdras kixbʼaanu aʼin re xkawresi xchʼool: tzolok, xyuʼaminkil li naxtzol ut kʼutuk. Tento naq tqakʼam qe rikʼin.
16-22 RE DICIEMBRE
XCHAQʼALIL RU LI RAATIN LI YOS | SALMO 119:57-120
Chanru tooruuq xkuybʼal ebʼ li chʼaʼajkilal
w06 15/6 20 raqal 2
«Kʼajoʼ naq ninra laachaqʼrabʼ!»
2 Chanru li xchaqʼrabʼ li Yos kixkʼojobʼ xchʼool laj salmiist? Kixtenqʼa re naq tchʼolaaq chiru naq li Yos naxkʼe xchʼool chirix. Usta wank xchʼaʼajkilal saʼ xkʼabʼaʼ li xikʼ nekeʼilok re, rilbʼal li rusilal li naxkʼam chaq li Raatin li Yos naxkʼe xsahil xchʼool. Kixkʼe reetal naq li Jehobʼa chaabʼil rikʼin, joʼkan ajwiʼ, li xchaqʼrabʼ kixbʼaanu naq jwal wanq xnaʼlebʼ chiruhebʼ li xikʼ nekeʼilok re ut kixkol chiru li kamk. Saʼ xkʼabʼaʼ naq naʼabʼink chiru, wank saʼ tuqtuukilal ut inkʼaʼ nachʼiʼchʼiʼik xbʼaan li xkʼaʼuxl (Salmo 119:1, 9, 65, 93, 98, 165).
w00 1/12 14 raqal 3
Ma jwal naqara li xchaqʼrabʼ li Jehobʼa?
3 Laj salmiist kʼajoʼ naxra li xchaqʼrabʼ li Jehobʼa, joʼkan naq kixye: «Chi anchal linchʼool ut chi inkʼaʼ ninbʼay wibʼ, ninkʼanjela li naxye laachaqʼrabʼ. Ebʼ li inkʼaʼ usebʼ nekeʼraj inraʼlenkil, abʼan inkʼaʼ nasachk saʼ inchʼool laataqlahom» (Salmo 119:60, 61, SBG). Joʼkan ajwiʼ naqakʼul laaʼo, li xchaqʼrabʼ li Jehobʼa nokooxtenqʼa re naq tooruuq xkuybʼal li rahobʼtesiik. Naqakuy saʼ xkʼabʼaʼ naq naqanaw naq li qachoxahil Yuwaʼ truuq xbʼaanunkil naq ebʼ li xikʼ nekeʼilok qe moko wanqebʼ ta xwankil saʼ qabʼeen. Saʼ xhoonalil, li Jehobʼa nokooxrachʼabʼ re naq tooruuq xkʼebʼal chi naweʼk li chaabʼil esil chirix li Awabʼejilal (Marcos 13:10).
w06 1/9 14 raqal 4
Li xqatzol saʼ li ro tasal re li hu Salmos
119:71. Kʼaru rusilal naqataw naq naqanumsi ebʼ li chʼaʼajkilal? Ebʼ li chʼaʼajkilal naru naq tooxtenqʼa re naq tqakʼojobʼ qachʼool rikʼin li Jehobʼa, tootijoq chiru chi anchal qachʼool ut tqayal qaqʼe chi xtzolbʼal li Raatin li Yos ut xyuʼaminkil li naqatzol. Joʼkan ajwiʼ, joʼ chanru naqaqʼax ru junaq li chʼaʼajkilal, tixkʼutbʼesi bʼar wank li qamaajelal ut chi joʼkan tooruuq xtiikobʼresinkil li qanaʼlebʼ. Wi naqakanabʼ naq ebʼ li chʼaʼajkilal tixchaabʼilobʼresi qanaʼlebʼ, inkʼaʼ tchʼinaaq qachʼool.
w17.07 13 raqal 3, 5
«Yaabʼanqex rikʼinebʼ li nekeʼyaabʼak»
3 Chʼolchʼo chiqu naq li xkʼojobʼankil qachʼool naqataw rikʼin li Jehobʼa, aʼ li qachoxahil Yuwaʼ (yaabʼasi 2 Corintios 1:3, 4). Li Jehobʼa naxkʼe qe jun chaabʼil eetalil chirix xtawbʼal ru kʼaru nekeʼrekʼa ebʼ li kristiʼaan. Joʼkan naq li Yos naxye rehebʼ laj kʼanjel chiru: «Laaʼin ninkʼehok xkawubʼ laachʼool» (Is. 51:12, SBG; Sal. 119:50, 52, 76).
5 Chʼolchʼo chiqu naq li Jehobʼa tooxtenqʼa. Joʼkan naq, qatehaq li qachʼool chiru ut qayeehaq re chixjunil li naqekʼa. Naxkawresi qachʼool xnawbʼal naq li Jehobʼa naxtaw ru chanru naqekʼa qibʼ ut naq naʼajmank chiqu naxkʼojobʼ qachʼool.
Li tertokil pek
Qajukʼaq chixjunil li naraj numtaak saʼ xbʼeen li xnaʼlebʼ li Yos
12 Xkabʼ, qʼaxal wank xwankil xkʼoxlankil rix li naʼlebʼ. Aajel ru naq wulaj wulaj tqil xsaʼ li Santil Hu ut tqakʼe qahoonal re xkʼoxlankil rix kʼaru li naʼlebʼ ut li bʼaanuhom tento tqajal (taayaabʼasi Salmo 119:59; Heb. 4:12; Sant. 1:25). Qakʼehaq reetal bʼar wank xnaʼlebʼ li ruuchichʼochʼ li yook chi taqlank saʼ li qakʼaʼuxl. Tento naq chʼolchʼooq chiqu bʼar wank li xmaajelal li qanaʼlebʼ ut tqakʼe qaqʼe chi xjalbʼal.
13 Re naq tooruuq xbʼaanunkil aʼin, naru naqakʼoxla ebʼ li patzʼom aweʼ: «Ma wank li kaqalink malaj li sowenk saʼ linchʼool» (1 Ped. 2:1). «Ma ninqʼetqʼeti wibʼ saʼ xkʼabʼaʼ li xinkʼul chaq saʼ linyuʼam, lintzolbʼal malaj lintumin?» (Prov. 16:5). «Ma nintzʼeqtaana li nebʼaʼebʼ chiwu malaj li jalanebʼ xtenamit?» (Sant. 2:2-4). «Ma naxik inchʼool chirix li naxyeechiʼi li xruuchichʼochʼ laj Tza?» (1 Juan 2:15-17). «Ma nawulak chiwu li ajsibʼaal u li naxkʼut li muxuk ibʼ ut li kamsink?» (Sal. 97:10, Wy; 101:3; Amós 5:15). Maare li xsumenkil ebʼ li patzʼom aʼin tixkʼutbʼesi chiqu kʼaru tento tqachaabʼilobʼresi saʼ li qanaʼlebʼ. Wi naqajukʼ «chixjunil li xkʼanjel li maaʼus», tqasahobʼresi xchʼool li Qayuwaʼ li wank saʼ choxa (Sal. 19:15).
23-29 RE DICIEMBRE
XCHAQʼALIL RU LI RAATIN LI YOS | SALMO 119:121-176
Maachʼik aawibʼ saʼ rahilal
Qoksihaq li chaqʼrabʼ ut li naʼlebʼ li naxkʼe li Yos re xtzolbʼal li qachʼool ut li qakʼaʼuxl
5 Re xtawbʼal rusilal ebʼ li xchaqʼrabʼ li Yos, moko tzʼaqal ta rikʼin rilbʼal malaj xnawbʼal chirix. Tento tqatzol xraabʼal ut roxloqʼinkil. Li Raatin li Yos naxye: «Tzʼeqtaanahomaq li inkʼaʼ us, rahomaq ru li us» (Amós 5:15, SBG). Jun li naʼlebʼ li tooxtenqʼa aʼan xtzolbʼal chanru naril li Jehobʼa ebʼ li naʼlebʼ. Qakʼoxlaq naq chiru naabʼal qʼoqyink inkʼaʼ sa yooko chi wark. Joʼkan naq, laj bʼanonel naxye qe kʼaru tqatzaka, naq tqakawresi li qajunxaqalil ut tqajal wiibʼ oxibʼ li qabʼaanuhom. Wi naqil naq naʼusaak li qayuʼam naq naqabʼaanu li naxye qe, peʼyaal naq tqoxloqʼi laj bʼanonel ut ebʼ li naʼlebʼ li xkʼe qe?
6 Joʼkan ajwiʼ, laj Yobʼtesihom qe kixkʼe qe ebʼ li chaqʼrabʼ li nokooxkol chiru li rahilal li naxkʼam chaq li maakobʼk ut naxchaabʼilobʼresi li qayuʼam. Jun eetalil, qakʼoxlaq joʼkʼihal li rusilal naqataw naq naqapaabʼ li naxye li Santil Hu chirix li tikʼtiʼik, li bʼalaqʼik, li elqʼak, li muxuk ibʼ, li raaxiikʼ ut li xbʼaanuhom ebʼ li maaʼus aj musiqʼej (taayaabʼasi Proverbios 6:16-19; Apoc. 21:8). Naq naqil li nimla rusilal li naxkʼam chaq abʼink chiru li Jehobʼa, nakʼiik li rahok ut li oxloqʼink li naqekʼa chirix aʼan ut chirix li naʼlebʼ li naxkʼe qe.
w93 15/4 17 raqal 12
Ex saaj, kʼaru jwal wank xwankil choʼq eere?
12 Tento naq taatzol xtzʼeqtaanankil li yibʼru aj naʼlebʼ (Salmo 97:10). Chanru tatruuq xtzʼeqtaanankil li yibʼru aj naʼlebʼ li maare nakaakʼoxla naq tixkʼam chaq sahil chʼoolejil wi taabʼaanu? Wi nakaakʼoxla rix li chʼaʼajkilal li tixkʼam chaq moqon. «Meebʼalaqʼi eeribʼ: maaʼani naru naxbʼalaqʼi li Yos. Xbʼaan naq li yooq rawbʼal junaq li qas qiitzʼin aʼan ajwiʼ li tixqʼol. Li naxbʼaanu li naxrahi ru li xtibʼel tixqʼol li kamk» (Gálatas 6:7, 8). Naq tchalq junaq li aaleek kʼoxla xbʼeenwa naq taarahobʼtesi xchʼool li Jehobʼa wi taabʼaanu (Juntaqʼeeta rikʼin Salmo 78:41). Kʼoxla ajwiʼ naq maare naru tatkanaaq saʼ yuʼam malaj taataw junaq li yajel joʼ li sida. Kʼoxla ajwiʼ chanru taawekʼa aawibʼ ut naq maare taakʼoxla naq maakʼaʼ chik nakat-ok wiʼ. Joʼkan ajwiʼ, kʼoxla kʼaru li chʼaʼajkilal tixkʼam saʼ laayuʼam moqon. Jun laj paabʼanel naxye: «Linbʼeelom ut laaʼin xqamux qibʼ rikʼin jalan chik li qas qiitzʼin naq toj maajiʼ naqanaw qu. Anaqwan saʼ qabʼichal wanko joʼ aj paabʼanel, usta joʼkan li xqabʼaanu naq toj maajiʼ nokoosumlaak naxkʼam chaq chʼaʼajkilal saʼ li qasumlajik». Joʼkan ajwiʼ, jultika naq inkʼaʼ chik twanq aakʼanjel saʼ laachʼuut malaj tateʼrisi saʼ li chʼuut (1 Corintios 5:9-13). Maakʼaʼ aj e naq tqasach naabʼal, kaʼajwiʼ re xyalbʼal xsahil junpaataq.
Li tertokil pek
Chʼolchʼo chiqu naq li Raatin li Yos aʼan li yaal
2 Joʼ aj kʼanjel chiru li Jehobʼa chʼolchʼo chiqu naq aʼan li Yos tiik xchʼool ut naraj li us choʼq qe (Sal. 31:6; Is. 48:17). Chʼolchʼo chiqu naq tooruuq xkʼojobʼankil qachʼool chirix li naxye li Santil Hu xbʼaan naq naxye: «Kʼojkʼo laawaatin saʼ xbʼeen li yaal» (taayaabʼasi Salmo 119:160, SBG). Naqapaabʼ li kixye jun rehebʼ li naxtzʼil rix li Santil Hu: «Saʼ chixjunil li naxye li Yos, maakʼaʼ junaq li tikʼtiʼ chi moko napaltoʼk. Li xtenamit li Yos naru naq tixkʼojobʼ xchʼool rikʼin li naxye xbʼaan naq aʼanebʼ nekeʼxpaabʼ li Yos li kiyehok re».
30 RE DICIEMBRE TOJ 5 RE ENERO
XCHAQʼALIL RU LI RAATIN LI YOS | SALMOS 120-126
Yookebʼ chi yaabʼak naq xeʼawok, abʼan chi sahebʼ xchʼool xeʼqʼolok
Sahebʼ saʼ xchʼool li nekeʼxkʼe xloqʼal li Yos
10 Naq naqakʼulubʼa wank joʼ xtzolom li Kriist, naqakʼutbʼesi naq xikʼ naqil laj Tza. Joʼkan naq Santiago 4:7 naxye: «Kawaqex chiru li Diʼaabʼ ut aʼan t-eleliq cheeru». Yaal, aʼin moko naraj ta xyeebʼal naq moko chʼaʼaj ta xbʼaanunkil. Re kʼanjelak chiru li Yos naʼajmank naq tqayal qaqʼe (Lucas 13:24). Abʼanan, li Santil Hu naxye saʼ Salmo 126:5: «Ebʼ li yookebʼ chi yaabʼak naq nekeʼawk, teʼsahoʼq xchʼool naq teʼqʼoloq». Joʼkan, inkʼaʼ naqakʼe xloqʼal jun li Yos li inkʼaʼ naxbʼanyoxi li naqabʼaanu. Aʼan «naxqʼajkamuhebʼ li nekeʼxkʼe xchʼool chi xloqʼoninkil ru» (Hebreos 11:6).
Ma kawaq laapaabʼal?
17 Ma xkamk junaq laakomon? Re xkawresinkil laapaabʼal kʼe aahoonal chi rilbʼal li Santil Hu chirixebʼ li kristiʼaan li xeʼwaklesiik wiʼ chik chi yoʼyo. Ma qʼaxal ra saʼ laachʼool naq kiʼisiik junaq laakomon saʼ li chʼuut? Tzol xkomon laanaʼlebʼ re naq chʼolchʼooq chaawu naq li qʼusuk li naxkʼe li Yos qʼaxal us. Maakʼaʼ naxye li chʼaʼajkilal li yookat xnumsinkil, aʼin tatxtenqʼa chi xkawresinkil laapaabʼal. Te laachʼool chiru li Jehobʼa ut maanajtobʼresi aawibʼ rikʼinebʼ li hermaan (Prov. 18:1). Kʼe aachʼool chi xbʼaanunkil li xkʼanjel li Yos, ut aʼin tatxtenqʼa chi xkuybʼal ebʼ li chʼaʼajkilal, usta ra laachʼool xbʼaan li xaakʼul chaq (Sal. 126:5, 6). Maakanabʼ xik saʼebʼ li chʼutam, xkʼebʼal resil li Raatin li Yos ut rilbʼal xsaʼ li Santil Hu. Maakanabʼ xkʼoxlankil rix li chʼinaʼusil osobʼtesihom li naxyeechiʼi aawe li Jehobʼa. Naq nakaakʼe reetal chanru nakatxtenqʼa li Jehobʼa, laapaabʼal junelik yooq chi kawuuk.
w01 15/7 18, 19 raqal 13, 14
Qayalaq qaqʼe saʼ li qʼolok
13 Ebʼ laj kʼanjel chiru li Yos joʼ li nekeʼxkʼul li rahobʼtesiik nekeʼxtaw xkʼojobʼankil xchʼool saʼ li Salmo 126:5, 6, SBG: «Ebʼ li yookebʼ chi yaabʼak naq nekeʼawk, teʼsahoʼq xchʼool naq teʼqʼoloq. Naq yo chi xik laj kʼalom, kʼajoʼ naq nayaabʼak, yo xhirbʼal li xloqʼlaj iyaj; ut naq taasutqʼiiq chaq, sahaq chik saʼ xchʼool chi xkʼambʼal chaq li xqʼolom». Ebʼ li aatin li kiroksi laj salmiist chirix awok ut qʼolok, naxkʼutbʼesi chanru li Jehobʼa kixchʼolani ut kirosobʼtesi ebʼ laj Israel li kiʼelk chaq Babilonia. Usta ebʼ laj Israel jwal sahebʼ saʼ xchʼool naq xeʼelk chaq Babilonia, maare xeʼyaabʼak naq yookebʼ chi awok saʼ jun li chʼochʼ li moko awbʼil ta chiru 70 chihabʼ. Abʼanan, li inkʼaʼ xeʼxkanabʼ awk ut xeʼxkabʼla wiʼ chik li tenamit, xeʼxyal xsahil li xkʼanjelebʼ.
14 Maare tooyaabʼaq naq tqakʼul li aaleek malaj naq ebʼ li hermaan nekeʼrahobʼtesiik saʼ xkʼabʼaʼ li tiikilal (1 Pedro 3:14). Maare saʼ xtiklajik tqakʼoxla naq moko yook ta chi kʼiik li qakʼanjel. Abʼan, wi inkʼaʼ naqakanabʼ awk ut tʼaqresink, li Yos tixbʼaanu naq tkʼiiq ut t-elq chi chaabʼil (1 Corintios 3:6). Ebʼ li xkʼihal li Santil Hu ut ebʼ li tasal hu li naqajekʼi, aʼan jun eetalil naq yaal li naʼlebʼ aʼin.
Li tertokil pek
Bʼar naqatiika li xnaqʼ qu?
1 WANKO saʼ li «honal qʼaxal chʼaʼaj [...] xnumsinkil», ut yook chi numtaak li chʼaʼajkilal saʼebʼ li qakutan toj reetal naq twulaq xkutankil naq akʼaq chixjunil ut wanq chik li tzʼaqal tuqtuukilal saʼ Ruuchichʼochʼ (2 Tim. 3:1, SBG). Joʼkan naq, us naq tookʼoxlaq chirix ebʼ li patzʼom aʼin: «Bʼar naqatiika li xnaqʼ qu?», malaj, ani aj ikʼin naqasikʼ qatenqʼankil ut qabʼeresinkil? Maare inkʼaʼ nachʼaʼajkoʼk chiqu xyeebʼal: «Rikʼin li Jehobʼa». Ut aʼin tzʼaqal li xsumenkil li patzʼom.
2 Kʼaru naraj xyeebʼal xtiikankil li xnaqʼ qu rikʼin li Jehobʼa? Ut, chanru chʼolchʼooq chiqu naq aʼan naqakaʼya naq yooko xkʼebʼal qaqʼe rajlal kutan chi xnumsinkil ebʼ li chʼaʼajkilal? Ak siʼeent chihabʼ xnumik, laj tzʼiibʼahom re jun rehebʼ li Salmo kixye naq naʼajmank xkʼebʼal li xnaqʼ qu rikʼin li Jehobʼa re xsikʼbʼal qatenqʼankil saʼ xqʼehil li rahilal (taayaabʼasi Salmo 123:1-4). Kixjuntaqʼeeta aʼin rikʼin li naxbʼaanu jun li moos. Naq kixye naq li moos kaw naʼilok saʼ ruqʼ laj echal re, moko kaʼaj tawiʼ kiraj xyeebʼal naq li moos naxnaw naq tkʼeheʼq xwa ut tkoleʼq. Kiraj ajwiʼ xyeebʼal naq junelik yooq rilbʼal laj echal re, re naq tixbʼaanu li nawulak chiru ut tixsahobʼresi li xchʼool. Joʼkan ajwiʼ, aajel ru naq tqatzol xsaʼ li Raatin li Yos re xkʼebʼal reetal malaj xtawbʼal ru bʼar wank li rajom li Jehobʼa ut xbʼaanunkil li naxye. Yal chi joʼkan, li Yos tooxtenqʼa (Efes. 5:17).