Kʼaʼut numtajenaq li xikʼ ilok?

Kʼaʼut naq ebʼ li kristiʼaan inkʼaʼ naru nekeʼelk rubʼel xwankil li xikʼ ilok? Re xnawbʼal aʼin tento tqanaw kʼaru li xikʼ ilok, chanru natiklaak ut chanru naxjekʼi ribʼ.

Kʼaru li xikʼ ilok?

Aʼan naq naʼalaak saʼ laachʼool xtzʼeqtaanankil junaq li kristiʼaan malaj jun chʼuut chi kristiʼaan. Aʼin moko juntaqʼeet ta naq nakatjosqʼoʼk junpaataq rikʼin junaq li kristiʼaan.

CHANRU NATIKLAAK SAʼ XCHʼOOLEBʼ LI XIKʼ ILOK?

Jalan jalanq xyaalal, wank sut xikʼ nekeʼileʼk li kristiʼaan saʼ xkʼabʼaʼ bʼar chalenaqebʼ ut inkʼaʼ xbʼaan li xbʼaanuhomebʼ. Maare nekeʼxkʼoxla naq ebʼ li kristiʼaan aʼan yibʼru xnaʼlebʼebʼ, maaʼusebʼ xchʼool ut maakʼaʼ rusil xyuʼamebʼ. Nekeʼxkʼoxla ajwiʼ naq kubʼenaqebʼ xwankil, xuwajelebʼ ut nekeʼxkʼam chaq li chʼaʼajkilal. Wankebʼ xikʼ nekeʼilok xbʼaan naq maare xeʼrahobʼtesiik, xeʼxkʼul junaq li maaʼusilal malaj junaq chik li rahilal.

CHANRU NAXJEKʼI RIBʼ LI XIKʼ ILOK?

Wank sut, usta inkʼaʼ nekeʼxnaw ru junaq li kristiʼaan ak xikʼ nekeʼril. Jun eetalil, maare junaq li kristiʼaan timil timil t-oq xkʼulubʼankil junaq li naʼlebʼ li naxye li xjunkabʼal malaj junaq li ramiiw chirix jun chʼuut chi kristiʼaan. Ut naq naabʼalebʼ nekeʼok chi kʼoxlak chi joʼkan, saʼ junpaat naxjekʼi ribʼ li xikʼ ilok.

Naq naqataw ru chanru naxjekʼi ribʼ li xikʼ ilok, naqataw ru kʼaʼut naq naabʼalebʼ li kristiʼaan nekeʼnaʼlebʼak chi joʼkan. Abʼan re xkanabʼankil li xikʼ ilok aajel ru xnawbʼal bʼar wank li xxeʼil. Li Santil Hu naxchʼolobʼ aʼin.

LI SANTIL HU NAXCHʼOLOBʼ BʼAR WANK XXEʼIL LI XIKʼ ILOK

Li eetalil naxkʼutbʼesi li nokooxkʼam saʼ li xikʼ ilok. 1. Li bʼalaqʼil esil li nachalk saʼ li minok u, li internet, li raay ut li tele. 2. Maakʼaʼ nanawmank chirix li wanjik, li tenamit ut li paabʼal. 3. Xuwak chiru li tjalmanq, li teʼxmaqʼ chiqu ut li tkʼulmanq. 4. Li xikʼ ilok naxkʼam chaq li sikʼok u, li tzʼeqtaanank ut li raaxiikʼ.

LI XIKʼ ILOK MOKO KITIKLAAK TA RIKʼINEBʼ LI KRISTIʼAAN. Kitiklaak saʼ choxa rikʼin jun li ánjel li kixqʼet ribʼ chiru li Yos li nawbʼil ru joʼ laj Tza. Naq kixqʼet ribʼ kikanaak joʼ aj kamsinel. Ut «xbʼaan naq aj tikʼtiʼ ut xyuwaʼil li tikʼtiʼ» inkʼaʼ naxkanabʼ xkʼutbʼal li xikʼ ilok ut li raaxiikʼ (Juan 8:44; 1 Juan 3:11, 12). Li Santil Hu naxye naq yibʼru xnaʼlebʼ, maaʼus xchʼool ut numtajenaq xjosqʼil (Job 2:7; Apocalipsis 12:9, 12, 17).

JOʼ AJ MAAK XQECHANI LI XIKʼ ILOK. Laj Adán kixqʼet ajwiʼ ribʼ joʼ kixbʼaanu laj Tza, joʼkan naq laaʼo xqechani li maak (Romanos 5:12). Ut laj Caín, li xbʼeen ralal laj Adán, xikʼ kiril laj Abel usta riitzʼin kixkamsi (1 Juan 3:12). Usta yaal naq laaʼo naru nokoorahok ut nokootoqʼobʼank u, saʼ xkʼabʼaʼ naq laaʼo aj maak moko nachʼaʼajkoʼk ta chiqu xyuʼaminkil li qʼetqʼetil, li kaqalink ut li nimobʼresink ibʼ ut aʼin naxkʼam chaq li xikʼ ilok (2 Timoteo 3:1-5).

LI XIKʼ ILOK NACHALK NAQ INKʼAʼ NAQAKʼULUBʼA LI XJALANIL LI JUNCHʼOL. Li ruuchichʼochʼ naxkʼut ut naxyuʼami li maaʼusilal ut li rahobʼtesink, chixjunil aʼin naxkʼam chaq li xikʼ ilok. Saʼ xkʼabʼaʼ naq «chixjunil li ruuchichʼochʼ wank rubʼel xwankil li maaʼus» yalaq bʼar naʼilmank li tzʼeqtaanank, li hobʼok ut naq inkʼaʼ nekeʼkʼulubʼaak li jalanebʼ xwanjik (1 Juan 5:19).

Abʼan li Santil Hu moko kaʼaj tawiʼ naxye bʼar wank xxeʼil li chʼaʼajkilal, naxye ajwiʼ chanru ttuqubʼaaq ru.