CHANRU XKANABʼANKIL LI XIKʼ ILOK

4 | Kʼulubʼa Li Xtenqʼ Li Yos

Li Santil Hu naxye:

«Li naruuchin li Musiqʼej aʼan li rahok, sahil chʼoolej, tuqtuukilal, kuyuk, chaabʼilal, usilal, paabʼank, tuulanil, kuyuk ibʼ» (GÁLATAS 5:22, 23).

Kʼaru naraj xyeebʼal?

Rikʼin li xtenqʼ li Yos naru naqakanabʼ li xikʼ ilok. Li santil musiqʼej truuq qatenqʼankil re xchaabʼilobʼresinkil qanaʼlebʼ, qajunes inkʼaʼ nokooruuk xqʼaxbʼal ru li xikʼ ilok. Aajel ru naq li Jehobʼa tooxtenqʼa. Wi joʼkan tqabʼaanu, tqekʼa qibʼ joʼ li apóstol Pablo naq kixye: «Chixjunil ninkuy xnumsinkil saʼ xkʼabʼaʼ Li nakʼehok xkawubʼ inchʼool» (Filipenses 4:13). Ut tooruuq ajwiʼ xyeebʼal: «Lintenqʼankil nachalk rikʼin li Qaawaʼ» (Salmo 121:2).

Li tatruuq xbʼaanunkil:

«Junxil laaʼin jun winq aj pleet. […] Abʼan anaqwan tuulanin, xbʼaan naq li Jehobʼa kixjal linchʼool» (LAJ WALDO).

Tzʼaama re li Jehobʼa naq tixkʼe aawe li xsantil musiqʼej, re naq tchaabʼiloʼq laanaʼlebʼ (Lucas 11:13). Tzol ebʼ li naʼlebʼ, joʼ li rahok, li tuqtuukilal, li tuulanil ut li kuyuk ibʼ, re naq taaqʼax ru li xikʼ ilok. Tzʼil rix li naxye li Santil Hu chirix aʼin ut yal xyuʼaminkil. Joʼkan bʼiʼ, wanqat saʼ aamiiwil rikʼinebʼ li nekeʼxyuʼami ebʼ li naʼlebʼ aʼin, xbʼaan naq ebʼ aʼan tateʼxtenqʼa re naq chaabʼil tatnaʼlebʼaq (Hebreos 10:24).

Li xkʼulmank chaq: LAJ WALDO

Kixqʼax ru li xikʼ ilok ut li raaxiikʼ

Chʼaʼaj chaq xwanjik laj Waldo, naq yook chaq chi kʼiik. Aʼan naxye: «Junelik wankin saʼ bʼe re pleetik rikʼin li nekeʼkʼayink li bʼan li nakanobʼresink u […]. Saʼ jun kutan, jun chʼuut chi winq li xikʼ nekeʼilok we, keʼxtoj jun laj kamsinel re naq tinxkamsi. Kinxtiqʼ chi chʼiichʼ abʼan tzʼaqal kinʼelelik».

Laj Waldo inkʼaʼ kiwulak chiru naq li rixaqil kiʼok xtzolbʼal li Santil Hu rikʼinebʼ laj testiiw re li Jehobʼa. Naxye ajwiʼ: «Xikʼ nawilebʼ ut ninhobʼebʼ rikʼin tzʼaj aj aatin. Abʼan kisach inchʼool naq junelik nikineʼraatina saʼ tuulanil».

Moqon laj Waldo kiʼok ajwiʼ xtzolbʼal li Santil Hu. Aʼan naxye: «Kichʼaʼajkoʼk chiwu xyuʼaminkil li yookin xtzolbʼal. Xinkʼoxla naq maajunwa tinruuq xjalbʼal innaʼlebʼ». Abʼanan, jun li naʼlebʼ li xtzol saʼ li Santil Hu, kixjal chanru nanaʼlebʼak.

Naxye ajwiʼ: «Laj Alejandro, li naxkʼe intzolbʼal rikʼin li Santil Hu, kixye we naq tinyaabʼasi li naxye Gálatas 5:22, 23 […]. Ut kixye we naq inkʼaʼ tinkʼojobʼ inchʼool rikʼin linnaʼlebʼ rikʼin bʼan li santil musiqʼej xbʼaan naq aʼan ttenqʼanq we re naq tchaabʼiloʼq innaʼleb. Li xintzol saʼ li Santil Hu kitenqʼank we re naq tinkanabʼ li xikʼ ilok ut li raaxiikʼ».

Rikʼin li xtenqʼ li Jehobʼa, laj Waldo kiruuk xqʼaxbʼal ru li xikʼ ilok. Naxye ajwiʼ: «Ebʼ linkomon ut li xeʼwank chaq choʼq wamiiw, inkʼaʼ nekeʼxpaabʼ naq xinjal linnaʼlebʼ». Ut naxye ajwiʼ: «Junxil laaʼin jun winq aj pleet. […] Abʼan anaqwan tuulanin, xbʼaan naq li Jehobʼa kixjal linchʼool».